ဖြေရှင်းဆောင်ရွက်ပေးမှုများ

     ရန်ကုန်တိုင်းဒေသကြီးရှိ ကားအရောင်းစင်တာအွန်လိုင်း Page တစ်ခုသည် Brand New Honda CR-V ယာဉ်များအား ဆိုရှယ်မီဒီယာမှတဆင့် ကြော်ငြာရောင်းချလျက်ရှိရာ EV ကား သာ တင်သွင်းခွင့်ပြုထားချိန်ဖြစ်သဖြင့် မှန်ကန်မှုရှိ/မရှိ စိစစ် အရေးယူဆောင်ရွက်ပေးရန် စားသုံးသူတစ်ဦးက အကြောင်းကြားလာပါသည်။

ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ တိုင်းဒေသကြီးဦးစီးမှူးရုံးမှ တာဝန် ရှိသူများက တိုင်ကြားခံရသည့် ကားအရောင်းစင်တာမှ တာဝန်ရှိသူများအား ခေါ်ယူတွေ့ဆုံ၍ စားသုံး သူကာကွယ်ရေးဥပဒေပါ တားမြစ်ချက်များနှင့် ပြစ်မှုပြစ်ဒဏ်များကို အသိပေးခြင်း ဆောင်ရွက်ခဲ့ကာ SKD(ပြည်တွင်းထုတ်မော်တော်ယာဉ်) စနစ်ဆိုပါကလည်း ရိုးရှင်းမှန်ကန်သော သတင်းအချက်အလက် ပေးရန် ပျက်ကွက်မှုကြောင့် စားသုံးသူကာကွယ်ရေးဥပဒေပုဒ်မ ၅၂၊ ပုဒ်မခွဲ(က) အရ သတိပေးခြင်း အမိန့်အား ချမှတ်ခဲ့ပါသည်။ အဆိုပါ ကားအရောင်းစင်တာများအား အွန်လိုင်းမှတဆင့် မော်တော်ယာဉ် များရောင်းချမည်ဆိုပါက အွန်လိုင်းမှတ်ပုံတင်ခြင်းလုပ်ငန်းများ ဆောင်ရွက်ရန်နှင့်မော်တော်ယာဉ် ရောင်းချမှုများနှင့်စပ်လျဉ်း၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအပါအဝင် သက်ဆိုင် ရာဌာနများမှ ထုတ်ပြန်ထားသည့် ဥပဒေ၊ နည်းဥပဒေများ၊ လုပ်ထုံးလုပ်နည်းများနှင့်အညီ ဆောင်ရွက် သွားရန်တို့ကို ညွှန်ကြားခဲ့ပြီး တိုင်ကြားမှုကို ပိတ်သိမ်းဆောင်ရွက်ခဲ့ပါသည်။ 

မကွေးတိုင်းဒေသကြီး၊ အောင်လံမြို့နေ တိုင်ကြားသူတစ်ဦး သည်  မကွေးမြို့ရှိ ကားဂိတ်တစ်ခု တွင် ငွေကျပ်(၁၀)သိန်းတန် စက်ဘီးဂီယာစက်တစ်ခုကို မန္တလေးမှ အောင်လံမြို့သို့ ဝန်ဆောင်ခ ပေး၍ ပို့ဆောင်စေခဲ့ရာ ၎င်းပစ္စည်းမှာ အောင်လံမြို့သို့ ရောက်ရှိ လာ ခြင်းမရှိသဖြင့် ဂိတ်သို့ မေးမြန်း စုံစမ်းရာ ဂိတ်တာဝန်ရှိသူမှ မကွေးမြို့ရှိဂိတ်သို့ ပေးပို့ခဲ့ကြောင်း၊ မကွေးမြို့ရှိဂိတ်မှတစ်ဆင့် အခြားယာဉ်လိုင်းဖြင့် ဆက်လက်ပေးပို့စေခဲ့ရာတွင် ပစ္စည်းမှာ လမ်းတွင်ပျောက်ဆုံးခဲ့ကြောင်း၊ မကွေးမြို့ရှိ ဂိတ်တာဝန်ရှိသူမှ လျော်ကြေးငွေကျပ်(၃)သိန်း ပေးလျော်မည်ဖြစ်ကြောင်း  ပြောကြားခဲ့မှု အပေါ် ပစ္စည်း၏တန်ဖိုးမှာ ငွေကျပ် (၁၀)သိန်းဖြစ်၍ ပစ္စည်း(သို့မဟုတ်) ပေးချေခဲ့ရသည့် ပစ္စည်းငွေ တန်ဖိုးအတိုင်း ပေးလျော်စေလိုသဖြင့် စားသုံးသူရေးရာဦးစီးဌာနသို့ ဆက်သွယ်တိုင်ကြားလာပါ သည်။

ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှ တာဝန်ရှိသူများက ပို့ဆောင် ရေး စီမံကိန်းဦးစီးဌာန၊ ပုဂ္ဂလိက လုပ်ငန်းသုံးမော်တော်ယာဉ်လိုင်းများ ကြီးကြပ်ရေးကော်မတီတို့ ပါဝင်သောအဖွဲ့ဖြင့် မကွေးမြို့ဂိတ်တာဝန်ခံအား  ခေါ်ယူမေးမြန်းခဲ့ရာ ဂိတ်တာဝန်ခံမှ အမှန်တစ်ကယ် ပေးချေခဲ့ရသည့် ပစ္စည်းတန်ဖိုးအထောက်အထားများ တင်ပြပေးရန်နှင့် တိုင်ကြားသူနှင့် ပြေလည် အောင် ညှိနှိုင်းသွားမည်ဖြစ်ကြောင်း တောင်းဆိုမှုအရ တိုင်ကြားသူထံမှ ပေးချေခဲ့သည့် အထောက် အထားများကို တောင်းယူ၍ မကွေးမြို့ဂိတ်တာဝန်ခံသို့ ပေးပို့ခဲ့သော်လည်း ပြေလည်မှုမရရှိသည့် အတွက် ဌာနမှ စစ်ဆေးရေးအရာရှိနှင့် သက်ဆိုင်ရာဌာနဆိုင်ရာများ ရှေ့မှောက်၌ ထပ်မံတွေ့ဆုံ ညှိနှိုင်းခဲ့ရာ တိုင်ကြားခံရသည့်ဂိတ်တာဝန်ခံမှ ငွေကျပ် (၈)သိန်းအား ပေးလျော်သွားမည်ဖြစ်ကြောင်း၊ လက်ရှိအခြေအနေတွင် ချက်ချင်းပေးလျော်နိုင်ခြင်းမရှိသည့်အတွက် တစ်လခန့် စောင့်ဆိုင်းပေးရန် ပြောကြားလာသဖြင့် တိုင်ကြားသူထံသို့ ဆက်သွယ်ညှိနှိုင်းပေးခဲ့ရာ သဘောတူလက်ခံပါသည်။  ၁၇-၂-၂၀၂၅ ရက်နေ့တွင် မကွေးမြို့ဂိတ်တာဝန်ခံက သက်ဆိုင်ရာဌာနဆိုင်ရာများ ရှေ့မှောက်တွင် ငွေကျပ်(၈)သိန်းအား တိုင်ကြားသူသို့ ပေးလျော်ခဲ့ပြီး တိုင်ကြားသူမှ ကျေနပ်လက်ခံခဲ့သောကြောင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

    ပြည်ထောင်စုနယ်မြေ၊ နေပြည်တော်၊ ပျဉ်းမနား မြို့နယ်နေ တိုင်ကြားသူတစ်ဦးသည် Online Website မှ တရားမဝင် ကုန်သွယ်မှုပြု၍ ငွေကြေးလိမ်လည်နေ သော အဖွဲ့အစည်းအား ဖမ်းဆီးဖော်ထုတ် အရေးယူ ပေးပါရန် စားသုံးသူရေးရာဦးစီးဌာနသို့ ဆက်သွယ် တိုင်ကြားလာပါသည်။

    ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှ တာဝန်ရှိသူများက စိစစ်ပြီး နောက် တိုင်ကြားမှုဖြစ်စဉ်သည် စားသုံးသူကာကွယ်ရေးဥပဒေအရ ဖြေရှင်းဆောင်ရွက်ပေးရန် အကန့်အသတ်ရှိနေသည့်အတွက် ပြည်ထဲရေးဝန်ကြီးဌာန၊ မှုခင်းရဲတပ်ဖွဲ့အနေဖြင့် ပူးပေါင်းကူညီ စုံစမ်းဖော်ထုတ်ပေးနိုင်ပါရန် ပြည်ထောင်စုဝန်ကြီးရုံးမှ ပြည်ထဲရေးဝန်ကြီးဌာနသို့ ညှိနှိုင်းပေးပို့ခဲ့ ခြင်းအပေါ် ပြည်ထဲရေးဝန်ကြီးဌာနက တိုင်ကြားသူအနေဖြင့် အကျိုးအမြတ်များ ပြန်လည်ရရှိခြင်း မရှိဘဲ လိမ်လည်ခံခဲ့ရခြင်းကြောင့် ငွေကြေးများ ဆုံးရှုံးနစ်နာမှုများနှင့်ပတ်သက်၍ သက်ဆိုင်ရာ ရဲစခန်းတွင် အမှုရေးဖွင့် တိုင်တန်းသင့်ပါကြောင်း အကြောင်းပြန်ကြားလာမှုကို  တိုင်ကြားသူအား ရုံးအမှတ်(၅၂)၊ စားသုံးသူရေးရာဦးစီးဌာနသို့ ခေါ်ယူတွေ့ဆုံ ရှင်းလင်းဆွေးနွေး ခဲ့ရာ တိုင်ကြားသူက သက်ဆိုင်ရာရဲစခန်းတွင် အမှုဖွင့်လှစ်ဆောင်ရွက်သွားမည်ဖြစ်ကြောင်းနှင့် တိုင်ကြားမှုအား ပိတ် သိမ်းခွင့်ပြုနိုင်ပါရန် လက်မှတ်ရေးထိုး၍ တင်ပြလာခဲ့သဖြင့် တိုင်ကြားမှုကို ပိတ်သိမ်းဆောင်ရွက်ခဲ့ ပါသည်။