ပြည်တွင်းကုန်သွယ်မှုသတင်း

        ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၊ တောင်ခွေးရဲကျေးရွာမှ တောင်သူဦးချင်း၏ လယ်ယာမြေ (၀.၂၅)ဧကတွင် သခွားသီးများကို တစ်နိုင်တစ်ပိုင်စိုက်ပျိုးရောင်းချခြင်းဖြင့် မိသားစုစားဝတ်နေရေးအတွက် ဝင်ငွေများတိုးပြီး စီးပွားရေးအဆင်ပြေလျက်ရှိကြောင်းသိရပါသည်။

         ဟင်းသီးဟင်းရွက်အုပ်စုဝင်ဖြစ်သော သခွားသီးများကို စားသုံးသူများက အများအပြားစားသုံးကြပါသည်။ သခွားမျိုးမှာ (၃၉၅)မျိုးကိုဝယ်ယူစိုက်ပျိုးပြီး မျိုးထုတ်တစ်ထုပ်လျှင် (၁၂၀၀၀)ကျပ်ပေးရကြောင်းသိရသည်။ စက်တင်ဘာလတွင် စတင်စိုက်ပျိုးခဲ့ပြီး ယခုနိုဝင်ဘာလတွင် ခူးဆွတ်ရောင်းချနေပြီဖြစ်ကြောင်းသိရသည်။ သခွားသီးများကို တစ်ရက်ချန်ခူး၍ရောင်းချပြီး တစ်ခါခူးလျှင် အလုံးရေ (၈၀၀ - ၁၀၀၀)လုံးခန့်ရရှိပါသည်။ ဈေးနှုန်းများမှာ တစ်လုံးလျှင် (၁၅၀-၂၀၀)ကျပ်ဖြင့်ရောင်းချကြောင်းသိရသည်။ သခွားသီးများကို ပြည်မြို့၊ ဈေးကြီးအပါအဝင် အခြားဈေးများတွင်လည်း ရောင်းချလျက်ရှိကြောင်းသိရသည်။

          သခွားသီးများရောင်းချရာတွင် ကျေးရွာအတွင်းမှ ဈေးသည်များက လာရောက်ဝယ်ယူကြပြီး ပြည်မြို့ပေါ်ရှိ ဈေးများသို့လည်း သွားရောက်ရောင်းချမှုများရှိပါသည်။ ယခုအချိန်သည် သခွားသီးများ စတင်ထွက်ပေါ်ချိန်ဖြစ်သောကြောင့် စိုက်ပျိုးသူတောင်သူများ ဈေးကောင်းရကာ  အရောင်းသွက်ကြောင်းသိရပါသည်။

DOCA(ပဲခူး)

           ပုသိမ်ခရိုင်အတွင်းရှိ မြို့နယ်များမှ မိုးစပါး၊ နွေစပါးစိုက်ဧက ၇၃၅၈၃၅ဧကရှိပြီး အထွက်တင်းအားဖြင့် ၆၈၄၇၀၂၉၆တင်းထွက်ရှိပြီး စားသုံးမှု၊ မျိုး၊ အလေအလွင့်နှင့် အခြားစားသုံးမှုမှာ ၂၁၀၅၆၂၁၃တင်းရှိသည့်အတွက် စပါးပိုလျှံမှု ၄၇၄၁၄၀၈၃တင်းပိုလျှံပါသည်။ ပိုလျှံသည့်စပါးများအား ဆန်အဖြစ်ကြိတ်ခွဲပြီး အထက်အညာဒေသသို့တင်ပို့လျက်ရှိပြီး အဓိက ရန်ကုန်တိုင်းသို့ တင်ပို့လျက်ရှိပါသည်။ ထိုသို့တင်ပို့ရာတွင် တင်ပို့သည့်စာရင်းဇယားအား လစဉ်တင်ပြလျက်ရှိပြီး တစ်လလျှင် ၃၀၀၀၀ကျော်ခန့်ဆန်စီးထွက်လျက်ရှိပါသည်။ လက်ရှိစပါးပေါ်စ စပါးတင်း၁၀၀လျှင် စပါးဈေးနှုန်းမှာ အမျိုးအစားအပေါ်မူတည်၍ ကျပ်သိန်း၂၀နှင့် ၂၃သိန်းအကြားရှိကြောင်း စိစစ်တွေ့ရှိရပါသည်။ တွက်ချက်မှုစာရင်းအရ မိုးစပါး (ဧည့်မထ) တစ်ဧကစိုက်ပျိုးစရိတ် ခန့်မှန်း ၉၀၀၀၀ကျပ်ခန့်ရှိခဲ့ပြီး စပါးအထွက်နှုန်း ၉၀ ထွက်ရှိပါက တောင်သူအနေဖြင့် တစ်ဧကအမြတ်နှုန်းမှာ ၁၂၇၀၀၀ကျပ်ခန့် ၏ရရှိမည်ဖြစ်ပြီး တောင်သူအနေဖြင့် အကျိုးအမြတ်ရရှိ၍ ဆန်စက်ပိုင်ရှင်အနေဖြင့်လည်း ထိုက်သင့်သည့် အကျိုးအမြတ်ရရှိမည်ဖြစ်ပါသည်။ MRF မှသတ်မှတ်သော သင့်တင့်မျှတသောဆန်ဈေးနှုန်း (Reasonable Market Price) ထုတ်ပြန်ချက်နှင့်ကိုက်ညီမှုရှိသော စပါးဈေးအား လက်ရှိအခြေအနေထက် မြင့်တက်မှုမရှိစေရေး ကုန်ဈေးနှုန်းတည်ငြိမ်ရေးအဖွဲ့အနေဖြင့် ထိန်းကျောင်းဆောင်ရွက်သွားမည်ဖြစ်ကြောင်းသိရှိရပါသည်။

DOCA(ဧရာဝတီ)

   ဧရာဝတီတိုင်းဒေသကြီး ညောင်တုန်းမြို့နယ်တွင် မွေးမြူးရေးလုပ်ငန်းများကို လုပ်ကိုင်လျက်ရှိသလို မြစ်အတွင်းမှ ငါးဖမ်းလုပ်ငန်းများကို လုပ်ကိုင်ဆောင်ရွက်လျက်ရှိပါသည်။ ညောင်တုန်းမြို့သည် စိုက်ပျိုးရေး အဓိက ထားစိုက်ပျိုးကြသလို မွေးမြူရေးလုပ်ငန်းဖြင့်လည်း စီးပွားဖြစ်ထွန်းအောင် လုပ်ကိုင်ဆောင်ရွက်နေပြီး ညောင်တုန်းမြို့နယ် ထွက်ရှိသော ငါးများကို ရန်ကုန်သို့ တင်ပိုလျက်ရှိပြီး ရန်ကုန်မှတဆင့် ပြည်ပပို့ကုန်အဖြစ် ငါးများတင်ပို့နေကြောင်း ငါးမွေးမြူရေးလုပ်ငန်းရှင်မှ ပြောပြ၍ သိရသည်။

    ညောင်တုန်းမြို့နယ်မှ ရန်ကုန်ဈေးကွက်သို့ အောက်တိုဘာလအတွင်း တီလားဗီးယားငါး ပိဿာချိန် ၆၆၀၀၀ ထိ တင်ပို့ရောင်းချနိုင်ခဲ့ကြောင်း သိရသည်။ စက်တင်ဘာလအတွင်းက တီလားဗီးယားငါး ပိဿာချိန်၅၀၀၀၀ ထိသာ တင်ပို့ရောင်းချနိုင်ခဲ့သည်။  

   ညောင်တုန်းမြို့နယ်မှထွက်သော ငါးများကို ပြည်တွင်း ရန်ကုန်ဈေးကွက်ကလဲ တီလားဗီးယားငါးတွေ ဝယ်ယူမှုများကြောင်း  နှစ်စဉ် ငါးပိဿာချိန်တွေ တော်တော်များများတင်ပို့နေပြီး ရေလုပ်ငန်းရှင်တွေနဲ့ ငါးရောင်းဝယ်ရေဒိုင်များ၊ ကုန်သည်တွေပါ အဆင်ပြေလျက်ရှိကြောင်း၊ ယခုမိုးရာသီကင်းလွတ်ပြီးဖြစ်၍ ငါးများလည်း ထွက်ရှိလာပြီး ငါးဝယ်လိုအားကောင်းလာတာကြောင့် မွေးမြူသူတွေ ငါးအကောင်ရေ ထပ်တိုးမွေးမြူလာကြပြီး  မွေးမြူသည့် တီလားဗီးယားငါးနှင့် သဘာဝအတိုင်း ဖမ်းဆီးရရှိသည့် တီလားဗီးယားငါးများထွက်ရှိကြောင်း၊ ညောင်တုန်းမြို့နယ်မှ ရန်ကုန်ဈေးကွက်သို့ တင်ပို့ရောင်းချနေသည့် တီလားဗီး ယားငါးတစ်ပိဿာလျှင် ငွေကျပ် ၉၅၀၀ ထိ ဈေးပေါက်နေကြောင်း သိရှိရသည်။

DOCA(ဧရာဝတီ)

        ကလားဝါးဥကို ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြို့နယ်အတွင်းရှိ ရပ်ကွက်ကျေးရွာများတွင် စီးပွားဖြစ် တစ်ပိုင်တစ်နိုင်စိုက်ပျိုးကြပါသည်။ ကလားဝါးဥကို  မိုးအကုန် အောက် တိုဘာလနှင့် နိုဝင်ဘာလများတွင် တူးဖော်ရောင်းချကြပါသည်။ ဝါးဥပင်ကိုစိုက်ပျိုးရာတွင်လည်း တကူးတကစိုက်ပျိုးစရာမလိုဘဲ ဝါးဥကိုတူးဖော်စဉ်ကပင် အပင်တက်ထွက်ရာ ဝါးဥ၏အမြီးပိုင်းကို လက်တစ်ဆစ်ခန့်ချိုး၍ တူးယူသောကျင်း၌ပင် ပြန်လည်မြေဖို့၍ စိုက်ပျိုးခဲ့ခြင်းဖြစ်ပြီး နောင်နှစ်မိုးဦးကျမှသာ အပင်တက်များ ပြန်လည်ထွက်ပေါ်လာခြင်းဖြစ်သည့်အတွက် စိုက်ပျိုးမှုကုန်ကျစရိတ်လည်းသက်သာပြီး အကျိုးများသော သီးနှံတစ်မျိုးဖြစ်ကြောင်းသိရပါသည်။

          ယခုအောက်တိုဘာလ တတိယပတ်တွင် သဲကုန်းမြို့နယ်ဈေးကွက်အတွင်း ကလားဝါးဥတစ်ပိဿာလျှင် လက်လီ (၅၀၀၀)ကျပ်၊ လက်ကား (၄၀၀၀)ကျပ်ဖြင့်ရောင်းချလျက်ရှိပြီး ပြည်၊ ရန်ကုန် နှင့် လက်ပံတန်းမြို့နယ်များသို့ တင်ပို့ရောင်းချနေကြောင်း ရာသီပေါ်ကလားဝါးဥစိုက်ပျိုးသူများထံမှသိရပါသည်။

DOCA(ပဲခူး)                                                                         

         ပဲခူးတိုင်းဒေသကြီး၊ နတ်တလင်းခရိုင်၊ ဇီးကုန်းမြို့နယ်အတွင်းရှိ မော်ရကျေးရွာ၊ ထန်းတပင်ကျေးရွာနှင့် အခြားကျေးရွာများတွင် မိုးခရမ်းသီးများကို တစ်နိုင်တစ်ပိုင်စိုက်ပျိုးကြပါသည်။ မိုးခရမ်းသီးစိုက်ပျိုးရန် ပျိုးပင်တစ်ပင်ကို ၅၀ကျပ်နှုန်းဖြင့် တစ်ဧကကို ပျိုးပင် ၄၀၀၀ခန့်စိုက်ပျိုးရပါသည်။ မြေကျင်းကလေးများတူးပြီး ပျိုးပင်တစ်ပင်ကို ပင်ခြားတန်းခြား နှစ်ပေခွဲထားပြီး စိုက်ပျိုးကြပါသည်။ ခရမ်းသီးစိုက်ပျိုးရာတွင် တစ်ဧကကုန်ကျစရိတ်အနေဖြင့် ပျိုးပင်၊ ထွန်ယက်ခ၊ စိုက်ပျိုးခ၊ ပေါင်းမြက်ရှင်းခ၊ မြေဩဇာ၊ ပိုးသတ်ဆေးအပါအဝင် စုစုပေါင်း ၈၂၀၀၀၀ကျပ်ကုန်ကျကြောင်း၊  တစ်ဧကအထွက်နှုန်းမှာ အလုံးရေ ၁၃၀၀၀ခန့်ထွက်ရှိကြောင်း တစ်လုံးလျှင် ၁၀၀ကျပ်မှ ၁၅၀ကျပ်နှုန်းဖြင့် ဒေသတွင်းသာမက ကုန်စိမ်းဒိုင်များမှတစ်ဆင့် အခြားမြို့နယ်များသို့ပါ တင်ပို့ရောင်းချလျက်ရှိကြောင်း ခရမ်းစိုက်တောင်သူတစ်ဦးထံမှသိရပါသည်။

DOCA(ပဲခူး)