ဆန်စပါးသိုလှောင်မှုလုပ်ငန်းများ၊ သိုလှောင်မှုအခြေအနေများနှင့် နိုင်ငံအနှံ့ရှိ သိုလှောင် ရုံများကို ဒီဂျစ်တယ်နည်းလမ်းဖြင့် စနစ်တကျမှတ်ပုံတင်နိုင်သည့် မြန်မာဆန်စပါးအွန်လိုင်း (Myanmar Rice Online – My RO) အား စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနနှင့် မြန်မာနိုင်ငံဆန်စပါးအသင်းချုပ်တို့ ပူးပေါင်း၍ ၂၀၂၃ ခုနှစ် နိုဝင်ဘာလ ၃ ရက်နေ့မှစတင်၍ အကောင်အထည်ဖော်ဆောင်ရွက်လျက်ရှိပါသည်။

           မြန်မာဆန်စပါးအွန်လိုင်း (My RO) တွင် အွန်လိုင်းစနစ်ဖြင့် သိုလှောင်ရုံမှတ်ပုံတင်ခြင်း လုပ်ငန်းများကို သိုလှောင်ရုံအကျယ်အဝန်း သတ်မှတ်ချက်များအလိုက် အုပ်စု ၄ စုခွဲ၍ ကောက်ခံ လျက်ရှိရာ ၂၀၂၃ ခုနှစ်၊ နိုဝင်ဘာလ ၃ ရက်နေ့မှ ၂၀၂၆ ခုနှစ်၊ ဧပြီလ ၃၀ ရက်နေ့ထိ ပြည်ထောင်စုနယ်မြေနေပြည်တော်၊ တိုင်းဒေသကြီး၊ ပြည်နယ်အလိုက် မှတ်ပုံတင်ထားသည့် ဆန် စပါးသိုလှောင်ရုံ ၅,၆၈၈ လုံး မှတ်ပုံတင်ထားရှိပါသည်။

             ရှမ်းပြည်နယ်(တောင်ပိုင်း)၊ ဓနုကိုယ်ပိုင် အုပ်ချုပ်ခွင့်ရဒေသ၊ စားသုံးသူရေးရာဦးစီးဌာန၊ ပင်းတယမြို့၊ ဒေသဦးစီးမှူးရုံးမှ စစ်ဆေးရေးမှူး နှင့်ဝန်ထမ်းများသည်  ဧပြီလ(၂၇) ရက်နေ့တွင် ပင်းတယမြို့နယ်၊ ပြည်တော်သာရပ်ကွက်နှင့် ဆင်ခေါင်းရပ်ကွက်ရှိ စားအုန်းဆီလက်လီ အရောင်းဆိုင်သို့ ကွင်းဆင်းစစ်ဆေးခြင်းများ ဆောင်ရွက်ခဲ့ကြပါသည်။

               ထိုသို့ ကွင်းဆင်းစစ်ဆေးခဲ့ရာ မိမိတို့ရရှိသောခွဲတမ်းများကို စားသုံးသူပြည်သူလက်ဝယ်သို့ အမှန်တကယ်ရောက်ရှိအောင် စာအုပ်စနစ်ဖြင့် အိမ်ထောင်စုတစ်စုလျှင် (၁)ပိဿာနှုန်းဖြင့် ရောင်းချပေးလျက်ရှိကြောင်း၊ ဈေးနှုန်းမြှင့်တင် ရောင်းချခြင်းမရှိဘဲ သတ်မှတ်ရည်ညွှန်းဈေးနှုန်း အတိုင်းရောင်းချပေးပါကြောင်း၊ သိုလှောင်ထား ရှိခြင်းလည်း မရှိပါကြောင်း၊ ရောင်းချမှု လက်ခံစာရင်းဇယားများလည်း စနစ်တကျထားရှိပါကြောင်း စစ်ဆေးတွေ့ရှိရပြီး မိမိတို့ဌာနမှလည်း အခြားမသမာသော နည်းလမ်းများသုံး၍ ရောင်းချခြင်း/ ဈေးကစားရန် ရည်ရွယ်ချက်ဖြင့် သိုလှောင်ထားခြင်းများရှိပါက အရေးယူ ဆောင်ရွက်သွားမည် ဖြစ်ကြောင်းနှင့် ရောင်းချရမည့် ကျေးရွာများကိုလည်း စဉ်ဆက်မပြတ် ရောင်းချပေးနိုင်ပါရန် ဆွေးနွေးပြောကြားခဲ့ကြောင်း သိရှိရပါသည်။

DOCA(ရှမ်း)

                 စားသုံးသူရေးရာဦးစီးဌာန၊ အုတ်တွင်းမြို့နယ်ရုံးမှ ဦးအောင်ဝင်း၊ ဌာနခွဲစာရေးသည်  မိတ်ဖက် ဌာနများဖြစ်သော အစားအသောက်နှင့်ဆေးဝါးကွက်ကဲရေးဦးစီးဌာန၊ မြို့နယ်အထွေထွေ အုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့နှင့် အုတ်တွင်းမြို့မဈေး တာဝန်ခံ ဝန်ထမ်းများနှင့်အတူ အုတ်တွင်းမြို့နယ်၊ မြို့မဈေးအတွင်းရှိ ကုန်စုံဆိုင်များအား ဧပြီလ ၂၃ ရက်နေ့ နံနက်ပိုင်းက ဈေးကွက် ကွင်းဆင်းစစ်ဆေးခြင်း လုပ်ငန်းများ ဆောင်ရွက်ခဲ့ပါသည်။

           စစ်ဆေးရာတွင် ဈေးကွက်အတွင်း၌ အလှကုန်ဆိုင်များ၊ ကုန်စုံဆိုင်များနှင့် ဆေးဆိုင်များတွင် ကုန်အညွှန်းအမှတ်အသားများ ပြည့်စုံစွာဖော်ပြထားခြင်းရှိ/ မရှိ၊ သက်တမ်းကျော်လွန်သော ကုန်ပစ္စည်း များ ရောင်းချခြင်း ရှိ/ မရှိတို့ကို  စစ်ဆေးခဲ့ပါသည်။ စစ်ဆေးချက်များအရ အုတ်တွင်းမြို့ ရှိ ဈေးကွက်အတွင်းတွင် ရောင်းချနေသော ကုန်ပစ္စည်းအမျိုးအစားများနှင့် အလှကုန်ပစ္စည်းများ၊ ဆေးဝါးများသည် ကုန်အညွှန်းအမှတ်အသားများ ပြည့်စုံစွာပါရှိ ကာ သက်တမ်းလွန် ပစ္စည်းများ ရောင်းချခြင်း မရှိကြောင်း စစ်ဆေးတွေ့ရှိရပါသည်။

           ကုန်စုံဆိုင်များနှင့် ဈေးဆိုင်တာဝန်ခံများအား မြန်မာနိုင်ငံ စားသုံးသူကာကွယ်ရေး ကော်မရှင်က ထုတ်ပြန်ထားသည့်(၂/၂၀၂၉)ညွှန်ကြားချက်ပါ အသေးစိတ် အချက်အလက်များ၊ စားသုံးသူကာကွယ်ရေးဥပဒေ အခန်း(၁၈)ပါ စီးပွားရေးလုပ်ငန်းရှင်၏တာဝန်များ၊ အခန်း(၁၁)ပါ ကုန်စည်နှင့်ပတ်သက်၍ အာမခံချက်ပေးခြင်းဆိုင်ရာ အချက်အလက်များကို ရှင်းလင်း ပြောကြားခဲ့ကြောင်း သိရှိရပါသည်။

DOCA(ပဲခူး)

               စားသုံးသူရေးရာဦးစီးဌာန၊ ပြည်မြို့နယ်တာဝန်ခံနှင့်ဝန်ထမ်းများသည် မိတ်ဖက်ဌာနဆိုင်ရာ များဖြစ်ကြသည့် ခရိုင်အစားအသောက်နှင့် ဆေးဝါးကြီးကြပ်ကွပ်ကဲရေးဌာန၊ မြို့နယ်ပြည်သူ့ကျန်းမာရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေး အဖွဲ့နှင့် မြို့နယ်ရဲတပ်ဖွဲ့တို့မှ တာဝန်ရှိသူများပါဝင်သော မြို့နယ်အစားအသောက်နှင့် ဆေးဝါးကြီးကြပ်ရေး ကော်မတီအဖွဲ့ဝင်များနှင့်ပူးပေါင်း၍ (၂၀.၄.၂၀၂၆)ရက်နေ့၊ နံနက်(၉:၃၀)နာရီ အချိန်တွင် ပြည်မြို့၊ ကျောင်းကြီးအိုးတန်းရပ်ကွက်အတွင်းရှိ အစားအသောက်ဝန်ဆောင်မှုလုပ်ငန်း များသို့ သွားရောက်၍ ကွင်းဆင်းစစ်ဆေးခဲ့ကြောင်းသိရှိရပါသည်။

          အဖွဲ့အနေဖြင့် ကွင်းဆင်းစစ်ဆေးရေးတွင် စားသောက်ဆိုင်ဝန်ဆောင်မှုလုပ်ငန်းရှင်များ အနေဖြင့် အစားအသောက်များကို ဖုန်မဝင်၊ ယင်မနားအောင် ကာကွယ်ထားရန် ရှိမှု ရှိ/မရှိ ပြင်ဆင်ချက်ပြုတ်ပြီး ပူပူနွေးနွေးတည့်ခင်းပေးမှုရှိ/မရှိ ချက်ချင်းတည်ခင်းခြင်းမရှိပါက သင့်တော် သောအပူချိန်တွင် ထားသိုမှုရှိ/မရှိ အစားအသောက်များကို လက်ဖြင့်ကိုင်တွယ်တို့ထိ စမ်းသပ်ခြင်း မပြုစေရန် အသားစိမ်း၊ ငါးစိမ်း၊ ခုတ်ထစ်သော စဉ်နှီတုံး၊ ဓါးအိုးခွက်များကို သီးသန့်ထားမှု ရှိ/မရှိ အစားအသောက်အတွက် ခွင့်ပြုထားသော အစာဆိုးဆေး၊ တာရှည်ခံဆေး၊ ဟင်းခတ် အမွှေးအကြိုင်များကို စနစ်တကျသုံးစွဲမှု ရှိ/မရှိအား စားသောက်ဆိုင်စစ်ဆေးခြင်း (Check List)များဖြင့် မှတ်တမ်းယူစစ်ဆေးခဲ့ကြောင်း သိရှိရပါသည်။

DOCA(ပဲခူး)

             ဧရာဝတီတိုင်းဒေသကြီး၊ ပုသိမ်ခရိုင်၊ စားသုံးသူရေးရာဦးစီးဌာနမှ ဒု-ခရိုင်ဦးစီးမှူးဦးကိုကိုအောင်နှင့် ဝန်ထမ်းများသည် (၂၃.၄.၂၀၂၆) ရက်နေ့တွင် ပုသိမ်ခရိုင်၊ ပုသိမ်မြို့နယ်၊ ဘုရားကြီးကုန်းကျေးရွာရှိ “သာထူးအောင် ဩဂဲနစ်မြေဩဇာ” လုပ်ငန်းသို့ အွန်လိုင်းမှတ်ပုံတင်ခြင်းနှင့် စပ်လျဉ်း၍ မြေပြင်ကွင်းဆင်းစစ်ဆေးခဲ့ကြောင်း သိရှိရပါသည်။

       ထိုသို့ကွင်းဆင်းစစ်ဆေးရာ အွန်လိုင်းစနစ်ဖြင့်ရောင်းချနေသော လုပ်ငန်းရှင်များအား မြေပြင်ကွင်းဆင်းစစ်ဆေးရာတွင် မှတ်ပုံတင်လက်မှတ်လျှောက်ထားမှုနှင့် စပ်လျဉ်း၍ လျှောက်လွှာပုံစံတွင် ဖြည့်သွင်းထားသည့်လိပ်စာအတိုင်း လုပ်ငန်းအမှန်တကယ်တည်ရှိခြင်း ရှိ/ မရှိ၊ မှတ်ပုံတင်လက်မှတ် လျှောက်ထားစဉ်က ရောင်းချရန်တင်ပြထားသော ကုန်စည် (သို့) ဝန်ဆောင်မှု့ အမျိုးအစားအတိုင်း မြေပြင်တွင် ဆောင်ရွက်နေခြင်း ရှိ/ မရှိစစ်ဆေးခဲ့ပြီး မှတ်ပုံတင်လက်မှတ်ရရှိသူ၏ တာဝန်များ၊ စားသုံးသူကာကွယ်ရေး ဥပဒေပါ ကုန်စည်ပေါ်တွင် ဖော်ပြပါရှိရမည့် ကုန်အညွှန်းအမှတ်အသား ဖော်ပြမှုတို့နှင့် စပ်လျဉ်း၍ ဆွေးနွေးခဲ့ကြောင်း သိရှိရပါသည်။

DOCA (ဧရာဝတီ)