ပြည်တွင်းကုန်သွယ်မှုသတင်း

      စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကန့်ဘလူမြို့မဈေးတွင် ဆန်၊ ဆီ၊ ဆေး၊ ဆား၊ အသား၊ ငါး၊ ဟင်းသီးဟင်းရွက်နှင့် ရာသီပေါ်အသီးအနှံများ ရောင်းချလျက်ရှိပြီး ဈေးရောင်းသူများ ဈေးဝယ်သူများနှင့် စည်ကားလျက်ရှိကြောင်း၊ မိုးဦးကာလ မေလ၊ ဇွန်လများတွင် အင်ဥ(မှိုစေ့)များ ပေါများစွာတွေ့ရတတ်ပြီး အင်ဥ(မှိုစေ့)မှာမှိုမျိုးနွယ်ဝင် မြေအောင်းမှိုတစ်မျိုးဖြစ်ကြောင်း၊ အင်ဥကို စားသုံးသူများအနေဖြင့် အင်ဥကြော်၊ အင်ဥကင်၊ အင်ဥသုတ်၊ အခြားသောအသီးအရွက်များနှင့်ရော၍ အရသာရှိသော စားသောက်ဖွယ်ရာဖြစ်အောင် အမျိုးမျိုးချက်ပြုတ်စားသုံးကြကြောင်း၊ ၂၀၂၅ ခုနှစ်၊ ဩဂုတ်လ ဒုတိယပတ်အတွင်း ကန့်ဘလူမြို့မဈေးတွင် အင်ဥ(မှိုစေ့)ကို နို့ဆီဘူး(၁)ဘူးလျှင် (၂၅၀၀)ကျပ်၊ လက်လီတစ်ပြည်လျှင် (၂၀၀၀၀)ကျပ်၊ လက်က္ကားတစ်ပြည်လျှင် (၁၉၀၀၀)ကျပ် တို့ဖြင့် အရောင်းအဝယ်ဖြစ်လျက်ရှိကြောင်း၊ အင်ဥ(မှိုစေ့)များ အဝင်နည်းလာ၍ အရောင်းသွက် လျက်ရှိကြောင်း အင်ဥ(မှိုစေ့)ရောင်းချသူများထံမှ သိရှိရပါသည်။

DOCA (စစ်ကိုင်း)      

  မျှစ်ခြောက်သည် အချိန်ကြာကြာအထားခံ၍ ဆိုးဆေးများမပါဝင်ဘဲ သဘာဝအတိုင်း ပြုပြင် ထားသည့် အစားအစာတစ်မျိုးဖြစ်ပါသည်။ မျှစ်ခြောက်ကို ရှမ်းပြည်နယ်၊ ကယားပြည်နယ်နှင့် ကရင်ပြည်နယ်တို့တွင် ပေါက်ရောက်သည့် မျှစ်ပင် (Bamboo Shoot) များမှပြုလုပ်ထားခြင်း ဖြစ်ပါ သည်။ ကရင်ပြည်နယ်၊ သံတောင်ကြီးဒေသမှ မျှစ်ခြောက်များစွာထွက်ရှိပြီး သံတောင်ကြီးနှင့် ပတ်ဝန်းကျင်အနီးတစ်ဝိုက်တွင် သဘာဝအလျောက် ပေါက်ရောက်သောမျှစ်ပင်များကို အခြောက်ခံ၍ ပြုလုပ်ထားပြီး ဒေသခံများမှ ရောင်းချလျက်ရှိပါသည်။

  သံတောင်ကြီးဒေသထွက်မျှစ်ခြောက်သည် အခြားပြည်နယ်မှ မျှစ်ခြောက်များထက် ပိုမိုနူးညံ့ပြီး အနံ့ အရသာပိုမိုကောင်းမွန်ပါသည်။ ဒေသခံများသည် မိုးရာသီတွင် သဘာဝအတိုင်းပေါက်ရောက်သော တောမျှစ်များ၊ ကျေးရွာများတွင် စိုက်ပျိုးထားသော ဝါးပင်များမှရရှိသည့် ဝါးမျှစ်များကို ကောက်ယူကာ အခွံနွှာခြင်း၊ မျှစ်‌များကို အချောင်းလိုက်လှီးကာ ဆားရည်စိမ်ပြီး ရေနွေးဖြင့်အချိန်ကြာကြာပြုတ်ခြင်းဖြင့် မျှစ်များတွင် ပါဝင်သော အဆိပ်ဓာတ်များကို ဖယ်ရှားကြပါသည်။ ပြုတ်ပြီးသောမျှစ်များကို နေပူပူတွင် ၃-၄ ရက်ကြာလှန်း၍ အခြောက်ခံကာ လေလုံပလတ်စတစ်အိတ်များဖြင့် စနစ်တကျထုပ်ပိုးကာ သိမ်းဆည်း၍ စီးပွားဖြစ်ရောင်းချကြပါ သည်။

   မျှစ်ခြောက်များကို စားသုံးမည်ဆိုပါက ရေအေးဖြင့်အချိန်ကြာကြာစိမ်ပြီး ရေနွေးဆူဆူတွင် မျှစ်ခြောက်များ ပျော့ပြောင်းလာသည်အထိပြုတ်ကာ ချက်စားခြင်း၊ ကြော်စားခြင်း၊ သုတ်စားခြင်း၊ ဟင်းချိုချက်သောက်ခြင်းများ ပြုလုပ်နိုင်ပါသည်။ ယခုမိုးရာသီကာလတွင် မျှစ်ခြောက်များ အရောင်း သွက်လျက်ရှိရာ မျှစ်ခြောက် ၂၅ ကျပ်သား တစ်ထုပ်လျှင် ၈၀၀၀ ကျပ်၊ ၁ ပိဿာလျှင် ၃၀၀၀၀ ကျပ်ဖြင့် သံတောင်ကြီးဒေသထွက်မျှစ်ခြောက်များကို တောင်ငူမြို့ပေါ်ရှိဈေးများနှင့် တောင်ငူဒေသ ထွက် အရောင်းဆိုင်များတွင် ဝယ်ယူရရှိနိုင်သည့်အပြင် အမြို့မြို့အနယ်နယ်သို့လည်း တင်ပို့ရောင်းချ လျက်ရှိကြောင်း သိရသည်။

DOCA(ပဲခူး)

  ငါးမုတ်နှင့်ငါးကြင်းသည် မြန်မာနိုင်ငံ၏‌ရေချိုဒေသများမှ အဓိကထွက်ရှိပြီး ရန်ကုန်တိုင်း၊ စစ်ကိုင်းတိုင်း၊ မန္တလေးတိုင်း၊ တနင်္သာရီတိုင်း၊ ဧရာဝတီတိုင်းနှင့် မွန်ပြည်နယ်တို့မှ အများဆုံး ထွက်ရှိပါသည်။ ငါးမုတ်သည် ရေငန် ရေချိုနှစ်ခုလုံးတွင် ပေါက်ဖွားပြီး ငါးကြင်းသည် ရေချိုတွင်သာ ပေါက်ဖွားပါသည်။ ငါးမုတ်သည် အသားပျော့ အဆီဓာတ်များသောကြောင့် ကင်ခြင်း၊ ပေါင်းခြင်း၊ ငါးခြောက်၊ ငါးပိ၊ ငါးဖယ်ချဉ်စသည်ဖြင့် ပြုလုပ်စားသုံးကြပြီး ငါးကြင်းသည် အသားမာပြီး ချိုသော အရသာရှိသောကြောင့် ကြော်ချက်ခြင်း၊ ပြုတ်ခြင်း၊ မုန့်ဟင်းခါးချက်စားခြင်းဖြင့် အမျိုးမျိုး စားသုံးကြ ပါသည်။

  တောင်ငူမြို့နယ်၊ ညောင်ပင်လေးဈေးထဲတွင် ယခုဩဂုတ်လ (ဒုတိယပတ်)၌ ငါးမုတ် နှင့်ငါးကြင်း ဈေးနှုန်းများ မြင့်တက်လျက်ရှိရာ ယခင်ဇူလိုင်လထက် အနည်းငယ်မြင့် တက်သွားခဲ့ ပါသည်။ ဇူလိုင်လက ငါးမုတ် အကောင်ကြီးတစ်ပိဿာလျှင် ၉၅၀၀ ကျပ်၊ ယခုဩဂုတ်လ (ဒုတိယပတ်)တွင် ၁၀၅၀၀ ကျပ်ထိ အနည်းငယ် မြင့်တက်သွားပြီး၊ ငါးကြင်း ၁ပိဿာလျှင် ယခင်ဇူလိုင်လက ၁၂၀၀၀ ကျပ်၊ ယခုဩဂုတ်လ (ဒုတိယပတ်)တွင် ၁၃၀၀၀ ကျပ်ထိ ဈေးနှုန်းအနည်းငယ်မြင့်တက်သွားကြောင်း သိရသည်။

DOCA(ပဲခူး)

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ပန်းဈေးကွက်၌ နှင်းဆီပန်း၊ နှင်းပန်း၊ ဂန္ဓမာပန်း၊ သပြေပန်း၊ အာစီယံသပြေ၊ စံပါယ်ပန်း၊ ဇွန်ပန်း၊ ပန်းထိမ်ငိုပန်းစသည့် ပန်းမျိုးစုံရောင်းချ လျက်ရှိကြောင်း၊ ဒေသခံပြည်သူများကလည်း ဘုရားပန်းကပ်လှူရန်၊ ပန်းအလှဆင်ရန်နှင့် အလှပန်ဆင် ရန် နေ့စဉ်ဝယ်ယူအသုံးပြုလျက်ရှိကြောင်း သိရသည်။

    ကန့်ဘလူမြို့ပန်းဈေးကွက်၌ ၂၀၂၅ ခုနှစ်၊ ဩဂုတ်လ ဒုတိယပတ်အတွင်း ဖြစ်ပေါ်နေသော ပန်းဈေးနှုန်းများအနေဖြင့် နှင်းပန်းတစ်စီးလျှင်(၇၀၀)ကျပ်နှင့် (၃)စီးလျှင်(၂၀၀၀)ကျပ်ဖြင့်လည်းကောင်း ၊ပန်းထိမ်ငိုပန်း(၁)စီးလျှင် (၇၀၀)ကျပ်၊ (၃)စီးလျှင်(၂၀၀၀)၊ (၁၀)စီးလျှင် (၆၇၀၀)ကျပ်တို့ဖြင့် အရောင်း အဝယ်ဖြစ်လျက်ရှိကြောင်း၊ ပန်းထိမ်ငိုပန်းသည် တာရှည်အထားခံသည့်အပြင် လှပသည့်အသွင်သဏ္ဍာန် ကြောင့် လူကြိုက်များကာ အရောင်းသွက်လျှက်ရှိကြောင်း ပန်းရောင်းချသူများထံမှ သိရှိရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး ကန့်ဘလူခရိုင် ကန့်ဘလူမြို့သစ်သီးဈေးကွက်သို့ မြစ်ကြီးနားဒေသ ထွက်နာနတ်သီးများနှင့် မန္တလေးသစ်သီးဈေးကွက်မှ နာနတ်သီးများ ဝင်ရောက်လျက်ရှိကြောင်း ယခုပတ်အတွင်း နာနတ်သီးဝင်ရောက်မှု များသောကြောင့် ဈေးအနည်းငယ်ကျသွားကြောင်း သစ်သီး ရောင်းဝယ်ရေး လုပ်ငန်းရှင်များထံမှ သိရသည်။ ကန့်ဘလူသစ်သီးဈေးကွက်တွင် ၂၀၂၅ ခုနှစ်၊ ဩဂုတ်လ ဒုတိယပတ်အတွင်း မန္တလေးနာနတ် သီး(၁)လုံးလျှင် (၃၀၀၀မှ ၄၀၀၀)ကျပ်၊ ဩဂုတ်လ ဒုတိယပတ်အတွင်း မြစ်ကြီးနားသီး(၁)လုံးလျှင် (၄၅၀၀မှ ၅၀၀၀)ကျပ်တို့ဖြင့် ရောင်းချလျက်ရှိ ကြောင်း၊ နာနတ်သီးသည် ရာသီပေါ်အသီးတစ်မျိုး ဖြစ်သည့်အတွက် ဝယ်ယူစားသုံးသူများပြား၍ နာနတ်သီးများ အရောင်းသွက်လျက်ရှိကြောင်း သိရပါသည်။

DOCA(စစ်ကိုင်း)