သတင်းနှင့် လှုပ်ရှားမှုများ

         စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဦးဇော်မင်းလတ် (ခရိုင်ဦး စီးမှူး)နှင့်ဝန်ထမ်းများသည်  ပြည်သူ့ကျန်းမာရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာနတို့နှင့် ပူးပေါင်း၍ ပြည်တွင်းဆေးဝါးပြတ်လပ်မှုမရှိစေရေး (၂.၁၂.၂၀၂၅ )ရက်နေ့၊ နေ့လယ် (၁၄း၀၀) နာရီအချိန်တွင်  အမှတ် ၃၉/၄၀၊ သာကေတစက်မှုဇုန်၊ သာကေတမြို့နယ်ရှိ FAIRDEAL  ဆေးကုမ္မဏီအား အဖွဲ့စုံဖြင့် ကွင်းဆင်းစစ်ဆေးခဲ့ကြောင်း သိရှိရပါသည်။

       ထိုသို့ကွင်းဆင်းစစ်ဆေးရာတွင် ဈေးကွက်အတွင်းဆေးနှင့်ဆေးပစ္စည်းများအားလက်ကား ဈေးအပေါ်တွင် ဒေသပေါက်ဈေး ထက်ဈေးနှုန်းပိုမိုအမြတ်တင်ပြီး လက်လီရောင်းချနေမှုအပေါ် ဈေးနှုန်းတည်ငြိမ်စေရေးအတွက် ဆက်စပ်ဌာနများပါဝင်သောအဖွဲ့စုံများနှင့် ပူးပေါင်း၍   FAIRDEAL ဆေးကုမ္မဏီအားကွင်းဆင်းစစ်ဆေးခဲ့ပြီး ဆေးဝါးများဈေးနှုန်းအတက်/ အကျဖြစ်ပေါ်မှုအခြေအနေနှင့်၊ ဆေးဝါးပစ္စည်းလက်ကျန်အခြေအနေတို့အား ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

     ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် ပုသိမ်ခရိုင်အတွင်း၌ ကော်ဖီ စိုက်ခင်းများဖြစ်ထွန်းအောင်မြင်မှုများကို (၂၄.၁၁.၂၀၂၅) ရက်နေ့ နံနက်ပိုင်းက တာဝန်ရှိ သူများနှင့်အတူ သွားရောက်ကြည့်ရှုအားပေးခဲ့သည်။ တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ်- မော်တင်ကားလမ်းဘေး (၂၈)မိုင်ရှိ Myanmar Agri-Tech Ltd ၏ သ‌ဘာဝတောနှင့် ထပ်မံ စိုက်ပျိုးထားသည့် အပင်များအောင်တွင် စိုက်ပျိုးထားသည့် ရိုဘက်စတာ မြေပြန့်  ကော်ဖီပင်များ ရှင်သန်ဖြစ်ထွန်းအောင်မြင်မှုများကို ကြည့်ရှုအားပေးခဲ့ပြီး ကော်ဖီပင်အောက်ခြေပေါင်းမြက်များ ရှင်းလင်းခြင်း၊ မြေဆွခြင်း၊ ကော်ဖီသီး များ စတင်ခူးဆွတ်အခြောက်ခံခြင်းများကို ကြည့်ရှုအားပေး ခဲ့ရာ  တာဝန်ယူ ဆောင်ရွက်လျက် ရှိသည့် ကုမ္ပဏီ တာဝန်ရှိသူတစ်ဦးက ရိုဘက်စတာ Robusta (TR4/TR9) တစ်ဧကလျင် ကော်ဖီပင်( ၄၃၅)ပင်စီဖြင့် ၃၁၀ ဧက စိုက်ပျိုးထားရှိမှု၊ အပင်သက်တမ်း သုံးနှစ်ကျော်ချိန်မှ စတင်၍ အသီးမှည့် ခူးဆွတ်လာခဲ့ရာ နှစ်စဉ် တိုးတက်လာမှု၊ ရေ၊ မြေ၊ ရာသီဥတုနှင့်ကိုက်ညီသော မျိုး၊ မြေဩဇာ၊ ဆေးဝါးသုံးစွဲမှု၊ ရေလိုအပ်မှုနှင့် ပျိုးခြံတွင် ပျိုးထောင်မှုတို့အားရှင်းလင်း တင်ပြခဲ့ပါသည်။

          တိုင်းဒေသကြီးဝန်ကြီးချုပ်က မိမိတို့ တိုင်းဒေသကြီးတွင် ကော်ဖီသီးနှံများလည်း စိုက်ပျိုး ဖြစ်ထွန်းအောင်မြင်ပါကြောင်း၊ ဥယျာဉ်ခြံများ၊ နှစ်ရှည်သစ်‌ေတာစိုက်ခင်းများအတွင်း မြေပြန့် ကော်ဖီ (ရိုဘက်စတာမျိုး) များကို စိုက်ပျိုးဆောင်ရွက်မည်ဆိုပါက များစွာအကျိုးဖြစ်ထွန်းစေမည် ဖြစ်ပြီး ပြည်ပပို့ကုန်များ ပိုမိုတိုးတက်ရရှိမည်ဖြစ်ကြောင်း၊ ကော်ဖီစံပြစိုက်ခင်းများ ထူထောင် လုပ်ကိုင်မည်ဆိုပါက ကော်ဖီစိုက်ပျိုးရေးကိုစိတ်ဝင်စားသည့် လုပ်ငန်းရှင်များ၊ ကော်ဖီစိုက်တောင်သူ များကလည်း ပေါ်ထွက်လာမည်ဖြစ်ပါကြောင်း” မှာကြားခဲ့သည်။

          ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ပုသိမ် -မော်တင်ကားလမ်းဘေး (၂၂)မိုင်ရှိ Myanmar Agri-Tech Ltd သို့သွားရောက်၍ Robusta ကော်ဖီမျိုးအား မြေပြန့်ချယ်ရီပင်၊ လဲမှို့ပင်စသည့် အရိပ်ရပင်များအောက်တွင် စိုက်ပျိုးထားထားရှိမှုများကို ကြည့်ရှုအားပေးခဲ့ပြီး‌နောက်  ကုမ္ပဏီမှ တာဝန်ရှိသူတစ်ဦးက ကော်ဖီပင်စိုက်ပျိုးထားရှိမှု၊ ကော်ဖီအသီးမှည့် ခူးဆွတ်ရရှိမှု အခြေအနေများ၊ ကုန်ကြမ်းအဖြစ် အခြားသောတိုင်းဒေသကြီးနှင့် ပြည်နယ်များသို့ တင်ပို့ရောင်းချမှု၊ ပျိုးခင်းများအတွက် မျိုးစေ့များအဖြစ်ရောင်းချပေးမှု၊ ကော်ဖီမှုန့်များထုတ်လုပ်ရောင်းချမှု အခြေ အနေများအား ရှင်းလင်းတင်ပြရာ တိုင်းဒေသကြီးဝန်ကြီးချုပ်က ကော်ဖီစိုက်ပျိုးရေးလုပ်ငန်းများ ရေရှည်တိုးတက် စိုက်ပျိုးနိုင်ရန်အတွက် ပိုမိုဖြစ်ထွန်းနိုင်သည့်  မြေအမျိုးအစား၊ ရာသီဥတု ကိုက်ညီသည့် နေရာများတွင် ရွေးချယ်စိုက်ပျိုးနိုင်ရေး၊ ဖြစ်ထွန်း အောင်မြင်အောင်စိုက်ပျိုးနိုင်ရေး နှင့် တိုးချဲ့စိုက်ပျိုးနိုင်ရေး၊  အောင်မြင်ဖြစ်ထွန်းသည့်နေရာများတွင် တစ်ဆက်က်တစ်စပ်တည်း စိုက်ပျိုးနိုင်ရေး၊ အရိပ်ရပင်များအောက်တွင် ကော်ဖီပင်အပြင် ငရုတ်ကောင်းပင်များပါ စိုက်ပျိုးနိုင် ရေးတို့ကို မှာကြားခဲ့ကြောင်း သိရပါသည်။

DOCA (ဧရာဝတီ)

       ဧရာဝတီတိုင်းဒေသကြီး ဝန်ကြီးချုပ်ဦးတင်မောင်ဝင်းသည် မြောင်းမြမြို့နယ်၊ သိလ္လာ ကျေးရွာရှိ ပိုင်ရှင်ဦးသုခအောင်၏ ငရုတ်ကောင်းစိုက်ဧက(၁၇)ဧကသို့  (၂၇.၁၁.၂၀၂၅) ရက်နေ့တွင် သွားရောက်ကြည့်ရှုအားပေးခဲ့ရာ  ခြံပိုင်ရှင်မှ ဒေသငရုတ်ကောင်းမျိုးနှင့် ယိုးဒယား ငရုတ်ကောင်း မျိုးများ စိုက်ပျိုးစိုက်ပျိုးထားရှိမှု၊ အဝိစိတွင်းမှ ရေတင်၍ ပိုက်များသွယ်တန်း၍ စနစ်တကျ ရေပေးဝေမှု၊ ဈေးကွက်အတွင်း ငရုတ်ကောင်းအခြောက် ရောင်းချရမှုဈေးနှုန်း၊ ငရုတ်ကောင်း ခူးဆွတ်ရရှိမှု၊ “စစ်မှစစ်” ငရုတ်ကောင်းမှုန့်ထုတ်လုပ် ဖြန့်ဖြူးမှုများကို ရှင်းလင်း တင်ပြခဲ့သည်။

          ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် မြောင်းမြမြို့ ဒီဧရာ စက်မှုလက်မှု အလုပ်ရုံသို့သွားရောက်၍ မျိုးစေ့ချကိရိယာ( Drum Seeder)များ ထုတ်လုပ်နေမှုများကို ကြည့်ရှုစစ်ဆေးခဲ့ရာ တာဝန်ရှိသူတစ်ဦးက လက်ရှိ Drum Seeder ထုတ်လုပ်မှူအခြေအနေများ၊ တိုင်း‌ဒေသကြီးအတွင်း ဖြန့်ဖြူးမှုအခြေအနေများ၊ ကောက်စိုက်စက် ထုတ်လုပ်ရန်အတွက် လိုအပ်သော ပစ္စည်းများမှာယူထားရှိမှု၊ အဆင့်မြှင့်တင်ထုတ်လုပ်မည့် ကောက်စိုက်နမူနာပုံစံများကို  ရှင်းလင်းတင်ပြခဲ့ရာ တိုင်းဒေသကြီးဝန်ကြီးချုပ်က  ဒေသနှင့်ကိုက်ညီပြီး အရည်အသွေး ကောင်းမွန် သည့်မျိုးစေ့ချကိရိယာ (Drum Seeder) များ၊ ကောက်စိုက်စက်များ ထုပ်လုပ်နိုင်ရေးနှင့် သတ်မှတ် ကာလအတွင်း အလက်ရေပြည့်မီအောင် ထုတ်လုပ်ဖြန့်ဖြူးနိုင်ရေးတို့ကို မှာကြားခဲ့ပြီး လိုအပ်သည်များကို သက်ဆိုင်ရာတာဝန်ရှိသူများနှင့်ပေါင်းစပ်ညှိနှိုင်း‌ဆောင်ရွက်ပေးခဲ့ကြောင်း သိရပါသည်။

DOCA (ဧရာဝတီ)

       ဧရာ၀တီတိုင်းဒေသကြီးကုန်သည်များနှင့်စက်မှုလက်မှုလုပ်ငန်းရှင်များအသင်းနှင့် ပထမ မြန်မာ့အာမခံ (FNI) ကုမ္ပဏီတို့၏ MOU လက်မှတ်ရေးထိုးပွဲအခမ်းအနားကို  (၂၇.၁၁.၂၀၂၅) ရက်နေ့ ၊ နံနက်ပိုင်းက ပုသိမ်မြို့၊ ပုသိမ်ဟိုတယ်တွင် ပြုလုပ်ခဲ့ရာ လက်မှတ်ရေးထိုးပွဲအခမ်းအနား သို့ တိုင်းဒေသကြီး ဝန်ကြီးချုပ်ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများ၊ ဌာနဆိုင်ရာများ၊ ဧရာ၀တီ တိုင်းဒေသကြီး ကုန်သည်များနှင့်စက်မှုလက်မှုလုပ်ငန်းရှင်များအသင်းမှ တာဝန်ရှိသူများ၊ ပထမမြန်မာ့အာမခံ (FNI) ကုမ္ပဏီမှ တာဝန်ရှိသူများတက်ရောက်ခဲ့ကြသည်။

          ဦးစွာ တိုင်းဒေသကြီးဝန်ကြီးချုပ်က“ ဧရာဝတီတိုင်းဒေသကြီးကုန်သည်များနှင့် စက်မှု လက်မှု လုပ်ငန်းရှင်များ အသင်းချုပ်(ARCCI)သည် တိုင်းဒေသကြီး၏ စီးပွားရေးလုပ်ငန်းများ ဖွံ့ဖြိုးတိုးတက်ရန် အင်တိုက်အားတိုက်ဖြင့် အသင်းအဖွဲ့များစုစည်း၍ တက်ညီလက်ညီ ဆောင်ရွက် နေသည့် အသင်းအဖွဲ့ဖြစ်ပါကြောင်း၊ တိုင်းဒေသကြီး၏ စိုက်ပျိုးမွေးမြူရေးလုပ်ငန်းများ၊ MSME လုပ်ငန်းများဖွံ့ဖြိုးတိုးတက်ရန် သုတေသနလုပ်ငန်းများကိုလည်း ဆောင်ရွက်လျက်ရှိရာ တိုးတက်မှု များရှိခဲ့ပါကြောင်း၊ တိုင်းဒေသကြီး၏ ရေသယံဇာတ၊ မြေသယံဇာတ၊ လူ့စွမ်းအားအရင်းအမြစ် ပေါကြွယ်ဝမှုများကို အခြေခံ၍ လုပ်ငန်းရှင်များအနေဖြင့် ပံ့ပိုးကူညီမှုများကိုဆောင်ရွက်ပေးမည် ဆိုပါက ပိုမိုဖွံ့ဖြိုးတိုးတက်လာမည်ဖြစ်ပါကြောင်း၊ တိုင်းဒေသကြီးမှ ကုန်ကြမ်းများထုတ်လုပ် ရုံသာမက ကုန်ချောများထုတ်လုပ်နိုင်သည့် စက်မှုလုပ်ငန်းဖြင့် တန်ဖိုးမြှင့်ထုတ်ကုန်များ ထုတ်လုပ် နိုင်မည်ဆိုပါက တိုင်းဒေသကြီး၏ (GDP)ပြည်တွင်းအသားတင်ကုန်ထုတ်လုပ်မှုတန်ဖိုးလည်း မြင့်တက်လာမည်ဖြစ်ပါကြောင်းပြောကြားခဲ့ပါသည်။

          ဆက်လက်၍ ဧရာ၀တီတိုင်းဒေသကြီး ကုန်သည်များနှင့်စက်မှုလက်မူလုပ်ငန်းရှင် များ အသင်းချုပ်သည် တိုင်းဒေသကြီး စီးပွားရေးတိုးတက်မှု အတွက်ပါဝင်ဆောင်ရွက်နေသည့် အသင်းအဖွဲ့ ဖြစ်သကဲ့သို့ အာမခံကုမ္ပဏီများသည်လည်း နိုင်ငံငွေကြေးတည်ငြိမ်ရေး၊ အပြုသဘော ဆောင်သော စီးပွားရေးစွန့်စားမှုများနှင့် ရင်းနှီး မြုပ်နှံသူများ၏ ယုံကြည်မှု ပိုမိုရရှိစေရန် စသည့် စီးပွားရေးဖွံ့ဖြိုးမှုအတွက် အရေးကြီးသည့် အခန်းကဏ္ဍမှ ပါဝင်နေကြောင်း၊ ယခုကဲ့သို့ တိုင်းဒေသကြီး၏ စီးပွားရေးအသင်းအဖွဲ့ချုပ် ARCCI နှင့် FNI အာမခံ တို့၏ MOU လက်မှတ် ရေးထိုးခြင်းသည် ARCCI နှင့်အတူ သူ၏ညီနောင် စီးပွားရေးအသင်းအဖွဲ့များနှင့် အာမခံကုမ္ပဏီတွေ အကြားမှာ ပိုမို နက်ရှိုင်းသည့် ဆက်ဆံမှု နားလည်မှုကို ဖြစ်စေပြီး၊ လုပ်ငန်းတွင် ကြုံရတတ်သည့် စီးပွားရေးဆိုင်ရာ စွန့်စားမှုများကို အကာအကွယ်နှင့် အထောက်အကူ ဖြစ်စေသည့် အာမခံချက်ရှိ‌သော တိုးတက်မှုတွေ ရရှိစေနိုင်မည် ဖြစ်ပါကြောင်း” အမှာစကားပြောကြားသည်။

          ထို့နောက် First National Insurance General Co,Ltd၊ ဒုတိယအုပ်ချုပ်မှု ဒါရိုက်တာက နှုတ်ခွန်းဆက်စကားများ ပြောကြားခဲ့ပြီး ဧရာဝတီတိုင်းဒေသကြီးဖွံ့ဖြိုးတိုးတက်ရေးအတွက် ရန်ပုံငွေမတည်‌ လှူဒါန်းပေးအပ်ခဲ့ရာ တိုင်းဒေသကြီးဝန်ကြီးချုပ်ကလက်ခံရယူခဲ့ကာ စုပေါင်း မှတ်တမ်းတင် ဓာတ်ပုံရိုက်ကူးခဲ့ကြသည်။ ဆက်လက်၍ အခမ်းအနား ဒုတိယပိုင်းကို ပြုလုပ်ရာ ဧရာဝတီတိုင်းဒေသကြီးကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (ARCCI) ဥက္ကဋ္ဌက နှုတ်ခွန်းဆက်စကားပြောကြားပြီး  First National Insurance (General) Co., Ltd.  Company Profile အား Assistant General Managerက ရှင်းလင်းတင်ပြခဲ့ပြီးနောက် MOU လက်မှတ်ရေးထိုး၍ Cooperate Gift လဲလှယ်ခဲ့ကြကြောင်းသိရသည်။

DOCA (ဧရာဝတီ)

     ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းသည် ယမန်နေ့ညနေပိုင်းက တာဝန်ရှိသူများနှင့်အတူ မြန်အောင်ခရိုင်၊ အင်္ဂပူမြို့နယ်၊ နောက်မီးကျေးရွာရှိ တောင်သူ(၁၈၆)ဉီး၏ စိုက်ဧက(၄၅၆)ဧကတွင် ဆီတိုးပဲပုပ်မျိုး အောင်မြင်ဖြစ်ထွန်းနေမှုများကို ကြည့်ရှုအားပေးခဲ့သည်။

          ဦးစွာ တိုင်းဒေသကြီးဝန်ကြီးချုပ်နှင့်အဖွဲ့သည် ၊ အင်္ဂပူမြို့နယ်၊ နောက်မီးကျေးရွာရှိ တောင်သူ(၁၈၆)ဦး၏ စိုက်ဧက(၄၅၆)ဧကတွင် ဆီတိုးပဲပုပ်မျိုး အောင်မြင်ဖြစ်ထွန်းနေမှုများကို ကြည့်ရှုအားပေးခဲ့ပြီး ပဲပုတ်စိုက်ပျိုးထုတ်လုပ်မှု၊ တစ်ဧကအထွက်နှုန်းနှင့်အောင်မြင် ဖြစ်ထွန်းမှု အခြေအနေများမေးမြန်းခဲ့ပြီး တောင်သူများနှင့်တွေ့ဆုံ၍ စားသုံးဆီဖူလုံရေးအတွက် ဆီထွက်သီးနှံ များပိုမိုတိုးတက်စိုက်ပျိုးစေရေး၊ ဆီထွက်နှုန်းကောင်းမွန်သည့် မျိုးများအသုံးပြုစိုက်ပျိုးစေရေး၊ ပိုးမွှားမကျရောက်စေရေးနှင့် ဆီကြိတ်ခွဲထုတ်လုပ်နိုင်ရေး တို့ကို ဆွေးနွေးမှာကြားခဲ့သည်။

          ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် မြန်အောင်ခရိုင်၊ အင်္ဂပူမြို့နယ် အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမတွင်ပြုလုပ်သည့် နိုင်ငံ့စီးပွားမြှင့်တင်ရေး ရန်ပုံငွေဖြင့် ဆောင်ရွက်သည့် လက်ဆွဲမျိုးစေ့ချကိရိယာ(Drum Seeder)များနှင့် ဆီထွက်သီးနှံ (ဆောင်းနေကြာ) မျိုးစေ့များပေးအပ်ပွဲအခမ်းအနားသို့ တက်ရောက်ခဲ့ပြီး တိုင်းဒေသကြီး ဝန်ကြီးချုပ်က “  ဆီဖူလုံရေးအတွက်  နေကြာစိုက်ပျိုးမှုကို ယခင်နှစ်ကထက် ဧက(၈)သောင်း ကျော် တိုးမြှင့်စိုက်ပျိုးရန်လျာထား ဆောင်ရွက်လျက်ရှိပါကြောင်း၊ ပဲပုပ်-ပဲကြီး ရောနှော စိုက်ပျိုး ခြင်းဖြင့်လည်း ဆီဖူလုံမှုကို အထောက်အကူရရှိပြီး ပဲပုပ်ဖတ်ကို တိရိစ္ဆာန်အစာအဖြစ် ထုတ်လုပ် နိုင်မည်ဖြစ်ပါကြောင်း၊ စပါးစိုက်ပျိုးရာတွင်  ကြဲခင်းများ ပပျောက်ရေးအတွက် မျိုးစေ့ချ ကိရိယာ (Drum Seeder) ဖြင့်စိုက်ပျိုးခြင်း၊ ကောက်စိုက်စက်ဖြင့်စိုက်ပျိုးခြင်း၊ ပျိုးထောင်စိုက်ပျိုခြင်းများ ဆောင်ရွက်လျက် ရှိပါကြောင်းနှင့် တောင်သူများကလည်း လိုက်ပါဆောင်ရွက်ကြရန် လိုအပ် မည်ပါကြောင်း၊ တစ်သီးမှနှစ်သီး နှစ်သီးမှသုံးသီးအထိ စိုက်ပျိုး၍ သီးနှံစိုက်စွမ်းအား တိုးတက် စေရေးအတွက် လိုက်ပါဆောင်ရွက်ရန် လိုအပ်မည်ဖြစ်ပါကြောင်း၊ သီးနှံများအောင်မြင် ဖြစ်ထွန်း စေရေးအတွက် လိုအပ်သောနည်းပညာများကို ပံ့ပိုးပေးကြရန်နှင့် လိုအပ်သည်များကို ဝိုင်းဝန်း ဆောင်ရွက်ပေးကြရန်” မှာကြားခဲ့ပြီး တိုင်းဒေသကြီးဝန်ကြီးချုပ်နှင့် အစိုးရအဖွဲ့ဝင် ဝန်ကြီး များသည် တောင်သူများအား လက်ဆွဲမျိုးစေ့ချကိရိယာ(Drum Seeder)များနှင့် ဆီထွက် သီးနှံ(ဆောင်းနေကြာ) မျိုးစေ့များပေးအပ်ခဲ့ကြောင်း သိရသည်။

DOCA (ဧရာဝတီ)