ပြည်တွင်းကုန်သွယ်မှုသတင်း

           မကွေးတိုင်းဒေသကြီး၊ မကွေးခရိုင်၊ မကွေးမြို့နယ်အတွင်းရှိ မိကျောင်းရဲ၊ လျောင်းတော်ဦး၊ ကံသစ်၊ ရွာဟောင်းကန်၊ သစ်ရာကောက်စသည့်ကျေးရွာများနှင့် မင်းဘူး၊ မြို့သစ်၊ နတ်မောက်မြို့နယ်တို့မှ ထွက်ရှိသော ပဲတီစိမ်း၊ ပဲနောက်၊ ကုလားပဲ၊ ပဲကြီး၊ စားတော်ပဲ၊ အခြားပဲမျိုးစုံနှင့် နှမ်းမျိုးစုံတို့ မကွေးဈေးကွက်သို့ ဝင်ရောက်ရောင်းဝယ်ဖောက်ကားလျက်ရှိကြောင်း သိရပါသည်။

         ၂၀၂6ခုနှစ်၊ ဇူလိုင်လ(စတုတ္ထပတ်)တွင် နှမ်းနီ(၁)တင်းလျှင် ကျပ်(၁၃၀၀၀၀)၊ နှမ်းဖြူ (၁) တင်း လျှင် ကျပ်(၁၄၀၀၀၀)၊ နှမ်းနက်(စမုံ)(၁)တင်းလျှင် ကျပ်(၁၇၈၀၀၀)၊ နှမ်းညိုကြား (၁) တင်းလျှင် ကျပ် (၁၂၇၀၀၀)ဖြစ်၍ ယခင်တစ်ပတ်နှင့် နှိုင်းယှဉ်ပါက နှမ်းနက်(စမုံ) ကျပ်(၁၃၀၀၀)၊ နှမ်းနီ ကျပ်(၃၀၀၀)၊ နှမ်းဖြူ ကျပ်(၄၀၀၀)၊ နှမ်းညိုကြား ကျပ်(၁၀၀၀)ဈေးကျဆင်းခဲ့ပြီး တစ်ပတ်အတွင်း မကွေးမြို့မှ မန္တလေးမြို့သို့ နှမ်းအိတ်ရေ (၂၀၀၀)၊ ရန်ကုန်မြို့သို့ နှမ်းအိတ်ရေ (၂၀၀၀) တင်ပို့ခဲ့ပြီး တန်ချိန်အားဖြင့် တန်(၂၆၀)ခန့် အရောင်းအဝယ်ဖြစ်ခဲ့ကြောင်း သိရသည်။

     ဇူလိုင်လ(စတုတ္ထပတ်)တွင် ကုလားပဲ(HL) (၁)တင်း လျှင် ကျပ်(၇၆၀၀၀)၊ ကုလားပဲ(929) (၁) တင်းလျှင် ကျပ်(၇၇၀၀)ဖြင့် အရောင်းအဝယ်ဖြစ်လျက်ရှိပြီး ယခင်တစ်ပတ်နှင့် ဈေးနှုန်းနှိုင်းယှဉ်ပါက ဈေးနှုန်းတည်ငြိမ်နေကြောင်း၊ အရောင်းအဝယ်အေးနေပြီး လက်ကျန်ပဲများသာ အရောင်းအဝယ်ဖြစ်နေကြောင်း၊ တစ်ပတ်အတွင်း မကွေးမြို့မှ မန္တလေးမြို့သို့ အိတ်ရေ (၁၀၀၀)၊ ရန်ကုန်မြို့သို့ အိတ်ရေ (၂၀၀၀)တင်ပို့ခဲ့ ပြီး တန်ချိန်အားဖြင့် တန်(၂၀၀)ခန့် အရောင်းအဝယ်ဖြစ်ခဲ့ကြောင်း သိရသည်။

          ဇူလိုင်လ(စတုတ္ထပတ်)တွင် ပဲစင်းငုံ(၁)တင်းလျှင် ကျပ်(၁၀၀00၀)ဖြင့် အရောင်းအဝယ်ဖြစ်လျက်ရှိပြီး ဈေးနှုန်းတည်ငြိမ်နေကြောင်း၊ ယခုအချိန်တွင် ဒေသတွင်း၌ ပဲစင်းငုံစိုက်ပျိုးချိန်ဖြစ်၍ လက်ကျန်ပဲများသာ ဈေးကွက်အတွင်းအရောင်းအဝယ်ဖြစ်လျက်ရှိကြောင်း၊ တစ်ပတ်အတွင်း မကွေးမြို့မှ ရန်ကုန်မြို့သို့ အိတ်ရေ (၁၅၀၀)တင်ပို့ခဲ့ပြီး တန်ချိန်အားဖြင့် တန်(၁၀၀)ခန့် အရောင်းအဝယ်ဖြစ်ခဲ့ကြောင်း သိရသည်။

          ဇူလိုင်လ(စတုတ္ထပတ်)တွင် ပဲတီစိမ်း (၁)တင်းလျှင် ကျပ်(၈၀0၀၀)ဖြင့် အရောင်းအဝယ်ဖြစ်လျက်ရှိပြီး ယခင်တစ်ပတ်နှင့် ဈေးနှုန်းနှိုင်းယှဉ်ပါက ကျပ်(၁၀၀၀) ဈေးနှုန်းကျဆင်းလာကြောင်း၊ တစ်ပတ်အတွင်း မကွေးမြို့မှ မန္တလေးမြို့သို့ အိတ်ရေ (၅၀၀)၊ ရန်ကုန်မြို့သို့ အိတ်ရေ(၅၀၀) တင်ပို့ခဲ့ပြီး တန်ချိန်အားဖြင့် တန်(၅၀)ခန့် အရောင်းအဝယ်ဖြစ်ခဲ့ကြောင်း သိရသည်။

          ဇူလိုင်လ(စတုတ္ထပတ်)တွင် စားတော်ပဲ(၁)တင်းလျှင် ကျပ်(၂၄၅၀၀၀)ဖြင့် အရောင်းအဝယ်ဖြစ်လျက်ရှိပြီး ယခင်တစ်ပတ်နှင့် ဈေးနှုန်းနှိုင်းယှဉ်ပါက ကျပ်(၂၀၀၀၀)ဈေးနှုန်းမြင့်တက်လာကြောင်း၊ တစ်ပတ်အတွင်း မကွေးမြို့မှ ရန်ကုန်မြို့သို့ အိတ်ရေ(၁၀၀၀)တင်ပို့ခဲ့ပြီး တန်ချိန်အားဖြင့် တန်(၅၀)ခန့် အရောင်းအဝယ်ဖြစ်ခဲ့ကြောင်း သိရှိရပါသည်။

DOCA(မကွေး)

          စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ်သည် လယ်ယာစိုက်ပျိုးရေးလုပ် ငန်းများကို အဓိကလုပ်ကိုင်သော ဒေသတစ်ခုဖြစ်ပြီး သီးနှံမျိုးစုံစိုက်ပျိုးလျက်ရှိရာ ဇွန်လနောက်ဆုံး ပတ်၏ ဈေးနှုန်းများနှင့် ယခုဇူလိုင်လ နောက်ဆုံးပတ်ဈေးနှုန်းများကို နှိုင်းယှဉ်၍ ဈေးနှုန်းအတက် အကျတို့ကို ရေးသားဖော်ပြလိုက်ပါသည်။

ကုလားပဲ

၂၀၂၆ ခုနှစ်၊ ဇူလိုင်လ နောက်ဆုံးပတ်အတွင်း ကန့်ဘလူမြို့နယ်၌ ကုလားပဲ(ထိုင်ဝမ်) တစ်တင်းလျှင် ကျပ်(၆၇၀၀၀)၊ (929)တစ်တင်းလျှင် ကျပ်(၇၀၀၀၀)၊ (V2)တစ်တင်းလျှင် ကျပ် (၇၃၀၀)နှင့် (V7)တစ်တင်းလျှင် ကျပ်(၇၁၅၀၀)ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်ဇွန်လ၏ ဈေးနှုန်းများနှင့်နှိုင်းယှဉ်ပါက ယခုဇူလိုင်လနောက်ဆုံးပတ်အတွင်း မန္တလေးပဲမျိုးစုံ ဈေးကွက်တွင် အရောင်းအဝယ်ဖြစ်မှုနှင့် ဈေးနှုန်းမြင့်တက်မှုတို့အပေါ်မူတည်၍ ဒေသတွင်းဈေး ကွက်၌ ကုလားပဲမျိုးစုံ တစ်တင်းလျှင် ကျပ် ၈၀၀၀ ဝန်းကျင်မြင့်တက်လာကြောင်း သိရသည်။

မတ်ပဲ

ဇူလိုင်လ နောက်ဆုံးပတ်အတွင်း မတ်ပဲရိုးရိုးတစ်တင်းလျှင် ကျပ် ၉၃၀၀၀၊ မတ်ပဲမျက်(ဂျပန်) တစ်တင်းလျှင် ကျပ် ၉၇၀၀၀နှုန်းဖြင့် အရောင်းအဝယ်ဖြစ်လျက်ရှိရာ ယခင်ဇွန်လ၏ဈေးနှုန်းများနှင့် နှိုင်းယှဉ်ပါက ယခုဇူလိုင်လနောက်ဆုံးပတ်အတွင်း တင်ပို့ရောင်းချရာတွင် လမ်းပန်းဆက်သွယ်ရေး အခက်အခဲရှိသော်လည်း မန္တေလေးမြို့ရှိ ပွဲရုံများနှင့် ကုန်စည်ဒိုင်များတွင် မတ်ပဲဈေးနှုန်းအနည်းငယ် မြင့်တက်ခဲ့သောကြောင့် မတ်ပဲတစ်တင်းလျှင် ကျပ် ၁၀၀၀၀ ဝန်းကျင်ဈေးနှုန်းမြင့်တက်ခဲ့ကြောင်း ပွဲရုံလုပ်ငန်းရှင်များထံမှ သိရသည်။

ပဲစင်းငုံ

          ပဲစင်းငုံနီတစ်တင်းလျှင် ကျပ် ၉၂၀၀၀၊ ပဲစင်းငုံဖြူတစ်တင်းလျှင် ကျပ် ၈၂၀၀၀နှင့် အောက်စ တစ်တင်းလျှင် ကျပ် ၈၁၅၀၀ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်ဇွန်လ၏ ဈေးနှုန်း များနှင့်နှိုင်းယှဉ်ပါက ယခုဇူလိုင်လနောက်ဆုံးပတ်အတွင်း  ဒေသတွင်းဈေးကွက်သို့ ပစ္စည်းဝင် ရောက်မှုနည်းသော်လည်း  မန္တလေးပဲဈေးကွက်၌ ဈေးနှုန်းအနည်းငယ်မြင့်တက်ပြီး အရောင်းအဝယ် ဖြစ်ခဲ့သောကြောင့် ကန့်ဘလူမြို့နယ် ပဲဈေးကွက်တွင် ပဲစင်းငုံမျိုးစုံ တစ်တင်းလျှင် ၁၀၀၀၀ ဝန်ကျင်း မြင့်တက်ခဲ့ကြောင်း သိရသည်။

ပဲတီစိမ်း

          ပဲတီစိမ်းရိုးရိုးတစ်တင်းလျှင် ကျပ် ၇၅၀၀၀၊ ပဲတီစိမ်းထွက်တိုးတစ်တင်းလျှင် ကျပ် ၈၁၀၀၀ ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်ဇွန်လ၏ဈေးနှုန်းများနှင့် နှိုင်းယှဉ်ပါက ယခုဇူလိုင်လနောက်ဆုံးပတ်အတွင်း မန္တလေးဈေးကွက်တွင် ပဲတီစိမ်းအရောင်းအဝယ် အေးနေသော ကြောင့် ပဲတီစိမ်း(ရိုးရိုး)တစ်တင်းလျှင် ကျပ် ၃၀၀၀ ‌ဈေးနှုန်းကျဆင်းသွားကြောင်း သိရသည်။

စွန်တာနီ

          စွန်တာနီ(ပဲနီ)တစ်တင်းလျှင် ကျပ် ၁၀၃၀၀၀၊ အကွဲအနာပါတစ်တင်းလျှင် ကျပ် ၁၀၂၅၀၀ ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်ဇွန်လ၏ ဈေးနှုန်းများနှင့်နှိုင်းယှဉ်ပါက ယခု ဇူလိုင်လနောက်ဆုံးပတ်အတွင်း စွန်တာနီ(ပဲနီ)သည် မန္တလေးမြို့ရှိ ပွဲရုံနှင့် ကုန်စည်ဒိုင်များသို့ တင်ပို့ သည်သာမက ဒေသတွင်းစားသုံးမှုရှိသောကြောင့် တစ်တင်းလျှင် ကျပ် ၂၀၀၀ ဈေးနှုန်းမြင့်တက်လာ ကြောင်း သိရသည်။

ထောပတ်ပဲ

          ဇူလိုင်လ နောက်ဆုံးပတ်အတွင်း ထောပတ်ပဲတစ်တင်းလျှင် ကျပ် ၁၃၆၀၀၀၊ အကွဲအနာပါ တစ်တင်းလျှင် ကျပ် ၁၃၅၅၀၀ ဈေးနှုန်းဖြင့် အရောင်းအဝယ်ဖြစ်လျက်ရှိရာ ယခင်ဇွန်လနောက် ဆုံးပတ် ဈေးနှုန်းများနှင့်နှိုင်းယှဉ်ပါက ယခုဇူလိုင်လနောက်ဆုံးပတ်အတွင်း မန္တလေးဈေးကွက်၌ အရောင်းအဝယ်လိုက်လာသောကြောင့် ထောပတ်ပဲဖြူတစ်တင်းလျှင် ကျပ် ၄၀၀၀ ဝန်းကျင်ဈေး နှုန်းမြင့်တက်လာကြောင်း သိရသည်။

ပဲလွမ်းဖြူ

          ဇူလိုင်လ နောက်ဆုံးပတ်အတွင်း ပဲလွမ်းဖြူတစ်တင်းလျှင် ကျပ် ၁၀၁၀၀၀၊ အကွဲအနာပါ တစ်တင်းလျှင် ကျပ် ၁၀၀၅၀၀ ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ ယခင်ဇွန်လနောက် ဆုံးပတ်ဈေးနှုန်းများနှင့် နှိုင်းယှဉ်ပါက ယခုဇူလိုင်နောက်ဆုံးပတ်အတွင်း မန္တလေးဈေးကွက်တွင် အရောင်းအဝယ်အေးနေသောကြောင့်  ပဲလွမ်းဖြူသီးနှံတစ်တင်းလျှင် ကျပ် ၅၀၀၀ ဝန်းကျင်ဈေးနှုန်း ကျဆင်းသွားကြောင်း ဒေသတွင်း သီးနှံပွဲရုံများထံမှ သတင်းရရှိသည်။

DOCA(စစ်ကိုင်း)

           မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မဈေးတွင် အခြေခံစားသောက်ကုန်များ ရောင်းချလျက်ရှိသော ကုန်ခြောက်ဆိုင်များတွင် နေ့စဉ်မုန့်ဟင်းခါးခြောက်ထုပ်များလည်း အရောင်းအဝယ်သွက်လျက်ရှိပါသည်။ မုန့်ဟင်းခါးခြောက်ကို  ကုန်ကြမ်းအဖြစ် ဆန်မှထုတ်လုပ်၍ မုံရွာမြို့ မုန့်ဖတ်/ ခေါက်ဆွဲခြောက်ထုတ်လုပ်သည့် စက်ရုံများမှ ထုတ်လုပ်ပြီး ပခုက္ကူဈေးကွက်သို့ ဝင်ရောက်ကြောင်း၊ စားသုံးသူများအတွက် ဈေးနှုန်းသင့်တင့်ပြီး အသင့်စားသုံးရန်လွယ်ကူသောကြောင့်  ရောင်းအားကောင်းလျက်ရှိကြောင်း၊ မြန်မာ့ရိုးရာ အစားအစာအဖြစ်၊ မုန့်ဟင်းခါးသုပ်၊ မုန့်ဟင်းခါး အရည်ပျော်ပြုလုပ်၍ ရှေးယခင် နှစ်များစွာကတည်းက စားသုံးလာကြောင်း သိရှိရသည်။

          ၂၀၂၆ ခုနှစ်၊ ဇူလိုင်လ (တတိယပတ်)တွင် မုန့်ဟင်းခါးခြောက်ထုပ်များ ဈေးငြိမ်၍ အရောင်းအဝယ်သွက်လျက်ရှိကြောင်း၊ “ရွှေပုဇွန်“ တံဆိပ် မုန့်ဟင်းခါးခြောက်ထုပ် (၂၅)ကျပ်သား တစ်ထုပ်လျှင် ကျပ်(၁၆၀၀)၊ (၅၀)ထုပ်ပါ တစ်ပါကင်လျှင် ကျပ်(၇၅၀၀၀)၊  စက်ကျအကျိုး တစ် ပိဿာလျှင် ကျပ်(၂၅၀၀)၊ မုန့်တီခြောက်ထုပ် အကျိုးတစ်ပိဿာလျှင် ကျပ်(၂၅၀၀)၊ “ဒုံးပျံ” တံဆိပ် မုန့်ဟင်းခါးခြောက်ထုပ် (၅၀)ကျပ်သားတစ်ထုပ်လျှင် ကျပ်(၂၅၀၀)၊ (၂၀)ထုပ်ပါ တစ်ပါကင်လျှင် ကျပ်(၄၉၀၀၀)၊  မုန့်တီရှမ်း‌အကျိုးစက်ကျ တစ်ပိဿာလျှင် ကျပ်(၂၅၀၀)ဈေးဖြင့် ရောင်းအားသွက် လျက်ရှိကြောင်း၊ ရောင်းအားအကောင်းဆုံးမှာမုန့်ဟင်းခါးခြောက်ထုပ် စက်ကျအကျိုးဖြစ်ပြီး တစ်နေ့လျှင် ပိဿာချိန်(၉၀-၁၀၀)ခန့်ရောင်းရကြောင်း၊ ဝါတွင်းကာလရာသီချိန်ဖြစ်၍ ရောင်းအားကောင်းလာကြောင်း၊ ပခုက္ကူမြို့နယ်ရှိ ကျေးရွာများနှင့် နယ်ဘက်ဒေသ မြိုင်၊ ရေစကြို၊ ယောနယ်များမှ လည်းကုန်ကားမှ တဆင့်မှာယူပြီး ဝယ်ယူလျက်ရှိကြောင်း၊ တစ်ပတ်အတွင်း‌ မုန့်ဟင်းခါးခြောက် ထုပ်ပိဿာ (၅၅၀-၆၀၀)ခန့် ရောင်းချရကြောင်းကုန်ခြောက်ဆိုင် ရောင်းချသူထံမှ သိရှိရပါသည်။

DOCA(မကွေး)

    ကချင်ပြည်နယ်တွင် နာနတ်သီးများကို မြစ်ကြီးနား၊ ဝိုင်းမော်၊ ဗန်းမော်၊ မိုးကောင်း၊ မိုးညှင်း ဒေသများတွင် စီးပွားဖြစ်အများဆုံးစိုက်ပျိုးကြပြီး အိမ်ခြံဝန်းများအတွင်း၌ တနိုင်တပိုင် စိုက်ပျိုးကြ ပါသည်။ ကချင်ပြည်နယ်တွင် နာနတ်ကို ဒေသမျိုးအပြင် အသီးအရွယ်ကြီးမားပြီး အသားထူအရည် ရွှမ်းကာ သယ်ယူပို့ဆောင်ရေးဒဏ်ခံနိုင်သည့် ထိုင်းမျိုး  “ smooth Cayenne” နှင့်“Queen” မျိုးတို့ကို လည်း စိုက်ပျိုးကြကြောင်းသိရပါသည်။ ကချင်ပြည်နယ်တွင် စိုက်ပျိုးသည့် နာနတ်သီးများအနက် မြစ်ကြီးနားဒေသထွက် နာနတ်သီးသည် အရသာချိုမွှေး၍ ချက်ဆံတိမ်သောကြောင့် စျေးကွက်အတွင်း နာမည်ရလျက်ရှိပြီး မြစ်ကြီးနားမြို့ရှိ မန်ခိန်၊ ရွှေပြည်သာ၊ နန့်ကျင်၊ နောင်နန်း၊ ရွှေစက် ရပ်ကွက်တို့တွင် ခြံများ၊ ယာခင်းများတွင် အများဆုံးစိုက်ပျိုးကြပါသည်။

     နာနတ်စိုက်ပျိုးရေးအတွက် သဲဆန်သောမြေ၊ နှုန်းမြေ၊  ဂဝံမြေနီများသည် အသင့်တော်ဆုံးမြေ များဖြစ်သည်။နာနတ်စိုက်ပျိုးနည်းစနစ်မှာ စိုက်ကျင်းပြုလုပ်စိုက်ပျိုးခြင်းနှင့် ထည်ရေးမြောင်းပြုလုပ် ၍ စိုက်ပျိုးခြင်းဟူ၍ စိုက်ပျိုးကြပြီး ကချင်ပြည်နယ်တွင် ထည်ရေးမြောင်း ပြုလုပ်စိုက်ပျိုး နည်းသာ အများစု အသုံးပြုစိုက်ပျိုးလေ့ရှိပါသည်။စိုက်ပျိုးရာတွင်(၁၂ လက်မ- ၁၆လက်မ) အနက်ရှိ ထည်ရေးမြောင်း အတွင်း အပင်စိုက်ပျိုးကြ၍ စိုက်စနစ်အားလုံးအတွက် ပင်ကြား (၁၀ လက်မ) တန်းကြား (၂၄ လက်မ) စိုက်မြောင်းအကွာအဝေး (၃၆ လက်မ)ဖြင့် စိုက်ပျိုးလျှင် တစ်ဧက အပင်အရေအတွက် (၂၄၀၀၀ မှ ၃၀၀၀၀ အထိ) ဝင်ဆံ့စိုက်ပျိုးနိုင်ပါသည်။ စိုက်ပျိုးချိန်ပုံမှန်ခြား၍ ဇူလိုင်လ မှ ဒီဇင်ဘာလ အထိ စိုက်ပျိုးခြင်းဖြစ် ဆောင်ရွက်နိုင်ပြီး အပင်စိုက်ပြီး(၁၀-၁၂)လအကြာတွင် ပန်းပွင့်ကာ(၁၅-၁၈)လအကြာတွင် ရိတ်သိမ်း နိုင်သော အဆင့်သို့ရရှိနိုင်ပါသည်။ စိုက်ပျိုးသည့်မျိုး၊ စိုက်ပျိုးစနစ်၊ စိုက်ပျိုးသည့်‌ဒေသနှင့် သက်တမ်း လိုက်၍ တစ်ဧကအထွက်နှုန်း အသီးအရေအတွက် ၂၅၀၀၀ မှ ၃၂၀၀၀(တန်ချိန် ၁၃ တန် မှ ၁၆ တန်)အကြား ထွက်ရှိကြောင်း နာနစိုက်ပျိုးသူတစ်ဦးထံမှ သိရှိရပါသည်။

    မြစ်ကြီးနားဒေသထွက် နာနတ်သီးများသည် ဇူလိုင်လတွင် လှိုင်လှိုင်ထွက်ရှိကာ သီးနှံကုန် သည်များအနေဖြင့် အခင်းပြတ်ဝယ်ယူမှုရှိသလို အလုံးလိုက် ဝယ်ယူမှုများလည်းရှိပါသည်။ အခင်း ပြတ်ဝယ်ယူရာတွင် အခင်းအတွင်း အသီးအရေအတွက်ပေါ်မူတည်၍ အပင်ရေ (၁၀၀၀၀)ပါ အခင်း ကွက်အား ငွေကျပ်(၁၃,၀၀၀,၀၀၀)ကျပ် မှ (၁၄,၀၀၀,၀၀၀) ကျပ်ဖြင့် အရောင်းဝယ်ဖြစ်နေကြောင်း၊ အလုံး လိုက်ဝယ်ယူရာတွင် အလုံးအကြီးအသေးရောရာ တစ်လုံးလျှင် (၁၄၀၀)ကျပ်မှ (၁၅၀၀)ကျပ် အထိ ဝယ်ယူရကြောင်း၊ အခင်းပြတ်ဝယ်ယူရာတွင် အလုံးလိုက် ဝယ်ယူသည့်စျေးနှုန်းထက် လျော့နည်းရခြင်းမှာ ရိတ်သိမ်းခူးဆွတ် လုပ်သားခကိုခုနှိမ် ဝယ်ယူခြင်းကြောင့် ဖြစ်ကြောင်း၊ အသီးပေါ်ရှိ အပင် Crown ပါသည့်အသီးကို ခူးဆွတ်ပါက (၁၀) ရက်မှ (၁၅) ရက် အထိ အပျက်အဆီးမရှိ ထားသိုနိုင် ကြောင်း သီးနှံကုန်သည်တစ်ဦးထံမှသိရပါသည်။ မြစ်ကြီးနားမြို့ နာနတ်သီးလက်လီစျေးအနေဖြင့် အလုံးကြီးတစ်လုံးလျှင် ၂၅၀၀ ကျပ် အလုံးလတ်တစ်လုံးလျှင် ၂၀၀၀ ကျပ် အလုံးသေးတစ်လုံးလျှင် ၁၅၀၀ ကျပ်ဖြင့် ရောင်းချလျက်ရှိကြောင်း ယခင်နှစ် နှင့်နှိုင်းယှဉ်ပါက တောင်သူများ တွက်ချေကိုက်လျက်ရှိကြောင်း နာနတ်သီးရောင်းချသူတစ်ဦးထံမှ သိရပါသည်။

     မြစ်ကြီးနားနာနတ်သီးကို စျေးကွက်အတွင်းရှိ သစ်သီးအရောင်းဆိုင်များ၊ စျေးများတွင် လက်လီ ရောင်းချလျက်ရှိသလို ‌ဒေသအတွင်း MSMEလုပ်ငန်းရှင်များကလည်း ဒေသတွင်းထွက်ရှိသော နာနတ်သီးများကို နာနတ်သီးဖျော်ရည်၊ နာနတ်သီးခြောက်၊ သကြားမပါသောနာနတ်သီးယို၊ နာနတ်သီး ဝိုင်(Pineapple Wine)  များအား တန်ဖိုးမြှင့်ထုတ်ကုန်အဖြစ် ထုတ်လုပ်၍ ‌စျေးကွက်ထိုးဖောက်နိုင်ရေး ဆောင်ရွက်လျက်ရှိနေသောကြောင့် နာနတ်သီးစိုက် တောင်သူများ ဈေးကောင်းရရှိ၍ အကျိုးအမြတ် ရရှိလျက်ရှိကြောင်း သတင်းရရှိပါသည်။

DOCA(ကချင်)

          မြိတ်ဒေသတွင် ဒေသထွက်ကုန်ဖြစ်သော ရာဘာ၊ သီဟိုဠ်၊ ဆီအုန်း၊ ကွမ်းသီးများစိုက်ပျိုးလျက်ရှိပြီး ပြည်တွင်းပြည်ပတင်ပို့လျက်ရှိရာ ဒေသထွက်ကွမ်းသီးစျေးနှုန်းများ ကျဆင်းလာကြောင်း သိရှိရပါသည်။ သီဟိုဠ်သီးကို မြိတ်ခရိုင်ရှိ မြို့နယ်များဖြစ်သော ပုလော၊ တနင်္သာရီ၊ ကျွန်းစု၊ ဘုတ်ပြင်း မြို့နယ်များတွင် အများဆုံးထွက်ရှိပြီး ရန်ကုန်နှင့် မန္တလေးတိုင်းတို့အား တင်ပို့ရောင်းချလျက်ရှိပါသည်။  ၎င်းတို့မှတစ်ဆင့် ဒေသထွက်များဖြစ်သည့် သီဟိုဠ်စေ့များကို ပြည်ပနိုင်ငံများသို့ တင်ပို့ရောင်းချကြပြီး ယခုအခါ အထွက်နှုန်းကောင်းမွန်ခြင်းနှင့် ဝယ်လိုအားတိုးလာခြင်းတို့ကြောင့် မြိတ်ဒေသထွက် သီဟိုဠ်စေ့များ စျေးနှုန်းတက်လာ‌ကြောင်း သိရှိရပါသည်။ ယခင်နှစ်က သီဟိုဠ်စေ့တစ်ပိဿာ စျေးနှုန်း ၄၅၀၀၀ ကျပ်ခန့် ပတ်လည်ဝန်းကျင်ရှိရာမှ ယခု စျေးနှုန်းတစ်ပိဿာ စျေးနှုန်း ၆၀၀၀၀ ကျပ် ခန့်ထိ စျေးတက်သွားကြောင်း သိရှိရပါသည်။ ယခုလအတွင်း သီဟိုဠ်စေ့လုပ်ငန်းလုပ်ကိုင်သူခန့်မှန်း ပြောကြားချက်အရ တစ်ပိဿာလျှင် ၇၀၀၀၀ ကျပ်ခန့်အထိ စျေးတက်သွားမည်ဖြစ်ကြောင်း သိရှိရပါ သည်။ ၂၀၂၆ခုနှစ်၊ ဇူလိုင်လ(၂၈)ရက်နေ့တွင် မြိတ်မြို့၌ သီဟိုဠ်စေ့ တစ်ပိဿာလျှင် ၆၀၀၀၀ ကျပ်ဖြင့် အရောင်းအဝယ်ဖြစ်နေကြောင်းသိရှိရပါသည်။

DOCA(တနင်္သာရီ)