ပြည်တွင်းကုန်သွယ်မှုသတင်း

          နနွမ်းကို မြန်မာနိုင်ငံအနှံ့အပြားတွင်စိုက်ပျိုးကြပြီး နနွမ်းကိုနေ့စဉ် ချက်ပြုတ် စားသောက်သော ဟင်းလျာများတွင် ဟင်းခတ်အမွှေးအကြိုင်အဖြစ်အသုံးပြုကြသည့်အပြင် တိုင်းရင်းဆေးများ ဖော်စပ် ရာတွင်လည်း အသုံးပြုကြပြီး နနွမ်းဖူးများကို တို့စရာဖြစ်စားသုံး၍ နနွမ်းခေါင်းကို ခြင်ဆေးအဖြစ် လည်းအသုံးပြုကြပါသည်။ နနွမ်းကို မိတ္ထီလာခရိုင်၊ သာစည်မြို့နယ်ရှိတောင်ပေါ်ဒေသများတွင် အနည်း ငယ်စိုက်ပျိုးကြကြောင်း၊ ၂၀၂၅-၂၀၂၆ ခုနှစ်တွင် သာစည်မြို့နယ် နနွမ်းစိုက်ဧက (၁၅၃)ဧက စိုက်ပျိုး ထားရှိကြောင်း ကြေးတိုင်နှင့် မြေစာရင်းဦီးစီးဌာနစာရင်းအရသိရပါသည်။

       နနွမ်းကို မေလနှင့်ဇွန်လများတွင်စိုက်ပျိုးကြကြောင်း၊ ဒေသတွင်းမှာ အနည်းငယ်သာ ထွက်ရှိသဖြင့် မိတ္ထီလာဈေးကွက်အတွင်းသို့ အောင်ပန်းနှင့်ကျောက်ဆည်မြို့နယ် ဆူးလေကုန်း ကျေးရွာမှ ထွက်ရှိသော နနွမ်းများအများဆုံးဝင်ရောက်လျက်ရှိကြောင်းသိရပါသည်။

         ယခုဇွန်လဒုတိယပတ်တွင် ပွဲရုံလက္ကားဈေး ရှမ်းနနွမ်းတစ်ပိဿာလျှင် (၁၄၀၀၀) ကျပ်၊ ကျောက်ဆည်နနွမ်းတစ်ပိဿာ(၁၅၅၀၀)ကျပ်၊ လက်လီရှမ်းနနွမ်း တစ်ပိဿာလျှင် (၁၆၀၀၀)ကျပ်၊ ကျောက်ဆည်နနွမ်းတစ်ပိဿာလျှင်(၁၆၅၀၀)ကျပ်၊ နနွမ်းခေါင်းဈေး တစ်ပိဿာလျှင်(၁၁၀၀၀) ကျပ်ဈေးဖြင့်အရောင်းအဝယ်ဖြစ်လျက်ရှိကြောင်း၊ ယခင်လနှင့်ကာလ တူနှိုင်းယှဉ်လျှင် နနွမ်းတစ်ပိဿာလျှင်(၁၀၀၀)ကျပ်ခန့်ဈေးနှုန်း အနည်းငယ်မြင့်တက်လာကြောင်း ပွဲရုံများမှသိရပါသည်။

DOCA(မန္တလေး)

            ဧရာဝတီတိုင်းဒေသကြီး၊ မအူပင်ခရိုင်တွင် လယ်ယာစိုက်ပျိုးရေးလုပ်ငန်းများကို      အဓိကထား လုပ်ကိုင်ကြပြီး စပါး၊ ပဲ၊ ပြောင်း၊ နှမ်း စသည့်သီးနှံများ စိုက်ပျိုးသည့်အပြင် စားဖိုဆောင်သီးနှံများကိုလည်း ရာသီအလိုက် စိုက်ပျိုးလျက်ရှိရာ ရုံးပတီသီး သီးနှံကိုလည်း စီးပွားဖြစ် စိုက်ပျိုးကြကြောင်း သိရသည်။

         ရုံးပတီသီးမျိုးအနေဖြင့် ပင်ပုမျိုး၊ ပင်လတ်မျိုး၊ ပင်မြင့်မျိုးများဖြစ်ပြီး ပင်မြင့်မျိုး (Finger One) ရုံးပတီမျိုးကို အများဆုံးစိုက်ပျိုးကြကြောင်း၊ တစ်ဧကလျှင် မျိုးစေ့ ၁၅ ထုပ် စိုက်ပျိုးရပြီး စိုက်ပျိုးမှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း ငွေကျပ် ၈၀၀၀၀၀ ခန့် ကုန်ကျကြောင်း၊ ရုံးပတီသီးနှံကို စိုက်ပျိုးပြီး ၄၅ ရက်အကြာတွင် စတင်ခူးဆွတ်ရ၍ တစ်ရက်ခြား တစ်ကြိမ် ခူးဆွတ်လျက်ရှိရာ သက်တမ်းအနေဖြင့် ၂ လထိ ခူးဆွတ်ရကြောင်း၊ အထွက်နှုန်းအနေဖြင့် တစ်ဧကလျှင် ရုံးပတီသီးပိဿာချိန် ၂၀၀၀ ခန့် ထွက်ရှိပြီး ဈေးနှုန်းအနေဖြင့် လက်ကားဈေး တစ်ပိဿာလျှင် ငွေကျပ် ၂၅၀၀-၂၇၀၀၊ လက်လီဈေး တစ်ပိဿာလျှင် ငွေကျပ် ၃၀၀၀ ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း၊ အကျိုးအမြတ်အနေဖြင့် တစ်ဧကလျှင် ငွေကျပ် ၁၈-သိန်းမှ ၂၀ သိန်းခန့် အကြားရရှိပြီး ဈေးကွက်အနေဖြင့် ကုန်စိမ်းပွဲစားများမှာ စိုက်ခင်းအထိ လာရောက်ဝယ်ယူကြကြောင်း၊ ရုံးပတီပင်သည် ရာသီမရွေးစိုက်ပျိုးနိုင်ပြီး ဈေးကောင်းရရှိသည့်အတွက် တောင်သူများအနေဖြင့် အကျိုးအမြတ်များ ပိုမိုရရှိကြောင်း တောင်သူတစ်ဦးထံမှ သိရှိရပါသည်။

DOCA (ဧရာဝတီ)

                ပဲခူးတိုင်းဒေသကြီး (အနောက်) နတ်တလင်းခရိုင်အတွင်းရှိ ကျေးရွာများတွင်လယ်ယာစိုက်ပျိုးခြင်း လုပ်ငန်းများ လုပ်ကိုင်ကြပြီးသီးနှံမျိုးစုံ စိုက်ပျိုးလျက်ရှိရာ  ဟင်းသီးဟင်းရွက်သီးနှံ ခရမ်းကြွပ်သီးပင်ကို စိုက်ပျိုးလျှက်ရှိပါသည်။ ခရမ်းကြွပ်သီးသည် စိုက်ပျိုးရလွယ်ကူပြီးကုန်ကျစရိတ်သက်သာပြီး  စီးပွားဖြစ် မိသားစုတစ်ပိုင်တစ်နိုင် အကျိုးအမြတ်ရရှိစေသော သီးနှံတစ်မျိုးဖြစ်ပါသည်။

             ခရမ်းကြွပ်သီးပင်ကို ရာသီမရွေးစိုက်ပျိုးနိုင်သော်လည်း နိုဝင်ဘာလတွင် အများဆုံးစတင်စိုက်ပျိုးကြ  ပါသည်။  စိုက်ပျိုးပြီး (၂)လခန့် အကြာတွင် အသီးများစတင်ခူးဆွတ်နိုင်ပါသည်။ ခရမ်းကြွပ်ပင်သည် အသီး  ခူးရမှု နဲသွားချိန်တွင်  ပင်ခြေမှ (၆-၈)လက်မခန့်ချန်၍ မလိုအပ်သော အကိုင်းအခက်များကိုဖြတ်တောက်ပစ်ကာ ရေနှင့် မြေဩဇာများပြန်ကြွေးပါက  တစ်လအတွင်း အသီးအသစ်များ ဒုတိယအကြိမ်ပြန်လည် ခူးဆွတ် နိုင်ကြောင်းသိရပါသည်။ ယခုလိုမိုးဦးကာလ ဇွန်လပိုင်းလောက်တွင် ခရမ်းကြွပ်သီး တစ်ပိဿာလျှင်(၃၀၀၀-  ၃၅၀၀)ထိ လက်ကားဒိုင်များသို့  ဖောက်သည်ပေးရကေဲာင်းသိရသည်၊ ထို့ကြောင့်ခရမ်းကြွပ်ပင်ကိုစိုက်ပျိုးရလွယ်ကူသောကြောင့် မိသားစု တစ်ပိုင်တစ်နိုင်အကျိုးအမြတ်ရရှိ၍ ဝင်ငွေတိုးသည့်အတွက် စိုက်ပျိုးသင့်သော သီးနှံဖြစ်ကြောင်းသိရပါသည်။

DOCA(ပဲခူး)

               ပဲခူးတိုင်းဒေသကြီး နတ်တလင်းခရိုင် သဲကုန်းမြို့နယ် ညောင်ဝင်းအုပ်စု လက်ပံပင်လေး ကျေးရွာ တောင်သူဦးသန်းဝင်း စိုက်ပျိုးထားသော သခွါးသီးစိုက်ခင်းသို့ သွားရောက်ကာ တစ်ဧက ကုန်ကျစရိတ် တစ်ဧကအထွက်နှုန်း တစ်ဧကအကျိုးအမြတ်နှင့် ဈေးကွက် ဈေးနှုန်း အခြေအနေ တို့အားသွားရောက် လေ့လာခဲ့ပါသည်။

              တစ်ဧကစိုက်ပျိုးရာတွင် မျိုး၊ ထွန်ယက်ခ နှင့် ဓါတ်မြေဩဇာ အပါအဝင် ကုန်ကျစရိတ် ပေါင်း(၈)သိန်းကျော် ကုန်ကျပြီး သခွါးသီးတစ်လုံးလျှင် (၇၀၀)ကျပ် ရောင်းချရ၍ (၃)ရက်လျှင် တစ်ကြိမ်ခူးဆွတ်ရောင်းချပြီးတစ်ရာသီစိုက်ပျိုးလျှင်(၅)သိန်းကျော်အမြတ်ရရှိပါသည်။ ကုန်စိမ်းဒိုင် များမှလာရောက် သယ်ယူကာ ကုန်စိမ်းကားများဖြင့် ရန်ကုန်မြို့နယ် ဒညင်းကုန်းဈေးကြီး အတွင်းသို့ ပို့ဆောင်ရောင်းချရပြီး ဈေးကွက်ဝင် သီးနှံဖြစ်သောကြောင့် တောင်သူများအကျိုးအမြတ်ရရှိကာ စီးပွားဖြစ်သီးနှံအဖြစ် ဆက်လက် စိုက်ပျိုးလုပ်ကိုင်သွားမည် ဖြစ်ကြောင်းသိရှိရပါသည်။

DOCA(ပဲခူး)

                      ပဲခူးတိုင်းဒေသကြီး၊ ပြည်ခရိုင်၊ ပန်းတောင်းမြို့နယ် မကြီးကုန်းအုပ်စု မကြီးကုန်းကျေးရွာ တောင်သူ ဦးရွှေမြင့်သည် တိုင်တောင်ပဲ စိုက်ပျိုးထားကြောင်း၊ စိုက်ပျိုးမြေ တစ်ဧကတွင် တိုင်ထောင်ပဲ (တစ်သုံးလုံး) မျိုး (၂) ထုပ် ကုန်ကျကြောင်း၊ တိုင်ထောင်ပဲ တစ်ထုပ်လျှင် ကျပ် ၅၄၀၀၀ ရှိကြောင်း၊ တစ်ဧကမျိုးစေ့မှာ ၂ ထုပ် အသုံးပြုရ၍ ကျပ် ၁၀၈,၀၀၀ ကုန်ကျကြောင်း၊ တစ်ဧက ထွန်ယက်ခမှာ ကျပ် ၆၀,၀၀၀ ကုန်ကျကြောင်း၊ ဘောင်ဆွဲခမှာ တစ်မနက် ကျပ် ၇,၀၀၀ နှင့် (၅) ယောက်ငှားခ ကျပ် ၃၅,၀၀၀ ဖြင့် (၃) ရက်ကြာ ဘောင်ဆွဲရသဖြင့် ငှားရမ်းခမှာ ကျပ် ၁၀၅,၀၀၀ ကုန်ကျကြောင်း သိရှိရပါသည်။ မြေအောက်ခံဆေးအနေဖြင့် ရွှေနင်္ဂါး တစ်ပိဿာ ကျပ် ၄,၀၀၀ နှင့် (၄) ကြိမ်ပက်ဖျန်း စရိတ်မှာ ကျပ် ၁၆,၀၀၀ ကုန်ကျကြောင်း၊ အပင်အားဆေးမှာလည်း ရွှေမင်္ဂလာ တစ်ထုပ် ကျပ် ၂၅,၀၀နှင့် (၄) ကြိမ်ပက်ဖျန်းစရိတ် မှာ ကျပ် ၁၀,၀၀၀ ကုန်ကျကြောင်း၊ ထပ်မံဆေးဖျန်းစရိတ်မှာလည်း တစ်မနက် ကျပ် ၇,၀၀၀နှုန်းနှင့် ၃ယောက်ငှားခမှာ ကျပ် ၂၁,၀၀၀ ပေချေရကြောင်း၊ တစ်ဧကစုစုပေါင်း ကုန်ကျစရိတ်မှာ ကျပ် ၃၂,၀၀၀၀ ကုန်ကျကြောင်း သိရှိရပါသည်။ တစ်ဧကအထွက်ခန့်မှန်းမှုမှာ တိုင်ထောင်ပဲ အတောင့်အရေအတွက်မှာ အတောင့် ၆၀,၀၀၀ ပြီး ယခုပေါက်ဈေးမှာ တိုင်ထောင်ပဲတစ်တောင့်ကို ကျပ် (၂၀) နှုန်းဖြင့် ရောင်းရသဖြင့် (၂၀) ရောင်းရငွေမှာ ကျပ် ၁,၂၀၀,၀၀၀ ရရှိသဖြင့် စိုက်ပျိုးတောင်သူအနေဖြင့် ကျပ် ၈၈၀,၀၀၀အကျိုးအမြတ်ရရှိမည်ဖြစ်ကြောင်း သိရှိရပါသည်။ အထွက်နှုန်းမှာလည်း စိုက်ပျိုးမြေပေါ်မူတည်၍ မြေကောင်းလျှင်ကောင်းသလို အကျိုးအမြတ်ရရှိပြီး ဈေးနှုန်းကောင်းလျှင် အကျိုးအမြတ်များပြီး ဈေးနှုန်းနည်းလျှင် အကျိုးအမြတ်နည်းပါးကြောင်း ရေးသားဖော်ပြလိုက်ရပါသည်။

DOCA(ပဲခူး)