သတင်းနှင့် လှုပ်ရှားမှုများ

၁၃.၁.၂၀၂၅ ရက်နေ့ နံနက် (၁၀:၃၀) နာရီအချိန်တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ချောင်းဆုံမြို့နယ်တာဝန်ခံ ဒုတိယဦးစီးမှူး ဒေါ်ထက်ထက်နွေဦး၊ အကြီးတန်းစာရေး ဒေါ်ယွန်းမီမီဖူးဝေတို့သည် မြို့နယ်ကျန်းမာရေးဦးစီးဌာန၊ မြို့နယ်စည်ပင် သာယာရေးအဖွဲ့တို့နှင့် ပူးပေါင်း၍ ချောင်းဆုံမြို့နယ်အတွင်းရှိ ကုန်စုံဆိုင်များတွင် ရောင်းချနေသော စားသုံးဆီအမျိုးမျိုးအား ကွင်းဆင်းစစ်ဆေးခဲ့ကြောင်း သိရှိရပါသည်။

ထိုသို့ ကွင်းဆင်းစစ်ဆေးရာ ချောင်းဆုံမြို့နယ်အတွင်းရှိ ကုန်စုံဆိုင်များတွင် ရောင်းချနေသော Good Choice အမှတ်တံဆိပ်ဟင်းသီးဟင်းရွက်ဆီ၊ အမေထွားမြေပဲဆီ၊ ပုဇွန်နှစ်ကောင်တံဆိပ် ဟင်းသီးဟင်းရွက်ဆီ၊ Mazin အမှတ်တံဆိပ် ဟင်းသီးဟင်းရွက်ဆီများ အား စစ်ဆေးခဲ့ပြီး အဆိုပါ စားသုံးဆီများမှာ  မြန်မာနိုင်ငံ စားသုံးသူကာကွယ်ရေး ကော်မရှင်၏ ညွှန်ကြားချက်အမှတ် (၂/၂၀၁၉) တွင် ဖော်ပြထားသော ကုန်စည်အလိုက် ဖော်ပြရမည့် ကုန်အညွှန်းအမှတ်အသားဖော်ပြချက်နှင့် ကိုက်ညီမှု ရှိ/မရှိ စစ်ဆေးခဲ့ရာ ကုန်အညွှန်းအမှတ် အသားပြည့်စုံစွာ ဖော်ပြထားသည်ကို စစ်ဆေးတွေ့ရှိရပြီး၊ ရောနှောဆီများရောင်းချမှု မရှိကြောင်း သိရှိရပါသည်။

DOCA(မွန်)

          ၈.၁.၂၀၂၅ ရက်နေ့တွင်  မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်ခရိုင်၊ မော်လမြိုင်မြို့နယ်တာဝန်ခံ ဒု-ဦးစီးမှူး ဦးအောင်ညီညီခန့်သည် မြို့နယ်အထွေထွေအုပ်ချုပ်ရေး ဦးစီးဌာန၊ မြို့နယ် စည်ပင်သာယာရေးအဖွဲ့တို့နှင့် ပူးပေါင်း၍ မော်လမြိုင်မြို့နယ်အတွင်းရှိ ဆန်ဆိုင်ကြီးများအား ဆန်ဈေးနှုန်းများ မြှင့်တင်ရောင်းချခြင်းအလို့ငှာ သိုလှောင်ခြင်း၊ ဖြန့်ဖြူးရောင်းချခြင်း ရှိ/မရှိ ကွင်းဆင်းစစ်ဆေးခဲ့ပါသည်။

ထိုသို့ ကွင်းဆင်းစစ်ဆေးရာတွင် မော်လမြိုင်မြို့နယ်အတွင်းရှိ ဆန်ဂိုဒေါင်များနှင့် ဆန်ဆိုင်ကြီးများတွင် ဈေးနှုန်းမြှင့်တင်ရောင်းချရန်အတွက် သိုလှောင်ခြင်း၊ ဖြန့်ဖြူးရောင်းချခြင်း မရှိပါကြောင်း သိရှိရပါသည်။

DOCA(မွန်)

မွန်ပြည်နယ်၊ သထုံခရိုင်၊ ဘီးလင်းမြို့နယ်၊ စားသုံးသူရေးရာဦးစီးဌာန မြို့နယ် တာဝန်ခံရုံးမှ ဝန်ထမ်းများသည် (၉.၁.၂၀၂၅) ရက်နေ့ နံနက် (၈:၀၀) နာရီအချိန်တွင် ဘီးလင်းမြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ Community Centre ခန်းမ၌ မြို့နယ်ရဲတပ်ဖွဲ့၊ မြို့နယ်အမျိုးသမီးရေးရာအဖွဲ့ဝင်များနှင့် မြို့နယ်ပြန်ကြားရေးနှင့်ပြည်သူ့ ဆက်ဆံရေးဦးစီးဌာနတို့ ပူးပေါင်း၍ အသိပညာပေးဟောပြောပွဲ ကျင်းပပြုလုပ်ခဲ့ပါသည်။

အဆိုပါ ဟောပြောပွဲတွင် မြို့နယ်ရဲတပ်ဖွဲ့ဝင် လွန်းသဒ္ဒါအောင် (ဒုရဲအုပ်)နှင့် အမျိုးသမီးရေးရာအဖွဲ့ဝင် ဒေါ်ရွှေစန္ဒာထွန်းစိုးတို့မှ လူကုန်ကူးမှုအကြောင်း အသိပညာပေး ဟောပြောခြင်း၊ လူကုန်ကူးမခံရအောင် ကြိုတင်ကာကွယ်ရမည့် နည်းလမ်းများနှင့် လူကုန်ကူးခံရပါက ဆက်သွယ်တိုင်ကြားနိုင်သည့် နည်းလမ်းများအကြောင်းတို့ကို အသိပညာ ပေး ဟောပြောခဲ့ပြီး စားသုံးသူရေးရာဦးစီးဌာန မြို့နယ်တာဝန်ခံရုံးမှ ဦးစီးမှူး ဒေါ်ဇင်ဖြူဝင်း မှ စားသုံးသူအခွင့်အရေးနှင့် တာဝန်များ၊ ကုန်အညွှန်းအမှတ်အသားများအကြောင်းနှင့် စားသုံးသူများ နစ်နာဆုံးရှုံးမှုများ ဖြစ်ပေါ်လာပါက ဖြေရှင်းနိုင်မည့်နည်းလမ်းများကို ဟောပြောဆွေးနွေးခဲ့ပါသည်။ အဆိုပါ ဟောပြောပွဲသို့ (အ.ထ.က) ဘီးလင်းမှ ကျောင်းသား/ ကျောင်းသူ (၃၅)ဦး၊ မြို့နယ်အမျိုးသမီးရေးရာအဖွဲ့ဝင် (၁၅) ဦးတို့ တက်ရောက်ခဲ့ပြီး တက်ရောက်လာကြသော ကျောင်းသား/ကျောင်းသူလေးများကို မြို့နယ်အမျိုးသမီရေးရာ အဖွဲ့ဝင်များနှင့် စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ ဝန်ထမ်းများမှ အသိပညာပေး လက်ကမ်းစာစောင်များကို ဖြန့်ဝေပေးခဲ့ကြောင်း သိရသည်။

DOCA(မွန်)

၇.၁.၂၀၂၅ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ မော်လမြိုင်ခရိုင်ဦးစီးမှူး ဒေါ်ဝါဝါမြိုင် နှင့် ဝန်ထမ်းများသည် Online Sales မှတ်ပုံတင်ထားသော ထာဝရ Online Sale လုပ်ငန်းသို့ မှတ်ပုံတင်လျှောက်ထားရာတွင် ဖော်ပြထားသော အချက်များနှင့် မြေပြင်အချက်အလက်များ ကိုက်ညီမှု ရှိ/မရှိ ကွင်းဆင်း စစ်ဆေးခြင်းဆောင်ရွက်ခဲ့သည်။

ထိုသို့ ကွင်ဆင်းစစ်ဆေးခဲ့ရာ Online Sales မှတ်ပုံတင်ရာတွင် ထည့်သွင်းလျှောက်ထားလာသည့် အချက်များဖြစ်သည့် (၁)မှတ်ပုံတင်မည့်လုပ်ငန်းအမည် မှန်ကန်မှု၊ (၂)လုပ်ငန်းတည်ရှိရာလိပ်စာ မှန်ကန်မှု၊ (၃)လုပ်ငန်းသို့ဆက်သွယ်ရန် ဖုန်းနံပါတ် မှန်ကန်မှု၊ (၄)လုပ်ငန်း၏Logo၊ (၅)ကုမ္ပဏီမှတ်ပုံတင်(ရှိပါက)၊ (၆)SMEမှတ်ပုံတင်အမှတ် (ရှိပါက)၊ (၇)လုပ်ငန်းပိုင်ရှင်အမည်မှန်ကန်မှု၊ (၈)လုပ်ငန်းပိုင်ရှင်၏လိပ်စာမှန်ကန်မှု၊ (၉)လုပ်ငန်းပိုင်ရှင်၏ဖုန်းနံပါတ်မှန်ကန်မှု၊ (၁၀)လုပ်ငန်းပိုင်ရှင်၏မှတ်ပုံတင် မှန်ကန်မှု၊ (၁၁)နိုင်ငံသား/နိုင်ငံခြားသား မှန်ကန်မှု၊ (၁၂)မှတ်ပုံတင်လက်မှတ်လျှောက်ထားသူ၏ အကျင့်စာရိတ္တကောင်းမွန်ကြောင်း၊ အမည်ပျက်စာရင်း (Black List) တွင်ပါဝင်ခြင်း မရှိကြောင်းထောက်ခံချက်၊ (၁၃)ရောင်းချနေသည့်ကုန်ပစ္စည်း/ ဝန်ဆောင်မှုအုပ်စု (တင်ပြစဉ် က ကုန်ပစ္စည်းအုပ်စု အတိုင်းကိုက်ညီမှု ရှိ/မရှိ)၊ (၁၄)ရောင်းချနေသည့် ကုန်စည်/ဝန်ဆောင်မှု သည်ဥပဒေတစ်ရပ်ရပ်အရ တားမြစ်ထားသော(သို့) ကန့်သတ်ထားသော ကုန်စည် ဟုတ်/မဟုတ် (သို့)ဥပဒေတစ်ရပ်ရပ်နှင့် ငြိစွန်းခြင်းရှိ/မရှိ ၊ (၁၅)ကုန်စည်အလိုက် သက်ဆိုင်ရာဌာနများ၏ ထောက်ခံချက်/ ညွှန်ကြားချက်များနှင့် ကိုက်ညီမှုရှိ/မရှိ၊ (၁၆)ရောင်းချနေသောကုန်စည်သည် ကိုယ်ပိုင်ထုတ်ကုန် ဟုတ်/မဟုတ်၊ (၁၇)ရောင်းချနေ သောကုန်စည်တွင် ပြည်တွင်း၌ထုတ်လုပ်/ တင်သွင်းဖြန့်ဖြူးသည့် ကုမ္ပဏီ၏ လိပ်စာပြည့်စုံစွာ ပါဝင်ခြင်းရှိ/မရှိနှင့် (၁၈)ရောင်းချနေသော ကုန်စည်/ ဝန်ဆောင်မှုနှင့် စပ်လျဉ်း၍ အခြားစိစစ်တွေ့ရှိချက်များ ဟူသောအချက်(၁၈)ချက်နှင့် ကိုက်ညီမှုရှိ/မရှိ ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(မွန်)

မွန်ပြည်နယ်တွင် ရော်ဘာစိုက်ပျိုးဧက ငါးသိန်းကျော်မှ ၉၀ ရာခိုင်နှုန်းသည် လုပ်ကွက်ငယ် ခြံငယ်ရှင်းများဖြစ်ပြီး ခြံကြီး၊ ခြံလတ်များနှင့် ကုမ္ပဏီစိုက်ခင်းများမှာ ၁၀ ရာခိုင် နှုန်းအောက် စိုက်ပျိုးထားရှိ၍ ရော်ဘာအစေးခြစ်ဧက သုံးသိန်းကျော်ရှိသည်။

မွန်ပြည်နယ်တွင် ရော်ဘာကဏ္ဍဖွံ့ဖြိုးတိုးတက်စေရေး၊ အထွက်နှုန်းနှင့် အရည်အသွေး မြင့်မားစေရေးနှင့် တန်ဖိုးမြှင့်ထုတ်ကုန်များ ထုတ်လုပ်နိုင်ရန်အတွက် တာဝန်ရှိသူများက ကြိုးစားဆောင်ရွက်လျက်ရှိသည်။ ထို့အပြင် အသေးစား၊ အငယ်စားနှင့် အလတ်စား စီးပွားရေး (MSME)လုပ်ငန်းများ ဖွံ့ဖြိုးစေရန် ရော်ဘာပင်အိုများအား ခုတ်လှဲပြီး တန်ဖိုးမြှင့်ထုတ်ကုန်ဖြင့် ရော်ဘာသစ်၊ ပရိဘောဂ၊ သစ်ပါးလွှာ၊ အထပ်သားလုပ်ငန်းများ ထုတ်လုပ်လျက်ရှိသည်။ မွန်ပြည်နယ်အတွင်း ရော်ဘာသစ်ခွဲသား၊ သစ်ပါးလွှာစက်ရုံ (၂၃) ရုံရှိပြီး ၂၀၂၃ - ၂၀၂၄ ခုနှစ်တွင် ရော်ဘာသစ်ခွဲသား၊ သစ်ပါးလွှာ (၂၂၉၀၆၁)တန် ထုတ်လုပ်နိုင်ခဲ့ကြောင်း သိရှိရသည်။

မွန်ပြည်နယ်တွင် ထုတ်လုပ်ရောင်းဝယ်နေကြသည့် ရော်ဘာအမျိုးအစားများမှာ RSS ၊ MSR စသည့် အမျိုးအစားများဖြစ်ပြီး ပြည်နယ်အတွင်း ရော်ဘာလုပ်ငန်း လုပ်ကိုင်နေသည့် မှိုင်ရုံ၊ ခရမ့်ရော်ဘာစက်ရုံ၊ တာယာစက်ရုံ၊ သရေးကွင်း၊ ပူဖောင်း၊ ဘောလုံး၊ ဖိနပ်လုပ်ငန်းများမှ တန်ချိန် ၁၅၀၀၀ ခန့်သုံးစွဲရာ ပြည်တွင်းသုံးစွဲမှုမှ ပိုလျှံသော ရော်ဘာများကို ပုဂ္ဂလိက ဝယ်လက်များမှတစ်ဆင့် ရော်ဘာအဝယ်ဒိုင်များက စုစည်းကာ ရန်ကုန်၊ မန္တလေး ကုမ္ပဏီကြီးများထံသို့ တင်ပို့ပြီး ပြည်ပနိုင်ငံများသို့ တင်ပို့ရောင်းချကြကြောင်း သိရသည်။

DOCA(မွန်)