ပြည်တွင်းကုန်သွယ်မှုသတင်း

     ၂၀၂၄ ခုနှစ်၊ စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကန့်ဘလူမြို့ မြို့မစည်ပင်သာယာဈေးကွက်အတွင်း ကြက်သွန်ဖြူကို ရှမ်းပြည်နယ် အောင်ပန်းမြို့နှင့် မန္တလေးတိုင်းဒေသကြီးမှ အများဆုံးမှာယူရောင်းချလျက်ရှိကြောင်း သိရှိရပါသည်။

     ကန့်ဘလူမြို့နယ်တွင် ကြက်သွန်ဖြူ ယခုနိုဝင်ဘာလအတွင်း ကြက်သွန်ဖြူ ဈေးနှုန်းအနေဖြင့် ရှမ်းကြက်သွန်ဖြူ(ခေါ်)ကြူကုတ်အမျိုးအစား တစ်ပိဿာလျှင်  ကျပ်(၂၀၀၀၀)၊ (၂၅) ကျပ်သားလျှင် ကျပ် (၅၀၀၀)၊ ဗမာကြက်သွန်ဖြူ အကြီးစ တစ်ပိဿာလျှင် ကျပ်(၁၈၀၀၀)(၂၅)ကျပ်သားလျှင် ကျပ်(၄၅၀၀)၊ အလတ်စ တစ်ပိဿာလျှင် ကျပ်(၁၅၀၀၀)၊ (၂၅)ကျပ်သားလျှင် ကျပ်(၄၀၀၀)နှင့် ဗမာကြက်သွန်ဖြူ အသေးစ တစ်ပိဿာလျှင် ကျပ်(၁၄၀၀၀)၊ (၂၅)ကျပ်သားလျှင် ကျပ်(၃၅၀၀) ဈေးနှုန်း အသီးသီးရောင်းချလျက်ရှိကြောင်း ယခု ဒီဇင်ဘာလဆန်းပိုင်းတွင် ကြက်သွန်ဖြူဈေးနှုန်းအနေဖြင့် ရှမ်းကြက်သွန်ဖြူ(ခေါ်)ကြူကုတ်အမျိုးအစား တစ်ပိဿာလျှင်  ကျပ်(၂၃၀၀၀)၊ (၂၅) ကျပ်သားလျှင် ကျပ် (၅၅၀၀)၊ ဗမာကြက်သွန်ဖြူ အကြီးစ တစ်ပိဿာလျှင် ကျပ်(၁၇၀၀၀)(၂၅)ကျပ်သားလျှင် ကျပ်(၄၅၀၀)၊ အလတ်စ တစ်ပိဿာလျှင် ကျပ်(၁၆၀၀၀)၊ (၂၅)ကျပ်သားလျှင် ကျပ်(၄၀၀၀)နှင့် ဗမာကြက်သွန်ဖြူ အသေးစတစ်ပိဿာလျှင် ကျပ်(၁၄၀၀၀)၊ (၂၅)ကျပ်သားလျှင် ကျပ်(၃၅၀၀)ဈေးနှုန်း အသီးသီး ရောင်းချလျက်ရှိကြောင့် နိုဝင်ဘာလထက် ကြက်သွန်ဖြူ(ကြူကုတ်)အမျိုးအစားသာ ဈေးနှုန်းအနည်းငယ် မြင့်တက်လျက်ရှိကြောင်း ကန့်ဘလူမြို့ ကြက်သွန်ဖြူအရောင်းအဝယ်လုပ်နေသူထံမှ သိရှိရပါသည်။

DOCA(စစ်ကိုင်း)

            ပြည်ဈေးကွက်တွင် မြေပဲဆန်ဈေးမှာ ယခုနိုဝင်ဘာလကုန်ပတ်တွင် လုံးဆန်ရော၊ ဆီဆန်ပါ ဈေးနှုန်းများမြင့်တက်လာခဲ့ပါသည်။ မိုးမြေပဲများဈေးကွက်လက်ကျန် အနည်းငယ်သာလက်ကျန်ရှိပြီး ဆောင်းမြေပဲများစိုက်ပျိုးချိန်ဖြစ်၍ ဈေးအနည်းငယ်ပြန်လည်မြင့်တက်လာပါသည်။ ယခုနိုဝင်ဘာလနောက်ဆုံးပတ်တွင် မြေပဲဆီဆန်(အဖြူ)တစ်ပိဿာလျှင် ၈၀၀၀ကျပ်၊ ဆီဆန် (အနီ)တစ်ပိဿာလျှင် ၈၀၀၀ကျပ်ဖြင့် ဈေးတူနေပြီး၊ လုံးဆန်(အဖြူ)တစ်ပိဿာလျှင် ၈၄၀၀ကျပ်၊ လုံးဆန်(အနီ)တစ်ပိဿာ လျှင် ၈၄၀၀ကျပ်ဖြင့် တစ်နေ့လျှင် ပိဿာ(၂၀)ဝင်အိတ် (၅၀၀)ခန့် အရောင်းအဝယ်ဖြစ်လျက်ရှိပါသည်။ ယခင်အောက်တိုဘာလနောက်ဆုံးပတ်နှင့် နှိုင်းယှဉ်လျှင်ဆီဆန် (အဖြူ)တစ်ပိဿာလျှင် ၁၂၀၀ကျပ်၊ ဆီဆန်(အနီ)တစ်ပိဿာလျှင် ၁၂၀၀ကျပ်နှင့် လုံးဆန် (အဖြူ)တစ်ပိဿာလျှင် ၁၀၀၀ကျပ်၊ လုံးဆန် (အနီ)တစ်ပိဿာလျှင် ၁၀၀၀ကျပ်ဖြင့် ယခုလတွင် ဈေးနှုန်းများမြင့်တက်လာခဲ့ပါသည်။ မြေပဲဆန် စီးဆင်းမှုအနေဖြင့် ယခုအချိန်တွင် ပြည်အနီးပတ်ဝန်းကျင်ကျေးရွာများနှင့် ပေါက်ခေါင်းမြို့နှင့် ရွှေတောင်မြို့ရှိကျေးရွာများမှ အနည်းငယ်သာဝင်ရောက်မှုရှိပြီး လက်ကျန်မြေပဲဆန်များဖြင့် ဒေသတွင်းဆီစက်များ၊ အောင်လံနှင့် မကွေးဘက်မှ ဝယ်ယူမှုရှိသဖြင့် အရောင်းအဝယ်ပုံမှန်ဖြစ်လျက်ရှိပါသည်။ ပြည်ဈေးကွက်အတွင်းတွင် ယခင်မိုးမြေပဲများပေါ်စအချိန်တွင် မြေပဲဆန် နို့ဆီဘူးတစ်ဘူးလျှင် (၁၀၀၀) ကျပ်ဖြင့်ရောင်းချခဲ့ပြီး ယခုအချိန်ဖြစ်သော မြေပဲဆန်လက်ကျန်ရှားချိန်တွင် နို့ဆီဘူးတစ်ဘူးလျှင် (၁၂၀၀-၁၃၀၀)ကျပ်ဖြင့် ရောင်းချသဖြင့် ဈေးအနည်းငယ်မြင့်တက်လာသည်ကို တွေ့ရှိရပါသည်။

DOCA(ပဲခူး)

                ပြင်သစ်ပန်း(ခ) ဆောင်တော်ကူးပန်းသည် အရောင်မှာဖြူစွတ်စွတ်အရောင်ရှိပြီး ပန်းပွင့်ချိန်တွင်  အဆုပ်လိုက် အဆုပ်လိုက်ပွင့်တက် သောနွယ်ပင်တစ်မျိုးဖြစ်ပါသည်။ ထိုပန်းသည် ဆောင်းဦးပေါက်ရာသီချိန်ဖြစ်သော နိုဝင်ဘာလနှင့် ဒီဇင်ဘာလတို့တွင် ထွက်ပေါ်လာပြီး တစ်နှစ်မှတစ်ခါသာပေါ်တက်သဖြင့် လူအများက နှစ်ခြိုက်စွာဝယ်ယူကြသော ပန်းတစ်မျိုးဖြစ်ပါသည်။ ပြင်သစ်ပန်း(ခ) ဆောင်တော်ကူးပန်းများကို ပြည်ဈေးကွက်သို့ အနီးအနားရှိ ကျေးရွာများ၊ ဧရာဝတီမြစ် အနောက်ဘက်ကမ်းရှိကျေးရွာများမှ လာရောက်ရောင်းချကြပါသည်။ ရောင်းချသော ဈေးနှုန်းများမှာ အစည်းတစ်စည်းလျှင် (၁၂၀၀-၁၃၀၀)ကျပ်ဖြင့်ရောင်းချကြောင်း သိရပါသည်။ ပန်းမှာ ဘုရားပန်းကပ်လှူ ရာတွင်လည်းကောင်း၊ နတ်ပန်းအိုးထိုးရာတွင်လည်းကောင်း၊ ပန်ဆင်ရာတွင်လည်းကောင်း ဝယ်ယူသုံးစွဲကြသဖြင့် ရောင်းချသူများအနေဖြင့်လည်း တစ်နှစ်တစ်ခါထွက်ပေါ်သည့်ပန်းဖြစ်၍ စရိတ်ငြိမ်းအမြတ်အစွန်းများလည်းရရှိသည့် ပန်းဖြစ်ကြောင်းသိရပါသည်။

DOCA(ပဲခူး)

              ပြည်ခရိုင်၊ ပြည်မြို့ရှိပွဲရုံများနှင့် ဈေးကွက်များတွင် နှမ်းများအရောင်းအဝယ်ဖြစ်လျက်ရှိပြီး ယခုအပတ်တွင် နှမ်းနီမှာ ဈေးအနည်းငယ်မြင့်တက်လာခဲ့ကြောင်းသိရသည်။ နှမ်းအနီကိုဒေသတွင်း ဆီစက်သမားများကဝယ်ယူမှုရှိသဖြင့် ဈေးအနည်းငယ်မြင့်တက်လာပါသည်။ နှမ်းနက်နှင့်စမုံနက်နှမ်းမှာ ဝယ်ယူမှုနည်းသည့်အတွက် ဈေးမှာ ယခင်အပတ်ကအတိုင်း ငြိမ်နေတာတွေ့ရပါသည်။ ယခုအချိန်တွင် ဆောင်းနှမ်းများစိုက်ပျိုးချိန်ဖြစ်ပြီး ပြည်ခရိုင်အနေဖြင့် ပြည်မြို့နှင့် ရွှေတောင်မြို့နယ်တို့တွင် စိုက်ပျိုးထားကြောင်းသိရှိပါသည်။ နှမ်းနီမှာ ပြည်ခရိုင်အနေဖြင့် အနည်းငယ်သာစိုက်ပျိုး၍ ဆီစက်သမားများကလည်းဝယ်ယူမှုရှိသဖြင့် နှမ်းနီဈေးသာ အနည်းငယ်မြင့်တက်လာကြောင်းတွေ့ရပါသည်။ နှမ်းနက်နှင့် စမုံနက်နှမ်းမှာ ဝယ်လိုအားနည်းသဖြင့် ဈေးနှုန်းများငြိမ်နေခဲ့ပါသည်။ နှမ်းဈေးနှုန်းများအနေဖြင့် နိုဝင်ဘာလနောက်ဆုံးပတ်တွင် နှမ်းနီတစ်တင်းလျှင် ၁၂၀၀၀၀ကျပ်ဖြင့် ယခင်အောက်တိုဘာလကုန် ပတ်နှင့်ယှဉ်လျှင် ၄၀၀၀ကျပ်ခန့်မြင့်တက်လာပြီး နှမ်းနက်တစ်တင်းလျှင် ၁၆၅၀၀၀ကျပ်နှင့် စမုံနက် နှမ်းတစ်တင်းလျှင် ၂၀၀၀၀၀ကျပ်ဖြင့် ယခင်အတိုင်း ဈေးငြိမ်နေကြောင်း တွေ့ရပါသည်။ ယခင်က နှမ်းနက်နှင့် စမုံနက်နှမ်းကို မကွေးတိုင်း၊ မန္တလေးတိုင်းတို့မှ ဝယ်ယူခဲ့ကြောင်းသိရသည်။ ယခုအချိန်တွင် မကွေးတိုင်း၊ အောင်လံဘက်မှ ဝယ်ယူမှုရှိသော်လည်း တစ်ခါတစ်ရံ အရောင်းအဝယ်ဖြစ်လျင် (၁၅၀-၂၀၀)အိတ်ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ပဲခူး)

         ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့မဈေးအတွင်း ရောင်းချလျက်ရှိသော ကြက်သွန်နီဈေးနှုန်းများမှာ  အောက်တိုဘာလဒုတိယပတ်မှ အောက်တိုဘာလနောက်ဆုံးပတ်အထိ ကြက်သွန်နီ(အကြီး) လက်လီဈေးနှုန်း တစ်ပိဿာလျှင် (၂၅၀၀/ ၂၈၀၀) ကျပ်ဈေးနှုန်းဖြင့် အရောင်းအဝယ်ရှိနေခဲ့သော်လည်း နိုဝင်ဘာလဆန်းမှစတင်ပြီး ကြက်သွန်နီ ဈေးနှုန်းများ တစ်ဖြည်းဖြည်းမြင့်တက်လာပြီး ယခုနိုဝင်ဘာလနောက်ဆုံးပတ်တွင် ကြက်သွန်နီတစ်ပိဿာလျင်ကြက်သွန်နီ (ကြီး)၅၀၀၀/ကျပ်၊ ကြက်သွန်နီ(လတ်)၄၀၀၀/ကျပ်၊ ကြက်သွန်နီ(သေး) ၃၅၀၀/ ကျပ် ဈေးနှုန်းဖြင့် ကြက်သွန်နီဈေးများမြင့်တက်သွားကြောင်းသိရှိရပါသည်။

             အာလူးဈေးကွက်ရောင်းချမှုအနေဖြင့် အာလူးတစ်ပိဿာလျင် အောက်တိုဘာလဒုတိယပတ်တွင် အာလူးတစ်ပိဿာလျှင် ၇၀၀၀/ ၈၀၀၀) ကျပ်ပေါက်ဈေးဖြင့် အရောင်းအဝယ်ရှိနေခဲ့ပြီး အောက်တိုဘာလလနောက်ဆုံးပတ်တွင် လည်းအာလူးဈေးနှုန်းများဆက်လက်မြင့်တက်လာခဲ့ရာ ယခုနိုဝင်ဘာလနောက်ဆုံးပတ်တွင်(၈၀၀၀/ ၁၀၀၀၀) ဈေးနှုန်းဖြင့် အရောင်း အဝယ်ဖြစ်နေပါသဖြင့် အာလူးဈေးနှုန်း/ ဈေးကွက်အခြေအနေမှာ ဈေးနှုန်းမြင့်တက်သွားကြောင်း သိရှိရပါသည်။

DOCA(ပဲခူး)