သတင်းနှင့် လှုပ်ရှားမှုများ

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံး သူကာကွယ်ရေးလုပ်ငန်းများ ခိုင်မာတိုးတက်စေရေး၊ စားသုံးသူနှင့်စီးပွားရေးလုပ်ငန်းရှင်တို့ကြား မျှတသောလုပ်ငန်းစဉ်များဖြစ်ပေါ်စေရေး၊စားသုံးသူများစိတ်ကျေနပ်မှုရရှိစေရေးနှင့် စားသုံးသူကာကွယ်ရေးဥပဒေကို ပိုမိုထိရောက်စွာ အကောင်အထည်ဖော်နိုင်ရေးတို့အား ဆောင်ရွက်လျက်ရှိရာ ၁၈.၁၁.၂၀၂၅ ရက်နေ့၊ နေ့လည် ၁၄:၀၀ နာရီအချိန်တွင် စားသုံးသူရေးရာဦးစီးဌာန၊ မြင်းခြံ ခရိုင်ဦးစီးမှူးရုံးတွင် မြင်းခြံမြို့နယ်ရှိ ဆက်သွယ်ရေးဝန်ဆောင်မှုလုပ်ငန်းရှင်များနှင့် တွေ့ဆုံဆွေးနွေး ပွဲအား ဆောင်ရွက်ခဲ့ပါသည်။ တွေ့ဆုံဆွေးနွေးမှုတွင် စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူး ဦးသန်းစိုး (လက်ထောက်ညွှန်ကြားရေးမှူး)က စားသုံးသူကာကွယ်ရေးဥပဒေပါ ဝန်ဆောင်မှု၏အဓိပ္ပာယ်၊ ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းနှင့်အာမခံချက်နှင့်စပ်လျဉ်း၍ စားသုံးသူက တောင်းဆို နိုင်သည့်အခွင့်အရေးများ၊ ဝန်ဆောင်မှုနှင့်စပ်လျဉ်း၍ လုံခြုံစိတ်ချရမှုများ၊ ဆက်သွယ်ရေးညွှန်ကြားမှု ဦးစီးဌာနမှ လိုင်စင်ရရှိသည့် လုပ်ငန်းရှင်များနှင့် မိုဘိုင်းအော်ပရေတာများသို့ ညွှန်ကြားထားသည့် အချက်များအား ရှင်းလင်းဆွေးနွေးခဲ့ပါသည်။ ဆက်လက်၍  ဒု-ခရိုင်ဦးစီးမှူးနှင့် စားသုံး/ထုတ်လုံဌာနခွဲတာဝန်ခံတို့မှ လုပ်ငန်းရှင်များသိရှိလို သည်များအား ပြန်လည်ရှင်းလင်းဆွေးနွေးခဲ့ပြီး၊ အဆိုပါဆွေးနွေးပွဲသို့ မြင်းခြံမြို့နယ်ရှိ အင်တာနက်ဝန်ဆောင်မှုလုပ်ငန်းများဖြစ်သော MPT ၊ Mytel ၊ Oceon Wave ၊ Fly Net ၊ Fiber Life ၊ ERI / MGT စသည့်လုပ်ငန်းများမှ တာဝန်ရှိသူ(၆)ဦးတက်ရောက်ခဲ့ကြောင်း သိရသည်။

DOCA(မန္တလေး)

       စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ရုံးမှ စစ်ဆေးရေးအရာရှိ ဦးသိန်းထွန်းနှင့် ဝန်ထမ်းများသည် (၂၁.၁၁.၂၀၂၅) ရက်နေ့၊ နေ့လယ်(၁၅:၀၀) နာရီအချိန်တွင်  အမှတ်(၇၈)၊ သမိန်ဗရမ်းလမ်း၊ တာမွေမြို့နယ်သို့သွားရောက်၍ လူသုံးကုန်ပစ္စည်းများအား Online Sale မှတ်ပုံ တင်မြေပြင်စစ်ဆေးခြင်းဆိုင်ရာ အချက်အလက်များကိုက်ညီမှုရှိ/ မရှိကို စစ်ဆေးခဲ့ကြောင်း သိရှိရပါသည်။

       ထိုသို့ကွင်းဆင်းခဲ့ရာတွင် စစ်ဆေးရေးအရာရှိက Online စနစ်ဖြင့်ရောင်းချနေသော အ‌ရောင်းဆိုင်များသို့ မှတ်ပုံတင်လက်မှတ်လျှောက်ထားမှုနှင့် စပ်လျဉ်း၍ မြေပြင်ကွင်းဆင်းဆောင်ရွက်ရာတွင် လုပ်ငန်းရှင်များလျှောက်လွှာပုံစံတွင် ဖြည့်သွင်းထားသည့် လိပ်စာအတိုင်း လုပ်ငန်းအမှန်တစ်ကယ်တည်ရှိခြင်းရှိ/ မရှိ၊ မှတ်ပုံတင်လက်မှတ်လျှောက်ထားစဉ်က ရောင်းချရန်တင်ပြထားသော ကုန်စည်(သို့)ဝန်ဆောင်မှု အမျိုးအစားစာရင်းအတိုင်း မြေပြင်တွင် အမှန်တစ်ကယ်ရောင်းချနေသော စာရင်းကိုက်ညီမှုရှိ/ မရှိတို့ကို မြေပြင်ကွင်းဆင်းစစ်ဆေးရာတွင် မြေပြင်စစ်ဆေးရမည့်အချက်(၁၈)ချက်နှင့် ကိုက်ညီမှုမှန်ကန်မှုရှိ/ မရှိကို စစ်ဆေးပြီးမှသာ Online Sale လုပ်ငန်းမှတ်ပုံတင်လက်မှတ်များ ထုတ်ပေးသွားမှာဖြစ်ကြောင်း အသိပေးပြောကြားခဲ့ကြောင်း သိရှိရပါသည်။

DOCA(ရန်ကုန်)

                မန္တလေးတိုင်းဒေသကြီး ငါန်းဇွန်မြို့နယ်ရှိ မြို့ပေါ်ရပ်ကွက်များ၊ ကျေးရွာများနှင့် ဌာနဆိုင်ရာ ဝန်ထမ်းများအား နိုင်ငံတော်မှသတ်မှတ်ရည်ညွှန်းဈေးနှုန်းဖြင့် ရောင်းချပေးသောစားအုန်းဆီများ လစဉ်လတိုင်း ရောင်းချပေးလျက်ရှိကြောင်း သိရသည်။ ၂၀၂၅ ခုနှစ် နိုဝင်ဘာလ ဒုတိယပတ်တွင် အိမ်ထောင်စုတစ်စုလျှင် (၂)ပိဿာနှုန်းဖြင် တစ်ပိဿာ (၇၇၀၀)ကျပ်ဈေးဖြင့် လည်းကောင်း၊ ရောင်းချ ပေးလျက်ရှိကြောင်း၊ ဌာနဆိုင်ရာဝန်ထမ်းများအား လစဉ် (၁၅)ရက်နေ့ တစ်ကြိမ်၊ လကုန် ရက်တွင်  တစ်ကြိမ် ပေါင်းနှစ်ကြိမ်(နှစ်ပိဿာ) ရောင်းချပေးကြောင်းနှင့် ပင်စင်စားဝန်ထမ်း များအား လစဉ် (၂၃)ရက်နေ့မှ (၂၅) ရက်အတွင်း ရောင်းချပေးကြောင်း၊ ထိုသို့ရောင်းချရာတွင် အလေးချိန်မှန်၊ သတ်မှတ်သောဈေးနှုန်းမှန်ကန်စွာဖြင့် ရောင်းချပေးကြောင်း၊ ဒေါ်သန့်သန့် (ဆီကိုယ်စားလှယ်) ထံမှ သိရှိရသည်။  

DOCA(မန္တလေး)

     ၂၁.၁၁.၂၀၂၅ ရက်နေ့တွင် စားသုံးသူရေးရာဦးစီးဌာန၊ မုဒုံမြို့နယ်တာဝန်ခံသည်  မိတ်ဖက်ဌာနများနှင့်ပူးပေါင်း၍ မုဒုံမြို့နယ်၊ ရွှေဟင်္သာဈေးအအတွင်းရှိ အလှကုန်ဆိုင်များတွင် ရောင်းချလျှက်ရှိသော ဆံပင်ပြုပြင်ရန် သုံးစွဲပစ္စည်းအမျိုးမျိုးတို့ကို ကွင်းဆင်းစစ်ဆေးခဲ့ကြောင်း သိရှိရပါသည်။

    ထိုသို့ ကွင်းဆင်းစစ်ဆေးရာတွင် မုဒုံမြို့နယ်အတွင်းရှိ ရွှေဟင်္သာဈေးအအတွင်းရှိ အလှကုန်ဆိုင်များတွင် ရောင်းချ လျက်ရှိသော ဆံပင်ပြုပြင်ရန် သုံးစွဲပစ္စည်းအမျိုးမျိုးတို့အား ကုန်အညွှန်းအမှတ်အသား ပြည့်စုံမှန်ကန်မှု ရှိ/မရှိ ၊ ဘေးအန္တရာယ် ဖြစ်နိုင်ချေ ရှိ/မရှိ၊ ကုန်ပစ္စည်းတစ်မျိုးချင်းစီအလိုက် ကြိုတင်သတိပေးထားချက်မရှိသော ကုန်စည်များ ရောင်းချ ခြင်း ရှိ/မရှိ တို့ကို ကွင်းဆင်း ကြီးကြပ်ဆောင်ရွက်ခဲ့ပါကြောင်း သိရှိရပါသည်။

DOCA (မွန်)

      ၂၁.၁၁.၂၀၂၅ ရက်နေ့တွင် မွန်ပြည်နယ်အစိုးရအဖွဲ့အစီအစဉ်ဖြင့် ပြည်နယ်စားသုံးသူ ရေးရာဦးစီးဌာနမှ ကြီးကြပ်၍ မော်လမြိုင်မြို့၊ မြန်မာ့စီးပွားရေးဘဏ် (၁)နှင့် ဘဏ်(၂)တို့၌ ပင်စင်လစာ လာရောက်ထုတ်ယူကြသော အငြိမ်းစားနိုင်ငံ့ဝန်ထမ်းများအား သက်သာသော ဈေးနှုန်းဖြင့် စားအုန်းဆီနှင့် ကြက်သွန်နီများ၊ ဆန်နှင့်ကြက်ဥများ ရောင်းချပေးခဲ့ရာ အဆိုပါ နေရာသို့ ပြည်နယ်ဝန်ကြီးချုပ်နှင့် အစိုးရအဖွဲ့ဝင်ဝန်ကြီးများ၊ ဌာနဆိုင်ရာများ လာရောက် ကြည့်ရှုအားပေးခဲ့ကြကြောင်း သိရှိရပါသည်။

          ယင်းသို့ ရောင်းချဆောင်ရွက်ရာတွင် စားအုန်းဆီ တစ်ပိဿာ (ဗူးခွံပါ) ၈၀၀၀/- ကျပ် နှုန်းဖြင့် ပိဿာ ၈၈၀  ပိဿာ၊ ကြက်သွန်နီ တစ်ပိဿာလျှင် ၁၅၀၀/- ကျပ်နှုန်းဖြင့် ပိဿာချိန် ၁၀၀၀ ၊ ကြက်ဥ ၁၀ လုံးလျှင် ၄၀၀၀/- ကျပ်ဖြင့် ကြက်ဥအလုံးရေ ၇၂၀၀ ၊ ဧည့်မထဆန် ၆ ပြည် (၁)အိတ်လျှင် ၁၅၅၀၀/- ကျပ်နှုန်းဖြင့်(၁၀)အိတ်၊ ဧရာဝတီပေါ်ဆန်း ၆ ပြည်အိတ် (၁)အိတ်လျှင် ၃၁၅၀/- ကျပ်နှုန်းဖြင့် (၂၀) အိတ်၊ ကျားပျံ ၆ ပြည် (၁)အိတ်လျှင် ၃၅၀၀၀/-နှုန်းဖြင့် (၂၀) အိတ် ရောင်းချပေးခဲ့ကြောင်း သိရှိရပါသည်။

DOCA (မွန်)