စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံး အစည်းအဝေးခန်းမ၌ ၂၀၂၅ ခုနှစ်၊ နိုဝင်ဘာလ (၁၁)ရက်နေ့၊ နံနက်(၁၀:၀၀)နာရီအချိန်တွင် “ဆီထွက်သီးနှံပိုမိုစိုက်ပျိုးထုတ်လုပ်နိုင်ရေးနှင့် စားသုံးဆီ ပိုမိုကြိတ်ခွဲထုတ်လုပ်နိုင်ရေး အလုပ်ရုံဆွေးနွေးပွဲ ” ကို ကျင်းပပြုလုပ်ခဲ့ရာ သက်ဆိုင်ရာဌာနဆိုင်ရာ များ၊ ဆီစက်လုပ်ငန်းရှင်များနှင့်တောင်သူ(၆၂)ဦးတက်ရောက်ခဲ့ပါသည်။
အလုပ်ရုံဆွေးနွေးပွဲ ကျင်းပပြုလုပ်ရခြင်းမှာ ဆီထွက်သီးနှံ စိုက်ပျိုးထုတ်လုပ်မှု တိုးတက်မြင့်မားလာပြီး မျိုးကောင်းမျိုးသန့်များ၊ အထွက်ကောင်းမျိုးများ စိုက်ပျိုးထုတ်လုပ်လာနိုင်စေရန်၊ တစ်ဧကအထွက်နှုန်း တိုးတက်လာသည့်နှင့်အမျှ တစ်ယူနစ်ထုတ်လုပ်မှု ကုန်ကျစရိတ် လျော့ချနိုင် ခြင်းဖြင့် မြေပဲဆီ၊ နှမ်းဆီဈေးနှုန်းများ သက်သာလာစေရန်၊ ဒေသတွင်း ဆီစက်များ ခေတ်မီအဆင့်မြင့် ဆီစက်များ ဖြစ်ပေါ်လာစေရန်၊ ကျန်းမာရေးနှင့် ညီညွတ်သောအရည်အသွေးမီ စားသုံးဆီများ ကြိတ်ခွဲ ထုတ်လုပ်လာနိုင်စေရန်နှင့် မြေပဲဆီ၊ နှမ်းဆီများကို ပြည်တွင်းဈေးကွက်သာမက ပြည်ပဈေးကွက်ထိ ရရှိနိုင်ရေး ကြိုးပမ်းဆောင်ရွက်ရန် ရည်ရွယ်ပါသည်။
စားသုံးသူရေးရာဦးစီးဌာန၊တိုင်းဒေသကြီးဦစီးမှူး၊ ဦးမြင့်ဝင်းမှ အဖွင့်အမှာစကားပြောကြား ပြီးနောက် စားသုံးသူရေးရာဦးစီးဌာန၊ပြည်ခရိုင်ဦးစီးမှူး ဦးမင်းဆွေမှ ခရိုင်အတွင်း ဆီထွက်သီးနှံများ စိုက်ပျိုးထုတ်လုပ်နေမှု အခြေအနေ၊ ဆီကြိတ်ခွဲထုတ်လုပ်နေမှုအခြေအနေနှင့် စားသုံးဆီဖူလုံမှုအခြေ အနေများကို ရှင်းလင်းဆွေးနွေးခဲ့ပါသည်။
ထို့နောက် စူပါထွဏ်း စိုက်ပျိုးရေးနှင့်သွင်းအားစုကုမ္ပဏီမှ MD ဦးဇော်မင်းထွန်းက မျိုးကောင်း မျိုးသန့်ရွေးချယ်စိုက်ပျိုးနိုင်ရေးနှင့် ခေတ်မီစိုက်နည်းစနစ်များအကြောင်းဖြင့်လည်းကောင်း၊ ခရိုင် အစားအသောက်နှင့်ဆေးဝါးကွပ်ကဲရေးဦးစီးဌာန၊ခရိုင်ဦးစီးမှူး ဦးအောင်လှိုင်ဝင်းမှ FDA ထောက်ခံ ချက်လက်မှတ်လျှောက်ထားရာတွင်လိုအပ်သည့် သတ်မှတ်ချက်များအကြောင်း၊ ပူးတွဲတင်ပြရမည့် စာရွက်စာတမ်းများ၊ဆောင်ရွက်ထားရှိရမည့် စည်းမျဉ်းစည်းကမ်းများအကြောင်းဖြင့်လည်းကောင်း၊ ခရိုင်စက်မှုကြီးကြပ်ရေးနှင့်စစ်ဆေးရေးဦးစီးဌာန၊ခရိုင်ဦးစီးမှူး ဒေါ်ညိုညိုမြင့်မှ MSMEs ချေးငွေဆိုင် ရာလုပ်ငန်းများအကြောင်း၊ ချေးငွေရယူရာတွင် လိုက်နာရမည့်အချက်များနှင့် ပေးချေရသည့် အတိုး နှုန်းများအကြောင်းဖြင့်လည်းကောင်း၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မြန်မာ့ အရည်အသွေးစမ်းသပ်စစ်ဆေးရေးဌာန၏ လက်ထောက်ညွှန်ကြားရေးမှူး ဒေါ်အိအိချောမှ ကျန်းမာရေး အတွက်ထိန်းသိမ်းရမည့် စားသုံးဆီအရည်အသွေးများအကြောင်းဖြင့်လည်းကောင်း Power Point များရှင်းလင်းဆွေးနွေးခဲ့ကြပါသည်။
ထိုသို့ ရှင်းလင်းဆွေးနွေးပြီးနောက် တက်ရောက်လာသော ဌာနဆိုင်ရာများ၊ ဆီစက်လုပ်ငန်းရှင် များ၊ တောင်သူများပူးပေါင်း၍ ဆီထွက်သီးနှံများ ပိုမိုစိုက်ပျိုးထုတ်လုပ်နိုင်ရေးနှင့် ဆီစက်လုပ်ငန်းရှင် များ၏ အခန်းကဏ္ဍခေါင်းစဉ်ဖြင့်လည်းကောင်း၊ ဆီထွက်သီးနှံမျိုးကောင်းမျိုးသန့်ရရှိရေးနှင့် စိုက်နည်း စနစ်သွင်းအားစုများ မှန်ကန်စွာအသုံးချတက်စေရေးခေါင်းစဉ်ဖြင့်လည်းကောင်း၊ ကျန်းမာရေးနှင့် ညီညွတ်သော စားသုံးဆီများထုတ်လုပ်နိုင်ရေးခေါင်းစဉ်ဖြင့်လည်းကောင်း၊ ဆီစက်များဖွံ့ဖြိုးတိုးတက် ရေးအတွက်စိန်ခေါ်မှုနှင့်လိုအပ်ချက်များခေါင်းစဉ်ဖြင့်လည်းကောင်း စားပွဲဝိုင်းဆွေးနွေးပွဲ ဆောင်ရွက် ခဲ့ပြီး ဖော်ထုတ်ချက်(၆)ချက်ရရှိခဲ့ကြောင်းသိရှိရပါသည်။
စားပွဲဝိုင်းဆွေးနွေးပွဲမှ ရရှိသော ဖော်ထုတ်ချက်(၆)ချက်မှာ-
(က) တောင်သူများအတွက် အာမခံချက်ရှိသော အခြေခံကြမ်းခင်းဈေးသတ်မှတ်ပေးရန်။
( ခ) ထွက်ရှိလာသောသီးနှံများကို ဈေးနှုန်းအာမ မခံသော်လည်း ဒေသကာလပေါက်ဈေး
ဖြင့် ဆီစက်များမှ ဝယ်ယူပေးရန်။
( ဂ) သက်ဆိုင်ရာဌာနဆိုင်ရာများ၊ ပုဂ္ဂလိက လုပ်ငန်းရှင်များမှ တောင်သူများ မိရိုးဖလာစိုက် နည်းအစွဲများပျောက်စေရေး တောင်သူပညာပေးစိုက်ခင်းများ ဆောင်ရွက်ပေးရန်။ (Demonstrated Farm)
(ဃ) ကျန်းမာရေးနှင့်ညီညွတ်သော စားသုံးဆီများ ထုတ်လုပ်နိုင်ရေးအတွက် ဆီစက်လုပ်ငန်း ရှင်များအနေဖြင့်လည်း သန့်ရှင်းလတ်ဆက်သော ကုန်ကြမ်းများကိုကြိတ်ခွဲထုတ်လုပ်၍ လက်လီ/လက်ကားရောင်းချသူများမှလည်း အရည်အသွေးထိန်းသိမ်းရောင်းချနိုင်ရေး ပညာပေးဆောင်ရွက်သွားရန်။
( င) စားအုန်းဆီတင်သွင်းမှု လျော့ချပေးရန်နှင့် ပြည်ပသို့ ဆီထွက်သီးနှံများ ကုန်ကြမ်း အတိုင်း တင်ပို့မှုလျော့ချပေးရန်။
( စ) ကြိတ်ခွဲရရှိသည့် စားသုံးဆီများအား ပြည်တွင်းဈေးကွက်၌ ယခုထက်ပိုမို၍ ဈေးကွက် ရရှိလာနိုင်စေရေး ဆောင်ရွက်ပေးရန်တို့ကို ဖော်ထုတ်ရရှိခဲ့ပါသည်။
“ ဆီထွက်သီးနှံ ပိုမိုစိုက်ပျိုးထုတ်လုပ်နိုင်ရေးနှင့် စားသုံးဆီ ပိုမိုကြိတ်ခွဲထုတ်လုပ်နိုင်ရေး အလုပ်ရုံဆွေးနွေးပွဲ ” မှ ဖော်ထုတ်ရရှိချက်များအား သက်ဆိုင်ရာဌာနများ၊ လုပ်ငန်းရှင်၊ တောင်သူများမှ ပူးပေါင်းအကောင်ထည်ဖော် ဆောင်ရွက်သွားမည်ဖြစ်ကြောင်းသတင်းရရှိပါသည်။
DOCA(ပဲခူး)