ပြည်တွင်းကုန်သွယ်မှုသတင်း

   စစ်ကိုင်းတိုင်းဒေသကြီး ၊ ကန့်ဘလူခရိုင်သည် လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်ရာ ကန့်ဘလူမြို့နယ်အတွင်းရှိ ထန်းကုန်းကျေးရွာ၊ မိုးကောင်းကျေးရွာနှင့် အခြားသောကျေးရွာများတွင် ပဲတီစိမ်းသီးနှံကို စိုက်ပျိုးကြကြောင်း၊ ယခုအခါ ပဲတီစိမ်းသီးနှံများ ဈေးကွက်အတွင်း ဝင်ရောက်လျက်ရှိပြီး ဒီဇင်ဘာလပထမပတ်အတွင်း ပဲတီစိမ်းရိုးရိုး တစ်တင်းလျှင်(၇၀၀၀၀)ကျပ်၊ ပဲတီစိမ်းထွက်တိုး အလုံးလှတစ်တင်းလျှင် (၇၅၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ပဲတီစိမ်းမှာ အလုံးလှပြီး အကွဲအနာကင်းလျှင် ဈေးနှုန်းပိုမိုရရှိကြောင်းနှင့် ဈေးကွက်အနေဖြင့် ကန့်ဘလူခရိုင်မှ ထွက်ရှိသော ပဲတီစိမ်းများကို မန္တလေးမြို့ရှိပွဲရုံများ ၊ ကုန်စည်ဒိုင်များသို့ တင်ပို့ရောင်းချလျက်ရှိသည်။

   နိုဝင်ဘာလနောက်ဆုံးပတ်ဈေးနှုန်းများနှင့် နှိုင်းယှဉ်ပါက ယခုလပထမပတ်အတွင်း ပဲတီစိမ်း ရိုးရိုးတစ်တင်းလျှင်(၅၀၀၀)ကျပ်နှင့် ပဲတီစိမ်းထွက်တိုး တစ်တင်းလျှင်(၅၀၀၀)ကျပ် ကျဆင်းသွားကြောင်းသီးနှံရောင်းဝယ်ရေး လုပ်ငန်းရှင်များထံမှ သိရသည်။

DOCA(စစ်ကိုင်း)

    မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည် နှင့်အညီ စစ်ကိုင်းတိုင်းဒေသကြီး ၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ကန့်ဘလူမြို့နယ်အတွင်းရှိ ကျေးရွာများတွင် ဒေသတွင်းစားသုံးဆီဖူလုံစေရေးအတွက် ဆီထွက်သီးနှံဖြစ်သည့် နှမ်းသီးနှံများလည်း စိုက်ပျိုးကြကြောင်း သိရသည်။

    ယခုအခါ နှမ်းများဈေးကွက်အတွင်း ဝင်ရောက်လျက်ရှိပြီး ကန့်ဘလူခရိုင်၌ဖြစ်ပေါ်နေသော နှမ်းဈေးနှုန်းမှာ ဒီဇင်ဘာလပတ်အတွင်း နှမ်းနက်(စမုံ)တစ်တင်းလျှင်(၂၁၀၀၀၀)ကျပ်၊ နှမ်းဖြူ (ဂျပန်)တစ်တင်းလျှင် (၁၂၀၀၀၀)ကျပ်ဖြင့် ရောင်းဝယ်လျက်ရှိကြောင်း၊ ဈေးကွက်အနေဖြင့် ကန့်ဘလူခရိုင်မှ ထွက်ရှိသောနှမ်းများကို မန္တလေးမြို့ရှိပွဲရုံများသို့ တင်ပို့ရောင်းချလျက်ရှိကြောင်း ၊ယခုပတ်တွင် အရောင်းအဝယ်ဖြစ်လျက်ရှိသော နှမ်းဈေးနှုန်းများသည် ယခင်ပတ်ဈေးနှုန်းများနှင့် နှိုင်းယှဉ်ပါက နှမ်းနက်(စမုံ)တစ်တင်းလျှင်(၁၀၀၀၀)ကျပ်မြင့်တက်၍၊ နှမ်းဖြူ(ဂျပန်)တစ်တင်းလျှင် (၄၀၀၀၀)ကျပ် ကျဆင်းလာကြောင်း သီးနှံရောင်းဝယ်ရေးလုပ်ငန်းရှင်ထံမှ သတင်းရရှိသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ ကန့်ဘလူခရိုင်တွင် ကွမ်းသီးပင်များကို နေအိမ်ခြံဝင်းများ၌ မိသားစုဝင်ငွေရရှိသည့်အတွက် တစ်နိုင်တစ်ပိုင်စိုက်ပျိုးကြကြောင်း ၊ ကန့်ဘလူခရိုင်တွင် ရောင်းချနေသည့် ကွမ်းသီးများကို ကန့်ဘလူခရိုင်အတွင်းမှလည်းကောင်း၊ ဘိတ်ဒေသမှလည်းကောင်း ဝယ်ယူ၍ ကွမ်းသီးမှ ကွမ်းသီးစိတ်များထုတ်လုပ်၍ ဖြန့်ဖြူးရောင်းချလျက်ရှိကြောင်း သိရသည်။

    ၂၀၂၄ ခုနှစ် ၊ ဒီဇင်ဘာလပထမပတ်တွင် ဖြစ်ပေါ်နေသော ကန့်ဘလူခရိုင်၏ ကွမ်းသီးစိတ်ဈေးနှုန်းများအနေဖြင့် အရည်အသွေးပေါ်မူတည်၍ ကွမ်းသီးစိတ်လက်ကားဈေး တစ်ပိဿာလျှင် ငွေကျပ်(၁၇၀၀၀မှ၁၇၅၀၀)ဖြင့်လည်းကောင်း၊ လက်လီဈေးတစ်ပိဿာလျှင် ငွေကျပ်(၁၈၀၀၀)ဖြင့် လည်းကောင်း၊ ကွမ်းသီးစိတ်(ပယ်)တစ်ပိဿာလျှင် ငွေကျပ်(၈၀၀၀)ဖြင့်လည်းကောင်း၊ အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် ကန့်ဘလူမြို့နယ်မှထွက်ရှိသည့် ကွမ်းသီးစိတ်များကို ကန့်ဘလူမြို့ပေါ်ရှိဆိုင်များ ၊ ကန့်ဘလူမြို့နယ်၊ ထန်းကုန်းကျေးရွာနှင့် ကျွန်းလှမြို့နယ်များသို့ လက်လီ/လက္ကားဖြန့်ဖြူးရောင်းချလျက်ရှိကြောင်း  ကန့်ဘလူမြို့၊ အမှတ်(၃)ရပ်ကွက်ရှိ ကွမ်းသီးစိတ်ရောင်းဝယ်ရေးလုပ်ငန်းရှင်၏ ပြောပြချက်အရ သိရသည်။

DOCA(စစ်ကိုင်း)

              ပဲခူးတိုင်းဒေသကြီး၊ သာယာဝတီခရိုင်၊ မိုးညိုမြို့နယ်သည်သီးနှံမျိုးစုံစိုက်ပျိုးထွက်ရှိသော မြို့နယ်ဖြစ်သည်။ ယခုအခါတွင် ပဲပုတ်သီးနှံများဖြစ်ထွန်းအောင်မြင်နေပြီဖြစ်ရာ ပဲပုတ်စိုက်တောင်သူများအနေဖြင့် မြို့ပေါ်ကုန်သည်များထံသို့ ၎င်းနီးစလပ်ရာမြို့များသို့ သွားရောက်ရောင်းချခြင်းဖြင့်လည်းကောင်း  ၊မြို့ပေါ်ကုန်သည်များ ကွင်းအရောက်ဆင်းကာဝယ်ယူခြင်းဖြင့်လည်းကောင်း၊ အရောင်းအဝယ်ဖြစ်နေလျက်ရှိပါသည်။ မြို့ပေါ်ကုန်သည်ကြီးများအနေဖြင့် တောင်သူများထံမှပွဲရုံအရောက် ပိဿာ (၂၀) တစ်တင်း  လျှင် ၁၄၄၀၀ကျပ်ဖြင့် ဝယ်ယူပေးလျက်ရှိပြီး ယခုအခါမြို့ပေါ်ကုန်သည်ကြီးများအနေဖြင့် တစ်နေ့လျှင် အိတ်ရေ (၃၀၀၀) ခန့်ဝယ်ယူရရှိနေပါသည်။ ဝယ်ယူရရှိသောပဲပုတ်များအား ရန်ကုန်မြို့ရှိထောက်ကြန့် အစာစပ်စက်ရုံ  (CP)စာစက်ရုံသို့၎င်း၊ မြောင်းတကာ ကြက်၊ ဝက်အစာစက်ရုံများသို့လည်းကောင်း၊ အိတ်လုံးရေ(၂၅၀)အိတ်ဆန့်တွဲကားကြီးများဖြင့်လည်းကောင်း၊ အိတ်လုံးရေ(၃၅၀) အိတ်ဆန့်ကားများဖြင့်လည်းကောင်း တင်ပို့ရောင်းချလျက်ရှိရာ ပေါက်ဈေးပိဿာ (၂၀)တစ်တင်း လျှင်(၁၇၄၀၀) ကျပ်ဈေးဖြင့်ရောင်းချရကြောင်း မိုးညိုမြို့ပေါ်ရှိ ပွဲရုံများသို့ကွင်းဆင်း ဆောင်ရွက်မှုများအရ သိရှိရပါသည်။

DOCA(ပဲခူး)

     ၂၀၂၄ ခုနှစ်၊ စစ်ကိုင်းတိုင်းဒေသကြီး ၊  ကန့်ဘလူမြို့၊ မြို့မစည်ပင်သာယာဈေးကွက်အတွင်းသို့ ဒေသထွက် ခရမ်းချဉ်သီးများနှင့်ရှမ်းပြည်နယ် အောင်ပန်းတို့မှထွက်ရှိသော ခရမ်းချဉ်သီးများကို မန္တလေးတိုင်းဒေသကြီးမှ မှာယူရောင်းချပြီး အရောင်းအဝယ်ဖြစ်လျက်ရှိကြောင်း သိရှိရပါသည်။

    ခရမ်းချဉ်သီးများသည် ယခုအချိန်အခါကာလဖြစ်သည့် ဆောင်းရာသီတွင် မိမိတို့ဒေသထွက် ခရမ်းချဉ်သီးများ ဈေးကွက်အတွင်းသို့ ဝင်ရောက်ကာ လှိုင်လှိုင်ထွက်ရှိလာသည့်အတွက် ရှမ်းပြည်နယ် အောင်ပန်းဒေသထွက် ခရမ်းချဉ်သီးများကို မန္တလေးမြို့မှ အနည်းငယ်သာမှာ ယူရောင်းချရပါသည်။ ရှမ်းပြည်၊ အောင်ပန်းဒေသထွက် ခရမ်းချဉ်သီးများမှာ ရာသီမရွေးဝယ်ယူ စားသုံးနိုင်ပြီး အခွံလည်းထူ၍ အချဉ်အရသာနည်းသည့်အပြင် အလုံးအရွယ်အစားလှခြင်း၊ အထားခံခြင်းတို့ကြောင့် လူအများက ပိုမိုကြိုက်နှစ်သက်ကြပါသည်။ ဒေသထွက် ခရမ်းချဉ်သီးမှာ အချိန်ကြာမြင့်စွာထားလျှင် ပုပ်လွယ်ပြီး အထားမခံသည့်အတွက် အကြိုက်နည်းကြပေမဲ့ ဈေးနှုန်းအနေဖြင့် သက်သောသောကြောင့် ဒေသထွက်ခရမ်းချဉ်သီးများကိုသာ လှိုင်လှိုင်ဝယ်ယူ ရောင်းချလျက်ရှိကြောင်း  ယခင်နိုဝင်ဘာလတွင် ခရမ်းချဉ်သီးဈေးနှုန်းများမှာ တစ်ပိဿာလျှင် (၈၀၀၀/ ၁၀၀၀၀)ကျပ် ဈေးနှုန်ုးတို့ဖြစ်ခဲ့ကြောင်း သိရှိရပါသည်။

     ယခု ဒီဇင်ဘာလ ပထမအပတ်တွင် ဒေသထွက်ခရမ်းချဉ်သီး ဈေးနှုန်းအနေဖြင့်  တစ်ပိဿာ လျှင်(၅၅၀၀/၆၀၀၀)ကျပ် (၂၅)ကျပ်သားလျှင်(၁၅၀၀)ကျပ်နှင့် ရှမ်းပြည်ဒေသထွက် ခရမ်းချဉ်သီးဈေးနှုန်းအနေဖြင့်  တစ်ပိဿာလျှင်(၇၀၀၀/၈၀၀၀)ကျပ် (၂၅)ကျပ်သားလျှင်(၂၀၀၀)ကျပ် ဈေးနှုန်းဖြင့် အရောင်းအဝယ်ဖြစ်လျက်ရှိကြောင်း ကန့်ဘလူမြို့ ကုန်စိမ်းသီးနှံ အရောင်းအဝယ်လုပ်နေသူများထံမှ သိရှိရပါသည်။

DOCA(စစ်ကိုင်း)