ပြည်တွင်းကုန်သွယ်မှုသတင်း

        နှမ်းယိုသည် မြန်မာလူမျိုးတို့၏ ရိုးရာအစားအစာတစ်ခုဖြစ်ပြီး အာဟာရပြည့်ဝကာ လူကြီးလူငယ်မရွေး ကြိုက်နှစ်သက်သော အစားအစာတစ်ခုဖြစ်ကြောင်း၊ မြင်းခြံဈေးကွက်၌ ရောင်းချ နေသော နှမ်းယိုများကို မကွေးမြို့တို့မှ မှာယူ‌ရောင်းချကြောင်း၊ ၂၀၂၅ခုနှစ်၊ နိုဝင်ဘာလ၌ အေးမြသီတာဈေးတွင် ရောင်းချနေသော နှမ်းယိုဝိုင်း ၂၅ ကျပ်သားလျှင် (၅၈၀၀) ကျပ်ခန့်ပေါက်  ဈေးများဖြင့် ရောင်းချလျက်ရှိကြောင်း၊ နှမ်းယိုကို စားသုံးခြင်းဖြင့် ခန္ဓာကိုယ်ကြီး ထွားဖွံ့ဖြိုးရန် အထောက်အကူပြုကြောင်း၊ အရိုးနှင့်သွားများကိုသန်မာစေပြီး ကယ်လ်ဆီယမ် ဓာတ်များ ကြွယ်ဝ ကြောင်း၊ သံဓာတ်ပါဝင်သောကြောင့် သွေးအားနည်းရောဂါကို ကာကွယ်ပေးကြောင်း၊ အမျှင်ဓာတ် ကြွယ်ဝသောကြောင့် အစာခြေစနစ်ကို အားကောင်းစေကြောင်း၊ ပြည့်ဝဆီများ ပါဝင်သောကြောင့် နှလုံးကျန်းမာရေးအတွက် အကျိုးပြုကြောင်း၊ မြန်မာလူမျိုးများ ကြိုက်နှစ်သက်သော နှမ်းယိုသည် ဈေးနှုန်းချိုသာပြီး အာဟာရပြည့်ဝသော ရိုးရာအစားအစာ တစ်ခုဖြစ်သောကြောင့် မြင်းခြံဈေးကွက်တွင် အရောင်းအဝယ် သွက်လျက်ရှိကြောင်း သိရှိရသည်။

DOCA(မန္တလေး)

    ညောင်ဦးခရိုင်သည် ခရီးသွားလုပ်ငန်းများ၊ Hotel လုပ်ငန်းများအပြင် မွေးမြူရေးလုပ်ငန်းများကို လည်း လုပ်ကိုင်လျက်ရှိပြီး ဒေသထွက်စီးပွားရေးလုပ်ငန်းများမှ အသားစားကြက်၊ ဥစားကြက် များကိုလည်း တစ်နိုင်တစ်ပိုင်လုပ်ကိုင်ကြသလို၊ စီးပွားဖြစ်လည်း မွေးမြူကြလျက်ရှိပါသည်။ ကြက်ဥသည် မုန့်လုပ်ငန်းများအပြင်၊ စားသောက်ကုန်များတွင် အရေးကြီးသော အစိတ်အပိုင်းအဖြစ်ပါဝင်ပြီး ဒေသတွင်း မွေးမြူရေးများမှ ရရှိသောကြက်ဥဖြင့် မလုံလောက်သဖြင့် ပြင်ဦးလွင်၊ မန္တလေးမြို့များမှ တင်သွင်းလျက်ရှိကြောင်း သိရှိရသည်။

          ညောင်ဦးမြို့ရှိ ဘုန်းဇဉ်ဈေးအတွင်း နိုဝင်ဘာလဒုတိယပတ်တွင် ဖြစ်ပေါ်နေသောကြက်ဥ အရောင်းဈေးနှုန်းများမှာ အကြီးတစ်လုံးလျှင်(၅၀၀)ကျပ်၊ အလတ်တစ်လုံးလျှင်(၄၅၀)ကျပ်၊ အသေး တစ်လုံးလျှင်(၄၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(မန္တလေး)

            မန္တလေးတိုင်းဒေသကြီး၊ ညောင်ဦးမြို့နယ်တွင် ယခုနှစ် ဆောင်းသီးနှံအဖြစ်စိုက်ပျိုးထားရှိသည့် နှမ်းစိုက်ခင်းများ ဖြစ်ထွန်းမှုအားနည်းလျက်ရှိကြောင်း၊ ညောင်ဦးမြို့နယ်၊ မင်းနန်းသူကျေးရွာမှ ဆောင်းသီးနှံစိုက်ပျိုးသည့် ဒေသခံများထံမှသိရသည်။

          ဆောင်းသီးနှံကို နှစ်စဉ် တော်သလင်းလဆန်း ဒုတိယပတ်တွင်စိုက်ပျိုးကြပြီး၊ တန်ဆောင်မုန်း လကုန်တွင် ရိတ်သိမ်းကြကြောင်း၊ ယခုနှစ်တွင် မိုးရွာသွန်းမှု နောက်ကျသဖြင့် သီးတင်းကျွတ်လဆန်း ပိုင်းမှ စိုက်ပျိုးရသောကြောင့် ဆောင်းနှမ်းများအပင်ငယ်ငယ်နှင့် အပွင့်များပွင့်၍ အသီးများ သီးနေခြင်းများကြောင့် ယခုနှစ်နှမ်းအထွက်နှုန်းလျော့ကျနိုင်ကြောင်း နှမ်းစိုက်တောင်သူများထံမှသိရသည်။၂၀၂၅ ခုနှစ်၊ နိုဝင်ဘာလ တတိယပတ်တွင် ဖြစ်ပေါ်နေသော နှမ်းဈေးနှုန်းများမှာ နှမ်းညိုတစ်တင်းလျှင်(၉၀၀၀၀)ကျပ်၊ နှမ်းနက်တစ်တင်းလျှင်(၂၅၀၀၀၀)ကျပ်၊ နှမ်းဖြူတစ်တင်းလျှင် (၁၀၀၀၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်း မြို့ပေါ်ရှိ ပွဲရုံများထံမှ သိရသည်။

  DOCA(မန္တလေး)

     ချင်းကို မြန်မာနိုင်ငံအနှံ့အပြားတွင်စိုက်ပျိုးကြရာ တောင်ပေါ်‌ဒေသများတွင်အများဆုံး စိုက်ပျိုးကြပါသည်။ ချင်း(ဂျင်း)ကို ဟင်းခတ်အမွှေးအကြိုင်၊ တိုင်းရင်းဆေးများဖော်စပ်ရာတွင် အသုံးပြုကြပါသည်။ ချင်းကို မိတ္ထီလာခရိုင်၊ သာစည်မြို့နယ်ရှိ တောင်ပေါ်ဒေသများတွင် အနည်းငယ်စိုက်ပျိုးကြ ကြောင်း၊ ၂၀၂၅-၂၀၂၆ ခုနှစ်တွင် သာစည်မြို့နယ်ချင်းစိုက်ဧက (၂၆၃)ဧကစိုက်ပျိုးထားရှိကြောင်း ကြေးတိုင်နှင့် မြေစာရင်းဦီးစီးဌာနစာရင်းအရ သိရပါသည်။

         ချင်းကို မေလနှင့်ဇွန်လများတွင်စိုက်ပျိုးကြကြောင်း၊ ဒေသတွင်းမှာ အနည်းငယ်သာထွက်ရှိသဖြင့် ဈေးကွက်တွင် ရှမ်းပြည်နယ် အောင်ပန်း၊ ဟဲဟိုး၊ နာမ့်ဆန်မှအဝင်များကြောင်း၊ မိတ္ထီလာဈေးကွက်အတွင်းသို့ တစ်လလျှင်ကုန်ချိန်ပိဿာ(၂၅၀၀၀)မှ(၆၀၀၀၀)ခန့် ထိဝင်ရောက်လျက်ရှိကြောင်း၊ ချင်းဈေးနှုန်းအနေဖြင့် ပွဲရုံလက္ကားဈေး အနှိမ့်စတစ်ပိဿာလျှင်(၂၀၀၀)ကျပ်၊ အလတ်စတစ်ပိဿာလျှင် (၂၅၀၀)ကျပ်၊ ထိပ်စတစ်ပိဿာလျှင်(၂၇၀၀)ကျပ်ဈေး၊ လက်လီ တစ်ပိဿာ လျှင်(၄၀၀၀-၅၀၀၀) ကျပ်၊ ဈေးဖြင့် အရောင်းအဝယ်ဖြစ်လျက်ရှိကြောင်း၊ ယခင်လနှင့် ကာလတူနှိုင်းယှဉ်လျှင်ချင်း ဈေးနှုန်းတည်ငြိမ်နေကြောင်း၊ ပြည်ပဝယ်လိုအားရှိလျှင် ဈေးနှုန်းမြင့် တက်လာနိုင်ကြောင်း ချင်းပွဲရုံများမှ သိရှိရပါသည်။

DOCA(မန္တလေး)