ပြည်တွင်းကုန်သွယ်မှုသတင်း

   စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ပေါ်ရှိ  ဒေသခံများသည် တစ်နိုင်တစ်ပိုင် အသေးစားစီးပွားရေးလုပ်ငန်းများကို လုပ်ကိုင်လျက်ရှိရာ ကုလားပဲချောင်းနှင့် စလေဘီများကိုလည်း ပြုလုပ်ရောင်းချကြပါသည်။ ၂၀၂၅ခုနှစ်၊ စက်တင်ဘာလ တတိယပတ်တွင် ရောင်းချလျက်ရှိသော ကုလားပဲချောင်းနှင့် စလေဘီဈေးနှုန်းများမှာ စလေဘီ(၁) ပိဿာလျှင် (၁၂၀၀၀) ကျပ်၊ စလေဘီ (၅၀)ကျပ်သားလျှင် (၆၀၀၀)ကျပ်နှင့် စလေဘီ(၂၅)ကျပ်သားလျှင် (၃၀၀၀)ကျပ်နှင့် ကုလားပဲ ချောင်း(၁)ပိဿာလျှင် (၂၀၀၀၀)ကျပ်၊ ကုလားပဲချောင်း (၅၀) ကျပ်သားလျှင် (၁၀၀၀၀)ကျပ်၊ ကုလားပဲချောင်း (၂၅)ကျပ်သားလျှင် (၅၀၀၀)ကျပ်ဖြင့် အရောင်း အဝယ်ဖြစ်လျက်ရှိကြောင်း၊ ကုလားပဲချောင်းနှင့် စလေဘီများကိုသရေစာအဖြစ် စားသုံးရန် အတွက်လည်းကောင်း၊လက်ဆောင်ပေးရန်အတွက်လည်းကောင်း ဝယ်ယူကြသဖြင့် အရောင်း အဝယ်သွက်လျက်ရှိကြောင်း သတင်းရရှိပါသည်။

DOCA(စစ်ကိုင်း)

            မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့ရှိ အေးမြကြည်လင်စျေးနှင့် မြို့မစျေးတို့တွင်  ရာသီစာအသီးအနှံများကို  စိုက်ပျိုးရောင်းချလျက်ရှိရာ  ယခုအခါ  ပုပ္ပါးဒေသမှ ဩဇာသီးများလှိုင်လှိုင်ဝင်ရောက်လျက်ရှိပါသည်။ သြဇာသီးလို့ဆိုလိုက်တာနဲ့ အရသာကောင်းသလောက် စားရတာအလွန်လက်ဝင်တဲ့ ရုပ်ဆိုးဆိုးအသီးကြီးကိုဆိုလိုမှန်း လူတိုင်းသိကြပါတယ်။ ချိုမြတဲ့အရသာနဲ့မှမလိုက် ပေါပေါများများ ပါလာတတ်တဲ့အစေ့တွေကို လက်ဝင်အောင်ဖယ်စားရတဲ့ အစေ့တွေမြင်တော့ ငယ်ငယ်တုန်းက သြဇာစေ့လေးတွေနဲ့ ဇယ်တောက်တမ်းကစားခဲ့ရတာတွေကို အမှတ်ရမိပါတယ်။ သြဇာသီးကို အိန္ဒိယလူမျိုးတွေက အစိမ်းစားသည့်အပြင် ကိတ်မုန့်တွေ မုန့်အချိုတွေလုပ်စားကြပါသည်။ ကျွန်မတို့ မြန်မာတွေကတော့ အစိမ်းလိုက်စားကြပါသည်။ သြဇာသီးအရသာ ကောင်းမွန်သလို အရေပြား၊ ဆံပင်၊ မျက်လုံး၊ ဦးနှောက်နှင့် နှလုံးတို့ကို အထောက်အကူပြုတဲ့ အသီးတစ်မျိုးဖြစ်ပါသည်။ ကိုယ်ခံအားစနစ်ကောင်းမွန်ခြင်း၊ ကင်ဆာကိုတိုက်ဖျက်နိုင်စွမ်းရှိခြင်း၊ ဦးနှောက်ကိုကျန်းမာစေခြင်း၊ သွားကိုခိုင်မာစေခြင်း၊ ဆီးချိုကိုတားဆီးနိုင်ခြင်းစသည့် ရောဂါများသက်သာစေကြောင်း ကျန်းမာရေးဗဟုသုတအရ  သိရှိရပါသည်။  သြဂုတ်လတွင် စတင်ဝင်ရောက်လျက်ရှိပြီး   သြဇာသီးစျေးနှုန်းအနေဖြင့် အကြီးတစ်လုံးလျှင် (၁၃၀၀/-)၊အလတ်တစ်လုံးလျှင်(၁၀၀၀/-)ကျပ် ၊ အသေးတစ်လုံးလျှင်(၈၀၀/-)ကျပ်စျေးနှုန်းများဖြင့် ‌ရောင်းချလျက်ရှိပြီးစက်တင်ဘာ ဒုတိယပတ်တွင်  သြဇာသီးစျေးနှုန်းအနေဖြင့် အကြီးတစ်လုံးလျှင် (၁၀၀၀/-) ၊ အလတ်တစ်လုံးလျှင်(၈၀၀/-)ကျပ် ၊ အသေးတစ်လုံးလျှင် (၅၀၀/-)ကျပ်စျေးနှုန်းများဖြင့် ရောင်းချလျက်ရှိပြီး သြဇာသီးများလှိုင်လှိုင် ဝင်ရောက်လျက်ရှိသောကြောင့် စျေးနှုန်းအနည်းငယ်ကျဆင်းသွားကြောင်း သိရှိရပါသည်။

DOCA(မန္တလေး)

    စစ်ကိုင်းတိုင်းဒေသကြီး၊ မုံရွာခရိုင်၊ မုံရွာမြို့နယ်ရှိ ချင်းတွင်းရတနာဈေး၊ မန်းကျည်းပင်ဈေး၊ သာစည်ဈေး၊ ဗန္ဓုလဈေး၊ ပြည်ထောင်စုဈေးနှင့် ဝန်ထမ်းအိမ်ရာရှိနန္ဒဝန်ဈေးသစ်တို့တွင် ၂၀၂၅ခုနှစ်၊ စက်တင်ဘာလ တတိယပတ်အတွင်း ရောင်းချနေသော မျှစ်ဈေးနှုန်းများအနေဖြင့် မျှစ်ချဉ် ( ၁၀ ) ကျပ်သားပါ အထုပ်သေး ( ၁ )ထုပ်လျှင် ( ၆၀၀)ကျပ်ဖြင့် လည်းကောင်း၊ မျှစ်စိမ်း ( ၂၅) ကျပ်သား လျှင်(၁၀၀၀)ကျပ်၊ မျှစ်ပြုတ်( ၁၀)ကျပ်သားလျှင် (၅၀၀)ကျပ်ဖြင့် လည်းကောင်း ရောင်းချလျက်ရှိရာ မျှစ်စိမ်းများလှိုင်လှိုင်ပေါများလာသောကြောင့် ဈေးနှုန်းထပ်မံ ကျင်းဆင်းလာနိုင်ကြောင်း သိရသည်။

DOCA(စစ်ကိုင်း)

  စစ်ကိုင်းတိုင်းဒေသကြီး၊ မုံရွာခရိုင်၊ မုံရွာမြို့နယ်ရှိ ချင်းတွင်းရတနာဈေး၊ မန်းကျည်းပင်ဈေး၊ သာစည်ဈေး၊ ဗန္ဓုလဈေး၊ ပြည်ထောင်စုဈေးနှင့်  ဝန်ထမ်းအိမ်ရာရှိ နန္ဒဝန်ဈေးသစ်တို့တွင် စက်တင်ဘာလတတိယပတ်တွင် ရောင်းချနေသော ကွမ်းသီးနှင့် ကွမ်းရွက် ဈေးနှုန်းများအနေဖြင့် ကွမ်းသီး(ရှယ်) ( ၁ ) ပိဿာလျှင်( ၃၀၀၀၀) ကျပ်ဖြင့်လည်းကောင်း၊ အလတ်စ ( ၁ )ပိဿာလျှင် ( ၂၅၀၀၀) ကျပ်ဖြင့် လည်းကောင်း၊ အသင့် ( ၁ ) ပိဿာလျှင် (၂၃၀၀၀)ကျပ်ဖြင့်လည်းကောင်း၊ ကွမ်းရွက် ( ရှယ်)  ( ၁ ) ပိဿာလျှင် ( ၇၀၀၀) ကျပ်ဖြင့်လည်းကောင်း၊ အလတ်စား ( ၁ )ပိဿာလျှင် ( ၅၀၀၀) ကျပ်ဖြင့် လည်းကောင်း၊ အသင့် ( ၁) ပိဿာလျှင် ( ၃၀၀၀)ကျပ်ဖြင့် လည်းကောင်း ဈေးနှုန်း အသီးသီးဖြင့် ရောင်းချလျက်ရှိပြီး စက်တင်ဘာလ ဒုတိယပတ်တွင် ၁ပိဿာလျှင် ( ၉၀၀၀)မှ ( ၁၀၀၀၀)ကျပ်ထိရှိခဲ့ရာ ယခုတတိယပတ်ဈေးနှုန်းများနှင့် နှိုင်းယှဉ်ကြည့်လျှင် ကွမ်းရွကဈေးများ ကျဆင်းလာကြောင်း သိရသည်။

DOCA(စစ်ကိုင်း)

  ကြံခင်းမြို့ရောက်လျှင် ထမင်းသုပ်သည် မဖြစ်မနေ စားသုံးကြသည့် ဒေသထွက်စားသောက် ကုန်တခုဖြစ်ပြီး မြို့မ ရပ်ကွက်တိုင်းတွင် ထမင်းသုပ်ဆိုင်များလည်းရှိကြပါသည်။ ဧရာဝတီတိုင်း‌ဒေသ ကြီး၊ မြန်အောင်ခရိုင်၊ ကြံခင်းမြို့နယ်၊ အောင်ချမ်းသာလမ်း၊ ရွာသစ်ရပ်ကွက်တွင် ဒေသထုတ်ကုန် ဖြစ်သော “သန့်ဇင်” ထမင်းသုပ်လုပ်ငန်းအား ကြံခင်းမြို့နယ်တာဝန်ခံမှ (၁၅.၉.၂၀၂၅)ရက်နေ့ နံနက် (၀၉:၀၀)နာရီအချိန် တွင် ကွင်းဆင်းလေ့လာခဲ့ပါသည်။

          ထိုသို့ကွင်းဆင်းခဲ့ရာတွင် ထုတ်ပိုးရောင်းချသည့် ကုန်စည်များတွင် ကုန်အညွှန်းအမှတ်အသား ပြည့်စုံမှန်ကန်စွာ ဖော်ပြခြင်းရှိ/မရှိ စစ်ဆေးခဲ့ပြီး၊ ထုတ်လုပ်မှုအခြအနေ၊ အရောင်းအဝယ်ဖြစ်မှု အခြေ အနေများအား မေးမြန်းဆွေးနွေးခဲ့ပါသည်။ ၅ ရက်လျှင် တစ်ကြိမ် ထမင်းတစ်ပန်းကန်စာနှင့် အသင့်သုပ် စားနိုင်သော အသင့်စား ထမင်းသုပ် အထုပ်ငယ် ၁၀၀၀ ထုပ် ပုံမှန် ထုတ်လုပ်ဖြန့်ဖြူးလျက်ရှိပါသည်။ ထမင်းသုပ်တွင် ပါဝင်ပစ္စည်း (၆) မျိုးရှိပြီး ၎င်းတို့မှာ (၁) ပဲဆီသန့် ဆီချက်(၂) ငံပြာရည်(၃) ကုလားပဲ အကြက်မှုန့် (၄)  ငရုတ်အကြမ်းကြော်  (၅)  ပုဇွန်ခြောက်မှုန့်  (၆)  ကြက်သွန်ဖြူကြော် တို့ဖြစ်ပါသည်။ တချို့ကလည်း ပုဇွန်ခြောက်မှုန့်အစား ငါးကျည်းခြောက်မှုန့်ကိုသုံးစွဲကြသည်ကို တွေ့ရပါသည်။ အထုပ် ၁၀၀၀ လျှင် လုပ်သားခ အပါအဝင် ကုန်ကျစရိတ် ၁၀ သိန်းဝန်းကျင် ကုန်ကျပြီး အကျိုးအမြတ် အနေဖြင့် ၂ သိန်းကျပ်ခန့် ရရှိပါသည်။ အသင့်စား စားစရာများ ထွန်းကာလာသည့်အခါ ကြံခင်းထမင်း သုပ်လုပ်ငန်းသည်လည်း ခေတ်နှင့် အညီ ပါဝင်ပစ္စည်းများကို အသင့်ထုတ်ပိုး၍ ထမင်းတစ်ခါပြင်စာ အတွက် Ready Made အထုပ်များ အဖြစ် ဈေးကွက်ဝင်ရောက်လာပြီး ယခုအခါ မြို့နယ်အနှံသို့ ဖြန့် ဖြူးရောက်ရှိလာသော နံမည်ကြီး ဒေသထွက်ကုန်တစ်ခုဖြစ်လာခဲ့ကြောင်း သတင်းရရှိပါသည်။

DOCA (ဧရာဝတီ)