ပြည်တွင်းကုန်သွယ်မှုသတင်း

          ပဲခူးတိုင်းဒေသကြီး၊ သာယာဝတီခရိုင် လက်ပံတန်းမြို့ဈေးအတွင်းရောင်းချလျှက်ရှိသော ကြက်သွန်နီလက်လီဈေးနှုန်းများမှာ ဇွန်လပထမပတ်မှဇွန်လတတိယပတ်ထိ ကြက်သွန်နီ အကြီးတစ်ပိဿာလျှင် ၂၀၀၀/ ကျပ်၊အသေး တစ်ပိဿာလျှင် ၁၅၀၀/ကျပ် ဈေးနှုန်းဖြင့် လက်လီ ရောင်းချခဲ့ပါသည်။ လက်ကားဈေးနှုန်းအနေဖြင့် အချိန်(၁၀)ပိဿာ မှ စတင်၍အိတ်လုံးဈေး ကြက်သွန်နီအကြီး တစ်ပိဿာလျှင်၁၈၀၀/ကျပ်၊  ကြက်သွန်နီအလတ် တစ်ပိဿာ လက်ကား ဈေးနှုန်းမှာ ၁၆၀၀/ ကြက်သွန်နီအသေး လက်ကားဈေးနှုန်းတစ်ပိဿာလျှင်၁၃၀၀/ ကျပ်ဈေးနှုန်းဖြင့် အသီးသီးရောင်းချခဲ့ပါသည်။ ယခင်နှစ် ကြက်သွန်နီ ဈေးနှုန်းများသည် ဧပြီလ နောက်ဆုံး ပတ်လောက်တွင် ကြက်သွန်နီဈေးများ တရိပ်ရိပ်တက်နေပြီး ယခုနှစ်တွင် ကြက်သွန်နီ ဈေးနှုန်းများ သည် ဇွန်လ တတိယပတ်အထိ ဈေးနှုန်းများတက်သွားခြင်းမရှိ ဈေးငြိမ်နေကြောင်း ကြက်သွန်နီဈေး ရောင်းချ သူ တစ်ဦးထံမှ သိရှိရပါသည်။

           အာလူးဈေးကွက် ရောင်းချမှုအနေဖြင့် အာလူးတစ်ပိသာလျှင် ဇွန်လ ပထမပတ်တွင်  ၄၀၀၀/ ကျပ်မှ ၄၅၀၀/ ကျပ်ဈေးရှိခဲ့သော်လည်းယခု ဇွန်လ တတိယပတ်တွင်  လည်းအာလူး ဈေးနှုန်းများမှာ ၅၀၀၀/ ကျပ်ဈေးဖြင့် ရောင်းချသဖြင့် ဈေးနှုန်းအနည်းငယ်တက်နေပါကြောင်း သိရှိရပါသည်။

DOCA(ပဲခူး)

             ပဲခူးတိုင်းဒေသကြီး သာယာဝတီခရိုင် အုတ်ဖိုမြို့နယ်မှခြံစိုက်ပျိုး၍ စီးပွားရေးလုပ်ကိုင် လာကြသည်။ တောင်သူများသည်ယခုနှစ်တွင်ရုံးပတီကိုအဓိကထားစိုက်ပျိုးကြပါသည်။

            ရုံးပတီပင်သည် ရက်တိုတိုဖြင့် ဝင်ငွေရရှိပြီး ရာသီဥတုဒဏ်ခံနိုင်ရည်ရှိသည့် သက်တမ်းတို အပင်မျိုးဖြစ်ပြီး တစ်ရက်ခြား ခူးဆွတ်ရရှိခြင်းဖြစ်သဖြင့် ဝင်ငွေမပြတ်ရရှိနိုင် ကြောင်းသိရှိရပါသည်။ ရုံးပတီသီး စိုက်ပျိုးရန်အတွက် ကုန်ကျစရိတ်အနေဖြင့် ရုံးပတီသီး တစ်ဧကလျှင် မျိုးစေ့ဘိုး (၃၅၀၀၀၀/)ကျပ်၊ အပင်အားဆေး ကျွေးရန် (၃) ကြိမ် အတွက်(၁၄၆၀၀၀/၀)ကျပ်၊မှိုသတ်ဆေး ဘိုး  (၄၆၀၀၀/)ကျပ်၊စိုက်ပျိုးထွန်ယက်ပြုပြင်ခြင်းကုန်ကျစရိတ်(၁၆၀၀၀၀/)ကျပ်၊မြက်နှုတ်ပေါင်းလိုက်ခ(၂၅၀၀၀၀/)ကျပ်၊ ခူးဆွတ်သယ်ယူခ (၂၇၀၀၀၀/) ကျပ် ခန့် ကုန်ကျနိုင်ပြီး စုစုပေါင်းကုန် ကျစရိတ်ငွေ (၁၂၂၂၀၀၀/) ကျပ် ခန့်ကုန်ကျနိုင်ပါသည်။

          တစ်ဧကအထွက်နှုန်းအနေဖြင့် တစ်ရက်လျှင် အတောင့်(၈၀၀၀/မှ၁၀၀၀၀)အထိ အကြိမ် ရေ (၁၅ကြိမ်မှ ၂၀ကြိမ်)ထိခူးဆွတ်ရရှိနိုင်ပါသည်.။ယခုအချိန်ဈေးကွက်ပေါက်ဈေးအရ တစ်တောင့်လျှင် (၂၀ကျပ်မှ၃၀ကျပ်) ထိရရှိနေပြီး၊ ပျမ်းမျှအကြိမ်(၁၆)ကြိမ်၊အတောင့်ရေ(၁၂၈၀၀၀)တောင့် ပျမ်းမျှ ပေါက် ဈေး(၂၄)ကျပ် ဈေးဖြင့်တစ်ဧက ဝင်ငွေ(၃၀၇၂၀၀၀/)ကျပ် ရရှိပါသည်။ တစ်ဧကအကျိုးအမြတ်အနေဖြင့် ကျပ်သိန်း (၂၀) ကျော် ရရှိနိုင်ပါသော်လည်း ယခုနှစ်တွင် ရေကြီးနစ်မြှပ်မှုဖြစ်ပေါ်ခဲ့သောကြောင့် အပင်အနည်းငယ် ထိခိုက်မှု ရှိသဖြင့်ကျပ်သိန်း (၁၈) သိန်းခန့်သာ ရရှိကြောင်း သိရှိရပါသည်။

DOCA(ပဲခူး)

          မကွေးတိုင်းဒေသကြီး၊ အထက်မင်းလှမြို့၊ ပန်းတော်ပြင်ကျေးရွာအုပ်စုရှိ မယ်ဇလီတောကျေးရွာတွင် သီးနှံမျိုးစုံစိုက်ပျိုးကြပြီး ပြောင်းသီးနှံများကို စိုက်ဧက ၃၅ ဧကခန့် စိုက်ပျိုးထားရှိကြောင်း သိရသည်။

     ပြောင်းသီးနှံကို ဧပြီလတွင် စတင်စိုက်ပျိုး၍ စိုက်ပျိုးပြီး(၂)လကျော်အကြာတွင် ခူးဆွတ်ရ ကြောင်း၊ မျိုးအနေဖြင့် ထိုင်ဝမ်ပြောင်းစီး(အဖြူ)မျိုးများကို စိုက်ပျိုးကြပြီး တစ်ဧကလျှင် မျိုးထုပ် (၈) ထုပ်ခန့် ကုန်ကျကြောင်း၊ စိုက်ပျိုးရာတွင် ထွန်ကြောင်းဆွဲအစေ့ချစနစ်ဖြင့် စိုက်ပျိုးကြောင်း၊ ယခင် နှစ်ကစိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ မြေပြုပြင်ခ၊ လုပ်သားခ အပါအဝင် တစ်ဧကလျှင် ငွေကျပ်(၉)သိန်းခန့် ကုန်ကျခဲ့သော်လည်း ယခုနှစ်တွင်မူ သွင်းအားစုစရိတ် အနည်းငယ်မြင့်တက်လာ၍ ကျပ်(၁၀)သိန်းခန့်ကုန်ကျကြောင်း၊ အထွက်နှုန်းအနေဖြင့် တစ်ဧကလျှင် ပြောင်းဖူးအရေအတွက် (၉၀၀၀) ခန့်ထိထွက်ရှိရာ စိုက်ပျိုးမြေအနေအထားနှင့် သီးနှံဖြစ်ထွန်းအောင်မြင်မှုအပေါ်မူတည်၍ သီးနှံ အထွက်နှုန်းများ ကွဲပြားမှုရှိကြောင်း၊ ဈေးနှုန်းအနေဖြင့် ၂၀၂၅ခုနှစ်၊ ဇွန်လ(တတိယပတ်)တွင် ပြောင်းဖူး တစ်ဖူးလျှင် (အကြီး၊ အသေးအလိုက်)လက်ကားဈေး ကျပ်(၃၅၀-၄၀၀)နှုန်းဖြင့်ရောင်းချရပြီး အကျိုး အမြတ်အနေဖြင့် တစ်ဧကလျှင် ကျပ်(၂၁)သိန်းမှ(၂၆)သိန်း ခန့်ရရှိကြောင်း၊ ဈေးကွက်အနေဖြင့် အထက်မင်းလှမြို့ပေါ်ရှိ ကုန်စိမ်းပွဲရုံများသို့ တင်ပို့ရောင်းချလျက်ရှိရာ ပြောင်းသီးနှံစိုက်ပျိုးခြင်းဖြင့် တောင်သူများ အကျိုးအမြတ်ရရှိကာ အဆင်ပြေလျက်ရှိကြောင်း ပြောင်းစိုက်တောင်သူတစ်ဦးထံမှ သိရသည်။

DOCA(မကွေး)

   မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့၊ ဇေယျာသီရိဈေး၌ ကြက်သွန်နီကို မင်းလှမြို့နယ်အတွင်းရှိ ကျေးရွာများနှင့် မကွေးမြို့၊ မင်းဘူးမြို့၊ တောင်တွင်းကြီးမြို့နှင့် သရက်မြို့တို့မှ မှာယူရောင်းချကြကြောင်း သိရသည်။

    ၂၀၂၅ခုနှစ်၊ ဇွန်လ(တတိယပတ်)တွင် ကြက်သွန်နီ(၁)ပိဿာလျှင် ဥအကြီး၊ အသေးအလိုက် ကျပ်(၁၅၀၀-၂၀၀၀)ဖြင့် ရောင်းချလျက်ရှိပြီး ယခင်မေလ(တတိယပတ်)တွင် (၁)ပိဿာလျှင် ကျပ် (၂၀၀၀-၂၅၀၀)ဖြစ်၍ ဈေးနှုန်းနှိုင်းယှဉ်ပါက ယခုတစ်ပတ်တွင် ကျပ်(၅၀၀)ဈေးနှုန်းကျဆင်း၍ အရောင်း အဝယ်ဖြစ်လျက်ရှိကြောင်း သိရသည်။ မင်းလှမြို့နယ်ဒေသတွင်း ကျေးရွာများရှိ ကြက်သွန်နီစိုက်ခင်း တချို့၌ ကြက်သွန်နီသစ်များထွက်ရှိလျက်ရှိပြီး ပြည်ပနိုင်ငံများမှ ဝယ်ယူမှုမရှိသေးသောကြောင့် ကြက်သွန်နီဈေးနှုန်းမှာ ကျဆင်းရခြင်းဖြစ်ကြောင်း သိရသည်။

DOCA(မကွေး)

           ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြို့နယ် အတွင်းရှိ ရပ်ကွက် ကျေးရွာများတွင်  ရာသီပေါ် ဟင်းသီး၊ ဟင်းရွက်မျိုးစုံကို စိုက်ပျိုးထုတ်လုပ် တင်ပို့ ရောင်းချလျက်ရှိပါသည်။  ယခုနှစ်တွင် မိုးဦးကျစော၍ ရေသွင်း ရေထုတ်ခြင်း ကုန်ကျစရိတ် ယခင်နှစ်ထက် သက်သာ၍ တောင်သူများ တွက်ခြေကိုက်၍ အကျိုးအမြတ်များပိုမိုရရှိနေကြောင်း  သိရပါသည်။

            သဲကုန်းမြို့နယ် ပုတီးကုန်းမြို့ စိမ်းရောင်စို ကုန်စိမ်းဒိုင်တွင် ယခုဇွန်လ ဒုတိယပတ် ဖြစ်ပေါ်နေသော ဟင်းသီး၊ ဟင်းရွက် သီးနှံဈေးနှုန်းများမှာ သခွားသီးတစ်လုံးလျင် (၄၀)ကျပ်၊ ခရမ်းကျွတ်သီးတစ်လုံးလျှင် (၁၅)ကျပ်၊ ပဲတောင့်ရှည်သီး တစ်တောင့်လျှင် (၁၇)ကျပ်၊ ပြောင်းဖူးတစ်ဖူးလျှင် (၄၀၀)ကျပ်၊ ခဝဲသီးအရှည်တစ်တောင့်လျှင် (၄၀၀)ကျပ်၊ ငရုတ်သီးစိမ်း တစ်ပိဿာလျှင် (၃၅၀၀)ကျပ်၊ ကြက်ဟင်းခါးသီး (အသေး) တစ်ပိဿာလျှင် (၁၅၀၀)ကျပ်နှုန်း ဖြင့်ဝယ်ယူ၍  ရန်ကုန်ဒညင်းကုန်းဈေးကြီးသို့ ပြန်လည်တင်ပို့ရောင်းချကြောင်း သိရှိရပါသည်။

DOCA(ပဲခူး)