ပြည်တွင်းကုန်သွယ်မှုသတင်း

               တောင်သာမြို့နယ်သည် ဆည်ရေသောက်ဒေသတစ်ခုဖြစ်၍ သီးနှံမျိုးစုံအောင်မြင်ဖြစ် ထွန်းလျက်ရှိပြီး စပါး၊ ပဲ၊ ပြောင်း၊ ဆီထွက်သီးနှံ၊ ကြက်သွန်နီနှင့် ကြက်သွန်ဖြူသီးနှံကို လည်းစိုက်ပျိုးလျက်ရှိပါသည်။ တောင်သာမြို့နယ်အတွင်း ကြက်သွန်ဖြူ စိုက်ဧက (၁၈၅) ဧက၊ စိုက်ပျိုးထားကြောင်း မြို့နယ်ကြေးတိုင်နှင့် မြေစာရင်းစာရင်းဦးစီးဌာန၏ စာရင်းများအရသိရှိရ သည်။ အများဆုံးစိုက်ပျိုးထားရှိသော ကျေးရွာများမှာ နစောင်ရွာ၊ ညောင်တိုရွာ၊ နန်းတည်းရွာနှင့် အင်းတဲရွာများတွင် အများဆုံးစိုက်ပျိုးထားကြောင်း၊

             တောင်သာမြို့နယ်တွင် ကြက်သွန်ဖြူများကို ၂၀၂၆ ခုနှစ်၊ မတ်လဆန်းပိုင်း၌ စတင်ရိတ်သိမ်း နေပြီဖြစ် ကြောင်းသိရှိရသည်။  စိုက်ပျိုးမှုအနေဖြင့် ကြက်သွန်ဖြူကို အတက်ကလေးများ နွှာပြီး  စိုက်ပျိုးရကြောင်း၊ အများဆုံးစိုက်ပျိုးသော မျိုးများမှာ ဗမာမျိုးများကိုသာ အဓိကထား စိုက်ပျိုးကြကြောင်း၊ ကြက်သွန်ဖြူ (၁)ဧက စိုက်ပျိုးထုတ်လုပ်မှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း ကျပ်သိန်း (၂၆)ကျပ်ခန့်ကုန်ကျကြောင်း၊ တစ်ဧကအထွက်နှုန်းအနေဖြင့် (၁၀၀၀-၁၃၃၀)ပိဿာခန့် ထွက်ရှိခဲ့ကြောင်း၊ ယခု ၂၀၂၆ခုနှစ်၊ ဧပြီပထမပတ်၌ ထွက်ပေါ်သော ကြက်သွန်ဖြူအခြောက် (အသစ်) စျေးနှုန်း (၁)ပိဿာလျှင် (၅၀၀၀-၆၀၀၀)ကျပ် အထိစျေးနှုန်းများဖြင့် အရောင်းအဝယ် ဖြစ်ခဲ့ကြောင်း၊ ကြက်သွန်ဖြူ အစိုတစ်ပိဿာလျှင်(၃၅၀၀-၄၀၀၀) ကျပ်ခန့်ရှိကြောင်း၊ အကျိုးအမြတ်အနေဖြင့် စိုက်ပျိုးစရိတ်နှုတ်ပြီး အထွက်နှုန်း အပေါ်မူတည်၍ တစ်ဧကလျှင်ကျပ် (၁၉-၂၀)သိန်းကျော် မြတ်ခဲ့ကြောင်း၊ ယခုဧပြီလ တတိယပတ်တွင် လက်လီ ကြက်သွန်ဖြူ တစ်ပိဿာ ပေါက်ဈေးအနေဖြင့်  (၆၀၀၀-၇၀၀၀) ကျပ်ဖြင့်  ရောင်းဝယ်လျက် ရှိကြောင်း၊  ကြက်သွန်ဖြူ ရောင်းဝယ်မှုအနေဖြင့် ပွဲစားများမှ စိုက်ခင်းထဲ အရောက်လာရောက် ဝယ်ယူကြကြောင်း၊ တောင်သူများ အနေဖြင့် ဒေသတွင်းပွဲရုံများနှင့် မြင်းခြံမြို့ ရှိပွဲရုံများသို့လည်း တင်ပို့ရောင်းချကြကြောင်း၊ ကြက်သွန်ဖြူများ အထွက်နှုန်းကောင်း၍ တောင်သူများ အကျိုးအမြတ် အမြတ်ရရှိကြောင်း နန်းတည်ရွာမှ ကြက်သွန်ဖြူ စိုက်တောင်သူတစ်ဦး၏ ပြောကြားချက် အရသိရှိ ရပါသည်။

DOCA(မန္တလေး)

         စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ်ကင်းရှင်းပြီး သင့်တင့်သောဈေးနှုန်းဖြင့် ဝယ်ယူ စားသုံးနိုင်စေရန်နှင့် ပြည်တွင်းလိုအပ်ချက်များကို ဖြည့်ဆည်းပေး နိုင်ရန် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင်ဖြန့်ဖြူးခြင်းလုပ်ငန်း ကြီးကြပ်ရေး ကော်မတီက ဆောင်ရွက်ပေးလျက်ရှိကြောင်း သိရပါသည်။

            စားအုန်းဆီကို ပြည်ပမှဝယ်ယူတင်သွင်းရာတွင် စားအုန်းဆီ တင်ပို့သည့်နိုင်ငံများ၏စျေးနှုန်းအတက်အကျပေါ်မူတည်၍ပြည်တွင်း၌ ဖြစ်သင့်ဖြစ်ထိုက်သည့်ဈေးနှုန်းများဖြစ်ပေါ်စေရေးကို ထိန်းကျောင်း ဆောင်ရွက်လျက်ရှိပါသည်။

          ပြည်ပမှစားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက် နှင့်ဈေးနှုန်းဖြစ်ပေါ်မှုများအရ၂၀၂၆ခုနှစ်၊မေလ၈ရက်နေ့မှ၁၄ရက်နေ့အထိ ရန်ကုန်အထိုင်ဈေးအခြေခံလက်ကားရည်ညွှန်းဈေးနှုန်းမှာစားအုန်းဆီ တစ်ပိဿာလျှင်ငွေကျပ်7,၄၉၉ဖြစ်ကြောင်း စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီက အသိပေးထုတ်ပြန် ကြေညာထားကြောင်း သိရှိရပါသည်။

            စားအုန်းဆီအခြေခံလက်ကားရည်ညွှန်းဈေးနှုန်းကို အပတ်စဉ် သောကြာနေ့တိုင်းထုတ်ပြန်ကြေညာလျက်ရှိပြီး စားသုံးသူပြည်သူများ အနေဖြင့် စားသုံးသူရေးရာဦးစီးဌာန၏ Website: www.doca.gov. mm၊Facebook Pageနှင့် မြန်မာနိုင်ငံဆီကုန်သည်နှင့်ဆီလုပ်ငန်းရှင် များအသင်း၏ Facebook Page တို့တွင် ဝင်ရောက် ကြည့်ရှုလေ့လာ နိုင်ကြောင်းသိရှိရပါသည်။ 

            စစ်ကိုင်းမြို့၊ ပါရမီရပ်ကွက်ရှိ “ရွှေမြန်မာ”ဂျုံခေါက်ဆွဲလုပ်ငန်းကို ၂၀၀၀ ခုနှစ်ကစတင်ပြီး မတည်ရင်းနှီးငွေ ကျပ်သိန်း(၃၀၀)ဖြင့် တစ်ပိုင်တစ်နိုင် အိမ်တွင်းစားသောက်ကုန်လုပ်ငန်းအဖြစ်  လုပ်ကိုင်ခဲ့ရာ ယခုလုပ်သားအင်အား ကျား+မ(၁၅)ဦးဖြင့် အလုပ်အကိုင်အခွင့်အလမ်းများ ပေးနိုင်ပါသည်။ လုပ်သားတစ်ဦးလျှင် တစ်လ (၂)သိန်းမှ (၃)သိန်းထိ လုပ်ငန်းကျွမ်းကျင်မှုပေါ်မူတည်၍ လုပ်အားခများပေးချေပါသည်။ ဂျုံကုန်ကြမ်းကို မန္တ‌လေးမြို့မှ ဒုံးပျံတံဆိပ်ကို ဝယ်ယူအသုံးပြုသည်။ တစ်လလျှင်ကုန်ကြမ်း ဂျုံ ၂၅ပိဿာဝင် အိတ် ၄၀၀ကို အသုံးပြု၍ ကုန်ချောခေါက်ဆွဲခြောက် ၁၀၀၀၀ ပိဿာခန့် ထုတ်လုပ်နိုင်ကြောင်း သိရသည်။

          ကုန်ချောထုတ်လုပ်ပုံအဆင့်ဆင့်မှာ ဂျုံ၊ ကြက်ဥ၊ ရေ၊ ဆားနှင့် ဆော်ဒါများဖြင့် မွှေသည့်စည်တွင်ထည့်ကာ အချိန်မိနစ် ၂၀ခန့်မွှေသည်။ ထွက်ရှိလာသော ဂျုံများကို ကြိတ်ခုံ(၃)ခုမှ အဆင့်ဆင့်ဖြတ်၍ ဂျုံပြားများရရှိလာပြီး ခေါက်ဆွဲမျှင်ဖြတ်သည့်စက်ဖြင့် အမျှင်များဖြတ်သည်။ ခေါက်ဆွဲမျှင်များကို တုတ်တန်းများပေါ်တွင်တင်၍ အစိမ်းနေလှန်းချိန်(၃)နာရီကြာမြင့်ပါသည်။  ရွှေမြန်မာခေါက်ဆွဲခြောက်မှထုတ်လုပ်သည့် ခေါက်ဆွဲများမှာကြက်ဥဂျုံခေါက်ဆွဲနှင့် သက်သတ်လွတ်ဂျုံခေါက်ဆွဲဟူ၍ (၂)မျိုးထုတ်လုပ်ပါသည်။ နေလှန်းပြီးဂျုံများကို  သတ်မှတ်ထားသည့် အရှည်အတိုင်းဖြတ်တောက်ပြီး ကြက်ဥဂျုံခေါက်ဆွဲ ၃၆၀ဂရမ် တစ်ထုပ်လျှင် (၃၀၀၀)ကျပ်နှင့် သတ်သတ်လွတ် ဂျုံခေါက်ဆွဲ ၃၅၅ဂရမ် တစ်ထုပ်လျှင် (၂၀၅၀)ကျပ် စသည်ဖြင့် ထုတ်လုပ်ရောင်းချလျက်ရှိသည်။ အရည်အသွေးမှန်၊ အလေးချိန်မှန်၊ ဈေးနှုန်းမှန်ဖြင့် ထုတ်လုပ်ရောင်းချသဖြင့် စားသုံးသူပြည်သူများအတွက် သင့်တင့်မျှတသော ဈေးနှုန်းများဖြစ်ပါသည်။ ရွှေမြန်မာခေါက်ဆွဲစက်မှ ထွက်ရှိသည့်ခေါက်ဆွဲများကို စစ်ကိုင်းတိုင်းဒေသကြီးအတွင်းနှင့် မြစ်ကြီးနားမြို့၊ မိုးညှင်းမြို့နှင့် မန္တလေးမြို့များသို့ တင်ပို့ရောင်းချလျက်ရှိသည်။ အစားအသောက်နှင့်ဆေးဝါးကွပ်ကဲရေးဦးစီးဌာန (FDA)၏ လက်မှတ်ရရှိပြီးဖြစ်၍ စားသုံးသူပြည်သူများအတွက် စိတ်ချယုံကြည်စွာဖြင့် ဝယ်ယူစားသုံးနိုင်သည့် ခေါက်ဆွဲဖြစ်ကြောင်း လုပ်ငန်းရှင်ထံမှ သိရှိရပါသည်။

DOCA(စစ်ကိုင်း)

    မွန်ပြည်နယ်၊ ပေါင်မြို့နယ်၌ ဆန်စပါးအပြင် ရာသီအလိုက် ကာလတို/ ကာလရှည် သီးနှံမျိုးစုံ စိုက်ပျိုးလျက်ရှိရာ ခရမ်းချဉ်သီးဈေးနှုန်း ပြန်လည်ကောင်းမွန်လာသဖြင့် ခရမ်းချဉ်သီးစိုက်တောင်သူများ အဆင်ပြေလျက်ရှိကြောင်း ကျုံကကျေးရွာမှ တောင်သူ တစ်ဦးကပြောပြ၍ သိရှိရပြီး ခရမ်းချဉ်သီးသည်  ပျိုးထောင်အချိန်မှ စတင်ပြီး ခူးဆွတ် ရောင်းချိန်အထိ အမြဲဂရုစိုက်ရသည့် သီးနှံအမျိုးအစား ဖြစ်ကြောင်း၊ စိုက်ပျိုးမြေ အမျိုးအစားနှင့် ရာသီဥတုအခြေအနေပေါ် မူတည်၍ ရေသွင်းခြင်း၊ အပင်အားတိုးဆေးနှင့် ပိုးမွှားနှိမ်နင်းဆေးများ အသုံးပြုရကြောင်း ပြောပြသည်။

    ခရမ်းချဉ်ပင်စိုက်ပျိုးပြီး (၄၅) ရက်တွင် အသီးများ စတင်ခူးဆွတ်ရကြောင်း၊ နှစ်ရက်ခြား တစ်ကြိမ် ခူးဆွတ်ရသဖြင့် နေ့စဉ်နီးပါးဝင်ငွေရကြောင်း၊ ရောင်းဈေးအနေဖြင့် ခရမ်းချဉ်သီး တစ်ပိဿာ ငွေကျပ် (၄၀၀၀)ကျပ် ရောင်းရသဖြင့် ခရမ်းချဉ်စိုက်တောင်သူများ အဆင်ပြေလျက်ရှိကြောင်း သိရသည်။ ပေါင်မြို့နယ်တွင် စီးပွားဖြစ် ခရမ်းချဉ်သီးနှံ စိုက်ပျိုးသူများအနေဖြင့် ဦးစွာသာဘာဝမြေဩဇာဖြစ်သည့် နွားချေး၊ ကွန်ပေါင်းဓာတ်မြေဩဇာများနှင့် မြေပြုပြင်ထားရကြောင်း၊ ရေသွင်းရေထုတ်ကောင်းမွန်စေရန်အတွက် မြေဘောင်များပြုလုပ်၍ ရေအလေအလွင့်နည်းပါးစေရန်နှင့် ပေါင်းမြက်များပေါက်ရောက်မှု သက်သာစေရန်အတွက် ပလတ်စတစ် အပါးစများခင်း၍ စိုက်ပျိုးပါက အပင်ဖြစ်ထွန်းမှု ကောင်းပြီး အသီးထွက်နှုန်း ကောင်းမွန်ကြောင်းနှင့် ခရမ်းချဉ်စိုက်ပျိုးခြင်းသည် ကျွမ်းကျင်မှုရှိပါက အကျိုးအမြတ်များသော သီးနှံတစ်မျိုးဖြစ်ကြောင်း သိရှိသည်။

DOCA (မွန်)

          မွန်ပြည်နယ်၊ ဘီးလင်းမြို့နယ်အတွင်းရှိ နှင်းပုလဲကျေးရွာ၊ ဇုတ်သုတ်ကျေးရွာ၊ မုသင်ကျေးရွာနှင့် ရွှေလှေကျေးရွာများ၌ ကွမ်းရွက်အား တစ်နိုင်တစ်ပိုင် စိုက်ပျိုးကြရာမှ စီးပွားဖြစ်စိုက်ပျိုးလာကြပြီး ယခုနှစ်တွင် ဈေးကောင်းရ၍ ကွမ်းရွက်စိုက်ပျိုးသူများ အဆင်ပြေနေကြောင်း သိရသည်။

          အဆိုပါ ကွမ်းရွက်ပင်များ စိုက်ပျိုးရာ၌ ဝါဆိုလတွင် စိုက်ပျိုးကြပြီး ဝါးတစ်တိုင်လျှင် ကွမ်းအညွှန့်နှစ်ညွှန့်စိုက်ပျိုးရပြီး တော်သလင်းလတွင် သွင်းအားစုများအဖြစ် နွားချေး၊ မြေဆွေး၊ ဓာတ်မြေဩဇာများ ကျွေးရပါသည်။ သီတင်းကျွတ်လခန့်တွင် ကွမ်းရွက်များ စတင်ခူးဆွတ်ရရှိပြီး ကွမ်းတိုင် (၁၀၀၀) တိုင်စိုက်ပျိုးလျှင် (၂၀) ရက်လျှင် (၁) ကြိမ်ခူးရာ (၇၅) ပိဿာခန့်ခူးဆွတ်ရရှိ၍ ထိုကွမ်းရွက်များအား မြို့နယ်အတွင်းဖြန့်ဖြူးရောင်းချရာတွင် ကွမ်း (၅၀) ကျပ်သားတစ်လိပ်လျှင် (၆၀၀၀) ကျပ်ဝန်းကျင်ရရှိကြောင်း၊ ကွမ်းတိုင် တစ်ထောင်စိုက်ပျိုးရန် အထွေထွေကုန်ကျစရိတ် (၅၀) သိန်းခန့် ကုန်ကျပြီး ကွမ်းပင်၏ သက်တမ်းမှာ (၄) နှစ်ခန့်ရှိကြောင်း၊ အထွေထွေကုန်ကျစရိတ်များသော်လည်း ကွမ်းရွက် ဈေးကောင်းရ၍ အထွက်နှုန်းကောင်းလျှင် အကျိုးအမြတ်ကောင်းစွာ ရရှိနိုင်ကြောင်း ကွမ်းရွက်စိုက်ပျိုးသူများထံမှ သိရှိရပါသည်။

DOCA (မွန်)