ပြည်တွင်းကုန်သွယ်မှုသတင်း

     ဇရစ်ရိုးပင်များသည် ကျေးရွာများတွင် စမ်းချောင်းငယ်များ၊ စိုစွတ်သောမြေများတွင် ဇရစ် ရိုးပင်များ လှိုင်လှိုင်ပေါများစွာပေါက်ရောက်ပါသည်။ ဇရစ်ရိုးပင်သည် အဆူးရှိသောအပင်တစ်မျိုး ဖြစ်သည်။ ဇရစ်ရိုးပင်များသည် မိုးရာသီတွင် ပေါများစွာပေါက်ရောက်သော အပင်တစ်မျိုးဖြစ်ပါ သည်။ ကျေးလက်ဒေသများတွင် နှစ်ခြိုက်သည့်ဟင်းလျာများတွင် ဇရစ်ရိုးလည်းပါဝင်သည်။ ဇရစ်ရိုးများကို ကြော်စားချက်စား ၊ အချဉ်ဟင်းချက်စား၊ သနပ်လုပ်စားကြပါသည်။ ငါးနှင့် ချက်စား၍စားကောင်းသလို မိုးရာသီနှင့် အလွန်လိုက်ဖက်သော ဟင်းလျာများဖြစ်ကြပါသည်။ ဇရစ်ရွက်ကို ချက်စားပေးပါက ချွဲ၊ သလိပ်ထသောရောဂါ၊ ပန်းနာရောဂါတို့ကို သက်သာစေကာ အိပ်မပျော်သူကို အိပ်ပျော်စေနိုင်ပါသည်။ ဇရစ်ရွက်ကို သုပ်စားပေးခြင်းအားဖြင့်လည်း လည်ချောင်းနာဝေဒနာကိုသက်သာစေပါသည်။ ဇရစ်ပင်၏ အရွက်နှင့်ရိုးတံကို အမျိုးမျိုးအဖုံဖုံ နှုတ်မြိန်စေရန် နေရာဒေသအလိုက် အခြားသော ဟင်းသီးဟင်းရွက်၊ အသား၊ ငါး၊ ပုစွန်တို့ဖြင့် ရောနှော၍လည်း ချက်ပြုတ်စားကြပါသည်။ ယခုလိုမိုးရာသီအချိန်မှာ ဇရစ်ရိုးများ စတင်ပေါ်ထွက်လျှက်ရှိပြီး ဈေးကွက်အတွင်း၌ ဇရစ်ရိုး တစ်စည်းလျှင် (၅၀၀/၁၀၀၀)ကျပ် ဈေးနှုန်းများဖြင့် ရောင်းချလျှက်ရှိကြောင်းဈေးကွက်အတွင်းမှသိရှိရပါသည်။

DOCA (မန္တလေး)

     မိတ္ထီလာမြို့ဈေးကြီးအတွင်း ဩဇာသီးများ အရောင်းသွက်လျက်ရှိပါသည်။ ယခုအခါ ဩဇာသီးပေါ်ချိန်ဖြစ်၍ မိတ္ထီလာမြို့အတွင်းသို့ ဩဇာသီးများကို ရှမ်းပြည်နယ်နှင့် အနယ်နယ် အရပ်ရပ် မှဝင်ရောက်လျက်ရှိပါသည်။ ဩဇာသီးပင်များ သည်အပူပိုင်းဒေသ များတွင်ပိုမို ဖြစ်ထွန်း သောအပင်တစ်မျိုးဖြစ်ပါသည်။ ဩဇာသီးတွင် ဗီတာမင်စီ ကြွယ်ဝစွာ ပါဝင်သောကြောင့် ကိုယ်ခံအားစနစ်ကိုကောင်းမွန်စေပါသည်။ ဩဇာသီးသည် အပေါ်ခွံမှာ အဖုအထစ်လေးတွေရှိပြီး အတွင်းမှာ ဖြူဖြူချိုချို အသား လေးနဲ့ အစေ့အနက်ရောင် လေးတွေနှင့် အရသာအလွန်ကောင်းမွန်ပါသည်။ ဩဇာပင်သည် ဩဇာသီးဘဲ စားရခြင်း မဟုတ်ဘဲ အရွက်ရော အပင်အခေါက်ကပါ ဆေးဖက်ဝင်ပါသည်။ ဩဇာသီး၊ ဩဇာရွက်တို့မှာ အနာကျက်စေနိုင်တဲ့ အာနိသင်ရှိပါသည်။ ထိခိုက်ဒဏ်ရာ ရသောအခါ ဩဇာရွက်ကို ခြေပြီး အနာပေါ်ကို အုံတာ ဒါမှမဟုတ် ဩဇာသီးအနှစ်ကို အနာပေါ်ကို အုံပေးခြင်းဖြင့်  ပိုးတွေကို သေစေနိုင်ပြီး အနာကျက်စေဖို့ အကောင်းဆုံး ထောက်ကူ ပေးနိုင်ပါသည်။ ဩဇာရွက်ကို ခြေ၍ ဩဇာရွက်သတ္ထုရေကို ဆားအနည်းငယ်နှင့် သောက်ပေးကမန်းကိုနိုင်စေသည်။ မိမိတို့၏ အိမ်ခြံဝင်းများတွင်လည်း မိသားစု စားသုံးနိုင်ရန်အတွက်လည်းစိုက်ပျိုးလေ့ရှိသည်။ ယခုအခါ မိတ္ထီလာဈေးကွက်အတွင်း၌ ဩဇာသီးတစ်လုံးလျှင် (၅၀၀-၁၀၀၀)ကျပ်ဖြင့် ရောင်းချလျှက်ရှိ ကြောင်း သစ်သီးမျိုးစုံအရောင်းဆိုင်မှ သိရှိရပါသည်။

DOCA (မန္တလေး)

    ကန့်ဘလူခရိုင်၊ ကျွန်းလှမြို့နယ်အတွင်း ငါးဈေးနှုန်းများ အနည်းငယ်မြင့်တက်လျက်ရှိရာမှ သဖန်းဆိတ်ဆည်မှ ထွက်ရှိသည့် ရေချို ပုဇွန်ဆိတ်နှင့်ပုဇွန်ခြောက် ဈေးနှုန်းသည်လည်း ဈေးကောင်းဖြင့် ရောင်းချလျက်ရှိကြောင်း သိရှိရပါသည်။

   ၂၀၂၅ ခုနှစ် ၊  ဩဂုတ်လ ဒုတိယပတ်အတွင်း ကျွန်းလှမြို့၌ ဖြစ်ပေါ်လျက်ရှိသော ပုဇွန်ဆိတ် ဈေးနှုန်းအနေဖြင့်  ပုဇွန်ဆိတ် ဆကာတင် အကောင်ကြီး လက်လီဈေး တစ်ပိဿာ(၂၃၅၀၀)ကျပ်နှင့် ပုဇွန်ဆိတ် အလတ်စ လက်လီဈေး(၁၈၅၀၀)ကျပ်နှင့် ပုဇွန်ဆိတ် ဆကာကျ အကောင်သေး လက်လီ တစ်ပိဿာလျှင်(၁၅၅၀၀)ကျပ်ဈေးနှုန်း အသီးသီးတို့ဖြင့်လည်းကောင်း ပုဇွန်ခြောက် ဈေးနှုန်းများအနေဖြင့် ပုဇွန်ခြောက် အကြီး တစ်ပြည်လျှင်(၅၅၀၀၀)ကျပ်၊ နို့ဆီ(၁)ဘူးလျှင်(၇၀၀၀)ကျပ်၊ ပုဇွန်ခြောက်အလတ် တစ်ပြည်လျှင်(၄၀၀၀၀)ကျပ်၊ နို့ဆီ(၁)ဘူးလျှင်(၅၀၀၀)ကျပ်နှင့် ပုဇွန်ခြောက်  အသေး တစ်ပြည် လျှင်(၃၂၀၀၀)ကျပ်၊ နို့ဆီ(၁)ဘူးလျှင်(၄၀၀၀)ကျပ် ဈေးနှုန်းအသီးသီးတို့ဖြင့် ရောင်းချလျက်ရှိကြောင်းနှင့် မိုးအားကြီးသည့်အတွက် ပုဇွန်ဆိတ်အစို ဈေးနှုန်း အနည်းငယ်မြင့်တက်လျက်ရှိကြောင်း ပုဇွန်ဆိတ် နှင့် ပုဇွန်ခြောက် ရောင်းချသူထံမှ သိရသည်။

DOCA(စစ်ကိုင်း)

        စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကျွန်းလှမြို့၊ ပိတောက်မြိုင်ဈေးတွင် ဟင်းသီးဟင်းရွက် အမျိုးမျိုးဖြစ်သော  ရုံးပတီသီး၊ မုံလာထုတ်(ခေါ်)ဂေါ်ဖီထုတ်၊ ပန်းဂေါ်ဖီ၊ ဂေါ်ရခါးသီး၊ ခါကြက်ဥ၊ ဘိုစားပဲသီး၊ ရွှေပဲသီး၊ ပဲသီးတောင့်ရှည်၊ ကြက်ဟင်းခါးသီး၊ ကင်းမုံသီး ၊ မျှစ်စိမ်း၊ မျှစ်ပြုတ်၊ ရွှေဖရုံသီး၊ ဘူးသီး၊ ကန်ဇွန်းရွက်၊ ချဉ်ပေါင်ရွက်နှင့် ပဲလင်းမြွေသီး(ခေါ်)ဗုံလုံသီး တို့ကို ရောင်းချနေကြောင်း သိရှိရပါသည်။

          ၂၀၂၅ ခုနှစ်၊ ဩဂုတ်လ(ဒုတိယပတ်)တွင် ကျွန်းလှမြို့၊ သစ်ရာမြိုင်ဈေး၌ ဖြစ်ပေါ်နေသော ဟင်းသီးဟင်းရွက်အမျိုးမျိုး၏ ဈေးနှုန်းအနေဖြင့် ဂေါ်ရခါးသီး တစ်လုံးလျှင်(၈၀၀/၇၀၀)ကျပ်၊ မုံလာထုတ် တစ်ထုတ်လျှင်(၅၅၀၀)ကျပ်၊ ပန်းဂေါ်ဖီ တစ်ပွင့်လျှင်(၄၅၀၀)ကျပ်၊ ခါကြက်ဥ(တရုတ်)တစ်ပိဿာလျှင် (၁၆၀၀၀)ကျပ်၊ ခါကြက်ဥ(ဗမာ)တစ်ပိဿာလျှင်(၁၀၀၀၀)ကျပ်၊ ချဉ်ပေါင်ရွက် တစ်ပိဿာ(၁၅၀၀)ကျပ်၊ ကန်ဇွန်းရွက် တစ်စီးလျှင်(၂၀၀)ကျပ်၊ ကြက်ဟင်းခါးသီး တစ်ပြည်လျှင်(၅၀၀၀)ကျပ်၊ ရွှေဖရုံသီး တစ်ပိဿာလျှင်(၃၀၀၀)ကျပ်၊ ဘူးသီး တစ်လုံးလျှင် (၂၅၀၀)ကျပ် ကင်းမုံသီး တစ်ပြည်လျှင် (၃၂၀၀၀)ကျပ်၊ ပဲလင်းမြွေသီး တစ်တောင့်လျှင်(၇၀၀/ ၈၀၀/၅၀၀)ကျပ်၊ ရွှေပဲသီး တစ်ပိဿာလျှင် (၁၅၀၀၀)ကျပ် မုံညှင်းထုတ် တစ်ပိဿာလျှင်(၁၂၀၀၀)ကျပ်၊ ခရမ်းသီး တစ်ပိဿာလျှင်(၄၀၀၀)ကျပ်၊ ရုံးပတီသီး တစ်ပိဿာလျှင်(၂၈၀၀)ကျပ်၊ ပဲသီးတောင့်ရှည်(၅)တောင့်ပါ တစ်စည်းလျှင်(၄၀၀)ကျပ်၊ မျှစ်စိမ်း တစ်ပိဿာလျှင်(၂၅၀၀)ကျပ်၊ မျှစ်ပြုတ် တစ်ပိဿာလျှင်(၃၀၀၀)ကျပ်၊ငရုပ်သီးစိမ်း တစ်ပိဿာ လျှင်(၃၅၀၀)ကျပ်၊ ကုလားအော် ငရုပ်သီးစိမ်း တစ်ပြည်လျှင်(၁၀၀၀၀)ကျပ် နှင့် ဘိုစားပဲသီး တစ်ပိဿာလျှင်(၁၆၀၀၀)ကျပ်ဈေးနှုန်းတို့ဖြင့် အရောင်းအဝယ် ဖြစ်နေကြောင်း သိရပါသည်။

DOCA(စစ်ကိုင်း)

    ဂမုန်းပန်းပင်သည် နွေရာသီ ၊ဆောင်းရာသီများတွင် အပင်ကိုမြင်တွေ့ဖို့ ခဲယဉ်းလှပြီး ဂမုန်းပန်းဥများသာ မြေကြီးထဲ၌နှစ်ပေါင်းမြောက်များစွာ ရှင်သန်လျက်ရှိပါသည်။ ယခုလမိုးရာသီ ရောက်မှသာ ဂမုန်းဥများမှအရွက်၊ရိုးတံများ ထွက်လာပြီး ပန်းပွင့်မှသာ ဂမုန်းပန်းပင်ကို မြင်တွေ့ နိုင်မည်ဖြစ်ပါသည်။ ဂမုန်းပန်းသည် ရိုးတံမှထွက်၍ ပန်းပွင့်များစွာပါသော ပန်းခိုင်အဖြစ် ပွင့် လန်းပါသည်။ ဂမုန်းပန်း၏အဓိပ္ပာယ်သည် “မျှော်လင့်ခြင်းကြီးစွာဖြင့် စောင့်နေရတဲ့ချစ်သူပါ” ဟူ၍ဖြစ်သည်။ တစ်နှစ်ပတ်လုံးမြေကြီးထဲတွင် ပန်းဥများရှင်သန်နေဆဲဖြစ်ပြီး မိုးသံကြားတာနဲ့ ပွင့်လန်းသောပန်းဖြစ်သည်။ ဂမုန်းပန်းရနံ့သည် ချိုချိုအေးအေးရနံ့သင်းသင်းမွှေးပြီး လှပသော ပန်းမျိုးနွယ်ဖြစ်သည်။အဖြူရောင်၊ပန်းရောင်၊အနီရောင်စသည်ဖြင့်ရောင်စုံပွင့်လန်းကြသည်။ ကျောင်းဆရာမလေးများ၏ ဆံကေသာဆံထုံးထက်ဝယ် အဖြူရောင်ဂမုန်းပန်းလေးတစ်ပွင့် ပန်ဆင်ထားလျှင် လှပကျော့ရှင်းပြီး ကျက်သရေရှိ၍ အမြင်တင့်တယ်လှပါသည်။ အလှပန်းအိုး နှင့်ဘုရားပန်းအိုးများတွင် အလှတင်လှူကြပါသည်။ အချို့ကလည်း အပင်ပေါ်မှာဘဲ အမြင်တင့် စွာ ကိုယ်ရံကြီးဂမုန်း၊ lucky ဂမုန်း၊ ဆင်စွယ်ဂမုန်း၊ ရှင်သီဝလိဂမုန်း၊ စီးပွားဂမုန်း မျိုးစုံရှိပါ သည်။ တချို့ဂမုန်းပင်ကို အိမ်တွင်းမှာမစိုက်ကောင်းဟု အယူရှိ၍မစိုက်ကြသလို အိမ်တော် မင်္ဂလာစီးပွားတက်ဂမုန်းမျိုးကိုတော့စိုက်ပျိုးလေ့ရှိပါသည်။စီးပွားဂမုန်းပင်မျိုးနွယ်ဝင် အပင်များ၊ အလှဂမုန်းပန်းပင်များ ရောင်းအားကောင်းလျက်ရှိပြီး တစ်ပင်လျှင် (၁၀၀၀၀ မှ ၃၀၀၀၀) ကျပ် အထိရောင်းဝယ်လျက်ရှိပြီး ပန်းပွင့်သော အလှဂမုန်းပန်းဥများကို မျိုးဥထုပ် အဖြစ်ရောင်းချသလို တစ်ဥတစ်ပင်လျှင်လည်း(၃၀၀၀,၅၀၀၀)ကျပ်ဖြင့်ရောင်းချလျက်ရှိကြောင်း ပန်းပျိုးပင်အရောင်း ဆိုင် မှသိရှိရသည်။

DOCA (မန္တလေး)