ပြည်တွင်းကုန်သွယ်မှုသတင်း

        မန္တလေးပဲမျိုးစုံစျေးကွက်သို့ မန္တလေးတိုင်းဒေသကြီး၊ စစ်ကိုင်းတိုင်းဒေသကြီး၊ မကွေးတိုင်းဒေသကြီးနှင့် ရှမ်းပြည်နယ်တို့မှထွက်သည့်ပဲစင်းငုံသီးနှံများ ဝင်ရောက်လျက်ရှိကြောင်း သိရပါသည်။ ပဲစင်းငုံမှာ ပြည်တွင်းစားသုံးမှုနည်းပြီး ပြည်ပသို့တင်ပို့ရောင်းချသည့် ပဲတစ်မျိုးဖြစ်ပါသည်။ မန္တလေးတိုင်းဒေသကြီးတွင် ပဲမျိုးစုံစိုက်ပျိုးမှုများပြားပြီး၊ ၃၁.၁.၂၀၂၅ ရက်နေ့အထိ ၂၀၂၄-၂၀၂၅ ခုနှစ် ပဲစင်းငုံသီးနှံ စိုက်ပျိုးမှု(၃၈၀၀၇၇)ဧက၊ ရိတ်သိမ်း(၃၁၁၀၀၇)ဧက၊ အထွက်နှုန်း (၉.၃၃)တင်း နှင့်အထွက် (၂၉၀၁၃၃၃)တင်းဖြစ်ကြောင်း သိရပါတယ်။ မန္တလေးပွဲစား၊ကုန်သည်၊ စက်ပိုင်များမဟာကထိန်တော် အသင်းတွင် ၂၀၂၅ ခုနှစ်ဒီဇင်ဘာလဒုတိယပတ်အတွင်း ဖြစ်ပေါ်လျက်ရှိသောပေါက်စျေးမှာ ၃တင်း ဝင်တစ်အိတ်လျှင်ပဲစင်းငုံ(နီ) ၂၃၉၀၀၀ကျပ်၊ ပဲစင်းငုံ(ဖြူ)၂၁၀၀၀၀ကျပ်နှင့်၂၁၅၀၀၀ကျပ်၊ တစ်ပိဿာ ပေါက်စျေးမှာ ပဲစင်းငုံ (နီ) ၃၉၈၃ကျပ်၊ ပဲစင်းငုံ(ဖြူ)၃၅၀၀ကျပ်နှင့် ၃၅၈၃ကျပ်တို့ဖြစ်ကြောင်း သိရှိရပါသည်။ ယခင်နှစ်ကာလတူပေါက်စျေးမှာ ၃တင်းဝင်တစ်အိတ်လျှင် ပဲစင်းငုံ(နီ) ၄၆၀၀၀၀ ကျပ်၊ တစ်ပိဿာစျေးမှာပဲစင်းငုံ(နီ)၇၆၆၇ကျပ်ပြီး၊ ယခင်နှစ်စျေးနှင့်ယခုနှစ်နှိုင်းယှဉ်ပါက ပဲစင်းငုံသီးနှံပေါက်စျေးမှာ လျော့နည်းသွားကြောင်း တွေ့ရှိရပါသည်။

DOCA(မန္တလေး)

        ပဲကြီးသီးနှံမှာ ပြည်တွင်း၌ စားသုံးမှုပမာဏများပြားပြီး၊ စျေးကွက်အတွင်း အရောင်းသွက်လျက်ရှိကြောင်း သိရပါသည်။ မန္တလေးတိုင်းဒေသကြီးအတွင်း ၂၀၂၄-၂၀၂၅ခုနှစ်တွင် ပဲကြီးသီးနှံအပါအဝင် ပဲမျိုးစုံစိုက်ပျိုးမှု(၁၀၁၉၄၇၇)ဧကဖြစ်ကြောင်း သိရပါသည်။  မန္တလေးပွဲစား၊ကုန်သည်၊ စက်ပိုင်များမဟာကထိန်တော်အသင်းတွင် ၂၀၂၅ခုနှစ်ဒီဇင်ဘာလဒုတိယပတ်အတွင်း ဖြစ်ပေါ်လျက်ရှိသော စျေးမှာ ၃တင်းဝင်တစ်အိတ်လျှင် ပဲကြီး(ကြီး)၆၃၀၀၀၀ကျပ်နှင့် ၆၅၀၀၀၀ကျပ်၊ ပဲကြီး(လတ်) ၅၅၀၀၀၀ကျပ်နှင့် ၅၇၀၀၀၀ ကျပ်၊ပဲကြီး(သေး)၄၈၀၀၀၀ကျပ်နှင့်၅၀၀၀၀၀ကျပ်၊ တစ်ပိဿာစျေးမှာ ပဲကြီး(ကြီး) ၁၁၄၀၃ကျပ်နှင့် ၁၁၇၆၅ ကျပ်၊ ပဲကြီး (လတ်)၉၉၅၅ကျပ်နှင့်၁၀၃၁၇ကျပ်၊ ပဲကြီး (သေး) ၈၆၈၈ ကျပ်နှင့် ၉၀၅၀ကျပ်ဖြစ်ပြီး၊ ယခင်နှစ် ကာလတူတစ်ပိဿာစျေးမှာ ပဲကြီး(ကြီး) ၅၂၄၉ကျပ် နှင့် ၅၄၃၀ကျပ်၊ပဲကြီး(လတ်) ၄၅၂၅ကျပ်နှင့်၄၇၀၆ကျပ်၊ပဲကြီး(သေး)၄၂၅၃ကျပ် တို့ဖြစ်ကြောင်း သိရှိရပါသည်။ ယခုနှစ်နှင့် ယခင်နှစ် ကာလတူပေါက်စျေးနှိုင်းယှဉ်ပါက ပဲကြီးစျေးမှာ ပိုမိုရရှိကြောင်း သိရှိရပါသည်။

DOCA(မန္တလေး)

               ကုန်စိမ်းစျေးကွက်သို့မန္တလေးတိုင်းဒေသကြီးရှိအမရပူရခရိုင်၊ပြင်ဦးလွင်ခရိုင်၊ ကျောက်ဆည် ခရိုင်နှင့်မိတ္တီလာခရိုင်တို့မှ ထွက်သည့်ကုန်စိမ်းများ၊ စစ်ကိုင်းတိုင်းဒေသကြီးနှင့် ရှမ်းပြည်နယ်တို့မှ ထွက်သည့်ပန်းငရုတ်ပွနှင့်ငရုတ်သီးစိမ်းများ ဝင်ရောက်လျက်ရှိပြီး၊ အရောင်းသွက်လျက်ရှိကြောင်း  သိရှိရပါသည်။စျေးကွက်အတွင်း ပန်းငရုတ်ပွများကို အစိမ်းရောင်၊အဝါရောင်၊အနီရောင်နှင့်လိမေ္မာ် ရောင်တို့တွေ့ရှိရပြီး၊အလေးချိန်ဖြင့်ရောင်းချခြင်းနှင့်အလုံးအရွယ်အစားအလိုက် ရောင်းချခြင်းဟူ၍ နှစ်မျိုး တွေ့ရှိရပါသည်။ မန္တလေးမြို့၊သီရိမာလာစျေးနှင့်၄၁လမ်းစျေးရှိ ကုန်စိမ်းစျေးကွက်တွင် ၂၀၂၅ ခုနှစ်နိုဝင်ဘာလနောက်ဆုံးပတ်အတွင်း ဖြစ်ပေါ်သည့်ငရုတ်သီးပွစျေးနှုန်းများမှာ  ၁ပိဿာလျှင် လက္ကားစျေး ၆၀၀၀ကျပ်နှင့် ၇၀၀၀ ကျပ်၊လက်လီစျေး  ၈၀၀၀ ကျပ်နှင့် ၉၀၀၀ကျပ်၊ ပန်းငရုတ်ပွ တစ်ခုချင်းစျေးအနေဖြင့် ၃၀၀ ကျပ်နှင့် ၅၀၀ ကျပ်စျေးတို့ဖြင့်ရောင်းချလျက်ရှိကြောင်း သိရှိရပါ သည်။  သီရိမာလာစျေးအတွင်း နေ့စဉ် ကုန်စိမ်းသီးနှံဝင်ရောက်မှုမှာ ကုန်စည်အမျိုးအစားအလိုက် Canter ၁၂ဘီးနှင့်၆ဘီး) ယာဉ်(၄၀) စီးနှင့်(၆၀)စီးအကြားဝင်ရောက်လျက် ရှိကြောင်း သိရှိရပါသည်။

 DOCA  (မန္တလေး)

     ငါန်းဇွန်မြို့နယ် မြစ်ကမ်းဘေးကျေးရွာများသည် ဆောင်းပဲတီစိမ်း၊ စွန်တာပြာ၊ ပဲပုတ်နှင့် ပဲလွမ်းများကို သီတင်းကျွတ်လတွင် စတင်စိုက်ပျိုးခဲ့ကြသည်။ ဆောင်းပဲတီစိမ်းအနေဖြင့် ယခုနှစ်တွင် လျာထားဧက(၁၈၀၀) ရှိပြီး ဒီဇင်ဘာလဆန်းထိ စိုက်ပျိုးပြီးစီးမှုမှာ (၁၃၁၂)ဧက ရှိကြောင်း သိရသည်။ ယခင်နှစ် လျာထားဧက(၁၈၀၀)ဧက၊ စိုက်ပျိုးဧက (၁၃၀၇)၊ အထွက်နှုန်းမှာ (၁၂.၈၅)တင်းနှင့် အထွက် တင်းပေါင်း (၁၆၇၉၅)တင်းရှိခဲ့ကြောင်း သိရသည်။ စိုက်ပျိုးသောမျိုးများမှာ ရေဆင်း-၁၄နှင့် ရေဆင်း-၁၁ မျိုးများကိုသာ အဓိကစိုက်ပျိုးကြောင်း၊ ဆောင်းပဲတီစိမ်းကို မိုးစပါးရိတ်သိမ်းပြီး ယာခင်းများတွင် ပြန်လည်စိုက်ပျိုးကြောင်းသိရသည်။ ယခင်နှစ် ပေါ်ဦးပေါ်စအချိန် ပဲတီစိမ်းတစ်ပိဿာ ဈေးနှုန်းမှာ(၃၀၀၀/၃၂၀၀)ကျပ်ရှိပြီး စိုက်ပျိုးမှု များသော ကျေးရွာများမှာ ဘုရားထူး၊ ရွာသစ်၊ ကုလားရွာ၊ ကျောက်တလုံး၊ သာစည်စသည့်တို့ဖြစ်ပြီး ရောင်းချမှုအနေဖြင့် မန္တလေးမြို့သို့ တင်ပို့ရောင်းချကြောင်း သိရသည်။

          ဆောင်းစွန်တာပြာပဲကို ၂၀၂၅-၂၀၂၆ ခုနှစ်တွင် လျာထား ဧက(၄၀၀၅) ရှိပြီး ဒီဇင်ဘာလဆန်းထိ စိုက်ပျိုးပြီးစီးမှုမှာ (၃၀၅၈)ဧက ရှိကြောင်းသိရသည်။ ယခင်နှစ် လျာထားဧက (၄၀၀၀)ဧက၊ စိုက်ပျိုးဧက (၃၆၁၂)၊ အထွက်နှုန်းမှာ(၁၃.၀၀)တင်းနှင့် အထွက်တင်းပေါင်း (၄၆၉၅၆)တင်းရှိခဲ့ကြောင်း သိရသည်။ စိုက်ပျိုးသောမျိုးများမှာ မုံရွာအထွက် တိုးနီ မျိုးကိုသာ အဓိကစိုက်ပျိုးကြောင်း၊ ပေါ်ဦးပေါ်စအချိန် စွန်တာပြာတစ်ပိဿာဈေးနှုန်းမှာ (၃၇၀၀/၃၈၀၀)ကျပ်ရှိကြောင်း၊  စိုက်ပျိုးမှုများသော ကျေးရွာများမှာ သားကျင်၊ ရေလည်သောင်၊ ကုလားရွာ၊မြောက်ကျွန်း၊ ထနောင်းပင်၊ အောက်ရိုး၊ ကံဘိုစသည့် ရွာများဖြစ်ကြောင်းသိရသည်။ စွန်တာပြာပဲကို ကျေးရွာသူကျေးရွာသားများသည် ပဲပါမှ ဟင်းဖြစ်သောကြောင့် နှစ်ပေါက်စာ စားသုံးရန်ချန်ထားပြီးမှသာ ရောင်းချကြောင်း၊ စွန်တာပြာစိုက်ပျိုးမှုအနေဖြင့် နွားစာအတွက်လည်း ဖူလုံမှုရှိကြောင်း၊ ရောင်းချမှုအနေဖြင့် မန္တလေးမြို့သို့ တင်ပို့ရောင်းချကြောင်း သိရသည်။

          ဆောင်းပဲပုတ်ကို ၂၀၂၅-၂၀၂၆ ခုနှစ်တွင် လျာထားဧက (၁၅၆၀) ရှိပြီး ဒီဇင်ဘာလဆန်းထိ စိုက်ပျိုးပြီးစီးမှုမှာ (၁၂၇၆)ဧက ရှိကြောင်း သိရသည်။ ယခင်နှစ် လျာထားဧက (၁၅၅၀)ဧက၊ စိုက်ပျိုးဧက (၁၂၇၉)၊ အထွက်နှုန်းမှာ(၁၂.၉၀)တင်းနှင့် အထွက်တင်းပေါင်း (၁၆၄၉၉) တင်းရှိကြောင်း သိရသည်။ စိုက်ပျိုးသောမျိုးများမှာ ရေဆင်း-၈ မျိုးကိုသာ အဓိကစိုက်ပျိုးကြောင်း၊ ယခင်နှစ် ပဲပုတ်ဈေးနှုန်းမှာ တစ်ပိဿာလျှင် (၃၅၀၀/၃၆၀၀) ကျပ်ရှိပြီး၊ စိုက်ပျိုးမှုများသော ကျေးရွာ များမှာ သားကျင်၊ ရေလည်သောင်၊ ကုလားရွာ၊ မြောက်ကျွန်း၊ ထနောင်းပင်၊ အောက်ရိုး၊ ကံဘို စသည့် တို့ဖြစ်ပြီး ရောင်းချမှုအနေဖြင့် မန္တလေးမြို့သို့ တင်ပို့ရောင်းချကြောင်း သိရသည်။

          ဆောင်းပဲလွမ်းကို ၂၀၂၅-၂၀၂၆ ခုနှစ်တွင် လျာထားဧက(၃၆၄၀) ရှိပြီး ဒီဇင်ဘာလဆန်းထိ စိုက်ပျိုးပြီးစီးမှုမှာ (၁၉၀၁)ဧက ရှိကြောင်း သိရသည်။ ယခင်နှစ် လျာထား ဧက(၃၆၄၀)ဧက၊ စိုက်ပျိုးဧက (၂၁၂၇)၊ အထွက်နှုန်းမှာ(၁၀.၅၀)တင်းနှင့် အထွက်တင်းပေါင်း (၂၂၃၃၄) တင်းရှိကြောင်း သိရသည်။ စိုက်ပျိုးသောမျိုးများမှာ ထွက်တိုးဖြူ မျိုးကိုသာ အဓိက စိုက်ပျိုးကြောင်း၊ မြစ်ကမ်းဘေးကျေးရွာများအပြင် မိုးကောင်းရေသောက်ကုန်းမြေများ တွင်လည်း စိုက်ပျိုးကြောင်း၊ ပဲလွမ်းကို စားသုံးမှုအနေဖြင့် စိုက်ပျိုးကြခြင်း၊ အချို့က စီးပွားဖြစ် အများဆုံးစိုက်ပျိုးကြောင်း၊ ယခင်နှစ် ပဲလွမ်းဈေးနှုန်းမှာ တစ်ပိဿာလျှင် (၃၈၀၀/၄၀၀၀)ကျပ်ရှိပြီး စိုက်ပျိုးမှုများသော ကျေးရွာများမှာ မြစ်ရိုးတစ်လျှောက်ကျေးရွာများဖြစ်သည့် သားကျင်၊ ရေလည်သောင်၊ ကုလားရွာ၊ မြောက်ကျွန်း၊ ထနောင်းပင်၊ အောက်ရိုး၊ ကံဘို၊ ဆူးဖြူကုန်း၊ သံကုန်း၊ တောင်ကုန်း စသည်တို့ဖြစ်ပြီး၊ ရောင်းချမှုအနေဖြင့် မန္တလေးမြို့၊ တံတားဦးမြို့များသို့ တင်ပို့ရောင်းချကြောင်း သိရသည်။

DOCA(မန္တလေး)

      မြင်းခြံခရိုင် ကုန်စည်ဒိုင်(MDCCI)၌ နေ့စဉ် လယ်ယာထွက်ကုန် ပဲမျိုးစုံအရောင်းအဝယ် ဖြစ်ပေါ်လျက်ရှိသည့်အနက် ပဲလွမ်းပြာ  ပဲများကိုလည်း အရောင်းအဝယ် ဖြစ်လျက်ရှိကြောင်း သိရှိရ သည်။ ယခု၂၀၂၅ ခုနှစ်၊ ဒီဇင်ဘာလ၌ ပဲလွမ်းပြာ တစ်တင်းလျှင် (၈၂၀၀၀) ကျပ်ခန့် ပေါက်ဈေး များဖြင့်အရောင်းအဝယ်ဖြစ်လျက်ရှိကြောင်း၊  ယခင်လ နိုဝင်ဘာလတွင် ပဲလွမ်းပြာ တစ်တင်းလျှင် (၆၃၀၀၀) ကျပ်ခန့်ပေါက်ဈေးများဖြင့် အရောင်းအဝယ်ဖြစ်ခဲ့ကြောင်း၊ ယခင်လနှင့် နှိုင်းယှဉ်ပါက ယခုလတွင် ပဲလွမ်းပြာတစ်တင်းလျှင် (၁၉၀၀၀) ကျပ်ခန့် ဈေးနှုန်းမြင့်တက်ခဲ့ကြောင်း၊ ပွဲရုံများ တွင်နေ့စဉ် အရောင်းအဝယ်ဖြစ်မှုအနေဖြင့်  (၁၀၀-၁၅၀) အိတ်ခန့် အရောင်းအဝယ် ဖြစ်လျက်ရှိ ကြောင်း၊ ပဲလွန်းပြာပဲများကို ဒေသတွင်းစားသုံးကြသလို တင်ပို့မှုအနေဖြင့် ရန်ကုန်တိုင်းဒေသကြီး လှိုင်သာယာမြို့နှင့် ရွှေပြည်သာမြို့ ရှိပွဲရုံများသို့ တင်ပို့ရောင်းချကြောင်း ပဲပွဲရုံများ၏ ပြောပြချက်အရ သိရှိရသည်။

DOCA(မန္တလေး)