ပြည်တွင်းကုန်သွယ်မှုသတင်း

              မန္တလေးသစ်သီးစျေးကွက်သို့   မေလပထမပတ်အတွင်း စပျစ်သီးဝင်‌ရောက်မှုများပြားပြီး  အရောင်းသွက်လျက်ရှိကြောင်း သိရပါတယ်။   မန္တလေးတိုင်းဒေသကြီး၊ ရမည်းသင်းခရိုင်မှ ထွက်ရှိ သည့် စပျစ်သီးဝင်ရောက်မှုများပြီး၊ စစ်ကိုင်းတိုင်းဒေသကြီးမှလည်း  ဝင်ရောက်ကြောင်း သိရပါ တယ်။ ရမည်းသင်းခရိုင်တွင် စားစပျစ်နှင့်ဝိုင်စပျစ်(၂) မျိုးလုံး စိုက်ပျိုးလျက်ရှိပြီး၊ အီတလီ No(3)၊ BQ ၊ BK ၊ RG စပျစ်မျိုးများ၊ရိုးရိုးအချွန်၊ ပန်း‌ရောင်အချွန်မျိုးနှင့် ဂျပန်(စိမ်း)တို့ စိုက်ပျိုး ကြောင်း  သိရပါတယ်။ သစ်သီးဝင်ရောက်မှုအနေဖြင့် ဒေသအသီးသီးမှ ဝင်ရောက်လာသည့်သစ်သီးများအား မန္တလေးမြို့၊စျေးချို စျေး၊ ၂၉ လမ်းနှင့် ၃၁လမ်းကြား၊ ၈၄လမ်းနေရာရှိ သစ်သီးပွဲရုံများသို့ ဝင်ရောက် ကြောင်း သိရပါ တယ်။ မန္တလေးစျေးကွက်တွင် ၂၀၂၅ ခုနှစ်မေလပထမပတ်အတွင်း စပျစ်သီး‌စျေး မှာ တစ်ပိဿာလျှင် စပျစ်သီးအလုံးဝိုင်း (ကြီး) ၁၀၀၀၀ကျပ်နှင့် ၁၂၀၀၀ကျပ်၊စပျစ်သီး အချွန်မျိုး ၁၀၀၀ဝ ကျပ်နှင့်၁၁၀၀၀ ကျပ်၊စပျစ်သီး (လုံးသေး) ၈၀၀၀ကျပ် နှင့် ၉၀၀၀ ကျပ်စျေးဖြစ်ပြီး၊ အသီး အရွယ်အစားအလိုက်စျေးအနည်းငယ်ကွာခြားမှုရှိကြောင်း သိရပါတယ်။ 

DOCA(မန္တလေး)

      စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများ ဖြစ်သည့် စပါး၊ပဲမျိုးစုံနှင့် ဆီထွက်သီးနှံတို့ကို အဓိကစိုက်ပျိုးသည့်အပြင် ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။

    ယခုအခါ ကန့်ဘလူမြို့ပေါ်၊ နတ်ပေးကျေးရွာနှင့် အခြားသောကျေးရွာများတွင် ဖက်ဖယ်ရွက် များကို စိုက်ပျိုးကြကြောင်း၊ ဖက်ဖယ်ရွက်များကို ကန့်ဘလူမြို့မဈေးတွင် ရောင်းချကြောင်း၊ ၂၀၂၅ ခုနှစ်၊ မေလ ပထမပတ်အတွင်း ဖက်ဖယ်ရွက်(၁)စည်းလျှင်(၃၀၀)ကျပ်၊ ဖက်ဖယ်ရွက်(၃)စည်းလျှင် (၈၀၀)ကျပ်ဖြင့်ရောင်းချကြောင်း၊ ဖက်ဖယ်ရွက်များကိုအိမ်ရှင်မများဟင်းချက်ရာတွင်လည်းကောင်း၊ စားသောက်ဆိုင်များနှင့် အကင်ဆိုင်များမှ အနံအရသာအတွက် မပါမဖြစ်ဝယ်ယူ အသုံးပြုကြသဖြင့် ဖက်ဖယ်ရွက်များ အရောင်းအဝယ်သွက်လျက်ရှိကြောင်း မြို့မဈေးရှိကုန်စိမ်း ရောင်းချသူတစ်ဦးထံမှ သိရှိရပါသည်။

DOCA(စစ်ကိုင်း)

   စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် ရာသီပေါ်သီးနှံများကို စိုက်ပျိုး ရောင်းချလျက်ရှိရာ ယခုအခါ ပူစီနံနံပင်များကို  နေအိမ်ခြံဝင်းများတွင်လည်းကောင်း၊ ယာတော၊ လယ်တောများတွင်လည်းကောင်း တစ်နိုင်တစ်ပိုင်စိုက်ပျိုး၍ ရောင်းချလျက်ရှိကြောင်း သိရသည်။  

   ယခုအခါ ကန့်ဘလူမြို့မဈေးတွင် ကုန်စိမ်းရောင်းချသူတစ်ဦး၏ ပြောပြချက်အရ ပူစီနံနံရွက် များကို ကန့်ဘလူမြို့ပေါ်နှင့် နတ်ပေးကျေးရွာ၊ နတ်အင်းကျေးရွာများမှလည်းကောင်း ဝယ်ယူ ရောင်းချလျက်ရှိကြောင်း ပူစီနံနံရွက်များကို အစည်းလေးများစည်း၍ရောင်းချရာ (၁)စည်းလျှင် (၂၀၀)ကျပ်၊ (၃)စည်းလျှင် (၅၀၀)ကျပ်၊ (၇)စည်းလျှင် (၁၀၀၀)ကျပ်ဖြင့် ရောင်းချလျက်ရှိကြောင်း ဒံပေါက်ဆိုင်များနှင့် ထမင်းဆိုင်များမှဝယ်ယူသည့်အတွက် နေ့စဉ်အရောင်းအဝယ်ဖြစ်လျက်ရှိ ကြောင်းသတင်းရရှိပါသည်။

DOCA(စစ်ကိုင်း)

            ၆.၅.၂၀၂၅ ရက်နေ့ ရန်ကုန်မြို့သို့ ဖျာပုံမြို့နယ်မှ ရွှေစင် သင်္ဘောဖြင့် ကြားပျံ (၅၀၀)အိတ်၊ ပေါ်ကျွဲ(၁၀၀) အိတ်၊ ဧည့်မထ(၂၄၄၀)အိတ်၊ ဆန်ကွဲ(၉၇၀)အိတ်၊ ဘိုကလေးမြို့နယ်မှ သုခဝတီ သင်္ဘောဖြင့် ဧည့်မထ (၂၀၀) အိတ်၊ ထိန်းလင်းရတနာ သင်္ဘောဖြင့်  ကြားပျံ(၂၀၅)  အိတ်၊ ပေါ်ဆန်း (၁၂၂၉)အိတ်၊ ပေါ်ကျွဲ (၄၃၀)အိတ်၊ ဧည့်မထ(၂၄၉၄) အိတ်နှင့် ဆန်ကွဲ(၁၄၉) အိတ်၊ ကြံတိုင်းအောင် သင်္ဘာများဖြင့် ကြားပျံ(၅၀၀) အိတ်၊ ပေါ်ကျွဲ (၅၀၀)အိတ်၊ ပေါ်ဆန်းအိတ်ရေ(၁၅၀၀)၊  ဧည့်မထ (၃၅၀၀ )အိတ် ၊ စိန်သိန်းသန်းဝေ သင်္ဘောဖြင့် ကြားပျံ (၁၀၀၀) အိတ်၊ ပေါ်ဆန်း(၂၄၉၅) အိတ်၊ ပေါ်ကျွဲ (၄၀၀) အိတ်၊ ဧည့်မထ(၁၀၀၀) အိတ်၊ ဆန်ကွဲ(၆၀၅) အိတ်၊ အောင်ချမ်းသူ သင်္ဘောဖြင့် ကြားပျံ(၅၀၀) မိတ်၊ ပေါ်ဆန်း(၂၀၀၅) အိတ်၊ ပေါ်ကျွဲ(၂၀၀) အိတ်၊ ဧည့်မထ(၁၇၉၅) အိတ်နှင့် အောင်သီရိသင်္ဘောဖြင့် ကြားပျံအိတ်(၅၀၀)၊ ပေါ်ဆန်းအိတ်(၁၀၄၉)၊ ပေါ်ကျွဲအိတ်(၃၀၀)၊ ဧည့်မထအိတ်(၂၄၅၈) ဆန်ကွဲအိတ် (၂၄၂၀) ၊ အောင်မြန်မာ သင်္ဘောဖြင့် ကြားပျံအိတ်(၄၉၃)၊ ပေါ်ဆန်းအိတ်(၁၀၀၀)၊ ပေါ်ကျွဲအိတ်(၁၄၄၁)၊ ဧည့်မထအိတ်(၃၃၆၃) နှင့် စိန်သလ္လာအောင် သင်္ဘောဖြင့် ကြားပျံအိတ်ရေ(၁၇၁၅)၊  ပေါ်ဆန်း(၂၈၃) ဧည့်မထ(၂၅၃၄) အိတ်တို့ဝင်ရောက်ပြီး လပွတ္တာမှ ထိန်လင်းရတနာသင်္ဘောဖြင့် ကြားပျံ(၅၉၄) အိတ်၊ ပေါ်ကျွဲ(၅၉၈) အိတ်၊ ဧည့်မထ(၉၁၉) အိတ်၊ ဆန်ကွဲ(၈၆၁) အိတ်၊ ကျိုက်လတ်မြို့နယ်မှ ပြည့်စုံသာလွန် သင်္ဘောဖြင့် ပေါ်ကျွဲ(၈၉၃) အိတ်နှင့် ဆန်ကွဲအိတ်ရေ(၂၀၀)၊ ကော့မှူးမြို့နယ်မှ ကားဖြင့် ပေါ်ဆန်း(၁၅၀) အိတ်၊ ပေါ်ကျွဲ(၁၀၀၀၀) အိတ်၊ ဧည့်မထ(၂၄၅၀) အိတ်တို့ဝင်ရောက်ခဲ့ကြောင်း သိရှိရပါသည်။

            ၅.၅.၂၀၂၅ ရက်နေ့ထက် ၆.၅.၂၀၂၅ ရက်နေ့သည် ဧရာဝတီတိုင်းမြို့နယ်များမှ ဆန်အမျိုးမျိုးဝင် ရောက်မှုမှာ အိတ်ရေ(၁၀၀၀) ကျော်ပိုမိုဝင်ရောက်ကြောင်း သိရှိရပါသည်။

DOCA(ရန်ကုန်)

ရန်ကုန်တိုင်းဒေသကြီး လှိုင်မြို့နယ်  သီရိမင်္ဂလာဈေးအတွင်းသို့ အနယ်နယ်အရပ်ရပ်မှ သစ်သီးများ၊ ပန်းနှင့် ကုန်စိမ်းများ ဝင်ရောက်လျက်ရှိရာ အောင်ပန်း၊ တောင်ကြီး၊ ကလော၊ ဟဲဟိုး၊ အင်းလေး၊ မှော်ဘီ၊ တိုက်ကြီး၊ တွံတေး၊ ကျောင်းကုန်း၊ ရွှေညောင်၊ ညောင်နှစ်ပင်၊ ခရမ်း၊ သုံးခွ၊ ဝါးနက်ချောင်း၊ ဧရာဝတီတိုင်း၊ ပဲခူးတိုင်း၊ မန္တလေးတိုင်းတို့မှ ၉.၅.၂၀၂၅ ရက်နေ့တွင် ကုန်စိမ်းကုန်ချိန် ပိဿာချိန်ပေါင်း (၇၆၀၀၀၀) ကား (၉၆) စီးဝင်ရောက်လျက်ရှိကြောင်း၊ ပြင်ဦးလွင်၊ ကလော၊ မိုးကုတ်၊ တောင်ကြီး၊ အောင်ပန်း၊ ဘီးလင်း၊ တပ်ကုန်း၊ ရဲမွန်၊ ရေး၊ အင်းမ၊ မှော်ဘီ၊ တိုက်ကြီး၊ မန္တလေး ၊ သီပေါ၊ ကျိုက်ကော်၊ မော်လမြိုင်၊ ပုပ္ပါး၊ ကျောက်ဆည်၊ တောင်ငူ၊ တွံတေး၊ ထားဝယ်၊ ကြံခင်း၊ ခရမ်းတို့မှ သစ်သီးများ ကုန်ချိန်ပိဿာချိန်ပေါင်း (၂၇၃၀၀၀) ကား (၄၂) စီးဝင်ရောက်ပြီး  ကလော၊ ဟဲဟိုး၊ တောင်ကြီး၊ ပြင်ဦးလွင်၊ ရွှေတောင်၊ ငွေတောင်၊ လှည်းကူး၊ ကျွန်းကလေး၊ ဇီးဖြူကုန်း၊ တွံတေး၊ ကော့မှူး၊ ညောင်တုန်းတို့မှ ပန်းများ ကုန်ချိန်ပိဿာပေါင်း (၃၈၈၀၀)  ကား (၂၇) စီး ဝင်ရောက်ကြောင်း  သိရှိရပါသည်။

DOCA(ရန်ကုန်)