HighLight News

         ဗီယက်နမ်နိုင်ငံ၏ ၂၀၂၆ ခုနှစ်၊ ပထမနှစ်ဝက် (ဇန်နဝါရီမှ ဇွန်လအထိ) စက်မှုထုတ်လုပ်မှု ညွှန်းကိန်း (Index of Industrial Production) သည် ယခင်နှစ်ကာလတူထက် ၁၀.၈ ရာခိုင်နှုန်း တိုးတက်လာခဲ့ပြီး ၂၀၁၉ ခုနှစ်နောက်ပိုင်း အဆိုပါကာလများအနက် အမြင့်မားဆုံး တိုးတက်မှု နှုန်းဖြစ်ကြောင်း ဗီယက်နမ်အမျိုးသားစာရင်းအင်းရုံး၏ ထုတ်ပြန်ချက်ကို ကိုးကား၍ ဒေသတွင်း သတင်းဌာနတစ်ခုဖြစ်သည့် VnEconomy က ဇူလိုင်လ ၃ ရက်နေ့တွင် ဖော်ပြခဲ့ကြောင်း သိရသည်။

         စက်မှုကဏ္ဍတိုးတက်မှု၏ အဓိကမောင်းနှင်အားဖြစ်သော ကုန်ထုတ်လုပ်မှုနှင့် ပြုပြင်မွမ်းမံမှုကဏ္ဍ (Manufacturing and processing sector) သည် ၁၁.၄ ရာခိုင်နှုန်း မြင့်တက်ခဲ့ပြီး စုစုပေါင်း တိုးတက်မှုနှုန်းတွင် ၈.၉ ရာခိုင်နှုန်းအထိ ပါဝင်ပံ့ပိုးပေးခဲ့ကြောင်း အစီရင်ခံစာတွင် ဖော်ပြထားကြောင်း သိရသည်။

          ထို့အပြင် လျှပ်စစ်ဓာတ်အားထုတ်လုပ်ခြင်းနှင့် ဖြန့်ဖြူးခြင်း၊ ရေပေးဝေခြင်းနှင့် စွန့်ပစ်ပစ္စည်း စီမံခန့်ခွဲမှုကဏ္ဍများ ပိုမိုအားကောင်းလာခြင်းကလည်း ယခုကဲ့သို့ ကောင်းမွန်သောရလဒ်များ ရရှိစေရန် အထောက်အပံ့ဖြစ်စေခဲ့သည်ဟု ဖြည့်စွက်ဖော်ပြထားသည်။ အစီရင်ခံစာအရ ဗီယက်နမ် တစ်နိုင်ငံလုံးရှိ ဒေသကြီး ၃၄ ခုလုံးတွင် စက်မှုကုန်ထုတ်လုပ်မှုများ အသီးသီးတိုးတက်လာခဲ့ကြောင်း သိရှိရပါသည်။

Source : Xinhua                                                                                 

DOCA (ရန်ကုန်)

         စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဦးမောင်ကျော်မြင့် (ဒု-ခရိုင်ဦးစီးမှူး) နှင့် ဝန်ထမ်းများသည် (၄.၇.၂၀၂၆ )ရက်နေ့၊ နေ့လယ်(၁၃:၀၀)နာရီအချိန်တွင် ပုဇွန်တောင်မြို့နယ်၊ သာကေတမြို့နယ်၊ ဒေါပုံမြိုု့နယ်တို့ရှိ ဆေးဆိုင်များတွင် ပြည်တွင်းဆေးဝါး ပြတ်လပ်မှုမရှိစေရေးနှင့် လက်လီ/လက်ကားရောင်းချနေမှုအပေါ် ဈေးနှုန်းတည်ငြိမ်စေရေး အတွက်ကွင်းဆင်းစစ်ဆေးခဲ့ကြောင်း သိရှိရပါသည်။

         ထိုသို့ကွင်းဆင်းစစ်ဆေးရာတွင် ဆေးဆိုင်များ၏ ဆေးဈေးနှုန်းများအတက်အကျရှိ/ မရှိ၊ ယခင်လဈေးနှုန်း၊ ယခုလဈေးနှုန်းများ၏ ဈေးနှုန်းကွာခြားမှုရှိ/ မရှိ၊  ဈေးကွက်များအတွင်းဆေးနှင့် ဆေးပစ္စည်းများပြတ်လပ်မှုရှိ/ မရှိနှင့် စားသုံးသူကာကွယ်ရေးဥပဒေအရ သတ်မှတ်ထားသော ကုန်အညွှန်းအမှတ်အသားများပါဝင်မှုရှိ/ မရှိတို့ကို စစ်ဆေးမှုများဆောင်ရွက်ခဲ့ရာ စားသုံးသူကာကွယ်ရေးဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ သိရှိလိုက်နာ ဆောင်ရွက်ရမည်ဖြစ်ပါကြောင်း၊ သက်ဆိုင်ရာဌာနများ၏ ဥပဒေပြဌာန်းချက်များ၊ လုပ်ထုံးလုပ်နည်း၊ ညွှန်ကြားချက်များနှင့်အညီလိုက်နာ၍ ဖြန့်ဖြူးရောင်းချကြရန် အသိပညာပေးဈေးကွက် စောင့်ကြည့်စစ်ဆေးခဲ့ပြီး ဆေးဆိုင်မှတာဝန်ရှိသူနှင့် တွေ့ဆုံ၍ ဆေးဝါးမှတ်ပုံတင်မရှိဘဲ FDA မှတားမြစ်ထားသော ဆေးဝါးများအားရောင်းချခြင်းမပြုလုပ်ကြရန်၊ အမြတ်ရာခိုင်နှုန်းများစွာတင်၍ ရောင်းချခြင်းမပြုလုပ်ဘဲ ဈေးနှုန်းမှန်ကန်စွာရောင်းချကြရန် ဈေးကွက်စောင့်ကြည့်စစ်ဆေးခဲ့ကြောင်း သိရှိရပါသည်။

DOCA(ရန်ကုန်)

         စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်ချက်အရ (၂၆.၆၂၀၂၆)ရက်နေ့၊ နေ့လယ် (၁၄:၀၀) နာရီအချိန်တွင် မကွေးမြို့၊ မီးသတ်ဦးစီးဌာန၌ စားသုံးသူကာကွယ်ရေးဆိုင်ရာ အသိပညာပေးဟောပြောပွဲအား ကျင်းပခဲ့ကြောင်း သိရသည်။

           အဆိုပါ ဟောပြောပွဲတွင် စားသုံးသူရေးရာဦးစီးဌာန၊  လက်ထောက်ညွှန်ကြားရေးမှူးက  စားသုံးသူရေးရာဦးစီးဌာန၏ သမိုင်းကြောင်းနှင့် လုပ်ငန်းတာဝန်များအကြောင်းအားလည်းကောင်း၊ စားသုံးသူရေးရာဌာနခွဲတာဝန်ခံမှ စားသုံးသူများရရှိမည့် အခွင့်အရေးများနှင့် ထိုအခွင့်အရေးများ ချိုးဖောက်ခံရပါက နစ်နာဆုံးရှုံးမှုများကို မည်ကဲ့သို့ကုစားမလဲနှင့် အွန်လိုင်းမျှတစ်ဆင့် ဈေးဝယ်ယူခြင်းနှင့် စပ်လျဉ်း၍ သိကောင်းစရာများအား အသိပညာပေးခြင်းများ ဆောင်ရွက်ခဲ့ကြောင်း သိရသည်။

          ဟောပြောပွဲသို့ အရာထမ်း၊ အမှုထမ်းများ စုစုပေါင်း (၇၀) ဦးတက်ရောက်ခဲ့ကြပြီး တက်ရောက်လာသူများအား အသိပညာပေး လက်ကမ်းစာစောင်များဝေငှခြင်း၊ သိလိုသည်များ မေးမြန်းလာမှုများအပေါ် ပြန်လည်ဆွေးနွေးခြင်းများ ဆောင်ရွက်ခဲ့ကြကြောင်း သတင်းရရှိပါသည်။

DOCA(မကွေး)

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မြန်မာနိုင်ငံစားသုံးသူကာကွယ်ရေး ကော်မရှင်ဥက္ကဌ  ပြည်ထောင်စုဝန်ကြီးက စားသုံးသူကာကွယ်ရေးဥပဒေ၏ ရည်ရွယ်ချက်များ အောင်မြင်စေရန်နှင့် စားသုံးသူကာကွယ်ရေးဆိုင်ရာမူဝါဒများနှင့် အစီအမံများချမှတ်နိုင်ရေးတို့အတွက် မြန်မာနိုင်ငံစားသုံးသူကာကွယ်ရေး ကော်မရှင်၏ (၂/၂၀၂၆)ကြိမ်မြောက်လုပ်ငန်းညှိနှိုင်း အစည်းအဝေးကို (၃၀.၆.၂၀၂၆) ရက်နေ့၊နံနက်(၀၉:၃၀)နာရီအချိန်တွင် Zoom Meeting ဖြင့် ကျင်းပပြုလုပ်ခဲ့ရာ ပခုက္ကူခရိုင် အထွေထွေ အုပ်ချုပ်ရေးဦးစီးဌာန၊ “မြဧရာ(၂)”အစည်းအဝေးခန်းမ၌ ခရိုင်စားသုံးသူရေးရာကော်မတီဥက္ကဌ၊  အဖွဲ့ဝင် (၄)ဦး၊ စားသုံးသူရေးရာဦးစီးဌာနမှ ဝန်ထမ်း(၅)ဦး၊ စုစုပေါင်း(၉)ဦး Virtual စနစ်ဖြင့် တက်ရောက်ခဲ့ကြောင်း သိရပါသည်။

          ကော်မရှင် ဥက္ကဌက အဖွင့်အမှာစကားပြောကြားရာ နိုင်ငံတော်မူဝါဒများနှင့်အညီ လိုက်လျောညီ ထွေစွာပြုလုပ်ဆောင်ရွက်လျက်ရှိကြောင်း၊ စားသုံးသူကာကွယ်ရေးဥပဒေပြဌာန်းချက် များကိုကော်မရှင်၊ ကော်မတီ၊ တိုင်းဒေသကြီးနှင့် ပြည်နယ်များ၊ ခရိုင်စားသုံးသူရေးရာ ကော်မတီများမှ စိတ်အားထက်သန်စွာ လုပ်ကိုင်ဆောင်ရွက်နေခြင်းကို သိရှိရ၍ ဝမ်းမြောက်ကြောင်း၊ ကော်မရှင်အတွင်းရေးမှူးက မြန်မာနိုင်ငံစားသုံးသူကာကွယ်ရေး ကော်မရှင်လုပ်ငန်း ညှိနှိုင်းအစည်းအဝေး(၁/၂၀၂၆)၏ ဆုံးဖြတ်ချက်များအပေါ်  ဆောင်ရွက်ပြီးစီးမှုအခြေအနေတင်ပြခြင်း၊ လုပ်ငန်းဆောင်ရွက်မှုအခြေအနေများအား ရှင်းလင်းတင်ပြခြင်း၊ အမှာစာများ ဖတ်ကြားတင်ပြခြင်းနှင့် ဥက္ကဌက အမှာစာများအပေါ် အဆုံးအဖြတ်ပေးခြင်း၊ ကော်မရှင်အဖွဲ့ဝင်များက ကဏ္ဍအလိုက် အသီးသီးဆွေးနွေးခြင်းနှင့် ပြည်ထောင်စုနယ်မြေ၊ တိုင်းဒေသကြီး/ ပြည်နယ် စားသုံးသူရေးရာကော်မတီ ဥက္ကဌများက စားသုံးသူကာကွယ်ရေး လုပ်ငန်းဆောင်ရွက်ချက်များနှင့် ရှေ့ဆက်လက်ဆောင်ရွက်မည့် လုပ်ငန်းအစီအမံများအား တင်ပြခဲ့ကြောင်း သိရပါသည်။

          ဆက်လက်၍ ပြည်ထောင်စု ဝန်ကြီးက နိဂုံးချုပ်စကားပြောကြားရာတွင် စားသုံးသူကာကွယ် ရေးလုပ်ငန်းများ လုပ်ဆောင်ရာ၌ ဌာနမှဝန်ထမ်းများက စွမ်းဆောင်မှုမြင့်မားစေရန် မိမိဌာန၏ ဥပဒေ၊ နည်းဥပဒေနှင့် ဆက်စပ်ဌာနများ၏ ဥပဒေများအား လေ့လာမှတ်သား၍ ထိရောက်စွာ အသိပညာပေး ရန်လိုအပ်ကြောင်း၊ အကြိမ်အရေအတွက်ထက် အရည်အသွေးပြည့်ဝစေရန် စဉ်ဆက်မပြတ်လေ့လာ ဆည်းပူးရန်လိုအပ်ကြောင်း၊ လုပ်ငန်းရှင်တွေ့ဆုံခြင်း၊ ဈေးကွက်စောင့်ကြည့်စစ်ဆေးခြင်း၊ နစ်နာမှုများ  ဖြေရှင်းပေးခြင်းများကို ဆောင်ရွက်နေရသော အမှုထမ်း၊ အရာထမ်းများက ဥပဒေပြဌာန်းချက်များနှင့် အညီ ဆွေးနွေးဆောင်ရွက်ရန်လိုအပ်ကြောင်း၊ စိတ်ပိုင်းဆိုင်ရာ၊ ရုပ်ပိုင်းဆိုင်ရာ၊ လုံခြုံမှုများပေးနိုင်ရေး အလေးထားဆောင်ရွက်ခြင်းဖြင့် စားသုံးသူများအား လုံခြုံမှုအပြည့်အဝပေးနိုင်ရေး ဆောင်ရွက်သွားကြရန် လမ်းညွှန်မှာကြားခဲ့ကြောင်း သိရှိရပါသည်။

DOCA(မကွေး)

      ကျိုက်လတ်မြို့နယ်၊ စားသုံးသူရေးရာဦးစီးဌာနမှ ခရိုင်ဦးစီးမှူး ဦးဆောင်၍ မြို့နယ်တာဝန်ခံနှင့် ဝန်ထမ်းတို့သည် စက်မှုလက်မှုသိပ္ပံကျောင်းရှိ ကျောင်းသား/ သူများအား (၂၅.၆.၂၀၂၆)ရက်နေ့ နံနက် (၁၀:၃၀) နာရီအချိန်တွင် အမှတ်(၁)ရပ်ကွက်၊ ကားလမ်းဘေးရှိ စက်မှုလက်မှုသိပ္ပံကျောင်းတွင် စားသုံးသူကာကွယ်ရေးဆိုင်ရာ အသိပညာပေးဟောပြောပွဲကို ပြုလုပ်ဆွေးနွေးဆောင်ရွက်ခဲ့ကြောင်း သိရသည်။

        ထိုသို့ဟောပြောရာတွင် ဆရာ/ ဆမများနှင့် ကျောင်းသား/ သူများ (၃၀၀)ဦးတက်ရောက်ခဲ့ပြီး ကျောင်းအုပ်ဆရာကြီးမှ အဖွင့်အမှာစကားပြောကြားပြီး အခမ်းအနားကို စတင်ဖွင့်လှစ်ခဲ့ပါသည်။ ထိုနောက် ဖျာပုံခရိုင်ဦးစီးမှူးမှ စားသုံးသူကာကွယ်ရေးဥပဒေအကြောင်းနှင့် စားသုံးသူကာကွယ်ရေး အခွင့်အရေးနှင့် တာဝန်များအကြောင်း Online Shopping အကြောင်းကို ရှင်းလင်းဟောပြောခဲ့ပြီး၊ မြို့နယ်တာဝန်ခံက စားသုံးသူအခွင့်အရေး(၈)ချက်ကို အကျယ်တဝင့် ပြန်လည်ရှင်းလင်းခြင်းနှင့် 1535 သို့ ဖုန်းခေါ်ဆိုမှု နမူနာပြုလုပ်၍ ခေါ်ဆိုပေးခြင်း၊ လက်ကမ်းစာစောင်များကို ဆရာ/မများနှင့် ကျောင်းသား/ သူများကို ဝေဌခြင်းပြုလုပ်ခဲ့ကြောင်း သိရသည်။

          အဆိုပါဟောပြောပွဲကို (၁၂:၃၀) နာရီအချိန်တွင် ရုတ်သိမ်းခဲ့ပြီး စားသုံးဆီလုပ်ငန်းရှင်အသင်းမှ စားအုန်းဆီ (၅၀) သား ဘူး(၃၀၀)အား ရည်ညွှန်းဈေးဖြင့် ဆရာ/ဆမများနှင့် ကျောင်းသား/ သူများအား ရောင်းချပေးခဲ့ကြောင်း သတင်းရရှိပါသည်။

DOCA(ဧရာဝတီ)