ပြည်တွင်းကုန်သွယ်မှုသတင်း

    မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်သည့် နိုင်ငံဖြစ်ပြီး စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကန့်ဘလူမြို့နယ်တွင် သီးနှံမျိုးစုံ စိုက်ပျိုးလျက်ရှိရာ ရေ၊ မြေ၊ ရာသီဥတုနှင့်ကိုက်ညီသည့် ပဲစင်းငုံသီးနှံကို အဓိကစိုက်ပျိုးလျက်ရှိကြောင်း စိုက်ပျိုးရေးဦးစီး ဌာန၏ စာရင်းများအရ သိရသည်။

     ဒေသတွင်းဈေးကွက်၌ ၂၀၂၆ ခုနှစ်၊ စက်တင်ဘာလ ပထမပတ်အတွင်း ပဲစင်းငုံနီတစ်တင်း လျှင် ကျပ် ၉၁၀၀၀၊ ပဲစင်းငုံဖြူ တစ်တင်းလျှင် ကျပ် ၈၁၀၀၀ နှုန်းတို့ဖြင့် အရောင်းအဝယ်ဖြစ်လျက်ရှိ ကြောင်း၊ ယခင်ဩဂုတ်လ ပထမပတ်ဈေးနှုန်းများမှာ ပဲစင်းငုံနီတစ်တင်းလျှင် ကျပ် ၈၉၀၀၀နှင့် ပဲစင်းငုံဖြူတစ်တင်းလျှင် ကျပ် ၇၉၅၀၀ ဖြင့်အရောင်းအဝယ်ဖြစ်ခဲ့ရာ နှိုင်းယှဉ်ပါက ယခုလပထမ ပတ်အတွင်း ပဲစင်းငုံနီတစ်တင်းလျှင် ကျပ် ၂၀၀၀နှင့် ပဲစင်းငုံဖြူတစ်တင်းလျှင် ကျပ် ၁၅၀၀ ဈေးနှုန်းမြင့်တက်လာကြောင်း၊ ကန့်ဘလူဒေသထွက် သီးနှံများကို မန္တလေးမြို့ရှိ ပွဲရုံများနှင့် ကုန်စည်ဒိုင်သို့ တင်ပို့ရောင်းချလျက်ရှိသောကြောင့် ဒေသတွင်းဈေးကွက်၏ ဈေးနှုန်းအတက်အကျ မှာ  မန္တလေးဈေးကွက်အပေါ်မူတည်ကြောင်း လုပ်ငန်းရှင်များထံမှ သိရှိရသည်။

DOCA(စစ်ကိုင်း)

          မကွေးတိုင်းဒေသကြီး၊ မကွေးခရိုင်၊ မကွေးမြို့နယ်အတွင်းရှိ မိကျောင်းရဲ၊ လျောင်းတော်ဦး၊ ကံသစ်၊ ရွာဟောင်းကန်၊ သစ်ရာကောက်စသည့်ကျေးရွာများနှင့် မင်းဘူး၊ မြို့သစ်၊ နတ်မောက်မြို့နယ်တို့မှ ထွက်ရှိသော ပဲတီစိမ်း၊ ပဲနောက်၊ ကုလားပဲ၊ ပဲကြီး၊ စားတော်ပဲ၊ အခြား ပဲမျိုးစုံနှင့် နှမ်းမျိုးစုံတို့ မကွေးဈေးကွက်သို့ ဝင်ရောက်ရောင်းဝယ်ဖောက်ကားလျက်ရှိပါသည်။

          ၂၀၂6ခုနှစ်၊ ဩဂုတ်လ(စတုတ္ထပတ်)တွင် နှမ်းနီ(၁)တင်းလျှင် ကျပ်(၁၅၀၀၀၀)၊ နှမ်းဖြူ (၁) တင်းလျှင် ကျပ်(၁၅၁၀၀၀)၊ နှမ်းနက်(စမုံ)(၁)တင်းလျှင် ကျပ်(၁၈၈၀၀၀)၊ နှမ်းညိုကြား (၁) တင်း လျှင် ကျပ်(၁၄၃၅၀၀)ဖြစ်၍ ယခင်တစ်ပတ်နှင့် နှိုင်းယှဉ်ပါက နှမ်းနီ ကျပ်(၃၀၀၀)၊ နှမ်းဖြူ ကျပ် (၁၀၀၀)၊ နှမ်းနက်(စမုံ) ကျပ်(၈၀၀၀)၊ နှမ်းညိုကြား ကျပ်(၁၅၅၀၀)ဈေးမြင့်တက်လာကြောင်း၊ တစ်ပတ်အတွင်း မကွေးမြို့မှ မန္တလေးမြို့သို့ နှမ်းအိတ်ရေ (၅၀၀၀)၊ ရန်ကုန်မြို့သို့ နှမ်းအိတ်ရေ (၅၀၀၀) တင်ပို့ခဲ့ပြီး တန်ချိန်အားဖြင့် တန်(၇၀၀)ခန့် အရောင်းအဝယ်ဖြစ်ခဲ့ကြောင်း သိရသည်။

      ဩဂုတ်လ(စတုတ္ထပတ်)တွင် ကုလားပဲ(HL) (၁)တင်း လျှင် ကျပ်(၇၅၅၀၀)၊ ကုလားပဲ(929) (၁)တင်းလျှင် ကျပ်(၈၄၀၀၀)ဖြင့် အရောင်းအဝယ်ဖြစ်လျက်ရှိပြီး ယခင်တစ်ပတ်နှင့် ဈေးနှုန်းနှိုင်းယှဉ်ပါက ကုလားပဲ(929) ကျပ်(၃၀၀)ဈေးမြင့်တက်လာကြောင်း၊ အရောင်းအဝယ်အေးနေပြီး လက်ကျန်ပဲများသာ အရောင်းအဝယ်ဖြစ်နေကြောင်း၊ တစ်ပတ်အတွင်း မကွေးမြို့မှ မန္တလေးမြို့သို့ အိတ်ရေ (၁၀၀၀)တင်ပို့ခဲ့ပြီး တန်ချိန်အားဖြင့် တန်(၁၅၀)ခန့် အရောင်းအဝယ်ဖြစ်ခဲ့ကြောင်း သိရသည်။

          ဩဂုတ်လ(စတုတ္ထပတ်)တွင် ပဲစင်းငုံ(၁)တင်းလျှင် ကျပ်(၁၀၀00၀)ဖြင့် အရောင်းအဝယ်ဖြစ်လျက်ရှိပြီး ဈေးနှုန်းတည်ငြိမ်နေကြောင်း၊ ယခုအချိန်တွင် ဒေသတွင်း၌ ပဲစင်းငုံစိုက်ပျိုးချိန်ဖြစ်၍ လက်ကျန်ပဲများသာ ဈေးကွက်အတွင်း အရောင်းအဝယ်ဖြစ်လျက်ရှိကြောင်း၊ တစ်ပတ်အတွင်း မကွေးမြို့မှ ရန်ကုန်မြို့သို့ အိတ်ရေ (၁၀၀၀)တင်ပို့ခဲ့ပြီး တန်ချိန်အားဖြင့် တန်(၁၀၀)ခန့် အရောင်းအဝယ်ဖြစ်ခဲ့ကြောင်း သိရသည်။

          ဩဂုတ်လ(စတုတ္ထပတ်)တွင် ပဲတီစိမ်း (၁)တင်းလျှင် ကျပ်(၈၀0၀၀)ဖြင့် အရောင်းအဝယ်ဖြစ်လျက်ရှိပြီး ယခင်တစ်ပတ်နှင့် ဈေးနှုန်းနှိုင်းယှဉ်ပါက ဈေးနှုန်းတည်ငြိမ်နေကြောင်း၊ တစ်ပတ်အတွင်း မကွေးမြို့မှ မန္တလေးမြို့သို့ အိတ်ရေ (၇၀၀)တင်ပို့ခဲ့ပြီး တန်ချိန်အားဖြင့် တန်(၅၀)ခန့် အရောင်းအဝယ်ဖြစ်ခဲ့ကြောင်း သိရသည်။

          ဩဂုတ်လ(စတုတ္ထပတ်)တွင် မတ်ပဲ(၁)တင်းလျှင် ကျပ်(၁၀၀၀၀၀)ဖြင့် အရောင်းအဝယ်ဖြစ်လျက်ရှိပြီး ယခင်တစ်ပတ်နှင့် ဈေးနှုန်းနှိုင်းယှဉ်ပါက ဈေးနှုန်းတည်ငြိမ်နေကြောင်း၊ တစ်ပတ်အတွင်း မကွေးမြို့မှ ရန်ကုန်မြို့သို့ အိတ်ရေ(၃၅၀)တင်ပို့ခဲ့ပြီး တန်ချိန်အားဖြင့် တန်(၅၀)ခန့် အရောင်းအဝယ်ဖြစ်ခဲ့ကြောင်း သိရှိရပါသည်။

DOCA(မကွေး)

          မြိတ်ခရိုင်၊မြိတ်မြို့နယ်တွင် ဇွန်လ၊ ဇူလိုင်လနှင့် ဩဂုတ်လများတွင် နာနတ်သီးများ လှိုင်လှိုင်ပေါသော ရာသီဖြစ်ပြီး မြိတ်မြို့ပေါ်ရှိ ကျေးရွာအချို့တို့မှ အများဆုံးထွက်ရှိကြောင်း သိရှိရပါသည်။ ၎င်းဒေသတို့မှထွက်ရှိသော နာနတ်သီးများကို ရန်ကုန်မြို့သို့ တင်ပို့ဖြန့်ဖြူး ရောင်းချလျက်ရှိကြောင်း သိရှိရပြီး မြိတ်မြို့အတွင်းသို့လည်း နာနတ်သီးများ နေ့စဉ်ဝင်ရောက်လျက်ရှိကြောင်းလည်း သိရှိရပါသည်။ စားသုံးသူများအနေဖြင့် နာနက်သီးဝယ်ယူရာတွင် အရောင်လှပ၍ သဘာဝအနံ့ရှိပြီး ပုတ်သိုးခြင်း၊ မှိုတက်ခြင်းနှင့် ထိခိုက်ပျက်စီးမှုမရှိသော အသီးများကိုသာဝယ်ယူစားသုံးသင့်ကြောင်း၊ မစားသုံးမီ သေချာဆေးကြောသန့်စင်ပြီး သန့်ရှင်းလတ်ဆတ်သော အသီးများကိုသာ စားသုံးသင့်ကြောင်းနှင့် ဈေးနှုန်းများသည်လည်း သယ်ယူစရိတ်ပေါ်မူတည်၍ ပြောင်းလဲနိုင်ကြောင်း သိရှိရပါသည်။ နာနတ်သီးသည် အမျှင်ဓါတ်ကြွယ်ဝစွာပါရှိခြင်းကြောင့် ကိုယ်ခံအားကို ကောင်းမွန်စေသည့်အပြင် သွေးအတွင်း မကောင်းသော အဆီဓာတ်များကိုပါ လျော့ချနိုင်သောကြောင့် သွေးတိုးရောဂါ ဖြစ်ပွားခြင်းများကိုလည်း လျှော့ချပေးနိုင်ကြောင်း၊ ထို့ပြင် မျက်စိအမြင်အာရုံကို အထောက်အကူဖြစ်စေသော ကျန်းမာရေးဆေးဖက်ဝင် သီးနှံတစ်မျိုးဖြစ်သည့်အပြင် ဖျော်ရည်ပြုလုပ်ရာတွင်လည်းကောင်း၊ လတ်ဆတ်စွာစားသုံးရသောကြောင့် ဝယ်ယူစားသုံးမှုများကြောင်း ဈေးကွက်မှသိရှိရပါသည်။

          မြိတ်မြို့၏ ဆိပ်ငယ်စည်ပင်သာယာဈေး၊ အခြားသောဈေးများနှင့် သစ်သီးဆိုင်များတွင် ၂၀၂၆ ခုနှစ်၊ သြဂုတ်လနောက်ဆုံးပတ်တွင် ဈေးနှုန်းအနေဖြင့် နာနတ်သီးတစ်လုံးလျှင် (၄၀၀၀)ကျပ် မှ (၄၅၀၀)ကျပ်ဖြင့် အရွယ်အစားကိုလိုက်၍ ရောင်းချလျက်ရှိကြောင်း၊ ဝင်ရောက်လာသော နာနတ်သီးများကို လက်လီရောင်းချနေသော ဈေးသည်များကလည်း တစ်ဆင့်ပြန်လည်ရောင်းချခြင်းဖြင့်အရောင်း အဝယ်ဖြစ်လျက်ရှိကြောင်း သိရှိရပါသည်။

DOCA(တနင်္သာရီ)

          မိုးရာသီကာလအတွင်း ဗူးသီးစိုက်ခင်းများမှ အထွက်နှုန်းကောင်းလာသဖြင့် ဒေသအသီးသီးရှိ ဈေးကွက်များတွင် ဗူးသီးများပေါများစွာရောင်းချလျက်ရှိကြောင်း သိရှိရပါသည်။ ဗူးသီးသည် မိုးရာသီတွင် ကောင်းစွာဖြစ်ထွန်းသော ဟင်းသီးဟင်းရွက်တစ်မျိုးဖြစ်ပြီး စိုက်ပျိုးရလွယ်ကူသည့်အပြင် အထွက်နှုန်းလည်းကောင်းမွန်သောကြောင့် တောင်သူများက အဓိကစိုက်ပျိုးသည့် သီးနှံများထဲတွင် ဗူးသီးလည်း အပါအဝင်တစ်ခုဖြစ်ပါသည်။ ဈေးကွက်အတွင်း ဗူးသီးပေါများလာသောကြောင့် စားသုံးသူများအနေဖြင့် လတ်ဆက်သောဗူးသီးများကို အလွယ်တကူဝယ်ယူနိုင်ကြပါသည်။ ဗူးသီးနှင့် ဗူးရွက်၊ ဗူးညွှန့်များကို ဟင်းချိုအရည်သောက်ဟင်း၊ ကြော်/ ချက်နှင့် အခြားဟင်းလျာများတွင် အသုံးပြုကြပြီး လူကြိုက်များသော ဟင်းသီးဟင်းရွက်တစ်မျိုးဖြစ်ပါသည်။ ဗူးသီးတွင် ရေဓါတ်၊ အမျှင်ဓါတ်နှင့် သတ္ထုဓါတ်အချို့ပါဝင်သဖြင့် ခန္ဓာကိုယ်အတွက် ရေဓါတ်ဖြည့်သွင်းရာတွင် အထောက်အကူပြုနိုင်ပြီး မျှတသော အစားအစာအစိတ်အပိုင်းတစ်ခုအဖြစ် စားသုံးနိုင်ပါသည်။ မြိတ်မြို့ပေါ်ရှိဈေးများတွင် ဗူးသီး အသေး(၁)လုံးလျှင်(၁၅၀၀)ကျပ်၊ဗူးသီးအလတ်(၁)လုံးလျှင်(၂၅၀၀)ကျပ်နှင့် ဗူးသီးအကြီး(၁)လုံးလျှင် (၃၀၀၀)ကျပ်ဖြင့် ရောင်းချလျက်ရှိပြီး အရွယ်အစားနှင့် ဒေသအလိုက် ဈေးနှုန်းကွာခြားမှုရှိကြောင်း ဈေးသည်များထံမှသိရှိရပါသည်။ မိုးရာသီတွင်အထွက်နှုန်းတိုးလာခြင်းကြောင့်ဝယ်လိုအားကိုအလွယ် တကူဖြည့်ဆည်းပေးနိုင်ကြောင်း သိရှိရပါသည်။

DOCA(တနင်္သာရီ)

           တနင်္သာရီတိုင်းဒေသကြီး၊ မြိတ်ဒေသထွက်ရေထွက်ကုန်တစ်မျိုးဖြစ်သည့် ငါးပုတ်သင်ခြောက်သည် ဒေသခံများသာမက တစ်ခြားအနယ်နယ်အရပ်ရပ်ကလည်း ကြိုက်နှစ်သက်ကြသော ငါးခြောက်အမျိုးအစားတစ်ခုဖြစ်ပြီး မြိတ်မြို့ပေါ်ရှိငါးခြောက်စျေးကွက်များတွင် အရောင်းအဝယ်ကောင်းလျက်ရှိ‌ကြောင်း သိရှိရပါသည်။ မြိတ်ကျွန်းစုနှင့် အနီးဝန်းကျင်‌ပင်လယ်ပြင်မှ ရရှိသည့်ငါးများကို သန့်စင်ကာ ဆားနယ်နေလှန်း၍ ငါးခြောက်အဖြစ်ထုတ်လုပ်ကြပြီး ဒေသတွင်းရောင်းချမှုများအပြင် မြိတ်မှတစ်ဆင့် အခြားဒေသများသို့လည်း ဖြန့်ဖြူး‌ရောင်းချလျက်ရှိသည်။ ငါးပုတ်သင်ခြောက်သည် အရည်အသွေး၊ အရွယ်အစားပေါ်မူတည်၍ စျေးနှုန်းကွာခြားနိုင်သည်။ ငါးပုတ်သင်ခြောက်မှာ ရေဓာတ်လျော့နည်းပြီး အာဟာရဓာတ်များပိုမိုပါဝင်ကြောင်း သိရှိရပါသည်။

          မြိတ်မြို့ပေါ်ရှိစျေးကွက်များတွင် ငါးပုတ်သင်ခြောက် တစ်ပိဿာလျှင် (၁၂၀၀၀၀) ကျပ်ဖြင့် ရောင်းချကြောင်း သိရှိရပါသည်။ မြိတ်ဒေသထွက်ငါးခြောက်များ၏ စျေးနှုန်းများသည် ရာသီအလိုက် ငါးဖမ်းဆီးရရှိမှု၊ ရာသီဥတုနှင့် ကုန်ကြမ်းဝင်ရောက်မှု အခြေအနေများအပေါ်မူတည်၍ အတက်အကျ ရှိနိုင်ပါသည်။ နှစ်စဉ်မိုးဦးကာလတွင် ငါးသားပေါက်ရာသီဖြစ်၍ ပင်လယ်ထွက်ကုန်ရရှိမှု လျော့နည်းသောကြောင့် ငါးပိ၊ ငါးခြောက်၊ ပုဇွန်ခြောက်များ စျေးနှုန်းမြှင့်တက်လျှက်ရှိကြောင်း သိရှိရပါသည်။

DOCA(တနင်္သာရီ)