ပြည်တွင်းကုန်သွယ်မှုသတင်း

          မန္တလေးတိုင်းဒေသကြီး ရမည်းသင်းမြို့နယ်အတွင်းရှိ သရက်ပင်၊ မြို့လှ၊ ပဲ့ပင်၊ အင်းတော်၊ တွင်းကျ၊ ကျောက်ဖူး၊ ရွာတန်းကျေးရွာများတွင်  လယ်ယာစိုက်ပျိုးရေး လုပ်ငန်းများကိုအဓိကလုပ်ကိုင်ကြပြီး သီးနှံမျိုးစုံစိုက်ပျိုးလျက်ရှိရာမှ ဆီထွက်သီးနှံတစ်မျိုးဖြစ်သည့် မြေပဲကိုအများဆုံးစိုက်ပျိုးကြကြောင်း၊ ရမည်းသင်းမြို့နယ်တွင် ၂၀၂၅-၂၀၂၆ ခုနှစ်တွင် မိုးမြေပဲကို(၁၉၂၀၀)လျာထားသော်လည်း စိုက်ဧက( ၂၀၅၁၃)ဧက စိုက်ပျိုးနိုင်ခဲ့ကြောင်း စိုက်ပျိုးရေးဦီးစီးဌာနစာရင်းအရ သိရှိရပါသည်။

          မိုးမြေပဲကို ဇွန်လဆန်းပိုင်းတွင် စိုက်ပျိုးကြပြီး ဩဂုတ်လဒုတိယပတ်တွင် မိုးမြေပဲကို  စတင်ရိတ်သိမ်းကြကြောင်း၊ မိုးမြေပဲကို သီးသန့်တန်းချစနစ်ဖြင့်စိုက်ပျိုးကြသဖြင့် တစ်ဧကလျှင် မျိုး(၂၄) ပြည် ကုန်ကျကြောင်း၊ ကုန်ကျစရိတ်အနေဖြင့် မျိုး၊ မြေပြုပြင်ခ၊ သွင်းအားစု၊ လုပ်သားခ အပါအဝင် တစ်ဧကစုစုပေါင်း ငွေကျပ်(၃)သိန်းကျော်ကုန်ကျကြောင်း၊  ယခုနှစ်အထွက်နှုန်းမှာ တစ်ဧကလျှင်(၇၀) တင်းခန့်ထွက်ရှိ၍ အကျိုးအမြတ်ရရှိကြောင်း မြေပဲစိုက်တောင်သူများထံမှ သိရပါသည်။

           ရမည်းသင်းမြို့ပေါ်ရှိသီးနှံပွဲရုံများတွင် နေ့စဉ် မိုးမြေပဲများလှိုင်လှိုင်ဝင်ရောက်လျက်ရှိပြီး အရောင်းအဝယ်ဖြစ်လျက်ရှိကြောင်း၊ ယခုစက်တင်ဘာလပထမပတ်တွင် မိုးမြေပဲအတောင့်တစ်တင်း လျှင် (၂၉၄၀၀)ကျပ်၊ မြေပဲလုံးဆံတစ်ပိဿာလျှင်(၇၅၀၀)ကျပ်၊ ဆီဆံတစ်ပိဿာလျှင်(၇၀၀၀)ကျပ် ဖြင့် အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် ဒေသတွင်းဆီကြိတ်စက်များအပြင် မန္တလေးမြို့သို့ အဓိကတင်ပို့ရောင်းချကြကြောင်း သိရပါသည်။

DOCA(မန္တလေး)

           မန္တလေးတိုင်းဒေသကြီး၊ ရမည်းသင်းခရိုင်၊ ပျော်ဘွယ်မြို့နယ်အတွင်းရှိ ကျေးရွာများတွင်  လယ်ယာစိုက်ပျိုးရေး လုပ်ငန်းများကိုအဓိကလုပ်ကိုင်ကြပြီး သီးနှံမျိုးစုံစိုက်ပျိုးလျက်ရှိရာမှ ဆီထွက်သီးနှံတစ်မျိုးဖြစ်သည့် နေကြာများစိုက်ပျိုးကြကြောင်း၊ ရမည်းသင်းမြို့နယ်တွင် မိုးနေကြာစိုက်ဧက ( ၄၂၀၈) ဧက စိုက်ပျိုးနိုင်ခဲ့ကြောင်း စိုက်ပျိုးရေးဦီးစီးဌာနစာရင်းအရ သိရှိရပါသည်။

          မိုးနေကြာကို ဇွန်၊ ဇူလိုင်လများတွင် စိုက်ပျိုးကြပြီး စက်တင်ဘာ၊ အောက်တိုဘာလ များတွင်ရိတ်သိမ်းကြကြောင်း၊ မိုးနေကြာသီးနှံကိုသီးသန့်စိုက်ပျိုးကြကြောင်း၊ ကုန်ကျစရိတ်အနေဖြင့် မျိုး၊ မြေပြုပြင်ခ၊ သွင်းအားစု၊ လုပ်သားခအပါအဝင် တစ်ဧကစုစုပေါင်း ငွေကျပ်( ၂ )သိန်းကျော် ကုန်ကျကြောင်း၊ မိုးနေကြာမှာ ယခင်နှစ် အထွက်နှုန်းအနေဖြင့်တစ်ဧကလျှင် (၂၄) တင်းခန့်ထွက်ရှိကြောင်း၊ ဈေးကွက်အနေဖြင့် ဒေသတွင်းဆီကြိတ်စက်များသို့ အဓိကတင်ပို့ရောင်းချကြကြောင်း၊ ယခုအချိန်တွင် စိုက်ပျိုးထားသည့်မိုးနေကြာများမှာ အောင်မြင်ဖြစ်ထွန်းလျက်ရှိပြီး၊ မိုးလေဝသနှင့် ရာသီဥတုကောင်းမွန်ပါက အထွက်နှုန်းကောင်းမွန်နိုင်ကြောင်း၊ နေကြာပေါ်ချိန်တွင်လည်း ဈေးနှုန်းကောင်းမွန်ပါက အကျိုးအမြတ်များစွာရရှိနိုင်မည်ဟု မျှော်မှန်ထားကြောင်း နေကြာစိုက်တောင်သူများ ထံမှသိရပါသည်။

DOCA(မန္တလေး)

             မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့နယ်တွင် စပါး၊ ပဲ၊ ပြောင်း၊ နှမ်း စသည့်သီးနှံမျိုစုံ စိုက်ပျိုးသည့်အပြင် ကုန်စိမ်းသီးနှံဖြစ်‌သော ခရမ်းကြွပ်သီးနှံကိုလည်း စိုက်ပျိုးလျက်ရှိပါသည်။ ခရမ်းကြွပ်သီးအပင်ကို ရာသီမရွေးစိုက်ပျိုးနိုင်ကြောင်း သိရှိရပါသည်။ ခရမ်းကြွပ်သီးစိုက်ပျိုးမည်ဆိုပါက မျိုးစေ့ကို ပျိုးထောင်ခြင်းနှင့် တိုက်ရိုက်အစေ့ချစိုက်ပျိုးနည်းဟူ၍ နှစ်မျိုးစိုက်ပျိုးလျက်ရှိပါသည်။ ခရမ်းကြွပ်သီးကို ပျိုးထောင်ပြီး စိုက်ပျိုးမည်ဆိုပါက ပျိုးသက် တစ်လခွဲသားအရွယ်တွင် စတင်စိုက်ပျိုးရကြောင်း၊ စိုက်ပျိုးပြီး (၂)လ (၃)လ အကျော်တွင် အသီးများစတင်ခူးဆွတ်နိုင်ပြီး တစ်ပတ်ခြားတစ်ကြိမ် ခူးဆွတ်ရကြောင်း၊ စတင်ခူးဆွတ်ပြီးမှ တစ်ပတ်နှင့် တစ်ပတ်အထွက်နှုန်းပိုမိုလာကြောင်း၊ သက်တမ်းအနေဖြင့် (၂)လခန့်အထိ ခူးဆွတ်နိုင်ကြောင်း၊ တစ်ဧကကုန်ကျစရိတ်အနေဖြင့် လုပ်သားခ၊ မျိုး၊ သွင်းအားစုအပါအဝင် စုစုပေါင်း ကုန်ကျစရိတ်အနေ ဖြင့် (၉၀၀၀၀၀-၁၀၀၀၀၀၀)ခန့် ကုန်ကျကြောင်း၊ ခရမ်းကြွပ်သီး လက်ကားဈေးအနေဖြင့် တစ်ပိဿာ လျှင် (၂၀၀၀/-)ကျပ်၊ လက်လီဈေးအနေဖြင့် တစ်ပိဿာလျှင် (၂၂၀၀/-)ကျပ်ဖြင့် အရောင်းအဝယ်ဖြစ်နေကြောင်း၊ တစ်ဧကအကျိုးအမြတ်အနေဖြင့် (၁၀၀၀၀၀၀/-) အမြတ်ရရှိကြောင်း၊ ခရမ်းကြွပ်သီးကို ကုန်စိမ်းပွဲစားများမှ စိုက်ခင်းအထိလာရောက်ဝယ်ယူပြီး ကျောက်ဆည်မြို့ရှိ မြို့မဈေး၊ အေးမြကြည်လင်ဈေး၊ စဉ့်ကိုင်မြို့နှင့် မန္တလေးမြို့များသို့ တင်ပို့ရောင်းချကြောင်း သိရှိရပါသည်။

DOCA(မန္တလေး)

         ကျောက်ဆည်ခရိုင် စားသုံးသူရေးရာဦးစီးဌာနမှ ဝန်ထမ်းများသည် အသေးစား၊ အလတ်စား လုပ်ငန်းများဖွံ့ဖြိုးတိုးတက်စေရေးအတွက် ကျောက်ဆည်မြို့နယ်၊ကျောင်းကုန်းကျေးရွာရှိ ထန်းလက်ကုလားထိုင် ပြုလုပ်ရောင်းလျက်ရှိသည့်လုပ်ငန်းအား  ကွင်းဆင်းလေ့လာခဲ့ပါသည်။ ၄င်းလုပ်ငန်းအား  မိသားစုတစ်နိုင် တစ်ပိုင်အပိုဝင်ငွေရရှိရေးပြုလုပ်ရောင်းချလျက်ရှိပါသည်။ ကျောင်းကုန်းကျေးရွာတွင် ထန်းလက်ကုလားထိုင်လုပ်ငန်းကို မိရိုးဖလာအဖြစ် ရှေးယခင်မှစ၍ လုပ်ကိုင်ဆောင်ရွက်လျက်ရှိကြောင်း သိရှိရပါသည်။ ထန်းလက်ကုလားထိုင်ပြုလုပ်ရန်အတွက် ထန်းကြီးလက်ဖျားကို ထန်းပင်မှခုတ်ယူပြီး နေပူခံကာအခြောက်လှမ်းထားရကြောင်း၊ ယင်းသို့နေပူခံကာ အခြောက်လှမ်းထားသော ထန်းလက်ကုလားထိုင်သည် ရေရှည်ခိုင်ခံ့မှု ရှိမည်ဖြစ်ကြောင်း၊ ထန်းလက်ကုလားထိုင်တစ်လုံး ပြုလုပ်မည်ဆိုပါက ထန်းအလက်(၃၀)ကုန်ကျမည်ဖြစ်ပြီး (၁)လက်လျှင်(၁၀၀/-)ကျပ်ဖြင့် ဝယ်ယူရကြောင်း၊ ကုလားထိုင်တစ်လုံးအား ထန်းလက်များဖြင့်သာပြုလုပ်ထားပြီး ကုလားထိုင်ခိုင်ခန့်ရန် အတွက်သံမှိုကိုအသုံးပြု၍ထိန်းထားကြောင်း၊ ကုလားထိုင် တစ်လုံးလျှင် (၁)လက်မသံနှင့်(၅)မတ်သံ (၅)ကျပ်သားကုန်ကျမည်ဖြစ်ပြီး သံမှိုစျေးအနေဖြင့်(၇၀၀/-)ကျပ်ကုန်ကျကြောင်း၊ လူတစ်ဦး(၁)ရက်လျှင် ကုလားထိုင်တစ်လုံးပြီးစီးကြောင်း၊ ကုလားထိုင်တစ်လုံးပြုလုပ်ရာတွင် အပြီးအစီး (၄၅၀၀-၅၀၀၀)ကျပ်ခန့် ကုန်ကျကြောင်း၊ ကျေးရွာအတွင်း ပြန်လည်ရောင်းချပါက တစ်လုံးလျှင်(၁၀၀၀၀/-) ကျပ်အထိရှိပြီး ပြုလုပ်ရောင်းချသူများအနေဖြင့် နေ့စားလုပ်အားခနှင့်ယှဉ်လျှင် တွက်ခြေကိုက်ကြောင်း၊ မပြုလုပ်နိုင်သူများမှ ငွေကြိုတင်‌ပေး၍ ဆိုင်ကယ်ဖြင့် လှည့်လည်ရောင်းချကြကြောင်း၊ ကြိုတင်ပေးယူ၍ ပြန်လည်ရောင်းချသောကြောင့် ကုလားထိုင်တစ်လုံးလျှင်(၁၁၀၀၀/-)ကျပ်ပေးဝယ်၍ ပြန်လည်ရောင်းချကြကြောင်း၊ လူတစ်ဦးလျှင် (၁)ရက် တစ်လုံးခန့် ပြုလုပ်၍ရောင်းချပါက တစ်လအကျိုးအမြတ်အနေဖြင့် (၁၄၀၀၀၀-၁၅၀၀၀၀)ကျပ်အထိရရှိနိုင်ကြောင်း၊ ကျောင်းကုန်းကျေးရွာမှ ထန်းလက်ကုလားထိုင်ပြု လုပ်သူတစ်ဦး၏ပြောကြားချက်အရ သိရှိရပါသည်။

DOCA(မန္တလေး)

          ကျောက်ဆည်ခရိုင်အတွင်းရှိ တောင်သူဦးကြီးများသည် စားဖိုဆောင်သီးနှံများဖြစ်သော ကြက်သွန်ဖြူ၊ ကြက်သွန်နီ၊ ပဲမျိုးစုံနှင့်နှမ်း၊ နေကြာစသည့် ဆီထွက်သီးနှံများအပြင် မိသားစုအပိုဝင်ငွေရရှိရေးအတွက် ကျေးလက်တောရွာများ၌ သဘာဝအလျှောက်ပေါက်ရောက်သည့် စားသုံးပင်ဖြစ်သလို ခြံစည်းရိုးများတွင်စိုက်ပျိုးသည့် ဆူးခြုံပင်တစ်မျိုးဖြစ်သော ကင်ပွန်းချဉ်ပင်ကိုလည်း စိုက်ပျိုးလာကြပါသည်။ ကင်ပွန်းချဉ်ပင်စိုက်ပျိုးရာတွင် အစေ့မှမျိုးယူ၍စိုက်ပျိုးရကြောင်း သိရှိရပါသည်။

        ကင်ပွန်းချဉ်ရွက်သည် အစာအိမ်ရောဂါနှင့် ဝမ်းချုပ်ခြင်းကိုလည်းသက်သာစေကြောင်း၊ ဆံသားပျက်စီးမှုကို သဘာဝအတိုင်းပြန်လည်ကုသပေးနိုင်ခြင်း၊ ကင်ပွန်းချဉ်ရွက်ကို ခေါင်းလျော်ရည်နှင့် ရေချိုးဆပ်ပြာများပြုလုပ်ရာတွင်လည်း အသုံးပြုနိုင်ပါကြောင်း၊ အရေပြားရောဂါများကုသရာတွင်လည်းအသုံးပြုနိုင်ပါကြောင်း ကျန်းမာရေးဗဟုသုတများအရသိရှိရပါသည်။ ကျောက်ဆည်မြို့၊ အေးမြကြည်လင်စျေးတွင် ကင်ပွန်းချဉ်ရွက်(၁၀) ကျပ်သားလျှင်(၁၅၀၀/-)ကျပ်၊ (၁)ပိဿာလျှင်(၁၂၅၀၀/-)ကျပ်စျေးနှုန်းများဖြင့် ရောင်းဝယ်လျက်ရှိကြောင်း သိရှိရပါသည်။ ကင်ပွန်ချဉ်ရွက်ကိုကြော်စားခြင်း၊ ဟင်းချိုချက်၍သောက်သုံးခြင်း၊ အချဉ်ရည်ဟင်းပြုလုပ်၍လည်း ချက်ပြုတ်စားသုံးကြသောကြောင့် မိသားစုအပိုဝင်ငွေရရှိရေးအတွက် စိုက်ပျိုးထားသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)