ပြည်တွင်းကုန်သွယ်မှုသတင်း

         ခရမ်းချဥ်သီးကိုမြန်မာနိုင်ငံတွင် မန္တလေး၊ မကွေး၊ စစ်ကိုင်းနှင့် ရှမ်းပြည်နယ်စသည့် ဒေသများတွင် အဓိကစိုက်ပျိုးကြကြောင်း သိရပါသည်။ ခရမ်းချဥ်သီးသည် နေ့စဥ်အစားအသောက်ထဲတွင် ပါဝင်ပြီး စျေးကွက်ဝင်သီးနှံတစ်မျိုးဖြစ်သည်။ ခရမ်းချဥ်သီးပင်ကို ဘောင်ဖော်၍စိုက်ပျိုးနိုင်သလို ပျိုးအိတ်ဖြင့်လည်း စိုက်ပျိုးနိုင်ပါသည်။ ခရမ်းချဥ်သီးတွင် ချို၊ ချဥ်သော အရသာရှိပြီး ရေစင်အောင်ဆေး၍ ဆီ၊ မြေပဲ၊ ပုဇွန်ခြောက်မှုန့်၊ ပဲမှုန့်၊ ဆီချက်တို့ဖြင့် ရောနှော၍ ခရမ်းချဥ်သီးသုပ်အဖြစ်လည်းကောင်း၊ ချင်း/လက်ဖက်တို့ဖြင့် ရောနှော၍လည်းကောင်း၊ ထမင်းနှင့်ရောနှော၍ လက်ဖက်ထမင်းသုပ်အဖြစ်လည်းကောင်း ထည့်သွင်းစားသုံးကြသလို ခရမ်းချဥ်သီးယို၊ ခရမ်းချဥ်သီး sauceနှင့် ဟင်းများတွင် ချက်ပြုတ်စားသုံးကြပြီး ခရမ်းချဥ်သီးဖျော်ရည်အနေဖြင့် သောက်သုံးနိုင်ပါသည်။

       ခရမ်းချဥ်သီးသည် နှလုံးကိုကျန်းမာစေပါသည်။ အရိုးအဆစ်သန်မာစေသည့် ကယ်လစီယမ်၊ သံဓါတ်၊ ဗီတာမင်စီ၊ မျက်စိအမြင်ကောင်းစေသော ဗီတာမင်အေ၊ ပိုတက်စီယမ်နှင့် အခြားဗီတာမင် သတ္တုဓါတ်များပါဝင်သည့်အပြင် အသားအရေလှပစေရန် ခရမ်းချဥ်သီးကို စားသုံးကြကြောင်း သိရပါသည်။ ခရမ်းချဥ်သီးကို မြိတ်ဒေသရှိရပ်ကွက်နှင့် စျေးများတွင်ရောင်းချလျက်ရှိပြီး ၂၀၂၆ ခုနှစ် ဇူလိုင် လတတိယအပတ်တွင် မြိတ်မြို့၊ ဆိပ်ငယ်စည်ပင်သာယာစျေး၌ ခရမ်းချဥ်သီးတစ်ပိဿာလျှင် ၄၀၀၀ ကျပ်ဖြင့်ရောင်းချလျက်ရှိကြောင်း သိရှိရပါသည်။

DOCA(တနင်္သာရီ)

       တနင်္သာရီတိုင်းဒေသကြီးအတွင်း မိသားစုတစ်ပိုင်တစ်နိုင်နှင့် စီးပွားဖြစ်ခရမ်းချဉ်သီး စိုက်ပျိုးထုတ်လုပ်မှုများ အောင်မြင်ဖြစ်ထွန်းနေပြီး ဒေသအတွင်း ဝယ်လိုအားကောင်းမွန်ကာ စျေးနှုန်းခိုင်မာမှုကြောင့် တောင်သူများ ပုံမှန်ဝင်ငွေရရှိ၍ စားဝတ်နေရေး အဆင်ပြေလျက်ရှိကြောင်း ဒေသခံတောင်သူများထံမှ သိရသည်။

       လက်ရှိစျေးကွက်အတွင်း စျေးနှုန်းအခြေအနေမှာ ဒေသထွက် ခရမ်းချဉ်သီး တစ်ပိဿာလျှင် (၄၀၀၀)ကျပ် ဝန်းကျင်ဖြစ် ပုံမှန်စျေးကောင်းရရှိနေပြီး၊ အခြားတိုင်းနှင့်ပြည်နယ်များမှ မှာယူရသည့် သယ်ယူစရိတ်သက်သာခြင်းနှင့် ဒေသထွက်အသီးများ၏ လတ်ဆက်မှုတို့ကြောင့် ထားဝယ်၊ မြိတ်နှင့်ကော့သောင်း စသည့် မြို့ကြီးများရှိ မြို့မစျေးများနှင့် ကုန်စိမ်းဒိုင်များတွင် စျေးကွက်ဝယ်လိုအားခိုင်မာလျက်ရှိကြောင်း သိရသည်။

          တနင်္သာရီတိုင်းအတွင်း ခရမ်းချဉ်သီးစိုက်ပျိုးရေးသည် ဒေသခံများ၏ မိသားစုဝင်ငွေကို တစ်ဖက်တစ်လမ်းမှ များစွာအကျိုးပြုနေသော သီးနှံတစ်ခုဖြစ်ကြောင်း သိရှိရပါသည်။

DOCA(တနင်္သာရီ)

     တနင်္သာရီတိုင်းဒေသကြီး၊ ထားဝယ်မြို့ပေါ်ရှိဈေးများတွင် ပဲပြားများရောင်းချနေကြောင်း သိရသည်။ ထားဝယ်မြို့အတွင်းရှိ ဟင်းသီးဟင်းရွက်ရောင်းချသည့် ဈေးဆိုင်များတွင် ဟင်းသီးဟင်းရွက်အပြင် ပဲပြားသည်လည်း မပါမဖြစ်တွဲ၍ စားသုံးသော အစားအစာတစ်မျိုး ဖြစ်ပါသည်။ ပဲပြားသည် သတ်သတ်လွတ်စားသုံးသူများအတွက် အသားဓါတ်တွေကို ပဲပြားကနေရနိုင်ပြီး ကိုယ်ခန္ဓာအတွက် လိုအပ်သော ဗီတာမင်ချို့တဲ့မသွားစေရန် ပဲပြားကို စားသုံးကြသည်။ ပဲပြားကို ကြော်ပြီးအစာသွပ်စားခြင်းဟာ မြန်မာတို့အတွက် နှစ်ကြိုက်လှတဲ့ သရေစာ တစ်မျိုးဖြစ်ပါသည်။ ပဲပြားကို အစိမ်းချက်စားကြသလို ကြော်၍၊ သုပ်၍လည်း စားသုံးကြသည်။ ထို့အပြင်  ဟင်းချိုတွေနဲ့ တစ်ချို့ဟင်းလျာတွေမှာ တွဲဖက်ပါဝင်ပစ္စည်းအဖြစ် အသုံးပြုကြသည်။

       ၂၀၂၆ ခုနှစ်၊ ဇူလိုင်လ၊ တတိယပတ်တွင် ရောင်းချလျက်ရှိသော ပဲပြားဈေးနှုန်းများမှာ ပဲပြား(၁)တုံးလျှင် (၈၀၀)ကျပ်ဖြင့် ရောင်းချပြီး (၃)တုံးလျှင် (၂၄၀၀)ကျပ်ဖြင့် ရောင်းချကြောင်း သိရှိရပါသည်။

DOCA(တနင်္သာရီ)

         တနင်္သာရီတိုင်း၊ မြိတ်မြို့နယ်အတွင်း မိုးရာသီအစပြုလာသည်နှင့်အမျှ သဘာဝဝါးတောများမှ မျှစ်များပေါများစွာထွက်ရှိလာပြီး မျှစ်ဈေးကွက်များပြန်လည်အသက်ဝင်လာကာ ဒေသခံပြည်သူများအတွက်  စားသောက်ကုန်နှင့်ဝင်ငွေရရှိရေးအတွက် အရေးပါသော သဘာဝထွက်ကုန်တစ်ခုဖြစ်လာပြီး ဒေသတွင်းဈေးကွက်များ၌ မျှစ်အရောင်းအဝယ်များ ကောင်းမွန်လျက်ရှိကြောင်း ဒေသခံများနှင့် ဈေးသည်များထံမှ သိရှိရပါသည်။ ကျေးရွာများတွင် မျှစ်များ နေ့စဉ်ထွက်ရှိလာပြီး ဒေသတွင်း ဈေးများသို့ တင်ပို့ရောင်းချနေကြောင်း သိရှိရပါသည်။ ဒေသခံများသည် တောအတွင်းသို့သွားပြီး သွားရောက်ခူးဆွတ်ကာ လတ်လတ်ဆပ်ဆပ်ရောင်းချခြင်း၊ မျှစ်ချဉ်ဖောက်ခြင်းများပြုလုပ်၍ စီးပွားဖြစ်ရောင်းချလျက်ရှိကြပါသည်။ ဒေသခံများအနေဖြင့် မျှစ်များကို မျှစ်ဟင်းချို၊ မျှစ်သုပ်၊ ငပိရည်နှင့် တွဲဖက်စားသုံးခြင်းနှင့် မျှစ်ချဥ်များကိုလည်း အသား၊ ငါးများနှင့်ရောနှောချက်ပြုတ်ကြသည့်အတွက် လူကြိုက်များလျက်ရှိကြောင်း သိရှိရပါသည်။ မျှစ် ရှာဖွေရောင်းချခြင်းသည် မိုးရာသီကာလအတွင်း မြိတ်မြို့နယ်ရှိ ကျေးလက်ဒေသနေ ပြည်သူများအတွက် အပိုဝင်ငွေရရှိစေသော ရာသီတစ်ခုဖြစ်သည့်အတွက် လက်ရှိတွင် မျှစ်(၁၀)ချောင်းပါ တစ်စည်းလျှင် (၂၀၀၀)ကျပ်ဖြင့် ရောင်းချနေကြောင်း သိရှိရပါသည်။

DOCA(တနင်္သာရီ)

    စားသုံးသူရေးရာဦးစီးဌာန၊ ကချင်ပြည်နယ်၊ မြစ်ကြီးနားခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် မြစ်ကြီးနားမြို့နယ်အတွင်းရှိ ပြည်သူလူထုများနှင့် ကျေးလက်နေတောင်သူ လယ်သမားများအား ကုန်စည်များကို ဈေးနှုန်းမှန်ကန်စွာ ဝယ်ယူအသုံးပြုနိုင်ရေးနှင့် ကုန်သွယ်မှု ကဏ္ဍ ပိုမိုဖွံ့ဖြိုးတိုးတက်လာစေရန်ရည်ရွယ်၍ ဒေသတွင်း ကုန်စည်ရောင်းချသောဆိုင်များ၊ စတိုးဆိုင် များ၊ ကုန်မာဆိုင်များ၊ စိုက်ပျိုးရေးသုံးပစ္စည်း ရောင်းချသောဆိုင်များ၊ ဆေးဆိုင်၊ ဆန်ဆိုင်များသို့ အပတ်စဉ်ကွင်းဆင်း၍ ဈေးနှုန်းနှင့် ဈေးကွက်အခြေအနေများကို လေ့လာဆန်းစစ်တင်ပြလျက်ရှိပါသည်။

     ၂၀၂၆ခုနှစ်၊ ဇူလိုင်လ (စတုတ္ထပတ်)တွင် မြစ်ကြီးနားမြို့နယ်အတွင်း၌ အခြေခံဆောက်လုပ်ရေး လုပ်ငန်းသုံးပစ္စည်းများဖြစ်သော ဘိလပ်မြေနှင့် စိုက်ပျိုးရေးလုပ်ငန်းခွင်သုံး စိုက်ပျိုးရေး သွင်းအားစု များဖြစ်သော ဓာတ်မြေဩဇာနှင့် ပိုးသတ်ဆေးများမှာ သယ်ယူပို့ဆောင်ရေးလမ်းကြောင်းအတိုင်း စီးဝင်လျက် ရှိသော်လည်း ယခုအခြေအနေတွင် လမ်းခရီးပိတ်ဆို့မှုများကြောင့် ကုန်စည်အဝင် ကျဆင်းနေပြီး လက်ကျန်လျော့နည်းနေကြောင်းနှင့် ဈေးနှုန်းများမှာ တည်ငြိမ်လျက်ရှိကြောင်း သိရပါသည်။

    ဒေသတွင်း ဘိလပ်မြေဈေးကွက်အခြေအနေမှာ မိုးရာသီကာလဖြစ်သောကြောင့် ဒေသတွင်း အကြီးစား ဆောက်လုပ်ရေးလုပ်ငန်းများနှင့် အဆောက်ဦးပြင်ဆင်မှုလုပ်ငန်းများ နည်းပါးသွားခြင်း ကြောင့် ဘိလပ်မြေဝယ်လိုအားမှာ ယခင်လများထက် အနည်းငယ် လျော့နည်းသွားသော်လည်း ဈေးကွက်အတွင်း ကုန်စည်ပြတ်လပ်မှုမရှိဘဲ ပုံမှန်အရောင်းအဝယ်ဖြစ်နေကြောင်း သိရပါသည်။ ဈေးကွက်အတွင်း အရောင်းအဝယ်ဖြစ်နေသော ဘိလပ်မြေဈေးနှုန်းမှာ  Crown-525 တစ်အိတ်လျှင် ကျပ် ၅၆၀၀၀၊ Crown-425 တစ်အိတ်လျှင်ကျပ် ၅၅၅၀၀၊ Alpha တစ်အိတ်လျှင်ကျပ် ၅၅၀၀၀၊ Apache တစ်အိတ်လျှင်ကျပ် ၅၅၀၀၀ တို့ဖြင့် ဈေးကွက်အတွင်း အသီးသီးရောင်းချလျက်ရှိကြောင်း သိရှိရပါသည်။

    စိုက်ပျိုးရေးသွင်းအားစု (ဓာတ်မြေဩဇာနှင့်ပိုးသတ်ဆေး) ဈေးကွက်အခြေအနေမှာ မိုးရာသီ စိုက်ပျိုးချိန်ကာလဖြစ်သောကြောင့် တောင်သူလယ်သမားများအနေဖြင့် စိုက်ပျိုးရေးသွင်းအားစုများ ဖြစ်သော ဓာတ်မြေဩဇာနှင့် ပိုးသတ်ဆေးများ အဝယ်လိုက်လျက်ရှိပါသည်။ ယခုအချိန်တွင် ကားလမ်း များ ပိတ်ဆို့ထားမှုရှိသော်လည်း သွင်းအားစုများကို ဈေးနှုန်းသက်သာစွာ ဝယ်ယူနိုင်ရေးကို သက်ဆိုင်ရာဌာနများမှ ကူညီဆောင်ရွက်ပေးလျက်ရှိပါသည်။ ဈေးကွက်အတွင်း ဓာတ်မြေဩဇာနှင့် ပိုးသတ်ဆေးဈေးနှုန်းများ တည်ငြိမ်လျက်ရှိပြီး  ၂၀၂၆ခုနှစ်၊ ဇူလိုင်လ(စတုတ္ထပတ်)တွင် ဖြစ်ပေါ်နေ သော ဓာတ်မြေဩဇာဈေးနှုန်းများမှာ ပုလဲ(ရွှေတောင်) (50KG) တစ်အိတ်လျှင်ကျပ် ၂၄၀၀၀၀၊ ကွန်ပေါင်း(အာမို)(၁၀:၁၀:၅)(50KG)တစ်အိတ်လျှင်ကျပ်၂၃၀၀၀၀၊ ကွန်ပေါင်း (၁၅:၁၅:၁၅) (50KG) တစ်အိတ်လျှင်ကျပ် ၂၆၀၀၀၀ ဖြင့်ရောင်းချလျက်ရှိပြီး ပိုးသတ်ဆေးဈေးနှုန်းများအနေဖြင့်  Rocket (ဝိစာရ)10cc တစ်ထုပ်လျှင်ကျပ် ၃၀၀၀ ၊ Rocket (ဝိစာရ)100cc တစ်ထုပ်လျှင်ကျပ် ၁၂၀၀၀ ၊ အီဘာလန်ဒါ (ဝိစာရ) 100g တစ်ထုပ်လျှင်ကျပ် ၂၀၀၀၀ ၊ အလန်း(ဩဘာ)100g တစ်ထုပ်လျှင်ကျပ် ၂၃၀၀၀၊ ဘတ်တား(ဩဘာ)10g တစ်ထုပ်လျှင်ကျပ် ၃၅၀၀ တို့ဖြင့်ရောင်းချလျက်ရှိကြောင်း သတင်းရရှိပါသည်။

DOCA(ကချင်)