ပြည်တွင်းကုန်သွယ်မှုသတင်း

           ပဲခူးတိုင်းဒေသကြီး၊ ပြည်ပဲမျိုးစုံဈေးကွက်အတွင်း ပြည်တွင်းအဝယ်ရှိသော ပဲများနှင့် ပြည်တွင်း စားသုံးမှုများပြီး ဒေသတွင်း ဝယ်လိုအားများသော ပဲများ သာ လက်လီ/ လက်ကား ရောင်းဝယ်မှု ဖြစ်လျှက်ရှိခဲ့ကြပါသည်။ ထိုပဲများ၏ ၂၀၂၆ခုနှစ် ဧပြီလမှ ဇွန်လအထိ ဖြစ်ပေါ်ခဲ့သော ပဲဈေးနှုန်းများ၏ လအလိုက် ဈေးနှုန်းများကို လေ့လာရာတွင် အောက်ပါအတိုင်း တွေ့ရှိ ရပါသည် -

စဉ်        ပဲအမျိုးအစား          ရေတွက်ပုံ      ၂၀၂၆            ၂၀၂၆            ၂၀၂၆          

                                                           ဧပြီ              မေ                 ဇွန်   (ကျပ်)

၁။      မြေပဲဆီဆန်             ပိဿာ           ၁၁၀၀၀         ၁၀၂၀၀          ၉၅၀၀          

၂။       မြေပဲလုံးဆန်            ပိဿာ           ၁၅၀၀၀         ၁၀၃၀၀         ၁၁၂၀၀                     ၃။          မတ်ပဲ                     တင်း             ၉၉၀၀၀         ၉၇၅၀၀         ၁၀၂၅၀၀                 ၄။     ပဲစင်းငုံ                    တင်း             ၉၅၀၀၀          ၉၆၅၀၀        ၉၆၀၀၀                   ၅။      ကုလားပဲ(HL)           တင်း             ၈၂၀၀၀       ၈၁၀၀၀            ၈၁၀၀၀

၆။      ပဲကြီး                      တင်း             ၁၆၀၀၀၀       ၁၇၀၀၀၀       ၂၂၀၀၀၀

၇။      ဘိုကိတ်ပဲ                တင်း             ၆၈၀၀၀         ၆၈၅၀၀         ၆၃၀၀၀

၈။      စားတော်ပဲ               တင်း             ၂၀၀၀၀၀        ၁၉၀၀၀၀       ၁၉၅၀၀၀

        ပြည်ဈေးကွက်တွင် ဖြစ်ပေါ်လျှက်ရှိသော မြေပဲဆန်(ဆီဆန်)ဈေးများမှာ ဧပြီလတွင် တစ်ပိဿာကို (၁၁၀၀၀)ကျပ်၊ မေလတွင် တစ်ပိဿာကို (၁၀၂၀၀)ကျပ်ဖြင့် ဈေးကျလာခဲ့ပြီး ဇွန်လတွင် တစ်ပိဿာကို (၉၅၀၀)ကျပ်ဖြင့် ဈေးများဆက်လက်ကျဆင်းလာခဲ့ပါသည်။ မြေပဲ(လုံးဆန်)ဈေးမှာလည်း ဧပြီလတွင် တစ်ပိဿာကို (၁၅၀၀၀)ကျပ်၊ မေလတွင် တစ်ပိဿာကို (၁၀၃၀၀)ကျပ်ဖြင့် တစ်ပိဿာကို (၄၇၀၀)ကျပ်ဖြင့် ဈေးနှုန်းများကျဆင်းလာပြီး၊ ဇွန်လတွင် တစ်ပိဿာကို (၁၁၂၀၀)ကျပ်ဖြင့် ဈေးပြန်လည်မြင့်တက်လာခဲ့ပါသည်။ ဈေးကွက် အနေ ဖြင့် ဆီစက်လုပ်ငန်းရှင်သမားများနှင့် ပဲကြော်ဖိုသမားများကဝယ်ယူမှုရှိ၍ တစ်နေ့လျှင် အိတ် (၃၀၀)ခန့် အရောင်း အဝယ်ဖြစ်ကြောင်းသိရှိရပါသည်။

         မတ်ပဲဈေးနှုန်းများအနေဖြင့် ဧပြီလတွင် တစ်တင်းကို (၉၉၀၀၀)ကျပ် ဖြင့် အရောင်း အဝယ် ဖြစ်ခဲ့ပြီး မေလတွင် တစ်တင်းကို (၉၇၅၀၀)ကျပ်ဖြင့် ဈေးပြန်ကျလာခဲ့ပါသည်။ ဇွန်လတွင် တစ်တင်းကို (၁၀၂၅၀၀)ကျပ်ဖြင့် ယခုလတွင် ဈေးနှုန်းများ ပြန်လည်မြင့်တက် လာခဲ့တာတွေ့ ရပါသည်။ မတ်ပဲကို ဒေသ တွင်းသာဝယ်ယူမှုရှိပြီး လက်လီသမားများနှင့် ပဲလှောင်လက်များဖြင့်သာ အရောင်း အဝယ် ဖြစ်လျှက်ရှိပါသည်။

        ပဲစင်းငုံဈေးမှာ ဧပြီလတွင် တစ်တင်းကို (၉၅၀၀၀)ကျပ်ဖြင့် အရောင်းအဝယ်ဖြစ်ခဲ့ပြီး မေလတွင် ဈေးနှုန်းများပြန်လည်မြင့်တက်လာပြီး တစ်တင်းကို(၉၆၅၀၀)ကျပ်ဖြင့် အရောင်း အဝယ် ဖြစ်ခဲ့ပါသည်။ ဇွန်လတွင် တစ်တင်းကို (၉၆၀၀၀)ကျပ်ဖြင့်  ဝယ်ယူမှုစ၍နည်းလာပြီး ဈေးမှာမဆို သလောက် ကျဆင်းလာခဲ့ပါသည်။

         ကုလားပဲ(HL) ဈေးမှာ ဧပြီလတွင် တစ်တင်းကို (၈၂၀၀၀)ကျပ်ဖြင့် အရောင်း အဝယ်ဖြစ်ခဲ့ပြီး ‌မေလနှင့် ဇွန်လတွင် တစ်တင်းကို(၈၁၀၀၀)ကျပ်ဖြင့် ဈေး(၁၀၀၀)ကျပ်ခန့်ကျဆင်းလာခဲ့ပါသည်။ကုလားပဲကို မြို့တွင်း ပဲခွဲစက်များမှ ဝယ်ယူမှုရှိသဖြင့် တစ်နေ့လျှင် အိတ် (၁၀၀)ခန့် အရောင်းအဝယ်ဖြစ်ကြောင်း သိရပါသည်။

      ပဲကြီးဈေးမှာ ဧပြီလတွင် တစ်တင်းကို (၁၆၀၀၀၀)ကျပ်ဖြင့် အရောင်းအဝယ်ဖြစ်ခဲ့ပြီး မေလတွင် တစ်တင်းကို (၁၇၀၀၀၀)ကျပ် ဈေးပြန်လည် မြင့်တက်လာပြီး ဇွန်လတွင် တစ်တင်းကို (၂၂၀၀၀၀)ကျပ်ဖြင့် ဈေးအမြင့်ဆုံးမြင့်တက်လာခဲ့ပါသည်။ ပဲကြီးကို ပဲလှော်ဖိုသမားများနှင့် လက်လီ သမားများမှ ဝယ်ယူမှုရှိ၍ တစ်နေ့လျှင် အိတ် (၅၀)ခန့် အရောင်း အဝယ်ဖြစ် ကြောင်း သိရပါသည်။

     ဘိုကိတ်ပဲဈေးမှာ ဧပြီလတွင် တစ်တင်းကို (၆၈၀၀၀)ကျပ် ၊ မေလတွင် တစ်တင်း ကို(၆၈၅၀၀)ကျပ်ဖြင့် ဈေးအနည်းငယ်မြင့်လာသော်လည်း ယခုဇွန်လတွင် ပဲတစ်တင်းကို (၆၃၀၀၀) ကျပ်ဖြင့် ဈေးများပြန်လည်ကျဆင်းလာတာတွေ့ရပါသည်။ ဈေးကွက်အနေဖြင့် လက်လီဝယ်ယူမှု အနည်းငယ်သာရှိကြောင်း သိရပါသည်။

       စားတော်ပဲဈေးများမှာ ဧပြီလ တွင် တစ်တင်းကို (၂၀၀၀၀၀)ကျပ်ဖြင့် ဈေးအမြင့်ဆုံးဖြင့် ရောင်းချခဲ့ပြီး မေလတွင် (၁၉၀၀၀၀)ကျပ်နှင့် ဇွန်လတွင် (၁၉၅၀၀၀)ကျပ်တို့ဖြင့် ရောင်းဝယ် လျှက်ရှိပါသည်။ စားတော်ပဲမှာ ဈေးကောင်းရသည့် ပဲသီးနှံတစ်မျိုးဖြစ်ပြီး ဈေးကွက် တွင်လည်း ရောင်းအားကောင်းသော ပဲတစ်မျိုးဖြစ်ပါသည်။

       ပြည်ဈေးကွက်တွင် အရောင်းအဝယ်ဖြစ်လျှက်ရှိသော ပဲများထဲတွင် ပဲကြီးနှင့် စားတော်ပဲ သီးနှံသာ ဈေးအမြင့်ဆုံးဖြစ်ပြီး ယခုလဖြစ်သောဇွန်လတွင် မတ်ပဲသီးနှံမှာ ဈေး(၁)သိန်းကျော်တွင် အရောင်းအဝယ်ဖြစ်လျှက်ရှိပါသည်။ ကျန်ပဲများမှာ အဆိုပါပဲများလောက်ဈေးမမြင့်ဘဲ အရောင်း အဝယ်ပုံမှန်ဖြစ်လျှက်ရှိကြောင်း လေ့လာသိရှိရပါသည်။

DOCA(ပဲခူး)

          မွန်ပြည်နယ်၊ ကျိုက်ထိုမြို့နယ်သည် စစ်တောင်းမြစ်ဝှမ်းနှင့် ကပ်လျက်ရှိပြီး ကမ်းရိုး တန်းဒေသများနှင့် နီးစပ်သည့်အပြင် ရန်ကုန်-မော်လမြိုင် လမ်းမကြီးပေါ်တွင် တည်ရှိသော ကြောင့် ရေထွက်ပစ္စည်း စီးဆင်းမှု ကောင်းမွန်သည့် မြို့နယ်တစ်ခုဖြစ်သည်။ လက်ရှိ ၂၀၂၆ ခုနှစ်အတွင်း ရေထွက်ပစ္စည်းဈေးကွက်သည် ပြည်တွင်းသယ်ယူပို့ဆောင်ရေးစရိတ်နှင့် ရာသီ ဥတုအခြေအနေများပေါ် မူတည်၍ ဈေးနှုန်းအတက်အကျရှိနေသည်။

          ဈေးကွက်စီးဝင်မှုပုံစံအရ ကျိုက်ထိုမြို့နယ်အတွင်းရှိ မြို့မဈေးကြီးနှင့် သိမ်ဇရပ်ဈေး များသို့ ရေထွက်ပစ္စည်းများ စီးဝင်သည့် လမ်းကြောင်း (၃) ခုရှိသည်ဟု သိရပါသည်။ ၎င်းတို့မှာ စစ်တောင်းမြစ်နှင့် ဘီးလင်းမြစ်ဝှမ်းတစ်လျှောက်ရှိ ကျေးရွာများမှဖမ်းဆီးရမိသော ဒေသတွင်း ရေချိုငါး/ပုစွန်များ၊ ချောင်းဆုံ၊ မော်လမြိုင်နှင့် ကျိုက္ခမီဘက်မှ ထွက်ရှိသည့် ပင်လယ်ငါး၊ ပုစွန်နှင့် ဂဏန်းများ၊ အအေးခန်းစနစ်ဖြင့် ရန်ကုန်မှ တင်ပို့လာသည့် ရေခဲရိုက် ပင်လယ်စာအချို့ (ရေဘဝဲ၊ ကင်းပုစွန်၊ ကင်းမွန်) စသည်တို့ဖြစ်ကြသည်။

          ဈေးနှုန်းများအနေဖြင့် ရေထွက်ပစ္စည်း အရွယ်အစားနှင့် လတ်ဆတ်မှုပေါ်မူတည်၍ ဈေးနှုန်းကွာခြားချက် ရှိနိုင်ကြောင်း သိရပါသည်။ ငါးဈေးနှုန်းများအနေဖြင့် ငါးမြစ်ချင်း တစ်ပိဿာလျှင် (၁၃၀၀၀) ကျပ်မှ (၁၅၀၀၀) ကျပ်ဝန်းကျင်၊ ငါးကြင်း တစ်ပိဿာလျှင် (၁၆၀၀၀) ကျပ်မှ (၂၀၀၀၀) ကျပ်ဝန်းကျင်၊ ငါးကနုတ်/ငါးနီတူ (ပင်လယ်ငါးအသေးစား) တစ်ပိဿာလျှင် (၈၀၀၀) ကျပ်မှ (၁၀၀၀၀) ကျပ်ဝန်းကျင်၊ ငါးသလောက် တစ်ပိဿာလျှင် (၃၀၀၀၀) ကျပ်မှ (၄၅၀၀၀) ကျပ်အထိ (အရွယ်အစားပေါ်မူတည်၍) ဈေးနှုန်းကွာခြားမှုများ ရှိနိုင်ကြောင်း သိရပါသည်။

          ငါးခြောက်၊ ပုစွန်ခြောက် ဈေးနှုန်းများအနေဖြင့် ငါးနီတူခြောက် တစ်ပိဿာလျှင် (၁၈၀၀၀) ကျပ်မှ (၂၂၀၀၀) ကျပ်ဝန်းကျင်ရှိပြီး၊ ပုစွန်ခြောက် အကောင်းစားတစ်ပိဿာလျှင် (၈၅၀၀၀) ကျပ်မှ (၁၁၀၀၀၀) ကျပ်အထိ ရှိကြောင်းသိရသည်။

          ဈေးကွက်စိန်ခေါ်မှုများအနေဖြင့် လတ်တလော မိုးရာသီကာလဖြစ်သဖြင့် ပင်လယ် ပြင် ငါးဖမ်းဆီးမှု ယာယီရပ်နားထားရခြင်းကြောင့် ပင်လယ်ငါး အဝင်နည်းပါးပြီး ဈေးနှုန်း အနည်းငယ်မြင့်တက်နေသည်။ ထို့ပြင် ရေခဲစရိတ်နှင့် သယ်ယူပို့ဆောင်ရေး ကုန်ကျစရိတ် များပြားခြင်းကြောင့် ကုန်သည်များနှင့် အသေးစား လက်လီရောင်းချသူများမှာ အမြတ် အစွန်းရရှိမှု နည်းပါးလာကြောင်း သိရသည်။

          သို့သော်လည်း ကျိုက်ထီးရိုးဘုရားဖူးရာသီ မဟုတ်သည့်အတွက် မြို့နယ်အတွင်း စားသုံးမှု ပမာဏသည် ပုံမှန်အခြေအနေတွင်သာ ရှိနေသဖြင့် ပြတ်လပ်မှုမရှိဘဲ ဈေးကွက် လည်ပတ်လျက်ရှိနေကြောင်း သိရပါသည်။

DOCA (မွန်)

                  မြန်မာနိုင်ငံသည် စိုက်ပျိုးရေးကိုအခြေခံသော နိုင်ငံဖြစ်သည့်အလျှောက် စီးပွားရေးလုပ်ငန်း ရှင်များသည် ယခုအခါရေရှည်၊ ရေတိုစီမံကိန်းများချမှတ်၍ စိုက်ပျိုးရေးလုပ်ငန်းများကို အဓိကထား လုပ်ဆောင်လာကြသည်တွေ့ရှိရပြီး နှစ်ရှည်သီးပင်များဖြစ်သော အုန်းသီးပင်များကိုလည်းအလေးထား စိုက်ပျိုးလာကြပါသည်။ ဘက်စုံသုံး အုန်းသီးပင်ကို မြန်မာနိုင်ငံပင်လယ် ကမ်းရိုးတန်းဒေသများ၊ မြစ်ဝကျွန်းပေါ်ဒေသများအဖြစ် အောက်ပြည်အောက်ရွာ၌သာမက အညာဒေသများမှာလည်း အုန်းသီးပင် များစိုက်ပျိုးထားသည်ကို တွေ့ရှိရကြောင်းသိရှိရသည် ။  အုန်းသီးစိုက်ပျိုးမှုအနေဖြင့် ၂၀၂၅-၂၀၂၆ ဘဏ္ဍာနှစ်တွင် ကျောက်ဆည်မြို့နယ်တွင်(၂၃)ဧက၊ စဉ့်ကိုင်မြို့နယ်တွင် (၁၂)ဧက၊ မြစ်သားမြို့နယ်တွင် (၉၃)ဧက ၊ စုစုပေါင်း (၁၂၈)ဧက စိုက်ပျိုးထားရှိကြောင်း သက်ဆိုင်ရာဌာန၏ စာရင်းများအရသိရှိရပါသည်။ အုန်းသီးများကို အုန်းသီးအညှာတံပါသည့် ဆွဲအုန်း(ခေါ်) အုန်းစို (ခေါ်)အုန်းစိမ်းနှင့်အခွံများခွာထားသည့်အုန်းပေါက်ဟူ၍ နှစ်မျိုးခွဲခြားရောင်းချရကြောင်း၊ အုန်းစိမ်းကို ဘုရားသာသနာပွဲများ၊ ရဟန်းသံဃာ ကန်တော့ပွဲများနှင့် သာရေး၊ နာရေးကန်တော့ ပွဲများတွင် လည်းကောင်း၊ မိရိုးဖလာ အိမ်တွင်းနတ်စင်များတွင် နတ်အုန်းအဖြစ်လည်းကောင်း ဝယ်ယူသုံးစွဲကြပြီး အုန်းပေါက်ကိုမူ အုန်းသီးဆံခြစ်၍ မြန်မာ့ရိုးရာမုန့်များတွင် ထည့်သွင်းအသုံးပြုခြင်းများ၊ အုန်းနို့ ထုတ်လုပ်ခြင်းများအတွက် ဝယ်ယူလေ့ရှိကြောင်း၊ အုန်းသီးဈေးနှုန်းများအနေဖြင့် နတ်တင်အုန်း တစ်လုံးလျှင် အလုံးအကြီးအသေးပေါ်မူတည်၍ (၅၀၀၀-၆၀၀၀) ကျပ်၊ အုန်းစိမ်းနုတစ်လုံးလျှင် (၁၅၀၀-၂၀၀၀)ကျပ်၊ အုန်းပင်ပေါက် တစ်ပင်လျှင် အပင်အကြီးအသေးပေါ်မူတည်၍ (၃၀၀၀-၅၀၀၀) ကျပ်အထိ ရောင်းဝယ်လျက်ရှိကြောင်း၊ အုန်းရည်တွင် အမိုင်နိုအက်ဆစ်၊ အင်ဇိုင်း၊ သံဓာတ်၊ ကယ်လစီယမ်၊ ပိုတက်စီယမ်၊ မဂ္ဂနီစီယမ်ဓာတ် များပါဝင်နေသဖြင့် ခန္ဓာကိုယ်အတွက် ရေဓာတ် ဖြည့်တင်းပေးခြင်း၊ ကိုယ်အလေးချိန်လျော့ကျစေခြင်း၊ နှလုံးကိုကျန်းမာစေခြင်း၊ သွေးဖိအားကို ထိန်းညှိပေးခြင်း၊ သွေးတွင်းသကြားဓာတ်ကို ထိန်းညှိပေးခြင်း၊ ကျောက်ကပ်ကို ကျန်းမာစေခြင်း၊ ဆံပင်ကိုအားဖြည့်ပေးခြင်းစသည့် အကျိုးကျေးဇူးများ ရရှိကြောင်း၊ အုန်းသီးနုနု၏ အုန်းရည်သည် ပိုတက်စီယမ်၊ ဆိုဒီယမ်နှင့် ဂလူးကို့စ်ဓာတ်များ ပြည့်ဝစွာပါဝင်သည့်အတွက် အားကစားသမားများ နှင့်လေ့ကျင့်ခန်းပြုလုပ်ပြီးသူများ သောက်သုံးပါက ရေဓာတ်ကိုလျှင်မြန်စွာ ဖြည့်ဆည်းပေးနိုင်သဖြင့် အားအင်ပြန်လည်ပြည့်ဖြိုး လန်းဆန်းစေကြောင်း သတင်းရရှိပါသည်။

DOCA(မန္တလေး)

            တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့နယ်အတွင်းရှိ ကျေးရွာများတွင် မိသားစု အပိုဝင်ငွေရရှိစေရန်အတွက် တွဲဖက်သီးနှံအဖြစ်လည်းကောင်း၊ တစ်ပိုင်တစ်နိုင် အိမ်ခြံဝန်းအတွင်း၌ လည်းကောင်း စိုက်ပျိုးထားကြသည့် ရာသီစာ ခဝဲသီးစိုက်ခင်းများ အောင်မြင်ဖြစ်ထွန်းကာ ဆွတ်ခူး ရောင်းချနေရပြီဖြစ်၍ စိုက်ပျိုးသူတောင်သူများ မိသားစုအပိုဝင်ငွေရရှိကာ အဆင်ပြေလျက်ရှိကြောင်း သိရှိရပါသည်။ သီးနှံများထဲမှ ခဝဲသီးနှံကို အများအားဖြင့် မိရိုးဖလာနည်းလမ်းများအတိုင်း စိုက်ပျိုးကြသော်လည်း မေလနှင့် ဇွန်လများတွင် ပိုမိုစိုက်ပျိုးကြောင်းလည်း သိရှိရပါသည်။ စိုက်ပျိုးရာတွင် အစိုဓာတ်ထိန်းသိမ်းနိုင်ရန် နုံးမြေ၊ နွားချေး၊ မြေဆွေးတို့ဖြင့် စနစ်တကျ မြေပြုပြင်ကာစင် တင်စနစ်ဖြင့် စိုက်ပျိုးကြကြောင်း သိရှိရပါသည်။ တစ်ပိုင်တစ်နိုင်နှင့် စီးပွားဖြစ် စိုက်ပျိုးမှုအပေါ်မူတည်၍ ကုန်ကျစရိတ်ကွာခြားမှုရှိသော်လည်း ခဝဲသီးနှံသည် အရင်းအနှီးနည်းပါးသော သီးနှံဖြစ်ပါသည်။ မျိုးစေ့ဖိုး၊ စင်ဆောက်ရန် ဝါးနှင့် နိုင်လွန်ကြိုးဖိုး၊ သဘာဝမြေဩဇာနှင့် ပိုးသတ်ဆေးဖိုး စသည်တို့ဖြစ်သည်။ စိုက်ခင်းတစ်ခုအတွက် ပျမ်းမျှအားဖြင့် ငွေကျပ် သောင်းဂဏန်းမှ သိန်းဂဏန်း ဝန်းကျင်သာ ကုန်ကျလေ့ရှိသဖြင့် အခြေခံတောင်သူများ အလွယ်တကူ စိုက်ပျိုးနိုင်သည့် သီးနှံဖြစ်သည်။ ခုလို မိုးဦးကျကာလမှာ ပေါ်ဦးပေါ်ဖျားဖြစ်၍ ဈေးကောင်းရကာ နေ့စဉ် ဒါမှမဟုတ် ရက်ခြား ဝင်ငွေရရှိနေကြာင်း၊ အိမ်စရိတ်အတွက်တင်မကဘဲ မိသားစုအပိုဝင်ငွေပါရရှိ၍ အဆင်ပြေနေကြောင်း မြိတ်မြို့နယ်မှ သီးနှံစိုက်ပျိုးတောင်သူတစ်ဦးက ပြောကြားခဲ့ကြောင်း သိရသည်။

        လက်ရှိအချိန်တွင် မြိတ်မြို့မဈေးနှင့် အနီးနားရှိဒေသဈေးကွက်များ၌ ခဝဲသီးကို အသီးအရွယ် အစားနှင့် အနုအရင့်အပေါ်မူတည်ပြီး  တစ်တောင့်လျှင် (၁၀၀၀)ကျပ်မှ (၁၅၀၀)ကျပ်အထိ ရောင်းချနေကြကြောင်း သိရှိရပါသည်။

DOCA(မကွေး)

       ဇွန်လ၊ ဇူလိုင်လနှင့် ဩဂုတ်လများတွင် နာနတ်သီးများလှိုင်လှိုင်ပေါသော ရာသီဖြစ်ပြီး  ရှမ်းပြည်(မြောက်ပိုင်း)ဒေသဖြစ်သည့် ကွတ်ခိုင်၊ နောင်ချို၊ သီပေါ၊ ကျောက်မဲတို့မှ အများဆုံးထွက်ရှိကြောင်း သိရှိရသည်။ ၎င်းဒေသတို့မှထွက်ရှိသော နာနတ်သီးများကို မြန်မာပြည်အနှံ့အပြား သို့ တင်ပို့ဖြန့်ဖြူးရောင်းချလျက်ရှိကြောင်း သိရှိရပြီး ပခုက္ကူဈေးကွက်သို့ သီပေါနှင့် ကျောက်မဲမြို့တို့မှ နာနတ်သီးများ နေ့စဉ်ဝင်ရောက်လျက်ရှိကြောင်း သိရှိရသည်။

      ပခုက္ကူမြို့၏အနောက်ဘက် ပန်းခြံဈေး၊ မြို့မစည်ပင်သာယာဈေးနှင့် သစ်သီးဆိုင်များတွင် ၂၀၂၆ခုနှစ်၊ ဇူလိုင်လ(ဒုတိယပတ်)တွင် ဈေးနှုန်းအနေဖြင့် နာနတ်သီးအလုံးကြီးတစ်လုံးလျှင် ကျပ်(၃၅၀၀-၄၀၀၀)၊ အလတ်တစ်လုံးလျှင် ကျပ်(၂၅၀၀)၊ အသေးတစ်လုံးလျှင် ကျပ်(၂၀၀၀)ဖြင့် အရွယ်အစားကိုလိုက်၍ ရောင်းချလျက်ရှိကြောင်း၊ ဝင်ရောက်လာသော နာနတ်သီးများကို လက်လီရောင်းချနေသော ဈေးသည်များကလည်း တစ်ဆင့်ပြန်လည်ရောင်းချခြင်းဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

          နာနတ်သီးသည် အမျှင်ဓါတ်ကြွယ်ဝစွာပါရှိခြင်းကြောင့် ကိုယ်ခံအားကိုကောင်းမွန်စေသည့်အပြင် သွေးအတွင်း မကောင်းသော အဆီဓာတ်များကိုပါ လျော့ချနိုင်သောကြောင့် သွေးတိုးရောဂါဖြစ်ပွားခြင်းများကိုလည်း လျှော့ချပေးနိုင်ကြောင်း၊ ထို့ပြင် မျက်စိအမြင်အာရုံကို အထောက် အကူဖြစ်စေသော ကျန်းမာရေးဆေးဖက်ဝင် သီးနှံတစ်မျိုးဖြစ်သည့်အပြင် ဖျော်ရည်ပြုလုပ်ရာတွင် လည်းကောင်း၊ လတ်ဆတ်စွာစားသုံးရသောကြောင့် ဝယ်ယူစားသုံးမှုများကြောင်း ဈေးကွက်မှ သိရှိရသည်။

          စားသုံးသူများအနေဖြင့် နာနက်သီးဝယ်ယူရာတွင် အရောင်လှပ၍ သဘာဝအနံ့ရှိပြီး ပုတ်သိုးခြင်း၊ မှိုတက်ခြင်းနှင့် ထိခိုက်ပျက်စီးမှုမရှိသော အသီးများကိုသာဝယ်ယူစားသုံးသင့်ကြောင်း၊ မစားသုံးမီ သေချာဆေးကြောသန့်စင်ပြီး သန့်ရှင်းလတ်ဆတ်သော အသီးများကိုသာ စားသုံးသင့်ကြောင်းနှင့် ဈေးနှုန်းများသည်လည်း သယ်ယူစရိတ်ပေါ်မူတည်၍ ပြောင်းလဲနိုင်ကြောင်း သိရှိရပါသည်။

DOCA(မကွေး)