ပြည်တွင်းကုန်သွယ်မှုသတင်း

      တောင်ငူမြို့ဈေးများတွင် အသားနှင့် ငါးမျိုးစုံ ရောင်းချလျက်ရှိရာ ယခုအခါ မိုးရာသီ ဖြစ်သည့်အတွက် ငါးရံ့၊ ငါးခူ၊ ငါးပြေမ၊ ငါးဇင်ရိုင်း၊ ငါးဖယ်အောင်း စသည့်ငါးမျိုးစုံများ ပေါများစွာ တွေ့ရသည်။ ထိုငါးလေးများကို တောင်ငူမြို့အနီးတဝိုက်ရှိ ကျေးရွာများမှ တောင်ငူမြို့ ဈေးများသို့ လာရောက် ရောင်းချကြပါသည်။

      ငါးများကို ကြော်စားခြင်း၊ ချက်စားခြင်း၊ ကင်စားခြင်း၊ ပြုတ်စားခြင်းဖြင့် အမျိုးမျိုး စားသုံးကြသည်။ ထို့ပြင် ဆားများများဖြင့် နယ်ပြီး၂ ရက်မှ ၃ရက်အထိ သိပ့်၍လည်း ငါးဆားနယ်(ခေါ်) ငါးပိကောင်အဖြစ်လည်း စားသုံးကြသေးသည်။

      ငါးဈေးနှုန်းများအနေဖြင့် ငါးရံ့၊ငါးခူ၊ ငါးဖယ်အောင်း အကောင်ကြီး ၁၀ ကျပ်သားလျှင် ၂၅၀၀ ကျပ်၊အကောင်သေး ၁၀ ကျပ်သားလျှင် ၂၀၀၀ ကျပ်၊ ငါးပြေမ အကောင်ကြီး ၁၀ ကျပ်သားလျှင် ၁၈၀၀ ကျပ်၊ အကောင်သေး ၁၀ ကျပ်သားလျှင် ၁၃၀၀ ကျပ်၊ ငါးဇင်ရိုင်း အကောင်ကြီး ၁၀ ကျပ်သားလျှင် ၁၂၀၀ကျပ်၊အကောင်သေး (၁၀)ကျပ်သားလျှင် (၈၀၀)ကျပ်ဖြင့် အသီးသီး ရောင်းချကြပြီး ပိဿာလိုက် ဝယ်ယူပါက ဈေးနှုန်းအနည်းငယ်လျော့ကြောင်း ငါးရောင်းချသည့် ဈေးသည်များထံမှ သိရှိရပါသည်။

DOCA(ပဲခူး)

   ဒိုက်ဦးမြို့နယ်သည် ပဲခူးတိုင်းဒေသကြီး အရှေ့ခြမ်း၊ ညောင်လေးပင်ခရိုင်အတွင်းတွင် တည်ရှိ ပြီး မြေဧရိယာအားဖြင့် ကျယ်ဝန်းသော မြို့နယ်တစ်ခု ဖြစ်ပါသည်။ ဒိုက်ဦးမြို့နယ်သည် အရှေ့ဘက် တွင် ညောင်လေးပင်မြို့နယ်၊ တောင်ဘက်တွင် ပဲခူးမြို့နယ်နှင့် ဝေါမြို့နယ်၊ အနောက်ဘက်တွင် ပဲခူး ရိုးမ၊ မြောက်ဘက်တွင် ညောင်လေးပင်မြို့နယ်၊ ကျောက်တံခါးမြို့နယ်တို့နှင့် နယ်နိမိတ်ချင်း ထိစပ် လျက်ရှိပါသည်။ ဒိုက်ဦးမြို့နယ်၏ မြေမျက်နှာသွင်ပြင်မှာ အနောက်ဘက်ခြမ်းတွင် ပဲခူးရိုးမရှိပြီး အနောက်ဘက်မှ အရှေ့ဘက်သို့ တဖြေးဖြေးနိမ့်ဆင်းသွားသည့် မြေနိမ့်လွင်ပြင် ဖြစ်ပါသည်။

          စီးပွားရေးမှာ စိုက်ပျိုးရေးနှင့် မွေးမြူရေးကို အဓိကထားလုပ်ကိုင်ကြပြီး လမ်းပန်းဆက်သွယ် ရေးကောင်းမွန်ကာ အေးချမ်းသာယာသော မြို့နယ်တစ်ခုဖြစ်ပါသည်။ အခြားစီးပွားရေးလုပ်ငန်းများ ကိုလည်း လုပ်ကိုင်ကြပြီး အစိုးရရုံးများ၊ ဌာနဆိုင်ရာရုံးများလည်း တည်ရှိပါသည်။ ဒိုက်ဦးမြို့နယ်တွင် စပါးကို အဓိကထားစိုက်ပျိုးကြသောကြောင့် ဆန်စက်ကြီးများကို လက်ညိုးထိုးမလွဲ တွေ့ရှိနိုင်ပြီး ဆီစက်ကြီးများလည်း တည်ရှိပါသည်။ ဒိုက်ဦးမြို့နယ်အတွင်းတွင် နိုင်ငံတော်အစိုးရမှ ဦးဆောင် လုပ်ကိုင်နေသော ဆင်းရဲမှုပပျောက်ရေးစီမံကိန်းများ၊ စပါးစမ်းသပ်စိုက်ခင်းများ၊ သုတေသန စိုက်ခြံများ၊ တောင်ကိုရီးယားကဲ့သို့သော နိုင်ငံခြားအစိုးရများနှင့် ပူးပေါင်းလုပ်ကိုင်နေသော စီမံကိန်း များ စသည်တို့တည်ရှိနေပါသည်။ ပဲခူးမြို့တော်နှင့် နီးကပ်နေသော မြို့နယ်တစ်ခုဖြစ်ပြီး ရန်ကုန် - မန္တလေးကားလမ်းမကြီးဘေးတွင် တည်ရှိနေသောကြောင့် စီးပွားရေးတိုးတက်ကောင်းမွန်သော မြို့တစ်ခုလည်းဖြစ်ပါသည်။ ပဲခူးမြို့တော်နှင့် နီးကပ်နေခြင်း၊ ရန်ကုန် - မန္တလေးကားလမ်းမကြီးဘေး တွင် တည်ရှိနေခြင်းတို့ကြောင့် MSMEs စီးပွားရေးလုပ်ငန်းများသည်လည်း အရှိန်အဟုန်ဖြင့် တိုးတက်လာနေသော မြို့နယ်တစ်ခုဖြစ်ပါသည်။

          ဒိုက်ဦးမြို့နယ်တွင် MSMEs စီးပွားရေးလုပ်ငန်းများစွာ ရှိသည့်အနက်မှ MSMEs လုပ်ငန်း တစ်ခုဖြစ်သည့် နိုင်ငံကျော် “ ဂြိုလ်တု ” ကွာစိအကြောင်းကို တင်ပြပါမည်။  “ ဂြိုလ်တု ” ကွာစိသည် ဒိုက်ဦးမြို့နယ်အတွင်းမှ ဖြန့်ချိသော ထုတ်ကုန်တစ်မျိုးဖြစ်ပြီး လူကြိုက်များလှပါသည်။ “ ဂြိုလ်တု ” ကွာစိတွင် ကုန်ကြမ်းအဖြစ် ဖရဲသီးစေ့ကို အဓိကထားအသုံးပြုပြီး အဆိုပါကုန်ကြမ်းကို ဘုရားကြီး မြို့၊ ဖအောင်ဝဲမြို့၊ ပြွန်တန်ဆာမြို့တို့မှ ဝယ်ယူကြောင်း သိရှိရပါသည်။ ဖရဲသီးစေ့တစ်တင်းကို ၁၅၀၀၀၀ ကျပ်ဖြင့် ဝယ်ယူရပြီး နေရာဒေသအလိုက် သယ်ယူခဈေးနှုန်းများ ကွာခြားကြောင်း သိရှိရ ပါသည်။ ပါဝင်ပစ္စည်းများအနေဖြင့် ဖရဲသီးစေ့၊ မဆလာ၊ ဆား၊ ဆီတို့ကို အသုံးပြုပြီး လူမျိုးမရွေး၊ ဘာသာမရွေး စားသုံးနိုင်ကြောင်း သိရှိရသည်။

          ထုတ်လုပ်ပုံအနေဖြင့် ပထမဦးစွာ ဖရဲသီးစေ့များကို တစ်ညသိပ် ရေစိမ်ထားရပါသည်။ ပြီး နောက် ဖရဲသီးစေ့များကို သုံးနာရီခန့်ပြုတ်ထားရပါသည်။ ထို့နောက် ရေပြုတ်ထားပြီးသော ဖရဲသီး စေ့များကို (၃) ရက်ခန့် နေလှန်းအခြောက်ခံထားရပါသည်။ ထို့နောက် ဖရဲသီးစေ့များကို အစေ့ အောင်/ မအောင် ရွေးချယ်ရပါသည်။ ထို့မှတစ်ဖန် ဖရဲသီးစေ့များကို လှော်ရပြီး ရောင်းတန်းဝင်သည့် အစေ့များကို ရွေးထုတ်ရပါသည်။ ထို့နောက် လှပသော ပါကင်အဖုံးများဖြင့် သပ်ရပ်စွာ ထုတ်ပိုးပြင် ဆင်ရပြီး ဈေးကွက်ထဲသို့ပို့ဆောင်ရကြောင်း သိရှိရပါသည်။ ရောင်းဈေးအနေဖြင့် အထုပ်အရွယ် အစားအလိုက် ၁၀၀၀ကျပ်/ ၂၀၀၀ကျပ်/ ၅၀၀၀၀ ကျပ်/ ၁၀၀၀၀ ကျပ်/ ၂၀၀၀၀ ကျပ်ဟူ၍ ဈေးနှုန်း အမျိုးမျိုးကွဲပြားပြီး ဈေးကွက်အနေဖြင့် ဒိုက်ဦးမြို့နယ်၊ ပြွန်တန်ဆာမြို့နယ်၊ ညောင်လေးပင်မြို့နယ်၊ ပဲခူးနှင့် မြန်မာတစ်နိုင်ငံလုံးကို ဖြန့်ချိရောင်းချကြောင်း သတင်းရရှိပါသည်။

DOCA(ပဲခူး)

     ဇူလိုင်လ (စတ္ထုထ)ပတ်တွင် စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့  ဆန်စီးထွက်မှုမှာ ရန်ကုန်သို့ အိတ်ရေ 53023၊ မန္တလေးသို့ အိတ်ရေ ၄၃၁၅၁၊ နေပြည်တော်သို့ အိတ်ရေ ၈၈၀၊ပဲခူးသို့ အိတ်ရေ ၄၈၃၅၊ ပြည်သို့ အိတ်ရေ ၈၀၀၊ တောင်ငူသို့ ၁၃၂၅ အိတ်ရေ ၊ ကျောက်ပန်းတောင်းသို့ အိတ်ရေ ၅၇၀၊ မိတ္ထီလာသို့အိတ်ရေ  ၁၉၀၈၊  ဘားအံသို့ အိတ်ရေ ၇၄၀၊ ရှမ်း(တ) သို့ အိတ်‌ရေ ၁၅၄၆၃၊ ကချင်သို့ အိတ်‌ရေ ၂၁၅၀၊ မွန်သို့ အိတ်ရေ ၄၄၈၅၊မူဆယ်သို့ အိတ်ရေ ၃၆၀၊ ဧရာဝတီသို့ အိတ်ရေ ၅၆၀၊ မကွေးသို့ အိတ်ရေ ၁၃၃၅၊ စုစုပေါင်း အိတ်ရေ ( ၁၂၉၈၅၅) အိတ်၊ တန်အားဖြင့် (၆၄၉၃) စီးထွက်ခဲ့ပြီး၊ ဩဂုတ်လ (ပထမ)ပတ်တွင် စစ်ကိုင်းတိုင်းဒေသကြီးမှ အခြားတိုင်း ဒေသကြီးများသို့  ဆန်စီးထွက်မှုမှာ ရန်ကုန်သို့ အိတ်ရေ ၅3684၊ မန္တလေးသို့ အိတ်ရေ ၄၅၂၃၄၊ နေပြည်တော်သို့ အိတ်ရေ ၁၈၄၈၊ပဲခူးသို့ အိတ်ရေ ၃၇၂၅၊ ပြည်သို့ အိတ်ရေ ၂၂၀၊ တောင်ငူသို့ အိတ်ရေ ၃၇၀၊ ကျောက်ပန်းတောင်းသို့ အိတ်ရေ ၅၆၀၊ မိတ္ထီလာသို့အိတ်ရေ  ၁၁၀၀၊  ဘားအံသို့ အိတ်ရေ ၃၇၄၅၊ ရှမ်း(တ) သို့ အိတ်‌ရေ ၁၆၅၀၇၊ မြိတ်သို့ အိတ်ရေ ၁၀၀၊ကချင်သို့ အိတ်‌ရေ ၁၃၅၀၊ မွန်သို့ အိတ်ရေ ၈၁၆၀၊မူဆယ်သို့ အိတ်ရေ ၆၀၅၊ ဧရာဝတီသို့ အိတ်ရေ ၁၂၅ မကွေးသို့ အိတ်ရေ ၁၂၈၀၊ကရင်သို့ အိတ်ရေ ၁၅၀၊ စုစုပေါင်းအိတ်ရေ ( ၈၉၀၈) အိတ်၊ တန်အားဖြင့် (၆၉၃၈) စီးထွက် ခဲ့သည့်အတွက်  ယခင်ပတ်နှင့် နှိုင်းယှဉ်လျှင် ယခုပတ်တွင် အိတ်ရေ (၂၉၅၇၃) အိတ်၊ တန်အားဖြင့် (၄၄၅)တန် ပိုမိုစီးထွက်ခဲ့ပါကြောင်း သိရှိရပါသည်။ 

DOCA (စစ်ကိုင်း)

     စစ်ကိုင်းတိုင်းဒေသကြီး၊ မုံရွာခရိုင်၊ မုံရွာမြို့တွင် ဩဂုတ်လ ဒုတိယပတ်အတွင်း ဖြစ်ပေါ် နေသော အသားနှင့် ငါး ဈေးနှုန်းများမှာ ကြက်သား(CP) တစ်ပိဿာ (၁၇၀၀၀/-)ကျပ်၊ ကြက် (ဗမာ) တစ်ပိဿာ (၃၀၀၀၀/-)ကျပ်၊ ဝက်သား တစ်ပိဿာ (၃၄၀၀၀/-)ကျပ်၊ အမဲသား တစ် ပိဿာ (၄၀၀၀၀/-)ကျပ်၊ ငါးကြင်း (ဖြူ) အကောင်လိုက်ဈေး တစ်ပိဿာ (၁၅၀၀၀/-)ကျပ်၊ ငါးကြင်း (နီ) အကောင်လိုက်ဈေး တစ်ပိဿာ (၁၃၀၀၀/-)ကျပ်၊ ငါးခူ အကောင်လိုက်ဈေး တစ်ပိဿာ (၁၄၀၀၀/-)ကျပ်၊ ငါးတန် တစ်ပိဿာ (၁၀၀၀၀/-) ကျပ်၊ တီလားဗီယား တစ်ပိဿာ (၁၈၀၀၀/-)ကျပ်၊ ဖြင့် အရောင်းဝယ်ဖြစ်နေကြောင်း သိရှိရပါသည်။

       ယခင်အပတ်ဈေးနှုန်းများနှင့် နှိုင်းယှဉ်ကြည့်လျှင် ကြက်သား(CP)တစ်ပိဿာ (၁၀၀၀/-) ကျပ် ဈေးနှုန်းတက်ပြီး၊ ငါးကြင်း(ဖြူ) အကောင်လိုက်ဈေး တစ်ပိဿာ (၅၀၀၀/-)ကျပ်၊ ငါးတန်တစ်ပိဿာ အကောင်လိုက်ဈေး (၁၀၀၀/-)ကျပ်၊ စီဖြင့် ဈေးနှုန်းကျသွားပြီး ကျန်အသား၊ ငါးဈေးနှုန်းများမှာ တည်ငြိမ်လျက်ရှိကြောင်း ပြည်ထောင်စုဈေးအတွင်းရှိ ဈေးသည်များထံမှ သိရှိရသည်။

DOCA(စစ်ကိုင်း)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ရွှေဘိုခရိုင် ဦးစီး မှူးရုံးအနေဖြင့် ရွှေဘိုမြို့ရှိ ပဲပွဲစားများကထိန်တော်အသင်း ပဲ၊နှမ်းကုန်စည်ဒိုင်၏ သီးနှံ အမျိုး အစားအလိုက် အရောင်းအဝယ်ဖြစ်မှုနှင့်ဈေးနှုန်းဈေးကွက် အခြေအနေများအား ကုန်စည်ဒိုင်ရှိ တာဝန်ရှိသူများဖြင့် ဆက်သွယ်မေးမြန်း၍  အပတ်စဉ်၊ လစဉ် တင်ပြလျက်ရှိပါသည်။

  ပဲ၊နှမ်းကုန်စည်ဒိုင်အနေဖြင့် ၂၀၂၅ခုနှစ် ဩဂုတ်လ ပထမပတ်တွင် ပဲတီစိမ်း တစ်တင်းလျှင် (၁၀၀၀၀၀)ကျပ် ပေါက်ဈေးဖြင့်  (၁၃၅၀)တင်း ၊တန်အားဖြင့် (၄၄)တန် ၊ ပဲစဉ်းငုံနီ တစ်တင်းလျှင် (၈၃၀၀၀)ကျပ် ပေါက်ဈေးဖြင့် (၂၂၅၀)တင်း၊တန်အားဖြင့် (၇၃)တန်၊ နှမ်းနက် တစ်တင်းလျှင်(၂၅၀၀၀၀)ကျပ် ပေါက်ဈေးဖြင့် (၄၅၀)တင်း တန်အားဖြင့် (၁၁)တန် အရောင်းအဝယ် ဖြစ်ခဲ့ကြောင်း ယခင်ပတ်နှင့်နှိုင်းယှဉ်ပါက ပဲ၊နှမ်းဈေးနှုန်းများ တည်ငြိမ်လျက်ရှိကြောင်း  ပဲပွဲစားများ ကထိန်တော်အသင်း ပဲနှမ်းကုန်စည်ဒိုင်ရှိ တာဝန်ရှိသူ တစ်ဦးထံမှ သတင်း ရရှိသည်။

DOCA(စစ်ကိုင်း)