ဖြေရှင်းဆောင်ရွက်ပေးမှုများ

      မန္တလေးတိုင်းဒေသကြီး၊ ကျောက်ဆည်မြို့နယ်နေ တိုင်ကြားသူတစ်ဦးသည် ခရီးသွားဝန်ဆောင်မှုနှင့် ကုန် စည်ပို့ဆောင်ရေးလုပ်ငန်းတစ်ခုမှတစ်ဆင့် “တောသူမ" သဘာဝဆေးဖက်ဝင် ထုတ်ကုန်များ (ခေါင်းလျှော်ရည် အပါ)အား ဂျပ်ဖာ(၄)ဖာကို ငွေကျပ် ၅၂,၀၀ဝ/- ဖြင့် ရန်ကုန်မြို့ရှိ  Super Market တစ်ခုသို့ Deli ပို့ခငွေကျပ် ၂၀,၀၀ဝ/- ဖြင့် အပ်နှံပို့ဆောင်ခဲ့ရာ  ရန်ကုန်မြို့ရှိ  Super Market  သို့ ပစ္စည်းများရောက်ရှိသော်လည်း ငွေကျပ် ၁၈,၉၁,၀၀၀/- တန်ဖိုးရှိ ကုန်ပစ္စည်းများ ပျက်စီးနေပါသဖြင့် နစ်နာဆုံးရှုံးမှုအတွက် ဖြေရှင်း ဆောင်ရွက်ပေးနိုင်ပါရန် စားသုံးသူရေးရာဦးစီးဌာနသို့ Call Center မှတစ်ဆင့် ခေါ်ဆိုတိုင်ကြားလာပါသည်။

    ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှတာဝန်ရှိသူများက တိုင်ကြား သူနှင့် တိုင်ကြားခံရသူတို့အား ကျောက်ဆည်ခရိုင်ဦးစီးမှူးရုံး၌  ခေါ်ယူ၍ တွေ့ဆုံဆွေးနွေးခဲ့ရာ တိုင်ကြားသူက တိုင်ကြားခံရသည့် ခရီးသွားဝန်ဆောင်မှုနှင့်ကုန်စည် ပို့ဆောင်ရေးလုပ်ငန်းအနေဖြင့် ပျက်စီးသွားသော ကုန်ပစ္စည်းများကို ယူဆောင်မှုမရှိပါက  ဆုံးရှုံးငွေမှ အနည်းငယ်ကို လျော့ပေါ့၍ လျော်ပေးရမည်ဖြစ်ကြောင်း၊ ပျက်စီးကုန်ပစ္စည်းများကို လက်ခံယူ ဆောင်သွားမည်ဆိုပါက ပစ္စည်း တန်ဖိုးငွေကျပ် ၁,၈၉၁,၀၀၀/-ကို ပေးလျော်စေလိုကြောင်း ပြောကြားခဲ့ပါသည်။ တိုင်ကြားခံရသူမှ ပျက်စီးသွားသည့် ကုန်ပစ္စည်းများအား ယူဆောင်သွားမည်ဖြစ်ပြီး ကျသင့်ငွေအား ပြန်လည် ပေးအပ် မည်ဖြစ်ကြောင်း ပြောကြားခဲ့ပြီး ကုန်ပစ္စည်းများ၏တန်ဖိုးငွေကျပ် ၁,၈၉၁,၀၀၀/-ကို ခရိုင်ဦးစီးမှူးရှေ့ မှောက်တွင် ပေးအပ်ခဲ့ပါသဖြင့် တိုင်ကြားသူမှကျေနပ်မှုရရှိခဲ့ပြီး တိုင်ကြားမှုကို စားသုံးသူကာကွယ် ရေးဥပဒေအရ နစ်နာဆုံးရှုံးမှုနှင့်အညီ ငွေပြန်လည်ပေးစေခြင်းဖြင့်  ဖြေရှင်းဆောင်ရွက်ခဲ့ပါသည်။

      မန္တလေးတိုင်းဒေသကြီး၊ ချမ်းမြသာစည်မြို့နယ်နေ တိုင် ကြားသူတစ်ဦးသည် ချမ်းမြသာစည်မြို့နယ်တွင် ဖွင့်လှစ်ထား သည့် ဆိုင်ကယ်ရောင်းဝယ်ရေးနှင့် ဖြန့်ချိရေးဆိုင်တစ်ဆိုင်မှ  (MDY-79W/ XXXX ) Honda Click မော်တော်ဆိုင်ကယ်အား တရားဝင်မှတ်ပုံတင် မော်တော်ဆိုင်ကယ်အဖြစ် လိမ်လည် ရောင်းချခဲ့ပါသဖြင့် ဖြေရှင်းဆောင်ရွက်ပေးနိုင်ပါရန် စားသုံးသူ ရေးရာဦးစီးဌာနသို့ စာဖြင့် တိုင်ကြားလာပါသည်။

        ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှ တာဝန်ရှိသူများက စစ်ဆေး ဆောင်ရွက်ရာတွင် တိုင်ကြားခံရသည့် ဆိုင်ကယ်ရောင်းဝယ်ရေးဆိုင်ပိုင်ရှင်အား ချမ်းမြသာစည် မြို့နယ် တရားရုံးမှ ရာဇသတ်ကြီးဥပဒေပုဒ်မ-၄၂၀ ကို ကျူးလွန်ကြောင်းနှင့်စွဲချက်ရှိသည်ကို ထုချေ ရှင်းလင်းရန် စစ်ဆေးဆဲအမှုဖြစ်သည်ကို စိစစ်တွေ့ရှိရပါသည်။ စားသုံးသူ ကာကွယ်ရေးနည်းဥပဒေ များ နည်းဥပဒေ ၈၀(င)အရ တရားရုံး တစ်ခုခု၏ရှေ့မှောက်၌ စစ်ဆေးကြားနာဆဲအမှုနှင့် တရားရုံး တစ်ခုခု၏ စီရင်ဆုံးဖြတ်ချက်အပေါ် အယူခံသို့မဟုတ် ပြင်ဆင်မှုဝင်ရောက်ဆဲအမှုများအပေါ် ဖြေရှင်း ဆောင်ရွက်ခြင်းမပြုရဟု ပြဌာန်းထားကြောင်း ဖော်ပြပါရှိသည့်အတွက် တိုင်ကြားမှုကို ဖြေရှင်း ဆောင်ရွက်ပေး၍မရပါကြောင်း တိုင်ကြားသူသို့ ဆက်သွယ်ရှင်းပြခဲ့ပြီး တိုင်ကြားမှုကို ဆက်စပ် ဥပဒေများနှင့်အညီ ဖြေရှင်းစေခြင်းဖြင့်  ပိတ်သိမ်းဆောင်ရွက်ခဲ့ပြီးဖြစ်ပါသည်။

    ရန်ကုန်တိုင်းဒေသကြီးနေ တိုင်ကြားသူ တစ်ဦးသည် ကားရောင်းဝယ်ရေးကုမ္ပဏီတစ်ခုထံမှ ဝယ်ယူထားသော Wuling EV Car အား တရုတ် Version မှ Global  Version သို့ ပြောင်းပေးရန် တောင်းဆိုရာတွင် (၇)လကြာသည်အထိ ဆောင် ရွက်ပေးမှု မရှိသောကြောင့်  စားသုံးသူရေးရာဦးစီး ဌာန၊ တိုင်းဒေသကြီးဦးစီးမှူးရုံးသို့ စာဖြင့်တိုင်ကြားလာပါသည်။

    ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှတာဝန်ရှိသူများက ကား ရောင်းဝယ်ရေးကုမ္ပဏီသို့ အကြောင်းကြားဆောင်ရွက်ခဲ့ရာ ကုမ္ပဏီမှ တာဝန်ရှိသူများက ၎င်းတို့ ကုမ္ပဏီမှ တင်သွင်းသော Wuling Baojun Cloud လျှပ်စစ်သုံးယာဉ်များ၏ English Global Version အား CNY 187,500 ဖြင့် ကုမ္ပဏီတစ်ခုထံတွင် အထူးအော်ဒါမှာယူ၍ Software ရေးဆွဲခဲ့ပါကြောင်း၊ ယခုအခါ ယင်း Software လက်ဝယ်ရောက်ရှိပြီဖြစ်ပါသဖြင့် ကုမ္ပဏီမှ တရားဝင်ရောင်းချထားသော ကားများကို Software Update Free ပေးနေပြီဖြစ်ပါကြောင်း၊ Wuling Baojun Cloud လျှပ်စစ် သုံးယာဉ် သုံးစွဲသူမိဘပြည်သူများအားလုံးအတွက် Software Update Free သွင်းပေးနေပြီ ဖြစ်ကြောင်းကို Wuling- Innogen Myanmar Facebook page စာမျက်နှာတွင်လည်း အသိပေး နှိုးဆော်ကြေညာထားပြီးဖြစ်ပါကြောင်းနှင့် ကုမ္ပဏီမှရောင်းချထားသော ကားများအတွက် English Version Software Update ပြုလုပ်ပေးသည့်အခြေအနေအားသိရှိနိုင်ရန် ဓာတ်ပုံနှင့်တကွအကြောင်း ပြန်ကြားလာသောကြောင့် တိုင်ကြားသူအနေဖြင့် ကုမ္ပဏီနှင့်ချိတ်ဆက်၍ ဆက်လက်ဆောင်ရွက် သွားနိုင်ရန် အကြောင်းပြန်ကြားပေးခဲ့ပြီး တိုင်ကြားမှုကို စားသုံးသူကာကွယ်ရေး ဥပဒေအရ စေ့စပ် ညှိနှိုင်းပေးခြင်းဖြင့် ဖြေရှင်းဆောင်ရွက်ခဲ့ပါသည်။

     ပဲခူးတိုင်းဒေသကြီး၊ ပြည်မြို့နယ်နေ တိုင်ကြားသူ တစ်ဦးသည် သနပ္ပင်မြို့နယ်ရှိ  ပဲသွေး (အမဲသွေး) ထုတ် လုပ်ဖြန့်ဖြူးသည့် လုပ်ငန်းတစ်ခုထံမှ ပဲသွေး(အမဲသွေး) များဝယ်ယူစားသုံးရာတွင် အသက်ရှူကြပ်လာသဖြင့် ဆေးခန်းပြသရာ ဆရာဝန်က တားမြစ်ဆေးစားသုံးမိသည် ဟု ပြောကြားသဖြင့် ပဲသွေး(အမဲသွေး)ထုတ်လုပ်သည့် လုပ်ငန်းအား စစ်ဆေးပေးပါရန် စားသုံးသူရေးရာဦးစီးဌာန သို့ စာဖြင့် တိုင်ကြားလာပါသည်။

ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ပဲခူးတိုင်းဒေသကြီးဦးစီးမှူးရုံးမှ တာဝန်ရှိသူများသည် အစားအသောက်နှင့်ဆေးဝါးကွပ်ကဲရေးဦးစီးဌာန၊ သနပ္ပင်မြို့နယ် အစား အသောက်နှင့်ဆေးဝါးကြီးကြပ်ကော်မတီအဖွဲ့ဝင်များနှင့်ပူးပေါင်း၍ တိုင်ကြားခံရသည့် ပဲသွေး (အမဲသွေး) အလုပ်ရုံသို့ ရှောင်တခင်ဝင်ရောက်စစ်ဆေးရာ အမဲသွေး(ပဲသွေး)များ ထုတ်လုပ်နေ ကြောင်းတွေ့ရှိရသဖြင့် အစားအသောက်နှင့်ဆေးဝါး ကွပ်ကဲရေးဦးစီးဌာနက နမူနာယူ၍ အဆိုပါ အလုပ်ရုံအတွင်း၌ Testkit ဖြင့် ချက်ချင်းစစ်ဆေးခဲ့ရာ အမဲသွေး(ပဲသွေး)ထဲတွင် စားသုံးရန်မသင့် သော ဖော်မလင်ဓာတုဆေးများ ပါဝင်နေကြောင်း စစ်ဆေးတွေ့ရှိရပါသည်။ ဖော်မလင်ဓာတု ဆေး များပါဝင်သော အမဲသွေး(ပဲသွေး) ပိဿာချိန် ၄၅၅ ပိဿာခန့်အား စစ်ဆေးသည့်အဖွဲ့မှ သိမ်းဆည်း ဖျက်ဆီးခဲ့ပြီး အစားအသောက်နှင့်ဆေးဝါးကွပ်ကဲရေးဦးစီးဌာနက နောက်နောင်  အမဲသွေး(ပဲသွေး)များ ထုတ်လုပ်ရောင်းချခြင်းမပြုရန် ခံဝန်ကတိပြု လက်မှတ်ရေးထိုးခဲ့ပါသည်။ စားသုံးသူရေးရာဦးစီးဌာန မှ တာဝန်ရှိသူများကလည်း ပဲသွေးထုတ်လုပ်သည့် လုပ်ငန်းရှင်များအား နောက်နောင် အမဲသွေး (ပဲသွေး)များအား ထုတ်လုပ်ဖြန့်ဖြူးရောင်းချခြင်းမပြုလုပ်ရန်နှင့် ထုတ်လုပ်ဖြန့်ဖြူးရောင်းချနေ ကြောင်း ထပ်မံစစ်ဆေးတွေ့ရှိပါက တည်ဆဲဥပဒေအရ အရေးယူခံရမည်ဖြစ်ပါကြောင်း သတိပေး အကြောင်းကြားစာပေးပို့ခဲ့ပြီး တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

    ရန်ကုန်တိုင်းဒေသကြီး၊ စမ်းချောင်းမြို့နယ်နေ တိုင်ကြားသူ တစ်ဦးသည် Electronic အရောင်းဆိုင်တစ်ခုမှ ၃-၂-၂၀၂၄ ရက်နေ့ တွင် ငွေ ကျပ် ၃၃၅,၀၀၀/- ဖြင့်TV ဝယ်ယူခဲ့ပြီး (၂) ပတ်အကြာ TV အသံပျောက်သွားသည့်အတွက် ဆိုင်သို့ဖုန်းဆက်မေးမြန်းခဲ့ရာ ဆိုင်မှ ပြောကြားသည့်အတိုင်း ဆောင်ရွက်ခဲ့သော်လည်း အဆင်ပြေမှုမရှိ သည့်အတွက် ပြန်လည်ပြင်ဆင်နိုင်ရေး ဆိုင်သို့ပို့ဆောင်ခဲ့ရာ (၁)ပတ်ခန့်ကြာမြင့်မည်ဟု ပြောကြား ခဲ့ပါကြောင်း၊ ၁၀-၃-၂၀၂၄ ရက်နေ့တွင် ဆိုင်၏ Facebook Page မှ Live Sale ရောင်းချနေသည်ကို တွေ့ရှိရသည့်အတွက် အပ်နှံထားသည့် TV အခြေအနေအား ဝင်ရောက်မေးမြန်းခဲ့သော်လည်း ပြန် လည် ဖြေကြားခြင်းမရှိသည့်အပြင် မိမိ၏ Facebook အကောင့်အား Ban ခဲ့ပါကြောင်း၊ အခြား Facebook အကောင့်ဖြင့် ထပ်မံဝင်ရောက် ရေးသားရာတွင်လည်း Ban နေသည့်အတွက် အဆင်မပြေကြောင်း ရေးသားခဲ့ရာ ဆိုင်မှထိုသို့ရေးသားခဲ့သည့်အတွက် အာမခံသက်တမ်း (၂)နှစ် ပေးအပ်ထား သော်လည်း ပြန်လည်ပြုပြင်ပေးခြင်းများ ဆောင်ရွက်ပေးနိုင်ခြင်းမရှိပါကြောင်းနှင့် TV အားလာရောက် ယူဆောင်သွားရန် ဆက်သွယ်ပြောကြားလာသဖြင့် စားသုံးသူရေးရာဦးစီးဌာနသို့ ဆက်သွယ်တိုင် ကြားလာပါသည်။

    ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှတာဝန်ရှိသူများက တိုင်ကြား သူနှင့် တိုင်ကြားခံရသည့်စီးပွားရေးလုပ်ငန်းရှင်တို့အား (၃)ကြိမ်တိုင်တိုင်အကြောင်းကြားစာ ပေးပို့ခဲ့ သော်လည်း လုပ်ငန်းရှင်အနေဖြင့် ဌာနမှပေးပို့သည့်စာအား လက်ခံခြင်းမရှိသည့်အပြင် လာရောက် ဖြေရှင်းမှုလည်း မရှိခဲ့ပါ။ တိုင်ကြားသူမှ လာရောက်တွေ့ဆုံ၍ ယခုလက်ရှိတွင် TV ပြင်ဆင်ပေးပို့၍ ပြန်လည်ရရှိနေပြီဖြစ်ပါကြောင်း၊ ဥပဒေနှင့်အညီ ဖြေရှင်းဆောင်ရွက်ပေးစေလိုပါကြောင်း၊ လုပ်ငန်း ရှင်သည် စားသုံးသူကာကွယ်ရေးဥပဒေ ပုဒ်မ ၂၆(ခ) အရ ပြည့်စုံသောဝန်ဆောင်မှု အဆင့်အတန်းနှင့် အညီ ပြည့်ဝစွာပေးအပ်မှုမရှိ ခြင်းကြောင့် စားသုံးသူရေးရာကော်မတီ အစည်းအဝေး (၅/၂၀၂၄)တွင် အမှာစာဖြင့် တင်ပြဆွေးနွေးခဲ့ရာ စီးပွားရေးလုပ်ငန်းရှင်အား စားသုံးသူရေးရာကော်မတီအနေဖြင့် စားသုံးသူကာကွယ်ရေးဥပဒေ ပုဒ်မ ၅၃၊ ပုဒ်မခွဲ (ဃ) အရ လုပ်ငန်းလိုင်စင်ယာယီပိတ်သိမ်းခြင်း သို့မဟုတ် အမြဲတမ်းပိတ်သိမ်းခြင်းကို သက်ဆိုင်ရာအစိုးရဌာနက ပြုလုပ်နိုင်ရေးညှိနှိုင်းဆောင်ရွက် သွားရန် တိုင်းဒေသကြီးအစိုးရအဖွဲ့သို့တင်ပြ၍ လမ်းညွှန်မှုခံယူသွားရန် ဆုံးဖြတ်ခဲ့ပါသည်။ တိုင်ကြား ခံရသည့် Electronic ဆိုင်အား လုပ်ငန်းလိုင်စင်ယာယီပိတ်သိမ်းနိုင်ရေး ရန်ကုန်မြို့တော်စည်ပင် သာယာရေးကော်မတီ၊ စီမံရေးရာဌာနခွဲသို့ အကြောင်းကြားဆောင်ရွက်ခဲ့ရာ ၁၀-၆-၂၀၂၅ ရက်နေ့ တွင်ကျင်းပပြုလုပ်သော ကော်မတီဝင်များအစည်းအဝေး(၁၅/၂၀၂၅) ဆုံးဖြတ်ချက်အရ “လုပ်ငန်းရှင် အနေဖြင့်သက်ဆိုင်ရာဌာန၏ ဥပဒေပြဋ္ဌာန်းချက်ကို လိုက်နာရန်ပျက်ကွက်ခဲ့ခြင်းသည် ကော်မတီက ခွင့်ပြုသည့် လိုင်စင်ပါစည်ကမ်းချက်အမှတ်(၃)ကို ဖောက်ဖျက်ကြောင်း” စိစစ်တွေ့ရှိရသဖြင့် ရန်ကုန် မြို့တော်စည်ပင်သာယာရေးဥပဒေ ပုဒ်မ ၂၈၁(ဂ) အရ ခွင့်ပြုထားသည့်လိုင်စင်အား ပိတ်သိမ်းထားပြီးဖြစ်ပါကြောင်းနှင့် စားသုံးသူရေးရာဦးစီးဌာနမှ ပြန်လည်ဖွင့်လှစ်ခွင့်ပြုရန် အကြောင်းကြားစာရရှိ မှသာ အဆိုပါလုပ်ငန်းအား သတ်မှတ် SOP နှင့်အညီစိစစ်၍ လိုင်စင်ပြန်လည် ခွင့်ပြုသွားမည်ဖြစ်ပါကြောင်း အကြောင်းပြန်ကြားလာသည့်အတွက် ရန်ကုန်တိုင်းဒေသကြီး စားသုံးသူရေးရာကော်မတီ ဥက္ကဋ္ဌထံ တင်ပြလမ်းညွှန်မှုခံယူခဲ့ပြီး Electronic ဆိုင်အား ၂-၇-၂၀၂၅ ရက်နေ့မှစ၍ လုပ်ငန်းလိုင်စင် (၆)လ ယာယီပိတ်သိမ်းပေးရန် ရန်ကုန်မြို့တော်စည်ပင်သာယာရေးကော်မတီသို့ အကြောင်းကြား ခဲ့ပြီးအခြေအနေများအား တိုင်ကြားသူထံ အကြောင်းပြန်ကြားပြီးဖြစ်ပါသောကြောင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။