ပြည်တွင်းကုန်သွယ်မှုသတင်း

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့၌ မိသားစုအပိုဝင်ငွေ ရရှိရန်အတွက် လက်လုပ်ချဉ်များကို ကိုယ်တိုင်ပြုလုပ်ပြီး “မြို့မဈေး”တွင်ရောင်းချလျက်ရှိရာ သရက်သီးကုလားတည် ချဉ်နှင့် နှမ်းပတ်ချဉ်များလည်း အပါအဝင်ဖြစ်ကြောင်း၊  ၂၀၂၅ ခုနှစ်၊ စက်တင်ဘာလ တတိယပတ် အတွင်း ကန့်ဘလူ“မြို့မဈေး”၌ သရက်သီးကုလားတည်ချဉ် လက္ကားတစ်ပိဿာလျှင် (၁၀၀၀၀)ကျပ်၊  လက်လီတစ်ပိဿာလျှင် (၁၀၅၀၀)ကျပ်၊ (၅၀)ကျပ်သားလျှင်(၅၅၀၀)ကျပ်၊ (၁၀)ကျပ်သားလျှင် (၁၁၀၀) ကျပ်ဈေးနှုန်းတို့ဖြင့် စားသုံးသူများ၊ ဒံပေါက်ဆိုင်များမှ ဝယ်ယူလျက်ရှိကြောင်း၊ နှမ်းပတ်ချဉ်လက်လီ တစ်ထုပ်လျှင် (၅၀၀)ကျပ်၊ လက်ကားတစ်ထုပ်လျှင် (၄၅၀)ကျပ်ဈေးနှုန်းတို့ဖြင့် ရောင်းချလျက်ရှိကြောင်း  သိရှိရသည်။   

DOCA(စစ်ကိုင်း)                

    ကျောက်ဆည်ခရိုင်အတွင်းတွင်  သီးနှံမျိုးစုံစိုက်ပျိုးလျက်ရှိရာ ကုန်စိမ်းသီးနှံဖြစ်သော ကျောက်ဖရုံသီးသီးနှံကိုလည်း တစ်နှစ်ပတ်လုံးစိုက်ပျိုးကြပါသည် ။ ကျောက်ဖရုံသီး မျိုးများမှာ အိုမီကာ(ထိုင်ဝမ်)မျိုးနှင့် ဗမာမျိုးများဖြစ်ပြီး အိုမီကာ(ထိုင်ဝမ်)မျိုးကိုသာ အများဆုံးစိုက်ပျိုးကြ ကြောင်း၊ ကျောက်ဖရုံသီး စိုက်ပျိုးမည်ဆိုပါက (၁)ဧကလျှင်(၄-၅)ထုပ်စိုက်ပျိုးရကြောင်း ၊ မျိုးစေ့ (၁)ထုပ် ဈေးနှုန်းအနေဖြင့် အိုမီကာ(ထိုင်ဝမ်)မျိုး(၁)ထုတ်လျှင်(၂၀၀၀၀)ကျပ် ဗမာမျိုး(၁)ထုပ်လျှင် (၁၅၀၀၀) ကျပ်ရှိကြောင်း ၊ ကျောက်ဖရုံသီးကို ဘောင်ဖြင့်စိုက်ပျိုးရကြောင်း (၁)ပင်နှင့်(၁)ပင် (၅)တောင်ခန့် ဖွင့်၍(၁)ပေခွဲခန့်ခြား စိုက်ပျိုးရကြောင်း၊ အများဆုံးစိုက်ပျိုးသည့်ကျေးရွာများမှာ စဉ့်ကိုင်မြို့နယ် စဉ့်ကိုင်ကြီးကျေးရွာ၊ ပင်းချားကျေးရွာ၊ ညောင်ပင်ကြီးကျေးရွာတို့ဖြစ်ကြကြောင်း ၊ (၁)ဧက ကုန်ကျစရိတ်အနေဖြင့် မျိုး၊သွင်းအားစု၊လုပ်သားခအပါအဝင် စုစုပေါင်း (၆၀၀၀၀၀)ကျပ် ဝန်းကျင် ခန့်ကုန်ကြကြောင်း ၊ ဈေးနှုန်းအနေဖြင့် ကျောက်ဖရုံးသီး အိုမီကာ (ထိုင်ဝမ်)တစ်လုံးလျှင် လက်ကားဈေး(၃၀၀၀/-)ကျပ်၊ လက်လီဈေး (၃၅၀၀/-)ကျပ်၊ ဗမာသီးတစ်လုံးလျှင် လက်ကားဈေး (၆၀၀၀/-)ကျပ်၊ လက်လီဈေး (၇၀၀၀/-)ကျပ်ဖြင့် ၊ အလုံးအကြီးအသေးပေါ်မူတည်၍ ဈေးနှုန်း ကွာခြားမှုလည်း ရှိကြောင်း၊ တစ်ဧကအကျိုးအမြတ်အနေဖြင့် (၃၀၀၀၀၀၀/-) ကျပ်ခန့်ရရှိ ကြောင်း၊ ဈေးကွက်အနေဖြင့် ကျောက်ဖရုံသီးကို စိုက်ခင်းထဲထိ ပွဲစားများမှ လာရောက်ဝယ်ယူကြပြီး၊ ကျောက်ဖရုံစိုက် တောင်သူများမှလည်း ရန်ကုန်၊ မန္တလေး၊ မိတ္ထီလာမြို့များနှင့် ကျောက်ဆည်ခရိုင် အတွင်းရှိ မြို့မဈေးများတွင်လည်း သွားရောက်ရောင်းချကြကြောင်း၊ အညာဒေသအလှူ၊ မင်္ဂလာဆောင်များတွင်လည်း ကျောက်ဖရုံသီးကို အသားဟင်းတစ်မျိုးမျိုးနှင့်ရော၍ ချက်ပြုတ် ကျွေးမွေးကြသောကြောင့် ကျောက်ဖရုံသီးနှံသည် ဈေးကွက်တွင် အရောင်းအဝယ်သွက်၍ တောင်သူ များအနေဖြင့် အကျိုးအမြတ်ရရှိသော သီးနှံဖြစ်သောကြောင့် ကျောက်ဖရုံသီး သီးနှံကို ပိုမိုတိုးချဲ့ စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

   ကျောက်ဆည်ခရိုင်အတွင်းရှိ ဈေးများသို့ မုန်လာဥဖြူများ ဝင်ရောက်လျက်ရှိပြီး ရှမ်းပြည်၊ အောင်ပန်းမှ ဝင်ရောက်လျက်ရှိကြောင်း မုန်လာဥသီးနှံသည် တစ်နှစ်ပတ်လုံး စိုက်ပျိုး၍ရကြောင်း ၊ အေးသောဒေသနှင့် အပူပိုင်းဒေသတွင်လည်း စိုက်ပျိုးဖြစ်ထွန်းကြောင်း ပြင်ဦးလွင်၊ နောင်ချိုနယ် များတွင်လည်း စိုက်ပျိုးကြကြောင်း၊ မုန်လာဥဈေးနှုန်းအနေဖြင့် ယခင်လတွင် (၁၀)လုံးတစ်စည်း လျှင် လက်ကားဈေး  (၈၀၀/-) ကျပ်၊ လက်လီတစ်စည်းလျှင် (၁၀၀၀/-)ကျပ်၊ ယခုလတွင် (၁၀)လုံး တစ်စည်းလျှင် လက်ကားဈေး(၄၀၀/-)ကျပ်၊ လက်လီတစ်စည်းလျှင်(၆၀၀-၇၀၀)ကျပ်ဖြင့် ရောင်းဝယ်လျက်ရှိကြောင်း၊ ယခင်လနှင့်နှိုင်းယှဉ်လျှင် မုန်လာဥဈေးနှုန်းအနည်းငယ်ကျဆင်းလျက် ရှိကြောင်း၊ ဟင်းသီးဟင်းရွက်များထဲမှ အဟာရဓာတ်အများဆုံးပါဝင်သော မုန်လာဥဖြူကို လူအများ နှစ်ကြိုက်စွာ စားသုံးလျက်ရှိကြောင်း၊ မုန်လာဥဖြူကို အချဉ်ရည်ဟင်း၊ ဟင်းချိုချက်၍လည်း စားသုံးကြကြောင်း၊   အတို့ အမြုပ်အဖြစ်လည်း  စားသုံးကြသလို မုန်လာဥကို အချဉ်တည်၍လည်း ပြန်လည်ရောင်းချလျက်ရှိကြောင်း၊ မုန်လာဥဖြူအား စားသုံးခြင်းဖြင့် ကင်ဆာဖြစ်စေနိုင်သော အရာတွေကို တိုက်ထုတ်ပေးခြင်း၊ အစာခြေစနစ်ကို ကျန်းမာစေနိုင်ခြင်း၊ ကိုယ်ခံအားကောင်းစေ ခြင်းနှင့် နှလုံးကိုကျန်းမာစေကြောင်း၊ အမျှင်ဓာတ်များစွာ ပါဝင်သောကြောင့် မုန်လာဥဖြူကို  နေ့စဉ် စားသုံးသင့်ပါကြောင်း ရေးသားတင်ပြအပ်ပါသည်။ 

DOCA(မန္တလေး)

   မန္တလေးတိုင်းဒေသကြီး၊ကျောက်ဆည်ခရိုင်သည် သီးနှံမျိုးစုံစိုက်ပျိုးဖြစ်ထွန်းလျက်ရှိပါသည်။ ထိုအထဲတွင်မှ စားဖိုဆောင်သီးနှံတစ်မျိုးဖြစ်သော နံနံပင်ကိုလည်း တောင်သူများမှ တစ်ပိုင်တစ်နိုင် စိုက်ပျိုးလျက်ရှိပါသည်။ကျွန်မတို့မြန်မာလူမျိုးများသည် နံနံပင်ကို ဟင်းခတ်အမွှေးအကြိုင်အဖြစ် အသုံးပြုကြပါသည်။ နံနံပင်ကို ဆောင်ရာသီတွင်စိုက်ပျိုးပါက အပင်ဖြစ်ထွန်းမှုကောင်းပြီး ကျန်ရာသီ များတွင်ရှားပါးပြီးစျေးကောင်းရရှိသောသီးနှံတစ်မျိုးဖြစ်ပါသည်။ နံနံပင်စိုက်ပျိုးရန် အသင့်တော်ဆုံး မြေအမျိုးအစားမှာ ရေမဝပ်သောနှုံးမြေဖြစ်ပြီး ဘောင်များပြုလုပ်၍ စိုက်ပျိုသလို ကြက်သွန်ခင်း၊ ကုလားပဲခင်းများတွင် သီးထပ်သီးညှပ်အဖြစ်လည်းစိုက်ပျိုးကြပါသည်။ နံနံစေ့ မစိုက်ခင်မြန်မြန် အပင်ပေါက်စေရန် ရေတွင်၂၄ နာရီကြာစိမ်ရကြောင်း၊အစေ့ကိုရေမစိမ်မီ ဂုံနီအိတ်ပေါ် တွင်တင်၍ ပုလင်းဖြင့်နှစ်ခြမ်းကွဲသွားစေရန် အသာအယာလှိမ့်ပေးရပါသည်။ရေတွင် ၂၄နာရီကြာ စိမ်ရာ၌ ရေနှစ်ကြိမ်လဲပေးပြီးနောက်ဆယ်ယူ၍စစ်ထားပေးရမည်။အပင်ပေါက်ပြီး ၄၅ရက်ကြာမှ စတင်၍ ခူးယူစားသုံးခြင်း၊‌ရောင်းချခြင်းများပြုလုပ်နိုင်ပါသည်။ယခုအချိန် စျေးကွက်ထဲ၌ နံနံပင်တစ်စည်းလျှင်(၂၀၀-၃၀၀)ကျပ် စျေးနှုန်းများဖြင့် အရောင်းအဝယ်ဖြစ်နေကြောင်းသိရှိရပါသည်။

DOCA(မန္တလေး)

   ကျောက်ဆည်ခရိုင်သည် မြေဆီမြေလွှာကောင်းမွန်သော ဒေသတစ်ခုဖြစ်ပြီး ရာသီပေါ်သီးနှံ မျိုးစုံများစိုက်ပျိုးသည့်အပြင် နှစ်ရှည်သီးနှံဖြစ်သည့် ဂွေးပင်ကိုလည်းစိုက်ပျိုးလျှက်ရှိရာ မိသားစု အပိုဝင်‌ငွေရရှိသည့် ရာသီမရွေးစိုက်ပျိုးပြီး ရာသီမရွေးစားသုံးနိုင်သည့် စျေးကွက်ဝယ်လိုအားရှိသည့် ဂွေးပင်များကို တိုးချဲ့စိုက်ပျိုးလာကြပါသည်။စိုက်ပျိုးမှုအများဆုံးအနေဖြင့် တစ်နှစ်ပတ်လုံးသီးသော ဂွေးပင်အမျိုးအစားကို အများဆုံးစိုက်ပျိုးကြကြောင်း၊ဂွေးပင်(၁)ဧက စိုက်ပျိုးလျှင် အပင်ရေ(၅၀-၆၀) အထိစိုက်ပျိုးနိုင်ကြောင်း၊ ဂွေးပင်ဝယ်ယူစိုက်ပျိုးလျှင် ပျိုးပင်အနေဖြင့် တစ်ပင်လျှင် အပင် အရွယ် အစားပေါ်မူတည်ပြီး(၂၀၀၀-၄၅၀၀)ကျပ်အထိရှိပြီး ဂွေးပင်စိုက်ပျိုးမှု (၁)ဧက ကုန်ကျစရိတ် အနေဖြင့် မိသားစုလုပ်အားမပါ(၇၀၀၀၀၀/-)ကျပ်ခန့် ကုန်ကျကြောင်း၊ အများဆုံး စိုက်ပျိုး သော ရွာများမှာ ပင်တလယ်ရွာ၊ကျောက်ခုံရွာနှင့်ပေါင်လောင်ရွာများတွင် စိုက်ပျိုးကြပြီး (၁)ဧက ဂွေးသီး အထွက်နှုန်း အနေဖြင့် တစ်ပင်လျှင် ဂွေးသီး(၃၀၀)လုံးခန့်သီးကြောင်း ၊ အလုံးပေါင်း(၁၅၀၀)ခန့်အထိ သီးကြောင်း၊ (၁၀)လုံးလျှင် ပျမ်းမျှစျေး (၂၅၀/-)ကျပ်ခန့်ရောင်းရကြောင်း၊ ရာသီချိန်ပေါ်မူ တည်၍ အထွက်နှုန်းများ ကွာခြားမှုရှိကြောင်း၊စျေးကွက်အနေဖြင့် အချဉ်ပေါင်း ရောင်းသူများမှ ခြံထဲအထိလာရောက်ဝယ်ယူ ကြပြီး ပွဲစားများမှတဆင့် ကုန်စိမ်းရောင်းချသူများထံသို့ ပြန်လည် ရောင်းချကြကြောင်းသိရှိရပါသည်။ ဂွေးသီးသည် ကယ်လ်ဆီယမ်ဓာတ်ကြွယ်ဝစွာ ပါဝင်ကြောင်း၊  အရည်ရွှမ်းပြီး  အမျှင်ဓာတ်တွေကြွယ်ဝစွာ ပါဝင်တဲ့အသီးဖြစ်သလို သွေးလည်ပတ်မှုကို ကောင်းမွန် ကြောင်း၊ နှလုံးရောဂါဖြစ်ပွားမှုကို ကာကွယ်ပေးသောအသီးဖြစ်၍ စားသုံးသင့်ကြောင်း၊  ဂွေးသီးပင်သည်  နှစ်ရှည်ပင်ဖြစ်သည့်အတွက် တစ်နှစ်ပတ်လုံးဝင်ငွေရရှိပြီး အကျိုးအမြတ်များရရှိကြောင်း၊ ဂွေးသီးပင် ခြံပိုင်ရှင်တစ်ဦး၏ ပြောကြားချက်အရသိရှိရပါသည်။

DOCA(မန္တလေး)