ပြည်တွင်းကုန်သွယ်မှုသတင်း

   နွေ ၊ မိုး ၊ ဆောင်း ဥတုသုံးပါး ညီမျှခြင်းကြောင့် ဒေသမရွေး သီးပင်၊ စားပင်များအား စိုက်ပျိုးဖြစ်ထွန်းလျက်ရှိရာ ၎င်းသီးနှံများအနက် ခရမ်းချဉ်သီး သီးနှံကို ဒေသမရွေး လွယ်ကူစွာ စိုက်ပျိုးလျှက်ရှိပါသည် ။ ယခုအချိန်တွင် ရှမ်းပြည်နယ်၊အောင်ပန်း ၊ အင်းလေးမှထွက်ရှိသော ခရမ်းချဉ်သီးများ ကျောက်ဆည်ခရိုင်အတွင်းသို့ ဝင်ရောက်လျက်ရှိသလို ၊ မြို့နယ်အတွင်း စိုက်ပျိုးထားသော ခရမ်းချဉ်သီး သီးနှံများလည်း အနည်းငယ်ထွက်ပေါ်နေပြီး ခရမ်းချဉ်သီး‌ စျေးနှုန်း အနေဖြင့် နိုဝင်ဘာလနောက်ဆုံးပတ်တွင် (၁)ပိဿာလျှင် (၂၅၀၀-၃၀၀၀)ကျပ် ရှိခဲ့ရာမှ ဒီဇင်ဘာလ ပထမပတ်တွင် (၁)ပိဿာလျှင် (၄၀၀၀-၄၅၀၀)ကျပ် စျေးနှုန်းများဖြင့် ရောင်းဝယ်လျက်ရှိပြီး ယခင်အပတ် နှင့် ယခုအပတ် နှိုင်းယှဉ်ပါက စျေးနှုန်းများ မြင့်တက်လာကြောင်း ၊ ခရမ်းချဉ်သီးများ ဈေးကွက်အတွင်း ဝင်ရောက်မှုအနေဖြင့် အောင်ပန်း ၊ အင်းလေးမြို့များမှ ဝင်ရောက်ရာတွင် သယ်ယူစရိတ်များပြားခြင်း နှင့် ဝင်ရောက်မှုနည်းခြင်းတို့ကြောင့် ခရမ်းချဉ်သီးဈေးနှုန်းများ မြင့်တက်လျက်ရှိကြောင်း ခရမ်းချဉ်သီးရောင်းချသည့် စျေးသည်များထံမှ သိရှိရပါသည်။

DOCA( မန္တလေး)

   ကျောက်ဆည်မြို့ရှိ ‌အေးမြကြည်လင်စျေး နှင့် မြို့မဈေးများသို့ အာလူးသီးများ ဝင်ရောက်လျက်ရှိပြီး ရှမ်းပြည်နယ် အောင်ပန်း ၊ ပင်းတယ နှင့် ရွာငံရေဦးမြို့များမှ ဝင်ရောက်လျက်ရှိကြောင်း၊ အာလူးသီး သီးနှံကို စားသုံးသူပြည်သူများက အလွန်ကြိုက်နှစ်သက်သောကြောင့် ဝယ်လိုအားရှိ ကြောင်း၊ အာလူးစျေးနှုန်း အနေဖြင့် နိုဝင်ဘာလ နောက်ဆုံးပတ်တွင် လက်လီ(၁)ပိဿာလျှင် အသေး(၄၅၀၀/-)ကျပ်၊ အလတ်(၅၅၀၀/-)ကျပ်၊ အကြီး(၆၅၀၀-)ကျပ်စျေးနှုန်းများဖြင့် အရောင်း အဝယ် ဖြစ်ခဲ့ပြီး ဒီဇင်ဘာလ ပထမပတ်တွင် လက်လီ(၁)ပိဿာလျှင် အသေး(၄၅၀၀/-)ကျပ်၊အလတ် (၅၅၀၀/-)ကျပ်၊အကြီး(၆၅၀၀-)ကျပ်စျေးနှုန်းများဖြင့် ‌ရောင်းဝယ်လျက်ရှိပြီး စျေးနှုန်းများတည်ငြိမ် နေကြောင်း အာလူးရောင်းချသည့် ဈေးသည်များထံမှသိရှိရပါသည် ။ အာလူးကို ဟင်းချက်၍ သော်လည်းကောင်း၊ အာလူးကို အသားများနှင့်ရောပြီး ချက်ပြုတ်စားသောက်၍ သော်လည်းကောင်း၊  အာလူးကိုကြော်စား၍ သော်လည်းကောင်း၊ အသုတ်များတွင်လည်းထည့်၍ သော်လည်းကောင်းစားသုံး ကြပါသည် ။ အာလူးသီးနှံတွင် ဗီတာမင် C ပါဝင်သောကြောင့် အရေပြားကျန်းမာစေဖို့ အကောင်းဆုံး အားဖြည့်ပေးနိုင်ကြောင်း ကျန်းမာရေး စာစောင်များမှသိရှိရပါသည်။

DOCA(မန္တလေး)

   ကန်စွန်းရိုးနီပြုတ်ရည်သည်  ငွေကုန်သက်သာပြီး ခန္ဓာကိုယ်အတွက် အကျိုးများစေ၍ သွေသားသန့်စင်သလို ကိုယ်တွင်းအပူကင်းစင်ပြီး အသားအရည်ကြည်လင်လာခြင်းကြောင့်  ကျားမ မရွေးသောက်သုံးရန်လိုအပ်ကြောင်း၊  ရေနှင့်စင်ကြယ်စွာဆေးကြောပြီးသော ကန်စွန်းရိုးနီနှစ်စည်း ခန့်ကို ဆားအနည်းငယ်၊ ထန်းလျက်နှစ်လုံးခန့်၊ မန်ကျည်းသီးမှည့်အနည်းငယ်နှင့် ရေတစ်လီ တာခန့် ထည့်ပြီး မီးဖိုပေါ်တွင်ဆူပွက်အောင်မိနစ် ၂၀ ခန့်ကြာအောင်တည်ပါ။ ၎င်းပြုတ်ရည်အား မနက်တစ်ခွက်၊ အိပ်ခါနီးအစာနဲ့ဝေးချိန်တစ်ခွက်၊ တစ်ပတ်လျှင် အနည်းဆုံး ၂ ရက်၊ ၃ ရက်လောက် သောက်ပေးခြင်းဖြင့် ခန္ဓာကိုယ်ခုခံအားကိုကောင်းစေကြောင်း၊ ကိုယ်တွင်းအဆိတ်အတောက် များကိုဖယ်ရှားပေးကြောင်း၊ သွေးသားကိုသန့်စင်စေပြီး မီးယပ်သွေးဆုံးဝေဒနာများကို သက်သာ စေကြောင်း၊ ဆီးပူခြင်းနှင့် ဆီးကျောက်တည်ခြင်းများကို သက်သာပျောက်ကင်းစေပြီး ခန္ဓာကိုယ် အတွက်လိုအပ်သော သံဓာတ်ကိုဖြည့်တင်းပေးကြောင်း၊ ကန်စွန်းရိုးနီသည် လယ်ကန်သင်းရိုးများတွင် အလေ့ကျပေါက်‌သလို  စိုက်ခင်းများတွင်လည်း ရေသွင်း၍စနစ်တကျ စီးပွားဖြစ် စိုက်ပျိုး‌‌ ရောင်း ချကြောင်း ၂၀၂၅ခုနှစ်၊ ယခု ဒီဇင်ဘာလဆန်းပိုင်းတွင်‌ ရောင်းချနေသော ကန်စွန်းရိုးနီတစ်စည်းလျှင် ၂၀၀/၃၀၀ ကျပ်၊ ပေါက်ဈေး များဖြင့်ရောင်းချကြောင်း ကုန်စိမ်းရောင်းချသူထံမှ သိရှိရသည်။  

DOCA(မန္တလေး)

    MSMEလုပ်ငန်းများဖြစ်သော မုန့်ဖတ်(မုန့်တီ၊မုန့်ဟင်းခါး) လုပ်ငန်းများကို မန္တလေးမြို့ပေါ်ရှိ ရပ်ကွက်များတွင် မိသားစုစားဝတ်နေရေးအတွက် စီးပွားဖြစ်တစ်နိုင်တစ်ပိုင် လုပ်ကိုင်ကြကြောင်း၊ ၂၀၂၅ ခုနှစ်၊ ယခုနိုဝင်ဘာလ၌ မုန့်ဖတ် (ဆန်ပြား၊မုန့်တီ၊မုန့်ဟင်းခါးဖတ်) ၅၀ ကျပ်သား လျှင်(၁၅၀၀)ကျပ်၊ တစ်ပိဿာလျှင်(၃၀၀၀)ကျပ်ခန့် ပေါက်ဈေးများဖြင့် ရောင်းချကြောင်း၊ ယခင်အောက်တိုဘာလ၌  မုန့်ဖတ် (ဆန်ပြား၊မုန့်တီ၊မုန့်ဟင်းခါးဖတ်) ၅၀ ကျပ်သား လျှင်(၁၃၀၀) ကျပ်၊ တစ်ပိဿာလျှင် (၂၅၀၀) ကျပ်ခန့်ပေါက်ဈေးများဖြင့်ရောင်းချခဲ့ကြောင်း၊ နေ့စဉ်ပုံမှန်ကုန်ချိန် (၁၀၀-၁၅၀) ပိဿာခန့်ရောင်း ကုန်ကြောင်း၊ ဈေးကွက်အနေဖြင့် မြို့ပေါ်ရှိရပ်ကွက်များမှ  ဝယ်ယူစားသုံးကြကြောင်း၊ မု့န်တီ၊မုန့်ဟင်းခါး ရောင်းချသူများမှလည်း ဝယ်ယူကြောင်း၊ အလှူပွဲ၊ မွေးနေ့ပွဲ၊ ဘုရားပွဲများတွင် အော်ဒါအမှာရှိပါက မုန့်ဖက်များပိုမိုထုတ်လုပ်ရောင်းချရကြောင်း MSME လုပ်ငန်းဖြစ်သော မုန့်ဖတ်ထုတ်လုပ်မှုလုပ်ငန်းသည် တွင်တွင်ကျယ်ကျယ် အရောင်းအဝယ်ဖြစ် ကြောင်း မုန့်ဖတ်ထုတ်လုပ်သူ၏ ပြောပြချက်အရသိရှိရသည်။

DOCA(မန္တလေး)

   ပေါက်ပန်းဖြူရွက်သည် ဆီးနီ၊ ဆီးနည်းရောဂါများအတွက် ဟင်းချက်စား၍လည်းကောင်း၊ အပွင့်ကိုကြော်စားသော်လည်းကောင်း၊ ချက်စားခြင်းဖြင့်လည်းကောင်း ဆီးရောဂါသက်သာ စေနိုင်ခြင်း၊ အရွက်နှင့်အပွင့်ကို မကြာခဏ ပြုတ်ပြီးတို့စားပေးလျှင် သည်းခြေရောဂါ၊ ကျောက်ကပ် တွင်ကျောက်ရှိသူများ သက်သာစေခြင်း၊ ပေါက်ပန်းဖြူပွင့်ကို သုပ်စားခြင်းဖြင့် မီးယပ်ဖြူဆင်းရောဂါ၊ သွေးအန်သွေးကျရောဂါ သက်သာစေခြင်း ပေါက်ပန်းဖြူရွက် သတ္တုရည်ကိုအုံပေးပါက အပူလောင် တာသက်သာစေခြင်း၊ ပေါက်ပန်းဖြူအပွင့်၏ သတ္တုရည်ကိုမျက်စိခပ်ပေးပါကမျက်စိမှုန်၊ မျက်စိဝေ သက်သာစေခြင်း၊ အဆစ်ရောင်ရောဂါဝေဒနာခံစားနေရပါက ပေါက်ပန်းနီ၏အမြစ်ကို သွေးလိမ်း ပေးခြင်းဖြင့် သက်သာစေခြင်း၊အပွင့်သို့မဟုတ်အရွက်ကိုအရည်ညှစ်ယူ၍ အရည်ကိုခေါင်းမကိုက် သော တစ်ဘက်ရှိ နှာခေါင်းမှရှူပေးပါကပျောက်ကင်းစေခြင်း၊ အပွင့်ကိုပြုတ်စားပါက ကြက်မျက် သင့်ရောဂါပျောက် ကင်းစေခြင်း၊ အရွက်၏သတ္ထုရည်တွင် ဂျင်းခြောက်၊ ပိတ်ချင်း၊ ကြံသကာတို့ကို အတူရော၍ ရှူပေးပါက စိတ်ပျံ့လွင့်မှုသက်သာစေခြင်း တုတ်ကွေးဖျားရိုးရိုးဖျားခြင်းများအတွက် ပေါက်ပန်းဖြူ အရွက် ကို ကြက်သွန်နီနှင့် ကြော်စားပေးပါက သက်သာစေနိုင်ကြောင်း စာပေများမှ ဖတ်ရှုလေ့လာသိရှိရပြီး၊ မြင်းခြံမြို့အေးမြသီတာဈေးတွင် ရောင်းချသော ပေါက်ပန်းဖြူဈေးနှုန်းမှာ (၁၀)ကျပ်သားလျှင် (၁၀၀၀) ကျပ်ဖြင့် ရောင်းချကြောင်း သိရသည်။

DOCA(မန္တလေး)