ပြည်တွင်းကုန်သွယ်မှုသတင်း

        ရှမ်းပြည်နယ်၊ တောင်ပိုင်းတွင်တည်ရှိသော သီပေါမြို့နယ်သည် နာနတ်သီးအများဆုံး ထွက်ရှိရာ ဒေသဖြစ်ပြီး  သီပေါဘက်မှ နာနတ်သီးများကို ပြည်တွင်းဈေးကွက်အပြင် တရုတ်နိုင်ငံ၊ စင်ကာပူနိုင်ငံ၊ ထိုင်းနိုင်ငံ၊ မလေးရှားနိုင်ငံ၊ ဂျပန်နိုင်ငံနှင့် တောင်ကိုရီးယားနိုင်ငံများသို့ ရေလမ်း၊ လေကြောင်းလမ်း များမှတစ်ဆင့် တင်ပို့ ရောင်းချလျက်ရှိကာ မူဆယ်နယ်စပ်မှတစ်ဆင့် တရုတ်နိုင်ငံသို့ အများဆုံးတင်ပို့ လျက်ရှိပါသည်။ သီပေါနာနတ်သီးများသည် တရုတ်ဈေးကွက်တွင် ရှမ်းနာနတ်အဖြစ် အမှတ်တံဆိပ် တည်ဆောက်နိုင်ခဲ့ပြီး ပြည်ပဈေးကွက်အတွက် အရည်အသွေးနှင့် စံချိန်စံညွှန်း ပြည့်မီနေပါသည်။

       ပဲခူးတိုင်းဒေသကြီး၊  တောင်ငူခရိုင်၊ တောင်ငူမြို့နယ်အတွင်းရှိ ဈေးများနှင့် ကားလမ်းဘေး များတွင် ရှမ်းပြည်နယ်၊ သီပေါမြို့မှ နာနတ်သီးများကို ရောင်းချလျက်ရှိနေပါသည်။ သီပေါဘက်မှ လာသော နာနတ်သီးတွင် ပျားရည်နာနတ်နှင့် ကျောက်စိမ်းနာနတ်ဟူ၍ နှစ်မျိုးရှိပြီး အခြားနာနတ်သီး များထက် ပိုမိုချိုမြိန်ပြီး အနံ့ မွှေးကြိုင်ပါသည်။ ယခင်နှစ်က နာနတ်သီးတစ်လုံးလျှင် ၂၀၀၀ ကျပ်မှ ၂၅၀၀ ကျပ် အထိ ရောင်းချခဲ့ပြီး ယခု၂၀၂၅ ခုနှစ်၊ ဩဂုတ်လတွင် နာနတ်သီးတစ်လုံးလျှင်  ၃၀၀၀ ကျပ်ဖြင့် ရောင်းချ လျက်ရှိကာ ယခင်နှစ်ထက် ဈေး အနည်းငယ်သာမြင့်တက်သွားခဲ့ပြီး ယခုနှစ်တွင်လည်း နာနတ်သီးများ အရောင်းသွက်လျက်ရှိကြောင်း သိရသည်။

DOCA(ပဲခူး)

            ရမည်းသင်းမြို့နယ်တွင် ဩဂုတ်လ တတိယပတ်၌ စပါးဈေးကွက်မှာ အရောင်းအဝယ် အေးနေကြောင်း သိရသည်။ ဒေသတွင်း စိုက်ပျိုးထွက်ရှိသော စပါးမျိုးမှာ ပဒေသာ၊ မနောသုခ၊ ထိုင်းနှံကောက် မျိုးများစိုက်ပျိုးကြရာ နွေစပါးအနေဖြင့် မနောသုခနှင့် ထိုင်းနှံကောက်များထွက်ရှိရာ ဒေသတွင်းစပါး ပွဲစားများနှင့် ဆန်စက်များသို့ ရောင်းချရပါသည်။ ယခုနှစ်နွေစပါးမှာ ဇွန်လမှစ၍ ရိတ်သိမ်းခဲ့ရာ ဈေးကွက်သို့ တင်ပို့ရာတွင် အဝယ်အေးကြောင်းသိရသည်။ ဩဂုတ်လလယ်၌ ဖြစ်ပေါ်နေသော နွေးစပါး အသစ်ဈေးများမှာ စပါး တစ်တင်းလျှင် မနောသုခမှာ (၁၂၅၀၀-၁၃၀၀၀) ကျပ်၊ ထိုင်းနှံကောက်မှာ (၁၁၅၀၀) ကျပ် ဈေးရှိပြီး၊ ယခင်မိုးစပါးဈေးများမှာ အစိုဓါတ်အနည်းငယ် လျော့လာပြီဖြစ်၍ စပါးတစ်တင်းလျှင် မနောသုခမှာ (၁၈၀၀၀) ကျပ်၊ ထိုင်း နှံကောက်မှာ (၁၂၀၀၀) ကျပ်၊ မဂျမ်းတော (ပဒေသာ) မှာ (၂၆၀၀၀) ကျပ် ဈေးရှိကြောင်း ဆန်စက်ပိုင်၊ စပါးပွဲစားများထံမှ သိရှိရပါသည်။

DOCA(မန္တလေး)

             မိတ္ထီလာဈေးကွက်၌ ဩဂုတ်လအတွင်း ဆားဈေးကွက်မှာ အရောင်းအဝယ်အေး၍ ဈေးငြိမ်နေကြောင်း သိရသည်။ ဆားဈေးကွက် ရိုးရိုးဆား၊ အိုင်အိုဒင်းဆားဟူ၍ ရှိသော်လည်း ရိုးရိုးဆားမှာ အရောင်းပိုသွက်သည်ကို တွေ့ရသည်။ မိတ္ထီလာဈေးကွက်သို့ ရိုးရိုးဆားကို ဧရာဝတီတိုင်းဒေသကြီးမှ၊ အိုင်အိုဒင်းဆားကို ရန်ကုန်မှ တင်သွင်းကာ ရိုးရိုးဆားကို လက်လီအနေဖြင့် တစ်ပိဿာ၊ ငါးဆယ်ကျပ်သား၊ နှစ်ဆယ့်ငါးကျပ်သား၊ အိုင်အိုဒင်းဆားကို သုံးဆယ်ကျပ်သား အထုပ်များပြန်လည်ထုပ်ပိုး ကာရောင်းချကြပါသည်။ ဆားဈေးကွက်မှာ နွားစာသိုလှောင်ချိန် ဖေဖော်ဝါရီလ၊ မကျီးရွက်၊ သရက်သီးတို့  ဆားစိမ်သည့် မတ်၊ ဧပြီလများတွင် အရောင်းအဝယ်သွက်ပြီး၊ ဆားဈေးနှုန်းမှာ မြန်မာနိုင်ငံသို့ မိုးဦးကာလမုန်တိုင်းဝင်ချိန် သင်္ကြန်ပြီးကာလ၌ ဈေးတက်လေ့ရှိကြောင်းသိရသည်။ မိတ္ထီလာမြို့နယ်တွင် အရောင်းအဝယ်ဖြစ်သော ဈေးနှုန်းမှာ လက်ကားဈေးမှာ (၂၅) ပိဿာတစ်အိတ်လျှင် (၃၈၅၀၀) ကျပ်၊ တစ်ပိဿာ လက်ကားဈေး (၁၅၅၀) ကျပ်၊ လက်လီ တစ်ပိဿာလျှင် (၁၆၀၀) ကျပ်၊ (၅၀) ကျပ်သားပါ တစ်ထုပ်လျှင် (၁၀၀၀) ကျပ်၊ (၂၅) ကျပ်သားတစ်ထုပ်လျှင် (၅၀၀) ကျပ်၊ အိုင်အိုဒင်းဆားတစ်ထုပ် (၁၀၀၀) ကျပ်ဈေးရှိပြီး၊ သင်္ကြန်နောက်ဈေးငြိမ်နေကြောင်း၊ တောင်သူများအနေဖြင့် ဆားကို နွားစာသိုလှောင်ချိန်မှာပင် တစ်နှစ်စာဝယ်ယူမှုများကြောင်း သိရှိရပါသည်။

DOCA(မန္တလေး)

           မိတ္ထီလာမြို့၊ မြို့မဈေးကြီးရှိ ဖြိုးဝေကုန်စိမ်းတန်းတွင် နယ်ခုံမှ ဝင်ရောက်သောကုန်စိမ်းများအနက် ကျောက်ဖယုံသီးမှာလည်း အပါအဝင်ဖြစ်ပါသည်။ ကျောက်ဖယုံသီးမှာ မိတ္ထီလာဈေးကွက်အတွင်း ဝမ်းတွင်း၊ သာစည်တို့မှ ဝင်ရောက်ပြီး၊ မိတ္ထီလာမြို့မဈေးကြီးမှတဆင့် လက်လီဈေးများ၊ ကျေးရွာများမှ ဝယ်ယူသူများကို လက်လီ၊ လက်ကားပြန်လည်ရောင်းချကြပါသည်။ ကျောက်ဖယုံသီးမှာ နွေဦးကာလ ရှင်ပြုအလှူပြုလုပ်သည့်ကာလများတွင် ပိုမိုအရောင်းသွက်ပြီး၊ ယခုအချိန်မှာတော့ အရောင်းအဝယ် ပုံမှန်ရှိကြောင်း၊ ကျောက်ဖယုံသီးတစ်လုံးလျှင် အလုံးကြီး၊အသေးအပေါ်မူတည်ပြီး (၂၀၀၀-၃၀၀၀) ကျပ်ရှိကြောင်းနှင့် ကာလကြာရှည်စွာအထားခံကြောင်း ကုန်စိမ်းပွဲရုံများမှ သိရှိရပါသည်။

DOCA(မန္တလေး)

           စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံးမှ ရမည်းသင်းမြို့နယ်တာဝန်ခံ၊ ဦးစန်းအောင် (ဒု-ဦးစီးမှူး) သည် ၁၅.၈.၂၀၂၅ ရက်၊ နံနက် (၁၀.၃၀) နာရီအချိန်တွင် ရမည်းသင်းမြို့နယ် သိမ်ကုန်းစံပြကျေးရွာရှိ ဦးဆန်းဝင်း၏ ဒေသထုတ်ကုန်ပဲကြော်၊ ပဲလှော်လုပ်ငန်းအား သွားရောက်ကွင်းဆင်းစစ်ဆေး ခဲ့ပါသည်။

         ကွင်းဆင်းရာတွင် မြို့နယ်တာဝန်ခံမှ ဒေသထုတ်ကုန် MSME လုပ်ငန်းများ၏ ဖွံ့ဖြိုးတိုးတက်မှုအခြေအနေ၏၊ ထုတ်လုပ်နိုင်မှုအခြေအနေ၏၊ ဈေးနှုန်းဈေးကွက်အခြေအနေ၊ အကျိုးအမြတ်ရရှိမှုအခြေအနေနှင့် ဈေးကွက်တင်ပို့နိုင်မှုအခြေအနေများအား မေးမြန်းဆောင်ရွက်ခဲ့ပါသည်။ ကုန်ကြမ်းဖြစ်သော ပဲများကို မန္တလေး၊ မိတ္ထီလာ ၊တပ်ကုန်း၊ လယ်ဝေးမြို့နယ်မျာမှ ဝယ်ယူရသည်ဟု သိရပါသည်။ ပဲကြီး တစ်ပိဿာလျှင် ၆၅၀၀ ကျပ်၊ ကုလားပဲခြမ်းတစ်ပိဿာလျှင် ၆၀၀၀/ကျပ်၊ မြေပဲတစ်ပိဿာလျှင် ၇၅၀၀/ကျပ်၊ တရုတ်ပဲကြီးတစ်ပိဿာလျှင် ၁၃၀၀၀/ကျပ်၊ ရွှေယင်းမာပဲတစ်ပိဿာလျှင် ၄၀၀၀/ကျပ်၊  ထောပတ်ပဲတစ်ပိဿာလျှင် ၅၀၀၀/ကျပ် ဈေးနှုန်းဖြင့် ဝယ်ယူရပါသည်။ ပဲကြော်၊ ပဲလှော်လုပ်ငန်းကို လက်ရှိလုပ်သား(၂၀)ဦး၊ ပဲကြော်ဖို(၂)ဖို၊ ပဲလှော်ဖို(၄)ဖိုဖြင့် လုပ်ကိုင်ဆောင်ရွက်လျက်ရှိကြောင်း သိရပါသည်။ ပဲကြော်ရန်အတွက် (၁)ရက်လျှင် စုစုပေါင်းပဲကုန်ကြမ်း(၁၅၀)ပိဿာခန့်ကြော်ပြီး ကုန်ချော (၁၄၅)ပိဿာ ခန့်ထွက်ရှိကြောင်း၊ ပဲလှော်ပြုလုပ်ရန်အတွက် စုစုပေါင်းကုန်ကြမ်း(၂၂၅)ပိဿာ ခန့်ရှိပြီး ကုန်ချော(၂၀၀)ပိဿာခန့်ထွက်ရှိကြောင်း သိရှိရပါသည်။ ပဲဖူးကြော် တစ်ပိဿာလျှင် (၁၂၀၀၀)ကျပ်၊ ကုလားပဲခြမ်းကြော်တစ်ပိဿာလျှင်(၉၀၀၀/)ကျပ်၊ တရုတ်ပဲကြော်တစ်ပိဿာလျှင်(၁၃၀၀၀/)ကျပ်၊  မြေပဲကြော်တစ်ပိဿာလျှင်(၁၁၅၀၀)ကျပ်၊ ပဲကြီးလှော်တစ်ပိဿာလျှင်(၇၅၀၀/)ကျပ်၊ ရွှေယင်းမာပဲ လှော်တစ်ပိဿာလျှင်(၇၅၀၀)ကျပ်၊ ကုလားပဲလုံးလှော်တစ်ပိဿာ (၉၀၀၀)ကျပ်၊ ထောပတ်ပဲလှော် တစ်ပိဿာ(၉၅၀၀)ကျပ်၊ မြေပဲဆားလှော်တစ်ပိဿာ (၁၂၅၀၀)ကျပ် ဖြင့်ရောင်းချရကြောင်းသိရပါ သည်။ (၁)ရက်လျှင်ကုန်ကြမ်းပဲအပါအဝင် အလုပ်သမားခ၊ ဆီနှင့် အထွေထွေစုစုပေါင်းကုန်ကျစရိတ် (၃၅)သိန်းခန့်ရှိပြီး ကုန်ချောဖြစ်သည့်ပဲကြော်၊ ပဲလှော်ရောင်းရငွေမှာ(၄၀)သိန်းခန့်ရရှိသည့်အတွက် အကျိုးအမြတ်အနေဖြင့် (၅)သိန်းခန့်ရှိကြောင်း၊ ပဲလှော်ပဲကြော်များကို ဒေသတွင်းရှိအရောင်းဆိုင်များတွင်လည်းကောင်း၊ ပျော်ဘွယ်၊ တပ်ကုန်မြို့များသို့လည်းကောင်း တင်ပို့ရောင်းချကြကြောင်း သိရှိရပါသည်။

DOCA(မန္တလေး)