မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၊ မြေနုကျွန်းကျေးရွာသည် စိုက်ပျိုးရေးကို အဓိကလုပ်ကိုင်ပြီး မတ်ပဲ၊ ကုလားပဲ၊ နေကြာ၊ ဝါ၊ မြေပဲ၊ ပဲထောပတ်နှင့် စားဖိုဆောင် သီးနှံများကို ရာသီအလိုက်စိုက်ပျိုးလျက်ရှိရာ ဆောင်းသီးနှံတစ်မျိုးဖြစ်သည့် မတ်ပဲကို ၂၀၂၅ခုနှစ်၊ အောက်တိုဘာလ(စတုတ္ထပတ်)မှစတင်၍ တောင်သူ(၆၀)ဦးမှ စိုက်ဧက(၁၅၀)ခန့်စိုက်ပျိုးခဲ့ကြောင်း သိရသည်။
မြေနုကျွန်းကျေးရွာနေ တောင်သူတစ်ဦးက ၎င်းအနေဖြင့် မတ်ပဲကို(၁)ဧကခန့် စိုက်ပျိုးထား ကြောင်း၊ မျိုးအနေဖြင့် ယခင်နှစ်ကစိုက်ခင်းမှ စိုက်ပျိုးထွက်ရှိသည့် မတ်ပဲစေ့များကို မျိုးအဖြစ်ဖယ်ချန် ၍ စိုက်ပျိုးခြင်းဖြစ်ကြောင်း၊ (၁)ဧကလျှင် မျိုး(၃)ပြည်ခန့်ကုန်ကျပြီး ထွန်ကြောင်းဆွဲအစေ့ချစနစ်ဖြင့် စိုက်ပျိုးခြင်းဖြစ်ကြောင်း၊ စိုက်ပျိုးပြီး (၃)လခွဲခန့်အကြာတွင် ရိတ်သိမ်းရကြောင်း၊ စိုက်ပျိုးကုန်ကျ စရိတ်အနေဖြင့် လုပ်အားခ၊ မြေပြုပြင်ခနှင့် အခြားသွင်းအားစု စရိတ်အပါအဝင် စုစုပေါင်းကျပ်(၃)သိန်း ခန့် ကုန်ကျကြောင်း သိရသည်။
ယခင်နှစ်က ကုန်ကျစရိတ်အနေဖြင့် စိုက်ပျိုးခနှင့် ရိတ်သိမ်းခအပါအဝင် စုစုပေါင်း ကျပ်(၃)သိန်း ခွဲခန့်ကုန်ကျကြောင်း၊ အထွက်နှုန်းအနေဖြင့် (၁)ဧကလျှင် (၁၅)တင်းထိထွက်ရှိပြီး (၁)တင်းလျှင် ကျပ် (၈၀၀၀၀)ခန့်ရရှိကာ အကျိုးအမြတ်အနေဖြင့် ကျပ်(၈)သိန်းခွဲခန့်ရရှိကြောင်း၊ ဈေးကွက်အနေဖြင့် မင်းလှမြို့နှင့် မင်းဘူးမြို့ရှိ ပွဲရုံများသို့ တင်ပို့ရောင်းချခဲ့ကြောင်း သိရသည်။
ယခုအချိန်တွင် မြေနုကျွန်းကျေးရွာ၌ မတ်ပဲစိုက်ခင်းများ အောင်မြင်ဖြစ်ထွန်းလျက်ရှိပြီး ၂၀၂၆ ခုနှစ်၊ ဇန်နဝါရီလ(တတိယပတ်)တွင် မင်းလှမြို့ပွဲရုံများ၌ မတ်ပဲ(အဟောင်း) (၁)တင်းလျှင် ကျပ် (၇၈၀၀၀)ဖြင့် အရောင်းအဝယ်ဖြစ်လျက်ရှိကြောင်း သိရှိရသည်။
DOCA(မကွေး)