ပြည်တွင်းကုန်သွယ်မှုသတင်း

          မကွေးတိုင်းဒေသကြီး၊ အထက်မင်းလှမြို့နယ်အတွင်းရှိ ပန်းတော်ပြင်၊ ဥယျာဉ်၊ မယ်ဇလီ တော၊ ရွာတော်၊ ညောင်ပင်သာ စသည့်ကျေးရွာများတွင် ခရမ်းသီး(အလုံးကြီးမျိုး)ကို အိမ်ခြံဝန်းများ၌ တစ်နိုင်တစ်ပိုင်စိုက်ပျိုးလျက်ရှိသည့်အပြင် ကိုင်းမြေများတွင်လည်း စိုက်ပျိုးလျက်ရှိပြီး ၂၀၂၅ခုနှစ်၊ မတ်လမှစ၍ ဇေယျာသီရိဈေးအတွင်းသို့ ဝင်ရောက်အရောင်းအဝယ်ဖြစ်လျက်ရှိကြောင်း သိရသည်။

          ဈေးနှုန်းအနေဖြင့် ၂၀၂၅ခုနှစ်၊ ဧပြီလ(ပထမပတ်)တွင် ခရမ်းသီး(အလုံးကြီး)(၁)ပိဿာလျှင် ကျပ် (၂၅၀၀) ဖြင့်ရောင်းချလျက်ရှိပြီး ယခင်မတ်လ(စတုတ္ထပတ်)တွင် (၁)ပိဿာလျှင် ကျပ်(၁၅၀၀-၂၀၀၀)ဖြင့် ရောင်းချလျက်ရှိရာ ဈေးနှုန်းနှိုင်းယှဉ်ပါက ယခုတစ်ပတ်တွင် ကျပ်(၅၀၀)ဈေးနှုန်းမြင့် တက်၍ အရောင်းအဝယ်ဖြစ်လျက်ရှိကြောင်း သိရသည်။ ဒေသတွင်းခရမ်းသီးစိုက်ခင်းများ၌ အထွက် နှုန်းလျော့နည်းလာသည့်အပြင် သရက်နှင့် မကွေး၊ မင်းဘူးမြို့တို့ရှိ ကုန်စိမ်းသီးနှံဒိုင်များမှလည်း ဝင်ရောက်မှုနည်းလာသောကြောင့် ဈေးနှုန်းမှာ အနည်းငယ်မြင့်တက်ရခြင်းဖြစ်ကြောင်း သိရသည်။

DOCA (မကွေး)

   ဧရာဝတီတိုင်းဒေသကြီး ဆန်စပါးဈေးကွက်ဧပြီလ ပထမပတ်အတွင်း ပုသိမ်ခရိုင် ၊ ပုသိမ်မြို့ ၊ ကန်ကြီးထောင့် ၊ သာပေါင်း ၊ ငပုတော ၊ ကျုံပျော် ၊ ရေကြည် ၊ ကျောင်းကုန်း မြို့နယ်များတွင် နွေသီးထပ်ရင် အလတ်စ ဆန် (၁၀၈) ပေါင် ဆန်တစ်အိတ်ကို ကျပ် ၆၂၀၀၀/ ၆၄၀၀၀ ဈေးအတွင်း ရောင်းဝယ်လျက်ရှိပြီး မြောင်းမြခရိုင်အတွင်းရှိ မြောင်းမြ ၊ အိမ်မဲ ၊ ဝါးခယ်မ မြို့နယ်များတွင် နွေသီးထပ်ရင်အလတ်စဆန် (၁၀၈) ပေါင် တစ်အိတ်ကို ကျပ် (၇၀၀၀၀/၆၇၀၀၀) ဈေးအတွင်း အရောင်းအဝယ်ဖြစ်လျက်ရှိကြောင်း ဆန်ဈေးကွက်မှ သိရသည်။

   ယခုဧပြီလ နောက်ဆုံးပတ်တွင် အရောင်းအဝယ်အေး၍ ဆန်ဈေးများကျဆင်းလျက်ရှိရာ ပုသိမ်ခရိုင်အတွင်းရှိ ပုသိမ်မြို့ ၊ ကန်ကြီးထောင့် ၊ သာပေါင်း ၊ ငပုတော ၊ ကျုံပျော် ၊ ရေကြည် ၊ ကျောင်းကုန်းမြို့နယ်များတွင် နွေသီးထပ်ရင် ဆန် (၁၀၈) ပေါင်တစ်အိတ်ကို ကျပ် ၅၆၀၀၀/ ၅၇၀၀၀ ဈေးအတွင်း ဖြစ်သွား၍ ယခင်ဧပြီလပထမပတ်‌ဈေးထက် ဧပြီလနောက်ဆုံးပတ်တွင်  ကျပ် ၆၀၀၀/၇၀၀၀ ဈေးနှုန်းကျဆင်းလျက်ရှိကြောင်းနှင့် မြောင်းမြခရိုင်အတွင်းရှိ မြောင်းမြ ၊ အိမ်မဲမြို့နယ်များတွင် ယခင်နွေသီးထပ်ရင်ဆန် (၁) အိတ်ကျပ် ၇၀၀၀၀ မှ ယခုကျပ် ၆၈၀၀၀ ဖြစ်သွားသည့်အတွက် ဆန် (၁) အိတ်ကျပ် ၂၀၀၀ ဈေးနှုန်းကျဆင်းလျက်ရှိပြီး ဝါးခယ်မမြို့နယ် တွင် နွေသီးထပ်ရင် ဆန်တစ်အိတ်ကျပ် ၆၇၀၀၀ ဈေးမှ ယခုကျပ် ၆၂၀၀၀ ဖြစ်သွား၍ ဆန်တစ်အိတ်ကို ကျပ် ၅၀၀၀ ခန့် ဈေးနှုန်းကျဆင်းလျက်ရှိပြီး မြို့နယ်အလိုက် ဆန်ဈေးကွက် အခြေအနေ ၊ အရောင်းအဝယ်သွက်မှုနှင့် ဆန်အရည်အသွေးပေါ်မူတည်၍လည်း ဆန်ဈေးနှုန်း များ အပြောင်းအလဲရှိကြောင်း ဆန်စပါး ဈေးကွက်မှ သိရသည်။

DOCA(ဧရာဝတီ)

ကယားပြည်နယ်၊ လွိုင်ကော်မြို့တွင် စက်သုံးဆီအရောင်းဆိုင်များ ပုံမှန်ပြန်လည်ဖွင့် လှစ်ရောင်းချလျက်ရှိပါသည်။   ၂၀၂၅ခုနှစ် ၊ ဧပြီလဒုတိယပတ်အတွင်း စက်သုံးဆီ ဈေးနှုန်း များမှာ Octane(92) တစ်လီတာလျှင် (၃၈၆၅)ကျပ်၊ Octane(95) တစ်လီတာလျှင် (၃၉၁၀) ကျပ်၊ ပရီမီယမ်ဒီဇယ်(HSD) တစ်လီတာလျှင် ( ၃၄၄၀ )ကျပ်၊ ရိုးရိုး ဒီဇယ် (PD) တစ်လီတာ လျှင် (၄၀၅၀)ကျပ်ဖြင့် ရောင်းချနေကြပြီး ယခင်တစ်ပတ်ဈေနှုန်းများမှာ စက်သုံးဆီဈေးနှုန်း များမှာ Octane(92)တစ်လီတာလျှင် (၃၁၅၀)ကျပ်၊ Octane(95) တစ်လီတာလျှင် (၃၁၉၁) ကျပ်၊ ပရီမီယမ်ဒီဇယ် (HSD) တစ်လီတာလျှင်  (၂၇၂၅)ကျပ် ၊ ရိုးရိုးဒီဇယ် (PD) တစ်လီတာ လျှင်( ၃၃၃၅ )ကျပ်ရှိခဲ့ပြီး ယခင်တစ်ပတ်ဈေးနှုန်းများနှင့် ယခုဈေးနှုန်းများ နှိုင်းယှဉ်ကြည့် လျှင် Octane(92) တစ်လီတာလျှင် (၇၁၅)ကျပ် ၊ Octane(95) တစ်လီတာလျှင် (၇၁၉)ကျပ်၊ ရိုးရိုးဒီဇယ် (PD) တစ်လီတာလျှင်( ၇၁၅ )ကျပ် ပရီမီယမ်ဒီဇယ်( HSD ) တစ်လီတာလျှင် (၇၁၅)ကျပ်စီဖြင့် ဈေးနှုန်းများတက်လာကြောင်း သိရှိရပါသည်။

DOCA(ကယား)

   ဧရာဝတီတိုင်းဒေသကြီး လပွတ္တာမြို့နယ်မှ ထုတ်လုပ်သည့် အရည်အသွေးမြင့် နေလှန်း ဆားများ ရန်ကုန်ဈေးကွက်တွင် ဝယ်လိုအားမြင့်မားစွာ ရောင်းချနိုင်ခဲ့ကြောင်း သိရသည်။ ဖေဖော်ဝါရီလအတွင်း ပိဿာချိန် ၈၅,၀၀၀ အထိ တင်ပို့ရောင်းချနိုင်ခဲ့ပြီး ယခုနှစ်အတွက် စံချိန်သစ်တင်နိုင်ခဲ့ခြင်းဖြစ်သည်။ လပွတ္တာမြို့နယ်မှ ဆားလုပ်ငန်းရှင်များက ၎င်းတို့၏ ဒေသ ထွက်ဆားများကို ရန်ကုန်မြို့ရှိ အဓိကဈေးကြီးများသို့ ပုံမှန်တင်ပို့လျက်ရှိရာ ဖေဖော်ဝါရီလတွင် ပိဿာချိန် ၈၅,၀၀၀ အထိ ရောင်းချနိုင်ခဲ့ကြောင်း ဆားရောင်းဝယ်ရေးလုပ်ငန်းရှင် ဦးမျိုးသူရက ပြောကြားသည်။

   ထို့ပြင် "လပွတ္တာဆားတွေက အနံ့အရသာသန့်ပြီး အစိုဓာတ်နည်းတာကြောင့် စားသုံးသူတွေကြား နာမည်ကောင်းရထားပါတယ်။ ဖေဖော်ဝါရီလမှာ ဆားဈေးကွက်က ပိုကောင်း လာတာနဲ့အမျှ ကျွန်တော်တို့ရဲ့တင်ပို့မှုပမာဏလည်း ၃၀% ကျော် တိုးလာခဲ့ပါတယ်" ဟု ၎င်းက ရှင်းပြသည်။ ဈေးနှုန်းအနေဖြင့် နေလှန်းဆား ၁ ပိဿာလျှင် ကျပ် ၄,၅၀၀ မှ ၅,၀၀၀ အထိ ဈေးကောင်းရရှိကြောင်း၊ ယခုလက်ရှိတွင် လပွတ္တာမြို့နယ်ရှိ ဆားခြောက်လုပ်ငန်း ၂၀ ကျော်မှ တစ်နေ့လျှင် ပိဿာချိန် ၃,၀၀၀ မှ ၅,၀၀၀ အထိ ထုတ်လုပ်နိုင်ကြောင်း သိရသည်။

  ရန်ကုန်မြို့တွင် လပွတ္တာဆားများကို အဓိကဝယ်ယူသည့် ကုန်သည်ကြီးများက ဆား အရည်အသွေးမှာ ယခုနှစ်တွင် ပိုမိုကောင်းမွန်လာသည်ဟု မှတ်ချက်ပြုကြသည်။ "လပွတ္တာ ဆားတွေက ဆားခါးနည်းပြီး အစိုဓာတ်လည်း နည်းတာကြောင့် စားသုံးသူတွေက ပိုနှစ်သက် ကြပါတယ်။ ကျွန်မတို့ဆိုင်မှာ တစ်လကို ပိဿာ ၂,၀၀၀ ကျော် ရောင်းရပါတယ်" ဟု ဆားကုန်သည်တစ်ဦးဖြစ်သူ ဒေါ်ခင်စန်းရီက ပြောသည်။ စီးပွားရေးပညာရှင်များက ဧရာဝတီ တိုင်းဒေသကြီးမှ ဒေသထွက်ကုန်များ၏ ဈေးကွက်တန်ဖိုးမြင့်မားလာမှုသည် တိုင်းဒေသကြီး၏ ကျေးလက်စီးပွားရေးကို အထောက်အကူပြုလျက်ရှိကြောင်း မှတ်ချက်ပြုကြသည်။ လပွတ္တာ မြို့နယ်တွင် ဆားလုပ်ငန်းနှင့်သက်ဆိုင်သော လုပ်သားပေါင်း ၅,၀၀၀ ကျော် အလုပ်အကိုင် အခွင့်အလမ်းများ ရရှိထားကြောင်း သိရသည်။

DOCA(ဧရာဝတီ)

      စစ်ကိုင်းတိုင်းဒေသကြီး၊ ကန့်ဘလူမြို့နယ်၊ အညာဒေသ၌ ယခုမတ်လပိုင်းတွင် သရက်သီး စိမ်း (ခေါ်)သရက်ကင်းများ စတင်ပေါ်နေပြီဖြစ်ရာ ရာသီစာအဖြစ် စားသုံးသောကြောင့် သရက်ကင်း ဈေးကောင်းရရှိကာ ဝင်ငွေတိုးနေကြောင်း သရက်စိုက်ပျိုးသူများထံမှ သိရသည်။ 

     ယခုအချိန်တွင် ကုန်စိမ်းဈေးကွက်သို့ သရက်သီးစိမ်း(ခေါ်) သရက်ကင်းဈေးမှာ အသီးအနေ အထားပေါ်မူတည်၍ သရက်ကင်း(၁၀)ကျပ်သားလျှင် ၁၀၀၀ကျပ်ဖြင့် လက်လီရောင်းချရကြောင်း၊ သရက်ကင်း(၁)ပိဿာလျှင် (၉၀၀၀-၁၀၀၀၀)ကျပ်နှုန်းဖြင့်  ပွဲစားများက ခြံအရောက်လာရောက်ဝယ် ယူမှုများလည်းရှိကြောင်း၊ စိုက်ပျိုးသော သရက်မျိုးများမှာ ဟင်္သာ၊ ဝါဆို၊ စိန်တစ်လုံး၊ ပတ္တမြား       ငမောက်၊ မချစ်စု စသည်ဖြင့် သရက်အမျိုးခွဲအစုံ စိုက်ပျိုးကြကြောင်း သိရသည်။

DOCA(စစ်ကိုင်း)