ပြည်တွင်းကုန်သွယ်မှုသတင်း

          စစ်ကိုင်းတိုင်းဒေသကြီး၊ ကန့်ဘလူခရိုင် ကျွန်းလှမြို့ သစ်ရာမြိုင်ဈေးရှိ သစ်သီးဆိုင်များတွင် စတော်ဘယ်ရီသီးများ ရောင်းချလျက်ရှိကြောင်း၊ စတော်ဘယ်ရီသီးများကို မန္တလေးမြို့ရှိ သစ်သီး ပွဲရုံများမှ ဝယ်ယူရောင်းချလျက်ရှိကြောင်း သစ်သီးဆိုင်များမှ သိရသည်။

          ၂၀၂၅ ခုနှစ် ၊ ဧပြီလ ဒုတိယပတ်အတွင်း ကျွန်းလှမြို့ရှိ သစ်သီးဆိုင်များတွင် ရောင်းချ လျက်ရှိသော စတော်ဘယ်ရီသီးဈေးနှုန်းများမှာ အလုံးအကြီးအသေးပေါ်မူတည်၍ အလုံးလှ(၁) ပိဿာလျှင် ၁၈၀၀၀ကျပ်၊ (၂၅)ကျပ်သားလျှင် ၄၅၀၀ကျပ်၊ အလုံးအသေး(၁)ပိဿာလျှင် ၁၆၀၀၀ ကျပ်ဖြင့် ရောင်းချလျက်ရှိကြောင်း၊ စတော်ဘယ်ရီသီးသည် အရောင်အသွေးလှပမှုရှိကာ စားသုံးသူ များကို ဆွဲဆောင်လျက်ရှိကြောင်း၊ စတော်ဘယ်ရီသီးကို အဖျော်ရည်ဆိုင်များ၊ ရွှေရင်အေးဆိုင်များမှ လည်း  ဝယ်ယူအသုံးပြုကြသည့်အတွက် အရောင်းအဝယ်ဖြစ်လျက်ရှိကြောင်း သစ်သီးဆိုင်များမှ သိရှိရပါသည်။

DOCA(စစ်ကိုင်း)

           မန္တလေးတိုင်းဒေသကြီး၊ကျောက်ဆည်၊ စဉ့်ကိုင်၊ဟန်မြင့်မိုရ်မြို့နယ်များတွင် စိုက်ပျိုးရေးနှင့် စီးပွားရေးကို အဓိကထား လုပ်ကိုင်ကြပြီး နှစ်ရှည်ခံသီးပင်တစ်မျိုးဖြစ်သော သရက်ပင်များကို လည်း  စိုက်ပျိုးကြပါသည်။ ယခုကာလတွင် စိန်တလုံးသရက်သီးမှာ ဈေးကွက်ကောင်းမွန်လျက် ရှိကြောင်း စိစစ်သိရှိရပါသည်။ယခင်က သရက်သီးကို တနိုင်တပိုင်စားသုံးရန်အတွက်သာ စိုက်ပျိုး ကြသော်လည်း ယခုနောက်ပိုင်းကာလများတွင် သရက်သီးပင်များကို ယာမြေနှင့် ဥယာဉ်ခြံမြေ များတွင် ကျယ်ပြန့်စွာ စိုက်ပျိုးလာသည်ကိုတွေ့ရှိရပါသည်။ယခင်က အစေ့ပျိုးပင်များကိုသာ စိုက်ပျိုးကြပြီး ယခုအချိန်တွင် စိုက်ပျိုးရေးနည်းပညာများစွာ ထွန်းကားလာသည်နှင့်အညီ တောင်သူများသည် ကိုင်းကူးစနစ်ဖြင့် စိုက်ပျိုးလာကြသည်ကိုလေ့လာတွေ့ရှိရပါသည်။ ကိုင်းကူး စနစ်ဖြင့် စိုက်ပျိုးထားသော သရက်ပင်များသည် သုံးနှစ်ခန့်ကြာကာလတွင် အသီးစတင်သီးပြီး၊ အလုံးချောသည့်အတွက်ဈေးကွက်ဝင်ကြောင်း သိရှိရသည်။ စိန်တလုံးသရက်သီးများ မှာ သရက် ဈေးကွက်တွင် တစ်လုံးလျှင် ငွေကျပ် ၅၀၀ မှ ၁၀၀၀ ကျော် ပေါက်ဈေးရှိနေကြောင်း ရောင်းသူ များထံမှသိရှိရသည်။စိန်တလုံးသရက်သီးများမှာ ပြည်တွင်းစားသုံးမှုနှင့် ပြည်ပဈေးကွက်တွင် ရောင်းအားကောင်းသောသစ်သီးဖြစ်သဖြင့်ဈေးကွက်သို့တင်ပို့ရာတွင် အရည်အသွေးကို အဓိက ထားရန်လိုအပ်ပြီး  အရည်အသွေးမကောင်းပါက ဈေးကွက်တွင်ခေတ္တသာဈေးကောင်းရနိုင် ကြောင်းလေ့လာချက်များအရ သိရှိရပါသည်။နေပူပူတွင် စိန်တလုံးသရက်သီးစားခြင်းဖြင့် ကျန်းမာရေးအကျိုးကျေးဇူးများစွာရရှိပါသည်။ယခုကာလတွင် စိန်တလုံးသရက်သီးများသည် မန္တလေးကုန်စည်ဒိုင်များတွင် အရောင်းသွက်နေကြောင်းလေ့လာချက်များအရတွေ့ရှိရပါသည်။

DOCA(မန္တလေး)

စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်းမျာ ဆောင်ရွက်လျက်ရှိသလို   စားသုံးသူများ နေ့စဉ်ဝယ်ယူသုံးစွဲလျက်ရှိသည့် အခြေခံစားသောက်ကုန် များ၏ ဈေးနှုန်း၊ဈေးကွက်အခြေအနေများကို လေ့လာ၍ အပတ်စဉ်၊ လစဉ် အထက်အဆင့်ဆင့်သို့ တင်ပြဆောင်ရွက်လျက်ရှိကြောင်း သိရသည်။

ယခုအခါ ကန့်ဘလူခရိုင် ကျွန်းလှမြို့၊ သစ်ရာမြိုင်ဈေးတွင် ရောင်းချလျက်ရှိသည့် ငါးများကို ကန့်ဘလူမြို့တို့ရှိ လက်လီ/လက္ကားကုန်သည်များနှင့် ကျွန်းလှမြို့နယ်အတွင်းမှ ဝင်ရောက်လျက် ရှိကြောင်း၊ ၂၀၂၅ ခုနှစ် ၊ ဧပြီလ ဒုတိယပတ်အတွင်း ကျွန်းလှမြို့ သစ်ရာမြိုင်ဈေးတွင်ရောင်းချနေ သောငါးဈေးနှုန်းများမှာ တီလားဗီးယားငါးအကြီး(၁)ပိဿာလျှင် ၁၂၀၀၀ကျပ်၊ တီလားဗီးယားငါး အသေး(၁) ပိဿာလျှင် ၁၀၀၀၀ကျပ်ဖြင့် ရောင်းချကြောင်း လုပ်ငန်းရှင်များထံမှ သိရသည်။

DOCA(စစ်ကိုင်း)

             လိုင်ချီးသီးတွင် ဗီတာမင်စီဓာတ် ကြွယ်ဝစွာပါဝင်သောကြောင့် လူအများအလွန်နှစ်ခြိုက်စွာ စားသုံးကြပါသည်။ လိုင်းချီးသီးကို စစ်ကိုင်း၊ မန္တလေး၊ တနင်္သာရီ၊ ကချင်ပြည်နယ်နှင့် ရှမ်းပြည်နယ် အနောက်ပိုင်းတို့တွင် စိုက်ပျိုးထွက်ရှိသည်။ လိုင်ချီးသီးတွင် အခွံထူပြီးအစေ့ကြီးကာ အသားပါး၍ အချဉ်ဓာတ်ကဲသော အမျိုးအစားနှင့် အခွံပါးပြီးအစေ့သေးကာ အသားထူ၍ ချိုမွှေးသော အမျိုးအစားဟူ၍ အမျိုးအစားနှစ်မျိုးကို စိုက်ပျိုးလျက်ရှိသည်။ မိုးမကျမီ မေလတွင် လိုင်ချီးသီးများသည် လှိုင်လှိုင်ပေါ်ပြီး ဈေးကောင်းရရှိသကဲ့သို့ ဒေသခံပြည်သူများသာမက လူအများကြိုက်နှစ်သက်သော ရာသီပေါ်သီးနှံတစ်မျိုး ဖြစ်သည်။ လိုင်ချီးသီးပင်ကို ကိုင်းဆက်ကူးစိုက်ပျိုးပါက ၃နှစ်အတွင်းအသီးသီးသည်။ လိုင်ချီးသီးတွင် ရေဓာတ်နှင့် အာဟာရဓာတ်များစွာပါဝင်ပါသည်။ လိုင်ချီးသီးတွင် ကာဗွန်ဟိုက်ဒရိတ် ၊ အသားဓာတ် ၊ အချိုဓာတ် ၊ အမျှင်ဓာတ်၊ ဗီတာမင်စီ တို့ပါဝင်သောကြောင့် ဆံသားကို ကျန်းမာစေခြင်း၊ ကိုယ်အလေးချိန် လျှော့ချပေးခြင်း၊ နှလုံးသွေးကြောဆိုင်ရာ ရောဂါများကို ကာကွယ်ပေးခြင်း၊ အစာကြေလွယ်ခြင်း၊ ကိုယ်ခံအား ကောင်းစေခြင်း၊ အမြင်အာရုံကောင်းစေခြင်း၊ ကင်ဆာရောဂါဖြစ်ခြင်းမှ ကာကွယ်ပေးခြင်း၊ သွေးလည်ပတ်မှု ကောင်းစေပြီး သွေးပေါင်များ ထိန်းညှိပေးခြင်း၊ ခန္ဓာကိုယ်အတွင်းရှိ ဗိုင်းရပ်စ်ပိုးသေစေနိုင်ပြီး ကိုယ်ခံအား ကောင်းစေခြင်း စသည့်အကျိုးကျေးဇူးများ ရရှိပါသည်။ လိုင်ချီးသီးသည် ဈေးကွက်အနေဖြင့်လည်း ဈေးကောင်းရရှိသည့်အပြင် တောင်သူများအဖို့ စိုက်ပျိုးလျှင် စိုက်ပျိုးသလောက် ဈေးကွက်ရရှိသည့်အတွက် တိုးချဲစိုက်ပျိုးပါက ပိုမိုအကျိုးဖြစ်ထွန်းမည်ဖြစ်ကြောင်း သိရှိရပါသည်။ လိုင်ချီးသီးကို ဈေးကွက်တွင် တစ်ပိဿာလျှင် (၁၀၀၀၀-၁၅၀၀၀) ကျပ်နှုန်းဖြင့် ရောင်းချလျက်ရှိပါသည်။ ယခုနှစ်တွင် ယခင်နှစ်ကထက် ဈေးနှုန်းပိုမိုရရှိသောကြောင့် လိုင်ချီးသီးစိုက်ပျိုးရောင်းချသော ပိုင်ရှင်များအနေဖြင့် ဝင်ငွေပိုမိုရရှိကြောင်း သိရှိရသည်။

DOCA(မန္တလေး)

     စစ်ကိုင်းတိုင်းဒေသကြီး၊ ကန့်ဘလူခရိုင်တွင် မန်ကျည်းပင်များကို အခြားစားပင်သီးပင်များကဲ့သို့ ခြံဖွဲ့၍ စိုက်ပျိုးခြင်းမရှိသော်လည်း ကန့်ဘလူမြို့နယ်နေရာအနှံ့အပြားတွင် အများအပြား လေ့ကျပေါက်ရောက်ကြသည်။  မန်ကျည်းပင်သည် အေးမြသော အရိပ်ကိုပေးသည့်အပြင်  အရွက်၊ အသီး၊ အခေါက် တစ်ပင်လုံးနီးပါး လူတို့အတွက် အသုံးဝင်ပါသည်။ လယ်တော၊ ယာတောများနှင့် မိမိတို့အိမ်တွင် စားသုံး၍ပိုလျှံသည့် မန်ကျည်းရွက်နုများကို ကန့်ဘလူမြို့မဈေးတွင်လာရောက် ရောင်းချကြောင်း သိရသည်။

  ၂၀၂၅ ခုနှစ်၊ မေလ ပထမပတ်အတွင်း မန်ကျည်းရွက်နု(၁)ပုံလျှင်(၃၀၀)ကျပ်၊ မန်ကျည်း ရွက်နု(၂)ပုံလျှင် (၅၀၀)ကျပ်ဖြင့်ရောင်းချကြောင်း၊ ရာသီစာတစ်ခုဖြစ်သည့် မန်ကျည်းရွက်နုအား အိမ်ရှင်မများဟင်းချက်ရာတွင်လည်းကောင်း၊ ထမင်းဆိုင်များတွင်လည်းအသုံးပြုကြသဖြင့် အရောင်းအဝယ်သွက်လျက်ရှိကြောင်း မြို့မဈေးရှိကုန်စိမ်းရောင်းချသူတစ်ဦးထံမှ သိရှိရပါသည်။

DOCA(စစ်ကိုင်း)