ပြည်တွင်းကုန်သွယ်မှုသတင်း

  မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်စနစ်ဖြင့် ရှေးယခင်ကပင် စပါး၊ ပဲ၊ နှမ်း၊ ပြောင်း၊ ဟင်းသီးဟင်းရွက်၊ သစ်သီးဝလံနှင့် ပန်းမာန်များအား စိုက်ပျိုးခဲ့ကြပါသည်။ ယင်းသီးနှံများအနက်မှ ရာသီမရွေးစိုက်ပျိုးနိုင်ပြီး စီးပွားဖြစ်ဝင်ငွေတိုးသော ဈေးကွက်ဝယ်လိုအားရှိ သော အောင်သပြေပန်းငုတ်များကို ကျောက်ဆည် မြို့နယ်၊ မြစ်သားမြို့နယ်၊စဉ့်ကိုင်မြို့နယ်များတွင် စိုက်ပျိုးလျက်ရှိကြောင်း သပြေပန်းစိုက်ပျိုးရန်အတွက် မျိုးစေ့ကို ခရမ်းသုံးခွမြို့နယ်များမှ ဝယ်ယူ စိုက်ပျိုးကြကြောင်း၊ မျိုးစေ့ (၁)ပြည်လျှင် (၁၈၀၀၀- ၂၀၀၀၀)ကျပ်ခန့်ရှိပြီး တစ်ဧကလျှင် မျိုးစေ့ ပြည်(၈၀)ခန့် ကုန်ကျကြောင်း၊ စိုက်ပျိုးပြီး (၂)လခွဲသားဝန်ကျင်တွင် အပင်များကို ဖြတ်တောက်ပြီး ငုတ်ချန်ပေးရကြောင်း ၊ ငုတ်ချန်ပြီး တစ်နှစ်အကြာတွင် ရောင်းတန်းဝင်ပန်းများရရှိပြီးဖြစ်ကြောင်း၊ သပြေပန်းများ ပိုးမကိုက်၊ အညွှန့်များ လှအောင်၊ အရွက်မာအောင် ဈေးကွက်မဖြန့်ခင် တစ်လအလို တွင် ဆေးဖြန်းပေးရကြောင်း၊ စိုက်ပျိုးမှု တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း (၃၅၀၀၀၀၀/-) ကျပ်ခန့် ကုန်ကျကြောင်း၊ စိုက်ပျိုးရာတွင် ဘောင်စိုက်စနစ်ဖြင့် စိုက်ပျိုးပြီး တစ်ဧကအပင်ပေါင်း (၁၅၀၀၀၀)ခန့်ထိ ရှင်သန်နိုင်ကြောင်း၊ မြေပြုပြင်မှုနှင့် ရေ ၊ မြေ အပြုအစုကောင်းပါက ပန်းများပိုမိုလှကြောင်း၊ အရွယ်အစားပေါ်မူတည်၍ တစ်နှစ်သား အောင်သပြေ ငုတ်တစ်ငုတ်လျှင် (၅၀၀-၁၅၀၀)ကျပ်အထိ ရောင်းချရကြောင်း၊ နှစ်နှစ်သား တစ်ပင်လျှင် (၃၀၀၀-၅၀၀၀)ကျပ်ထိ ရောင်းချရကြောင်း၊ လက်ကားဖောက်သည်ဈေးအနေဖြင့် (၂၀%) လျော့၍ ရောင်းချပေးကြောင်း၊ အောင်သပြေငုတ်များ စိုက်ပျိုးရာတွင် အပင်သက်တမ်း (၃)နှစ်အထိ ရောင်းချ ပေးနိုင်ကြောင်း၊ ပန်းများကို အနီးပတ်ဝန်ကျင်ရှိ ကျေးရွာများမှ လာရောက်ဝယ်ယူသူများရှိသလို ရန်ကုန်မြို့ များသို့လည်း Express ကားများဖြင့် တင်ပို့ရောင်းချကြောင်း၊ ကျန်နယ်ဝေးများမှ မှာယူ လျှင်လည်း ကားဂိတ်အရောက် သေချာစွာထုတ်ပိုးပြီး ရောင်းချပေးလျက်ရှိကြောင်း၊ အောင်သပြေငုတ်စိုက်ပျိုးမှုတွင် အခင်းပြတ်ရောင်းချပါက ငွေအလုံးအရင်း ရရှိသော်လည်း တစ်နိုင်တစ်ပိုင်‌ နေ့ချင်း ရောင်းချပါက ပိုမိုအကျိုးမြတ်ဖြစ်ထွန်းကြောင်း၊ သပြေငုတ်စိုက်ပျိုးခြင်းဖြင့် စီးပွားဖြစ် ဝင်ငွေတိုးကာ စားဝတ်နေရေးပြေလည်သောကြောင့် အောင်သပြေပန်း စိုက်ပျိုးသူများ များပြားလာလျက်ရှိကြောင်း အောင်သပြေပန်းစိုက်ပျိုးခြင်းဖြင့် စီးပွားရှာနေသော တောင်သူတစ်ဦး၏ ပြောကြားချက်အရ သိရှိရ ပါသည်။      

DOCA(မန္တလေး)    

    မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်ပြီး စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကန့်ဘလူမြို့နယ်တွင်လည်း သီးနှံမျိုးစုံစိုက်ပျိုးလျက်ရှိရာ ရေ၊ မြေ၊ ရာသီဥတုနှင့်ကိုက်ညီသည့် ပဲစဉ်းငုံသီးနှံကို အဓိကစိုက်ပျိုးလျက်ရှိကြောင်း စိုက်ပျိုးရေး ဦးစီးဌာန၏ စာရင်းများအရ သိရသည်။

      ၂၀၂၅ ခုနှစ်၊ ဒီဇင်ဘာလ ပထမပတ်အတွင်း ပဲစဉ်းငုံနီတစ်တင်းလျှင် (၇၁၀၀၀)ကျပ်၊ ပဲစဉ်းငုံဖြူတစ်တင်းလျှင် (၆၈၀၀၀)ကျပ်နှင့် အောက်စတစ်တင်းလျှင်(၆၇၅၀၀)ကျပ်ဈေးနှုန်းတို့ဖြင့် အရောင်းအဝယ်ဖြစ်လျှက်ရှိကြောင်း၊ ယခင်နိုဝင်ဘာ စတုတ္ထပတ်၏ ဈေးနှုန်းများနှင့် နှိုင်းယှဉ်ပါက ယခုလ ဒီဇင်ဘာလ ပထမပတ်အတွင်း ပဲစဉ်းငုံနီတစ်တင်းလျှင်(၁၀၀၀)ကျပ်နှင့် ပဲစဉ်းငုံဖြူ(၁)တင်း လျှင်(၁၀၀၀)ကျပ် ဈေးနှုန်းကျဆင်းလျက်ရှိကြောင်း၊ ဒေသထွက်ပဲစဉ်းငုံများကို မန္တလေးမြို့ရှိပွဲရုံများ၊ ကုန်စည်ဒိုင်များသို့ တင်ပို့ရောင်းချကြောင်း သီးနှံရောင်းဝယ်ရေး လုပ်ငန်းရှင်များထံမှ သိရှိရသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် သီးနှံမျိုးစုံစိုက်ပျိုးလျက် ရှိရာ စွန်တာနီ(ပဲနီ)သီးနှံများကို ကန့်ဘလူမြို့နယ် ကံကြီးကုန်းကျေးရွာ၊ တောက္ကရှပ်ကျေးရွာနှင့် အခြားသောကျေးရွာများတွင် စိုက်ပျိုးလျက်ရှိပြီး မိုးသီးနှံ စွန်တာနီ(ပဲနီ)(၂၂၀၀)ဧကကျော် စိုက်ပျိုး ထားကြောင်း စိုက်ပျိုးရေးဦးစီးဌာန၏ စာရင်းများအရ သိရှိရသည်။

    ၂၀၂၅ ခုနှစ် ဒီဇင်ဘာလ ပထမပတ်အတွင်း စွန်တာနီ(ပဲနီ)တစ်တင်းလျှင် (၈၃၀၀၀)ကျပ်၊ အကွဲအနာပါတစ်တင်းလျှင် (၈၂၅၀၀)ကျပ်ဈေးနှုန်းဖြင့် အရောင်းအဝယ်ဖြစ်လျက်ရှိရာ ယခင် နိုဝင်ဘာလ စတုတ္ထပတ်၏ ဈေးနှုန်းများနှင့်နှိုင်းယှဉ်ပါက ယခုလ ပထမပတ်အတွင်း စွန်တာနီ(ပဲနီ) တစ်တင်းလျှင်(၅၀၀)ကျပ် ဈေးနှုန်းဆက်လက်ကျဆင်းနေကြောင်း ပွဲရုံလုပ်ငန်းရှင်များထံမှ သိရသည်။

DOCA(စစ်ကိုင်း)

          မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့နယ်တွင် စပါး၊ ပဲ၊ ပြောင်း၊ နှမ်းစသည့်သီးနှံမျိုစုံ စိုက်ပျိုးသည့်အပြင် ကုန်စိမ်းသီးနှံဖြစ်‌သော ခရမ်းကြွပ်သီးနှံကိုလည်း စိုက်ပျိုး လျက်ရှိကြောင်း၊ ခရမ်းကြွပ်သီးအပင်ကို ရာသီမရွေးစိုက်ပျိုးနိုင်ကြောင်း၊ ခရမ်းကြွပ်သီး စိုက်ပျိုး မည်ဆိုပါက မျိုးစေ့ကို ပျိုးထောင်ခြင်းနှင့် တိုက်ရိုက်အစေ့ချစိုက်ပျိုးနည်းဟူ၍ (၂)မျိုးစိုက်ပျိုးလျက် ရှိကြောင်း၊ ခရမ်းကြွပ်သီးကို ပျိုးထောင်ပြီး စိုက်ပျိုးမည်ဆိုပါက ပျိုးသက် တစ်လခွဲသားအရွယ်တွင် စတင်စိုက်ပျိုးရကြောင်း၊ စိုက်ပျိုးပြီး (၂)လ (၃)လ အကျော်တွင် အသီးများ စတင်ခူးဆွတ်နိုင်ပြီး တစ်ပတ်ခြားတစ်ကြိမ် ခူးဆွတ်ရကြောင်း၊ စတင်ခူးဆွတ်ပြီးမှ တစ်ပတ်နှင့် တစ်ပတ်အထွက်နှုန်း ပိုမိုလာကြောင်း၊ သက်တမ်းအနေဖြင့် (၂)လခန့်အထိ ခူးဆွတ်နိုင်ကြောင်း၊ တစ်ဧကကုန်ကျစရိတ်အနေ ဖြင့် လုပ်သားခ၊ မျိုး၊ သွင်းအားစုအပါအဝင် စုစုပေါင်း ကုန်ကျစရိတ်အနေဖြင့် (၉၀၀၀၀၀-၁၀၀၀၀၀၀) ခန့် ကုန်ကျကြောင်း၊ ခရမ်းကြွပ်သီး လက်ကားဈေးအနေဖြင့် တစ်ပိဿာလျှင် (၂၅၀၀/-)ကျပ်၊ လက်လီဈေးအနေဖြင့် တစ်ပိဿာလျှင် (၃၀၀၀/-)ကျပ်ဖြင့် အရောင်းအဝယ်ဖြစ်နေကြောင်း၊ ခရမ်းကြွပ် သီးကို ကုန်စိမ်းပွဲစားများမှ စိုက်ခင်းအထိလာရောက်ဝယ်ယူပြီး ကျောက်ဆည်မြို့ရှိ မြို့မဈေး၊ အေးမြ ကြည်လင်ဈေး၊ စဉ့်ကိုင်မြို့ နှင့် မန္တလေးမြို့များသို့ တင်ပို့ရောင်းချကြောင်း သိရှိရပါသည်။

DOCA(မန္တလေး)

 မန္တလေးတိုင်းဒေသကြီး ၊ ကျောက်ဆည်မြို့နယ်အတွင်းရှိ တောင်သူများသည် စပါး၊ပဲ၊ ကြက်သွန်၊ ငရုတ်၊ နှမ်း၊ မြေပဲစသည့်  သီးနှံမျိုးစုံစိုက်ပျိုးကြသည့်အပြင် ကုန်စိမ်းသီးနှံ တစ်မျိုးဖြစ်သောကြက်ဟင်းခါးသီးသီးနှံကိုလည်းမိသားစုတစ်ပိုင်တစ်နိုင် စိုက်ပျိုးထားကြောင်း သိရှိရပါသည်။ ကြက်ဟင်းခါးသီးပင်ကို ရာသီးမရွေးစိုက်ပျိုးနိုင်ပြီး တောင်သူအများစုသည် ဗိုလ်တစ်ထောင် ကြက်ဟင်းခါးမျိုးများကို စိုက်ပျိုးကြကြောင်း၊ ကြက်ဟင်းခါးပင် စိုက်ပျိုးမည် ဆိုပါက မျိုးစေ့ကို ပျိုးအရင်ထောင်ရကြောင်း၊ ပျိုးသက် (၂၅)ရက်ခန့်ပြည့်လျှင် ပြောင်းရွှေ့ စိုက်ပျိုးရကြောင်း၊ စိုက်ပျိုးပြီး (၃)လခန့်အကြာတွင် ကြက်ဟင်းခါးသီးများ စတင်ခူးဆွတ်နိုင် ကြောင်း၊ (၇)ရက်ခြား  တစ်ကြိမ် ခူးဆွတ်ရပြီး သက်တမ်းအနေဖြင့် (၅)လခန့်အကြာထိ ခူးဆွတ်နိုင်ကြောင်း အထွက်နှုန်းအနေဖြင့် (၁)ဧက လျှင် စတင်ခူးဆွတ်ချိန်တွင် ပိဿာ (၅၀)ခန့်ထွက်ရှိပြီး အထွက်အများဆုံးအချိန်တွင် ပိဿာ (၁၀၀-၁၁၀)ခန့် ထွက်ရှိကြောင်း သိရှိရပါသည်။ (၁)ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း(၁၂၀၀၀၀၀-၁၅၀၀၀၀၀)ကျပ် ကုန်ကြကြောင်း၊ ကြက်ဟင်းခါးသီး ဈေးနှုန်းအနေဖြင့် တစ်ပိဿာလျှင် လက်ကားဈေး (၃၀၀၀-၃၂၀၀)ကျပ် ဈေးနှုန်းရှိပြီး လက်လီဈေးနှုန်းအနေဖြင့် (၃၅၀၀-၃၈၀၀)ကျပ် ဈေးနှုန်းဖြင့် ရောင်းချရကြောင်း၊ ကြက်ဟင်းခါးသီး အလုံးအကြီးအသေး ပေါ်မူတည်၍ ဈေးနှုန်းကွာခြားကြောင်း သိရှိရပါသည်။ ကုန်စိမ်းပွဲစားများမှ စိုက်ခင်းအထိ လာရောက်ဝယ်ယူသည့်အတွက် သယ်ယူစရိတ်သက်သာကြောင်း၊ ၄င်းတို့မှတဆင့် ရန်ကုန်-မန္တလေးမြို့ကြီးများသို့ တင်ပို့ရောင်းချရကြောင်း သိရှိရပါသည် ။ (၁)ဧက အကျိုးအမြတ် အနေဖြင့် (၁၅)သိန်းကျပ် ဝန်းကျင်ခန့် အမြတ်ရသည့်အတွက် တွက်ခြေကိုက်သည့် သီးနှံ ဖြစ်ကြောင်း ၊ ကြက်ဟင်းခါးသီး စိုက်ပျိုးသော တောင်သူတစ်ဦး၏ ပြောကြားချက်အရ သိရှိရ ပါသည်။

DOCA(မန္တလေး)