ပြည်တွင်းကုန်သွယ်မှုသတင်း

     စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကျွန်းလှမြို့နယ်သည် လယ်ယာစိုက်ပျိုးရေးလုပ်ငန်းများကို အဓိကလုပ်ကိုင်သော ဒေသတစ်ခုဖြစ်ပြီး၊ စိုက်ပျိုးတောင်သူများသည် မတ်ပဲသီးနှံနှင့် ပဲတီစိမ်းသီးနှံတို့ကိုလည်း စိုက်ပျိုးကြောင်း၊ ထွက်ရှိသည့် မတ်ပဲနှင့် ပဲတီစိမ်းသီးနှံများကို ကန့်ဘလူ မြို့ရှိ ပွဲရုံများ၊ မန္တလေးမြို့ရှိ ပွဲရုံများနှင့် ကုန်စည်ဒိုင်များသို့ တင်ပို့ရောင်းချကြောင်း သိရသည်။

     ၂၀၂၅ ခုနှစ်၊ ဩဂုတ်လ ဒုတိယပတ်အတွင်း ဈေးနှုန်းများမှာ မတ်ပဲရိုးရိုးတစ်တင်းလျှင် (၈၀၀၀၀)ကျပ်၊ မတ်ပဲမျက်ကွင်းဖြူတစ်တင်းလျှင် (၈၃၀၀၀)ကျပ်၊ ဩဂုတ်လ ဒုတိယပတ်အတွင်း ပဲတီစိမ်းရိုးရိုးတစ်တင်းလျှင် (၇၈၀၀၀)ကျပ်၊ ပဲတီစိမ်းထွက်တိုး တစ်တင်းလျှင် (၈၇၀၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်း၊  ယခုပတ်အတွင်း မတ်ပဲနှင့် ပဲတီစိမ်းဈေးနှုန်းများ ကျဆင်းလျက်ရှိကြောင်း၊ ဒေသတွင်းပွဲရုံ လုပ်ငန်းရှင်များထံမှ သတင်းရရှိသည်။

DOCA(စစ်ကိုင်း)

      မန္တလေးတိုင်းဒေသကြီး ၊  ကျောက်ဆည်မြို့နယ်အတွင်းရှိ ကျေးလက်တောရွာများရှိ တောင်သူများသည် စပါး၊နှမ်း၊ပဲ၊ပြောင်း၊နေကြာစသည့် သီးနှံမျိုးစုံ စိုက်ပျိုးသည့်အပြင် ဟင်းသီး ဟင်းရွက်မျိုးစုံ နှင့် သစ်သီးဝလံများကို တစ်နိုင်တစ်ပိုင်မှ စီးပွားဖြစ်အများအပြား စိုက်ပျိုးလာကြပါ သည်။ ၄င်းသီးနှံများအနက်မှ ဆေးဘက်လည်းဝင် စီးပွားလည်းဖြစ်ထွန်းသော ရုံးပတီသီး သီးနှံ လည်းပါဝင်ပါသည်။ရုံးပတီသီး၏အရသာသည် ချွဲပျစ်ပျစ်နှင့်အလွန်စားကောင်းသော အသီးဖြစ်ပြီး ပြုတ်တို့၍စားသောက်ခြင်း၊ ကြော်ချက်စားခြင်း၊ အကင်ပြုလုပ်၍စားသုံးခြင်းနှင့်အချဉ်ရည်ဟင်းများ တွင်လည်းရောကာချက်ပြုတ်စားသုံးကြပါသည်။ ရုံးပတီသီးတွင် အမျှင်ဓါတ်များစွာပါဝင်သော ကြောင့်အစာခံနိုင်ပြီး အစာအိမ်နှင့်အူလမ်းကြောင်းအတွက်လည်းကောင်းမွန်ပါကြောင်း၊ ရုံးပတီသီး စားသုံးခြင်းဖြင့် မျက်စိအာရုံကြောများကိုလည်း အားကောင်းစေပါကြောင်း၊    ကိုယ်လက်ထုံကျဉ်သူများ အနေဖြင့်လည်း မကြာခဏ ပြုတ်တို့၍စားသောက်ပေးခြင်းဖြင့် ကြွက်သားများကိုသန်မာစေပါ ကြောင်း၊ရုံးပတီသီးတွင် လူတို့အတွက် များစွာအကျိုးပြုသည့် ဓါတ်ပစ္စည်းများပါဝင်သောကြောင့် မကြာခဏစားသုံးသင့်ပါသည် ။ ရုံးပတီသီးပင်သည် အနွေးကြိုက်သီးနှံဖြစ်ပြီး နှစ်ရှည်ပင်ဖြစ် သောကြောင့် နှစ်ခြင်းစားသုံးနိုင်ပါသည် ။ ရုံးပတီသီးပင်သည် ရာသီမ‌ရွေးစိုက်ပျိုးနိုင်ပြီး ဝင်ငွေရ လွယ်သော သီးနှံတစ်မျိုးဖြစ်သည့်အတွက် တွက်ခြေကိုက်၍ စိုက်ပျိုးသင့်သော သီးနှံတစ်မျိုး ဖြစ်ပါသည်။ အများဆုံးစိုက်ပျိုးသော ရွာများမှာ ကျောင်းကုန်း ၊ ငါးမြွေကုန်း နှင့် မင်းစုကျေးရွာ များတွင်စိုက်ပျိုးကြပါသည် ။ စိုက်ပျိုးသောမျိုးများမှာ ပင်ပုမျိုး၊ ပင်လတ်မျိုးနှင့်ပင်မြင့် မျိုးများ ကိုစိုက်ပျိုးကြပြီး(ပင်မြင့်မျိုး) Finger One ရုံးပတီမျိုးကို အများဆုံးစိုက်ပျိုးကြပါသည်။(၁)ဧကလျှင် မျိုးစေ့(၁၂)ထုပ်စိုက်ပျိုးရပြီးမျိုးစေ့(၁)ထုပ်လျှင်(၂၇၀၀၀/-)ကျပ်ပေးရကြောင်း၊(၁)ဧကကုန်ကျစရိတ် အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၇၀၀၀၀၀/-)ကျပ် ဝန်းကျင်ကုန်ကျ ကြောင်း ၊ စတင်စိုက်ပျိုးပြီး (၄၅)ရက်အကြာတွင် စတင်ခူးဆွတ်ရပါသည် ။ ခူးဆွတ်မှုအနေဖြင့် တစ်ရက်ခြား တစ်ကြိမ်ခူးဆွတ်ပေးရကြောင်း ၊ သက်တမ်းအနေဖြင့် (၂)လအထိ ခူးဆွတ်ရကြောင်း ၊ စျေးနှုန်းစျေးကွက်အနေဖြင့် ဖောက်သည်စျေး (၁)ပိဿာလျှင် (၂၀၀၀/-)ကျပ် စျေးနှုန်းများဖြင့် အရောင်းအဝယ်ဖြစ်နေကြောင်း ၊ ကုန်စိမ်းသီးနှံဖြစ်သည့်အတွက် စျေးနှုန်းအတက်အကျရှိနိုင်ပါ ကြောင်း ၊ (၁)ဧက အထွက်နှုန်းအနေဖြင့် ပိဿာ(၁၂၀၀)ခန့်ထွက်ရှိကြောင်း ၊ အကျိုးအမြတ် အနေဖြင့် (၁၇)သိန်းခန့်မြတ်ပြီး ပွဲစားများမှစိုက်ခင်းထဲများအထိ လာရောက်ဝယ်ယူကြကြောင်း ၊ ရုံးပတီသီး သီးနှံစိုက်ပျိုးခြင်းဖြင့် အကျိုးအမြတ်များစွာရရှိသည့်အပြင် စားသုံးမှုအတွက် ကျန်းမာ စေမည့်ဟင်းစားရုံးပတီသီး သီးနှံကိုလည်း တိုးချဲ့စိုက်ပျိုးသင့်ပါကြောင်း တောင်သူတစ်ဦး၏ ပြောကြားချက်အရသိရှိရပါသည်။

DOCA (မန္တလေး)

     စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကျွန်းလှမြို့နယ်သည် လယ်ယာစိုက်ပျိုးရေးလုပ်ငန်းများကို အဓိကလုပ်ကိုင်သော ဒေသတစ်ခုဖြစ်ပြီး ၊ ကျွန်းလှမြို့နယ် ကျီကုန်းကျေးရွာ၊ စံပြကျေးရွာနှင့် အခြားသောကျေးရွာများတွင် ပဲမျိုးစုံစိုက်ပျိုးကြောင်း သိရှိရသည်။

     ၂၀၂၅ ခုနှစ် ဩဂုတ်လ ဒုတိယပတ်အတွင်း ပဲနီ(၁)တင်းလျှင် (၉၈၅၀၀)ကျပ်၊ အကွဲအနာပါ (၁)တင်းလျှင် (၉၈၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ၊ ဩဂုတ်လ ဒုတိယပတ်အတွင်း ထောပတ်ပဲတစ်တင်းလျှင် (၁၂၀၅၀၀)ကျပ်၊ အကွဲအနာပါ(၁)တင်းလျှင် (၁၂၀၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ယခုပတ်အတွင်း ထောပတ်ပဲသီးနှံဈေးနှုန်း အနည်းငယ်ကျ ဆင်းကြောင်း၊ စွန်တာနီ(၁)တင်းလျှင် (၅၀၀)ကျပ်မြင့်တက်လာကြောင်း၊ ပဲနီနှင့်ထောပတ်ပဲများကို ရွှေဘိုမြို့နှင့် မန္တလေးမြို့ရှိ ပွဲရုံများသို့ တင်ပို့ရောင်းချကြောင်း၊ သီးနှံရောင်းဝယ်ရေး လုပ်ငန်းရှင်များထံမှ သတင်းရရှိပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့်ဆီထွက် သီးနှံများအပြင် ပဲမျိုးစုံကိုလည်းစိုက်ပျိုးကြောင်း၊ ပဲဇီးကွက်သီးနှံများကို ကျွန်းလှမြို့နယ် ကျီကုန်း ကျေးရွာ၊ စံပြကျေးရွာနှင့် အခြားသောကျေးရွာများမှ ဝင်ရောက်လျက်ရှိကြောင်း သိရသည်။

     ၂၀၂၅ ခုနှစ်၊ ဩဂုတ်လ ဒုတိယပတ်အတွင်း ဈေးနှုန်းများမှာ ပဲဇီးကွက်တစ်တင်းလျှင် (၈၈၀၀၀)ကျပ်၊ အကွဲအနာပါလျှင်(၈၇၅၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ယခုပတ် အတွင်း ပဲဇီးကွက်တစ်တင်းလျှင် (၂၅၀၀)ကျပ်ကျဆင်းသွားကြောင်း၊ ဈေးကွက်အနေဖြင့် ကျွန်းလှ မြို့နယ်မှထွက်ရှိသော ပဲဇီးကွက်သီးနှံများကို ရွှေဘိုမြို့နှင့် မန္တလေးမြို့ ရှိပွဲရုံများ၊ ကုန်စည်ဒိုင်များသို့ တင်ပို့လျက်ရှိကြောင်း သီးနှံရောင်းဝယ်ရေး လုပ်ငန်းရှင်များထံမှ သတင်းရရှိ ပါသည်။

DOCA(စစ်ကိုင်း)

      စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကျွန်းလှမြို့နယ်သည် လယ်ယာစိုက်ပျိုးရေးလုပ် ငန်းများလုပ်ကိုင်သော ဒေသတစ်ခုဖြစ်ပြီး သီးနှံမျိုးစုံစိုက်ပျိုးလျက်ရှိရာ စိုက်ပျိုးတောင်သူများသည် ပဲစဉ်းငုံသီးနှံကို အဓိကစိုက်ပျိုးကြောင်း သိရသည်။

       ကျွန်းလှမြို့နယ်တွင် ပဲစဉ်းငုံမျိုးအနေဖြင့် အစေ့အနီရောင်မျိုးနှင့် အစေ့အဖြူရောင်မျိုးတို့ကို စိုက်ပျိုးကြောင်း ဈေးနှုန်းအနေဖြင့် ဩဂုတ်လ ပထမပတ်အတွင်း ပဲစဉ်းငုံနီ(၁)တင်းလျှင်(၇၉၅၀၀) ကျပ် ၊ပဲစဉ်းငုံဖြူ(၁)တင်းလျှင် (၇၆၅၀၀)ကျပ်ဖြင့် အရောင်းအဝယ်ဖြစ်နေကြောင်း၊ ယခုပတ်အတွင်း ပဲစဉ်းငုံ(၁)တင်းလျှင်(၁၅၀၀မှ ၂၅၀၀)ကျပ် ဈေးနှုန်းကျဆင်းသွားကြောင်း၊ ထွက်ရှိသည့် ပဲစဉ်းငုံများ ကို ရွှေဘိုမြို့ရှိပွဲရုံများ၊ မန္တလေးမြို့ရှိပွဲရုံများသို့ ရောင်းချကြောင်း ဒေသတွင်းသီးနှံရောင်းဝယ်ရေး လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)