ပြည်တွင်းကုန်သွယ်မှုသတင်း

    ညောင်လေးပင်ခရိုင်အတွင်းရှိ ဒိုက်ဦးမြို့နယ်သည် ရန်ကုန် - တောင်ငူ - မန္တလေး လမ်းဘေး၏ အချက်အချာကျသော နေရာတွင်တည်ရှိပြီး စိုက်ပျိုးရေးကောင်းမွန်သော နေရာဒေသတစ်ခုလည်း ဖြစ်ပါသည်။ ဒိုက်ဦးမြို့နယ်တွင် အဓိကအားဖြင့် စပါး၊ ပြောင်း၊ နေကြာ၊ ဖရဲ စသည့် သီးနှံများ ရောင်းဝယ်ဖောက်ကားလျက်ရှိသည်။

      ယခုအခါ ညောင်လေးပင်ခရိုင်၊ ဒိုက်ဦးမြို့နယ်အတွင်းရှိ ဈေးကွက်အတွင်းတွင် ဖူးစားပြောင်း (ထိုင်ဝမ်) ပြောင်းများ ဝင်ရောက်မှုများပြားလျက် ရှိကြောင်း သိရှိရပါသည်။ ဖူးစားပြောင်းများကို ဒိုက်ဦးမြို့နယ်အတွင်းရှိ အိမ်ခြေလေးဆယ်ကျေးရွာ၊ ရွာဝိုင်းကြီးကျေးရွာ၊ မလေးစုကျေးရွာတို့မှ အများအပြားစိုက်ပျိုးလျက်ရှိပြီး ရေသွင်းစိုက်ပျိုးလျက် ရှိကြောင်း သိရပါသည်။ ဖူးစားပြောင်း (ထိုင်ဝမ်) ပြောင်းမျိုးစေ့ ဈေးနှုန်းများမှာ ပြောင်းမျိုးစေ့ (၁)ဖာလျှင် (၉၂၀၀၀) ကျပ်ရှိပြီး တစ်ဧကလျှင် (၆)ဖာခန့် စိုက်ပျိုးနိုင်ကြောင်း သိရှိရပါသည်။ ထွန်ယက်ခမှာ တစ်ဧလျှင် ပျမ်းမျှ (၈၀၀၀၀) မှ (၁၀၀၀၀၀) ခန့်အထိ ကုန်ကျနိုင်ပြီး ဓာတ်မြေဩဇာနှင့် ပိုးသတ်ဆေးဖြန်းခအနေဖြင့် ကျပ် (၃၀၀၀၀၀) ခန့်၊ အထွေထွေ ကုန်ကျစရိတ်အနေဖြင့် ပျမ်းမျှ ကျပ် (၃၀၀၀၀၀) အထိ ကုန်ကျနိုင်ကြောင်း သိရှိရပါသည်။ စုစုပေါင်းကုန်ကျစရိတ်အနေဖြင့် ကျပ်ခုနှစ်သိန်းကျော်ခန့် ကုန်ကျနိုင်ပြီး ပြောင်းဖူးဈေးနှုန်းများမှာ အရွယ်အစားအလိုက် ပြောင်းလဲမှု ရှိနိုင်ပါသည်။ တစ်ဧကလျှင် ပျမ်းမျှ ပြောင်းဖူး (၈၀၀၀) မှ (၉၀၀၀)ခန့်အထိ ထွက်ရှိနိုင်ပြီး ပြောင်းဖူးအကြီး တစ်ဖူးလျှင် ကျပ် (၇၀၀) ခန့်အထိရှိပြီး ပြောင်းဖူးအသေးတစ်ဖူးလျှင် ကျပ် (၄၀၀) ခန့်အထိ ရှိနိုင်ပါသည်။ ဈေးဒိုင်များတွင် သွားသွင်းလျှင် ဈေးနှိမ်ခံရနိုင်ပြီး ဈေးကွက်များတွင် ကိုယ်တိုင်လိုက်ရောင်းလျှင် ဈေးကောင်းရရှိနိုင်ကြောင်း သတင်းရရှိပါသည်။

DOCA(ပဲခူး)

     ပဲခူးတိုင်းဒေသကြီး ပေါင်းတည်မြို့၌ ဝဲကြီးရေလှောင်တမံမှ စိုက်ပျိုးရေးရယူကာ ပြည်တွင်း စားသုံးမှု ဖူလုံရေးနှင့် နိုင်ငံ့စီးပွားမြှင့်တင်ရေးတို့အတွက် နွေစပါးစိုက်ပျိုးထုတ်လုပ်ရေး စီမံကိန်းကို နှစ်စဉ်ဆောင်ရွက်ခဲ့ကြရာ ယခုနှစ်တွင် မြို့နယ်စိုက်ပျိုးမွေးမြူမှုကြီးကြပ်ရေးအဖွဲ့က တောင်သူများ နှင့်ပူးပေါင်းကာ ဆက်လျက်ဆောင်ရွက်လျက်ရှိကြောင်း သိရပါသည်။

     ထိုသို့ဆောင်ရွက်ရာ၌ ဝဲကြီးရေလှောင်တမံအတွင်း ရေဝင်ရောက်သိုလှောင်ထားရှိမှု အခြေအနေ၊ နွေစပါးစိုက်ပျိုးမည့် စိုက်ပျိုးမြေဧရိယာနှင့် ရေဖြန့်ဝေနိုင်မှု အခြေအနေများကို ကွင်းဆင်း စစ်ဆေးကြည့်ရှု့ခဲ့ကြပြီး ယခုနှစ်အတွင်း နွေစပါးစိုက်ပျိုးရန် ၂၆၃၄၃ဧက လျာထားသတ်မှတ် ခဲ့ကြောင်းသိရပါသည်။

      ထိုနွေစပါးစိုက်ပျိုးရေးအတွက် ဝဲကြီးရေလှောင်တမံမှ ၂၀၂၆ခုနှစ် ဇန်နဝါရီလမှ စတင်၍ စိုက်ပျိုးရေးပေးဝေနိုင်ရေးကို ဆည်မြောင်းဦးစီးဌာနက ကွင်းဆင်းဆောင်ရွက်လျက်ရှိပါသည်။ တောင်သူများအနေဖြင့် နွေစပါးများဖြစ်ထွန်းအောင်မြင်ရေးအတွက် စိုက်ပျိုးမည့်မြေများ၌ ကြိုတင် ထွန်ယက်ကာ နွေထယ်ရေးခံခြင်း၊ မြေပြုပြင်ခြင်းနှင့် လယ်ကြားမြောင်းများ တူးဖော်ခြင်း များကို ကြိုတင်လုပ်ကိုင်လျက်ရှိကြောင်း သိရပါသည်။

DOCA(ပဲခူး)

   ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်တွင် ဒေသထွက် မုံလာဥဖြူကို စပါးရိတ်သိမ်း ပြီးချိန် မြေပြန့်လွင်ပြင်၊ ဥယျာဉ်ခြံများတွင် နွေ၊ မိုး၊ ဆောင်း ရာသီမရွေး စိုက်ပျိုးနိုင်သော်လည်း ဆောင်းရာသီ၌သာ အများဆုံးစိုက်ပျိုးကြပါသည်။ မြေပြန့်ဥယျာဉ်ခြံဒေသများဖြစ်သော တောင်ပေါ် (၅) အုပ်စု၊ လွယ်မွေအုပ်စုတို့တွင် တစ်နိုင်တစ်ပိုင် စိုက်ပျိုးကြောင်း သိရပါသည်။

          မုန်လာဥဖြူကို စတင်စိုက်ပျိုးသည့် အောက်တိုဘာနှင့် နိုဝင်ဘာလများတွင် မြေကိုထွန်ယက် ၍ ဘောင်စနစ်ဖြင့်စိုက်ပျိုးကာ ဇန်နဝါရီလတွင် ထွက်ရှိကြောင်း သိရပါသည်။ တစ်ဧက၏ စိုက်ပျိုးမှု အတွက် သွင်းအားစုများ၊ ကွန်ပေါင်းဓာတ်မြေဩဇာ၊ မြေဆွေး၊ စပါးခွံ၊ ပိုးသတ်ဆေး၊ နွားချေး၊ လုပ်သားခ စသည်တို့သည် ယခုနှစ်တွင် တစ်ဧကလျှင် သွင်းအားစု စုစုပေါင်း (၁၇) သိန်းခန့် ကုန်ကျ ကြောင်း တောင်သူကြီးများထံမှ သိရှိရပါသည်။

          ၂၀၂၅-၂၀၂၆ ခုနှစ်၊ ဒီဇင်ဘာလတွင် ထွက်ရှိသော မုန်လာဥဖြူများသည် တစ်ဧကလျှင် မုန်လာဥပေါင်း (၅၀၀၀-၆၀၀၀) ခန့် ထွက်ရှိကြောင်း သိရှိရပါသည်။ ထွက်ရှိသော မုန်လာဥဖြူများကို ကျိုင်းတုံမြို့မဈေး၊ အာခါဈေး၊ ယန်းခမ်းဈေးတို့၌ အရွယ်အစားပေါ်မူတည်၍ လက်ကားဈေးနှုန်း တစ်ဥလျှင် (၈၀၀-၁၀၀၀) ကျပ်ခန့်ဖြင့် ဖြန့်ဖြူးရောင်းချကြောင်း သိရပါသည်။ မုန်လာဥဖြူ ရောင်းရ ငွေမှာ လက်ကား အနိမ့်ဆုံးဈေးဖြင့်တွက်လျှင် (၄၀) သိန်းခန့်ရရှိ၍ တစ်ဧက၏ အထွေထွေ ကုန်ကျစရိတ် (၁၇) သိန်းနုတ်လျှင် မုန်လာဥဖြူစိုက် တောင်သူကြီးများအနေဖြင့် တစ်ဧကကို အကျိုးအမြတ်မှာ (၂၃) သိန်းခန့် ရရှိကြောင်း သိရှိရပါသည်။

DOCA(ရှမ်း)

                      ပဲမျိုးစုံစိုက်ပျိုးထုတ်လုပ်ရာတွင် မတ်ပဲသည် မြန်မာနိုင်ငံအတွက် အရေးပါသော သီးနှံတစ်မျိုး ဖြစ်သည်။ မတ်ပဲကို အစိုဓါတ်နှင့် မြေဆီလွှာ အာဟာရ အနည်းငယ်သာရှိသော မြေများတွင်လည်း စိုက်ပျိုးနိုင်သည်။ မတ်ပဲကိုများသောအားဖြင့် ဆောင်းတွင်းပိုင်းတွင် ပိုမိုစိုက်ပျိုးကြပြီး၊ မိုး တွင်းပိုင်းတွင် အနည်းငယ် စိုက်ပျိုးကြပါသည်။ မတ်ပဲသည် နိုင်ငံခြားဈေးကွက်ရှိသော သီးနှံလည်း ဖြစ်ပါသည်။

                  မိုးသီးနှံမတ်ပဲကို ဇွန်လနှင့်ဇူလိုင်လများတွင် စိုက်ပျိုးပြီး၊ အောက်တိုဘာလနှင့် နိုဝင်ဘာလ များတွင် ရိတ်သိမ်းကြပါသည်။ဆောင်းသီးနှံ မတ်ပဲကို နိုဝင်ဘာလ၊ ဒီဇင်ဘာလနှင့် ဇန်နဝါရီလများတွင် စိုက်ပျိုးကြပြီးဖေဖော်ဝါရီလ၊ မတ်လ၊ ဧပြီလတွင်ရိတ်သိမ်းကြပါသည်။မတ်ပဲ တောင့်များကို အစိမ်းရောင်မှအနက်ရောင်သို့(၇၅)ရာခိုင်နှုန်းအထိ အရောင်ပြောင်းချိန်တွင် ရိတ်သိမ်းကြပါသည်။

          ယခင်နှစ် နိုဝင်ဘာလ တတိယအပတ်တွင် မတ်ပဲများ အသစ်ပေါ်ချိန်ဖြစ်၍ တစ်တင်းလျှင် ၆၀၀၀၀ ကျပ်၊ ယခုနှစ် ဇန်နဝါရီလတတိယအပတ် မတ်ပဲတစ်တင်းလျှင် ၉၂၀၀၀ ကျပ်ဖြစ်ကြောင်း မုံရွာကုန်စည်ဒိုင် ဈေးနှုန်းသတင်းအရ သိရပါသည်။

            မတ်ပဲကို ခွဲခြမ်းပြုလုပ်၍ မတ်ပဲဘယာကြော်၊ အပင်ပေါက်ဖောက်၍ မတ်ပဲပင်ပေါက်၊ ၎င်းအပင်ပေါက်ကို အချဉ်တည်၍ ပဲပင်ချဉ်အဖြစ် အမျိုးမျိုးပြုလုပ်ရောင်းချနေရခြင်းကြောင့် ပြည်တွင်းဈေးကွက်သာမက နိုင်ငံခြားဈေးကွက်ရှိသော သီးနှံဖြစ်သည့်အတွက် ကာလမရွေး ဈေးကွက်ဝယ်လိုအားရှိကြောင်း သိရှိရပါသည်။

DOCA(စစ်ကိုင်း)

                   စစ်ကိုင်းတိုင်းဒေသကြီး၊ ကနီမြို့နယ်အတွင်းရှိ ကျေးရွာများတွင် နှမ်း၊ မြေပဲ၊ နေကြာ၊ ဝါ၊ ဆန်စပါး၊ ကြက်သွန်နီနှင့် ပဲမျိုးစုံသီးနှံတို့ကို နှစ်စဉ်စိုက်ပျိုးလျက်ရှိရာ ကနီမြို့နယ်တွင် နေကြာသီးနှံ စိုက်ဧက  ၁၀ ဧကခန့် စိုက်ပျိုးထားရှိကြောင်း သိရသည်။

             နေကြာသီးနှံကို ဩဂုတ်လတွင် စိုက်ပျိုးပြီး နိုဝင်ဘာလတွင် စတင်ရိတ်သိမ်းကြကြောင်း၊ မျိုးစေ့အနေဖြင့် ဆင်းရွှေကြာ-၁မျိုးနှင့် ဆင်းရွှေကြာ-၂မျိုးများကို စိုက်ပျိုးကြကြောင်း၊ နေကြာသီးနှံကို သီးသန့် စိုက်ပျိုးမှုနှင့် သီးညှပ်စိုက်ပျိုးမှုဟူ၍ စိုက်ပျိုးကြပြီး တစ်ဧကလျှင် မျိုးစေ့ ၈ ပြည်ခန့် ကုန်ကျကြောင်း၊ စိုက်ပျိုးမှုကုန်ကျစရိတ်အနေဖြင့် နေကြာမျိုးစေ့၊ သွင်းအားစု၊ လုပ်သားခ အပါအဝင် တစ်ဧကလျှင် စုစုပေါင်း ငွေကျပ် ၄ သိန်းခန့် ကုန်ကျကြောင်း၊ နေကြာသီးနှံ အထွက်နှုန်းအနေဖြင့် တစ်ဧကလျှင် ၂၀-၂၅ တင်းခန့် ထွက်ရှိပြီး စိုက်ပျိုးမြေအနေအထားနှင့် သီးနှံဖြစ်ထွန်း အောင်မြင်မှု အပေါ်မူတည်၍ အထွက်နှုန်းများ ကွာခြားမှုရှိကြောင်း၊ ဈေးနှုန်းအနေဖြင့် နေကြာသီးနှံ ပေါ်စအချိန်တွင် နေကြာတစ်တင်းလျှင် ငွေကျပ်  ၇၀၀၀၀-၇၅၀၀၀ ဖြင့် အရောင်းအဝယ်ဖြစ်ခဲ့ပြီး တစ်ဧကလျှင် အကျိုးအမြတ်အနေဖြင့် ငွေကျပ် ၁၀ သိန်းကျော်ခန့် ရရှိကြောင်း သိရသည်။

          ယခု ဇန်နဝါရီလ တတိယပတ်တွင် နေကြာတစ်တင်းလျှင် ငွေကျပ် ၅၈၅၀၀ နှင့် နေကြာဆီ တစ်ပိဿာလျှင် ငွေကျပ် ၁၉၀၀၀ ဖြင့် အရောင်းအဝယ်ဖြစ်လျက်ရှိပြီး ဈေးကွက် အနေဖြင့် မုံရွာမြို့ရှိ ပွဲရုံများသို့ တင်ပို့ရောင်းချကြောင်း၊ နေကြာသီးနှံသည် စိုက်ပျိုးမှုကုန်ကျ စရိတ် သက်သာပြီး အကျိုး အမြတ်ရရှိသည့် သီးနှံဖြစ်သောကြောင့် နှစ်စဉ် စိုက်ပျိုးလျက်ရှိရာ ယခုအချိန်တွင်နေကြာသီးနှံများမှာ အဖူးအပွင့်များဝေဆာ၍ အောင်မြင်ဖြစ်ထွန်းလျက်ရှိကြောင်း သိရသည်။

DOCA(စစ်ကိုင်း)