ပဲခူးတိုင်းဒေသကြီး၊ တောင်ငူမြို့နယ်တွင် ဒေသခံတောင်သူလယ်သမားများသည် စိုက်ပျိုး မြေများကောင်းမွန်မှုကြောင့် နွေစပါး၊ မိုးစပါး၊ ဆောင်းသီးနှံများဖြစ်သော မတ်ပဲ၊ ပဲတီစိမ်းစိုက်ပျိုးခြင်းကို စီးပွားဖြစ်စိုက်ကြသည်။ မြန်မာနိုင်ငံ၏ပြည်ပပို့ကုန်အဖြစ် မတ်ပဲသည် အဓိကနေရာတွင် ရှိနေပြီး နိုင်ငံတော်အတွက် စိုက်ပျိုးရေးကဏ္ဍမှ နိုင်ငံခြားဝင်ငွေရရှိအောင်ဆောင်ရွက်နေသည်။
ယခုနှစ်ဆောင်းသီးနှံစိုက်ပျိုးရာသီချိန်တွင် သီးနှံမှဝင်ငွေတိုးပွားစေရန် စားနပ်ရိက္ခာဖူလုံရေးအတွက် မတ်ပဲကိုအားထားစိုက်ပျိုးကြသည်။ မတ်ပဲစိုက်ပျိုးရာတွင် တောင်ငူမြို့နယ်စိုက်ပျိုးရေး ဦးစီးဌာန၏ကြီးကြပ်မှုဖြင့် တစ်ဧကပန်းတိုင်အထွက်တင်းရရှိရေးအတွက် မျိုးကောင်းမျိုးသန့်ရရှိ ရေး၊ သွင်းအားစုများ အချိုးကျမှန်ကန်စွာ သုံးစွဲနိုင်ရေးနှင့်စနစ်တကျစိုက်ပျိုးရေးကျေးရွာများတွင် သင်တန်းများပေးခြင်း၊ ကြီးကြပ်ကူညီပေးခြင်းများကို ဆောင်ရွက်နေသည်။ မိုးစပါးရိတ်သိမ်းပြီး လျှင် ဆောင်းသီးနှံမတ်ပဲကို နိုဝင်ဘာလမှ စတင်စိုက်ကြပြီး မတ်ပဲအထွက်ကောင်းမျိုးများဖြစ်ကြ သော TBL.9၊ ရေဆင်း (၄)၊ ရေဆင်း (၇) မတ်ပဲမျိုးများအများဆုံးစိုက်ပျိုးကြသည်။
မတ်ပဲစိုက်ပျိုးရန် ၂၀၂၅-၂၀၂၆ ခုနှစ်တွင် စိုက်ဧက ၃၁၆၂၈ ဧကလျာထားပြီး ၂၀၂၄-၂၀၂၅ ခုနှစ်တွင် မတ်ပဲ ၂၀၇၂၉ ဧကစိုက်ပျိုးနိုင်ခဲ့သည်။ ယခုနှစ်တွင် မတ်ပဲစိုက်ဧကသည် ယခင်နှစ်ထက် ၁၀၈၃၇ ဧကပိုမိုစိုက်ပျိုးနိုင်ခဲ့သည့်အတွက် စိုက်ဧကစုစုပေါင်း ၃၁၆၂၈ ဧကစိုက်ထားပါသည်။ ၂၀၂၆ ခုနှစ်၊ ဇန်နဝါရီလကုန်တွင် မတ်ပဲစိုက်ခင်းများစတင်ရိတ်သိမ်းတော့မည်ဖြစ်ပြီး မတ်ပဲရိတ်သိမ်းပြီး နွေစပါးများစိုက်ကြမည်ဖြစ်သည်။ မတ်ပဲပေါက်ဈေးပိဿာ ၃၀ တစ်အိတ်လျှင် ၁၃၁၀၀၀ ကျပ်ဈေး ပေါက်နေပြီး မတ်ပဲစိုက်ခင်းများအောင်မြင်ဖြစ်ထွန်းလျက်ရှိခြင်းကြောင့် မတ်ပဲစိုက်တောင်သူကြီးများ အပိုဝင်ငွေတိုးတော့မည်ဖြစ်သည်။
DOCA(ပဲခူး)