သတင်းနှင့် လှုပ်ရှားမှုများ

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူးရုံး လက်အောက်ရှိ ကျွန်းလှမြို့နယ်တာဝန်ခံရုံးအနေဖြင့် စားသုံးသူအခွင့်အရေးနှင့် အကျိူးစီးပွားကာကွယ်ရန်အတွက် စားသုံးသူကာကွယ်ရေးလုပ်ငန်းများကို ဆောင်ရွက်လျက်ရှိရာ ၂၀၂၅ ခုနှစ်၊ ဒီဇင်ဘာလ(၃)ရက်နေ့၊ နံနက်(၀၈း၀၀)နာရီအချိန်တွင် ကျွန်းလှမြို့နယ်တာဝန်ခံသည် ကျွန်လှမြို့နယ် ရှမ်းစုကျေးရွာရှိ “UTN” စက်သုံးဆီအရောင်းဆိုင်လုပ်ငန်းရှင်နှင့် သွားရောက်တွေ့ဆုံ ဆွေးနွေးခဲ့ပါသည်။

         ထိုသို့ကွင်းဆင်းစစ်ဆေးရာတွင် မြို့နယ်အတွက် စက်သုံးဆီ ပြတ်လတ်မှုမရှိစေရေး စက်သုံးဆီဈေးနှုန်းများ မြှင့်တင်ရောင်းချခြင်းမပြုရန် စက်သုံးဆီ တင်သွင်းဖြန့်ဖြူး ရောင်းချနေမှုအခြေအနေ၊ စက်သုံးဆီပြတ်လတ်မှုရှိ/ မရှိ၊ (PPRD) စက်သုံးဆီ တင်သွင်းသိုလှောင် ဖြန့်ဖြူးခြင်း လုပ်ငန်းကြီးကြပ် ရေးကော်မတီမှ  နေ့စဉ် သတ်မှတ်ထုတ်ပြန်ထားသော စက်သုံးဆီ ရည်ညွှန်းဈေးနှုန်းအတိုင်း ရောင်းချ မှုရှိ/ မရှိ၊ အချိန်အတွယ်နှင့် အလေးချိန်မှန်ကန်မှုရှိ/မရှိ  စစ်ဆေးရာ သတ်မှတ်ရည်ညွှန်းဈေးနှုန်းအတိုင်း ရောင်းချလျက်ရှိပြီး၊ အချိန်အတွယ်မှန်ကန်ကြောင်း စစ်ဆေး တွေ့ရှိရပါသည်။  စက်သုံးဆီ လုပ်ငန်းရှင်အနေဖြင့် တရားမဝင် စက်သုံးဆီ၊ ချောဆီများ တင်သွင်းဖြန့်ဖြုးရောင်းချနေခြင်း စိစစ်တွေ့ရှိရပါက အရေးယူ ဆောင်ရွက်ခြင်းခံရမည်ဖြစ်ကြောင်းနှင့် ပြည်သူများ အဆင်ပြေချောမွေ့စွာ ဝယ်ယူနိုင်ရေးအတွက် စက်သုံးဆီအရောင်းဆိုင်များအား စက်သုံးဆီပြတ်လတ်မှု မရှိစေရေးအတွက် ပုံမှန်ဖွင့်လှစ် ရောင်းချနိုင်ရေး သတ်မှတ်ဈေးနှုန်းထက် ပိုမိုရောင်းချခြင်းမပြုဘဲ  ဌာနမှ ထုတ်ပြန်ထားသော စီးပွားရေးလုပ်ငန်းရှင်များ လိုက်နာရမည့် ညွှန်ကြားချက်များအတိုင်း လိုက်နာဆောင်ရွက်ကြရန်နှင့် စီးပွားရေးလုပ်ငန်းရှင်များ လိုက်နာ ဆောင်ရွက်ရမည့် တာဝန်များအား ဆွေးနွေးပြောကြားခဲ့ကြောင်း သိရှိရပါသည်။

DOCA(စစ်ကိုင်း)

   စားသုံးသူရေးရာဦးစီးဌာန ၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် ထုတ်ကုန်လုံခြုံစိတ်ချရမှုဌာနခွဲတာဝန်ခံ ၊ ဒေါ်ချောစုထွေး (ဦးစီးမှူး) နှင့်ဝန်ထမ်း များသည်  ၂၀၂၅ ခုနှစ် ဒီဇင်ဘာလ ၃ ရက်နေ့တွင် မိတ္ထီလာမြို့နယ်ရှိ မိတ်ဆက်ယိုစုံလုပ်ငန်းအား   လုပ်ငန်းလုပ်ကိုင်ရာတွင် ကုန်အညွှန်းအမှတ်အသားများဖော်ပြခြင်းနှင့် ဈေးကွက်အတွင်း ဖြန့်ဖြူး ရောင်းချရာတွင် ကုန်အညွှန်းအမှတ်အသားများ ကိုက်ညီမှုရှိ/မရှိအား ဈေးကွက်မရောက်မီ ကွင်းဆင်း စစ်ဆေးရာတွင် စားသုံးသူရေးရာဦးစီးဌာနမှဝန်ထမ်းများ၊ စစ်ဆေးရာတွင် ပူး ပေါင်းပါဝင်ခဲ့သည့် ဌာနများနှင့်အတူ ကွင်းဆင်းစစ်ဆေးခဲ့ပြီး၊ စီးပွားရေးလုပ်ငန်းရှင်များအား ပစ္စည်းများ၏ထုတ်ပိုးမှု အပြင်အဆင်ပေါ်တွင် စားသုံးသူကာကွယ်ရေး ဥပဒေပါအခန်း (၁၈) ၌ပါရှိသည့် ကုန်အညွှန်းအမှတ် အသားများပြည်စုံစွာပါရှိစေရန်နှင့်ထုပ်ပိုးသည့် ကုန်ပစ္စည်းများအား သန့်ရှင်းသပ်ရပ်စေရန်နှင့် ဈေးကွက်အတွင်းတင်ပို့ရောင်းချရာတွင် ကုန်အညွှန်းအမှတ်အသားများပြည့်စုံစွာပါရှိသည့် ပစ္စည်း များကို ရောင်းချပါရန် အသိပညာပေးဟောပြောခဲ့ပါသည်။

DOCA(မန္တလေး)

   ဝန်ထမ်းများအနေဖြင့် ရုံးချိန်အတွင်း ပြင်ပထွက်ခွာရာတွင်လည်းကောင်း၊ တာဝန်ဖြင့်သွားလာရာ၌ လည်းကောင်း ဌာနအကြီးအကဲနှင့် မိမိဌာနတာဝန်ခံများအား သတင်းပို့သည့်စနစ်အား အလေးထား ဆောင်ရွက်သွားရန်လိုကြောင်း တင်ပြဆွေးနွေးခဲ့ပါသည်။

          စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် ထုတ်ကုန်လုံခြုံစိတ်ချရမှုဌာနခွဲတာဝန်ခံ ဒေါ်ချောစုထွေး၊ဦးစီးမှူး ဦးဆောင်သော ဈေးကွက်စောင့်ကြည့် စစ်ဆေးရေးအဖွဲ့သည် အထွေထွေအုပ်ချုပ်ရေးဦးစီးဌာန၊ ခရိုင်အစား အသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်ပြည်သူ့ကျန်းမာရေး၊ မြို့နယ်စည်ပင် သာယာရေးအဖွဲ့နှင့် မြန်မာနိုင်ငံရဲတပ်ဖွဲ့တို့ပူးပေါင်း၍ ၂၀၂၅ ခုနှစ် ဒီဇင်ဘာလ (၂)ရက်နေ့ ၊ နံနက် (၁၀း၀၀) အချိန်တွင် မိတ္ထီလာ မြို့ပေါ်ရှိ ဆေးဆိုင်များအား ဈေးကွက်စောင့်ကြည့်စစ်ဆေးခဲ့ပါသည်။

      ထိုသို့ကွင်းဆင်းခဲ့ရာတွင် မိတ္ထီလာမြို့နယ်ရှိ ဆေးဆိုင်များသို့ ကွင်းဆင်းစစ်ဆေးရာတွင် ဆေးဈေးနှုန်းများမှာ (၁၀%) ခန့် မြင့်တက်လာကြောင်း၊ Isosorbide 10 mg (နှလုံးဆေး)နှင့် Potassium Chloride (ဆီး ဆေး) တို့မှာ ဈေးကွက်အတွင်း ပြတ်နေသည်မှာ နှစ်လခန့်ရှိကြောင်း၊ အဆိုပါဆေးများကို ယခင်က Sun Co., Ltd နှင့် Right & Bright Co.,ltd တို့မှ တင်သွင်းခဲ့ကြောင်း၊ ဆေးတွေကို ကုမ္ပဏီတွေမှ လိုသလောက်မရရှိပဲ ခွဲတမ်းဖြင့်သာရရှိကြောင်း၊ ဆေးအများစုမှာ တံဆိပ်အမျိုးမျိုးဝင်ရောက်လျက်ရှိပြီး၊ လူနာများအနေဖြင့် သောက်နေကျဆေးမရရှိပဲ အာနိသင်တူ တံဆိပ်အတူဆေးများသာ ရောင်းချရကြောင်း၊ တံဆိပ်စွဲသောက်သော လူနာများအနေဖြင့် အခက်အခဲ ရှိကြောင်း၊ ဆေးအများစုမှာ တံဆိပ်မတူတာပဲဖြစ်ပြီး၊ အာနိသင်တူသည့်ဆေးများမှာ ဈေးကွက်အတွင်း ပြတ်လပ်မှုမရှိကြောင်း၊  ဆေးအများစုမှာ အမှတ်တံဆိပ်ကွဲလွဲမှုရှိသော်လည်း အာနိသင် တူသည့် ဆေးများမှာ ဈေးကွက်အတွင်းပြတ်လပ်မှုမရှိ၍ လူနာများအတွက် အဆင်ပြေမှုရှိ သော်လည်း တံဆိပ်စွဲသောက်သူများအတွက်သာ အခက်အခဲရှိကြောင်း၊ အချို့သောခွဲတမ်းနှင့် ရရှိသောဆေးများမှာ (၁၀%) ခန့်ဈေးတက်ကြောင်း၊ လက်ရှိအခြေအနေတွင် ဈေးကွက်အတွင်း နာမည်ရတံဆိပ်ရှိသော  ဆေးများပြတ်လပ်မှုရှိလာသည့်အတွက်   အာနိသင်တူတံဆိပ်မတူနာမည်မရှိသော တံဆိပ်များဈေးကွက်အတွင်း အစားထိုးဝင်ရောက်လာသဖြင့် ဆေးဈေးကွက်အတွင်း ပစ္စည်းပြတ်လပ်မှုမရှိကြောင်း သိရှိရသည်။  

DOCA(မန္တလေး) 

   မန္တလေးတိုင်းဒေသကြီးစားသုံးသူရေးရာဦးစီးဌာန၊ မြင်းခြံခရိုင်ဦးစီးမှူးရုံးမှ ဦးဝင်းထွန်းဦး (ဦးစီးမှူး)နှင့်ဝန်ထမ်းများသည် ၂၀၂၅ ခုနှစ်၊ ဒီဇင်ဘာလ (၂)ရက်နေ့၊ မွန်းလွဲ (၁:၀၀)နာရီအချိန်တွင် မြင်းခြံမြို့၊အမှတ်(၆)ရပ်ကွက်ရှိ “အလင်း‌ရောင် အခြေခံပညာအထက်တန်းကျောင်း(ခွဲ)” သို့ သွားရောက် ၍ စားသုံးသူကာကွယ်ရေးဆိုင်ရာ အသိပညာပေးဟောပြောခြင်း၊ စားသုံးသူနစ်နာမှု ရှိပါက Call Center ၁၅၃၅ သို့ ဖုန်းခေါ်ဆို၍ အလွယ်တကူတိုင်ကြားနိုင်ရန်နှင့် ကုန်အညွှန်းအမှတ်အသား ဖော်ပြ ခြင်းဆိုင်ရာ အသိပညာပေးဟောပြောပွဲကိုကျင်းပခဲ့ရာ ဟောပြောပွဲသို့ဆရာ/ဆရာမ(၁၀)ဦး၊ ကျောင်းသား/ကျောင်းသူ(၂၅၀)ဦးခန့် တက်ရောက်ခဲ့ပါသည်။

      အဆိုပါဟောပြောပွဲတွင် ဦးဝင်းထွန်းဦး(ဦးစီးမှူး)မှ စားသုံးသူကာကွယ်ရေးနှင့်ပတ်သက်၍ စားသုံးသူကာကွယ်ရေးဥပဒေပြဌာန်းချက်ပါ စားသုံးသူအခွင့်အရေးနှင့်တာဝန်များ၊ ကုန်စည်တစ်ခုကို ဝယ်ယူမည်ဆိုပါက စစ်ဆေးကြည့်ရှုရမည့်အချက်များ၊ ဘေးအန္တရာယ်ဖြစ်စေနိုင်သည့် အစားအစာများ နှင့် စားသုံးရန်သင့်/မသင့်ကို စားသုံးသူကိုယ်တိုင် ဝေဖန်သုံးသပ်နိုင်မည့် သိရှိသင့်သည့် ကုန်အညွှန်း အမှတ်အသားပါအချက်အလက်များ၊ စားသုံးသူနစ်နာခြင်းနှင့်ပတ်သက်၍ တိုင်ကြားနိုင်သည့် နည်းလမ်း များကို အသိပညာပေးဟောပြောခဲ့ပြီး မေးခွန်းများမေးမြန်းခြင်း၊ ဆုချီးမြှင့်ခြင်းများနှင့် လက်ကမ်း စာစောင်များ ဖြန့်ဝေခဲ့ကြောင်း သတင်းရရှိရပါသည်။

DOCA(မန္တလေး)

   စားသုံးသူပြည်သူများ ကုန်စည်နှင့်ဝန်ဆောင်မှုများ သုံးစွဲရာတွင် ထိခိုက်နစ်နာမှုမရှိစေရေး၊ လုံခြုံစိတ်ချရမှုရှိစေရေး၊ ဥပဒေပြဌာန်းချက်များနှင့်ကိုက်ညီမှုမရှိဘဲ မမှန်မကန်ထုတ်လုပ်ဖြန့်ဖြူး ရောင်းချလျက်ရှိသော ကုန်စည်များနှင့် လုံခြုံစိတ်ချရမှုမရှိသောကုန်စည်များ လျော့နည်းပပျောက် သွားစေရေး၊ ဖြစ်သင့်ဖြစ်ထိုက်သောနှုန်းထားများဖြင့် ဝယ်ယူသုံးစွဲနိုင်ရေးတို့အတွက် စားသုံးသူရေးရာ ဦးစီးဌာန၊ မြင်းခြံခရိုင်ဦးစီးမှူးရုံးအနေဖြင့် ဈေးကွက်စောင့်ကြည့် စစ်ဆေးခြင်းများကို အစဉ်တစိုက် ဆောင်ရွက်လျက်ရှိပါသည်။

             (၂.၁၂.၂၀၂၅)ရက်နေ့၊ နေ့လည် (၁၄:၃၀) နာရီအချိန်တွင် စားသုံးသူရေးရာဦးစီးဌာန မြင်းခြံခရိုင်ဦးစီးမှူးရုံးမှ ဦးတင်ဇော်ထွေး(ဒု-ခရိုင်ဦးစီးမှူး) ဦးဆောင်၍ ဝန်ထမ်းများသည် မြင်းခြံမြို့ရှိ အမှတ် (၁)ရပ်ကွက်ရှိ စံချိန်မှီဆေးနှင့်ဆေးအရောင်းတွင် သက်ဆိုင်ရာဌာနထောက်ခံချက် ပါဝင်သော ဆေးဝါးများနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ် အသားဖော်ပြခြင်းများနှင့် ကိုက်ညီသော ဆေးဝါးများသာရောင်းချစေရေး သတ်မှတ်ချက်နှင့်ကိုက်ညီသော ဆေးဝါးများရောင်းချ ရာတွင် လက်ကားဈေးအပေါ်တွင် ဒေသပေါက်ဈေးထက် ဈေးနှုန်းပိုမိုသော အမြတ်တင်ရောင်းချမှု များမဖြစ်ပေါ်စေရေး၊ ဆေးဝါးလက်ကျန်အခြေအနေနှင့်ဆေးဝါးများပြတ်လပ်မှု မဖြစ်ပေါ်စေရေး ကွင်းဆင်းစိစစ်မှုများဆောင်ရွက်ခဲ့ပြီး ဆက်လက်၍လည်း အပတ်စဉ်တိုင်း ကွင်းဆင်းစိစစ်မှုများ ဆောင်ရွက်သွားမည်ဖြစ် ကြောင်း သိရသည်။

DOCA(မန္တလေး)