နာနတ်သီးသည် တောင်သူများ၏လူနေမှုဘဝဖွံဖြိုးတိုးတက်ရေးအတွက် ဝင်ငွေကောင်းရရှိနိုင် သောအသီးနှံတစ်မျိုးဖြစ်ပါသည်။ နာနတ်သီးကို လတ်လတ်ဆတ်ဆတ်စားသုံးခြင်းအပြင် ဖျော်ရည်၊ ယို၊ အခြောက်ခံကာ အခြားတန်ဖိုးမြှင့် ထုတ်ကုန်များအဖြစ်လည်း ထုတ်လုပ်ရောင်းချကြပါသည်။ နာနတ်သီးပင်သည် ရေဝပ်သည်ကိုမနှစ်သက်သောကြောင့် မြေဆီလွှာတိုက်စားမှုနည်းသော မြေပြန့် ကုန်းမြေများတွင် ၁၅-၂၀ စင်တီမီတာခန့် အနက်ရှိသောစိုက်ကျင်းများ တူး၍စိုက်ပျိုးကြပါသည်။ ရေစီးဆင်းမှုကောင်းပြီး မြေဆီဩဇာထက်သန်သည့် ဂဝံမြေနီ၊ သဲနုန်းမြေများတွင် စိုက်ပျိုးပါက အကောင်းဆုံးဖြစ်ထွန်းပါသည်။နာနတ်သီးကို မိုးဦးကျကာလဖြစ်သောမတ်လ၊ ဧပြီလနှင့် မေလများတွင် အဓိကစတင်စိုက်ပျိုးကြပါသည်။
မိုးရာသီတွင်စိုက်ပျိုးခြင်းဖြင့် သဘာဝမိုးရေကိုအပြည့်အဝရရှိကာ အပင်အမြစ်စွဲမြန်ပြီးကြီးထွား မှုကောင်းမွန်စေပါသည်။ အပင်မစိုက်ပျိုးမီဖယ်ရှားထားသော သားတက်များကိုမှိုမတက်စေရန်နှင့် အပင်ပုတ်ခြင်းမှကာကွယ်ရန် (၁)ရက်မှ (၂)ရက်ခန့် ခြောက်သွေ့အောင်ထားရှိပြီးမှ စိုက်ပျိုးရပါသည်။ နာနတ်ပင်စိုက်ပျိုးပြီး (၁၅)လ မှ (၁၈)လ အကြာတွင်ခူးဆွတ်နိုင်ပါသည်။ မိုးရာသီတွင်မှည့်သော နာနတ်သီးများသည် ဆောင်းရာသီတွင်မှည့်သော အသီးများထက်အချိုဓာတ်ပိုကဲပြီး အရသာပိုမို ကောင်းမွန်ပါသည်။
ကယားပြည်နယ်ရှိ နာနတ်သီးစိုက်ဧကမှာနည်းပါးပြီး ဒေသအတွင်းဈေးကွက် အနည်းငယ်သာ ရှိပါသည်။ နာနတ်သီးပင်စတင်စိုက်ပျိုးသည့် ပထမနှစ်တွင်စိုက်ပျိုးပြီး(၁)နှစ်ခွဲမှစတင်ကာ (၅)နှစ်မှ (၇)နှစ် အထိနှစ်စဉ်ဆက်တိုက်ခူးဆွတ်နိုင်သည့်အတွက် အကျိုးအမြတ်များစွာရရှိနိုင်ပါသည်။ ယခုလလွိုင်ကော်မြို့ သီရိမင်္ဂလာဈေးကြီးအတွင်း အရောင်းအဝယ်ဖြစ်လျက်ရှိသော နာနတ်သီးဈေးနှုန်းများမှာ အသီးအရွယ်အစားအပေါ်မူတည်၍ တစ်လုံးလျှင် ၃၀၀၀ကျပ် မှ ၄၀၀၀ကျပ်ဝန်းကျင်အထိ အရောင်းအဝယ်ဖြစ်လျက်ရှိကြောင်း သီရိမင်္ဂလာဈေးရှိ ဈေးသည်များထံမှ သိရှိရပါသည်။
DOCA(ကယား)