သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန၊ဟင်္သာတမြို့နယ်ဦးစီးမှူးသည်(၈.၅.၂၀၂၅)ရက်နေ့၊ နံနက်(၁၀:၀၀) နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန၊ ဟင်္သာတခရိုင်/မြို့နယ် စိုက်ပျိုးရေးဦးစီးဌာန တို့နှင့် ပူးပေါင်း၍ ဟင်္သာတမြို့နယ်၊ ဒူးယားမြို့ရှိ ရတနာမဥ္ဇူရန်ပြေစေတီ ဓမ္မာရုံတွင် ၂၀၂၅ ခုနှစ် မိုးစပါးပန်းတိုင်အထွက်နှုန်း ပြည့်မှီကျော်လွန်စေရေး တောင်သူများအား အသိပညာပေးဟောပြောခြင်း ကို  ဆောင်ရွက်ခဲ့ပါသည်။

         အဆိုပါ‌ဟောပြောပွဲတွင် ဟင်္သာတမြို့နယ်ဦးစီးမှူး ဦးမိုးကျော်က လယ်ယာထွက်သီးနှံများနှင့် ပါတ်သတ်၍ ဈေးနှုန်းဈေးကွက်၊ ဝယ်လိုအား၊ ရောင်းလိုအားအခြေအနေများဆွေးနွေးခဲ့ပြီး၊ စားသုံးသူ ကာကွယ်ရေးဆိုင်ရာလုပ်ငန်းများနှင့်ပါတ်သတ်၍ စားသုံးသူကာကွယ်ရေးဥပဒေစတင်ဖြစ်ပေါ်လာပုံ၊ စားသုံးသူများ၊ စီးပွားရေးလုပ်ငန်းရှင်များ၏ရရှိနိုင်သောအခွင့်အရေးများကို အကျယ်တဝင့် ရှင်းလင်း ပြောကြားခဲ့ပါသည်။ ဆက်လက်၍ အစားအသောက်များနှင့်လူသုံးကုန်ပစ္စည်းများတွင် ကုန်အညွှန်း အမှတ်အသားဖော်ပြထားခြင်းမရှိပါက သတိထား၍ ဝယ်ယူသုံးစွဲသင့်ကြောင်း၊ ကုန်အညွှန်းအမှတ်အ သားပြည့်စုံစွာရိုက်နှိပ်ဖော်ပြထားသော ပစ္စည်းများကိုသာရွေးချယ်ဝယ်ယူသုံးစွဲသင့်ကြောင်း ၊ ထို့နောက် စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များအကြောင်း စားသုံးသူ နစ်နာဆုံး ရှုံးမှုများဖြစ်ပေါ်လာပါကတိုင်ကြားနိုင်ကြောင်းကိုလည်းကောင်း၊ စားသုံးသူသတင်းပြန်ကြားရေးနှင့်တိုင် ကြားမှု လက်ခံဆောင်ရွက်ရေးစင်တာ (Consumer Information and Complaint Center) CICC ဖွင့်လှစ်ထားရှိမှု အခြေအနေကိုလည်းကောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက် များ အကြောင်း သိရှိလိုပါက www.doca.gov.mm Website တွင် ဝင်ရောက်လေ့လာနိုင်ကြောင်းနှင့် Consumer Call Center 1535 သို့ ဆက်သွယ်မေးမြန်းနိုင်ကြောင်းကိုလည်းကောင်း အသေးစိတ် ပြောကြားခဲ့ပြီး နေ့လည်(၁၂:၀၀) နာရီအချိန်တွင် ဟောပြောပွဲကို ရုပ်သိမ်းခဲ့ပါ သည်။

DOCA(ဧရာဝတီ)

       စားသုံးသူရေးရာဦးစီးဌာန၊ ဇလွန်မြို့နယ်တာဝန်ခံသည် (၇.၅.၂၀၂၅)ရက်နေ့ ၊ နံနက် (၉:၀၀) အချိန်တွင် သက်ဆိုင်ရာဌာနဆိုင်ရာများနှင့်ပူးပေါင်း၍ ဇလွန်မြို့နယ်အတွင်းရှိ မြို့ပေါ်ရပ်ကွက်နှင့် မြို့မဈေးအတွင်းရှိ  ကုန်စုံဆိုင်များ၊  စားအုန်းဆီ လက်လီ၊ လက္ကားအရောင်းဆိုင်များအား ဈေးနှုန်း မြှင့်တင်ရောင်းချမှု ရှိ/မရှိ ရှောင်တခင်ကွင်းဆင်းစစ်ဆေးခဲ့ပါသည်။

        ထိုသို့ကွင်းဆင်းစစ်ဆေးခဲ့ရာ ပူးပေါင်းအဖွဲ့သည် ဟင်္သာတခရိုင် ဆီထုတ်လက်ကား ကိုယ်စား လှယ်များမှ တစ်ဆင့် ခွဲတမ်းရရှိသော ဆီများအား လက်လီကုန်စုံဆိုင်များသို့လည်းကောင်း၊ လက်လီ ကုန်စုံဆိုင်များ မှတဆင့် စားသုံးသူများထံသို့ ဖြန့်ဖြူးရောင်းချလျက်ရှိပြီး ၊ ထိုသို့ရောင်းချ  ရာတွင်လည်း စားအုန်းဆီ သတ်မှတ်ရည်ညွှန်းဈေးအပေါ်တွင် အဆင့်အလိုက်(၂)% အမြတ်ထက် ကျော်လွန်၍ ရောင်းချမှုမရှိကြောင်း၊ ရောင်းချမှုလက်ခံ ဘောက်ချာများထားရှိခြင်း၊ သတ်မှတ်ရည် ညွှန်းဈေးဖြင့် သာရောင်းချခြင်း၊ အခြားမသမာသော နည်းလမ်းများသုံး၍ ရောင်းချမှုမရှိခြင်းနှင့် ဈေးကစားရန် ရည်ရွယ်ပြီး သိုလှောင်ထားခြင်းများ မရှိကြောင်း သိရှိရပြီး စားအုန်းဆီအရောင်းဆိုင်(၅)ဆိုင်အား ရှောင်တခင်ကွင်းဆင်းစစ်ဆေးခြင်းများဆောင်ရွက်ခဲ့ကြောင်းသိရှိရပါသည်။

DOCA(ဧရာဝတီ)

     ပဲခူးတိုင်းဒေသကြီး နတ်တလင်းခရိုင် နတ်တလင်းမြို့နယ်တွင် မြေဩဇာ ရောင်းချနေသော စိုက်ပျိုးရေးနှင့် ဓါတ်မြေဩဇာရောင်းဝယ်ရေးလုပ်ငန်းရှင်ဆိုင် (၅)ဆိုင်အား  နတ်တလင်းမြို့နယ် မြို့နယ်တာဝန်ခံရုံး စားသုံးသူရေးရာဦးစီးဌာနမှ ဝန်ထမ်းများနှင့် မြို့နယ်ထွေအုပ်၊ မြို့နယ်စည်ပင်၊ စိုက်ပျိုးရေး၊ မြို့နယ်မြေစာရင်း၊ ဆည်/မြောင်းဦးစီးဌာနတို့နှင့် ပူးပေါင်း၍    မေလ ပထမပတ်တွင်  ကွင်းဆင်းစစ်ဆေးမှု ဆောင်ရွက်ခဲ့ပါသည်။

      ယူရီးယား မြေဩဇာ ဝယ်ယူဖြန့်ဖြူးရောင်းချရေး ဦးဆောင်ကော်မတီ၏  ကြီးကြပ်မှုဖြင့် မြန်မာနိုင်ငံ မြေဩဇာ၊ မျိုးစေ့နှင့် စိုက်ပျိုးရေးဆေး လုပ်ငန်းရှင်များအသင်း  အသင်းဝင် ကုမ္ပဏီများအနေဖြင့် တောင်သူများအဓိက သုံးစွဲလျက်ရှိသော ရန်ကုန်အထိုင် ဈေးနှုန်းများအဖြစ် (၁.၅.၂၀၂၅)မှ (၃၁.၅.၂၀၂၅)ရက်ထိ  (က) ယူရီးယား (အလုံးကြီး) ၅၀ကီလိုတစ်အိတ် ၉၅၀၀၀၀ကျပ်၊ (ခ) Rock Phosphate အခြေခံ ၁၅ပတ်လည် ၅၀ကီလိုတစ်အိတ် ၁၂၄၀၀၀၀ကျပ် (ဂ)    Di Ammonium Phosphate အခြေခံ ၁၅ပတ်လည် ၅၀ကီလိုတစ်အိတ် ၁၃၅၀၀၀ကျပ် ဈေးနှုန်းများအဖြစ် ရောင်းချပေးလျက်ရှိပါသည် ရန်ကုန်အထိုင် ဈေးနှုန်းများဖြစ်သဖြင့် ဒေသအလိုက် သယ်ယူပို့ဆောင်စရိတ်နှင့် အရောင်းဆိုင် အမြတ်ငွေများ အပေါ်မူတည်၍ ဈေးနှုန်း အနည်းငယ် ပြောင်းလဲမှုဖြစ်နိုင်ပါကြောင်း မြေဩဇာ ရောင်းချနေသော စိုက်ပျိုးရေးနှင့် ဓါတ်မြေဩဇာရောင်းဝယ်ရေးလုပ်ငန်းရှင်ဆိုင် (၅)ဆိုင်အား ဈေးနှုန်းမြှင့်တင် ရောင်းချမှုမရှိစေရေး အပတ်စဉ် အဖွဲ့စုံဖြင့်    ကွင်းဆင်းစစ်ဆေး ဆောင်ရွက်မည်ဖြစ်ကြောင်း သိရှိရသည်။

DOCA(ပဲခူး)

     ပဲခူးတိုင်းဒေသကြီး၊ သာယာဝတီခရိုင်၊ သာယာဝတီမြို့နယ် ဆန်ကုန်သည်နှင့် ဆန်စက်လုပ် ငန်းရှင်များ အသင်းမှစားသုံးသူပြည်သူများအား သက်သာသောဈေးနှုန်းဖြင့် ဧည့်မထ ၂၅% ဆန်များကို ၂၀၂၄ခုနှစ်ဇွန်လ ၂၄ရက်နေ့မှစ၍ ရောင်းချပေးခဲ့ရာ ယနေ့၂၀၂၅ခုနှစ် မေလ ၅ရက်နေ့ တွင်ဆန်ဆိုင်(၃)ဆိုင်မှ ဆန်(၁)ပြည်လျှင် (၃၀၀၀)ကျပ်နှုန်းဖြင့် ဆန်(၆) အိတ်၊လူဦးရေ (၇၂)ဦး၊ ဆန်စက် (၁၀)စက်မှဆန်(၁)ပြည်လျှင် (၃၀၀၀)ကျပ်နှုန်းဖြင့် ဆန်(၁၈) အိတ်၊လူဦးရေ (၂၈၈)ဦး တို့ကိုဖြန့်ဝေရောင်းချပေးခဲ့ပါသည်။ဆန်ကုန်သည်နှင့် ဆန်လုပ်ငန်းရှင်များအသင်းမှ လိုအပ်လျှင် လိုအပ်သလို ပံ့ပိုးကူညီရောင်းချမှုများကိုလည်း ပြုလုပ်ဆောင်ရွက်ပေးလျှက်ရှိပါကြောင်း သတင်း ရေးသားတင်ပြအပ်ပါသည်။

DOCA(ပဲခူး)

     စားသုံးသူပြည်သူများအား ထုတ်ကုန်လုံခြုံစိတ်ချရမှုရှိစေရေး ဘေးအန္တရာယ်ရှိသော ကုန်စည်များ ဈေးကွက်အတွင်းမှပပျောက်စေရေးနှင့် စားသုံးသူကာကွယ်ရေးဥပဒေပြဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသား ဖေါ်ပြထားမှုအခြေအနေတို့နှင့် စပ်လျဉ်း၍ သက်ဆိုင်ရာ မိတ်ဖက်ဌာနများနှင့် ပူးပေါင်း၍ ဈေးကွက်စောင့်ကြည့်စစ်ဆေးခြင်း လုပ်ငန်းများ ဆောင်ရွက်လျက်ရှိရာ ၂၀၂၄ ခုနှစ်၊ အောက်တိုဘာလ (၁၆)ရက်နေ့မှ (၃၁)ရက်နေ့ အတွင်းတွင် ပြည်ခရိုင်၊ ပြည်မြို့တွင် ကိုးသောင်းဈေးရှိ ကုန်စုံဆိုင်များသို့ စားသုံးဆီအမျိုးမျိုးကို လည်းကောင်း၊ ရွှေတောင်မြို့တွင် ယွန်းတန်းရပ်ကွက်နှင့် စံပြရပ်ကွက်ရှိ ကုန်စုံဆိုင်များသို့ စားသုံးဆီအမျိုးမျိုးကိုလည်းကောင်း၊ ယွန်းတန်း ရပ်ကွက်နှင့် သရက်တောရပ်ကွက်ရှိ ဆေးဆိုင်များ သို့ တိုင်းရင်းဆေး အမျိုးမျိုးကိုလည်းကောင်း၊ ဆည်ကြီးကုန်းအုပ်စု၊ ညောင်ဝိုင်းရွာရှိ ဦးပိုင်စိုးကျော်၏ AK(သောက်ရေသန့်) လုပ်ငန်းသို့လည်းကောင်း၊ ပန်းတောင်းမြို့တွင် ဥသျှစ်ပင်ဈေးရှိ ကုန်စုံဆိုင်များသို့ စားသုံးဆီအမျိုးမျိုးကိုလည်းကောင်း၊  ပေါက်ခေါင်း မြို့တွင် မြို့မဈေးရှိ ကုန်စုံဆိုင်များသို့ စားသုံးဆီအမျိုးမျိုးကိုလည်းကောင်း၊ သက်ဆိုင်ရာမြို့နယ် တာဝန်ခံနှင့် ဝန်ထမ်းများသည် သွားရောက်၍ ကုန်အညွှန်းအမှတ်အသားပါ သတ်မှတ်ချက်များနှင့် ကိုက်ညီမှုရှိသော ကုန်စည်များကို တင်သွင်းရောင်းချခြင်း ရှိ/မရှိ၊ သက်ဆိုင်ရာဌာန၏ ထောက်ခံမှုရှိ/မရှိ ဈေးကွက်စောင့်ကြည့် စစ်ဆေးခဲ့ပါကြောင်းနှင့် စောင့်ကြည့်စစ်ဆေးခဲ့သည့် ကုန်စည်များတွင် ကုန်အညွှန်းအမှတ်အသား ဖေါ်ပြချက်များနှင့် ကိုက်ညီမှုရှိပါကြောင်း သတင်းရရှိပါသည်။

DOCA(ပဲခူး)