ဆောင်းရာသီရောက်ပြီဖြစ်၍ ဈေးတက်လာသောကွမ်းရွက်
မြင်းခြံမြို့သည် စိုက်ပျိုးရေးကို အခြေခံသောမြို့တစ်မြို့ဖြစ်ပြီး အပိုဝင်ငွေရရှိရန် သီးနှံမျိုးစုံကိုလည်း စိုက်ပျိုးကြောင်း၊ ကွမ်းရွက်နှင့်ဆေးရွက်ကြီးများလည်း စိုက်ပျိုးကြောင်း သိရပါသည်။ ကွမ်းရွက်သည် အမိုးအကာဖြင့် အထူးဂရုစိုက်ရသောအပင်ဖြစ်ပြီး အသန့် ကြိုက်သောအပင် ဖြစ်ပါသည်။ မြင်းခြံမြို့နယ်တွင် ကွမ်းကို ကျေးရွာများ၌ အများဆုံးစိုက်ပျိုးကြောင်း သိရသည်။ ယခုလို မိုးအကုန်ဆောင်းရာသီဝင်သောအချိန်တွင် ကွမ်းအထွက်နှုန်းနည်းလာပြီဖြစ်သည်။ မြင်းခြံမြို့ရှိ ကွမ်းပွဲရုံများသို့တင်ပို့ရောင်းချကြောင်း၊ အချို့ပွဲစားများသည် ရွာအရောက်လာရောက်ဝယ်ယူကြကြောင်း၊ အချို့မှာ မြို့ပေါ်ရှိ ကွမ်းယာဆိုင်များသို့ တိုက်ရိုက်ဖောက်သည်ပေး ရောင်းချကြောင်း သိရသည်။ မြင်းခြံမြို့ အေးမြသီတာဈေး၊ မြို့မစည်ပင်သာယာဈေးနှင့် စံပြဈေးတို့တွင် နိုဝင်ဘာလ တတိယပတ်တွင် ဖြစ်ပေါ်နေသောဈေးနှုန်းအရ ကွမ်းတစ်ပိဿာလျှင် ၉၀၀၀/- ကျပ်မှ ၉၅၀၀/- ကျပ်အထိ ဈေးအနည်းငယ်မြင့်တက်ကြောင်း သိရသည်။
DOCA(မန္တလေး)
