ပြည်ပကုန်သွယ်မှုသတင်းများ

          ကမ္ဘောဒီးယားနိုင်ငံ၊ တော်ဝင်အစိုးရ (RGC) သည် လာမည့်ဆယ်စုနှစ်အတွက် နှစ်စဉ် စီးပွားရေးတိုးတက်မှုနှုန်းသည် ပျမ်းမျှ ၆.၅ ရာခိုင်နှုန်းအထိ တိုးတက်လာနိုင်ကြောင်း  ၄-၃-၂၀၂၅ ရက်နေ့ကထုတ်ပြန်ခဲ့သည်။ စီးပွားရေးတိုးတက်ရေး အကောင်းအထည်ဖော်ရန် တိကျသောမူဝါဒများနှင့် လက်တွေ့ကျသောမူဝါဒများဖွဲ့စည်းခြင်းဖြင့်သာ ထိရောက်မှုရှိနိုင်မည် ဟု ဝန်ကြီးချုပ် Hun Manet က ဖနွမ်းပင်မြို့တွင်ကျင်းပပြုလုပ်ခဲ့သော ‘Cambodia Outlook Conference 2025’ ညီလာခံအတွင်း အလေးပေးပြောကြားခဲ့သည်။ ရေတိုနှင့် အလယ်အလတ် ကာလများတွင် စီးပွားရေးတိုးတက်နှုန်းသည် နှစ်စဉ်ပျမ်းမျှ ၆.၅ ရာခိုင်နှု်နးအထိ ဆက်လက် တိုးတက်နိုင်မည်ဟု ကမ္ဘောဒီးယားအစိုးရမှခန့်မှန်းထားကြောင်း ဝန်ကြီးချုပ် က ပြောကြားခဲ့ သည်။ သို့သော် ဤတိုးတက်မှုသည် သဘာဝအတိုင်းဖြစ်ပေါ်လာမည် မဟုတ် သော်လည်း အဓိကမူဝါဒများနှင့် ပြုပြင်ပြောင်းလဲရေးများကို အကောင်အထည်ဖော်ရန် သက်ဆိုင်ရာ ဝန်ကြီးဌာနများ၊ အဖွဲ့အစည်းများနှင့် ဖွံ့ဖြိုးတိုးတက်ရေးမိတ်ဖက်အဖွဲ့အစည်းများမှ စုပေါင်း ကြိုးပမ်းမှုများ လိုအပ်မည်ဖြစ်ကြောင်း ထပ်မံပြောကြားခဲ့သည်။ ညီလာခံသို့ စီးပွားရေးနှင့် ဘဏ္ဍာရေးဝန်ကြီး Aun Pornmoniroth၊ ကမ္ဘောဒီးယားနိုင်ငံ၊ ဖွံ့ဖြိုးတိုးတက်ရေးကောင်စီ (CDC) ၏ ဥက္ကဋ္ဌ Sun Chanthol နှင့် ကမ္ဘောဒီးယားနိုင်ငံ၊ အမျိုးသားဘဏ်၏ အုပ်ချုပ်ရေးမှူး Chea Serey တို့ တက်ရောက်ခဲ့ကြသည်။ လူမှုစီးပွားရေးပညာရှင် Chey Tech က လက်ရှိ ဖြစ်ပေါ်နေသော ကမ္ဘာလုံးဆိုင်ရာတင်းမာမှုများနှင့် စီးပွားရေးမသေချာမှုများကြောင့် တိုးတက်မှု၏ ၀.၂ ရာခိုင်နှုန်း ခန့်လျော့ကျနိုင်ကြောင်းပြောကြားခဲ့သည်။ သိုသော်လည်း အလတ်စားနှင့် တန်ဖိုးမြင့်စက်မှုလုပ်ငန်းများ၊ အထည်ချုပ်လုပ်ငန်းနှင့် ကုန်ထုတ်လုပ်မှု ကဏ္ဍများသည် နိုင်ငံတော်စီးပွားရေး၏ အဓိကမောင်းနှင်အားများဖြစ်ကြောင်းနှင့် အသေးစား၊ အငယ်စားနှင့်အလတ်စား စီးပွားရေးလုပ်ငန်းများ(MSMEs) နှင့်အတူ လူမှုစီးပွားဖွံ့ဖြိုး တိုးတက် ရေး၏ အဓိကဏ္ဍိုင်များဖြစ်သောကြောင့် ဆောက်လုပ်ရေး၊ အိမ်ခြံမြေ၊ ခရီးသွား လုပ်ငန်းနှင့် စိုက်ပျိုးရေးကဏ္ဍများ ဖွံ့ဖြိုးတိုးတက်ရေးတို့ကို အလေးထားဆောင်ရွက်သင့်ကြောင်း ဆက်လက် ပြောကြားခဲ့သည်။

DOCA(ရန်ကုန်)

          ကမ္ဘောဒီးယားနိုင်ငံ၊ ဖွံ့ဖြိုးတိုးတက်ရေးကောင်စီ(CDC) ၏ ဥက္ကဋ္ဌ Sun Chanthol က ကမ္ဘောဒီးယားနိုင်ငံ၏ အပြုသဘောဆောင်သောအလားအလာများကို ရင်းနှီးမြှုပ်နှံရန် ထည့်သွင်းစဉ်းစားရန် အမေရိကန်စီးပွားရေးကိုယ်စားလှယ်အဖွဲ့အား ပြောကြားခဲ့သည်။ ကယ်လီဖိုးနီးယားပြည်နယ်မှ ဂုဏ်ထူးဆောင်ကောင်စစ်ဝန်ချုပ် Kim Chha Hout ဦးဆောင် သည့် ကိုယ်စားလှယ်အဖွဲ့နှင့် ကယ်လီဖိုးနီးယားရှိ ကမ္ဘောဒီးယား၊ ကုန်သည်ကြီးများအသင်း ဥက္ကဋ္ဌနှင့် ကုန်သည်ကြီးများအသင်း ကိုယ်စားလှယ်အဖွဲ့တို့ ၄-၃-၂၀၂၅ ရက်နေ့ကတွေ့ဆုံစဉ် Chanthol ကပြောကြားခဲ့ခြင်းဖြစ်သည်။ Chanthol က ကမ္ဘောဒီးယားနိုင်ငံ၏ တိုးတက်လာနိုင် သော အလားအလာများကို ထည့်သွင်းစဉ်းစားပြီး ရင်းနှီးမြှုပ်နှံကြရန် အကြောင်းပြချက် ဖြစ်သည့် ကမ္ဘောဒီးယားနိုင်ငံ၏ အပြုသဘောဆောင်သော တည်နေရာနှင့် ပြန်လည်ပြည့်ဖြိုးမြဲ စွမ်းအင် အရင်းအမြစ်၊ နိုင်ငံရေးတည်ငြိမ်မှု၊ စီးပွားရေးတည်ငြိမ်မှု၊ လုပ်သားအင်အား တောင့်တင်းမှု၊ အစိုးရ၏ ပံ့ပိုးကူညီမှုနှင့် ဖွံ့ဖြိုးတိုးတက်လာနေသည့် ထောက်ပံ့ပို့ဆောင်ရေး အခြေခံအဆောက်အအုံများ ကိုထည့်သွင်းစဉ်းစားရန်လိုအပ်ကြောင်း ပြောကြားခဲ့သည်။ အမေရိကန် ကိုယ်စားလှယ်အဖွဲ့သည် ကမ္ဘောဒီးယားနိုင်ငံ၏ တိုးတက်မှုအပေါ် ကျေနပ်အားရမှု ရှိကြောင်းနှင့် ပုဂ္ဂလိက ကဏ္ဍကို ပံ့ပိုးကူညီရာတွင် အစိုးရနှင့် ကမ္ဘောဒီးယားနိုင်ငံ၊ ဖွံ့ဖြိုး တိုးတက်ရေးကောင်စီ(CDC) ကိုယ်တိုင်၏ အာရုံစိုက်မှုကို အထူး ကျေးဇူးတင်ရှိပြီး အထူးသဖြင့် ကယ်လီဖိုးနီးယားနှင့် ကမ္ဘောဒီးယားနိုင်ငံတို့အကြား ပူးပေါင်းဆောင်ရွက်မှု ပိုမိုအားကောင်း လာစေရန်အတွက် အလာအလာများကို လေ့လာလိုကြောင်း ထုတ်ဖော်ပြောကြားခဲ့သည်။

DOCA(ရန်ကုန်)

          ထိုင်းအစိုးရသည် ထိုင်းနှစ်သစ်ကူးပွဲတော်အခမ်းအနားများအတွက် ဘတ် ၁၅၃ သန်း သုံးစွဲနည်ဖြစ်ပြီး ခရီးသွားများသုံးစွဲမှုမှ ဝင်‌ငွေ ဘတ် ၃ ဘီလီယံ ရရှိရန် မျှော်လင့်လျှက် ရှိကြောင်း သိရပါသည်။ ထိုင်းအထက်လွှတ်တော်က ဝန်ကြီးချုပ် Paetongtarn Shinawatra သည် ခရီးသွားနှင့် အားကစားဝန်ကြီးဌာနအား လာမည့်လတွင် ကျင်းပမည့် ဆွမ်ခရန်ပွဲတော် အတွက် ငွေကြေးအသုံးပြုရန် ခွင့်ပြုခဲ့ကြောင်း မတ်လ ၃ ရက်နေ့က ပြောကြားခဲ့ပါသည်။ မဟာဆွမ်ခရန်ကမ္ဘာ့ရေကစားပွဲ‌တော် ၂၀၂၅ ကို Sanam Luang တွင် ဧပြီလ ၁၁-၁၅ ရက်ထိ ကျင်းပပြုလုပ်သွားမည်ဟု ထိုင်းနိုင်ငံခရီးသွားအာဏာပိုင် အဖွဲ့၏အဆိုအရ သိရပါသည်။  ထိုင်းအထက်လွှတ်တော်က ထိုပရိုဂရမ်သည် ခရီးသွာကဏ္ဍကိုမြှင့်တင် ပေးပြီး ပြည်တွင်းနှင့် ပြည်ပခရီးသွား ၈၀၀၀၀၀ ကပွဲတော်အခမ်းအနားများကို ပါဝင်ဆင်နွှဲကာ ဝင်ငွေဘတ် ၃.၂ ဘီလီယံ သုံးစွဲမည်ဟု မျှော်လင့်ရကြောင်း သိရပါသည်။

DOCA(ရန်ကုန်)

          အင်ဒိုနီးရှားနိုင်ငံလူအင်အားဝန်ကြီးဌာန ဒုတိယဝန်ကြီးဖြစ်သူ Immanuel Ebenezer Gerungan က မကြာခင် အလုပ်အကိုင် အနည်းဆုံး ၅၈၀၀၀ ဖန်တီးနိုင်မည်ဖြစ်ကြောင်းနှင့် ကမ္ဘာလုံးဆိုင်ရာမသေချာ မရေရာမှုများရှိနေသော်လည်း ထိုအချက်သည် အပေါင်းလက္ခဏာ ဆောင်သည့် ဖွံ့ဖြိုးတိုးတက်မှု ဖြစ်ကြောင်း သိရပါသည်။ အလုပ်အကိုင် ၁၀၀၀၀ ခန့်ကို အနောက်ဂျာဗားတွင် အသစ်ဖွင့်လှစ်သည့် ဖိနပ် ထုတ်လုပ်သည့် Ultimate Noble Indonesia ကဖန်တီးလိမ့်မည်ဖြစ်ပြီး ကျန်သည့် ၄၈၀၀၀ ကို အခြားကုမ္ပဏီ ၂ ခုက ဖန်တီးပေးနိုင်မည်ဟု သိရပါသည်။ Gerungan ကတရုတ်ကားကုမ္ပဏီ BYD သည် လတ်တလောတွင် အနောက် ဂျာဗားရှိ Subang တွင် အလုပ်အကိုင် ၁၈၀၀၀ ဖန်တီးပေးနိုင်သည့် စက်ရုံတည်ဆောက် လျှက်ရှိကြောင်း သိရပါသည်။ ထို့ပြင် Huawei Technologies ကတည်ဆောက်မည့် စက်ရုံသည် အလုပ်အကိုင်အခွင့်အလမ်းအနည်းဆုံး ၃၀၀၀၀ ဖန်တီးပေးနိုင်မည်ဟု သိရပါသည်။ အဝတ်အထည်ထုတ်လုပ်သည့် Sritex သည်လည်း ဖေဖော်ဝါရီနှောင်းပိုင်းတွင် လုပ်သားသစ်များ ထပ်မံ ငှားရမ်းရန်စီစဉ်နေကြောင်း သိရပါသည်။ လတ်တလောတွင် Ultimate Noble Indonesia သည် လုပ်သား ၁၁၀၀ ခန့်အပ်ထားပြီး မကြာမီအချိန်အတွင်း ၄၀၀၀ ထိ မြှင့်တင် သွားရန် စီစဉ်နေကြောင်း သိရပါသည်။ Gerungan ကအင်ဒိုနီးရှား၏စီးပွားရေးမျှော်မှန်းချက် နှင့်ပတ်သတ်၍ ဆက်လက်အကောင်းမြင်ကြရန် သက်ဆိုင်ရာစီးပွားရေးလုပ်ငန်းများအား တိုက်တွန်းခဲ့ကြောင်း သိရပါသည်။

DOCA(ရန်ကုန်)

          ဖေဖော်ဝါရီလတွင် ဗီယက်နမ်သည် စိုက်ပျိုးမွေးမြူရေး-သစ်တော-ရေထွက်ကုန် တင်ပို့မှုမှတစ်ဆင့် ဝင်ငွေအမေရိကန်‌ဒေါ်လာ ၄.၄ ဘီလီယံ ရရှိခဲ့ပြီး ၂၀၂၄ ခုနှစ် ဖေဖော်ဝါရီ လထက် ၃၇.၂ ရာခိုင်နှုန်း မြင့်တက်ခဲ့ကာ ယခုနှစ်၏ပထမနှစ်လတွင် ထိုကဏ္ဍမှတစ်ဆင့် စုစုပေါင်း ဝင်ငွေ အမေရိကန်ဒေါ်လာ ၉.၃၈ ဘီလီယံ ရရှိခဲ့ပြီး ၂၀၂၄ ခုနှစ် ပထမနှစ်လထက် ၈.၃ ရာခိုင်နှုန်းမြင့်တက်ခဲ့ကြောင်း စိုက်ပျိုးမွေးမြူရေးနှင့် သဘာဝပတ်ဝန်းကျင်ဝန်ကြီးဌာန (MoAE)၏ အဆိုအရ သိရပါသည်။ ထိုစုစုပေါင်းပမာဏထဲမှ ယခုနှစ်၏ ပထမနှစ်လတွင် စိုက်ပျိုးမွေးမြူရေးထုတ်ကုန်တင်ပို့မှုမှဝင်ငွေ အမေရိကန်ဒေါ်လာ ၄.၈၉ ဘီလီယံ ရရှိခဲ့ပြီး ၄.၅ ရာခိုင်နှုန်းမြင့်တက်ခဲ့ကြောင်း သိရပါသည်။ တိရိစ္ဆာန်မွေးမြူရေးလုပ်ငန်းမှဝင်ငွေ အမေရိကန်ဒေါ်လာ ၇၂.၂ သန်း၊ ရေထွက်ကုန်တင်ပို့မှုမှဝင်ငွေ အမေရိကန်ဒေါ်လာ ၁.၄၂ ဘီလီယံနှင့် သစ်တောထွက် ကုန်တင်ပို့မှုမှဝင်ငွေ အမေရိကန်ဒေါ်လာ ၂.၆၈ ဘီလီယံ ရရှိခဲ့ ကြောင်း သိရပါသည်။ ဆားတင်ပို့မှုမှာ ဝင်ငွေ ၁.၄ သန်းဖြင့် သိသာစွာမြင့်တက်ခဲ့ကြောင်း သိရပါသည်။ အာရှသည် ဗီယက်နမ်၏ စိုက်ပျိုးမွေးမြူရေး-သစ်တော-ရေထွက်ကုန်တင်ပို့ရာ အကြီးမားဆုံးဈေးကွက်ဖြစ်ပြီး စုစုပေါင်းတင်ပို့မှုတန်ဖိုး၏ ၄၂.၂ ရာခိုင်နှုန်းရှိကြောင်း သိရပါ သည်။ ၎င်း၏နောက်တွင် အမေရိကနှင့်ဥရောပက စုစုပေါင်းတင်ပို့မှုတန်ဖိုး၏ ၂၄.၂ ရာခိုင်နှုန်းနှင့် ၁၅.၅ ရာခိုင်နှုန်း အသီးသီးရှိကြောင်း သိရပါသည်။ အာဖရိကနှင့် သမုဒ္ဒရာပိုင်း ဒေသသို့ တင်ပို့မှုမှာ ၂.၉ ရာခိုင်နှုန်းနှင့် ၁.၄ ရာခိုင်နှုန်း အသီးသီး ရှိကြောင်း သိရပါသည်။ အဓိကစိုက်ပျိုးမွေးမြူရေး ထုတ်ကုန်များတွင် ကော်ဖီတင်ပို့မှုမှာ တန်ချိန် ၂၈၄၀၀၀ ဖြင့် အမေ ရိကန်ဒေါ်လာ ၁.၅၈ ဘီလီယံ ရရှိခဲ့ကြောင်း သိရပါသည်။ ဂျာမနီ၊ အီတလီနှင့်ဂျပန်တို့သည် ဗီယက်နမ်ကော်ဖီအတွက် အကြီးမားဆုံး ဈေးကွက်များဖြစ်ကြောင်း သိရပါသည်။ ငရုတ်ကောင်း တင်ပို့မှုမှာ အပေါင်းလက္ခဏာဆောင်ခဲ့ပြီး တန်ချိန် ၂၈၀၀၀ တင်ပို့ရာမှ ဝင်ငွေ အမေရိကန်ဒေါ်လာ ၁၈၈.၇ သန်းရရှိခဲ့ကြောင်း သိရပါသည်။ တစ်ချိန်တည်း မှာပင် ဆန်တန်ချိန် ၁.၁ သန်းတင်ပို့ရာမှ ဝင်ငွေ အမေရိကန်ဒေါ်လာ ၆၁၃ သန်းရရှိခဲ့ကြောင်း သိရ ပါသည်။ သစ်သီးနှင့် ဟင်းသီးဟင်းရွက်တင်ပို့မှုမှ ဝင်‌ငွေ အမေရိကန်ဒေါ်လာ ၇၂၄.၅ သန်း ရရှိခဲ့ကြောင်း သိရပါသည်။ တရုတ်နိုင်ငံသည် ဗီယက်နမ်သစ်သီးနှင့် ဟင်းသီးဟင်းရွက် တင်ပို့ရာအကြီးမားဆုံး ဈေးကွက်အဖြစ်ရပ်တည်နေပြီး ၎င်းတို့နောက်တွင် အမေရိကန်နှင့် ထိုင်းနိုင်ငံတို့က ရပ်တည်နေကြောင်း သိရပါသည်။

DOCA(ရန်ကုန်)