သတင်းနှင့် လှုပ်ရှားမှုများ

          စားသုံးသူရေးရာဦးစီးဌာနအနေဖြင့် ပြည်တွင်း၊ ပြည်ပမှ ထုတ်လုပ်တင်သွင်းလာသည့် ကုန်စည်နှင့် ဝန်ဆောင်မှုများအပေါ် နိုင်ငံသားအားလုံး ဘေးအန္တရာယ်ကင်းရှင်းစွာ သုံးစွဲနိုင်ရေးအတွက် ထုတ်ကုန်လုံခြုံစိတ်ချရမှုရှိစေရေန် ဈေးကွက်စောင့်ကြည့်စစ်ဆေးရေးလုပ်ငန်းများကို အချိန်နှင့်တပြေးညီ ဆောင်ရွက်လျက်ရှိရာ စားသုံးသူရေးရာဦးစီးဌာန၊ ပြည်မြို့နယ်တာဝန်ခံနှင့် ဝန်ထမ်းများသည် (၂၀.၁.၂၀၂၆)ရက်နေ့၊ နေ့လည် (၁၃:၀၀)နာရီအချိန်တွင် မိတ်ဖက်ဌာနဆိုင်ရာများ ဖြစ်ကြသည့် ခရိုင် FDA၊ မြို့နယ်ရဲတပ်ဖွဲ့တို့မှ တာဝန်ရှိသူများပါဝင်သည့် မြို့နယ်အစား အသောက်နှင့် ဆေးဝါးကြီးကြပ်ကွပ်ကဲရေးကော်မတီဝင်များနှင့် ပူးပေါင်း၍ ပြည်မြို့၊ ခေတ္တရာရပ်ကွက်၊ ၅/၇ လမ်းရှိ Online Media မှ ကြော်ငြာရောင်းချနေသော တရားမဝင် အလှကုန်လူသုံးကုန်ပစ္စည်းများကို ရောင်းချနေမှုအား ရှောင်တခင်ကွင်းဆင်းစစ်ဆေးခဲ့ကြောင်းနှင့် Online ဖြင့် ရောင်းချမည်ဆိုပါက အွန်လိုင်းစနစ်ဖြင့် မှတ်ပုံတင်ထားပြီးမှသာ ရောင်းချရန်နှင့် လိုက်နာဆောင်ရွက်ခြင်းမရှိပါက အရေးကြီးကုန်စည်နှင့်ဝန်ဆောင်မှုဥပဒေဖြင့် အရေးယူဆောင်ရွက်သွားမည်ဖြစ်ကြောင်း အသိပေး၊ သတိပေးခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ပဲခူး)

      တနင်္သာရီတိုင်း၊ မြိတ်ခရိုင်သည် ဆန်လိုအပ်သာဒေသဖြစ်သည့်အတွက် မြိတ်ခရိုင်ဆန်ကုန်သည်များသည် ဧရာဝတီတိုင်းနှင့် ရန်ကုန်တိုင်းတို့မှ ဆန်များမှာယူလျက်ရှိပြီး (၁၉.၁.၂၀၂၆) ရက်နေ့တွင် ဧရာဝတီတိုင်း‌ဒေသကြီး၊ ဖျာပုံခရိုင်၊ ကျိုက်လတ်မြို့နယ်မှ သယ်ဆောင်လာသော MV အောင်တက်တိုးရေယာဉ်ဖြင့် ဆန်တန် (၄၅၀)၊ အိတ်ရေ (၉၀၀၀)နှင့် MV မြမြမွန်ရေယာဉ်ဖြင့် ဆန်တန် (၄၇၅)၊ အိတ်ရေ (၉၅၀၀)တို့သည် မြိတ်မြို့သို့ (၂၂.၁.၂၀၂၆)ရက်နေ့တွင် ရောက်ရှိလာခဲ့သဖြင့် ကွင်းဆင်းစစ်ဆေးခဲ့ကြောင်း သိရှိရပါသည်။

     ကွင်းဆင်းစစ်ဆေးရာတွင် မြိတ်ခရိုင်စားသုံးသူရေးရာဦးစီးဌာနအပါအဝင် မြိတ်ခရိုင် အကောက် ခွန်ဦးစီးဌာန၊ မြိတ်ခရိုင်လူဝင်မှုကြီးကြပ်ရေးနှင့်ပြည်သူ့အင်အားဦးစီးဌာန၊ မြိတ်ကုန်သွယ်ရေးဦးစီး ဌာန၊ မြိတ်ခရိုင်ရဲတပ်ဖွဲ့တို့ပါဝင်သောအဖွဲ့များဖြင့် ရေယာဉ်တွင်ပါဝင်သောကုန်စည်များအပါအဝင် ဆန်အိတ်များကို စစ်ဆေးခဲ့ကြကြောင်း သိရှိရပါသည်။

DOCA(တနင်္သာရီ)

          ၂၂.၁.၂၀၂၆ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ ဘီးလင်းမြို့နယ်၊ မြို့နယ်တာဝန်ခံ ဒေါ်ဇင်ဖြူဝင်းသည် မြို့နယ်ယူရီးယားဓာတ်မြေသြဇာ ဝယ်ယူဖြန့်ဖြူး ရောင်းချရေး ကော်မတီအဖွဲ့တို့နှင့်ပူးပေါင်း၍ ဘီးလင်းမြို့နယ်၊ ကန်သာယာရပ်ကွက်ရှိ “စံမေတ္တာ” (၂) မျိုးစေ့ ဓာတ်မြေဩဇာနှင့် စိုက်ပျိုးရေး ဆေးပစ္စည်းအရောင်းဆိုင်သို့ သွားရောက်၍  ဓာတ်မြေသြဇာအမျိုးမျိုးတို့၏ အရည်အသွေးနှင့် စျေးနှုန်းတို့အား လေ့လာ စစ်ဆေးခဲ့ရာတွင် ရွှေတောင်ပုလဲ ၅၀ Kg တစ်အိတ်လျှင် ၁၀၀၀၀၀ ကျပ်၊ အာဗို ၁၅ ပတ်လည် (ရိုးရိုး) အသီး ၅၀ Kg တစ်အိတ်လျှင် ၁၁၅၀၀၀ ကျပ်၊ အာဗို (၉/၂၅/၂၅) အသီး ၅၀ Kg တစ်အိတ်လျှင် (၂၀၈၀၀၀) ကျပ်၊  V super (အသီး) ၅၀ Kg တစ်အိတ်လျှင် (၂၀၄၀၀၀) ကျပ် တို့ဖြင့် ရောင်းချနေပြီး ထိုစျေးနှုန်းများသည် ဒေသအတွင်း သင့်တင့်သော ဈေးနှုန်း ဖြစ်ကြောင်းနှင့် ဓာတ်မြေဩဇာအမျိုးမျိုးတို့တွင် ကုန်အညွှန်းအမှတ်အသားနှင့် သက်ဆိုင်ရာ ဌာနများ၏ ထောက်ခံချက်များ ပြည့်စုံစွာ ဖော်ပြထားကြောင်း တွေ့ရှိရပါသည်။ ယခု ရာသီ ကာလသည် စိုက်ပျိုးရေးတောင်သူများ ရာသီသီးနှံများ စိုက်ပျိုးသည့် ကာလဖြစ်သည့်အတွက် ဓာတ်မြေဩဇာများ အရောင်းသွက်နေကြောင်း  သတင်းရရှိပါသည်။

DOCA (မွန်)

         စားသုံးသူရေးရာဦးစီးဌာန၊   ပန်းတနော်မြို့နယ်ဦးစီးမှူးသည် ၂၀၂၆ ခုနှစ်၊ ဇန်နဝါရီလ (၁၉)ရက်နေ့ နံနက် (၁၀:၃၀) နာရီအချိန်တွင် ပန်းတနော်မြို့နယ်၊ အလယ်ပိုင်းရပ်ကွက်၊ မြို့နယ်စားသုံးသူရေးရာဦးစီးမှူးရုံး အစည်းအဝေးခန်းမ၌  စားသုံးသူပြည်သူ (၃၅ )ဦးအား စားသုံးသူကာကွယ်ရေးဆိုင်ရာ  အသိပညာပေးဟောပြောခြင်းကို ဆောင်ရွက်ခဲ့ကြောင်း သိရသည်။

         ဟောပြောပွဲတွင် မြို့နယ်ဦးစီးမှူး ဦးအောင်ကျော်သက်က အလယ်ပိုင်းရပ်ကွက်နေပြည်သူများကို အသိပညာပေးဟောပြောရာ စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များအကြောင်း၊ ဆန်စပါးသိုလှောင်ရုံ မှတ်ပုံတင်ခြင်းဆိုင်ရာကိစ္စရပ်များ၊ Online မှတစ်ဆင့် ကုန်စည်ရောင်းဝယ်ခြင်းဆိုင်ရာကိစ္စရပ်များအကြောင်း၊ ကျေးရွာအုပ်ချုပ်ရေးမှူးများအနေဖြင့် မိမိတို့ ကျေးရွာအတွင်း ကုန်စုံဆိုင်များမှတစ်ဆင့် ပြည်သူများထံ စားသုံးဆီဖြန့်ဖြူးရောင်းချနေမှု့အပေါ် မသမာသောနည်းလမ်းဖြင့် ပါဝင်ပတ်သတ်ရောင်းချခြင်းမပြုရန်၊ စားသုံးဆီဝယ် ယူခွင့်စာအုပ်များဖြင့် စနစ်တကျဖြန့်ဖြူးရောင်းချနိုင်ရေး ရှင်းလင်းဆွေးနွေးခြင်း၊ စားသုံးသူများ သည် ကုန်စည်ကိုရွေးချယ်ဝယ်ယူတတ်စေရန် ကုန်အညွှန်းအမှတ်အသားနှင့် စပ်လျဉ်း၍ ဖော်ပြပါရှိသည့် အချက်အလက်များကို သေချာစွာစိစစ်ဝယ်ယူနိုင်ရန်၊ စီးပွားရေးလုပ်ငန်းရှင်များအနေဖြင့် မိမိတို့ရောင်းချနေသော ကုန်စည်နှင့် ဝန်ဆောင်မှုများတွင် အာမခံချက်ပေးနိုင်ခြင်းများအကြောင်း၊  စားသုံးသူကာကွယ်ရေးဥပဒေပါ ပြစ်မှုနှင့် ပြစ်ဒဏ်များအကြောင်း၊ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (Consumer Information and Complaint Center) CICC ဖွင့်လှစ်ထားရှိမှု အခြေအနေကိုလည်ကောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov. mm Website တွင် ဝင်ရောက်လေ့လာနိုင်ကြောင်းနှင့် Consumer Call Center 1535 သို့ ဆက်သွယ်မေးမြန်းနိုင်ကြောင်းကိုလည်းကောင်း စသည်တို့ကို အသိပညာပေးဟောပြောခဲ့ပြီး၊ တက်ရောက်သူများမှလည်း သိလိုသည်များကိုမေးမြန်း၍ ဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

          ကျိုက်လတ်မြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းတို့သည် (၁၉.၁.၂၀၂၆) နေ့၊ နေ့လယ် (၁၃:၀၀) နာရီ အချိန်တွင် စားအုန်းဆီ လက်လီ/လက်ကား ရောင်းချနေသော ဆိုင်များသို့ တရားမဝင်ကုန်သွယ်မှု တိုက်ဖျက်ရေးအဖွဲ့၊ ကုန်ဈေးနှုန်းတည်ငြိမ်ရေးအဖွဲ့၊ စားအုန်းဆီတင်သွင်းဖြန့်ဖြူးရေး ကြီးကြပ်မှုကော်မတီ ဥက္ကဌဖြစ်သော မြို့နယ်စီမံခန့်ခွဲရေးနှင့် အုပ်ချုပ်ရေး ကော်မတီ ဥက္ကဌ ဦးမင်းအောင်ဦး ဦးဆောင်၍ စားသုံးသူရေးရာဦးစီးဌာန၊ မီးသတ်ဦးစီးဌာန၊ စည်ပင်သာယာရေးအဖွဲ့၊ ဈေးကော်မတီ ဆီကိုယ်စားလှယ်များ ပါဝင်သော ပူးပေါင်းအဖွဲ့တို့ဖြင့် ရှောင်တခင်ဝင်ရောက်စစ်ဆေးခဲ့ပါသည်။

       ကျိုက်လတ်မြို့နယ်အတွင်း စားအုန်းဆီ လက်လီ/လက်ကား ရောင်းချနေသောဆိုင်များတွင် ရည်ညွှန်းဈေး ဆိုင်းဘုတ်တင်ရောင်းချခြင်းရှိ/ မရှိ၊ အလေးချိန်တွယ် ပြည့်မပြည့်၊ ဆီအရည်အသွေး ကောင်းမကောင်း၊ ပြင်ပ၌ သတင်းထွက်ပေါ်နေသော စားအုန်းဆီ တစ်ပိဿာဈေး (၁၀၀၀၀) နှင့် အထက် ရောင်းချနေမှုရှိ/ မရှိတို့ကို ဈေးဝယ်သူစာအုပ်နှင့် ထုတ်ယူသူတို့ကိုပါ မေးမြန်းစုံစမ်းခဲ့ကြပါသည်။ ဆီဆိုင်များတွင် သက်ဆိုင်ရာဌာနများ၏ ညွှန်ကြားချက်များအား လိုက်နာဆောင်ရွက်ထားကြောင်း၊ မှန်(၆) မှန်ဖြင့် တိုက်ဆိုင်စစ်ဆေးခဲ့ကြောင်း၊ ကောလဟာလသတင်းမှာ မမှန်ကန်ကြောင်း စစ်ဆေးတွေ့ရှိရပါသည်။

          ကျိုက်လတ်မြို့နယ်အနေဖြင့် လူဦးရေ(၁၉၆၂၂၂) ဦးရှိပြီး အိမ်ထောင်စုဦးရေအနေဖြင့် မြို့ပေါ်နေအိမ်ထောင်စုဦးရေ (၆၁၄၁)နှင့်  ကျေးရွာနေအိမ်ထောင်စုဦးရေ (၃၉၈၂၆) စုစုပေါင်း အိမ်ထောင်စု ဦးရေ (၄၅၉၆၁၇) ရှိပြီး ဆီထုတ်စာအုပ်များဖြင့် ထုတ်ပေးလျက်ရှိကြောင်း စားအုန်းဆီခွဲတမ်းရရှိမှုမှာ နေ့စဉ် ပေပါ (၂၀) ပိဿာ (၂၂၀၀၀) ပိဿာ၊ တစ်လလျှင် ပေပါ (၅၀၈) ပေပါ ဆီပိဿာ (၅၅၈၈၀) ပိဿာ ရရှိပြီး ရပ်ကွက်၊ ကျေးရွာများသို့ ဆီထုတ်စာအုပ်များဖြင့်လည်းကောင်း ဝန်ထမ်းများ ဘဏ်ပင်စင်စားများ၊ သာရေးနာရေး အသင်းအဖွဲ့များအား ရောင်းချပေးလျက်ရှိကြောင်း စိစစ်သိရှိရပါသည်။ယခုအပတ် စားအုန်းဆီရောင်းချဈေးနှုန်း (၆၆၇၂) ကျပ်ဖြင့်သာ ရောင်းချနေကြောင်း သတင်းရရှိပါသည်။

DOCA(ဧရာဝတီ)