ပြည်တွင်းကုန်သွယ်မှုသတင်း

  မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ်တွင် စက်သုံးဆီအရောင်းဆိုင်(ဆီပန့်)ဆိုင် များအားလုံး ပုံမှန်ဖွင့်လှစ် ရောင်းချလျက်ရှိပြီး ၂၀၂၅ခုနှစ်၊ ဒီဇင်ဘာလ(ပထမပတ်)တွင် စက်သုံးဆီ ဈေးနှုန်းမှာ တစ်လီတာလျှင် 92 Octance ကျပ်(၂၆၁၀)၊ 95 Octance (၂၆၉၀)၊ ဒီဇယ်(ရိုးရိုး) ကျပ်(၂၆၃၅)၊ ဒီဇယ်(ပရီမီယံ) ကျပ်(၃၁၅၀)ဖြင့် ရောင်း ချခဲ့ကြောင်း သိရသည်။

   ဒီဇင်ဘာလ(ဒုတိယပတ်)တွင် တစ်လီတာလျှင် 92 Octance ကျပ်(၂၆၄၅)၊ 95 Octance ကျပ်(၂၇၃၀)၊ ဒီဇယ်(ရိုးရိုး) ကျပ်(၂၄၅၀)၊ ဒီဇယ်(ပရီမီယံ) ကျပ် (၂၉၂၅) ဖြစ်၍ ယခင်တစ်ပတ်နှင့် နှိုင်းယှဉ်ပါက ယခုတစ်ပတ်တွင် 92 Octance ကျပ်(၃၅)၊ 95 Octance ကျပ်(၄၀) ဈေးတက်ပြီး ဒီဇယ် (ရိုးရိုး) ကျပ်(၁၈၅)၊ ဒီဇယ်(ပရီမီယံ) ကျပ်(၁၂၅) ဈေးနှုန်းကျဆင်းခဲ့ကြောင်း သိရှိရပါသည်။

DOCA(မကွေး)

  မကွေးတိုင်းဒေသကြီး၊ မကွေးခရိုင်၊ တောင်တွင်းကြီးမြို့နယ်၊ တရုတ်ကောအုပ်စု၊ သဖန်းကုန်း ကျေးရွာတွင် ရာသီပေါ်ဇီးဖြူသီးအမှုန့်လုပ်ငန်း လုပ်ကိုင်ကြသူများစျေး ကောင်းရရှိ၍ အဆင်ပြေလျက် ရှိကြောင်း သိရသည်။

   ဇီးဖြူသီး ပေါ်ချိန်ဖြစ်သော သီတင်းကျွတ်လဆန်းမှ တပေါင်းလအထိ ဇီးဖြူသီးအမှုန့် ဖြန့်ဖြူး ရောင်းချရေးလုပ်ငန်းကိုလုပ်ကိုင်ကြကြောင်း၊ ကုန်ကြမ်း ဖြစ်သော ဇီးဖြူသီးအလုံး (၁)တင်းလျှင် ကျပ် (၁၀၀၀၀)ပေးဝယ်ရကြောင်း၊ မောင်းထောင်းခအနေဖြင့် (၁)တင်းလျှင် ကျပ်(၄၀၀၀)၊ အစေ့ကွဲ ရွေးခ (၁)ရက်လျှင် ကျပ်(၅၀၀၀)ပေးရကြောင်း၊ ဇီးဖြူသီးအမှုန့် ပြုလုပ်ရာတွင် ပထမဆုံးအနေဖြင့် ဇီးဖြူ သီးအလုံးများကို အနုအရင့်ရွေးပြီး စက်မောင်းစင်ဖြင့် အမှုန့်ဖြစ်အောင်ထောင်းရကြောင်း၊ ထောင်းပြီး သားအမှုန့်များကို အရည်ညှစ်ပြီး၊ အမှုန့်များတွင် အစေ့ကွဲ‌များကို ရွေးရပြီး ကြာရှည်စားနိုင်ရန်အတွက် ဆားပတ်ဖြန်းပြီး အရိပ်ထဲတွင် လှန်းရပါကြောင်း၊ (၂)ရက်ခန့် လှန်းပြီးပါက စျေးကွက်အတွင်းသို့ ရောင်းချနိုင်ပြီဖြစ်ကြောင်း၊ ဇီးဖြူသီးအမှုန့် (၁)တင်းလျှင် ကျပ်(၄၀၀၀၀)ဖြင့် တောင်တွင်းကြီးမြို့နယ် အပြင် မကွေးမြို့၊ အောင်လံမြို့၊ မြို့သစ်မြို့၊ နတ်မောက်မြို့နယ်များအထိ ဖြန့်ဖြူးရောင်းချကြောင်း၊ သီတင်းကျွတ်လပြည့်မှ တန်ဆောင်မုန်းလပြည့်အတွင်း ပိုမိုအရောင်းသွက်လျက်ရှိပြီး နတ်တော် လမှ တပေါင်းလအတွင်း အလှူအတန်း နည်းပါးသဖြင့် အနည်း ငယ်သာရောင်းချရကြောင်း၊ ဇီးဖြူ သီးအမှုန့်လုပ်ငန်း လုပ်ကိုင်သူများမှာ အဆင်ပြေလျက်ရှိကြောင်း သဖန်းကုန်းကျေးရွာနေ ဇီးဖြူသီး အမှုန့်ဖြန့်ဖြူးရောင်းချသူ ဒေါ်ခင်မာဦးထံမှ သိရှိရပါသည်။

DOCA(မကွေး)

    တနင်္သာရီတိုင်းဒေသကြီး၊ ထားဝယ်မြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များ တွင် မိမိပိုင် အိမ်ခြံဝင်းများနှင့် ယာကွက်များတွင် ကျွဲကောပင်များကို တစ်ပိုင်တစ်နိုင် စိုက်ပျိုးလျက်ရှိ ကြောင်း သိရှိရပါသည်။

     ၂၀၂၅ ခုနှစ်၊ ဒီဇင်ဘာလ ပထမပတ်အတွင်းဖြစ်ပေါ်သည့် စျေးနှုန်းများမှာကျွဲကောသီး ၁ လုံး လျှင် အလုံး(ကြီး) ၃၀၀၀ ကျပ်နှင့် ၃၅၀၀ကျပ်၊ အလုံး(သေး) ၂၅၀၀ ကျပ်နှင့် ၂၇၀၀ ကျပ်စျေးတို့ ဖြင့် အလုံးအရွယ်အစားအပေါ် မူတည်၍ စျေးကွာခြားမှုရှိကြောင်း သိရှိရပါသည်။ သစ်သီးမျိုးစုံစျေး ကွက်အတွင်းမော်လမြိုင်ကျွဲကောသီးမှာအရည်ရွှမ်းကာ အချဉ်ဓါတ်လျော့နည်းသည့်အတွက်စားသုံး သူများကြိုက်နှစ်သက်ကာ အရောင်းသွက်လျက်ရှိကြောင်း   သိရှိရပါသည်။

DOCA(တနင်္သာရီ)

   အညာဒေသ၏ အစားအစာ တစ်ခုဖြစ်သော ရာသီစာ ထန်းပင်မြစ်များ ဈေးကွက်အတွင်းသို့ စတင်ဝင်ရောက်အရောင်းအဝယ်ဖြစ်လျက်ရှိပါသည်။ အညာဒေသသည် ထန်းပင်များလှိုင်လှိုင်ပေါသော အရပ် ဒေသတစ်ခုလည်းဖြစ်ပါသည်။ ပခုက္ကူမြို့နယ်အတွင်းရှိ ကျေးရွာများတွင် ထန်းပင်များကို ယာမြေ များ၏ ဘေးပတ်ပတ်လည်တွင် စိုက်ပျိုးထားကြပြီး စည်းရိုးအဖြစ်လည်း အသုံးပြုကြ ပါသည်။ ထန်းပင်မြစ်များကို ပခုက္ကူအတွင်းရှိ မြိုင်မြို့နယ်၊ ကမ္မ၊ ပေါက်ပခုက္ကူမြို့နယ်အတွင်းရှိ ကန်တော်၊ ကန်ရပ်၊ ချောက်ကန်အုပ်စု ရွာများမှ အများအပြားစိုက်ပျိုးကြပြီး ပခုက္ကူမြို့ပေါ်သို့ တင်ပို့ရောင်း ချလျက် ရှိပါသည်။ ယခုအချိန် ထန်းပင်မြစ်များကို ပခုက္ကူမြို့နယ်ရှိရွာများသာမက အခြား ဒေသများမှ လည်း တင်ပို့ ရောင်းချလျက်ရှိကြောင်း မြို့မဈေးသည်များထံမှ သိရှိရပါသည်။

          ထန်းပင်မြစ်များကို တော်သလင်းလ ထန်းသီးရင့် မှည့်ချိန်မှ စ၍ သီတင်းကျွတ်လဆန်းပိုင်း တွင် သဲမြေများ၌ ကျင်း အနက် (၁) တောင်ခန့်တူး၍မြုပ်ကြပြီး သီတင်းကျွတ်လကုန် တန်ဆောင်မုန်းလ ဆန်း တွင် စတင်တူးဖော်ကြောင်း၊ ပြာသိုလ် လဆန်းပိုင်းတွင် ထန်းမြစ်များရင့်ပြီး လှိုင်လှိုင် ပေါ်လျက် ရှိကြောင်း ထန်းစိုက်တောင်းသူများထံမှသိရှိရပြီး ဈေးနှုန်းအနေဖြင့်  ထန်းပင်း အချောင်း(၂၅) ချောင်းပါ တစ်စည်းလျှင် ကျပ် (၂၅၀၀-၂၀၀၀) ဖြင့် ရောင်းချနေကြောင်း သိရှိရပါသည်။

DOCA(မကွေး)

   မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်တွင် နယ်မြေအခြေအနေအရ ကုန်စည်ဒိုင် ဖွင့်လှစ်အရောင်းအဝယ်မပြုလုပ်နိုင်သော်လည်း ရန်ကုန်၊ မန္တလေးတွင် ဖြစ်ပေါ်နေသော ဈေးကွက် အခြေအနေနှင့် ဒေါ်လာဈေးအတက်အကျပေါ်မူတည်၍ ပွဲစားများ စုစည်းနိုင်သည့်နေရာတွင် ဈေးနှုန်း သတ်မှတ်ပြီးနောက် မိမိတို၏ ပွဲရုံများတွင် ပဲမျိုးစုံ အရောင်းအဝယ်ပြုလုပ်လျက်ရှိကြောင်း သိရသည်။

   ၂၀၂၅ခုနှစ်၊ နိုဝင်ဘာလ (စတုတ္ထပတ်)တွင် ရေစကြိုမြို့နယ်အတွင်း မတ်ပဲသီးနှံများ လှိုင်လှိုင် ထွက် ပေါ်လျက်ရှိပြီး အရောင်းအဝယ်ဖြစ်ကြောင်း၊ အခြားသီးနှံများ ထောပတ်ပဲ၊ ကုလားပဲ၊ ပဲတီစိမ်း သီးနှံများမှာ ယခုအချိန်တွင် စိုက်ပျိုးပြီး ဖြစ်ထွန်းအောင်မြင်လျက်ရှိကြောင်း၊ မတ်ပဲအသစ် တစ်တင်း လျှင် ကျပ် (၇၀၀၀၀)ဖြင့် အရောင်းအဝယ်ဖြစ်ပြီး ကျန်ပဲများ အရောင်းအဝယ်မဖြစ်ကြောင်း၊ ရောင်းဝယ် မှု အနေဖြင့် နိုဝင်ဘာလ (စတုတ္ထပတ်)တွင် မတ်ပဲ တစ်တင်း ဝင်အိတ် (၁၀၀)ခန့် အရောင်းအဝယ်ဖြစ် ကြောင်း ကုန်သည်ပွဲစားများထံမှ သိရှိရပါသည်။

DOCA(မကွေး)