ကမ္ဘာ့ပြောင်းဖူး လက်ကျန်ပမာဏနှင့် သုံးစွဲမှုအပေါ်မူတည်သည့် လက်ကျန်အချိုး (stocks-to-use ratio) သည် သုံးနှစ်အတွင်း ပထမဆုံးအကြိမ်အဖြစ် ပြန်လည်မြင့်တက်လာတော့မည်ဖြစ်ကြောင်း လေ့လာဆန်းစစ်သူတစ်ဦးက ပြောကြားခဲ့သည်။ London Stock Exchange Group မှ စိုက်ပျိုးရေးသုတေသနမန်နေဂျာ Libin Zhou ၏ ပြောကြားချက်အရ အမေရိကန်ပြည်ထောင်စုတွင် ပြောင်းဖူးအထွက်နှုန်း အလွန်ကောင်းမွန်ခြင်းနှင့် တောင်အမေ ရိကတွင် သာယာဝပြောသော ရာသီဥတုအခြေအနေများရှိနေခြင်းတို့ကြောင့် ၂၀၂၅-၂၆ ခုနှစ် အတွင်း ပြောင်းဖူးထုတ်လုပ်မှု တိုးတက်နှုန်းသည် စားသုံးမှုမြင့်တက်လာမည့်နှုန်းကို ကျော် လွန်သွားမည်ဖြစ်ကြောင်း သိရသည်။ သုံးနှစ်ဆက်တိုက် လျော့နည်းခဲ့ပြီးနောက် ယခုနှစ်တွင် ကမ္ဘာ့ပြောင်းဖူး လက်ကျန်ပမာဏ (Carryout) သည် တန်ချိန် ၂၆.၁ သန်းခန့် ပြန်လည် မြင့် တက်လာမည်ဟု ခန့်မှန်းထားကြသည်။ ပြောင်းဖူးဈေးနှုန်းများသည် မုယောစပါး (Barley)၊ ဂျုံ (Wheat) နှင့် အခြားသီးနှံဈေးနှုန်းများအပေါ် ဦးဆောင်လွှမ်းမိုးမှု ရှိနေသည်။ အမေရိကန်၊ ယူကရိန်းနှင့် တရုတ်နိုင်ငံတို့တွင် အထွက်နှုန်း အလွန်ကောင်းမွန်ခြင်း၊ ဘရာဇီး နိုင်ငံတွင်လည်း ထွက်နှုန်းကောင်းမည့် အလားအလာရှိခြင်းတို့ကြောင့် ကမ္ဘာ့ပြောင်းဖူး ထုတ် လုပ်မှု တန်ချိန် ၆၉ သန်းခန့် တိုးတက်လာခြင်းမှာ ယခုအခြေအနေ၏ အကြောင်းရင်း ဖြစ်ကြောင်း Argus Media မှ မကြာသေးမီက ပြုလုပ်ခဲ့သော ဝက်ဘ်ဆိုက်ဆွေးနွေးပွဲ (Webinar) တွင် Libin Zhou က ပြော ကြားခဲ့သည်။ ဥရောပအနောက်ပိုင်းနှင့် အရှေ့တောင်ပိုင်းဒေသများတွင်သာ ပြောင်းဖူးထွက် ရှိမှု လျော့နည်းခဲ့သည့် ဒေသများ ဖြစ်ခဲ့သည်။၂၀၂၅ ခုနှစ် အစပိုင်းမှ နွေရာသီ အနိမ့်ဆုံးဈေးနှုန်း ကာလများအကြား ကမ္ဘာ့ပြောင်းဖူးဈေးနှုန်းများ သည် ၂၀ ရာခိုင်နှုန်းကျော်အထိ ထိုးကျသွားခဲ့ သည်။ ဥရောပတွင် အထွက်နှုန်းနည်းပါးခြင်းနှင့် အမေရိကန်၏ ပို့ကုန်တင်ပို့မှု အားကောင်းခြင်း တို့ကြောင့် ဈေးနှုန်းများ တဖြည်းဖြည်း ပြန်လည်မြင့်တက်လာခဲ့သော်လည်း၊ တောင်အမေရိက တွင် ရာသီဥတုသာယာခြင်းနှင့် ဇန်နဝါရီ လထုတ် 'ကမ္ဘာ့စိုက်ပျိုးရေးဆိုင်ရာ ထောက်ပံ့မှုနှင့် ဝယ်လိုအား ခန့်မှန်းချက်' (WASDE) အစီရင်ခံစာတွင် အမေရိကန်၏ ထုတ်လုပ်မှုကို တိုးမြှင့် ပြင်ဆင်သတ်မှတ်လိုက်ခြင်းတို့ကြောင့် မကြာသေးမီက ဈေးနှုန်းများ ပြန်လည်ကျဆင်းသွားခဲ့ သည်။ မက္ကဆီကို၊ ဂျပန်နှင့် ကိုလံဘီယာကဲ့သို့ ပုံမှန်ဈေးကွက်များသို့ အများအပြား ရောင်းချ ခဲ့ရရုံသာမက ဥရောပသမဂ္ဂ (EU)၊ အရှေ့အလယ်ပိုင်းနှင့် မြောက်အာဖရိကနိုင်ငံများမှလည်း အံ့အားသင့်ဖွယ်ကောင်း လောက်အောင် ဝယ်လိုအား အားကောင်းခဲ့ကြောင်း သိရသည်။ ဘရာဇီး နှင့် အာဂျင်တီးနားနိုင်ငံတို့တွင်လည်း ပို့ကုန်တင်ပို့မှု မြင့်တက်လာမည်ဟု ခန့်မှန်းရသည်။ လူဦးရေတိုးပွားလာ ခြင်း၊ စီးပွားရေးဖွံ့ဖြိုးတိုးတက်လာခြင်းနှင့် ပြောင်းဖူးဈေးနှုန်း သက်သာခြင်း တို့ကြောင့် ကမ္ဘာလုံးဆိုင်ရာ တိရစ္ဆာန်အစာအတွက် ပြောင်းဖူးဝယ်လိုအားမှာ ခိုင်မာလျက်ရှိ သည်။ အမေရိကန်ပြည်ထောင်စု၏ စုစုပေါင်း တိရစ္ဆာန်အစာလိုအပ်ချက်တွင် ပြောင်းဖူးသည် ၉၅ ရာခိုင်နှုန်းအထိ ပါဝင်နေပြီး ကမ္ဘာ့ဒုတိယအကြီးဆုံး ကြက်ဘဲမွေးမြူထုတ်လုပ်သည့် ဘရာဇီး နိုင်ငံတွင်လည်း အဓိက အခန်းကဏ္ဍမှ ပါဝင်နေသည်။ ထို့ပြင် ကမ္ဘာ့အက်သနော (Ethanol) လောင်စာဈေးကွက်မှလည်း ဝယ်လိုအား အလွန်ကောင်းမွန်နေသည်။ ဘရာဇီးနိုင်ငံ စိုက်ပျိုးရေး ဌာန (Conab) ၏ ခန့်မှန်းချက်အရ ယခုနှစ်တွင် ဘရာဇီးလယ်သမားများသည် စံချိန်တင် ဧက ၅၆ သန်းအထိ တိုးမြှင့်စိုက်ပျိုးကြမည်ဖြစ်ရာ ယင်းမှာ အထွက်နှုန်းလျော့နည်း ဆုံးရှုံးမှုများကို ပြန်လည်ကာမိစေရန် အထောက်အကူပြုမည်ဖြစ်သည်။ ၂၀၂၅-၂၆ ခုနှစ် အတွက် ပြောင်းဖူး ထုတ်လုပ်မှု တန်ချိန် ၁၃၈.၉ သန်း ထွက်ရှိမည်ဟု ခန့်မှန်းထားပြီး၊ ယင်းမှာ မနှစ်က ထွက်ရှိခဲ့ သော စံချိန်တင် အများဆုံးပမာဏဖြစ်သည့် ၁၃၉.၇ သန်းပြီးလျှင် ဒုတိယ အမြင့်ဆုံး ထုတ်လုပ်မှု ဖြစ်လာမည်ဖြစ်သည်။ အက်သနောကဏ္ဍမှ ဝယ်လိုအား မြင့်တက်လာခြင်းကြောင့် စုစုပေါင်း ဝယ်လိုအားမှာ တန်ချိန် သန်း ၁၄၀ ခန့်ရှိမည်ဟု ခန့်မှန်းရပြီး ယင်းမှာ မနှစ်ကထက် ၁၀ သန်းခန့် ပိုမိုများပြားနေသည်။ ပြောင်းဖူးမှ အက်သနော ထုတ် လုပ်မှုသည် လွန်ခဲ့သော ၁၀ နှစ်ခန့်က လုံးဝနီးပါး မရှိသလောက်ဖြစ်ခဲ့သော်လည်း ယခုအခါ လီတာ ၁၀ ဘီလီယံအထိ ထွက်ရှိမည်ဟု ခန့်မှန်းထားကြသည်။ တောင်အမေရိက၏ ရာသီ ဥတုအခြေအနေနှင့် အမေရိကန်၏ စိုက်ပျိုးရန် ရည်ရွယ်ချက် (Planting intentions) တို့သည် ပြောင်းဖူးဈေးနှုန်းအပေါ် လွှမ်းမိုးမှုရှိလိမ့်မည်ဟု Zhou က ဆိုသည်။ အမေရိကန် လယ်သမားများသည် ယခုနှစ်တွင် ပြောင်းဖူးဧက ၉၃.၉ သန်းမှ ၉၅ သန်းအထိ စိုက်ပျိုးကြ မည်ဟု Libin Zhou က ခန့်မှန်းထားကြောင်းသိရသည်။
Source : The western producer
DOCA(ရန်ကုန်)