သတင်းနှင့် လှုပ်ရှားမှုများ

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံး အနေဖြင့် အွန်လိုင်းစနစ်ဖြင့်ရောင်းချသည့်လုပ်ငန်းများအား မြေပြင်စစ်ဆေးခြင်းလုပ်ငန်းများ ဆောင်ရွက် လျက်ရှိရာ (၉.၄.၂၀၂၆)ရက်နေ့၊  နံနက်(၁၀:၃၀)နာရီအချိန်တွင် ရွှေဘိုခရိုင်စားသုံးသူရေးရာဦးစီးဌာနမှ ခရိုင်ဦးစီးမှူး၊ ဒု-ခရိုင်ဦးစီးမှူးနှင့် ရွှေဘိုမြို့နယ်တာဝန်ခံ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံတို့သည် ရွှေဘိုမြို့၊ အမှတ်(၄)ရပ်ကွက်ရှိ “Shinli Outfit Collection” အထည်အလိပ်၊ အဝတ်အထည်နှင့် ဆက်စပ် ပစ္စည်းလုပ်ငန်းနှင့် “Vinn Foxx Bookshop Shwebo (ဗင်ဖို့စ်စာအုပ်ဆိုင် ရွှေဘိုမြို့ Business Type)”စာအုပ်စာတမ်းများနှင့် စားရေးကိရိယာပစ္စည်းများ Online Sale လုပ်ငန်းအား မြေပြင်ကွင်းဆင်း စစ်ဆေးခဲ့ပါသည်။

               ထိုသို့စစ်ဆေးရာတွင် စားသုံးသူရေးရာဦးစီးဌာနမှ ရွှေဘိုခရိုင်ဦးစီးမှူးက Online Sale မှတ်ပုံတင် လုပ်ငန်းဆောင်ရွက်ခြင်းအတွက် လိုအပ်သောအချက်အလက်များ၏ မြေပြင်စစ်ဆေးရာ ကိုက်ညီမှုရှိသဖြင့် တွေ့ရှိချက်များကို Online Sale  Application တွင်ဖြည့်သွင်းခြင်းများဆောင်ရွက်ခဲ့ပြီး အဆိုပါမြေပြင် စစ်ဆေးတွေ့ရှိချက်များကို ကုန်သွယ်ရေးဦးစီးဌာနမှ ဆက်လက်စိစစ်ပြီးပါက လုပ်ငန်းမှတ်ပုံတင် လက်မှတ် ထုတ်ပေးခြင်း(သို့) ပယ်ဖျက်ခြင်းတို့ကို ဆက်လက်ဆောင်ရွက်သွားမည်ဖြစ်ကြောင်းနှင့် မှတ်ပုံတင်ခြင်း၊ သက်တမ်းတိုးခြင်း၊ ပြင်ဆင်ခြင်းတို့အတွက် သတ်မှတ်နှုန်းထားများ၊ Online Saleမှတ်ပုံတင်လက်မှတ်ရရှိသူ၏ အခွင့်အရေးများ၊ စားသုံးသူကာကွယ်ရေးဥပဒေပါ ကုန်အညွှန်းအမှတ် အသားဖော်ပြခြင်းအကြောင်းများ၊ စားသုံးသူအခွင့်အရေးနှင့် စီးပွားရေးလုပ်ငန်းရှင်၏တာဝန်များ  ရှင်းလင်းဆွေးနွေးခဲ့ကြကြောင်း သတင်းရရှိပါသည်။

DOCA(စစ်ကိုင်း)

                   စားသုံးသူရေးရာဦးစီးဌာန၊ ပြည်ခရိုင်ဦးစီးမှူး၏ လမ်းညွှန်မှုအရ ပြည်မြို့နယ်တာဝန်ခံနှင့် ဝန်ထမ်းများသည် မိတ်ဖက်ဌာနဆိုင်ရာများဖြစ်ကြသည့် ခရိုင် FDA မြို့နယ်ထွေအုပ်၊ မြို့နယ်စည်ပင်၊ မြို့နယ်ပြည်သူ့ကျန်းမာရေးနှင့် မြို့နယ်ရဲတပ်ဖွဲ့မှ တာဝန်ရှိသူများနှင့်အတူ ပြည်မြို့နယ်အတွင်းရှိ ဆေးဝါးနှင့် ဆေးပစ္စည်းအရောင်းဆိုင်များသို့ သွားရောက်၍ မြို့နယ်အစားအသောက်နှင့် ဆေးဝါး ကြီးကြပ်ကွပ်ကဲရေးကော်မတီအဖွဲ့ဖြင့် ရှောင်တခင် ဝင်ရောက်စစ်ဆေးခဲ့ကြောင်း သိရှိရပါသည်။

          အဖွဲ့အနေဖြင့် ဆေးဝါးနှင့် ဆေးပစ္စည်းမျးအား ဈေးကစားရန် ရည်ရွယ်၍ ဈေးနှုန်းမြှင့်တင် ရောင်းချခြင်း၊ သိုလှောင်ခြင်းမရှိစေရေး ကွင်းဆင်းစစ်ဆေးခြင်း၊ တိုင်းရင်းဆေးများတွင် တိုင်းရင်း ဆေးကုဌာန၏ ဆေးဝါးထုတ်လုပ်ခွင့် လိုင်စင်ပါဝင်မှုရှိ/ မရှိ၊ သက်တမ်းလွန်ဆေးဝါးများ ရောင်းချမှုရှိ/ မရှိအား ကွင်းဆင်းစစ်ဆေးခဲ့ကြောင်း သိရပါသည်။

DOCA(ပဲခူး)

                    ပဲခူးတိုင်းဒေသကြီး၊ ပြည်ခရိုင်အတွင်း ၂၀၂၆ခုနှစ်၊ မတ်လအတွင်း သယ်ယူပို့ဆောင်ရေး ဝန်ဆောင်မှုလုပ်ငန်းများ ရရှိစေရန် စားသုံးသူများ၏ လူနေမှုဘဝ အဆင်ပြေချောမွေ့ စေရန် ရည်ရွယ်၍ ပြည်ခရိုင်အတွင်းရှိ မြို့နယ်တာဝန်ခံများမှ ပြည်မြို့နယ်တွင် မြို့သစ်ကားကြီး ဂိတ်ဝန်းအတွင်းရှိ “မြတ်မန္တလာထွန်း” (မန္တလေး-ပြည်-ကြို့ပင်ကောက်)၊ “အောင်လံမိုး” (ပြည်-တောင်တွင်းကြီး-အောင်လံ)၊ “ကောင်းကင်မိုး” (အောင်လံ-ကိုးပင်-သာဂရ-ဆွာ-ရေတာရှည်-တောင်ငူ)၊ ရွှေတောင်မြို့နယ်တွင် ကြာနီကန်ရပ်ကွက်တွင်းရှိ “ဘုန်းမြင့်ဇော်”(ပြည်-ရွှေတောင်-ရန်ကုန်)၊ “New Asia” (ပြည်-ရွှေတောင်-ရန်ကုန်)   သို့လည်းကောင်း သယ်ယူပို့ဆောင်ရေး ဝန်ဆောင်မှုလုပ်ငန်းများ ဆောင်ရွက် နေသည်ကို ကွင်းဆင်းစစ်ဆေး၍ သတ်မှတ်ဦးရေထက် ပိုမိုတင်ဆောင်ခြင်း ရှိ/မရှိ၊ ယာဉ်မောင်းအရက်သေစာ သောက်စားထားခြင်း ရှိ/မရှိ၊ ယာဉ်အန္တရာယ် ကင်းရှင်းစေရေးအတွက် ထုတ်ပြန်ထားသော သက်ဆိုင်ရာဌာနများ၏ စည်းကမ်းချက်များနှင့်အညီ လိုက်နာဆောင်ရွက်ခြင်း ရှိ/မရှိ၊ ခရီးသွားလာမှုနှင့် ကုန်စည်တန်ဆာ ပေးပို့မှုစသည့် ဝန်ဆောင်မှုများကို အသုံးပြုသည့် စားသုံးသူများအနေဖြင့် အခြေခံလိုအပ်ချက် များအပေါ် စိတ်ကျေနပ်ဖွယ်ရရှိစေရေး ဆောင်ရွက်ပေးရန်နှင့် နစ်နာဆုံးရှုံးမှုများ ဖြစ်လာပါက ဖြစ်သင့် ဖြစ်ထိုက်သော ကုစားခွင့်ရရှိစေရေး ဆောင်ရွက်ပေးရန် သိရှိလိုက်နာမှုရှိ/မရှိ၊ စသည့်အချက် အလက်များကို စစ်ဆေးခဲ့ပြီး သက်ဆိုင်ရာ မော်တော်ယာဉ်လိုင်းများအနေဖြင့် ပြည်သူများ စိတ်ကျေနပ်မှုရရှိအောင် ဆောင်ရွက်ပေးနိုင်ရေး ဆွေးနွေးပြောကြား ခဲ့ကြောင်း သတင်းရရှိပါသည်။

DOCA(ပဲခူး)

                 စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံး အနေဖြင့်   ရပ်ကွက်/ကျေးရွာနေ    စားသုံးသူပြည်သူများနှင့် တိုင်းပြည်၏ အနာဂတ်မျိုးဆက်သစ်များဖြစ်သော   ကျောင်းသား/ကျောင်းသူများအား စားသုံးသူကာကွယ်ရေးဆိုင်ရာ အသိပညာများ ကျယ်ကျယ် ပြန့်ပြန့်သိရှိနိုင်စေရေး ရည်ရွယ်၍ ခရိုင်အတွင်း မြို့နယ်များရှိ ရပ်ကွက်/ ကျေးရွာများနှင့် အခြေခံ ပညာကျောင်းများတွင် အသိပညာပေးဟောပြောဆွေးနွေးခြင်းများကို အင်တိုက်အားတိုက် လုပ်ဆောင်လျက်ရှိရာ ပြည်ခရိုင်အတွင်း ၂၀၂၆ ခုနှစ်၊ မတ်လ(၁၆)ရက်မှ(၃၁)ရက်အတွင်း ပြည်ခရိုင်ဦးစီးမှူး ဦးမင်းဆွေက ပြည်မြို့နယ် သူနာပြုနှင့်သားဖွားအသက်မွေးသင်တန်းကျောင်းရှိ သူနာပြုကျောင်းသား/ကျောင်းသူများသို့လည်းကောင်း၊ ပြည်ခရိုင်ဦးစီးမှူးရုံး၏ စားသုံး/ထုတ်လုံ ဌာနခွဲတာဝန်ခံ ဦးစီးမှူး ‌ဒေါ်ဝင်းလဲ့ဝါက ပြည်ခရိုင်ဘေးအန္တရာယ်ဆိုင်ရာစီမံခန့်ခွဲမှုဦးစီးမှူးရုံး၌ ခရိုင်ဌာနဆိုင်ရာဝန်ထမ်းများအားလည်းကောင်း ၊ ပြည်မြို့နယ်တွင် ကိုးသောင်းရပ်ကွက် ချင်းစုရွာရှိ ပြည်သူများအားလည်းကောင်း၊ ရွှေတောင်မြို့နယ်နှင့် ပန်းတောင်းမြို့နယ်တို့တွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာန နှင့်ပူးပေါင်း၍ စားသုံးသူအသိပညာပေး Talk Show ပွဲပြုလုပ် ဆောင်ရွက်ခြင်းကို လည်းကောင်း၊ သက်ဆိုင်ရာ မြို့နယ်တာဝန်ခံများနှင့် ဝန်ထမ်းများသည် စားသုံးသူကာကွယ်ရေးဆိုင်ရာ အသိပညာပေးဟောပြောခြင်းများဆောင်ရွက်ခဲ့ပါသည်။

                    အဆိုပါ အသိပညာပေး ဟောပြောခြင်းများ ဆောင်ရွက်ရာတွင် သက်ဆိုင်ရာ မြို့နယ် တာဝန်ခံများမှ စားသုံးသူ အခွင့်အရေးများနေ့ဖြစ်ပေါ်လာပုံ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဖေါ်ပြခြင်းဆိုင်ရာအချက်များ၊ နစ်နာဆုံးရှုံးမှုရှိပါက တိုင်ကြားနိုင်သည့် ပုဂ္ဂိုလ်များနှင့် နည်းလမ်းများတိုင်ကြားနိုင်မည့်ဖုန်းနံပါတ်နှင့်လိပ်စာ၊စားသုံးသူကာကွယ်ရေးဥပဒေပါပြစ်မှုပြစ်ဒဏ်များအကြောင်း၊ သက်ဆိုင်ရာဌာနများက စားသုံးရန်မသင့်ဟုတားမြစ်ထုတ်ပြန်ထားသောကုန်စည်များအားရွေးချယ်ဝယ်ယူခြင်းမပြုရန်၊ ကုန်အညွှန်းအမှတ်အသား ပြည့်စုံစွာပါဝင်သော ကုန်စည်များကိုသာ ရွေးချယ်ဝယ်ယူကြရန် အသိပညာပေးဟောပြောခြင်းများ ဆောင်ရွက်ခဲ့ကြောင်းသိရပါသည်။

DOCA(ပဲခူး)

                   ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့နယ်မှ စားသုံးသူရေးရာ ဦးစီးဌာနမှ မြို့နယ်တာဝန်ခံ ဒေါ်ရီရီရှိန်သည် (၂.၄.၂၀၂၆) ရက်နေ့၌ Online Shop စနစ်ဖြင့် ရောင်းချနေသော ဒေါ်အိမွန်သန်း၊ပုန်းဆိုးအုပ်စု ခုနှစ်ရွာကျေးရွာသို့ အမှန်တကယ်  Online ဖြင့် ရောင်းချမှုရှိ/မရှိတို့အား သိရှိနိုင်ရန် မြေပြင်ကွင်းဆင်း သွားရောက်စစ်ဆေးခဲ့ပါသည်။

          လုပ်ငန်းရှင်ဒေါ်အိမွန်သန်းမှာ သူ၏ Facebook Page Account ကို အသုံးပြု၍ စားသောက် ကုန်မျိုးစုံ၊အသီးအနှံမျိုးစုံတို့အား အခြားဒေသမှ မှာယူပြီး အိမ်တွင်းစီးပွားရေးတစ်ခုအဖြစ် ရောင်းချ ဆောင်ရွက်လျက်ရှိပါကြောင်း သိရပါသည်။ယခုမြေပြင်ကွင်းဆင်းစစ်ဆေးရာတွင်လည်း Online အသီးအနှံရောင်းဝယ်ရေးနှင့် စားသောက်ကုန်မျိုးစုံတို့အား နေ့စဉ်အရောင်းအဝယ်ဆောင်ရွက်လျက် ရှိပါကြောင်း စစ်ဆေးတွေ့ရှိရပါသည်။တခြားစားသောက်ကုန်များ ရောင်းချလျှင် ကုန်အညွှန်းအမှတ်အသား ပြည့်စုံစွာပါရှိသော ပစ္စည်းများကိုသာ ရောင်းချရန် မြို့နယ်တာဝန်ခံမှ အသိပညာပေး ဆွေးနွေးပြောကြားခဲ့ပြီး ဌာနမှ လက်ကမ်းစာစောင်များ ဖြန့်ဝေခဲ့ပါသည်။

DOCA(ပဲခူး)