ပြည်တွင်းကုန်သွယ်မှုသတင်း

    ကျောက်ဆည်ခရိုင်၊ စဉ့်ကိုင်မြို့နယ်သည် စိုက်ပျိုးရေးနှင့်မွေးမြူရေးကို အဓိကထားလုပ်ကိုင်ကြသော်လည်း ဒေသခံတောင်သူများသည် နှစ်ရှည်သီးနှံဖြစ်သော ဇီးပင်စိုက်ပျိုးခြင်းလုပ်ငန်းကိုလည်း ယာမြေနှင့်ဥယျာဉ်ခြံမြေများတွင် အများအပြားစိုက်ပျိုးလာကြကြောင်း၊ ဇီသီးသည်ရာသီစာဖြစ်၍ တစ်နှစ် ပတ်လုံးစားခွင့်မရှိပဲ တစ်နှစ်တွင် တစ်ခါသာစားသုံးခွင့်ရှိသော သီးနှံတစ်မျိုးလည်းဖြစ်ကြောင်း၊ ဇီးပင်စိုက်ပျိုးရာတွင် ကိုင်းကူးပျိုးပင်များကိုသာ အများဆုံးစိုက်ပျိုးကြပြီး အလုံးကြီးပြီး အရည် အသွေးကောင်းမွန်၍ အရသာရှိသော ထိုင်ဝမ်ဇီးသီးမျိုးများကိုသာ အများဆုံးစိုက်ပျိုးလာကြ ကြောင်း၊ ဇီးပင်စိုက်ပျိုးရာတွင် တစ်ပင်နှင့် တစ်ပင် (၁၅)ပေခြား စိုက်ပျိုးကြကြောင်း၊ တစ်ဧက ပျိုးပင် (၁၀၀)စိုက်ပျိုးရပြီး စတင်စိုက်ပျိုးသည့် အချိန်မှ (၂-၃)နှစ်ခန့်အကြာတွင် ဇီးသီးများ စတင် ခူးဆွတ်ရကြောင်း၊ ထိုင်ဝမ်ဇီးသီးများသည် နိုဝင်ဘာတွင် စတင်ထွက်ရှိပြီး ပေါ်ဦးပေါ်စချိန် ဖြစ်သောကြောင့် ဈေးကောင်းရရှိပြီး ဖောက်သည်ဈေးအနေဖြင့် ဇီးသီး(၁၀)ပြည်ပါ တစ်ဖာတွင် အလုံးအကြီးအသေးပေါ်မူတည်၍ (၂၀၀၀-၃၀၀၀)ကျပ်အထိ ဈေးရှိပြီး လက်လီဈေးနှုန်းအနေဖြင့် ထိုင်ဝမ်ဆီးသီး (၁)ပြည်လျှင် အလုံးကြီး (၄၀၀၀/-) အလုံးသေး (၃၀၀၀/-)ကျပ်ဈေးဖြင့် ရောင်းချ လျက်ရှိကြောင်း၊ စတင်ထွက်ပေါ်သည့်အချိန်တွင် တစ်ပတ်ခူးဆွတ်မှုအနေဖြင့် (၁၀)ပြည်ပါ (၂၅)ဖာအထိရရှိပြီး ယိုစုံလုပ်ငန်းရှင်များမှလည်း ဇီးခြံအထိလာရောက်၍ဝယ်ယူလျက်ရှိကြောင်း၊ ဇီးသီးစိုက်တောင်သူများမှာလည်း ရန်ကုန်-မန္တလေး လမ်းဘေးများတွင်လည်း ကိုယ်တိုင်ရောင်းချ လျက်ရှိကြောင်း၊ ယခုနှစ်တွင် မိုးရွာသွန်းမှုကောင်းမွန်သောကြောင့် ထိုင်ဝမ်ဇီးသီးများမှာ အရည်အသွေး လှ၍ အလုံးကြီးပြီး အထွက်နှုန်းကောင်းမွန်သည့်အပြင် ပေါ်စအချိန်ဖြစ်သောကြောင့် အရောင်းသွက်၍ ဈေးကောင်းရရှိပြီး အကျိုးအမြတ်အနေဖြင့် အထွက်နှုန်းနှင့် ဈေးနှုန်းအပေါ် မူတည်ပြီး ရာသီအစမှ ရာသီကုန်အထိ (၄၀၀၀၀၀၀-၅၀၀၀၀၀၀)ကျပ်ခန့် အကျိုးအမြတ် ရရှိကြောင်းကို ဇီးသီးစိုက်ပျိုးသော တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)

    စိမ်းစားဥသည် ရာသီဥတုအမျိုးမျိုးကို ခံနိုင်ရည်ရှိပြီး မျှတသောအပူချိန်နှင့် မိုးရေချိန် အသင့်အတင့် လိုအပ်ပြီး ရေဝင်ရေထွက်ကောင်းသော သဲနှုန်းမြေတွင် ကောင်းစွာစိုက်ပျိုးနိုင်သော သီးနှံဖြစ်ပါသည်။ စိမ်းစားဥစိုက်ပျိုးရာတွင် မျိုးစေ့ကိုအနက် ၂-၃လက်မခန့်ချပြီး ကြွက်မြီးတန်း စိုက်ပျိုးရကြောင်း၊ စိမ်းစားဥကို နယုန်၊ ဝါဆိုလတွင် စတင်စိုက်ပျိုးပြီး တန်ဆောင်မုန်း လဆန်း လောက်တွင် စတင်တူးဖော်ရောင်းချနိုင်ကြောင်း၊ အပင်အပြုစုကောင်းပါက တပို့တွဲ၊ တပေါင်းလအထိ တူးဖော်ရောင်းချနိုင်ကြောင်း၊ စိမ်းစားဥကို ရွာငံဒေသများတွင် အများဆုံးစိုက်ပျိုးလျက်ရှိပါသည်။ စိမ်းစားဥ တစ်ဧကစိုက်လျှင် ပိဿာ (၃၀၀၀ မှ ၅၀၀၀)ခန့်အထိထွက်ရှိကြောင်း၊ ပေါ်ဦးပေါ်စ စိမ်းစားဥများကို တစ်ပိဿာလျှင် (၅၀၀၀/-)ကျပ်နှုန်းဖြင့် ‌ရောင်းချရကြောင်း၊ စိမ်းစားဥကို ဆောင်းရာသီစာ စားစရာတစ်မျိုးဖြစ်ပြီး စားလိုက်လျှင် ချိုချိုကြွပ်ကြွပ်လေးနှင့် ရင်ထဲအေးမြစေပါ သည်။ စိမ်းစားဥကို သင့်သင့်အောင် စားသုံးခြင်းဖြင့် ဆီးချိုသွေးချိုရောဂါများကို ကာကွယ်ပေးရုံ သာမက ခံတွင်းကိုလည်း ကောင်းမွန်စေပြီး ကျန်းမာရေးအကျိုးကျေးဇူးများရရှိသဖြင့် စားသုံးသင့်ပါ ကြောင်း ရေးသားတင်ပြအပ်ပါသည်။

DOCA(မန္တလေး)

          ကျောက်ဆည်ခရိုင် စားသုံးသူရေးရာဦးစီးဌာနမှ ဝန်ထမ်းများသည် အသေးစား၊အလတ်စား လုပ်ငန်းများဖွံ့ဖြိုးတိုးတက်စေရေးအတွက်ကျောက်ဆည်မြို့နယ်၊ကျောင်းကုန်းကျေးရွာရှိ ထန်းလက် ကုလားထိုင်ပြုလုပ်ရောင်းလျှက်ရှိသည့်လုပ်ငန်းအား  ကွင်းဆင်းလေ့လာခဲ့ပါသည်။ ၄င်းလုပ်ငန်းအား မိသားစုတစ်နိုင်တစ်ပိုင်အပိုဝင်ငွေရရှိရေးပြုလုပ်ရောင်းချလျှက်ရှိပါသည်။ကျောင်းကုန်းကျေးရွာတွင် ထန်းလက်ကုလားထိုင် လုပ်ငန်းကို မိရိုးဖလာအဖြစ် ရှေးယခင်မှစ၍ လုပ်ကိုင်ဆောင်ရွက်လျှက် ရှိကြောင်းသိရှိရပါသည်။ ထန်းလက်ကုလားထိုင်ပြုလုပ်ရန်အတွက် ထန်းကြီးလက်ဖျားကို ထန်းပင်မှ ခုတ်ယူပြီး နေပူခံကာအခြောက်လှမ်းထားရကြောင်း ၊ ယင်းသို့နေပူခံကာ အခြောက်လှမ်းထားသော ထန်းလက်ကုလားထိုင်သည်ရေရှည်ခိုင်ခံ့မှုရှိမည်ဖြစ်ကြောင်း၊ ထန်းလက်ကုလားထိုင်တစ်လုံးပြုလုပ် မည်ဆိုပါက ထန်းအလက်(၃၀)ကုန်ကျမည်ဖြစ်ပြီး (၁)လက်လျှင်(၁၀၀/-)ကျပ်ဖြင့် ဝယ်ယူရ ကြောင်း၊ ကုလားထိုင်တစ်လုံးအား ထန်းလက်များဖြင့်သာပြုလုပ်ထားပြီး ကုလားထိုင်ခိုင်ခန့်ရန် အတွက်သံမှိုကိုအသုံးပြု၍ထိန်းထားကြောင်း ၊ ကုလား ထိုင်တစ်လုံးလျှင် (၁)လက်မသံနှင့်(၅)မတ်သံ (၅)ကျပ်သားကုန်ကျမည်ဖြစ်ပြီး သံမှိုစျေးအနေဖြင့်(၈၀၀/-)ကျပ်ကုန်ကျကြောင်း၊ လူတစ်ဦး(၁)ရက် လျှင် ကုလားထိုင်တစ်လုံးပြီးစီးကြောင်း ၊ ကုလားထိုင်တစ်လုံးပြုလုပ်ရာတွင် အပြီးအစီး (၅၀၀၀-၆၀၀၀)ကျပ်ခန့် ကုန်ကျကြောင်း ၊ ကျေးရွာအတွင်း ပြန်လည်ရောင်းချပါက တစ်လုံးလျှင်(၁၀၀၀၀/-) ကျပ်အထိရှိပြီး ပြုလုပ်ရောင်းချသူများအနေဖြင့် နေ့စားလုပ်အားခနှင့်ယှဉ်လျှင် တွက်ခြေကိုက် ကြောင်း ၊ မပြုလုပ်နိုင်သူများမှငွေကြိုတင်‌ပေး၍ဆိုင်ကယ်ဖြင့် လှည့်လည်ရောင်းချကြကြောင်း ၊ ကြိုတင်ပေးယူ၍ ပြန်လည်ရောင်းချသောကြောင့် ကုလားထိုင်တစ်လုံးလျှင်(၁၂၀၀၀/-)ကျပ်ပေးဝယ် ၍ပြန်လည်ရောင်းချကြကြောင်း၊ လူတစ်ဦးလျှင် (၁)ရက် တစ်လုံးခန့် ပြုလုပ်၍ရောင်းချပါက တစ်လ အကျိုးအမြတ်အနေဖြင့် (၁၅၀၀၀၀-၁၆၀၀၀၀)ကျပ်အထိရရှိနိုင်ကြောင်း ၊ ကျောင်းကုန်းကျေးရွာမှ ထန်းလက်ကုလားထိုင်ပြုလုပ်သူတစ်ဦး၏ပြောကြား ချက်အရသိရှိရပါသည်။

DOCA(မန္တလေး)

   မန္တလေးတိုင်းဒေသကြီး၊ ကျောက်ဆည်ခရိုင်တွင် သီးနှံမျိုးစုံစိုက်ပျိုးလျှက်ရှိရာ ကုန်စိမ်းသီးနှံ တစ်မျိုးဖြစ်သော ခရမ်းသီး(အလုံးသေး) သီးနှံကိုလည်း ရာသီမရွေး တစ်နှစ်ပတ်လုံး စိုက်ပျိုးကြ ပါသည်။ အများဆုံးစိုက်ပျိုး သောကျေးရွာများမှာ သံချပ်ကုန်းကျေးရွာ ၊ ရွာပုလဲကျေးရွာ နှင့် အုတ်ဖို ကျေးရွာများဖြစ်ပါသည်။ ခရမ်းသီး(အလုံးသေး) စိုက်ပျိုးရာတွင် မျိုးစေ့ကိုပျိုးထောင်ပြီး (၁)လခွဲသား အရွယ်တွင် စတင်စိုက်ပျိုးရကြောင်း ၂လခွဲ ၃လကျော် အချိန်တွင် စတင်ခူးဆွတ်နိုင်ပြီး (၄)ရက်ခြား တစ်ကြိမ်ခူးဆွတ်ရကြောင်း၊ စတင်ခူးဆွတ်သည်မှတစ်ပတ်နှင့်တစ်ပတ် အထွက်နှုန်းပိုမိုလာကြောင်း၊ (၁)ဧက အထွက်နှုန်း အနေဖြင့် တစ်ပတ်လျှင် ခရမ်းသီး(အလုံးသေး)  ပိဿာ(၂၅၀-၃၀၀)ခန့် ထွက်ရှိကြောင်း၊ သက်တမ်းအနေဖြင့် (၄-၅)လခန့် အထိခူးဆွတ်နိုင်ကြောင်း ၊ (၁)ဧက ကုန်ကျစရိတ် အနေဖြင့် မျိုး၊သွင်းအားစု၊လုပ်သားခ အပါအဝင် စုစုပေါင်း(၁၀၀၀၀၀၀/-)ကျပ်ကုန်ကျကြောင်း ၊ အထွက်နှုန်းအနေဖြင့်ပိဿာ(၂၀၀၀-၂၂၀၀)အထိထွက်ရှိကြောင်း ၊ ယခင်လ ခရမ်းသီး(အလုံးသေး) စျေးနှုန်းအနေဖြင့် ဖောက်သည်စျေးမှာ (၁)ပိဿာလျှင်(၁၀၀၀/-)ကျပ် ၊ လက်လီစျေး အနေဖြင့် (၁၅၀၀-၂၀၀၀)ကျပ် စျေးနှုန်းများဖြင့် ရောင်းဝယ်ခဲ့ပြီး ယခုလက်ရှိခရမ်းသီး(အလုံးသေး) စျေးနှုန်း အနေဖြင့်ဖောက်သည်စျေးမှာ(၁)ပိဿာလျှင်(၁၅၀၀/-)ကျပ်၊ လက်လီစျေး အနေဖြင့် (၂၅၀၀-၃၀၀၀) ကျပ်စျေးနှုန်းများဖြင့် အရောင်းအဝယ်ဖြစ်နေကြောင်း ၊ ယခင်လထက် စျေးနှုန်းမြင့်တက်လျက်ရှိ ကြောင်း ၊ ကုန်စိမ်းပွဲစားများမှ စိုက်ခင်းများအထိ  လာရောက်ဝယ်ယူကြကြောင်း ၊ ကုန်စိမ်းသီးနှံ ဖြစ်သည့်အတွက် တစ်ပတ်နှင့်တစ်ပတ် အထွက်နှုန်းနှင့်စျေးနှုန်းများ မတူညီကြောင်း ၊ (၁)ဧက အကျိုးအမြတ်အနေဖြင့် ပျမ်းမျှ(၂၀၀၀၀၀၀/-)ကျပ် ဝန်းကျင်မြတ်ကြောင်း ၊ ကုန်စိမ်းပွဲစားများမှ စိုက်ခင်းများအထိလာရောက်ဝယ်ယူကြကြောင်း ၊ ပွဲစားများမှတဆင့် ကျောက်ဆည် ၊ စဉ့်ကိုင်၊ မန္တလေးနှင့်ရန်ကုန်မြို့များသို့ တင်ပို့ရောင်းချကြကြောင်း ၊ ခရမ်းသီး (အလုံးသေး) စိုက်ပျိုးခြင်းဖြင့် ဝင်ငွေတိုးပြီး တွက်ချေကိုက်သော သီးနှံတစ်မျိုးဖြစ်ကြောင်း ခရမ်းသီး(အလုံးသေး) စိုက်ပျိုးသော တောင်သူတစ်ဦး၏ ပြေကြားချက်အရ သိရှိရ ပါသည်။

DOCA(မန္တလေး)

    မန္တလေးတိုင်းဒေသကြီး ၊ ကျောက်ဆည်ခရိုင်အတွင်းရှိ ကုန်စိမ်းပွဲရုံများသို့ မုန်လာထုပ်(ခ) ဂေါ်ဖီထုပ်များ စျေးကွက်အတွင်းသို့ ဖြိုင်ဖြိုင်ဝင်ရောက်လျက်ရှိ အရောင်းအဝယ်ဖြစ်နေကြောင်း သိရှိရပါသည် ။ ဂေါ်ဖီထုပ်များသည် ယခုအချိန်တွင် မြေပြန့်ဒေသများမှထွက်ရှိမှုနည်းပါပြီး တောင်ပေါ်ဒေသများဖြစ်သည့် အောင်ပန်း၊ ကလော၊ ရွာငံ နှင့် ရေဦးဒေသများမှ အဓိက အများဆုံး ဝင်ရောက်လျက်ရှိပြီး ယခင်လ ဂေါ်ဖီထုပ် တစ်ထုပ်လျင် (၁၀၀၀-၁၃၀၀)ကျပ်အထိ ရောင်းချရပြီး ဒီဇင်ဘာလ ပထမပတ်တွင် ဂေါ်ဖီထုပ်စျေးနှုန်းအနေဖြင့် တစ်ထုပ်လျင် လက်ကားစျေး (၁၂၀၀-၁၅၀၀)ကျပ်စျေးနှုန်းများရှိပြီး စျေးအနည်းငယ်မြင့်တက်လျက်ရှိကြောင်း၊ ဂေါ်ဖီထုပ်ကို အစိမ်းကြော်၊ အတို့အမြှုပ်၊ မုန်လာထုပ်အချဉ်၊ မုန့်ဟင်းခါးများ တွင်လည်းထည့်၍စားသုံးကြောင်း၊ ဂေါ်ဖီထုပ်ကို ပဲလှော် ပဲကြော်များဖြင့်လည်း အသုပ်သုပ်၍ စားသုံးကြပါသည်။ ဂေါ်ဖီထုပ် စားသုံးခြင်းဖြင့် ဂေါ်ဖီထုပ်မှာပါတဲ့ အမိုင်နိုအက်ဆစ်က အရောင်ကျစေနိုင်ပြီး အရေပြားရောင်ရမ်းခြင်းကို သက်သာ စေနိုင်ကြောင်း ကျန်းမာရေး ဗဟုသုတများမှ သိရှိရပါသည်။

DOCA(မန္တလေး)