သတင်းနှင့် လှုပ်ရှားမှုများ

           စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် မိတ္ထီလာမြို့နယ်၊ ဒေါ်မြို့ရီ ( ဒု-ခရိုင်ဦးစီးမှူး) ပါ (၂)ဦးတို့သည့် ၂၀၂၆ ခုနှစ်၊ စက်တင်ဘာလ ၁၆ ရက်နေ့တွင် ဝမ်းတွင်းမြို့နယ်ရှိ တော်ဝင်နန်းအထည်Online Sale ရောင်းချသည့်ဆိုင်သို့ မြေပြင်ကွင်းဆင်း စစ်ဆေးခဲ့ကြောင်း သိရသည်။

                     အဆိုပါ ကွင်းဆင်းစစ်ဆေးရာတွင် Online စနစ်ဖြင့်ရောင်းချခြင်း လုပ်ငန်းများနှင့် ပတ်သတ်၍ အချက်အလက်နှင့် ကိုက်ညီမှုရှိ/မရှိ စစ်ဆေးခြင်း၊ ရောင်းချသောပစ္စည်း များတွင် မြန်မာဘာသာဖြင့် ကုန်အညွှန်းအမှတ်သား ပြည့်စုံစွာပါဝင်ခြင်း ရှိ/မရှိ ဈေးကွက်စောင့်ကြည့် စစ်ဆေးခြင်းနှင့် Online စနစ်ဖြင့် ရောင်းချခြင်းလုပ်ငန်းကို အရေးကြီးကုန်စည်နှင့် ဝန်ဆောင်မှု ဥပဒေအဖြစ် သတ်မှတ်ထားကြောင်း၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ လိုက်နာရမည့်ချက်များနှင့်အခြားသိကောင်းစရာများအားအသိပညာပေးကွင်းဆင်းစစ်ဆေးခဲ့ကြောင်းသိရသည်။ DOCA(မန္တလေး)

             စားသုံးသူရေးရာဦးစီးဌာန၊မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် ထုတ်ကုန်လုံခြုံစိတ်ချရမှုဌာနခွဲတာဝန်ခံ ဒေါ်ချောစုထွေး (ဦးစီးမှူး)သည် (၁၁.၉.၂၀၂၆) ရက်နေ့တွင်မိတ္ထီလာမြို့နယ်၊ မိတ္ထီလာမြို့ရှိ သစ္စာမရွေး လုပ်ငန်းရှင်နှင့်တွေ့ဆုံ၍ ကုန်အညွှန်းအမှတ်အသားဆိုင်ရာများနှင့်ပတ်သတ်၍ ဆွေးနွေးခဲ့ကြောင်းသိရှိရသည်။

                   ထုတ်ကုန်လုံခြုံစိတ်ချရမှုဌာနခွဲတာဝန်ခံမှ ကုန်စည်များထုတ်လုပ်ရောင်းချခြင်းနှင့် ပတ်သက်၍ လုပ်ငန်းရှင်၏ ထုတ်ကုန်ပစ္စည်းများပေါ်တွင် မဖြစ်မနေဖော်ပြရန်လိုအပ်သည့် ကုန်အညွှန်းအမှတ် အသားများကို စားသုံးသူကာကွယ်ရေးဥပဒေ ၂၀၁၉၊ အခန်း (၁၈) တွင် ဖော်ပြထားသော ပြဌာန်းချက် များအတိုင်း ပြည့်စုံစွာဖော်ပြနိုင်ရန်၊ ကုန်စည်အမျိုးအမည်၊အရွယ်အစား၊အရေအတွက်၊အသားတင်ပမာဏ၊ထားသိုသိမ်းဆည်းပုံအညွှန်းတို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ ဖော်ပြရန် အသိပညာပေးဆွေးနွေးခဲ့ပြီး ကုန်အညွှန်းအမှတ်အသား ဖော်ပြချက်၊ မူပိုင်ခွင့်လျှောက်ထားခြင်းနှင့်ပတ်သက်၍ အသိပညာပေး ဆွေးနွေးခဲ့ကြောင်း သိရှိရသည်။

DOCA(မန္တလေး)

            စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး ဦးဇော်မင်းသည် ၂၀၂၆ခုနှစ်၊ စက်တင်ဘာလ(၁၈)ရက်နေ့တွင် မိတ္ထီလာခရိုင်၊ အထွေထွေအုပ်ချုပ်ရေးဦးစီးဌာန၊ ခရိုင်အထွေထွေအုပ်ချုပ်ရေးအစည်းအဝေးခန်းမတွင် မိတ္ထီလာ မြို့နယ်အတွင်းရှိ စက်သုံးဆီဆိုင်များမှ တာဝန်ရှိသူများနှင့် တွေ့ဆုံဆွေးနွေးပွဲကျင်းပခဲ့ကြောင်း သတင်းရရှိ ပါသည်။

            ဆွေးနွေးပွဲတွင် ခရိုင်ဦးစီးမှူးမှ စက်သုံးဆီဆိုင်များအား သတ်မှတ်ရည်ညွှန်းဈေးအတိုင်း ‌ရောင်းချရေး ၊ အချိန်အတွယ်ပြည့်မီစေရေးတို့ကို အလေးထားရောင်းချရန်ဖြစ်ကြောင်း၊ စားသုံးသူရေးရာဦးစီးဌာအနေဖြင့်လည်း စျေးကွက်စောင့်ကြည့်ကွင်းဆင်းခြင်းလုပ်ငန်းများဆောင်ရွက်နေကြောင်း၊စက်သုံးဆီဆိုင်များတွင် ရောင်းချနေသော ဈေးနှုန်းများနှင့် စက်သုံးဆီရောင်းချမှု၊ လက်ကျန်အခြေအနေများကိုလည်း နေ့စဉ်ကောက်ယူ၍ သက်ဆိုင်ရာအဆင့်ဆင့်သို့ တင်ပြ လျက်ရှိရာ မြေပြင်တွင် အမှန်တကယ်ရောင်းချသည့် အခြေအနေများကိုသာ ပေးရန်ဖြစ်ကြောင်း ၊မိတ္ထီလာခရိုင် အတွင်း စက်သုံးဆီဆိုင်ပေါင်း ၁၁၀ ဆိုင် ရှိ၍ ဝန်ထမ်းအင်အားကြောင့် ဆီဆိုင် များမှ Viber ဖြင့် ပေးပို့သည့် စနစ်ဖြင့် စက်သုံးဆီစျေးနှုန်းများနှင့် စက်သုံးဆီရောင်းချမှု၊ လက်ကျန်အခြေအနေများကိုလည်းကောက်ခံနေရကြောင်း၊ သံသယဖြစ်ပေါ်စေသော အခြေအနေများဖြစ်ပါက ကွင်းဆင်းစစ်ဆေးခြင်း လုပ်ငန်းများဆောင်ရွက်လျက်ရှိကြောင်း၊ ပေးပို့သော စာရင်းများနှင့်မြေပြင်တွင် အမှန်တကယ်ရောင်းချ သောစာရင်းများကွဲလွဲမှုရှိပါက သက်ဆိုင်ရာလုပ်ထုံးလုပ်နည်းများနှင့်အညီအရေးယူ ဆောင်ရွက်သွားရမည်ဖြစ်၍ လုပ်ငန်းရှင် များအနေဖြင့်ထိခိုက်နစ်နာမှုများမရှိစေရေးအတွက် စနစ်တကျ ဆောင်ရွက်သွားရန်နှင့် သက်ဆိုင်ရာဌာနများ၏ ညွှန်ကြားချက်များကိုလိုက်နာဆောင်ရွက်သွားကြရန်အသိပေး ဆွေးနွေး ခြင်းဖြစ်ကြောင်း သိရှိရပါသည်။

DOCA(မန္တလေး)

         စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှု၊ ပခုက္ကူခရိုင်ဦးစီးမှူး၏ ကြီးကြပ်မှုဖြင့် စားသုံးသူရေးရာဌာနခွဲတာဝန်ခံ ဒု-ဦးစီးမှူး ဒေါ်နွယ်နွယ်အေးနှင့် ဝန်ထမ်းသည် စားသုံးသူများ ကျန်းမာပျော်ရွှင်ပြီး လုပ်ငန်းရှင်များ စီးပွားရေးကျင့်ဝတ် နှင့်အညီ ထုတ်လုပ်နိုင်စေရန် ရည်ရွယ်၍ (၁၉.၉၂၀၂၆)ရက်နေ့၊ နံနက်(၁၀:၀၀) နာရီအချိန်တွင် ဒေသတွင်းထုတ်လုပ် လျက်ရှိသော “ သာထက်လျှံ ” နှင့် “အောင်မြန်မာ” မြေပဲဆုံဆီ၊ “ကောင်းကျော်” တို့ဟူးကျိုပဲမှုန့်၊  “A-1” သောက်ရေသန့် ထုတ်လုပ်ရောင်းချသော လုပ်ငန်းရှင်များထံ သို့ သွားရောက်၍ အသိပညာပေးဆွေးနွေးခဲ့ကြောင်း သိရသည်။

         ထိုသို့ဆွေးနွေးရာတွင် စားသုံးသူရေးရာဌာနခွဲတာဝန်ခံက လုပ်ငန်းရှင်များအား စားသုံးသူများ နေ့စဉ်အသုံးပြုနေရသော ထုတ်ကုန်များ၏ ဘေးကင်းလုံခြုံမှုသည် လူမှုစီးပွားဘဝလုံခြုံရေး၊ ကျန်းမာရေးနှင့် စိတ်ကျေနပ်မှုရရှိစေရေးတို့အတွက် အလွန်အရေးကြီးသောကြောင့် ယခုလို အသိပညာပေးရခြင်းဖြစ်ကြောင်း၊ သောက်ရေသန့် လုပ်ငန်းရှင်နှင့်ဆွေးနွေးရာတွင် ရေသည် လူသားတိုင်းအတွက် မရှိမဖြစ်အရေးပါသောကြောင့် သန့်ရှင်းသပ်ရပ်ပြီး ဘေးအန္တရာယ်မရှိအောင် ထုတ်လုပ်ရန်လိုအပ်ကြောင်း၊ မြေပဲဆုံဆီထုတ်လုပ်သော လုပ်ငန်းရှင်များအနေဖြင့် မြေပဲမှာ အာဖလာတောက်ဆင် မှိုဆိပ်ပါနိုင်၍ အထူးသတိပြု လုပ်ကိုင်စေလိုကြောင်း၊ စားသုံးသူကာကွယ်ရေးဥပဒေ အခန်း(၁၀)၊ ပုဒ်မ-၂၁ စီးပွားရေးလုပ်ငန်းရှင်၏တာဝန်များ၊ အခန်း(၁၈) ပုဒ်မ-၄၁၊ ၄၃ ပြဌါန်းချက်ပါ အကြောင်းအရာများ၊ အခန်း(၂၃)ပါ တားမြစ်ချက်များနှင့် အခန်း(၂၄) ပြဌါန်းချက်ပါ ပြစ်မှု၊ ပြစ်ဒဏ်များအကြောင်းအားဆွေးနွေးခဲ့ပြီး အသိပညာပေးလက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(မကွေး)

စားသုံးသူရေးရာဦးစီးဌာန၊ သတင်းအချက်အလက်နည်းပညာနှင့် အရည်အသွေးစီမံခန့်ခွဲ ရေးဌာနခွဲ၊ ကုန်ပစ္စည်းစမ်းသပ်စစ်ဆေးရေးနှင့် အရည်အသွေးစီမံခန့်ခွဲမှုဌာနစု (လှည်းကူး) ၏ ဓာတ်ခွဲခန်းများမှ ၂၀၂၆ ခုနှစ်၊ စက်တင်ဘာလအတွင်း လုပ်ငန်းရှင် ၁၄ ဦးက အပ်နှံလာသော သီးနှံ အမျိုးအစား ၁၃ မျိုး၊ စုစုပေါင်းနမူနာအရေအတွက် ၄၉ ခု၊ ဓာတ်ခွဲစမ်းသပ်မှုပေါင်း ၁၃၁ ခုကို ဓာတ်ခွဲ စမ်းသပ်စစ်ဆေးခြင်းများ ဆောင်ရွက်နိုင်ခဲ့ပါသည်။

၂၀၂၆ ခုနှစ်၊ စက်တင်ဘာလအတွင်း လယ်ယာထွက်ကုန် ပို့ကုန်များအား ပြည်ပနိုင်ငံ များသို့ တင်ပို့နိုင်ရေးအတွက် ဆန်၊ ဆန်ကွဲ၊ နှမ်းနက် (သိပ္ပံ)၊ ပဲတီစိမ်း၊ ပဲလွန်း၊ နှမ်းညို၊ ပဲစဉ်းငုံ၊ မတ်ပဲ၊ တိရစ္ဆာန်စာ၊ နှမ်းဖြူ၊ မတ်ပဲ၊ ပတ္တမြားပဲ၊ မြေပဲဖတ်တို့တွင် ပိုးသတ်ဆေးဓာတ်ကြွင်းပါရှိမှု၊ မှိုဆိပ်ပါရှိမှု၊ သီးနှံဓာတုနှင့် ရူပအရည်အသွေးစသည့် ဓာတ်ခွဲစမ်းသပ်စစ်ဆေးခြင်းများနှင့် မြေပဲဆီ တို့၏ အရည်အသွေး ဓာတ်ခွဲစမ်းသပ်စစ်ဆေးခြင်းများ ဆောင်ရွက်ခဲ့ပါသည်။

ဓာတ်ခွဲခန်းအလိုက် ဓာတ်ခွဲစမ်းသပ်မှုအနေဖြင့် ပိုးသတ်ဆေးဓာတ်ကြွင်းဓာတ်ခွဲခန်းမှ ၃၁ ခု၊  မှိုဆိပ်ဓာတ်ခွဲခန်းမှ ၁၁ ခု၊ ဆီနှင့်ဆီထွက်သီးနှံဓာတ်ခွဲခန်းမှ ၁၉ ခု၊ သီးနှံဓာတု ဓာတ်ခွဲခန်းမှ ၅၈ ခု၊ သီးနှံရူပဓာတ်ခွဲခန်းမှ ၁၂ ခု၊ စုစုပေါင်းဓာတ်ခွဲစမ်းသပ်မှု ၁၃၁ ခု ဆောင်ရွက်နိုင်ခဲ့ပါသည်။