ပြည်တွင်းကုန်သွယ်မှုသတင်း

                    မန္တလေးတိုင်းဒေသကြီး၊ ကျောက်ဆည်ခရိုင်အတွင်း ကျောက်ဆည်၊မြစ်သားမြို့နယ်များတွင် ၂၀၂၆-၂၀၂၇ ခုနှစ်၊မိုးချဉ်မျှင်ရှည်ဝါများ ပန်းတိုင်အထွက်နှုန်းရရှိရေး ရည်မှန်းချက်ထားဆောင်ရွက် လျက်ရှိရာ ကျောက်ဆည်မြို့နယ်တွင်(၁၀၅)ဧက၊ စဉ့်ကိုင်မြို့နယ်တွင်(၅၀)ဧက၊ မြစ်သားမြို့နယ် တွင် (၂၁၇၅)ဧက အစောစိုက်ပျိုးထားရှိမှုစုစုပေါင်း စိုက်ပျိုးဧက(၂၃၃၀)ဧက စိုက်ပျိုးထားကြောင်း သက်ဆိုင်ရာဌာန၏စာရင်းများအရသိရှိရပါသည်။ ဧပြီလနှင့်မေလများတွင် စတင်စိုက်ပျိုးကြပြီး ဇူလိုင်လနှင့်သြဂုတ်လများတွင် စတင်ထွက်ရှိမှာဖြစ်ကြောင်း ၊ကျောက်ဆည်မြို့နယ်အနေဖြင့် မိုးကြို ချည်မျှင်ရှည်ဝါသီးနှံများကို ကျောက်ဆည်မြို့အရှေ့ဘက် ဖျောက်ဆိပ်ပင်ကျေးရွာ အပါအဝင် ရဲဘော်ကြီး၊မှိုင်းပန်၊ကလေး၊ရှမ်းတောင်ဦး၊ရဲယမန်းရွာ၊တောင်တော်၊ ပေါင်လောင်၊ ကင်းကျေးရွာများ နှင့်မြစ်သားမြို့နယ်တွင် ဒိုင်း၊မြနဒီကျေးရွာများတွင်လည်းအများဆုံးစိုက်ပျိုးကြကြောင်း၊ ဝါစိုက်ပျိုး ရာတွင် ဘောင်ကြောင်းပေးစနစ်ဖြင့် အတန်းလိုက် စိုက်ပျိုးကျကြောင်း ၊ ဝါစိုက်ပျိုးမှုတွင် မျိုးအနေဖြင့် ငွေချည်-၆ ၊ ရွှေတောင် - ၈ မျိုးများကို အများဆုံး စိုက်ပျိုးကြပြီး (၁)ဧကလျှင် မျိုးထုပ်(၂-၃)ထုပ် အထိ ကုန်ကျကြောင်း၊ မျိုး(၁)ထုပ် စျေးနှုန်း အနေဖြင့် (၆၄၀၀၀-၆၉၀၀၀)ကျပ် စျေးဖြင့် ဝယ်ယူ စိုက်ပျိုးရကြောင်း၊ စိုက်ပျိုးစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၆၀၀၀၀၀/-)ကျပ်ခန့် ကုန်ကျပြီး (၁)ဧက အထွက်နှုန်းအနေဖြင့် ပိဿာ(၄၀၀-၅၀၀) ပိဿာခန့် ထွက်ရှိကြောင်း၊ ယခင် ဝါစျေးနှုန်းအနေဖြင့် ဝါ(၁)ပိဿာလျှင် (၃၈၀၀-၄၀၀၀)ကျပ် ၊ ဂွမ်း(၁)ပိဿာလျှင်(၉၅၀၀-၉၈၀၀)ကျပ် ၊ အရည်အသွေးကောင်းမွန်သော ဝါအသန့်(၁)ပိဿာလျှင် (၄၂၀၀)ကျပ်၊ ဂွမ်းအကောင်း(၁)ပိဿာလျှင် (၁၀၀၀၀)ကျပ် စျေးများဖြင့်အရောင်းအဝယ်ဖြစ်ခဲ့ပြီး  စိုက်ပျိုးစရိတ်နှုတ်ပြီး(၁၀၀၀၀၀၀/-)ကျပ်ခန့်မြတ်ကြောင်း၊ဇွန်လဒုတိယပတ််စျေးအနေဖြင့်ဝါ(၁)ပိဿာလျှင်(၅၀၀၀-၅၁၀၀)ကျပ်၊ ဂွမ်း(၁) ပိဿာလျှင်(၉၉၀၀-၁၀၀၀၀)ကျပ်၊ အရည်အသွေးကောင်းမွန် သောဝါအသန့်(၁)ပိဿာလျှင်(၅၂၀၀)ကျပ်၊ ဂွမ်းအကောင်း(၁)ပိဿာလျှင် (၁၁၀၀၀)ကျပ်စျေးနှုန်း များဖြင့်ရောင်းဝယ်လျှက်ရှိပါသည်။ဝါထွက်ပေါ်ချိန်တွင် တောင်သူများမှ ပွဲရုံများသို့ တိုက်ရိုက်တင်ပို့ ရောင်းချကြပြီး ပွဲရုံများမှတဆင့် မန္တလေးစက်မှုဇုံ၊ ယက်ကန်းစက်ရုံ၊ ချည်မျှင်စက်ရုံများသို့တင်ပို့ ရောင်းချလျှက်ရှိကြောင်း ဝါထွက်ပေါ်ချိန်တွင်လည်း စျေးနှုန်းများကောင်းမွန်ပါက တောင်သူများ အကျိုးအမြတ်ပိုမိုဖြစ်ထွန်း နိုင်မည်ဖြစ်ပါသည်။

DOCA(မန္တလေး)

             ကွမ်းစားသုံးသူများပြာလာသည့်အတွက် ကျောက်ဆည်မြို့နယ်အတွင်း ကျေးရွာများမှ ကွမ်းစိုက်ပျိုးသူများ အဆင်ပြေလျက်ရှိကြောင်း  သိရှိရပါသည်။ အင်းကုန်းကျေးရွာမှ ကွမ်းစိုက် တောင်သူများအနေဖြင့် ကွမ်းပင်(၄၀၀၀/၅၀၀၀)ခန့် စိုက်ပျိုးလျက်ရှိကြောင်း၊ ကွမ်းစိုက်ပျိုးမှုအား မိုးအကုန် ဆောင်းအကူးတွင် စိုက်ပျိုးလေ့ရှိကြကြောင်း၊ စိုက်ပျိုးပြီး(၂-၃)လအကြာတွင် အောက် အခြေအရွက်ကြမ်းများအား ခူးယူပြီး ကွမ်းနုများအား တစ်လလျှင်(၂)ကြိမ်ခူးယူရကြောင်း၊ ကွမ်းပင် ပိုးမွှားမကျ ကျန်းမာရေးကောင်းပါက မျိုးပင်အဖြစ် အခြားကွမ်းစိုက်သူများအား ကွမ်းညွန့်ဖြတ်၍ ရောင်းချလေ့ရှိကြောင်း၊ ကွမ်းခူးပတ်တစ်ပတ်လျှင် ကွမ်းပိဿာချိန်(၈၀-၁၀၀)ရရှိကြောင်း၊ ကွမ်းဈေးနှုန်းအနေဖြင့် ကွမ်းနုဝါ အချော တစ်ပိဿာလျှင် လက်ကားဈေး (၁၅၀၀၀/-)ကျပ်၊ အလတ် တစ်ပိဿာလျှင် (၁၂၀၀၀/-)ကျပ် ၊ အသေးတစ်ပိဿာလျှင် (၈၀၀၀/-)ကျပ် ဈေးများဖြင့် ရောင်းဝယ် လျက်ရှိပြီး၊ ကွမ်းအရော လက်ကားတစ်ပိဿာလျှင် (၉၀၀၀/-)ကျပ်ဖြင့် ရောင်းဝယ်လျက်ရှိကြောင်း၊ ကွမ်းရွက်များဖြိုင်ဖြိုင်ထွက်ရှိလာသဖြင့် ဈေးနှုန်းအနည်းငယ်ကျဆင်းလျက်ရှိကြောင်း၊ ကွမ်းစိုက်ပျိုး ခြင်းဖြင့် အိမ်ရှိမိသားစုအားလုံး စုပေါင်းလုပ်ဆောင်ရသည့် လုပ်ငန်းဖြစ်သည့်အပြင် ကွမ်းခူးခြင်း၊ ကွမ်းခွေခြင်း၊ ကွမ်းစီခြင်းလုပ်ငန်းများကြောင့်‌ ကျေးရွာနေပြည်သူများအတွက် ဝင်ငွေရသည့် လုပ်ငန်းဖြစ်ကြောင်း၊ ကွမ်းစိုက်ပျိုးသူများအနေဖြင့်လည်း ကွမ်းစိုက်ပျိုးခြင်းဖြင့် စီးပွားဖြစ်ဝင်ငွေတိုးကြောင်း ကွမ်းစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

          ကျောက်ဆည်မြို့နယ် ၊ ထားဝယ်ကျေးရွာတွင် နေ့စဉ်ဝင်ငွေရရှိပြီး မိသားစုစားဝတ်နေရေး အဆင်ပြေရန်အတွက် ဂန္ဓာမာပန်းမျိုးစုံကို နှစ်ပတ်လည် စိုက်ပျိုးရောင်းချသည့် မိသားစုများ ရှိကြောင်း၊ စိုက်ပျိုးထားသော ဂန္ဓာမာပန်းခင်းများ အောင်မြင်ဖြစ်ထွန်းလျက်ရှိပြီး နေ့စဉ်ခူးဆွတ် ရောင်းချရသဖြင့် မိသားစုစားဝတ်နေရေး အဆင်ပြေလျက်ရှိကြောင်း၊ ပန်းမျိုးအနေဖြင့် ရွှေစိမ်းအနီ၊ ခိုင်ချူး၊ စပယ်အဖြူ၊ စပယ်အဝါ၊ ကျောက်စိမ်း၊ရွှေဝါဝင်းစသည့် ပန်းမျိုးကွဲများစွာရှိကြောင်း၊ ပန်းပျိုး ပင်များကို ပြင်ဦးလွင်မြို့အနီးစခန်းကျေးရွာများမှ တစ်ပင်လျှင်(၂၅-၃၀)ကျပ်အထိ ပန်းအမျိုးအစား အလိုက် ဝယ်ယူစိုက်ပျိုးကြကြောင်း ၊ တစ်ဧက စိုက်ပျိုးမည်ဆိုပါက ပန်းပျိုးပင်ရေ(၆)သောင်းခန့် စိုက်ပျိုးနိုင်ကြောင်း ၊ စတင်စိုက်ပျိုးပြီး (၄)လခန့်အကြာတွင် စတင်ခူးဆွတ်ရောင်းချရကြောင်း ၊ ရောင်းချရာတွင် ပန်းခိုင်(၁၀)ခိုင်ခန့် ပါဝင်သောပန်းတစ်စည်းလျှင် ပန်းလှပမှုနှင့် ပန်းအမျိုးအစား ပေါ်မူတည်၍ လက်လီဈေးနှုန်းအနေဖြင့် (၃၀၀၀)ကျပ်နှုန်းခန့် ရောင်းချရကြောင်း၊ ပန်းစတင် ခူးဆွတ်ချိန်မှ အပြီးရိတ်သိမ်းချိန်အထိ ပန်းအစည်းပေါင်း (၂၅၀၀)ခန့် ထွက်ရှိပြီး၊ လက်ကားဈေး တစ်စည်းကို (၁၉၀၀/-)ကျပ်ဖြင့် ရောင်းချရသောကြောင့် တစ်ဧကကုန်ကျစရိတ်အနေဖြင့် မျိုး၊ သွင်းအားစု၊လုပ်သားခအပါအဝင် (၂၅)သိန်းခန့် ကုန်ကျပြီး အကျိုးအမြတ်အနေဖြင့် (၂၀)သိန်း ကျော် ကျပ်ခန့်အမြတ်ရရှိကြောင်း၊ ဂန္ဓာမာပန်းများကို နှစ်ပတ်လည်စိုက်ပျိုး ရောင်းချသူများ အနေဖြင့် နေ့စဉ်ဝင်ငွေရရှိပြီး အဆင်ပြေလျှက်ရှိကြောင်း သိရှိရပါသည်။

DOCA(မန္တလေး)

              မန္တလေးတိုင်းဒေသကြီး၊ ကျောက်ဆည်မြို့ရှိ ဒေသခံဈေးကွက်များအတွင်းသို့ နွေနှောင်း မိုးဦးရာသီပေါ် သီးနှံတစ်ခုဖြစ်သည့် ဒူးရင်းသီးများ စတင်ဝင်ရောက်လာပြီး မိသားစုအလိုက် စားသုံးသူ များနှင့် လက်ဆောင်ပေးလိုသူများကြောင့် အရောင်းအဝယ် စည်ကားလျက်ရှိကြောင်း၊ ဒူးရင်းသီးများကို အဓိကစိုက်ပျိုးရာ ဒေသအသီးသီးမှတဆင့် ရန်ကုန်-မန္တလေးအမြန်လမ်းမကြီးအတိုင်း ကုန်တင်မော်တော်ယာဉ်များဖြင့် သယ်ယူပို့ဆောင်ကာ မန္တလေးမြို့ပေါ်ရှိ သစ်သီးဝလံပွဲရုံများသို့ ပို့ဆောင်ပြီးနောက်၊ ၎င်းမန္တလေးပွဲရုံများမှတဆင့် ကျောက်ဆည်ဈေးကွက်အတွင်းသို့ ပြန်လည် ဖြန့်ဖြူး ဝင်ရောက်လျက်ရှိကြောင်း၊ ဒူးရင်းသီးဈေးနှုန်းအနေဖြင့် အသေးတစ်လုံးလျှင် (၈၀၀၀/-) ကျပ်၊ အလတ်တစ်လုံးလျှင် (၁၀၀၀၀-၁၂၀၀၀)ကျပ်၊ အကြီးတစ်လုံးလျှင် (၁၅၀၀၀/-)ကျပ်ဖြင့် ရောင်းဝယ်လျက်ရှိကြောင်း၊ ဒူးရင်းသီးအရွယ်အစား အကြီးအသေးနှင့် အမျိုးအစားပေါ် မူတည်၍ ဈေးနှုန်းအမျိုးမျိုး ကွဲပြားလျက်ရှိကြောင်း၊ အနံ့နှင့် အရသာ ထူးခြားကောင်းမွန်သည့် ဒူးရင်းသီးကို သစ်သီးဝလံများ၏ ဘုရင်အဖြစ်တင်စားကြပြီး လူကြိုက်များသော ရာသီစာဖြစ်သဖြင့် လူကြီး လူငယ်မရွေး အရွယ်စုံ၊ အလွှာစုံက ကြိုက်နှစ်သက်စွာ ဝယ်ယူစားသုံးလျက်ရှိကြောင်း၊ ဈေးကွက် အတွင်း အရောင်းအဝယ် အားကောင်းနေသည့် သီးနှံတစ်ခုဖြစ်ကြောင်းနှင့် စားသုံးသူများအနေနဲ့ မိမိတို့အဆင်ပြေသည့်ဈေးနှုန်းကို ရွေးချယ်ဝယ်ယူနိုင်ကြပါကြောင်း သစ်သီးဝလံရောင်းချသူတစ်ဦး ၏ ပြောကြားချက်အရ သိရှိရပါသည်။

DOCA(မန္တလေး)

               မန္တလေးတိုင်းဒေသကြီး ၊ ကျောက်ဆည်ခရိုင်သည် စိုက်ပျိုးရေးကို အဓိကထားလုပ်ကိုင် ဆောင်ရွက်သော ဒေသတစ်ခုဖြစ်ပြီး သီးနှံမျိုးစုံ စိုက်ပျိုးဖြစ်ထွန်းလျက်ရှိရာ ဈေးကွက်ဝယ်လိုအား ရှိသော သခွားသီးနှံကိုလည်း စိုက်ပျိုးလျက်ရှိကြောင်း၊ သခွားစိုက်ပျိုးမှုအနေဖြင့် မျိုးစေ့ဝယ်၍ ပျိုးထောင် စိုက်ပျိုးရကြောင်း၊ ပျိုးသက်တမ်း (၂၅)ရက်မတိုင်မီ စိုက်ခင်းထဲသို့ ပြောင်းရွေ့ စိုက်ပျိုးရ ကြောင်း၊ မျိုးစေ့ကို စိုက်ပျိုးရေးဆေးဆိုင်များမှ ဝယ်ယူစိုက်ပျိုးကြကြောင်း၊ သခွားမျိုးစေ့ တစ်ထုတ် လျှင် (၃၅၀၀၀-၄၀၀၀၀)ကျပ်ဖြင့် ဝယ်ယူရကြောင်း၊ တစ်ဧကမျိုး (၂၀၀)ဂရမ် စိုက်ပျိုးရကြောင်း၊ တစ်ဧက ကုန်ကျစရိတ်အနေဖြင့် မျိုး၊သွင်းအားစု၊ လုပ်သားခ၊ တိုင်ထောင်ဝါး၊ ပလပ် စတစ်လိပ်ဖိုး များအပါအဝင် စုစုပေါင်း (၆၀၀၀၀၀၀/-)ကျပ်ခန့် ကုန်ကျကြောင်း၊ သွင်းအားစုများ ပိုမိုသုံးစွဲပါက ကုန်ကျစရိတ် ပိုမိုများပြားနိုင်ကြောင်း၊ သခွားစိုက်ပျိုးရာတွင် တန်းကြားတစ်ပင်လျှင် (၃)ပေခြား၊ (၂)ပေခြား၍ စိုက်ပျိုးကြောင်း ၊ တစ်ဧကလျှင် အပင် (၇၀၀၀)ကျော်ခန့် ဝင်ဆန့်ကြောင်း ၊ စတင်အသီးသီးချိန်မှ (၃)လုံးအထိ တင်စေပြီး တင်းနစ်ဘောလုံး အရွယ်အစားရောက်လျှင် တစ်ပင်ကို (၂)လုံးသာ ယူကြောင်း၊ အသီးတင်ပြီး (၁၀)ရက်တစ်ကြိမ် သွင်းအားစုများ ထည့်ပေးရကြောင်း၊ စိုက်ပျိုးပြီး ရက်(၃၀)အကြာတွင် ပန်းများစတင်ပွင့်ပြီး ပန်းပွင့်ပြီး (၃၅)ရက်၊ (၄၅) ရက်တွင် အသီးများစတင်ခူးခွတ်နိုင်ပြီးဖြစ်ကြောင်း၊ စိုက်ပျိုးမှု မျိုးအနေဖြင့် ရွှေသခွား၊ ကျောက်စိမ်း သခွားနှင့် ပိုက်ကွက်သခွားမျိုးများကို စိုက်ပျိုးကြကြောင်း၊ ဇွန်လဆန်းတွင် စိုက်ပျိုးခဲ့သောကြောင့် စက်တင်ဘာလဆန်းပိုင်းတွင် ထွက်ပေါ်မည်ဖြစ်ကြောင်း၊ တစ်ဧကအထွက်နှုန်းအနေဖြင့် အလုံး ပေါင်း (၁၄၀၀၀)ခန့် ထွက်ရှိကြောင်း၊ ခရိုင်အတွင်း လက်ရှိစိုက်ပျိုးမှု အနည်းငယ်သာရှိပြီး စိုက်ပျိုး သောရွာမှာ မြေစိုရွာဖြစ်ကြောင်း၊ ယခုလက်ရှိဈေးကွက်အတွင်း ဝင်ရောက်နေသော သခွားသီးများ မှာ မြို့နယ်အတွင်း ထွက်ရှိသော အသီးများဖြစ်ပြီး သစ်သီးဆိုင်များမှ ဝင်ရောက်သော အသီး အနည်းငယ်သာရှိကြောင်း ထွက်ပေါ်ချိန်မှသာ အသီးများဖြိုင်ဖြိုင်ရောင်းချနိုင်မှာဖြစ်ကြောင်း သစ်သီးရောင်းချသော ဆိုင်ရှင်တစ်ဦး၏ ပြောကြားချက်အရ သိရှိရပါသည်။ သခွားဈေးနှုန်းအနေဖြင့် ကျောက်စိမ်းသခွား/ ပိုက်ကွက်သခွား တစ်လုံးလျှင် အလုံးသေး (၇၀၀၀/-)ကျပ်၊ အလုံးကြီး (၁၀၀၀၀/-) ကျပ်၊ ရွှေသခွား တစ်လုံးလျှင် အလုံးကြီး(၈၀၀၀/-) ၊ အလုံးသေး (၅၀၀၀/-) ကျပ်တို့ဖြင့် ရောင်းဝယ်လျက်ရှိကြောင်း ဈေးကွက်အနေဖြင့် မြို့ပေါ်ရှိ သစ်သီးဆိုင်များ၊ သစ်သီးပွဲရုံများနှင့် ဈေးများသို့ ရောင်းချလျက်ရှိပြီး ပွဲရုံများမှ တစ်ဆင့် မန္တလေးမြို့၊ ရန်ကုန်မြို့များသို့ တင်ပို့လျက်ရှိ ကြောင်း၊ သစ်သီးဆိုင်များမှ စိုက်ခင်းထဲ အရောက်လာရောက် ဝယ်ယူသူများလည်းရှိကြောင်း သိရှိရ ပါသည်။

DOCA(မန္တလေး)