ပြည်တွင်းကုန်သွယ်မှုသတင်း

     မန္တလေးတိုင်းဒေသကြီး သာစည်မြို့နယ်တွင် သင်္ဘောသီးကိုနှစ်စဉ်စိုက်ပျိုးရာ ယခုနှစ် မေလမှ စတင်စိုက်ပျိုးခဲ့ပြီး မိုးရာသီတွင် မိုးအချိုးအစား လုံလောက်ခြင်းကြောင့် နိုဝင်ဘာလအတွင်း အသီးအထွက်ကောင်းမွန်နေပြီး ဈေးနှုန်းတဖြည်းဖြည်းမြင့်တက်နေကြောင်း ဒေသစိုက်ပျိုးသူများထံ သိရှိရပါသည်။ သင်္ဘောသီး ဈေးကွက်အခြေအနေအရ အလုံးအကြီး/ အသေးပေါ်မူတည်၍ တစ်လုံးလျှင် (၁၅၀၀-၂၀၀၀) ကျပ်ခန့်ရှိပြီး တစ်ဧကလျှင် တစ်ပတ် ပျှမ်းမျှအသီး  အလုံးရေ(၁၀၀-၁၅၀) ခန့်ရှိပြီး၊ ဈေးကွက်နှင့် ရောင်းဝယ်မှုအနေဖြင့် ပွဲစားများမှ အခင်းအရောက်လာရောက်ဝယ်ယူကြသလို သာစည်၊ မိတ္ထီလာ၊ မန္တလေးမြို့ပေါ်သို့ သွားရောက်ရောင်းချသူများလည်းရှိကြောင်း သင်္ဘောစိုက်တောင်သူများထံမှ သိရှိရပါသည်။ သာစည်မြို့နယ်၌ သင်္ဘောပင်စိုက်တောင်သူများအနေဖြင့် အကျိုးအမြတ်ရရှိသော သင်္ဘောကို နှစ်စဉ်ပုံမှန်စိုက်ပျိုးလျက်ရှိကြောင်း သိရှိရပါသည်။

DOCA(မန္တလေး)

      မြင်းခြံမြို့နယ်၌ ပဲကြားဆောင်းသီးနှံကို အောက်တိုဘာလနှင့် နိုဝင်ဘာလတို့တွင် စတင် စိုက်ပျိုး၍ စိုက်ပျိုးပြီး ၄ လခန့်အကြာ ဖေဖော်ဝါရီလနှင့် မတ်လတို့တွင် ရိတ်သိမ်းရကြောင်း၊ ၂၀၂၅/၂၀၂၆ခုနှစ်တွင် ပဲကျားဆောင်းသီးနှံ စီမံကိန်းဧက(၂၃၀၀)လျာထား ဧကအနက် စိုက်ပျိုး ပြီးဧက (၁၀၀၀)ဧက စိုက်ပျိုးထားကြောင်း၊ စိုက်ပျိုးရန်ကျန်ရှိသော ဧကများအား လျာထား ချက်ပြည့်မီအောင် ဆက်လက်စိုက်ပျိုးမည်ဖြစ်ကြောင်း၊ မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများအရ သိရှိရသည်။ ပဲကြား(ဆောင်း)သီးနှံကို ဒါးကျွန်းကျေးရွာ၊ နတ်ညွှန်းကျေးရွာ၊ အနိမ့်ရွာ၊ ဖိုးတုတ်ဖြူရွာနှင့် ကွမ်းစိုက်ရွာများတွင်စိုက်ပျိုးထားကြောင်း၊ ထွန်ကြောင်းဆွဲ အစေ့ချစနစ်ဖြင့် အတန်းလိုက် စိုက်ပျိုးကြကြောင်း၊ မျိုး၊ သွင်းအာစု၊ လုပ်သားခအပါအဝင် တစ်ဧကလျှင် (၄၅၀၀၀၀) ကျပ်ခန့် ကုန်ကျကြောင်း၊ ယခင်နှစ်တစ်ဧက အထွက်နှုန်းအနေဖြင့် (၉-၁၀) တင်းခန့်ထွက် ရှိခဲ့ကြောင်း၊  ယခင်နှစ်ထွက်ပေါ်ချိန်ပေါ်ချိန်တွင် ပဲကြားတစ်တင်းလျှင် (၁၃၃၀၀၀) ကျပ် ဝန်းကျင်ရှိခဲ့ကြောင်း၊ ယခုနှစ်တွင်လည်း ပဲကြား(ဆောင်း)သီးနှံကို ရာသီဥတု၊ အပင်ပြုစုမှု၊ သွင်းအားစုများနှင့် အချိန်မှန်ရေတင်ပေးပါက ယခင်နှစ်ထက် အထွက်နှုန်းကောင်း နိုင်မည်ဖြစ်ကြောင်း တောင်သူတစ်ဦး၏ ပြောပြချက်အရ သိရှိရပါသည်။

DOCA(မန္တလေး)

         တောင်သာမြို့နယ်ရှိ မိုးကောင်းသောက် ဧရိယာများတွင် ပဲမျိုးစုံ၊ နှမ်း၊ မြေပဲ၊ ပြောင်းနှင့် ကြက်သွန်နီသီးနှံများစိုက်ပျိုးလျက်ရှိရာ ဖူးစားပြောင်း(မိုး)များကိုလည်း စိုက်ပျိုးထားကြောင်း သိရှိရသည်။ ဖူးစားပြောင်း(မိုး)သီးနှံကို ဇူလိုင်လ၊ ဩဂုတ်လနှင့် စက်တင်ဘာလတို့တွင် စတင် စိုက်ပျိုးပြီး၊ နိုဝင်ဘာလနှင့် ဒီဇင်ဘာလတို့၌ ရိတ်သိမ်းထွက်ပေါ် မည်ဖြစ်ကြောင်း၊ ၂၀၂၅-၂၀၂၆ ခုနှစ်၊ ဖူးစားပြောင်း(မိုး) သီးနှံကို စီးမံကိန်းဖြင့် (၄၉၅)လျာထားဧကတွင် စိုက်ပျိုးပြီး ဧက(၁၃၆၃) ဧကစိုက်ပျိုးထားကြောင်း၊ လျားထားချက်ထက်(၈၆၈)ဧက ကျော်ပိုမိုစိုက်ပျိုး ထားကြောင်း၊ ကျောက်ဖူးရွာ၊ ချောင်းဆုံရွာ၊ ခါးတက်ကုန်းရွာနှင့် ထန်းပင်ကန်ရွာများတွင် စိုက်ပျိုးထားကြောင်း၊ ယခင်နှစ်တစ်ဧက အထွက်နှုန်းအနေဖြင့် ပြောင်းဖူး (၈၀၀၈၂၅၀) ဖူးထွက်ရှိကြောင်း၊ ရာသီဥတုနှင့် မြေအမျိုးအစား၊ စိုက်နည်းစနစ်၊ သွင်းအားစုနှင့် အပင်ပြုစုမှုကောင်းမွန်ပါက အထွက်နှုန်းကောင်းနိုင်မည်ဖြစ်ကြောင်း ဖူးစားပြောင်း စိုက်တောင်သူတစ်ဦး၏ ပြောပြချက်အရ သိရှိရပါသည်။

DOCA(မန္တလေး)

         တောင်သာမြို့နယ်တွင် ပြည်တွင်းစားသုံးဆီဖူလုံစေရေးနှင့် ပိုလျှံရေးအတွက် အရေးကြီးသီးနှံတစ်မျိုးဖြစ်သည့် မိုးနေကြာများစိုက်ပျိုးထားရှိရာ အောင်မြင်ဖြစ်ထွန်းလျက်ရှိကြောင်း သိရှိရသည်။ နေကြာ(မိုး)သီးနှံအား ဩဂုတ်လ၊ စက်တင်ဘာလနှင့် အောက်တိုဘာလတို့တွင် စတင်စိုက်ပျိုးပြီး ဇန်နဝါရီလ၊ ဖေဖော်ဝါရီလနှင့် မတ်လတို့တွင် ရိတ်သိမ်းထွက် ပေါ်မည်ဖြစ်ကြောင်း၊ စိုက်ပျိုးချိန်မှ ရိတ်သိမ်းချိန်အထိ (၄)လခန့်ကြာမြင့်ကြောင်းသိရှိရသည်။  ၂၀၂၅/၂၀၂၆ ခုနှစ်၊ နေကြာ(မိုး)ကို တစ်မြို့နယ်လုံးအနေဖြင့် စီမံကိန်းလျာထားဧက (၄၇၅)ဧက ရှိသည့်အနက် စိုက်ဧက (၅၀၂) ဧက စိုက်ပျိုးထားပြီးဖြစ်ကြောင်း၊ စီမံကိန်းလျာထားဧကထက် (၂၇)ဧကကျော် ပိုမိုစိုက်ပျိုးထားကြောင်း၊  မြို့နယ်ကြေးတိုင်နှင့် မြေစာရင်း ဦးစီးဌာန၏စာရင်းများ အရသိရှိရသည်။ ယခင်နှစ်တစ်ဧက အထွက်နှုန်းအနေဖြင့်(၂၃)တင်းခန့်ထွက်ရှိခဲ့ကြောင်း၊ ယခင်နှစ်ထွက်ပေါ်ချိန်တွင် ဆီနေကြာတစ် ပိဿာလျှင် (၆၅၀၀)ကျပ်ခန့် ပေါက်ဈေးများရှိခဲ့ကြောင်း၊ နေကြာ(မိုး)သီးနှံကို ကျွဲဇင်းရွာ၊ ခါးတက်ကုန်းရွာ၊ ငါးပင်စင်ရွာ၊ ဆည်ကုန်းရွာနှင့် ဆုံးကုန်းရွာ တို့တွင်စိုက်ပျိုးထားရှိကြောင်း၊ တောင်သူများအနေဖြင့် ဆင်းရွှေကြာ-၂နှင့် ရေဆင်းစပ်မျိုး-၁ နေကြာမျိုးကို အဓိကစိုက်ပျိုးကြကြောင်း၊ စိုက်နည်းစနစ်၊ အပင်ပြုမှု၊ သွင်းအားစုနှင့် ရာသီဥတုကောင်းပါက အထွက်နှုန်းကောင်းနိုင်ကြောင်း နေကြာစိုက်တောင်သူများထံမှ သိရှိရပါသည်။

DOCA(မန္တလေး)

              အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ နိုဝင်ဘာလ(၁၂)ရက်နေ့မှ နိုဝင်ဘာလ(၁၈)ရက်အတွင်း ညောင်တုန်း၊ မှော်ဘီ၊သာရဝေါ၊ ညောင်နှစ်ပင်ကျေးရွာ၊ ကြာကန်စု ကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါသည်။ ထိုသို့ဝင်ရောက် ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ်(ပိဿာ)ကျပ် ၁၈၀၀ မှ ၂၅၀၀ အတွင်း၊ ဂေါ်ဖီထုပ်(တစ်ထုပ်)ကျပ် ၁၀၀၀ မှ ၂၀၀၀ အတွင်း၊ ပန်းဂေါ်ဖီ(ထုပ်)ကျပ် ၁၀၀၀ မှ ၂၀၀၀ အတွင်း၊ အာလူး(ပိဿာ)ကျပ် ၆၀၀၀ မှ ၇၀၀၀ အတွင်း၊ မုန့်လာဉနီ(ပိဿာ) ကျပ် ၁၀၀၀၀ မှ ၁၃၀၀၀ အတွင်း ရွှေဖရုံသီး(လုံး)ကျပ် ၁၅၀၀ မှ ၂၀၀၀ အတွင်း၊ ဗူးသီး(လုံး) ကျပ် ၃၀၀၀ မှ ၄၀၀၀ အတွင်း၊ မုန်ညှင်း(ထုပ်)(ပိဿာ)ကျပ် ၂၅၀၀ မှ ၅၀၀၀ အတွင်း၊ ကြက်သွန်နီ(ဆိပ်ဖြူ)ကျပ် ၁၁၀၀ မှ ၁၆၀၀ အတွင်း၊ ကြက်သွန်ဖြူ(ရှမ်း)(ပိဿာ)ကျပ် ၅၀၀၀ မှ ၇၀၀၀ အတွင်း၊ ကြက်သွန်ဖြူ (ကြူကုတ်) (ပိဿာ) ကျပ် ၁၃၀၀၀ မှ ၁၃၅၀၀ အတွင်း၊ ချင်း(ပိဿာ)ကျပ် ၃၀၀၀ မှ ၅၀၀၀ အတွင်း၊ ဆလပ်ရွက် (စီး) ကျပ် ၃၀၀ မှ ၅၀၀ အတွင်း၊ ချဉ်ပေါင်ရွက်(စီး) ကျပ် ၁၅၀ မှ ၂၅၀ အတွင်း၊ ခရမ်းသီး  (ရှည်) (ပိဿာ)ကျပ် ၁၅၀၀ မှ ၂၅၀၀ အတွင်း၊ သံပရာသီး(လုံး)ကျပ် ၅၀ မှ ၁၅၀ အတွင်း၊ ငရုတ်သီးစိမ်း (ကျောက်စိမ်း) (ပိဿာ)ကျပ် ၃၀၀၀ မှ ၄၀၀၀ အတွင်း၊ ဖရဲသီး (အကြီး၊ အလတ်၊ အသေး)ကျပ် ၁၅၀၀ မှ ၆၀၀၀ အတွင်းဖြစ်ကြောင်း သိရှိရပါသည်။ တညင်းကုန်းလက်ကားဈေးကြီး အတွင်းသို့ ယခုရက် သတ္တပတ်အတွင်း သံပုရာသီးအလုံးပေါင်း (1620500)ကျော်၊ ခရမ်းသီး(ရှည်) (ပိဿာ) (73790) ကျော်၊ ဗူးသီးအလုံးပေါင်း (25220)ကျော်၊ ရွှေဖရုံသီးအလုံးပေါင်း(14383)ကျော်၊ ဂေါ်ဖီထုပ်ပေါင်း (233450)ကျော်၊ ပန်းဂေါ်ဖီထုပ်ပေါင်း (125360)ကျော်၊ မုန်ညှင်းထုပ် (ပိဿာ)ပေါင်း (15675) ကျော်၊ ဖရဲသီးလုံးပေါင်း(29750)ကျော် အသီးသီးကုန်အဝင်ရှိကြောင်း သိရပါသည်။

DOCA(ရန်ကုန်)