သတင်းနှင့် လှုပ်ရှားမှုများ

            ၂၀၂၅ ခုနှစ်၊ ဇန်နဝါရီလ ၉ ရက်နေ့၊ နံနက်(၁၀း၃၀)နာရီအချိန်တွင် ထားဝယ်မြို့၊ စားသုံးသူရေးရာဦးစီဌာန၊ တနင်္သာရီတိုင်းဒေသကြီးဦးစီးမှူးရုံးတွင် အွန်လိုင်းစနစ်ဖြင့် ရောင်းချခြင်းလုပ်ငန်းနှင့်စပ်လျဥ်း၍ အွန်လိုင်းစနစ်နှင့်ကုန်စည်ပို့ဆောင်ရေး ဝန်ဆောင်မှုလုပ်ငန်းဆောင်ရွက်သည့် လုပ်ငန်းရှင်အား အွန်လိုင်းမှတ်ပုံတင်လျှောက်ထားရာတွင် လိုအပ်သည့်အချက်များနှင့် စားသုံးသူကာကွယ် ရေးဥပဒေအကြောင်း သိကောင်းစရာများကို ဟောပြောဆွေးနွေးခဲ့ပါသည်။

           အဆိုပါတွေ့ဆုံဆွေးနွေးရာတွင် စားသုံးသူရေးရာဦးစီးဌာနမှ အွန်လိုင်းစနစ်ဖြင့် ရောင်းချခြင်းလုပ်ငန်းနှင့်စပ်လျဥ်း၍ မှတ်ပုံတင်လျှောက်ထားရန်နှင့် လျှောက်ထားရာတွင်  ကြိုတင်ပြင်ဆင်ထားရှိရမည့် အထောက်အထားများ၊ အခြေခံလိုအပ်ချက်များ၊ လျှောက်ထားခြင်း ပုံစံအဆင့်ဆင့်နှင့် စားသုံးသူကာကွယ်ရေးဥပဒေပါ စားသုံးသူအခွင့်အရေး၊ တာဝန်များ၊ စီးပွားရေးလုပ်ငန်းရှင်များ လိုက်နာရမည့်တာဝန်များအကြောင်း၊ ကုန်အညွှန်းအမှတ်အသား ဖော်ပြခြင်းဆိုင်ရာများအကြောင်း ဟောပြောဆွေးနွေးခဲ့ကြောင်း သိရှိရပါသည်။

DOCA(တနင်္သာရီ)

           ရှမ်းပြည်နယ်တောင်ပိုင်း၊ စားသုံးသူရေးရာဦးစီးဌာန၊ လွိုင်လင်ခရိုင်ဦးစီးမှူးရုံးမှ ဝန်ထမ်းများသည် (၆.၁.၂၀၂၅)ရက်နေ့တွင် နမ့်စန်မြို့ပေါ်ရှိ ကုန်စုံဆိုင်များ၌ အာဟာရဖြည့်စွက်စာအမျိုးမျိုးတို့အား ဈေးကွက်စောင့်ကြည့် စစ်ဆေးခဲ့ပါသည်။

           ထိုသို့စစ်ဆေးရာ၌ ကုန်စုံဆိုင်တွင်ရောင်းချနေသော အာဟာရဖြည့်စွက်စာအမျိုးမျိုးတွင် ကုန်အညွှန်းအမှတ်အသား ပြည့်စုံစွာဖော်ပြထားခြင်းရှိ/ မရှိ၊ စားသုံးသူ ဘေးအန္တရာယ်ဖြစ်စေနိုင်သော ဖြည့်စွက်စာများ ရောင်းချခြင်းရှိ/ မရှိတို့အားစစ်ဆေးခဲ့ပြီး သတ်မှတ်ထားသော စံချိန်စံနှုန်းနှင့် ကိုက်ညီ၍ သက်ဆိုင်ရာဌာနများမှ ခွင့်ပြုထားသော ကုန်အညွှန်းအမှတ်အသား ပြည့်စုံစွာဖော်ပြထားသည့် ဖြည့်စွက်စာများကိုသာ ဈေးကွက်အတွင်း တင်သွင်းရောင်းချစေရန် အသိပညာပေးခြင်းတို့ကို ဆောင်ရွက်ခဲ့ပါသည်။

DOCA(ရှမ်း)

          ၂၀၂၅ ခုနှစ်၊ ဇန်နဝါရီလ ၈ ရက်နေ့၊ နံနက် (၁၀း၃၀) နာရီအချိန်တွင် တနင်္သာရီတိုင်းဒေသကြီးဦးစီးမှူးရုံးမှ ဝန်ထမ်းများသည် အထူးစုံစမ်းစစ်ဆေးရေးဦးစီးဌာန၊ အထွေထွေအုပ်ချုပ်ရေးဦးစီးဌာန၊ ဗဟိုစာရင်းအင်းအဖွဲ့၊ စည်ပင်သာယာရေးအဖွဲ့တို့နှင့်ပူးပေါင်း၍ ထားဝယ်မြို့ပေါ်ရှိ ဘိလပ်မြေအရောင်း ဆိုင်ကြီးများသို့ သွားရောက်စစ်ဆေးခဲ့ပါသည်။

            ထိုသို့စစ်ဆေးရာတွင် စျေးကွက်အတွင်း ဘိလပ်မြေပြတ်လပ်မှုရှိ/ မရှိ၊ စျေးနှုန်းစျေးကွက်အခြေအနေများ၊ ယခင်လနှင့်ယခုလစျေးနှုန်းအခြေအနေများအား သွား‌ရောက်စစ်ဆေးခဲ့ရာ ထားဝယ်မြို့သို့ ယခင်က‌ရေလမ်းခရီးဖြင့်တင်ပို့သော်လည်း ယခုနောက်ပိုင်းတွင် ရေလမ်းမှဝင်ရောက်မှု နည်းပါးလာပြီး ကုန်းလမ်းခရီးဖြင့်တင်ပို့မှုများရှိလာသဖြင့် ကြန့်ကြာမှုများဖြစ်ပေါ်ခြင်းကြောင့် ထားဝယ်မြို့တွင်းရှိ ဘိလပ်မြေအရောင်းဆိုင်များတွင် ဘိလပ်မြေများပြတ်လပ်မှုရှိကြောင်း သိရှိရပါသည်။

DOCA(တနင်္သာရီ)

           ရန်ကုန်တိုင်းဒေသကြီး ခရမ်းမြို့နယ် စည်ပင်သာယာမြို့မဈေးအတွင်းရှိ စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ၏ ညွှန်ကြားမှုဖြင့် စားသုံးသူ ရေးရာဦးစီးဌာန၊ ရန်ကုန်တိုင်းဒေသကြီး၊ တိုင်းဒေသကြီးဦးစီးမှူး၊ ခရိုင်ဦးစီးမှူး၏ လမ်းညွှန်မှုဖြင့် ဈေးကွက်အတွင်း ခရမ်းမြို့နယ်တာဝန်ခံနှင့် မြို့နယ်စည်ပင်သာယာရေးအဖွဲ့တို့ဖြင့် ပူးပေါင်း ၍ ခရမ်းမြို့စည်ပင်သာယာမြို့မဈေးရှိဈေးဆိုင်များရှိ အမှတ်(၁၁)ရပ်ကွက်ရှိ အောင်ရတနာဆီစက်များရှိ ပြည်တွင်းထုတ်အမှတ်တံဆိပ်ပါ စားသုံးဆီများအား (၂၀၂၄)ခုနှစ် ဒီဇင်ဘာလ (၂၃) ရက်နေ့၊ နေ့လယ်(၁၄:၀၀)နာရီအချိန်တွင် မြေပြင်ကွင်းဆင်းစစ်ဆေးခြင်းများ ဆောင်ရွက်ခဲ့သည်။

          ထို့သို့ကွင်းဆင်းစစ်ဆေးရာတွင် စည်ပင်သာယာမြို့မဈေးအတွင်းအပြင်ရှိ ဈေးဆိုင်တို့တွင် ပြည်တွင်းထုတ်အမှတ်တံဆိပ်ပါ မြေပဲဆီ၊ နေကြာဆီ၊ နှမ်းဆီများ၊ ရောနှောဆီဗူးများတွင် အစားအသောက်နှင့်ဆေးဝါးကွပ်ကဲရေးဦးစီးဌာန(FDA)၏ ထောက်ခံချက်ရှိမှသာ ထုတ်လုပ်ဖြန့်ဖြူးရောင်းချခွင့်ရှိမည်ဖြစ်၍ ဈေးအတွင်းရှိ ကုန်စုံဆိုင်များ၊ ရပ်ကွက်အတွင်းရှိ ဆီစက်များတွင် ထုတ်လုပ်ဖြန့်ဖြူးရောင်းချလျက်ရှိသောထုတ်ပိုးဗူးဆီများတွင် (FDA)ထောက်ခံချက်များ ပါဝင်မှုရှိ/ မရှိနှင့် စားသုံးသူကာကွယ်ရေးဥပဒေညွှန်ကြားချက်များနှင့် ကုန်အညွှန်းအမှတ်အသားများ ပြည့်စုံမှုရှိ/ မရှိ၊ ကျန်းမာရေးဝန်ကြီးဌာန၊ မြန်မာနိုင်ငံအစားအသောက်နှင့် ဆေးဝါးအာဏာပိုင်အဖွဲ့မှ ရောနှောဆီ (Blended Oil) ထုတ်လုပ်၊ သိုလှောင်၊ သယ်ယူ၊ ဖြန့်ဖြူးရောင်းချခြင်းနှင့် စပ်လျဉ်း၍ လိုက်နာဆောင်ရွက်ရန် အမိန့်အမှတ်(၂/၂၀၂၄) ဖြင့်ကိုက်ညီမှုရှိ/မရှိ၊ FDA ထောက်ခံချက်အမှတ်များ ထုတ်လုပ်သည့်စက်ရုံ လိပ်စာ၊ ဗူးဆီအရွယ်အစားများအား မြေပြင်ကွင်းဆင်း စစ်ဆေးခဲ့သည်။

          ထိုသို့စစ်ဆေးခဲ့ရာတွင် ခရမ်းမြို့နယ်အတွင်းရောင်းချလျှက်ရှိသော ဗူးဆီများတွင် သတ်မှတ် ချက်များနှင့်ပြည့်စုံ၍ FDA ထောက်ခံချက်ပါဝင်သော ဆီများရောင်းချလျက်ရှိကြောင်း သိရှိရပါသည်။

DOCA(ရန်ကုန်)        

            စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးကွပ်ကဲမှုအောက်ရှိ မှော်ဘီမြို့နယ်ခွဲရုံးမှ ဝန်ထမ်းများသည် ၇.၁.၂၀၂၅ ရက်နေ့ နံနက် (၁၀:၀၀)နာရီအချိန်တွင် မှော်ဘီမြို့မဈေးအတွင်းရှိ အခြေခံစားသောက်ကုန်ပစ္စည်းများ ရောင်းချနေသောဆိုင်များသို့ မြို့နယ်စည်ပင်သာယာရေးအဖွဲ့မှ မြို့မဈေးတာဝန်ခံနှင့်အတူ ဈေးနှုန်းမှန်ကန်စွာရောင်းချနိုင်ရေးအတွက် ကွင်းဆင်းစစ်ဆေး ဆောင်ရွက်ခဲ့ပါသည်။

            အဆိုပါ အခြေခံစားသောက်ကုန်ပစ္စည်းများဖြစ်သော ကြက်သွန်နီ၊ ကြက်သွန်ဖြူ၊ ငရုတ်သီး (အရှည်)၊ ငရုတ်သီး(အပု)၊ အာလူး၊ ချင်း၊ မန်းကျည်းသီးမှည့်၊ ကုလားပဲ၊ ငရုတ်သီးမှုန့်၊ မြေပဲဆံများ အား ဈေးနှုန်းမှန်ကန်စွာရောင်းချနိုင်ရေး အချိန်အတွယ်ပမာဏနှင့် ဈေးနှုန်းမှန်ကန်မှုရှိစေရေးနှင့် စားသုံးသူဘေးအန္တရာယ်ဖြစ်စေနိုင်သော ကုန်ပစ္စည်းများရောင်းချခြင်းရှိ/မရှိတို့အား ကွင်းဆင်းစစ်ဆေးဆောင်ရွက်ခဲ့ကြောင်း သိရှိရပါသည်။

DOCA(ရန်ကုန်)