ဖြေရှင်းဆောင်ရွက်ပေးမှုများ

     စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူပြည်သူများ စားသုံးသူအခွင့်အရေးချိုးဖောက်ခံရမှုနှင့် အကျိုးစီးပွားထိခိုက်နစ်နာမှုများကို စားသုံးသူကာကွယ်ရေးဥပဒေ၊ နည်းဥပဒေနှင့်အညီ ဖြေရှင်းဆောင်ရွက်ပေးလျှက်ရှိရာ (၂၈.၃.၂၀၂၂)ရက် နေ့တွင် ရုံးချုပ်၊ စားသုံးသူရေးရာဦးစီးဌာန Website Complaint Systemသို့  ရွှေဘိုမြို့ အမှတ်(၅) ရပ်ကွက်၊ မင်းရပ်နေ ×××××× မှ Wave Money ပတ်သက်၍ ညှိနှိုင်းဖြေရှင်းပေးပါရန် တိုင်ကြားခဲ့ပါသည်။ ၎င်းတိုင်ကြားမှုနှင့်ပတ်သက်၍ တိုင်ကြားသူထံ ရွှေဘိုခရိုင်ဦးစီးမှူးရုံးမှ တိုင်ကြားသည့်အကြောင်းအရာနှင့် ဖြေရှင်းပေးစေလိုသည့် နည်းလမ်းအား တယ်လီဖုန်းဖြင့် ဆက်သွယ်မေးမြန်းရာ Wave Money accထဲသို့ ထည့်ထားသည့် ငွေကြေး တစ်စုံတစ်ရာ ဆုံးရှုံးမှုမရှိသော်လည်း acc ထဲသို့ ငွေကြေးမသမာမှုဟု စာရောက်လာပြီး  accအားပိတ်ထားသည်မှာ တစ်လကျော်ကြာပြီဖြစ်ကြောင်း၊ Customer Service သို့တယ်လီဖုန်းဖြင့် ဆက်သွယ်သော်လည်း တိုင်ကြားသည့် (၂၈.၃.၂၀၂၂)ရက်နေ့ထိ accအား ပြန်လည်၍ ဖွင့်လှစ်ပေးခြင်း မရှိသေးသည့်အပြင် ပြန်လည်မဆက်သွယ်၍ ထိရောက်မှုလည်းမရှိသဖြင့် Website Complaint Systemသို့ ဆက်သွယ် တိုင်ကြားရခြင်းဖြစ်ကြောင်း၊ မိမိအနေဖြင့် accနှင့်ပတ်သက်၍ ငွေကြေးမသမာမှု တစ်စုံတစ်ရာ ပြုလုပ်ခြင်းမရှိဘဲ ရိုးရိုးသာအသုံးပြုခြင်းဖြစ်၍ acc အား ပြန်လည် ရယူ အသုံးပြုလိုပါသဖြင့်  ညှိနှိုင်း ပေးစေလိုကြောင်း ပြန်လည်ဖြေကြားခဲ့ပါသည်။

          တိုင်ကြားစာနှင့်ပတ်သက်၍ ညှိနှိုင်းဖြေရှင်းနိုင်ရန်  Digital Money Myanmar Ltd.(Wave Money)၏  ငွေကြေးလွှဲပြောင်းဝန်ဆောင်မှုနှင့်ပတ်သက်၍ တိုင်ကြားမှုဖြစ်ပေါ်လာပါက လျင်မြန်စွာ ဖြေရှင်းဆောင်ရွက်နိုင်ရေး ဆက်သွယ်ပေးနိုင်ပါရန် အကြောင်းကြားထားသည့် တာဝန်ရှိသူထံ ဌာနမှ တယ်လီဖုန်းဖြင့်ညှိနှိုင်းချိတ်ဆက်ရာ (၂၂.၄.၂၀၂၂)ရက်နေ့တွင်တိုင်ကြားသူ၏ Wave Money accအား ပြန်လည်ဖွင့်လှစ်ပေးပြီးဖြစ်ကြောင်း (၂၅.၄.၂၀၂၂)ရက်နေ့တွင် တယ်လီဖုန်းဖြင့်  အကြောင်းပြန်ကြား ခဲ့ပါသည်။ Digital Money Myanmar Ltd.(Wave Money)၏  အကြောင်းပြန်ကြားမှုအား တိုင်ကြားသူထံ  ဌာနမှ (၂၅.၄.၂၀၂၂)ရက်နေ့တွင် တယ်လီဖုန်းဖြင့် အကြောင်းပြန်ကြားပေးခဲ့ရာ Wave Money  accအား ပြန်လည်ရရှိပြီဖြစ်ကြောင်း ယခုကဲ့သို့ ညှိနှိုင်းဆောင်ရွက်ပေးသဖြင့် ဌာနကို ကျေးဇူးတင်ပါကြောင်းနှင့် ညှိနှိုင်းဆောင်ရွက်ပေးသည့်အပေါ် စိတ်ကျေနပ်မှုရှိပါကြောင်း ပြန်လည် ဖြေကြားခဲ့သဖြင့် Wave Money acc          ပြန်လည်ရယူအသုံးပြုလိုသည့် တိုင်ကြားစာအား ညှိနှိုင်းဖြေရှင်း ပေးခဲ့ပါသည်။

DOCA(စစ်ကိုင်း)

         လယ်ယာသုံးရိတ်သိမ်းခြွေလှေ့စက်ဝယ်ယူရာတွင် ဝယ်ယူသူက ကျေနပ်မှုမရှိသည့်အတွက် စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနသို့ တိုင်ကြားလာမှုအား ဌာနမှ ဥပဒေနှင့်အညီ ဖြေရှင်းဆောင်ရွက်ပေးခဲ့ပါသည်။ ဖြစ်စဉ်မှာ ရွှေဘိုခရိုင်၊ တန့်ဆည်မြို့၊ ဗိုလ်မြရပ်ကွက်နေ တောင်သူ ဦးဝင်းဆန်းဦးက UMG Group မှ လယ်ယာသုံးရိတ်သိမ်းခြွေလှေ့စက်တစ်လုံးကို အရစ်ကျစနစ်ဖြင့် ဝယ်ယူခဲ့ ပါကြောင်း၊ ထိုသို့ဝယ်ယူခဲ့ရာတွင် အဆိုပါရိတ်သိမ်းခြွေလှေ့စက်မှာ မကြာခဏစက်ချို့ယွင်းခြင်း၊ အပိုပစ္စည်း မရရှိနိုင်ခြင်းတို့ကြောင့် ကျေနပ်မှုမှမရှိသည့်အတွက် နစ်နာဆုံးရှုံးမှုအား စစ်ကိုင်း တိုင်း ဒေသကြီး၊ စားသုံးသူရေးရာဦးစီးဌာန (CICC)ရုံးသို့ တိုင်ကြားခဲ့ပါသည်။

          စစ်ကိုင်းတိုင်းဒေသကြီး စားသုံးသူရေးရာဦးစီးဌာနအနေဖြင့် တိုင်ကြားသူနှင့် UMG Groupမှတာဝန်ရှိသူတို့အား စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးသို့ ခေါ်ယူ တွေ့ဆုံခဲ့ပြီးဖြေရှင်းခဲ့ရာ ကုမ္ပဏီမှအရစ်ကျစနစ်ဖြင့် ဝယ်ယူသူအား သိန်း(၉၀)ပြန်လည် ပေးချေရန် ညှိနှိုင်း ဖြေရှင်းသဘောတူညီဆုံးဖြတ်ချက်ချ ဆောင်ရွက်ခဲ့ပါသော်လည်း ကိုဗစ်(၁၉) အခြေအနေ မြင့်တက် လာခြင်းနှင့် အခြားအထွေထွေကိစ္စရပ်များကြောင့် တိုင်ကြားသူ ထံငွေ ကျပ်သိန်း(၉၀) အားတစ်လုံးတည်းပေးချေရန် အခက်အခဲရှိပါ၍ တစ်လလျှင် သိန်း(၃၀) ဖြင့်သုံးကြိမ်ခွဲ၍ ပေးချေ ခွင့်ပြုနိုင်ရေး ညှိနှိုင်းတင်ပြရာ တိုင်ကြားသူ ဘက်က ကျေနပ်လက်ခံခဲ့ ပါသည်။ ကုမ္မဏီမှ (၂၆.၁.၂၀၂၂) ရက်နေ့တွင်ပထမအရစ်သိန်း(၃၀)၊ (၁၈.၂.၂၀၂၂)ရက်နေ့တွင် ဒုတိယအရစ်သိန်း(၃၀)၊ (၂၄.၃.၂၀၂၂)ရက်နေ့ တွင် တတိယအရစ် သိန်း(၃၀)တို့ကို ပေးချေခဲ့ပါသည်။ အဆိုပါဖြေရှင်းဆောင်ရွက်ပေးမှုနှင့် ပတ်သက်၍တိုင်ကြားသူနှင့် တိုင်ကြားခံရသူတို့ဖက်မှ ကျေနပ်လက်ခံခဲ့ကြပြီး လယ်ယာသုံး စက်ကရိယာပစ္စည်းရိတ်သိမ်ချွေလှေ့စက်ဝယ်ယူခြင်းအတွက် တိုင်ကြားမှုကို (၂၄.၃.၂၀၂၂)ရက်နေ့တွင် နှစ်ဖက်ညှိနှိုင်းသဘောတူ၍ အောင်မြင်စွာ ဆောင်ရွက်ပြီးစီးခဲ့ပါသည်။

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူပြည်သူများ ဘေးကင်းလုံခြုံစိတ်ချရမှုရှိစေရန်မျှော်မှန်း၍ တိုင်းနှင့်ပြည်နယ်များတွင် စားသုံးသူကာကွယ်ပေးရေးလုပ်ငန်းများကို ကျယ်ကျယ်ပြန့်ပြန့် ဆောင်ရွက်လျက်ရှိပါသည်။ စားသုံးသူပြည်သူများ၏ ဘေးအန္တရာယ်ကင်းရှင်းစွာ စားသုံးခြင်း၊သုံးစွဲခြင်းများ ဆောင်ရွက်နိုင်စေရန် စားသုံးသူကာကွယ်ပေးရေးဥပဒေပါ စားသုံးသူအခွင့်အရေးများကို သိရှိရယူနိုင်စေရန် နေရာဒေသမရွေး အသိပညာပေးခြင်းများ ဆောင်ရွက်ပြီး စားသုံးသူများနစ်နာမှုရှိပါက စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ(CICC)များသို့ တိုင်ကြားနိုင်ပြီး နှစ်ဘက်ညှိနှိုင်းဖြေရှင်းလျက် ကျယ်ကျယ်ပြန့်ပြန့် ဆောင်ရွက် နေခြင်းကြောင့် စားသုံးသူ၏အခွင့်အရေးများနှင့်တာဝန်များကို သိရှိ၍ အချိန်နှင့် တပြေးညီ မျှတညီညွတ်မှုရှိစေရန် ဖြေရှင်းဆောင်ရွက်လျက်ရှိကြောင်း သိရပါသည်။

                    စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအအနေဖြင့် တိုင်ကြားမှုအများဆုံးမှာ ဆက်သွယ်ရေးဝန်ဆောင်မှုများဖြစ်ပြီး စားသောက်ကုန် ၊ ကုန်ပစ္စည်း၊  အခြားဟူ၍ တိုင်ကြားမှုအမျိုးအစားများ ခွဲခြားဆောင်ရွက်လျက်ရှိကြောင်း စစ်ကိုင်းတိုင်းဒေသကြီး စားသုံးသူသတင်းပြန်ကြားရေးနှင့်တိုင်ကြားမှု လက်ခံဆောင်ရွက်ရေးစင်တာ(CICC)ရုံးတွင် တိုင်ကြားမှုများကို ၂၀၁၈/၂၀၁၉  မှ ၂၀၂၀ / ၂၀၂၁/၂၀၂၂ထိ တိုင်ကြားမှုစုစုပေါင်း(၁၆၈)မှုရှိပြီး၊(၁၆၅)မှုကိုဖြေရှင်းဆောင်ရွက်ပြီးဖြစ်ကြောင်း သိရပါသည်။ စစ်ကိုင်းတိုင်းဒေသကြီးအတွင်း တိုင်ကြားမှုများကို ဝန်ဆောင်မှု၊ စားသောက်ကုန်၊ ကုန်ပစ္စည်း၊ အခြားဟူ၍ ခွဲခြားထားပြီး အများဆုံးတိုင်ကြားမှုမှာ ဆက်သွယ်ရေးဝန်ဆောင်မှုများပြီး ဖြေရှင်းဆောင်ရွက်ရန်ကျန်အမှု(၃)ခုမှာ လယ်ယာသုံးစက်ကရိယာကုန်ပစ္စည်း ဝန်ဆောင်မှုဖြစ်ကြောင်း တိုင်ကြားသူများမှာ ကသာခရိုင်ကဖြစ်၍  ယနေ့အချိန်ထိ ကိုဗစ်ရောဂါအခြေအနေများ ၊ လုံခြုံရေး အခြေအနေများကြောင့် သွားလာရန်ခက်ခဲခြင်း ၊ ဆက်သွယ်ရေးလိုင်းများဖြတ်တောက်ထားခြင်းများကြောင့် ညှိနှိုင်းဖြေရှင်းရန် ကျန်ရှိခြင်းဖြစ်ကြောင်း  သိရှိရပါသည်။

                   စားသုံးသူပြည်သူများ ဘေးအန္တရာယ်ကင်းစွာ အသုံးပြုခွင့်နှင့် ကုန်စည်နှင့်ဝန်ဆောင်မှုများအပေါ်  နစ်နာဆုံးရှုံးမှုများရှိပါက စားသုံးသူရေးရာဦးစီးဌာန ၊ စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ (CICC )ရုံးသို့ တိုင်ကြားခြင်းများအား ဌာနမှ ဖြေရှင်းဆောင်ရွက်ပေးလျက်ရှိကြောင်း သိရှိရပါသည်။

DOCA(စစ်ကိုင်း)

        မန္တလေးတိုင်းဒေသကြီးဦးစီးမှူးရုံးအနေဖြင့် စားသုံးသူတိုင်ကြားမှုများကို ဖြေရှင်းဆောင်ရွက်ပေးလျက်ရှိရာ ၂၀၁၇-၂၀၁၈ ဘဏ္ဍာနှစ်အတွင်းတိုင်ကြားမှုပေါင်း (၃၈)မှု၊ ၂၀၁၈-၂၀၁၉ ကြားကာလ(၆)လအတွင်း တိုင်ကြားမှုပေါင်း (၅၁)မှု၊ ၂၀၁၈- ၂၀၁၉ ဘဏ္ဍာနှစ်အတွင်း တိုင်ကြားမှုပေါင်း (၁၆၄)မှု၊ ၂၀၁၉- ၂၀၂၀ ဘဏ္ဍာနှစ်အတွင်း တိုင်ကြားမှုပေါင်း (၂၃၇)မှု၊ ၂၀၂၀- ၂၀၂၁ ဘဏ္ဍာနှစ်အတွင်း တိုင်ကြားမှုပေါင်း (၇၆)မှု၊ ၂၀၂၀-၂၀၂၁ ကြားကာလ(၆)လအတွင်း တိုင်ကြားမှုပေါင်း (၂၃)မှု၊ တိုင်ကြားမှုစုစုပေါင်း (၅၈၉)မှုရှိခဲ့ပြီး ယနေ့အချိန်ထိ ဖြေရှင်းဆောင်ရွက်ပြီး (၅၇၂)မှု၊ ဖြေရှင်းဆောင်ရွက်ဆဲ (၁၇)မှုရှိပါသည်။

      မန္တလေးတိုင်းအနေဖြင့် တိုင်ကြားမှုများကို စားသုံးသူကာကွယ်ရေးဥပဒေနှင့်အညီ အမြန်ဆုံးဖြေရှင်း ပေးနိုင်ခဲ့ သဖြင့် စားသုံးသူများ၏ ယုံကြည်အားကိုးမှုများရှိလာပြီး တိုင်ကြားမှုပိုမိုများပြားလျက်ရှိရာ တိုင်ကြားမှုများကိုလည်း အချိန်နှင့်တပြေးညီ ဖြေရှင်းဆောင်ရွက်ပေးလျက်ရှိပါသည်။      ယခုနှစ်တိုင်ကြားမှုများတွင် ဆက်သွယ်ရေးဝန်ဆောင်မှုနှင့်ပတ်သက်သည့် တိုင်ကြားမှုများနှင့် ငွေကြေးဝန်ဆောင်မှုဆိုင်ရာတိုင်ကြားမှုများမှာ များပြားလျက်ရှိပါသည်။

DOCA(မန္တလေး)

         စစ်ကိုင်းတိုင်းဒေသကြီး၊ စားသုံးသူရေးရာဦးစီးမှ ၁၄.၁၂.၂၀၂၁ ရက်နေ့တွင် ရွှေဘိုခရိုင်၊ ဒီပဲယင်းမြို့နယ်၊ စိုင်ပြင်မြို့နေ စားသုံးသူတစ်ဦး၏ Website Complaint System သို့ Mybus ဝန်ဆောင်မှုနှင့် ပတ်သက်၍တိုင်ကြားမှုအား ဖြေရှင်းဆောင်ရွက်ပေးနိုင်ခဲ့ပါသည်။

       တိုင်ကြားမှုနှင့်ပတ်သက်၍ ရွှေဘိုခရိုင်၊ စားသုံးသူရေးရာဦးစီးဌာန၊ ခရိုင်ဦးစီးမှူးရုံးမှ စားသုံးသူကာကွယ်ရေးဥပဒေအရ တိုင်ကြားသူရေးသားထားသည့် အကြောင်းအရင်းနှင့် ကိုက်ညီမှုရှိ/မရှိ တယ်လီဖုန်းဖြင့် ဆက်သွယ်မေးမြန်းရာတွင် တိုင်ကြားသူသည် ဆက်သွယ်ရေးဝန်ဆောင်မှုတစ်ခုမှ ဆင်းကဒ်နံပါတ် (၀၉-******) ဖြင့် Mybus ဝန်ဆောင်မှုကို (၁၀/၂၀၂၁)လတွင် ရယူထားပြီး လစဉ် ငွေကျပ် ၂၅၀၀ဝိ/-ဖြည့်သွင်း၍ အသုံးပြုလျက်ရှိကြောင်း၊ (၁၄.၁၂.၂၀၂၁)ရက်နေ့တွင် သုံးစွဲ၍မရသဖြင့် ဆက်သွယ်ရေး ဝန်ဆောင်မှု အော်ပရေတာသို့ မေးမြန်းရာရှင်းလင်းပြောဆိုခြင်းမရှိသဖြင့် တိုင်ကြားရကြောင်း၊ ယခုလက်ရှိအခြေ အနေတွင် မိမိတို့ဒေသ၌ လိုင်းများပြတ်တောက်သဖြင့် ယင်းဆင်းကဒ်ကို ဆက်လက်သုံးစွဲ၍ ရ/မရ နှင့် နောင်တွင်လိုင်းများ ကောင်းမွန်ပါက သုံးစွဲ၍ ရ/မရ သိရှိလိုကြောင်း၊ ဌာနအနေဖြင့် ကူညီပေးရန် တယ်လီဖုန်းဖြင့် ဖြေကြားခဲ့ပါသည်။

     စားသုံးသူကာကွယ်ရေးဥပဒေအရ တိုင်ကြားမှုနှင့်ပတ်သက်၍ ညှိနှိုင်းဖြေရှင်းရန်အတွက် နယ်မြေ အခြေအနေအရ တိုင်ကြားသူနှင့် စီးပွားရေးလုပ်ငန်းရှင်အား တွေ့ဆုံ၍ ညှိနှိုင်းဖြေရှင်းရန် အခက်အခဲရှိသဖြင့် တိုင်ကြားသူလက်ခံရယူထားသော ဆက်သွယ်ရေးဝန်ဆောင်မှုနှင့်ပတ်သက်၍ ဌာနအနေဖြင့် ယင်းOperator မှတစ်ဆင့် နံပါတ် “XXX”သို့ ဆက်သွယ်ဆောင်ရွက်ရာတွင် မိမိတို့ အော်ပရေတာ ဆင်းကဒ်အမှတ် (၀၉-*******) မှာMybus ဝန်ဆောင်မှုကို ရယူထားကြောင်း၊ ၎င်းဝန်ဆောင်မှုမှာ ငွေကျပ် ၅၀၀ဝိ/-ဖြည့်သွင်းလျှင် (၂)ရက်၊ ၁၀၀၀ဝိ/- ဖြည့်သွင်းလျှင် (၇)ရက်၊ ငွေကျပ် ၁၅၀၀ဝိ/-မှ ၂၅၀၀ဝိ/-ကြားဖြည့်သွင်းလျှင် (၁၅)ရက်နှင့်ငွေကျပ် ၂၅၀၀ဝိ/- ဖြည့်သွင်းပါက (၁)လ သုံးစွဲ၍ရကြောင်း၊ ယခုဆင်းကဒ်မှာ (၁၃.၁.၂၀၂၂)ရက်နေ့တွင် သက်တမ်း ကုန်ဆုံးနေပြီဖြစ်ကြောင်း၊ ရက်ပေါင်း (၉၀)အတွင်း ငွေထပ်မံမဖြည့်သွင်းပါက ကဒ် အား ပယ်ဖျက်မည်ဖြစ်၍ ငွေဖြည့်သွင်းပါက ငွေဖြည့်သွင်းသည့်ရက်၏ ည (၁၂:၀၀)နာရီကျော်လျှင် ကဒ် ပြန်ပွင့်ပါကြောင်းနှင့် တိုင်ကြားသူအား ဌာနအနေဖြင့် ဆက်သွယ်ပေးစေလိုကြောင်း၊ ယခင်အဆင်မပြေမှုများရှိပါက တောင်းပန်ကြောင်း ဖြေကြားခဲ့ပါသည်။

       ဌာနအနေဖြင့် Mytel ဆက်သွယ်ရေးအော်ပရေတာ၏ ပြန်ကြားချက်ကို တိုင်ကြားသူအား ဆက်သွယ်ဆောင်ရွက်ရာ မိမိအနေဖြင့် ယခုလိုဌာနမှ ကူညီဆောင်ရွက်ပေးသဖြင့် သိရှိလိုသည်များ ကို ပြည့်စုံစွာ သိရှိရကြောင်း၊ စားသုံး သူရေးရာဦးစီးဌာနကိုလည်း ကျေးဇူးတင်ရှိပါကြောင်းနှင့် စိတ်ကျေနပ်မှုရှိပါကြောင်း ပြန်လည်တင်ပြခဲ့သဖြင့် စားသုံးသူနစ်နာ ဆုံးရှုံးမှုများ ဖြေရှင်းဆောင်ရွက် ပေးနိုင်ခဲ့ကြောင်း သိရှိရပါသည်။

DOCA(စစ်ကိုင်း)