ပြည်ပကုန်သွယ်မှုသတင်းများ

       ကမ္ဘာ့အကြီးဆုံး စျေးကွက်ဖြစ်သည့် အိန္ဒိယနိုင်ငံတွင် စီးပွားရေးသုံး ဂတ်စ်အိုးများ ပြတ်လပ်မှုကြောင့် နွေရာသီ အားလပ်ရက်အတွင်း စားသောက်ဆိုင်များမှာ လုပ်ငန်းများကို လျှော့ချလုပ်ကိုင်လာရသဖြင့် သကြားနှင့် စားသုံးဆီ စားသုံးမှုနှုန်း ကျဆင်းလျက်ရှိကြောင်း သိရပါသည်။ ယခုကဲ့သို့ စားသုံးမှုလျော့နည်းလာခြင်းက အင်ဒိုနီးရှားနိုင်ငံနှင့် မလေးရှားနိုင်ငံတို့မှ တင်သွင်းသည့် စားအုန်းဆီအပြင် အာဂျင်တီးနား၊ ဘရာဇီး၊ ရုရှားနှင့် ယူကရိန်းနိုင်ငံတို့မှ တင်သွင်းသည့် ပဲပုပ်ဆီနှင့် နေကြာဆီ အပါအဝင် အိန္ဒိယ၏ စားသုံးဆီ တင်သွင်းမှုများကိုပါ လျော့ကျသွားစေနိုင်ကြောင်း သိရပါသည်။ "လမ်းဘေးဆိုင်လေးတွေနဲ့ စားသောက်ဆိုင်တွေဟာ ဂတ်စ်ပြတ်လပ်တဲ့ အခက်အခဲနဲ့ ရင်ဆိုင်နေရပြီး အဲဒါက စားသုံးဆီသုံးစွဲမှုကို လျော့ကျစေပါတယ်" ဟု အိန္ဒိယစားသုံးဆီ ထုတ်လုပ်သူများအသင်း (SEA) ၏ အမှုဆောင်ဒါရိုက်တာ B.V. Mehta က ပြောကြားခဲ့ပါသည်။ ထို့အပြင် ပြီးခဲ့သည့် မတ်လအတွင်း အိန္ဒိယ၏ စားသုံးဆီတင်သွင်းမှုသည် ယခင်လထက် ၉ ရာခိုင်နှုန်းခန့် ကျဆင်းခဲ့ပြီး တန်ချိန် ၁.၂ သန်းသာ ရှိတော့ကြောင်း သိရပါသည်။

           ကမ္ဘာ့ဒုတိယအကြီးဆုံး ရည်ညွှန်းရေနံဓာတ်ငွေ့ (LPG) တင်သွင်းသည့် အိန္ဒိယနိုင်ငံသည် ဆယ်စုနှစ်များစွာအတွင်း အဆိုးရွားဆုံး ဂတ်စ်ပြတ်လပ်မှုဒဏ်ကို ရင်ဆိုင်နေရပြီး အစိုးရအနေဖြင့် အိမ်ထောင်စုများတွင် မပြတ်လပ်စေရန် စက်မှုလုပ်ငန်းများသို့ ပေးဝေသည့် ဂတ်စ်ခွဲတမ်းများကို လျှော့ချထားရကြောင်း သိရပါသည်။

            အိန္ဒိယသည် ပြီးခဲ့သည့်နှစ်က ချက်ပြုတ်ရန်အတွက် LPG တန်ချိန် ၃၃.၁၅ သန်း သုံးစွဲခဲ့ပြီး လိုအပ်ချက်၏ ၆၀ ရာခိုင်နှုန်းခန့်ကို ပြည်ပမှ တင်သွင်းခဲ့ရကြောင်းသည်။ အဆိုပါ တင်သွင်းမှု၏ ၉၀ ရာခိုင်နှုန်းခန့်မှာ အရှေ့အလယ်ပိုင်းနိုင်ငံများမှဖြစ်သည်။  အမျိုးသားသမဝါယမသကြား စက်ရုံများအဖွဲ့ချုပ် (NFCSF) မှ အဆင့်မြင့်အရာရှိတစ်ဦး၏ ပြောကြားချက်အရ ပုံမှန်အားဖြင့် နွေရာသီတွင် မြင့်တက်လေ့ရှိသော သကြားဝယ်လိုအားမှာလည်း ဂတ်စ်ပြတ်လပ်မှုကြောင့် ထိခိုက်မှုရှိနေကြောင်း သိရှိရပါသည်။

Source: Reuters                                                                        

DOCA (ရန်ကုန်)

       အမေရိကန်-အစ္စရေးနှင့် အီရန်တို့အကြား ဖြစ်ပွားနေသည့် ပထဝီနိုင်ငံရေး မတည်ငြိမ်မှုများကြောင့် ပေါ်ပေါက်လာသော စွမ်းအင်အကျပ်အတည်းကို ဖြေရှင်းရန်အတွက် ဘင်္ဂလား‌‌ဒေ့ရှ်နိုင်ငံအစိုးရသည် စက်သုံးဆီတန်ချိန် ၃ သိန်း ထပ်မံတင်သွင်းသွားမည်ဖြစ်ကြောင်း သိရပါသည်။ အဆိုပါအခြေအနေများကြောင့် အာဏာပိုင်များက မကြာသေးမီရက်ပိုင်းအတွင်းက ခြိုးခြံချွေတာရေး အစီအမံများကို ချမှတ်ကျင့်သုံးခဲ့ရကြောင်း သိရပါသည်။

           ထို့အပြင် တစ်နိုင်ငံလုံးအတိုင်းအတာဖြင့် ကူးစက်မြန် ဝက်သက်ရောဂါ ပြင်းထန်စွာဖြစ်ပွားနေစဉ်အတွင်း အစိုးရမှ ဝက်သက်အပါအဝင် အဓိကရောဂါ ၁၀ မျိုးမှ ၁၄ မျိုးအတွက် အခမဲ့ထိုးနှံပေးနေသည့် တိုးချဲ့ကာကွယ်ဆေးထိုးလုပ်ငန်း (EPI) အတွက် လိုအပ်သောကာကွယ်ဆေးများကိုလည်း တင်သွင်းသွားမည်ဖြစ်ကြောင်း သိရပါသည်။

         စွမ်းအင်နှင့် တွင်းထွက်သယံဇာတဌာနခွဲမှ တင်ပြလာသည့် တစ်ကြိမ်လျှင် တန်ချိန် ၁ သိန်းစီဖြင့် စုစုပေါင်း ဒီဇယ်တင်သွင်းမှု အဆိုပြုချက် ၃ ခုကို အတည်ပြုပေးခဲ့ခြင်းဖြစ်‌ကြောင်း သိရပါသည်။ အဆိုပါ ဝယ်ယူမှုများကို ပုံမှန်တင်ဒါခေါ်ယူသည့်စနစ်အား ကျော်လွန်၍ နိုင်ငံတကာမှ တိုက်ရိုက်ဝယ်ယူသည့်စနစ်ဖြင့် ဆောင်ရွက်သွားမည်ဖြစ်ကြောင်း သိရပါသည်။ စုစုပေါင်းပမာဏအနက် သယ်ယူပို့ဆောင်ရေးနှင့် စက်မှုလုပ်ငန်းများတွင် ကျယ်ကျယ်ပြန့်ပြန့် အသုံးပြုသည့် ဆာလဖာပါဝင်မှု အလွန်နည်းသော အဆင့်မြင့်ဒီဇယ် အမျိုးအစားဖြစ်သည့် EN590-10 PPM ဒီဇယ်တန်ချိန် ၁ သိန်းကို ဆွစ်ဇာလန်နိုင်ငံ၊ ဇုမြို့အခြေစိုက် သဘာဝသယံဇာတ ကုန်သွယ်ရေးကုမ္ပဏီဖြစ်သော YAR Energy AG ထံမှ တင်သွင်းမည်ဖြစ်ကြောင်း သိရပါသည်။

          စက်မှုသုံးစက်ပစ္စည်းများ၊ မီးစက်များနှင့် သယ်ယူပို့ဆောင်ရေးတွင် အသုံးပြုသည့် ဆာလဖာပါဝင်မှုနည်းသော 10-50 PPM ဒီဇယ်တန်ချိန် ၁ သိန်းကို K&R International Trading Company ထံမှလည်းကောင်း၊ နောက်ထပ် EN590-10 PPM ဒီဇယ်တန်ချိန် ၁ သိန်းကို M/S Sikder International ထံမှလည်းကောင်း အသီးသီးဝယ်ယူသွားမည်ဖြစ်ကြောင်း သိရပါသည်။

          ထို့အပြင်အစည်းအဝေးတွင် လက်ရှိဘဏ္ဍာရေးနှစ်အတွင်း လိုအပ်သောကာကွယ်ဆေးများ ရရှိစေရန်အတွက် ကျန်းမာရေးဝန်ဆောင်မှုဌာနခွဲမှ တင်ပြသည့် EPI ကာကွယ်ဆေးများကို UNICEF မှတစ်ဆင့် တိုက်ရိုက်ဝယ်ယူမည့် အဆိုပြုချက်ကိုလည်း အတည်ပြုခဲ့ကြောင်း သိရှိရပါသည်။

Source: The daily star                                                               

DOCA (ရန်ကုန်)

        ကုန်စည်သယ်ယူပို့ဆောင်ရေးစရိတ် မြင့်တက်လာခြင်း၊ လမ်းကြောင်းများ ပြတ်တောက်ခြင်းနှင့် ဟော်မုဇ်ရေလက်ကြား ပိတ်ဆို့မှုများကြောင့် ထိုင်းနိုင်ငံ၏ စားသောက်ကုန်တင်ပို့မှုကို ခြိမ်းခြောက်လျက်ရှိပြီး အရှေ့အလယ်ပိုင်းသို့ တင်ပို့မှုမှာ ၅၀.၇ ရာခိုင်နှုန်း အထိ ထိုးဆင်းသွား နိုင်ကြောင်း ခန့်မှန်းထားသည်။

         ဒုတိယမြောက်လထဲသို့ ရောက်ရှိလာပြီဖြစ်သော အရှေ့အလယ်ပိုင်းစစ်ပွဲကြောင့် ရေနံဈေးနှုန်းနှင့်အတူ သင်္ဘောတင်ခများပါ သိသိသာသာ မြင့်တက်လာသဖြင့် ကမ္ဘာ့ကုန်သွယ်ရေးကို  ရိုက်ခတ်လျက်ရှိသည်။ ကုလသမဂ္ဂ စားနပ်ရိက္ခာနှင့် စိုက်ပျိုးရေးအဖွဲ့ (FAO) ၏ ဧပြီလ ၃ ရက်နေ့ ထုတ်ပြန်ချက်အရ မတ်လအတွင်း ကမ္ဘာ့စားနပ်ရိက္ခာဈေးနှုန်း အညွှန်းကိန်းမှာ စွမ်းအင်ဈေးနှင့် သယ်ယူပို့ဆောင်ရေးစရိတ်များကြောင့် ၂.၄ ရာခိုင်နှုန်း မြင့်တက်ခဲ့သည်။

        ထိုင်းနိုင်ငံ၏ အမျိုးသားစားနပ်ရိက္ခာဌာန၊ ကုန်သည်ကြီးများအသင်းနှင့် စက်မှုလုပ်ငန်း ရှင်များအဖွဲ့ချုပ် (FTI) တို့၏ ခန့်မှန်းချက်အရ ၂၀၂၆ ခုနှစ်တွင် ထိုင်းစားသောက်ကုန်တင်ပို့မှု တန်ဖိုးမှာ ဘတ် ၁.၄ ထရီလီယံ ရှိနိုင်ပြီး ၂၀၂၅ ခုနှစ်ထက် ၇.၃ ရာခိုင်နှုန်း လျော့ကျနိုင်သည်ဟု ဆိုသည်။ အထူးသဖြင့် အရှေ့အလယ်ပိုင်းဈေးကွက်မှာ ဘတ် ၂၉ ဘီလီယံခန့်သာ ရှိတော့မည်ဖြစ်ပြီး ယခင်ကထက် ထက်ဝက်ကျော် (၅၀.၇ ရာခိုင်နှုန်း) လျော့ကျသွားဖွယ် ရှိနေသည်။

       ထိုင်းကုန်သည်ကြီးများအသင်း ဒုတိယဥက္ကဋ္ဌ Mr. Wisit Limleucha က ဤသို့ကျဆင်းရခြင်းမှာ ဝယ်လိုအားကြောင့်တင်မဟုတ်ဘဲ ပထဝီဝင်နိုင်ငံရေး ပဋိပက္ခများကြောင့် ပို့ဆောင်ရေးစနစ် ပျက်ပြားသွားခြင်းနှင့် ကမ္ဘာ့စီးပွားရေး နှေးကွေးခြင်းတို့ကြောင့် ဖြစ်သည်ဟုဆိုသည်။

           အရှေ့အလယ်ပိုင်းသို့ အဓိကတင်ပို့နေသည့် ထိုင်းစားသောက်ကုန်များမှာ ဆန်၊ တူနာငါး သေတ္တာ၊ ကြက်သား၊ နာနတ်သီးစည်သွပ်ဗူးနှင့် အသင့်စားခေါက်ဆွဲများဖြစ်ကြသည်။ ၂၀၂၆ ခုနှစ်၊ ဇန်နဝါရီနှင့် ဖေဖော်ဝါရီလအတွင်း တင်ပို့မှုမှာပင် ၂၂.၅ ရာခိုင်နှုန်း စတင်ကျဆင်းနေပြီ ဖြစ်သည်။

         လက်ရှိကမ္ဘာ့ကုန်သွယ်ရေးသည် အရည်အသွေးနှင့် ဈေးနှုန်းတင်မကဘဲ “ပို့ဆောင်နိုင် စွမ်း” (Delivery capability) အပေါ်တွင်ပါ မူတည်နေသည်။ စစ်ပွဲကြောင့် မရေရာမှုများ မြင့်တက်နေသော်လည်း တင်ပို့သူများသည် ဆိပ်ကမ်းများ ပြန်ဖွင့်မည့်အချိန်နှင့် ဈေးကွက် ပြန်လည်ဝင်ရောက်နိုင်မည့် အခွင့်အရေးကို မျက်ခြေမပြတ် စောင့်ကြည့်ရန်လိုအပ်ကြောင်း အကြံပြုထားကြောင်း သိရှိရပါသည်။

Source : Nation Thailand                                                                   

DOCA (ရန်ကုန်)

          တရုတ်ကော်ဖီဆိုင်လုပ်ငန်းစုများသည် ယခင်က ဈေးနှုန်းအလွန်ချိုသာစွာရောင်းချသည့် နည်းဗျူဟာဖြင့် ဆိုင်ခွဲပေါင်း ထောင်ချီဖွင့်လှစ်ကာ လျင်မြန်စွာတိုးတက်လာခဲ့သော်လည်း ယခုအခါ ထိုနည်းလမ်းမှာ ထိရောက်မှုလျော့နည်းလာပြီဖြစ်သည်။ ထို့ကြောင့် အဆိုပါ အမှတ်တံဆိပ်များသည် ထုတ်ကုန်အရည်အသွေးနှင့် ဝန်ဆောင်မှုအတွေ့အကြုံများ ပိုမိုကောင်းမွန်လာစေရန် အာရုံစိုက်လာကြသည်။

       Cotti Coffee သည် ယခုနှစ်မှစတင်ကာ အဖျော်ယမကာတစ်ခွက်လျှင် ၉.၉ ယွမ် (၁.၄ ဒေါ်လာခန့်) ဖြင့်ရောင်းချသည့် လျှော့ဈေးအစီအစဉ်များကို လျှော့ချခဲ့သည်။ အဆိုပါ နည်းဗျူဟာမှာ ၂၀၂၂ ခုနှစ် စတင်တည်ထောင်ချိန်မှစ၍ နိုင်ငံပေါင်း ၂၈ နိုင်ငံတွင် ဆိုင်ခွဲပေါင်း ၁၈,၀၀၀ အထိ တိုးချဲ့နိုင်ရန် ကူညီပေးခဲ့ခြင်းဖြစ်သည်။ ယခုအခါ ၎င်းတို့သည် မြို့ကြီးများတွင် အကျိုးတူပူးပေါင်းဆောင်ရွက်မှု လျှောက်ထားမှုများကိုရပ်ဆိုင်းထားပြီး ဝန်ဆောင်မှုအတွေ့အကြုံကောင်းမွန်စေရန် ကိုယ်ပိုင်ဆိုင်ခွဲများ တည်ဆောက်ရေးကိုသာ ဦးစားပေးတော့မည် ဖြစ်သည်။

           တစ်ချိန်တည်းမှာပင် Mixue Bingcheng သည်လည်း ကော်ဖီမှုန့်သုံးစွဲမှုအစား ကော်ဖီစေ့ကို ကိုယ်တိုင်ချက်ချင်းကြိတ်၍ ဖျော်စပ်သည့် စနစ်သို့ ပြောင်းလဲရန် ပြင်ဆင်နေကြောင်း သတင်းများထွက်ပေါ်နေသည်။ ထို့အပြင် အလိုအလျောက်ကော်ဖီ ဖျော်စက်များ၊ ကော်ဖီစေ့ အမျိုးအစားသစ်များနှင့် နို့အစရှိသည့် ပါဝင်ပစ္စည်းများကို အဆင့်မြှင့်တင်ရန် စီစဉ်နေသည်။

          တရုတ်ပြည်တွင်း စားသောက်ကုန်နှင့် အဖျော်ယမကာဈေးကွက်သည် ပြည့်နှက်နေပြီဖြစ်သောကြောင့် လုပ်ငန်းစုများသည် ပြည်ပသို့ ခြေဆန့်လာကြခြင်းဖြစ်သည်။ Luckin Coffee သည် ပြီးခဲ့သည့်လက ဆိုင်ခွဲပေါင်း ၃၀,၀၀၀ ပြည့်မြောက်ခြင်းကို ဆင်နွှဲခဲ့ပြီး ဟောင်ကောင်၊ စင်ကာပူနှင့် မလေးရှားတို့သို့ ချဲ့ထွင်ခဲ့ပြီးဖြစ်သည်။ Luckin Coffee သည် အမေရိကန်စတော့ ဈေးကွက်သို့ ပြန်လည်ဝင်ရောက်ရန် ပြင်ဆင်နေသကဲ့သို့ ၎င်း၏ အဓိကရှယ်ယာရှင်ဖြစ်သူ Centurium Capital ကလည်း နာမည်ကြီး Blue Bottle Coffee ၏ ဆိုင်ခွဲပိုင်ဆိုင်မှုများကို Nestle ထံမှ ဒေါ်လာ ၄၀၀ သန်းအောက်ဖြင့် ဝယ်ယူရန် သဘောတူညီခဲ့သည်။

           ပညာရှင်များ၏ အဆိုအရ ဤဝယ်ယူမှုသည် Luckin Coffee အတွက် အဆင့်မြင့် (Premium) ကုန်အမှတ်တံဆိပ်တစ်ခုအဖြစ် ရပ်တည်နိုင်ရန် ဖြည့်ဆည်းပေးခြင်းဖြစ်သည်ဟုဆိုသည်။ တရုတ်ကော်ဖီအမှတ်တံဆိပ်များဖြစ်သော Lucky Cup (Mixue အုပ်စုဝင်)၊ Luckin နှင့် Cotti တို့သည် ဆိုင်ခွဲပေါင်း သောင်းနှင့်ချီ ရှိလာသော်လည်း ပြည်ပဈေးကွက်တွင် အောင်မြင်မှုရရန်မှာ မသေချာကြောင်း သိရသည်။

         ပြည်ပနိုင်ငံများတွင် ဆိုင်ခန်းငှားရမ်းခ၊ လုပ်အားခနှင့် ဥပဒေကြောင်းအရ လိုက်နာရမည့် ကုန်ကျစရိတ်များမြင့်မားသဖြင့် ဈေးနှုန်းချိုသာစွာ ရောင်းချခြင်းမှာ ရေရှည်တွင် အကျိုးအမြတ်ရရန် ခက်ခဲနိုင်သည်။

        အနောက်နိုင်ငံရှိ စားသုံးသူများသည် ဈေးနှုန်းထက် ကုန်အမှတ်တံဆိပ်၏ ပုံရိပ်၊ အရည်အသွေးနှင့် ဝန်ဆောင်မှုကို ပိုမိုတန်ဖိုးထားကြသည်။ အရှိန်အဟုန်ဖြင့် တိုးချဲ့ခြင်းကြောင့် ဆိုင်ခွဲအချင်းချင်း ဈေးကွက်လုခြင်းနှင့် ဈေးနှုန်းစစ်ပွဲများ ဖြစ်ပေါ်လာကာ အကျိုးအမြတ်ကို ထိခိုက်စေနိုင်သည်။

        သို့သော်လည်း လက်ရှိတွင် အရည်အသွေးမြှင့်တင်သည့် နည်းဗျူဟာမှာ ရလဒ်ကောင်းများ ပြသနေသည်။ ဥပမာအားဖြင့် Tianlala လက်ဖက်ရည်ဆိုင်ခွဲသည် ကော်ဖီစက်များ စတင်တပ်ဆင်ပြီးနောက် ကော်ဖီရောင်းအား ၂၇ ရာခိုင်နှုန်း မြင့်တက်ကာ စုစုပေါင်းဝင်ငွေ ၅၀ ရာခိုင်နှုန်းကျော် တိုးတက်လာခဲ့သည်။

          တရုတ်ကော်ဖီဆိုင်များသည် ကမ္ဘာလုံးဆိုင်ရာ အမှတ်တံဆိပ်များအဖြစ် ရပ်တည်နိုင်ရန်အတွက် ဈေးနှုန်းအပြင် အရည်အသွေးနှင့် ဒေသဆိုင်ရာ ယဉ်ကျေးမှုများတွင် ပေါင်းစပ်ဝင်ဆံ့နိုင်မှုကို အဓိကထား၍ ပြောင်းလဲလုပ်ဆောင်နေကြပြီဖြစ်ကြောင်း သိရှိရပါသည်။

Source : VN Express                                                                           

DOCA (ရန်ကုန်)

        ဖိလစ်ပိုင်နိုင်ငံ၏ စိုက်ပျိုးရေးထုတ်ကုန်စွမ်းအား မြှင့်တင်ရန်နှင့် ရာသီဥတုဒဏ်ခံနိုင်ရည်ရှိသော စားနပ်ရိက္ခာစနစ်တစ်ခု တည်ဆောက်ရန်အတွက် အမေရိကန်ဒေါ်လာ ၁ ဘီလီယံ ချေးငွေထုတ်ပေးရန် ကမ္ဘာ့ဘဏ်က အတည်ပြုလိုက်ကြောင်း သိရသည်။

       ဝါရှင်တန်အခြေစိုက် ကမ္ဘာ့ဘဏ်၏ အမှုဆောင်ညွှန်ကြားရေးမှူးများအဖွဲ့သည် “ဖိလစ်ပိုင် ရေရှည်တည်တံ့သော စိုက်ပျိုးရေးကဏ္ဍ အသွင်ကူးပြောင်းမှုစီမံကိန်း” (PSAT) အတွက် အဆိုပါ ရန်ပုံငွေကို တရားဝင်ခွင့်ပြုပေးခဲ့ခြင်း ဖြစ်သည်။ ဤစီမံကိန်းသည် ဖိလစ်ပိုင်တစ်နိုင်ငံလုံးရှိ လယ်သမား ၅ သန်းကျော်ကို တိုက်ရိုက်အကျိုးပြုမည်ဖြစ်ပြီး အဓိကအားဖြင့် စိုက်ပျိုးရေးလုပ်ထုံး လုပ်နည်းများကို ခေတ်မီအောင် ဆောင်ရွက်ခြင်း၊ စားနပ်ရိက္ခာနှင့် အာဟာရဖူလုံမှုကိုမြှင့်တင်ခြင်း၊ အလုပ်အကိုင်အခွင့်အလမ်းသစ်များ ဖော်ဆောင်ပေးခြင်းတို့ကို လုပ်ဆောင်သွားမည်ဖြစ်သည်။

        ကမ္ဘာ့ဘဏ်၏ ဖိလစ်ပိုင်၊ မလေးရှားနှင့် ဘရူနိုင်းဆိုင်ရာ ညွှန်ကြားရေးမှူး Zafer Mustafaoğlu က ဤရင်းနှီးမြှုပ်နှံမှုသည် ဖိလစ်ပိုင်စိုက်ပျိုးရေးကဏ္ဍအတွက် အလှည့်အပြောင်းတစ်ခု ဖြစ်လာမည်ဖြစ်ပြီး မှန်ကန်သည့် မူဝါဒများ၊ စနစ်များနှင့် ပူးပေါင်းဆောင်ရွက်မှုများမှ တစ်ဆင့် လယ်သမားများ ဝင်ငွေပိုရလာမည်ဟု ပြေားကြားခဲ့သည်။ ရာသီဥတုပြောင်းလဲမှုဒဏ်ကို ခံနိုင်ရည်ရှိလာပြီး ပြည်သူများအတွက်လည်း ဈေးနှုန်းသက်သာပြီး ဘေးကင်းတဲ့ အစားအစာများကို ပံ့ပိုးပေးနိုင်မည်ဖြစ်ကြောင်းလည်း ၎င်းက ဆက်လက်ပြောကြားခဲ့သည်။

          PSAT စီမံကိန်း၌ ရာသီဥတုနှင့် ကိုက်ညီသော စိုက်ပျိုးရေးနည်းစနစ်များ၊ မျိုးစေ့နှင့် မြေဩဇာစီမံခန့်ခွဲမှု၊ ရေချွေတာရေးနှင့် ဖန်လုံအိမ်ဓာတ်ငွေ့လျှော့ချရေး နည်းပညာများကို မိတ်ဆက်ပေးသွားမည်ဖြစ်သည်။ လယ်ယာသုံးသွင်းအားစုများကို မြန်ဆန်ပွင့်လင်းမြင်သာစွာ ဖြန့်ဝေနိုင်ရန် Digital Voucher System အသစ်ကို ကျင့်သုံးသွားမည်ဖြစ်သည်။

         စိုက်ပျိုးရေးဝန်ကြီးဌာန၏ ဘတ်ဂျက်သုံးစွဲမှု၊ အချက်အလက်စီမံခန့်ခွဲမှုနှင့် ပစ္စည်းဝယ်ယူမှု လုပ်ငန်းစဉ်များကိုလည်း ပိုမိုခိုင်မာအောင် လုပ်ဆောင်သွားမည်ဖြစ်သည်။ ကမ္ဘာ့ဘဏ်၏ စိုက်ပျိုးရေးဆိုင်ရာ အကြီးတန်းပညာရှင် Mio Takada က ယခုစီမံကိန်းကြောင့် လယ်သမားများ ၏ ဝင်ငွေတိုးတက်လာမည့်အပြင် ရိတ်သိမ်းချိန်အလွန် လေလွင့်ဆုံးရှုံးမှုများကိုလည်း လျှော့ချနိုင်မည်ဖြစ်ကြောင်း အလေးပေးပြောကြားခဲ့သည်။

​Source : VN Express                                                                           

DOCA (ရန်ကုန်)