သတင်းနှင့် လှုပ်ရှားမှုများ

      ( ၁.၁၀.၂၀၂၆ ) ရက်နေ့တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ဒေါ်သန်းသန်းဝင်း ( ခရိုင်ဦးစီးမှူး ) မှ ဦးဆောင်၍ စည်ပင်သာယာရေးကော်မတီတို့ ပူးပေါင်းကာ ကလေးမြို့ပေါ်ရှိ အိမ်သုံးလျှပ်စစ်နှင့် အီဘက်ထရောနစ် အရောင်းဆိုင် ( ၆ ) ဆိုင်သို့ သွားရောက်၍ ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရသည်။

        ကွင်းဆင်းစစ်ဆေးရာတွင် ပြည်တွင်း၌ ရေခဲသေတ္တာများ ဈေးနှုန်းအဆမတန်မြှင့်တင် ရောင်းချလျက်ရှိကြောင်း၊ အထူးသဖြင့် ထိုင်းနိုင်ငံမှ တင်သွင်းသည့် ရေခဲသေတ္တာများသည် ထိုင်းနိုင်ငံ အရောင်းဈေးထက် ပြည်တွင်းဈေးကွက်တွင် ၂ဆခန့် မြှင့်တင်ရောင်းချနေကြောင်း Media များတွင် ဖော်ပြနေမှုနှင့် ပတ်သက်၍ မြေပြင်ကွင်းဆင်းစစ်ဆေးခဲ့ကြပြီး ကလေးမြို့ပေါ်ရှိ အိမ်သုံးလျှပ်စစ်နှင့် အီလက်ထရောနစ်အရောင်းဆိုင်များတွင် ရောင်းချနေသည့် ရေခဲသေတ္တာများအနေဖြင့် ယခင်က ဝယ်ယူရောင်းချလျက်ရှိသော လက်ကျန်ပစ္စည်းများဖြစ်ပြီး ယခုအခါ ရေခဲသေတ္တာများ မှာယူရောင်းချ ရန်အခက်အခဲများရှိသောကြောင့် အသစ်မှာယူရောင်းချခြင်းများမရှိဘဲ လက်ကျန်ပစ္စည်းများကိုသာ ဈေးနှုန်းကြီးမြှင့်၍ ရောင်းချမှုမရှိပါကြောင်း အရောင်းဆိုင်ပိုင်ရှင်များအနေဖြင့် ပြောကြားခဲ့ကြောင်း သိရသည်။

         စားသုံးသူရေးရာဦးစီးဌာနမှ ဒေါ်သန်းသန်းဝင်း ( ခရိုင်ဦးစီးမှူး ) သည် စားသုံးသူကာကွယ်ရေး ဥပဒေပါ စီးပွားရေးလုပ်ငန်းရှင်၏ တာဝန်များနှင့် ပြစ်မှု၊ ပြစ်ဒဏ်များအကြောင်း ရှင်းလင်းပြောကြား ပညာပေးခဲ့ကြောင်း သိရှိရပါသည်။

DOCA(စစ်ကိုင်း)

          စားသောက်ကုန်၊ လူသုံးကုန်၊ စက်ပစ္စည်းအမျိုးမျိုး ရောင်းချသည့်ဈေးဆိုင်များတွင် တရားမဝင် ပစ္စည်းများရောင်းချခြင်း၊ သိုလှောင်ခြင်းများရှိ/ မရှိ စစ်ဆေးဆောင်ရွက်ရန် မြို့နယ်စည်ပင်သာယာရေးအဖွဲ့၊ ခရိုင်စားသုံးသူရေးရာဦးစီးဌာန၊ ခရိုင်ပြည်သူ့ကျန်းမာရေးဦးစီးဌာန၊ ခရိုင်စက်မှုကြီးကြပ်ရေးနှင့် စစ်ဆေးရေးဦးစီးဌာန၊ ခရိုင်လျှပ်စစ်ဓါတ်အားဖြန့်ဖြူးရေးလုပ်ငန်း၊ ကုန်းလမ်းပို့ဆောင်ရေးညွှန်ကြားမှုဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့မှူးရုံး၊ ယာဉ်ထိန်းတပ်ဖွဲ့တို့ပါဝင်သော ရွှေဘိုခရိုင် Mobile Team အဖွဲ့ကိုဖွဲ့စည်းထားရှိရာ အဆိုပါအဖွဲ့ဖြင့် (24.9.၂၀၂၆)ရက်နေ့၊ နံနက် (10:၀၀)နာရီအချိန်တွင် ရွှေဘိုမြို့၊ အမှတ်(၃)ရပ်ကွက်ရှိ ရွှေယမင်းကုန်မျိုးစုံရောင်းဝယ်ရေးဆိုင်၊ အောင်စေပိုင်စေဆေးနှင့် ဆေးပစ္စည်းရောင်းဝယ်ရေးဆိုင်၊ အမှတ်(၂)ရပ်ကွက်၊ ပြင်ဈေးရပ်ရှိ ခင်မောင်ဝင်း လျှပ်စစ်ပစ္စည်းရောင်းဝယ်ရေးဆိုင်နှင့် ငွေလရောင်ဆိုင်ကယ်ရောင်းဝယ်ရေးဆိုင်တို့အား စစ်ဆေးဆောင်ရွက်ခဲ့ကြောင်း သိရသည်။

     ထိုသို့စစ်ဆေးရာတွင် တရားမဝင်ပစ္စည်းများရောင်းချခြင်း၊ သိုလှောင်ခြင်းများ ဆောင်ရွက်ခြင်းမပြုရန် အသိပညာပေးခြင်းနှင့် ရောင်းချသည့်ပစ္စည်းများတွင် စားသုံးသူကာကွယ်ရေးဥပဒေအခန်း(၁၈)ပါ ကုန်အညွှန်းအမှတ်အသားများ ပြည့်စုံစွာဖော်ပြရမည့်အချက်များအကြောင်း ရှင်းလင်းဆွေးနွေးခြင်း၊  လျှပ်စစ်အန္တရာယ်ကင်းရှင်းမှုရှိ/ မရှိ၊  SME Member Card ဆောင်ရွက်ထားခြင်းရှိ/ မရှိ၊ မြို့နယ်စည်ပင်သာယာရေးအဖွဲ့၏ လုပ်ငန်းလိုင်စင်များရှိ/ မရှိ စစ်ဆေးခြင်းများဆောင်ရွက်ခဲ့ကြပြီး သက်ဆိုင်ရာဌာန၏ လုပ်ငန်းလိုင်စင်များမရှိပါက ဆောင်ရွက်နိုင်ရန် ချိတ်ဆက်ခြင်းများ ဆောင်ရွက်ခဲ့ကြကြောင်း သတင်းရရှိပါသည်။

DOCA(စစ်ကိုင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေး အသိပညာပေးဟောပြောပွဲများ၊  စီးပွားရေးလုပ်ငန်းရှင်များနှင့် တွေ့ဆုံပြီး ဥပဒေ၊ အမိန့်နှင့် ညွှန်ကြားချက်များအား ရှင်းလင်းဆွေးနွေးခြင်းများ ဆောင်ရွက်လျက်ရှိရာ (၂၆.၉.၂၀၂၆)ရက်နေ့၊ နံနက်(၁၀:၀၀)နာရီအချိန်တွင် မြို့နယ်အဆင့် ပြည်သူ့ကျန်းမာရေးဦးစီးဌာန၊ စားသုံးသူရေးရာဦးစီးဌာနနှင့် စည်ပင်သာယာရေးကော်မတီတို့ပူးပေါင်းပြီး ရွှေဘိုမြို့ စည်ပင်သာယာ ဈေးကြီးအတွင်းရှိ ဈေးသည်များ၊ ဈေးဝယ်ရန်လာရောက်ကြသည့် စားသုံးသူပြည်သူများ ကျယ်ကျယ်ပြန့်ပြန့်သိရှိနိုင်စေရန် အထက်ဌာနလမ်းညွှန်ချက်ဖြစ်သည့် ဆီစားသုံးမှုလျော့ချရေးနှင့် ဆီအလွန်အကျွံ စားသုံးခြင်းကြောင့် ဖြစ်လာနိုင်သည့်ကျန်းမာရေးဆိုင်ရာ ဆိုးကျိုးများအကြောင်းကို လက်ကမ်းစာစောင်များဖြန့်ဝေခြင်း ဆောင်ရွက်ခဲ့ကြောင်း သိရသည်။

       ဆက်လက်ပြီး စည်ပင်သာယာဈေးကြီးတောင်ဘက်ရှိ ရွှေဘိုမြို့နှင့် အနီးတစ်ဝိုက်ရှိ ကျေူးရွာများမှ ဈေးဝယ်ရန်လာရောက်သည့် ကားများရပ်နားရန် ဂိတ်အနီးတွင်လည်း အသိပညာပေးလက်ကမ်းစာစောင်များ ဖြန့်ဝေသည့်အပြင် အသိပညာပေး ဗီနိုင်းကပ်ခြင်းများ ဆောင်ရွက်ခဲ့ကြကြောင်း သတင်းရရှိပါသည်။

DOCA(စစ်ကိုင်း)

၇.၁၀.၂၀၂၆ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ သထုံခရိုင်၊ ဘီးလင်းမြို့နယ်တာဝန်ခံနှင့် ဝန်ထမ်းတို့သည် ဘီးလင်းမြို့နယ်၊ ဇုတ်သုတ်ကျေးရွာရှိ (My RO) တွင် မှတ်ပုံတင်ထားသော ဆန်စပါး သိုလှောင်ရုံများအား ကွင်းဆင်းခြင်း ဆောင် ရွက်ခဲ့ကြောင်း သိရသည်။

ထိုသို့ကွင်းဆင်းစစ်ဆေးရာတွင် ဆန်စပါးသိုလှောင်ရုံများ၏ သိုလှောင်ထားရှိမှု အခြေ အနေ၊ ဆန်စပါးလက်ကျန်အခြေအနေ၊ ဆန်စပါးဝင်ထွက်မှုအခြေအနေများအား စစ်ဆေးမေး မြန်းခဲ့ပြီး MyRo တွင် ကုန်ရ၊ ကုန်ထုတ်နှင့် ကုန်လက်ကျန်စာရင်းများကို ပြည့်စုံမှန်ကန်စွာ ဖြည့်သွင်းထားရှိရေး၊ ဆန်စပါးသိုလှောင်ရုံ လုပ်ငန်းရှင်များအနေဖြင့် သက်ဆိုင်ရာစည်းမျည်း စည်းကမ်းများနှင့်အညီ ဆောင်ရွက်ကြရန် အသိပေး ဆွေးနွေးခဲ့ကြောင်း သိရသည်။

                                                                                                  DOCA (မွန်)

၆.၁၀.၂၀၂၆ ရက်နေ့ နံနက် (၁၀:၀၀) နာရီအချိန်တွင် မွန်ပြည်နယ်၊ စားသုံးသူ ရေးရာဦးစီးဌာန၊ မော်လမြိုင်ခရိုင်၊ မော်လမြိုင်မြို့နယ်တာဝန်ခံနှင့် ဝန်ထမ်းများသည် မော်လမြိုင်မြို့နယ်၊ မုပွန်ရပ်ကွက် (အ.မ.က) သင်္ဘောဆိပ်ကျောင်း၌ စားသုံးသူကာကွယ်ရေး အသိပညာပေး ဟောပြောဆွေးနွေးပွဲ ပြုလုပ်ခဲ့ကြောင်း သိရှိရပါသည်။

          အဆိုပါ ဟောပြောဆွေးနွေးပွဲတွင် အကြီးတန်းစာရေး ဒေါ်ခင်လေးနွယ်မှ စားသုံးသူကာကွယ်ရေး ဥပဒေ အဓိပ္ပာယ်ဖွင့်ဆိုချက်များ၊ စားသုံးသူအခွင့်အရေးနှင့် တာဝန်များ၊ ကုန်အညွှန်းအမှတ်အသားဆိုင်ရာပြဋ္ဌာန်းချက်များ၊ Consumer Call Center အကြောင်းအရာများနှင့် စားသုံးသူရေးရာဦးစီးဌာန၏ အကြောင်းအရာများအား www.doca.gov.mm တွင်လည်း ဝင်ရောက်ကြည့်ရှုလေ့လာနိုင်ကြောင်း၊ စားသုံးသူနစ်နာ မှုနှင့် စပ်လျဉ်း၍ တိုင်ကြားနိုင်မှုနှင့် ဖြေရှင်းဆောင်ရွက်ပေးနေမှု အခြေအနေများအား ဟောပြောဆွေးနွေးခဲ့ပြီး ဆွေးနွေးပွဲသို့ တက်ရောက်လာသော ဆရာ/ ဆရာမများနှင့် ကျောင်းသား/ ကျောင်းသူများမှ သိလိုသည်များမေးမြန်းခြင်း၊ ပြန်လည်ဖြေကြားခြင်းများ ပြုလုပ်ခဲ့ကြောင်း သတင်းရရှိပါသည်။

အဆိုပါ ဟောပြောဆွေးနွေးပွဲသို့ ဆရာ/ဆရာမ (၆) ဦး၊ ကျောင်းသား/ကျောင်းသူ (၁၁၆) ဦး တက်ရောက်ခဲ့ပြီး လက်ကမ်းစာစောင်များဖြန့်ဝေပေးခြင်းများ ဆောင်ရွက်ခဲ့ ကြောင်း သိရှိရပါသည်။

DOCA (မွန်)