ပြည်တွင်းကုန်သွယ်မှုသတင်း

                     မိတ္ထီလာမြို့၊ ပေါက်ချောင်းဈေးကွက်တွင် နိုဝင်ဘာလ၌ အာဆီယမ်သပြေ များဝင်ရောက် လာကြောင်းသိရသည်။ ဘုရားပန်းဈေးကွက်တွင် သပြေပန်းကို အာဆီယမ်သပြေ၊ အောင်သပြေ၊ ကျောက်စိမ်းသပြေ၊ သပြေငုတ်တို့ရှိပြီး သပြေငုတ်တွင်လည်း ကျောက်ဆည်သပြေငုတ်၊ နေပြည်တော်သပြေငုတ်ဟူ၍လည်း ခွဲခြားရောင်းချကြပြသည်။ သပြေပန်းကို ဘုရားပန်းကပ်လှူရာ၌ ညောင်ရေးအိုး၊ အောင်အိုးများအပြင် အုန်းငှက်ပျော ကန်တော့ပွဲများတွင်လည်း ထည့်သွင်းကပ်လှူလေ့ရှိပါသည်။ ၎င်းသပြေပန်းများအနက် အာဆီယမ်သပြေမှာ အရွက်တွင် အနီရောင်အညွှန့်များဖြင့် ဝေဆာစွာပါရှိခြင်းကြောင့် အမြင်အားဖြင့် ပိုမိုလှပသည်ကိုတွေ့ရပါသည်။ မိတ္ထီလာဈေးကွက်သို့ အာဆီယမ်သပြေကိုနေပြည်တော်မှအများဆုံးဝင်ရောက်ကာပေါက်ချောင်းဈေးကတော့မြို့မဈေးနှင့်ဘဲကန်ဈေးတို့မှတဆင့်ဝယ်ယူရောင်းချကြပါသည်။ပေါက်ချောင်းဈေးကွက်သို့ အောက်တို ဘာလကုန်ပိုင်းမှ စတင်ဝင်ရောက်လာရာ တစ်စီးလျှင် (၅၀၀)ကျပ်ဖြင့် အရောင်းသွက် ကြောင်းသိရသည်။

DOCA(မန္တ‌လေး)

      ကင်းပုံပင်သည် အပူပိုင်းဒေသများတွင် ပေါက်ရောက်တတ်သော နွယ်ပင်မျိုးဖြစ်ပြီး၊ ၎င်း၏အသီးကို ဟင်းလျာအဖြစ် တွင်ကျယ်စွာ စားသုံးကြသည်။ ကင်းပုံသီးသည် အပြင်ဘက်တွင် အဖုအထစ်များ ပါရှိတတ်ပြီး အစိမ်းရောင် သို့မဟုတ် အဝါရောင်ရှိသည်။ အရသာမှာ ခါးသက် သော်လည်း မြန်မာ့ဟင်းလျာများတွင် ၎င်း၏ထူးခြားသော အရသာကြောင့် လူကြိုက်များသည်။

    ကင်းပုံသီးကို အများအားဖြင့် ကြော်ချက်ခြင်း၊ ပြုတ်၍ တို့စားခြင်း၊ သို့မဟုတ် ဟင်းချိုချက်သောက်ခြင်းဖြင့် စားသုံးကြသည်။ အရသာခါးသော်လည်း ကျန်းမာရေးအတွက် အလွန်ကောင်းမွန်သည်ဟု ယူဆကြသည်။ အသီးသာမက ကင်းပုံညွန့်များကိုပါ ပြုတ်၍ တို့စားနိုင် သလို၊ ဟင်းချိုချက်သောက်နိုင်သည်။

    ကင်းပုံသီးတွင် ကိုယ်တွင်းဇီဝဖြစ်စဉ်ကို တိုးတက်စေခြင်း၊ သွေးတွင်းသကြားဓာတ်ကို ထိန်းညှိပေးခြင်း၊ ဆီးချိုရောဂါ ကာကွယ်ခြင်းစသည့် ဆေးဖက်ဝင် အာနိသင်များ ပါရှိသည်။ ထို့ပြင် နှလုံးနှင့် အာရုံကြောစနစ်အတွက်လည်း ကောင်းမွန်သည်ဟု ဆိုကြသည်။

     ကင်းပုံသီးသည် ဈေးကွက်တွင် လွယ်လင့်တကူ ဝယ်ယူရရှိနိုင်ပြီး မြန်မာ့အစားအစာ တစ်ခုဖြစ်သည်။ ၎င်း၏ခါးသက်သောအရသာကို နှစ်သက်သူများအတွက် ထမင်းစားမြိန်စေသည့် အရံဟင်းတစ်ခွက်အဖြစ် အသုံးဝင်လှသည်။ ကင်းပုံသီးဈေးနှုန်းမှာ တစ်ပိဿာလျှင် (၀၀၀၀) ကျပ်နှုန်းခန့် ရှိကြောင်း လားရှိူးမြို့၊ မြို့မဈေးရှိ ရောင်းချသူများထံမှသိရှိရပါသည်။

DOCA(ရှမ်း)

    မြန်မာနိုင်ငံတွင် ထောပတ်သီးကို ရှမ်းပြည်နယ်၊ ကယားပြည်နယ်နှင့် ပြင်ဦးလွင်ဒေသတို့၌ အများဆုံးစိုက်ပျိုးကြပြီး ဆောင်းရာသီစာသီးနှံ တစ်မျိုးဖြစ်သည်။ ထောပတ်သီးသည် အာဟာရဓာတ် များစွာကြွယ်ဝ၍ အရသာမှာဆိမ့်ဆိမ့်လေးနှင့် စားကောင်းပြီး အမျှင်ဓာတ်များစွာ ကြွယ်ဝပါသည်။ အောက်တိုဘာလတွင် ထောပတ်သီးများစတင်ထွက်ရှိလာပြီး ယခုနိုဝင်ဘာလတွင် ထောပတ်သီးကို ‌ဈေးများထဲတွင် ပေါများစွာတွေ့မြင်နေရပြီ ဖြစ်ပါသည်။

    လားရှိုးမြို့တွင်ရောင်းချလျက်ရှိသော ထောပတ်သီးဈေးနှုန်းများမှာ ထောပတ်သီး အသေး တစ်လုံးလျှင် (၅၀၀) ကျပ်၊ အကြီးတစ်လုံးလျှင် (၁၀၀၀) ကျပ်နှုန်းဖြင့် ရောင်းချလျက်ရှိကြောင်း သိရှိရပါသည်။

DOCA(ရှမ်း)

    ဆလပ်ရွက်တွင် ဆလပ်ရွက်အနီရောင်နှင့် ဆလပ်ရွက်အစိမ်းရောင်ဟူ၍ အရောင်အနေဖြင့် နှစ်ရောင်ရှိပြီး၊ ဆလပ်ထုပ်နှင့် ဆလပ်ရွက်ပြန့်ဟူ၍ အမျိုးအစားနှစ်မျိုးရှိကြောင်း သိရှိရပါသည်။  စိုက်ပျိုးရာတွင် ပျိုးဘောင်ပြုလုပ်ပြီး မျိုးစေ့ကိုအပင်ဖောက်ကာ ၆ လက်မ (သို့) ၇ လက်မခန့်ခြား၍ စိုက်ပျိုးကြကြောင်း၊ စိုက်ပျိုးပြီး တစ်လခွဲ နှစ်လခန့်အကြာတွင် စတင်ရောင်းချနိုင်ပြီဖြစ်ကြောင်း သိရှိရပါသည်။

    လက်ကားဈေးအနေဖြင့် တစ်ပင်လျှင် (၅၀၀/- မှ ၈၀၀/-)ကျပ်နှုန်းဖြင့် ရောင်းချလျက် ရှိကြောင်း၊ ဆလပ်ရွက်ထွက်ပေါ်ချိန်တွင် ပွဲစားများမှ အခင်းထဲအရောက် လာရောက်ဝယ်ယူကြသလို၊ တောင်သူများမှလည်း ကုန်စိမ်းပွဲရုံနှင့် ဈေးများသို့ တိုက်ရိုက်တင်ပို့ ရောင်းချလျက်ရှိကြောင်း သိရှိ ရပါသည်။

      ဆလပ်ရွက် စားသုံးခြင်းဖြင့် ရောင်ရမ်းမှုကို သက်သာစေနိုင်ခြင်း၊ သွေးတွင်း အဆီကျ စေခြင်း၊ ဘက်တီးရီးယားများကိုလည်း တိုက်ဖျက်ပေးနိုင်ခြင်း၊ စိတ်ဖိစီးမှုများကို ပြေလျော့စေခြင်း၊ ကိုယ်အလေးချိန်ကို ထိန်းညှိပေးခြင်း၊ အသားအရေလှပစေခြင်း စသည့်အကျိုးကျေးဇူးများ ရရှိစေ ကြောင်း လေ့လာသိရှိရပါသည်။ ဆလပ်ရွက်ကို အသုပ်သုပ်၍စားသုံးကြသလို၊ အတို့အမြှုပ်အဖြစ် လည်းစားသုံးကြကြောင်း၊ အကင်/ Hot potများဖြင့်လည်း တွဲဖက်စားသုံး ကြကြောင်း သိရှိရပါသည်။

DOCA(ရှမ်း)

    ရှမ်းပြည်နယ်တောင်ပိုင်းတွင်စိုက်ပျိုးသောဂေါ်ရခါးသီးများသည် အရည်အသွေးကောင်း၊ အထွက်နှုန်းမြင့်မား သောသီးနှံတစ်မျိုးဖြစ်ပါသည်။ ဂေါ်ရခါးသီနှံဟာစိုက်ပျိုးရလွယ်ကူသောသီနှံဖြစ်၍ စိုက်ခင်းထိန်းသိမ်းမှုလွယ်ကူခြင်း၊ ကုန်ကျစရိတ်နည်းပါးခြင်းရှိကြောင်းသိရှိရပါသည်။ထိုသီးနှံဟာ တောင်တန်းဒေသနှင့် ကိုက်ညီသော သီနှံဖြစ်ပြီး နှစ်ပတ်လည် စီးပွားဖြစ် စိုက်ပျိုးထုတ်လုပ်နိုင်ခြင်းတို့ကြောင့် တိုးချဲ့စိုက်ပျိုးလာကြပါသည်။‌ဂေါ်ရခါးသီးနှံမှာ အသီးဈေးကွက်၊အရွက်အညွှန့်ဈေးကွက်အပေါ်မှီတည်၍ အသီးစား၊အရွက်အညွှန့်စားစိုက်ခင်းအဖြစ်ခွဲခြား စိုက်ပျိုး ကြောင်းသိရှိရပါသည်။ရှမ်းပြည်နယ်တောင်ပိုင်းသည် သဘာဝမြေဆီဩဇာ ကောင်းမွန်မှု၊ ရာသီဥတု ကောင်းမွန်မှု ကြောင့် စိုက်ပျိုးထွက်ရှိသော ဂေါ်ရခါးသီးဟာအရသာ ကောင်းမွန်ပြီး အသီးသန့်အရွယ်အစား ကောင်းမွန်မှုရှိကြောင်း တွေ့ရှိရသည်။

      အထွက်ကောင်းသောသီးနှံဖြစ်၍ ဝယ်လိုအားလည်းမြင့်မားလာမှုကြောင့် ကျယ်ပြန့်လာသော ဈေးကွက်လဲ ပိုင်ဆိုင်ထားပါသည်။စဉ်ဆက်မပြတ်ထွက်ရှိမှုနှင့်ဈေးကွက်လိုအပ်ချက်အရအချိုးညီသီးနှံဖြစ်ကြောင်း သိရှိရပါသည်။ ရှမ်းပြည်နယ်တောင်ပိုင်းထွက် ဂေါ်ရခါးသီးနှံမှာ တွက်ခြေကိုက်၍တိုးချဲ့စိုက်ပျိုးလာမှုတို့ကြောင့် စိုက်ပျိုးရေးနယ်ပယ် တွင် ဒေသထွက်အမှတ်တံဆိပ်ရ သီးနှံဖြစ်လာနိုင်ကြောင်း ခန့်မှန်းသုံးသပ်ရပါသည်။

DOCA(ရှမ်း)