ဈေးကွက်အလားအလာကောင်းသော ပြည်ပပို့ကုန် ပဲစင်းငုံ
မကွေးတိုင်းဒေသကြီး၊ ပခုက္ကုခရိုင်၊ ပခုက္ကူကုန်စည်ဒိုင်သည် မကွေးတိုင်းဒေသကြီးအတွင်း၌ စီးပွားရေးအချက်အချာကျသော ကုန်သွယ်မှု ဗဟိုဌာနတစ်ခုဖြစ်ပါသည်။ ကုန်စည်ဒိုင်သို့ လာရောက်ရောင်းချသည့် ဒေသများမှာ ပခုက္ကူ၊ မြိုင်၊ ပေါက်(ရေပြာ၊ ကမ္မ)၊ ရေစကြို၊ ဆိပ်ဖြူမြို့နယ်များရှိ ကျေးရွာများ၊ မန္တလေးတိုင်းဒေသကြီး၊ ညောင်ဦးမြို့နယ် ငါ့သရောက်ကျေးရွာနှင့် အနီးပတ်ဝန်းကျင်ရှိ ကျေးရွာများမှ ကုန်သည်များနှင့် တောင်သူများ နေ့စဉ် စုဝေးရာနေရာဒေသဖြစ်ပြီး ဆီထွက်သီးနှံများ၊ ပဲမျိုးစုံနှင့် ကြက်သွန်နီများ လာရောက်ရောင်းဝယ်ဖောက်ကားကြပါသည်။ နယ်မြေအခြေအနေပေါ်တွင် မူတည်၍ မုံရွာခရိုင်အစပ်ရှိကျေးရွာများနှင့် ယောဒေသထွက်ကုန် နှမ်းမျိုးစုံနှင့် တောင်ယာသီးနှံများ လည်း လာရောက်ရောင်းချကြောင်း သိရပါသည်။
၂၀၂၆ ခုနှစ်၊ ဇူလိုင်လ (ဒုတိယပတ်)တွင် ပခုက္ကူကုန်စည်ဒိုင်၌ ပဲစင်းငုံနီ ဈေးနှုန်းမှာ တစ်တင်း (၂၀ ပိဿာ)လျှင် ကျပ်(၉၉၆၀၀)ဖြင့် အရောင်းအဝယ်ဖြစ်နေပြီး ယခုရက်ပိုင်းအတွင်း ဈေးတက် လာသောအခြေအနေဖြစ်ပါသည်။ ယနေ့ ဈေးကွက်အခြေအနေကို ယခင်တစ်ပတ်နှင့်ဈေးနှုန်း နှိုင်းယှဉ်ပါက တစ်တင်းလျှင် ကျပ်(၃၀၀၀)ခန့် ဈေးမြင့်တက်လာကြောင်း သိရှိရပါသည်။
ဈေးကွက်သုံးသပ်ချက်အနေဖြင့် ပဲစင်းငုံသီးနှံသည် အိန္ဒိယနိုင်ငံသို့ အဓိကထားပြီး တင်ပို့ သော သီးနှံဖြစ်သောကြောင့် လက်ရှိအချိန်သည် အိန္ဒိယဘက်က ပဲစိုက်ပျိုးမှုနှင့် ရာသီဥတုမမှန်ခြင်းတို့ ကြောင့် ပဲပြတ်လပ်မှုဖြစ်ကာ ဝယ်လိုအားရှိနေခြင်း၊ ပြည်တွင်း၌ လှောင်ပဲလက်ကျန်သာရှိ၍ တောင်သူများနှင့် နယ်ကုန်သည်များက ဈေးလျှော့မရောင်းဘဲ ထိန်းထားခြင်းကြောင့် ဈေးကွက် အတွင်း အဝင်နည်းကာ ဈေးနှုန်းခိုင်မာနေပါသည်။
ရှေ့ဆက်ဖြစ်ပေါ်နိုင်သည့်ဈေးကွက် အလားအလာမှာ ဇူလိုင်လ (တတိယပတ်)မတိုင်မီအထိ ပဲစင်းငုံဈေးနှုန်းသည် လက်ရှိအတိုင်း ခိုင်မာတည်ငြိမ်နေမည့်အပြင် အနည်းငယ် ဈေးနှုန်းမြင့်တက် လာနိုင်ချေ ရှိပါသည်။ မြန်မာ့ပဲစင်းငုံသည် ပြည်ပဝယ်လိုအားနှင့် ဈေးကွက် အခွင့်အလမ်းကောင်းများ ဆက်လက်အားကောင်းနိုင်သည်ဟု ကုန်သည်များ၏ သုံးသပ်ချက်အရ သိရှိရပါသည်။
DOCA(မကွေး)
