အိန္ဒိယနိုင်ငံ ပန်ဂျပ်ပြည်နယ်၌ ရေကြီးမှုများက ဘာစမာတီဆန် အထွက်ထိခိုက်စေနိုင်
အိန္ဒိယနိုင်ငံ ပန်ဂျပ်ပြည်နယ်တွင် မိုးသည်းထန်စွာရွာသွန်းပြီး ရေကြီးရေလျှံမှုများ ဖြစ်ပေါ် ခြင်းက ယခုနှစ် ဘာစမာတီဆန် ထုတ်လုပ်မှုကို ၂၀ မှ ၂၅ ရာခိုင်နှုန်းအထိ လျော့ကျစေဖွယ်ရှိပြီး ကမ္ဘာ့ ဘာစမာတီဆန် ရောင်းလိုအားကို ကန့်သတ်မှုဖြစ်ပေါ်စေလျက် ပို့ကုန်လုပ်ငန်းရှင်များအား ဈေးနှုန်း ပိုမိုမြှင့်တင်ရောင်းချလာစေမည့် အလားအလာရှိနေကြောင်း Hindu Business Line သတင်းဌာနက ဖော်ပြပါသည်။
ပန်ဂျပ်ပြည်နယ် ဆန်စက်လုပ်ငန်းရှင်များနှင့် ပို့ကုန်လုပ်ငန်းရှင်များအသင်းမှ ဒါရိုက်တာ Ashok Sethi က မိုးအဆက်မပြတ် ရွာသွန်းနေမှုကြောင့် သီးနှံများ ထိခိုက်ပျက်စီးမှု ကြီးမားမည်ဟု ခန့်မှန်းရကြောင်း ပြောကြားခဲ့သည်။ ကနဦး အစီရင်ခံတင်ပြချက်များအရ ဘာစမာတီ စပါး စိုက်ခင်းများ ထိခိုက်မှုမှာ ဟက်တာ ၁.၅ သိန်းခန့်ရှိမည်ဟု ဆန်စပါးလုပ်ငန်းနယ်ပယ်ရှိ သတင်း အရင်းအမြစ်များကလည်း ပြောဆိုထားကြသည်။
ပန်ဂျပ်ပြည်နယ် စိုက်ပျိုးရေးဝန်ကြီး Gurmeet Singh Khudian က မိုးသည်းထန်စွာ ရွာသွန်းပြီး ရေကြီးနစ်မြပ်မှုများကြောင့် ပြည်နယ်အတွင်း သီးနှံစိုက်ခင်းများ ပျက်စီးမှုမှာ ဧရိယာ ဟက်တာ ၂.၅ သိန်း (ဧက ၆ သိန်း) ခန့်ရှိနိုင်ကြောင်း၊ အဓိကအားဖြင့် ဘာစမာတီနှင့် ဘာစမာတီ မဟုတ်သော စပါးစိုက်ခင်းများ၊ ဝါစိုက်ခင်းများ ထိခိုက်မှုရှိကြောင်း၊ ပြည်နယ်အစိုးရအနေဖြင့် ဆေးဝါးအထောက်အပံ့များနှင့် လယ်ယာလုပ်ငန်းသုံး ကျွဲနွားများအတွက် တိရစ္ဆာန်အစာများ အပါ အဝင် ကူညီထောက်ပံ့မှုများကို ပေးအပ်ထားရှိကြောင်း၊ ကျေးရွာများစွာသည် ရေနစ်မြုပ်လျက်ရှိ နေဆဲဖြစ်သဖြင့် သီးနှံပမာဏ မည်မျှထိခိုက်မှုရှိသည်ကို အချိန်ယူ ဆန်းစစ်ရမည်ဖြစ်ကြောင်း ပြောဆိုခဲ့သည်။
သီးနှံများ ထိခိုက်ပျက်စီးမှု အများဆုံးဖြစ်ပေါ်သည့် ခရိုင်များမှာ Gurdaspur, Pathankot, Fazilka, Kapurthala, Tarn Taran, Ferozepur, Hoshiarpur နှင့် Amritsar တို့ဖြစ်ကြပြီး ၂၀၂၃ ခုနှစ် စစ်တမ်းများအရ ၎င်းခရိုင် ၈ ခုသည် ပြည်နယ်အတွင်း ဘာစမာတီဆန် ထုတ်လုပ်မှု၏ ၅၂ ရာခိုင်နှုန်းကျော်ကို ပံ့ပိုးပေးလျက်ရှိကြောင်း၊ ၂၀၂၃ ခုနှစ် မိုးသီးနှံရာသီတွင် ပန်ဂျပ်ပြည်နယ်သည် ဘာစမာတီ စပါးစိုက်ဧရိယာ ဟက်တာ ၈.၁၂ သိန်းမှ ဘာစမာတီဆန် တန်ချိန် ၃.၈၄ သန်းကို ထုတ် လုပ်ပေးနိုင်ခဲ့ကြောင်း သိရှိရသည်။ အိန္ဒိယနိုင်ငံသည် ၂၀၂၄-၂၅ ခုနှစ်တွင် ဘာစမာတီဆန် တန်ချိန် ၆.၀၇ သန်းကို တင်ပို့ခဲ့ရာ ပန်ဂျပ်ပြည်နယ်မှ ၄၀ ရာခိုင်နှုန်းခန့် ပါဝင်ခဲ့သည်။
ပန်ဂျပ်ပြည်နယ်တွင် လက်ရှိ မိုးသီးနှံရာသီကာလ၌ ဩဂုတ် ၂၉ ရက်နေ့အထိ စုစုပေါင်း သီးနှံစိုက်ဧရိယာ ဟက်တာ ၃၅.၅၂ သိန်း စိုက်ပျိုးထားရှိပြီး ဘာစမာတီနှင့် ဘာစမာတီမဟုတ် သော စပါးစိုက်ခင်းဧရိယာ ဟက်တာ ၃၂.၄၉ သိန်း၊ ဝါစိုက်ခင်း ဟက်တာ ၁.၁၉ သိန်း၊ ကြံစိုက်ခင်း ဟက်တာ ၀.၉၅ သိန်းနှင့် ပြောင်းသီးနှံ ဧရိယာ ၀.၈၆ သိန်း ပါဝင်လျက်ရှိသည်။
ရေကြီးနစ်မြုပ်မှုဒဏ်ခံရသည့် ပြည်နယ်များရှိ သီးနှံစိုက်ခင်းများ၏ အခြေအနေကို သုံးသပ် ရာတွင် ပန်ဂျပ်ပြည်နယ်ရှိ လယ်သမားများအနေဖြင့် စိုးရိမ်ပူပန်ရန်မလိုကြောင်း၊ ဗဟိုအစိုးရသည် လက်ရှိ သဘာဝဘေးဒဏ်ကို ကြုံတွေ့နေရသည့် ကာလအတွင်း ထိခိုက်မှုရှိသော လယ်သမားများ နှင့်အတူ ရပ်တည်လျက်ရှိပြီး ၎င်းကိုယ်တိုင်လည်း မကြာမီ၌ ပန်ဂျပ်ပြည်နယ်သို့ လာရောက်တွေ့ ဆုံမည်ဖြစ်ကြောင်းဖြင့် ပြည်ထောင်စု စိုက်ပျိုးရေးဝန်ကြီး Shivraj Singh Chouhan က စက်တင် ဘာ ၁ ရက်နေ့တွင် ပြောဆိုခဲ့သည်။
ပို့ကုန်လုပ်ငန်းရှင်များကမူ ဘာစမာတီဆန်ထွက်ရှိမှုမှာ ယခုနှစ်၌ လျော့နည်းမည့် အခြေ အနေအရ ဈေးနှုန်းပိုမိုရရှိလာရန် မျှော်လင့်လျက်ရှိကြသည်။ ဘာစမာတီဆန်ကို စိုက်ပျိုးထုတ် လုပ်သော အခြားနိုင်ငံဖြစ်သည့် ပါကစ္စတန်တွင်လည်း အလားတူပင် ဘာစမာတီစပါးခင်းများ ရေကြီးနစ်မြုပ်မှုနှင့် ကြုံတွေ့ရလျက်ရှိသည်။
ဘာစမာတီဆန် တင်ပို့သူများသည် ၂၀၂၄-၂၅ ခုနှစ်၌ ဆန်ပို့ကုန်တန်ဖိုး တစ်တန်လျှင် ပျမ်းမျှ ၉၈၀ ဒေါ်လာနှုန်း ရရှိခဲ့ကြကြောင်း၊ စပါးစိုက်ခင်းများ ရေနစ်မြုပ်မှုကို ကြုံတွေ့ရမှုမတိုင်မီ ကာလ၌ တစ်တန်လျှင် ပျမ်းမျှ ဒေါ်လာ ၉၀၀ မှ ဒေါ်လာ ၁၀၀၀ အတွင်းဈေးနှုန်းဖြင့် စာချုပ်ချုပ်ဆို ရောင်းချခဲ့ကြကြောင်း၊ ၎င်းနှုန်းထားမှ မကြာမီကာလအတွင်း တစ်တန်လျှင် ဒေါ်လာ ၁၀၅၀ အထိ ခုန်တက်လာဖွယ်ရှိသည်ဟု ကုန်သည်အသိုင်းအဝိုင်းက ပြောဆိုကြကြောင်း Hindu Business Line သတင်းဌာနက ဖော်ပြထားသည်။
Source: The Hindu Business Line, 1 September 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)
