ပြည်တွင်းကုန်သွယ်မှုသတင်း

      တနင်္သာရီတိုင်းဒေသကြီး၊ မြိတ်မြို့ပေါ်ရှိ ကျေးရွာများနှင့်ရပ်ကွက်ဈေးငယ်များတွင် စိုက်ပျိုးရေးလုပ်ငန်းများကို အဓိကထားလုပ်ကိုင်ကြပြီး စာဖိုဆောင်သီးနှံတစ်မျိုးဖြစ်သည့် ကန်စွန်းဥ ကိုလည်း တစ်နိုင်တစ်ပိုင်စိုက်ပျိုးကြပြီး ဈေးကွက်အတွင်းရောင်းချနေကြောင်း သိရှိရပါသည်။ ကန်စွန်းဥကို ပြုတ်စားခြင်း၊ ကြော်စားခြင်း၊ မုန့်မျိုးစုံများကိုလည်း ပြုလုပ်စားကြပါသည်။ ကန်စွန်းဥသည်စားကောင်းရုံသာမကကျန်းမာရေးအတွက် လွန်စွာအထောက်အကူပြုပါသည်။ ကန်စွန်းဥမှာ အာဟာဓာတ်များစွာပါဝင်သည့်အတွက် ကိုယ်ခံအားကောင်းမွန်စေခြင်း၊ အမြင် အာရုံများကိုကောင်းမွန်စေခြင်း၊ ဦးနှောက်လုပ်ဆောင်မှုများကိုကောင်းမွန်စေခြင်း၊ ကိုယ်အလေးချိန်ကိုကောင်းမွန်စေခြင်းစသည့် အကျိုးကျေးဇူးများရရှိနိုင်သည့်အတွက် ကန်စွန်းဥများကို စားသုံးသင့်ပါသည်။

          ယခု၂၀၂၅ခုနှစ်၊ သြဂုတ်လတတိယပတ်တွင် မြိတ်မြို့ပေါ်ရှိ ကန်စွန်းဥဈေးနှုန်းမှာ တစ်ပိသာလျှင် (၄၀၀၀)ကျပ်နှင့် (၄၅၀၀)ကျပ်ခန့် ရှိကြောင်းသိရှိရပါသည်။ ကန်စွန်းဥအပြုတ် (၃)လုံးလျှင် (၁၀၀၀)ကျပ်ရှိကြောင်း သိရှိရပါသည်။

DOCA(တနင်္သာရီ)

      တနင်္သာရီတိုင်းဒေသကြီး၊ မြိတ်မြို့ပေါ်တွင် စိုက်ပျိုးရေးနှင့် မွေးမြူရေးလုပ်ငန်းကို ရာသီအလိုက် စားဖိုဆောင်သီးနှံများကိုစိုက်ပျိုးလျက်ရှိရာမှ ပူစီနံများကို အနည်းငယ်မျှသာ စိုက်ပျိုးကြပြီး ခူးဆွတ်ရောင်းချကြကြောင်းလည်း သိရှိရပါသည်။ ပူစီနံများကို မြန်မာဟင်းများတွင် သာမက မုန့်ဟင်းခါးအသုပ်စုံတို့တွင်လည်း တွဲဖက်စားသုံးကြပါသည်။ ဆောင်းရာသီများတွင်သာ အထွက်များသောကြောင့် ကျန်ရာသီများမှာ ဈေးကြီးပေးကာဝယ်ယူကြရကြောင်း သိရှိရပါသည်။

     ၂၀၂၅ခုနှစ်၊ ယခုသြဂုတ်လတတိယပတ်တွင် မြိတ်မြို့ပေါ်တွင် ရောင်းချနေသော ပူစီနံ ဈေးနှုန်းမှာ တစ်စည်းလျှင် (၅၀၀)ကျပ်ရှိပြီး နံနံပင်တစ်စည်းလျှင်လည်း (၅၀၀)ကျပ်သာရှိကြောင်း သိရှိရပါသည်။

DOCA(တနင်္သာရီ)

        ပြည်ဈေးကွက်အတွင်း ငွေနှင်းမှိုသည် တစ်နှစ်ပတ်လုံးထွက်ရှိသည့် မှိုအမျိုးအစားဖြစ်ပြီး ပြည်မြို့ပေါ် ရွာဘဲရပ်၊ နဝဒေးရပ်၊ ခေတ္တရာရပ်ကွက်အစုံနှင့် မြို့နယ်နေရာအချို့တွင် တစ်နိုင်တစ်ပိုင် စိုက်ပျိုးရောင်းချနေကြပါသည်။ ပြည်မြို့ပေါ်လက်လီဈေးများသို့ တစ်ပတ်လျှင် ရက်ခြား (၈)ပိဿာမှ (၁၀)ပိဿာခန့်အဝင်ရှိပြီး ဈေးကွက်အတွင်း အဝင်ရှိသလောက် အရောင်းအဝယ် ဖြစ်ကြောင်းသိရသည်။ ငွေနှင်းမှိုကို ကန်စွန်းရွက်နှင့်ရော၍ ချက်စားခြင်း၊ ငရုတ်သီးစိမ်း၊ မျှင်ငပိတို့နှင့် ငပိချက် ချက်၍ စားသောက်ကြပါသည်။ ပြည်မြို့ပေါ် ဈေးကွက်တွင် ငွေနှင်းမှို (၁၀)ကျပ်သားလျှင် (၁၀၀၀)ကျပ်မှ (၁၂၀၀)ကျပ်နှုန်းဖြင့် ရောင်းချလျက်ရှိကြောင်းသိရပါသည်။

DOCA(ပဲခူး)

         ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၊ မှော်ဇာကျေးရွာရှိ တောင်သူ ဦးခင်မောင်ချင်း ၏ (၀.၂၅)ဧကရှိ စိုက်ဧကပေါ်တွင် ဖရုံသီးများ စိုက်ပျိုးထားကြောင်းသိရသည်။ စတင်စိုက်ပျိုးသည့် လမှာ ဇွန်လတွင် စတင်စိုက်ပျိုးရပါသည်။ မျိုးများအနေဖြင့် မျှားနီ၊ ပစ်တိုင်းထောင်မျိုးများကို စိုက်ပျိုးပါသည်။ မျိုးထုတ်ကြီးတစ်ထုတ်လျှင် မျိုးစေ့ (၁၃၀)ခန့်ပါရှိပြီး မျိုး (၂)ထုတ် စိုက်ပျိုးထား ကြောင်းသိရသည်။ စတင်စိုက်ပျိုးသည့်ကာလမှာ (၂)လအကြာတွင် စတင်ခူးဆွတ်နိုင်ပြီဖြစ်ပါသည်။ ဇွန်လတွင် စတင်စိုက်ပျိုးထားသောကြောင့် ယခုဩဂုတ်လတွင် စတင်ခူးဆွတ်နိုင်ကြောင်း သိရ သည်။ ဖရုံသီးဒိုင်များသို့ အနုသီး၊ အရင့်သီး သောင်းပြောင်းပေးပို့ရသည်။ သောင်းပြောင်းဈေးမှာ တစ်လုံးလျှင် (၅၀၀)ကျပ်ဖြင့် ပေးပို့ရပြီး လက်လီဈေးမှာ တစ်လုံး (၆၀၀ - ၇၀၀)ကျပ်ဖြင့် ရောင်းချ နေပါသည်။ (၃)ရက် (၄)ရက်ခြားတစ်ကြိမ် ခူးဆွတ်ရသည်။ တစ်ခါခူးလျှင် အလုံး (၁၅၀ - ၂၀၀) လောက် ခူးဆွတ်ရပါသည်။ ခူးဆွတ်ချိန် (၂)လလောက်ရှိကြောင်းလည်း သိရသည်။ ဖရုံသီးတွင် အသီးသာမက အညွန့်များကိခူးဆွတ်ရောင်းချနိုင်ကြောင်းသိရသည်။   ဖရုံသီး စိုက်ပျိုးခြင်းဖြင့် အရင်းအနီးသိပ်မများပဲ အကျိုးအမြတ်များစွာရှိသဖြင့် စိုက်ပျိုးသင့် သော သီးနှံတစ်မျိုးဖြစ်ကြောင်း သိရှိရပါသည်။

DOCA(ပဲခူး)

       ပဲခူးတိုင်းဒေသကြီး၊ ပြည်ခရိုင်၊ ပြည်မြို့အတွင်းရှိ မြို့မစည်ပင်သာယာဈေးကြီးနှင့် အခြား ဈေးများတွင် နံနံပင်ဈေးနှုန်းများ ကျဆင်းလျက်ရှိပြီး (၁၀)ပင်စည်း တစ်စည်းလျှင် (၃၀၀)ကျပ်မှ (၂၀၀)ကျထတဖြည်းဖြည်း ကျဆင်းလာကြောင်းသိရပါသည်။ ပြည်ဈေးကွက်သို့ ပြည်မြို့ အတွင်းရှိ ကျေးရွာများဖြစ်သော မှော်ဇာ၊ ဇီးအုပ်၊ တောင်လုံးညို၊ ဝက်ထီးကန်၊ ရွှေတောင်၊ ပုတီးကုန်း၊ သဲကုန်း၊ ဝက်ပုတ်ယမျာမကားလမ်းဖြင့်လည်းကောင်း၊ ရထားများဖြင့်လည်းကောင်း ရက်ခြားဝင်ရောက် လာရောက် ရောင်းချကြကြောင်းသိရပါသည်။ ဈေးနှုန်းအနေဖြင့် ၁၀ ပင်စည်း တစ်စည်းကို (၂၀၀)ကျပ်နှင့် တစ်ပိဿာလျှငကျပ်(၂၀၀၀၀)နှုန်းများဖြင့် အသီးသီးရောင်းချလျက် ရှိကြောင်းသိရ ပါသည်။ ဈေးနှုန်းချိုသာသောကြောင့် စားသုံးသူပြည်သူများ စိတ်ကြိုက်ဝယ်ယူ စားသုံးမှုများကြောင့် ရောင်းအားတက်လာကြောင်း သိရပါသည်။

DOCA(ပဲခူး)